Edén lof, ¿chumngelu falin-ngei eimi mu?

QUIÑEQUE quimche feipiquei caquelu lifru Biblia mu pengelquelai ñi rüf mülequefel Edén lof. Quiñe huentru adümquefilu ti religion dungu, Paul Morris pingelu, huirintucui: “Biblia huiño nütramcalai Edén lof”. Caquelu quimche, ¿ca femngechi raquiduampelaingün? Huelu quimfali ñi rüf mülequefel Edén lof.

Fentren dungu feipilu Biblia pengeli ñi rüf mülequefel Adán, Eva, ti filu ca tati Edén lof.a Huelu doi huesalcai quiñeque loncolechi religioso ca quimche epeu müten troquifilu Edén lof. Femngechi femlu engün caiñetuquefi Biblia ñi feipin.

Rüfcünu llemai, cüme quimnoliyiñ ñi chem rupan Edén lof mu, cüme adümlayafiyiñ ñi chem pin ta Biblia. Tati Biblia huiñoldunguquei ti doi falinque ramtun. Ñi chem rupan Edén lof mu quelluqueiñmu taiñ huiñoldungual feichi ramtun.

● ¿Chumngelu füchaqueiñ ca laqueiñ? Adán engu Eva feyentufule ta Chau Jehová, rumel mongeleafuingu. Huelu feichi feyentuhuenofilu tañi Chau, culpaingu, fei larpuingu (Génesis 2:16, 17; 3:19). Femngechi rulpaleleiñmu com iñchiñ ti culpan dungu. Feimu Biblia feipilei: “Quiñe huentru meu müten mülei ta culpan mapu meu ca femngechi mülei ta lan dungu. Fei tati lan dungu mülei itrocom che meu, itrocom che culpafengelu am” (Romanos 5:12).

● Chau Ngünechen, ¿chumngelu petu apümcalafi ti huesaque dungu? Edén lof mu, Huecüfü coilatufe pifi ta Jehová. Cüpa eluquelafi cümeque dungu tañi pu che pi (Génesis 3:3-5). Feipi ñi cüme ngüneniequenofiel tañi pu che. Adán engu Eva feyentufingu ta Huecüfü, fei quiñepülecünufingu ta Jehová. Femngechi cüpa pengeli engu pu che dulliafui chem ñi cümen ca chem ñi cümenon. ¿Chumi Chau Jehová? Fente tañi quimün-ngen ca tañi femquen nor dungu elufi tati pu che ñi quisu ngüneniehual engün rupalechi tripantu meu. Com ti huesaque dungu ñi mülen Mapu meu pengeli cüme tripaquelai pu che ñi quisu ngünenieuquen (Jeremías 10:23).

● Chau Ngünechen, ¿chumngelu deumai ti mapu? Edén lof pengeli Chau Dios ayüquefui com ti Mapu ñi ayüfalngeal. Feipifi Adán engu Eva ñi nieal yall, fei ñi apolafiel ta Mapu ca ñi cüme elcünutuafiel com ti Mapu. Feimu Chau Ngünechen ayüniei com ti Mapu quiñe ayüfalchi mapungeal (Génesis 1:28). Cafei ayüniei Adán engu Eva ñi cüpanche ñi niehuenoal culpan, ñi ayüucüleal engün ca tañi quiñeucüleal Mapu mu. Epe com ñi feipin Biblia pengeli chumngechi Chau Dios huechunentuafi tañi ayünieel.

● Jesucristo, ¿chumngelu cüpai Mapu mu? Adán engu Eva feyentuhuenofilu ta Chau Dios Edén lof mu, fei engu ca tañi pu cüpanche mülefui ñi layal. Huelu Chau Dios fente tañi piuqueyechen huercüi ñi Fotüm Mapu mu, femngechi taiñ montulaeteu ca taiñ eluaeteu maneluhun (Mateo 20:28). ¿Chumngechi montuleiñmu? Jesús ti “inan Adán” pingei Biblia mu. Huelu femlai Adán reque, doi mai rumel feyentufi tañi Chau, turpu culpalai. Fei tañi femün mu com pu che cüme piuquengelu rulpacünungeafui tañi culpan, fei nieafuingün feichi mongen ñi ñamümel Adán engu Eva (1 Corintios 15:22, 45; Juan 3:16). Feimu llemai, Jesús cüpai Mapu mu ñi huechutripayal Chau Dios ñi ayünieel.b

Chumngechi ngüneduampeiñ, Chau Dios ñi ayünieel cüdaungelai ñi adümngeal. Doi mai rüfngei ca quimfali. Rüf mülefui com ñi mülen Edén mu: ti mapu, pu che ca tati pu culliñ. Ca femngechi Chau Dios ñi feipicünuel rüfngei ca pichin antü meu huechutripayai. Taiñ peafiel, mülei taiñ yafüluucüleal. Chau Dios ayüniei fentren che ñi llohual feichi cümeque dungu, pu püntülefulu cütu. ¿Chumngechi quimnieiñ tüfa? (1 Timoteo 2:3, 4).

Epe lalu Jesús, nütramcafi quiñe huesa che tañi inafül püle mülelu. Feichi huentru mülefui ñi langümngeal, huelu nütramcafi ta Jesús ñi yafülngeal ca tañi nieal maneluhun. Fei Cristo feipieyu: “Trür müleayu ayüfalchi mapu meu” (Lucas 23:43, TNM). Jesús ayüfui quiñe huesa chengefulu ñi rumel mongeleal ti ayüfalchi mapu meu. Feimu doyelchi mai ayüniei com iñchiñ taiñ llohual feichi mongen. Ca femngechi ayüniei Chau Ngünechen. Cüpa llohülmi com ti cümeque dungu ñi feipicünuel Chau Ngünechen, amulepe tami quimfiel ta Chau Jehová, tati deumalu Edén lof.

[Pu quimngeal dungu]

[Huichulechi dungu/​Fillque adentun]

QUIÑE FEIPICÜNUN NÜTRAMCANGEI COM TI BIBLIA MU

“Eimi [filu] tati domo eimu caiñeyehuaimu, ca femngechi [caiñetuhuai tami pu püñeñ ca] tati domo ñi pu püñeñ. Ti domo ñi püñeñ pünoñmayaimeu tami lonco, fei eimi ünatuñmayafimi ñi rüncoi namun” (Génesis 3:15).

Tüfa tati hunen dungu ñi feipicünuel Chau Dios Edén lof mu. Huelu, ¿inei am tati domo, ti filu ca tañi pu püñeñ? ¿Chemu caiñetuuquei engün?

TI FILU

Satanás chi Huecüfü (Apocalipsis 12:9).

TI DOMO

Chau Jehová ñi adcünuelchi cümeque püllü huenu mu mülelu (Gálatas 4:26, 27). Isaías feipicünui tüfachi domo ñi choyüafiel quiñe troquiñche reque (Isaías 54:1; 66:8).

TI FILU ÑI PU PÜÑEÑ

Pu femquelu Huecüfü ñi ayünieel (Juan 8:44).

TI DOMO ÑI PU PÜÑEÑ

Tati doi falin-ngelu, fei ta Jesucristo, tripai Chau Jehová ñi adcünuelchi dungu mu huenu mu mülelu. Tüfa mu ca coneltulei pu dullin cristiano, Cristo ñi pu peñi pingelu. Fei engün dullingei ñi ngünenieal Jesús engün huenu mu ca coneltuleingün “Ngünechen ñi Israel troquiñche” meu (Gálatas 3:16, 29; 6:16; Génesis 22:18).

CHUMNGECHI ÜNATUNGEI ÑI RÜNCOI NAMUN

Mülepalu mapu mu, Jesús langümngei Satanás ñi duam mu. Pichiñmai tüfachi huesa dungu huiñomongeltungelu cai ta Jesús.

CHUMNGECHI PÜNOÑMANGEAI ÑI LONCO

Jesús apümcayafi ta Huecüfü, turpu mülehuetulayai. Huelu hune cüme elcünutuafi com ñi huesa femün ta Huecüfü Edén lof ta fantepu meu (1 Juan 3:8; Apocalipsis 20:10).

Ti folleto Tati Biblia ca tañi huercün dungu pingelu pengeli chem nütramcangei com ti Biblia meu.

[Adentun]

Adán engu Eva rume cutrancahui tañi culpan mu