Ana llellipui ñi nieal püñeñ

Elcaná Israel chengefui ca nierquei 2 domo: Ana ca Peniná. Huelu doi piuqueyefi ta Ana. Peniná fentren püñeñ niefui, huelu Ana nielai quiñe no rume. Feimu Peniná ayentuquefeyu. Fill tripantu, Elcaná yequefui tañi familia ngillatuhue tolto ruca mu ñi poyeafiel ta Chau Jehová, Siló huaria mu mülefui. Üye mu, quiñe rupa, Elcaná ngüneduami ñi rume hueñancülen ta Ana.

Ana amui ñi llellipumeal. Af ngümalai, fei llellipufi ta Chau Jehová ñi quelluaeteu. Feipicünufi: “Chau Jehová, eluafen quiñe püñeñ, elungeli, hultuculelayu tami serfiaeteu con tañi mongen mu”.

Ti hunen lonco sacerdote Elí pefi ñi ngümamequen Ana, dungumequefui reque, huelu allcün-ngelai. Feimu ngollilelu troquifi. Fei Ana feipieyu: “Femlan, ñidol, ngollilelan. Rume cutrancaumequen, feimu nütramcalelfiñ ta Chau Jehová”. Elí ngüneduami tañi huesa feipifiel ta Ana, fei feipifi: “Chau Jehová eluaimu tami llellipufiel”. Fei Ana doi cüme duamtui ca amutui. Petu ñi rupanon 1 tripantu, nierpui quiñe püñeñ, Samuel üitucufi. Eimi, ¿raquiduamafuimi fente ñi ayüucülen ta Ana?

Ana loncontucuniefui ñi feipicünufiel ta Chau Jehová. Deu moyolhuenofilu müten ta Samuel, yefi ngillatuhue tolto ruca mu ñi serfiafiel ta Chau Dios. Ana feipifi ta Elí: “Llellipufiñ Chau Jehová ñi eluaeteu tüfachi pichi huentru. Feula hultuculelfiñ ñi serfiaeteu com tañi mongen mu”. Fill tripantu, Elcaná engu Ana pemefingu ta Samuel, fei yelelfingu quiñe hue tacun. Rupalu ta tiempo, Chau Jehová elufi ta Ana 3 huentru püñeñ ca 2 domo püñeñ.