Doyümfinge Chau Dios ñi ngünenietual ti mapu
Raquiduamnge tüfa: puquemngei, fei quiñe fütra meulen fülcülepai cheu tami mülen. Fei pu autoridad fill püle feipifeipingei: “¡QUINTUMÜN CHEU TAMÜN MONTULUHUAM!”. Fei, ¿chumaimi cai? Quintufemaimi llemai cheu tami ellcahuam.
Ca femngechi feleiñ com iñchiñ, ¿chumngelu? Jesús feipi ñi rupayal “ta rume fütra cutrancahun”, tüfa quiñe fütra meulen reque feleai (Mateo 24:21). Iñchiñ catrütulayafuiñ ñi rupayal feichi fütra cutrancahun, huelu montuluhuafuiñ llemai, ¿chumngechi? Inaduamaiñ.
Jesús huli quiñe hueupin, fei feipi: “Doyümnieafimün tamün cüdauyenieafiel ta Chau Ngünechen, quisu ngünenietuai ta mapu” (Mateo 6:33). ¿Chumngechi femafuiñ tüfa?
Doyümafiyiñ Chau Dios ñi ngünenietual ti mapu. Felei, doi falintuafiyiñ Chau Dios ñi Reino chem dungu meu rume (Mateo 6:25, 32, 33). Fei, ¿chumngelu doyümafuiñ? Chau Dios müten ngünenietule ta mapu, cüme elcünutuafi itrocom huesaque dungu taiñ rupamequen. Pu che tañi gobierno turpu femlayafuingün tüfa.
Doyümafiyiñ Chau Dios tañi nor dungu. ¿Chumngechi femafuiñ? Eluhuaiñ taiñ inayal Chau Dios tañi ngülam taiñ mongen mu. Raquiduamnge tüfa: iñchiñ quisu dulliliyiñ chem ñi cümen ca chem ñi cümenon, huesa tripayaiñ llemai (Proverbios 16:25). Huelu inaliyiñ Chau Dios ñi ngülam, ayühuelafiyiñ ca cüme feleaiñ llemai (Isaías 48:17, 18).
Amulepe taiñ doyümniefiel Chau Dios ñi ngünenietual ti mapu ca tañi nor dungu. Jesús feipi fentren che doyümnieafui Chau Dios ñi Reino, huelu rupalechi antü mu hueluraquiduamcületuafui, fei doyümnieafui caquelu dungu tañi mongen mu. Quiñeque eluhuafui ñi doi nieal plata, fei ñi cüme feleal. Caquelu che niei fentren duam ñi cümelcaleal tañi pu che engün, fei duamtuhuelayafui Chau Dios ñi ngünenietual (Mateo 6:19-21, 25-32).
Doyümfiliyiñ Chau Dios tañi Reino, llohuaiñ com taiñ duamtunieel feula ca fentren cümeque dungu cüpalechi antü meu, tüfa ñi feipicünuel Jesús (Mateo 6:33).
Cuifi mu, pu che inaquefilu ta Jesús doyümfingün ta Chau Dios ñi Reino ca tañi nor dungu, huelu ca rupaingün huesaque dungu mu. Fei, ¿chumingün?
Fei engün inaquefingün Chau Dios ñi ngülam, tüfa quellueyu ñi contunoaeteu feichi huesaque dungu ñi rupamequen pu che feyentuquenofilu ta Chau Dios. Cafei rume maneluuquefuingün chem ñi femal Chau Dios ngünenietule ti mapu, tüfa quellueyu ñi nehuentuleal rupan mu huesaque dungu. Chau Ngünechen elueyu engün nehuen, femngechi quellungeingün ñi cüme chaftuafiel huesaque dungu (2 Corintios 4:7-9).
¿CHUMAIMI CAI?
Cuifi meu, pu hunenque cristiano inafingün Jesús ñi feipin, fei doyümfingün Chau Dios ñi Reino, ¿chumingün? Enseñalquefingün tati pu che ti cümeque dungu ñi femal tüfachi cüme gobierno (Colosenses 1:23). ¿Famülque meu cai? ¿Petu enseñalngequepei mai tüfachi cümeque dungu?
Femi llemai. Pu Dunguquelu Ineingen Jehová, testigo de Jehová ca pingequelu, quimnieingün pichin mu Chau Dios ngünenietuai ta mapu ca apümcayafi ti huesaque dungu. Feimu eluucüleingün ñi femal chem ñi feipin ta Jesús: “Tati cümeque dungu Chau Dios ñi ngünenietual ta mapu amuldungungeai huall mapu püle, femngechi com troquiñche ñi quimal engün. Fei hula afai mapu meu müleyechi dungu” (Mateo 24:14).
¿Eimi cai? Allcütulmi tüfachi cümeque dungu, ¿chumaimi? Raquiduamnge ñi femün quiñeque cuifique che. Ti apostol Pablo quimeltufi engün ti cümeque dungu ñi rupayal ngünenietule Chau Dios, fei allcütulu tüfa ‘eluucülefuingün ñi llohual Chau Ngünechen ñi dungu’. Huelu re lloulafingün müten, ¿ca chem chumingün? “Cüme ngüneduamquefuingün Chau Ngünechen ñi huirintucuel”, fei ñi quimal ñi rüfngepen mai chem ñi quimeltueteu ti apostol Pablo. Fei hula, feichi pu che inafingün chem ñi quimürpuel (Hechos 17:11, 12).
Eimi inayentuafuimi feitachi pu che. Fei doyümniefilmi Chau Dios ñi Reino ca tañi nor dungu, aflayai tami cüme felen.