Fütra huesaque dungu rupaliyiñ

Tüfa ñi feipiel Andrés, Sierra Leona mapu mu tuulu: “Traitraicülen nagpalu chi fotra co, com tacui chi mapu. Fei com taiñ niefel com ñami, feimu müna llicalefuiñ”.

David, Islas Vírgenes mu mülelu, feipi: “Aflu hula ti fütra cürüf, huiñotuiñ taiñ ruca mu, huelu chem no rume niehuelafuiñ. Fentepun ngañhuadcülefuiñ. Tañi ñahue lloyünagi, fei ngümai”.

FENTREN che mongetripalu quiñe fütra huesa dungu mu mülehueduamcülehuei, hueluraquiduamcülehuei, huesa duamquei ca cüme umautuhuelai. Eimi rupalmi tüfa, yafüngehuelan pipelaimi fente tami huesa duamcülen.

Fei ñamülmi com tami nieel quiñe fütra huesa dungu mu, “müna huesa, com fentepui, ngünam mongelen” piafuimi. Huelu, ¡yafüluunge! Quimülmi Biblia ñi feipin, rüf maneluhuafuimi tami doi cüme feleal, fei ngünam mongelelan piaimi llemai.

BIBLIA HULQUEI RÜF MANELUHUN

Eimi mongetripalmi quiñe fütra huesa dungu mu, maneluulayafuimi tami cüme feletual, nehuentulmi rume tami amuleal. Huelu yafüluhulmi, ñochiquechi cüme feletuafuimi. Tüfa ñi feipiel Santiago 5:11: “Quimnieiñ ñi rume saquifalün ta [fei] engün tañi nehuentun meu yafüluulu ca cutrancaulu”.

Biblia ca feipicünui: “Ngehuelayai [...] ngüman no rume ca eyütun no rume” (Apocalipsis 21:4). ¿Chumül femai tüfa? Chau Dios ñi Gobierno quiñe cüme mülehuecünutufile ti Mapu (Salmo 37:11, 29). Feichi mu rupahuelayai chem fütra huesa dungu no rume ca raquiduamhuelayaimi com feiti huesaque dungu tami huesa duamelquefeteu. Isaías 65:17 feipi: “Fei tati cuifique rupan dungu ngoimacünungeai, ca piuquentucungelayai rume”. Tüfa ñi feipicünuel Chau Ngünechen, tati Com Pepiluhun-ngelu.

Felei llemai, Chau Dios ayüniei tami cüme feleal quisu ñi Gobierno mu (Jeremías 29:11). Tami quimfiel tüfa, rüf quelluaimu llemai. Ngüneduampeiñ Sally ñi rupan, quisu ca feipi: “Chau Dios ñi Gobierno re cümeque dungu cüpalai. Piuquentucual tüfa müna quelluqueneu tañi ngoimanentual tañi huesa rupan ca doi yafüluhual”.

Eimi doi quimafuimi ñi chumal Chau Ngünechen tañi cümelcayafiel itrocom pu che. ¿Chumngechi quelluafeimu quimal tüfa? Rüf maneluhuaimi ñi acual ti antü ngehuenole chem fütra huesa dungu no rume, fei ngünam mongelen pihuelayaimi llemai. Cafei Biblia mu mülei cümeque ngülam tami doi cüme duamcüleal. Ngüneduamaiñ chem ngülamtuqueiñmu Biblia.

Biblia ñi ngülam quelluafeimu llemai

Cüme umautuaimi

“Jesús ta feipieyu: ‘Cüpamün. Amuiñ iñchiñ quisu taiñ pichi cansatual’” (Marcos 6:31).

Tati pu ngüneduamquelu ñi chum duamquen pu che mongetripalu fütra huesaque dungu mu, feipi: “Tati pu cüme umautulu doi cüme duamquei tati pu cüme umautunolu mu”. Feimu, müna duamfali tami cüme umautual.

Entuaimi tami chum duamcülen

“Ñi fill raquiduamcülen quiñe huentru ñi piuque, huesa duamelqueyu, huelu quiñe cüme dungun meu yafülduamquei” (Proverbios 12:25).

Nütramcalelafimi tami huesa duamcülen quiñe tami pu che cam hueni. Quisu allcütuafeimu, yafülduamelafeimu ca quelluafeimu.a

Maneluunge tami cümelcaletual

“Üngümnieiñ ñi mületual ta hue deumatuelchi huenu mapu ca hue mapu Ngünechen tañi tuculpacünuel, [fei] meu ta com cümeque nor dungu mületuai” (2 Pedro 3:13).

a Huelu fentreñma mu huesa duamcülelmi, pital meu lahuentungeafuimi tami doi cüme duamcüleal.