Chau Dios, ¿quimniepeimu mai?

CHEM QUIMELTUEIÑMEU NGÜNECHEN ÑI DEUMAEL

Raquiduamnge ñi fente cüme yeuquen pu epuntu mür femngechi adtuleingu. Feipiafuiñ pu femngechi choyüngelu doi cüme quiñeucülei caquelu che mu. Quiñe domo trür choyüngelu tañi lamngen engu, Nancy Segal pingelu, adcünuquei quiñe troquiñche ngüneduamquelu pu epuntu ñi femngen. Quisu feipi: “Nütramcaulu pu epuntu cüme adümnieuquei com tañi entuel engu”. Ca quiñe domo famngechi feipi tañi yeuquen tañi epuntuhuen: “Epuñpüle fente cüme quimnieuyu”.

Pu epuntu, ¿chem mu am ta fente cüme yeuqueingu? Pu adümuuquelu feipiquei pu epuntu tañi rupan ca chumngechi ñi tremümngeel engu quellueyu ñi cüme quimuhual, huelu doi mai tañi mür femngen ñi ADNa tañi cuerpu mu.

NGÜNEDUAMNGE: Afmatufali chumngechi taiñ deumaeteu Chau Dios. Quisu eli ta mongen ca huirintucucünui reque caque quiñeque iñchiñ taiñ femngen ca taiñ adngen, feimu fente cüme quimnieiñmeu. Quiñe huentru David pingelu feipi: “Llümumen reque tañi ñuque ñi pütra mu. Com tañi foro ellcalelafui tami adquiñ mu [...]. Tami nge peeneu petu choyüngenolu rume, com tañi troquiñ huiriconcülefui reque tami lifru mu” (Salmo 139:13, 15, 16). Quisu müten cüme quimniei chumngechi ñi femngen taiñ ADN, huelu ca ngüneduamquei com taiñ rupaquefel, feimu cüme quimniei taiñ chumngechi chengen. Afmatufali Chau Dios ñi cüme quimfiel taiñ chumngen ca taiñ chengen, tüfa pengeli quisu taiñ fente cüme quimnieteu.

BIBLIA ÑI FEIPIN CHAU DIOS TAIÑ QUIMNIETEU

David llellipui: “¡Ahuem Jehová! Eimi ngüneduamnieen, ca cüme quimnieen. Eimi quimüñmaen tañi anüquen ca tañi huitraquen. Fütra camapu mu eimi inaduamqueimi tañi raquiduamqueel iñche. Petu ñi mülenon rume quiñe dungun tañi quehun meu, ¡tüfei! Eimi lle Chau Jehová deu cüme quimniefimi” (Salmo 139:1, 2, 4). Jehová ca quimniei ñi chum duamcülen taiñ piuque ca “inaduamquefi pu che ñi raquiduam ca ñi ayüqueel” (1 Crónicas 28:9; 1 Samuel 16:6, 7). ¿Chem quimeltuqueiñmu tüfa?

Taiñ Huenu Chau ngüneduamquelai müten taiñ femün, doi mai quisu quimniei chumngelu taiñ femngechi femquen. Feimu llellipun mu pepi entudungunoliyiñ rume taiñ raquiduamcülen ca taiñ chum duamcülen, quisu quimniei chem taiñ cüpa femqueel, huelu ca taiñ pepi femquenon fillque dungu taiñ ayüqueel. Chau Dios tuculeleiñmu piuque mu taiñ piuqueyecheal, feimu müna ayüquei ñi ngüneduamafiel taiñ cümeque raquiduam ca taiñ piuqueyechequen (1 Juan 4:7-10).

Biblia feipi

• “Ñidol am cuidaquefilu tati nor mongen-ngelu ca allcütuñmaquefi tañi ngillatun” (1 PEDRO 3:12).

• Chau Dios feipieimu: “Eluayu tami quim ngüneduamngeal, ca quimelelayu tati rüpü cheu tami amual. Ngülamtuayu iñche ñi adquiñ mu” (SALMO 32:8).

CHAU DIOS MÜNA CUTRANDUAMYECHEQUEI

Ngünechen ñi cüme quimniefiel taiñ huesa rupan, ¿chumngechi quelluafeiñmu? Ngüneduamnge Luisa ñi rupan, Nigeria mapu tuulu. Fei feipi: “Fütra huesaque dungu mu rupan, feimu ngünam mongelen piquefun. Lantu domo ta iñche, ca dapiquefun tañi püñeñ pital mu, contueteu am quiñe huesa cutran müllo mu, hidrocefalia pingelu. Feichi mu ca feipingen ñi contueteu cancer moyo mu, fei operangen ca lahuentuñmangen tañi cancer. Müna cüdaungefui dapiafiel tañi püñeñ cutrancülelu ca chaftuafiel iñche tañi huesa cutran”.

¿Chem quellueyu ta Luisa ñi cüme tripayal? Quisu feipi: “Raquiduamquefun quiñeque troquiñ Biblia mu. Quiñe tüfa Filipenses 4:6, 7, feipilu: ‘Ngünechen tamün elueteuchi cüme tüngün yafülnieñmayaimünmeu tamün piuque ca tamün raquiduam’. Raquiduamfiel mu feichi texto quellueneu tañi doi cüme hueniyeafiel ta Jehová. Iñche nehue quimuulan, huelu quisu cüme quimnieneu. Cafei müna yafültucueneu pu lamngen coneltulelu tañi cristiano trahunche.

Petu cutrancülen, huelu ñi püñeñ iñchiu doi tremolequetuyu. Jehová quelluqueyumu huesa raquiduamnoal rupan mu huesaque dungu. Biblia feipi Santiago 5:11 mu: ‘Fei iñchiñ quimnieiñ ñi rume saquifalün ta tüfei engün tañi nehuentun meu yafüluulu ca cutrancaulu. Eimün allcüqueimün chumngechi ñi nehuentulen cutrancahun meu ta Job ca quimnieimün ñi chumcünueteu ta Ñidol afpulu ñi cutrancahun, fei Ñidol am rume cuñillchequelu ca cutranduamyechequelu’”. Jehová cüme quimniefui Job tañi rupan, feimu maneluhuaiñ Chau Dios taiñ cutranduamyeteu rupan mu huesaque dungu.