¿Chumngechi kelluafuiñ ta che ñi inayal Jesus tañi werkün dungu?

1. Ñi feypin Matew 28:⁠18-20, ¿chem werküfi Jesus tañi pu inanieetew?

DEW wiñomongetulu Jesus, amuy Galilea mapu mu. Fey pewfaluwi tañi pu inanieetew mu, feypimefi kiñe falin dungu. Tañi feypiel ta Jesus wirikonküley Matew pingechi lifru mu (papeltunge Matew 28:⁠18-20).

2. ¿Chem ramtun ngüneduamaiñ tüfachi trokiñ mu?

² Famülke mu, iñchiñ ka müley taiñ kelluafiel che Jesus ñi discipulo ngerpual engün. Feymu ngüneduamaiñ küla ramtun: 1) Dew kimeltufilu iñchiñ ta che Chaw Dios tañi werkün dungu, ¿ka chem müley taiñ femal? 2) Kom ti trawünche, ¿chumngechi kelluntukuafuy pu estudiante ñi weniyeafiel ta Chaw Jewba? 3) ¿Chumngechi kelluafuiñ pu amuldunguwenolu ñi ka wiño konal feytachi küdaw mu?

KELLUAFIYIÑ ENGÜN ÑI INAYAL JESUS TAÑI WERKÜN DUNGU

3. ¿Chem pi Jesus taiñ femal iñchiñ?

³ Jesus werküeiñmu taiñ kimeltuafiel ta che tañi werkün dungu, welu longkontukunieafiyiñ kiñe falin dungu. Jesus feypilay taiñ kimeltucheal müten, doy may ‘kimeltuafimün tañi inayal engün kom iñche tamün werküwkefiel ta eymün’ pi. Feymu müley taiñ enseñayafiel pu estudiakelu Biblia chem müley tañi femal engün ka chumngechi tañi femürpual (Hecho 8:⁠31). Welu, ¿chemu falin-ngey taiñ femngechi kimeltucheal? Peafiyiñ.

4. ¿Chumngechi kelluafuiñ che ñi inayal Jesus tañi werkün dungu? Feypinge kiñe pengelün dungu.

⁴ ¿Chumngechi kelluafuiñ ta che ñi inayal Jesus tañi werkün dungu? Peafiyiñ kiñe pengelün dungu. Kiñeke che amukey escuela mu tañi kim manejayal, fey pu kimeltukelu enseñakeeyew tati leyes del transito pingelu. Welu ka femngechi manejakantulu tati che, ti kimeltukelu müley ñi compañaetew ka kelluaetew ñi inayal chem tañi kimürpun. ¿Chem kimeltukeeiñmu feytachi pengelün dungu? Ngüneduamafiyiñ.

5. 1) Ñi feypin Juan 14:⁠15 ka 1 Juan 2:⁠3, ¿chem enseñayafiyiñ pu estudiakelu Biblia? 2) ¿Chumngechi kelluafuiñ pu estudiakelu ñi inayal Biblia ñi ngülam?

⁵ Enseñalfiliyiñ Biblia ta che, enseñalkefiyiñ Chaw Dios tañi werkün dungu. Welu ka femngechi müley taiñ enseñayafiel pu estudiakelu ñi inayal chem tañi kimürpun (papeltunge Juan 14:⁠15; 1 Juan 2:⁠3). Taiñ femken mu pengelelafiyiñ pu estudiante chumngechi ñi inayal Biblia tañi ngülam küdaw mu, colegio mu ka chem dungu mu rume. Nütramelafiyiñ kiñe dungu iñchiñ taiñ rupan, femngechi pengelelafiyiñ chumngechi Biblia tañi ngülam kellukeeiñmu taiñ kon-noal wedake dungu mu ka taiñ küme dullial taiñ chumal. Tati estudio mu llellipuafiyiñ ta Jewba ñi adnieafiel tati estudiakelu ka ñi eluafiel ñi newen (Juan 16:⁠13).

6. ¿Ka chem chumafuiñ taiñ kelluafiel che ñi inayal Jesus tañi werkün dungu?

⁶ Jesus ayüniey taiñ kelluafiel che ñi discipulo ngerpual, feymu enseñayafiyiñ pu estudiakelu Biblia ñi ka femngechi femal engün. Femngechi inayafingün Jesus tañi werkün dungu. Kiñeke estudiakelu llükayafuy tañi amuldungual, feymu nieaiñ ta paciencia. Kelluafiyiñ engün ñi doy kimafiel Biblia tañi rüf dungu, femngechi maneluwayngün Jewba mu. Fey tati rüf dungu puway tañi piwke mu engün, fey eluwayngün tañi amuldungucheal. ¿Chumngechi doy küme kelluafuiñ che ñi femürpual tüfa? Peafiyiñ.

7. ¿Chumngechi kelluafuiñ pu estudiante ñi kimeltucheal Biblia mu?

⁷ Ramtuafuiñ tati estudiante: “Inafilu eymi Biblia tañi ngülam, ¿chumngechi doy kümelkaletuy tami mongen? ¿Kümepeafuy may kakelu che ñi ka allkütual feytachi kümeke dungu? ¿Chem pimi? ¿Chumngechi kelluafuymi engün?” (Prov. 3:⁠27; Mat. 9:⁠37, 38). Pengelelafuiñ tati tratado koneltulelu ti fillke kellu taiñ kimeltucheal, fey ramtuafuiñ: “¿Chuchi doy ayüafuy ñi papeltual tami pu che, tami pu weni ka tami pu compañ küdaw mu?”. Fey eluafiyiñ feychi tratado tañi dullifiel. Fey adümkantuaiñ chumngechi ñi piwkeyenkechi eluafiel ti tratado ta kakelu che. Tati estudiakelu elungele ñi amuldungual ti trawünche mu, amuleaiñ taiñ kelluafiel (Ecl. 4:⁠9, 10; Luka 6:⁠40).

TI TRAWÜNCHE, ¿CHUMNGECHI KELLUAFUY PU ESTUDIAKELU?

8. ¿Chumngelu fente falin-ngey pu estudiakelu Biblia ñi piwkeyeafiel ta Chaw Jewba ka tati pu che? (Inaduamnge ti wichulechi dungu “¿Chumngechi kelluafuymi pu estudiakelu ñi doy piwkeyeafiel ta Jewba?”).

⁸ Longkontukuaiñ, Jesus ta feypieiñmu: ‘Kimeltuafimün ta che tañi inayal engün kom iñche tamün werküwkefiel ta eymün’. Feychi dungu mu ñi werküel ta Jesus ka koneltuley taiñ piwkeyeafiel ta Chaw Ngünechen ka taiñ pu chafche (Mat. 22:⁠37-39). Kellufiliyiñ pu estudiakelu ñi inayafiel feychi werkün dungu, kelluafiyiñ engün ñi amuldungucheal. ¿Chemu am? Tati estudiakelu doy piwkeyefile ta Chaw Dios ka tati pu che, doy eluway tañi amuldungucheal. Kiñeke estudiakelu llükayafuy chi tañi amuldungucheal, welu feypiafiyiñ Jewba ñi kelluaetew, femngechi llükawelayafi tati pu che (Sal. 18:⁠1-3; Prov. 29:⁠25). Ti wichulechi dungu mülelu nagaltu kimeltuaeiñmu chumngechi kelluafuiñ pu estudiante ñi doy piwkeyeafiel ta Chaw Jewba. Fewla peafiyiñ chumngechi kom ti trawünche kelluafuy pu estudiante ñi doy piwkeyeafiel ta Jewba ka tati pu che.

9. Ti pengelün dungu mu, ¿chumngechi doy küme kimürpuafuy ti che ñi kim manejayal?

⁹ Ka rakiduamaiñ ti pengelün dungu tripalu ti parrafo meli. Petu ñi manejakantumeken tañi profesor engu, ti che müley ñi ngüneduamafiel ñi chem pimekeetew tañi profesor ka chumngechi ñi manejaken kakelu che. Femngechi doy kimürpukey. Por ejemplo, tati petu kim manejalu ngüneduamafuy kiñe conductor ñi elufiel kangelu che ñi wünekünuwal kidu mu, ka ngüneduamafuy kiñe conductor ñi nakümfiel ti luces del auto ñi tretrilnoafiel ta kakelu conductor. Kom tüfa kelluaeyew tati petu kim manejalu ñi ka femngechi femal.

10. ¿Chem kelluafuy pu estudiakelu Biblia ñi doy weniyeafiel ta Jewba?

¹⁰ Ka femngechi pu estudiakelu Biblia eluwlu ñi serfiafiel ta Jewba müley ñi ngüneduamal ñi chem piken tañi enseñakeetew, welu ka femngechi müley ñi ngüneduamal ñi chumken kakelu peñi ka lamngen. Feymu pu estudiakelu rume kelluaeyew ñi amual taiñ trawün mu, fey doy nieay kimün, doy maneluway Jewba mu ka doy piwkeyerpuafi (Hecho 15:⁠30-32). Kafey trawün mu, ti estudiakelu Biblia kimafuy kakelu peñi ka lamngen ka femngechi dungu mew rupalu. Peafiyiñ chumngechi pu peñi ka pu lamngen rume küme kelluafuy pu estudiakelu Biblia.

11. Pu estudiakelu, ¿chumngechi kelluafeyew pu peñi ka pu lamngen ti trawünche mu?

¹¹ Rakiduamnge kiñeke ejemplo. Kiñe domo estudiakelu Biblia kidu tremümfile tañi pu püñeñ, ngüneduamafuy ñi chumken kiñe lamngen ka femngechi dungu mew rupalu. Feytachi lamngen rume küdawkey ñi amual trawün mu tañi pu püñeñ engün, fey yafültukuafeyew ñi ka femngechi femal. Kiñe wentru estudiakelu Biblia küdawtule ñi pütremtuwenoal, trawün mu kimmeafuy kiñe peñi ka femngechi dungu mew rupalu. Ti peñi feypiafeyew ñi rume piwkeyerpufiel ta Jewba, “feymu eluwün ñi pütremtuwenoal” piafeyew (2 Kor. 4:⁠7; 7:⁠1). “Eymi ka femngechi pütremtuwelayafuymi” pingeafuy, feymu ti wentru doy yafüluwafuy tañi femnoal. Kiñe üllcha domo estudiakelu ta Biblia ngüneduamafuy kiñe üllcha lamngen ñi ayüwünkechi serfimekefiel ta Chaw Jewba. Ti üllcha domo pefile fente ñi ayüwkülen ti üllcha lamngen, ayüafuy ñi kimal chumngelu ñi fente ayüwkülen tañi ka felerpual.

12. ¿Chumngelu feypiafuiñ kake kiñeke iñchiñ kelluafuiñ pu estudiakelu Biblia?

¹² Pu estudiakelu Biblia ngüneduamfiel mu ñi küme femken pu peñi ka pu lamngen, doy kimürpukey chumngechi ñi piwkeyeafiel ta Chaw Dios ka tati pu che (Juan 13:⁠35; 1 Tim. 4:⁠12). Kafey chumngechi ngüneduamiyiñ, pu estudiakelu Biblia rume kümelkayafeyew ñi kimafiel pu peñi ka pu lamngen ka femngechi dungu mew rupalu. Feymu “iñche ka femngechi femafun ñi poyeafiel ta Jewba” piafuyngün (Deut. 30:⁠11). Kake kiñeke iñchiñ kelluafuiñ pu estudiakelu Biblia ñi doy weniyerpuafiel ta Jewba (Mat. 5:⁠16). Feymu kümeafuy taiñ ramtuwal: “¿Chumken iñche ñi kelluafiel pu estudiante?”.

KELLUAFIYIÑ PU AMULDUNGUWENOLU

13, 14. ¿Chumngechi trokifi Jesus tañi pu apostol ñi kidukünuetew?

¹³ Kelluafiyiñ pu peñi ka pu lamngen amuldunguwenolu ñi wiño konal feytachi falin küdaw mu. ¿Chumngechi femürpuafuiñ? Taiñ kimal, ngüneduamaiñ chumngechi ñi kellufiel Jesus tañi pu apostol weda duamkülelu.

¹⁴ Pichilewelu ñi layal ta Jesus, kom ñi pu apostol “kidukünueyew, ka lefmawi engün” (Mar. 14:⁠50; Juan 16:⁠32). ¿Jesus kay? ¿Famentupefi engün may? Femlay tati. Feymu wiñomongetulu, feypifi epu domo tañi inanieetew: ‘Llükakilmu. Feypimeafimu tañi pu peñi’ ñi wiñomongetun (Mat. 28:⁠10). Jesus kiñepülekünulafi tañi pu apostol. Kidukünueyew engün, welu “tañi pu peñi” piniefi. Jewba reke, Jesus kutranpiwkeyechekey ka perdonachekey (2 Rey. 13:⁠23).

15. ¿Chem rakiduamkeiñ ti pu amuldunguwekenolu mu?

¹⁵ Iñchiñ ka femngechi rume duamniefiyiñ ka piwkeyeniefiyiñ taiñ pu peñi ka pu lamngen amuldunguwenolu. Pu amuldunguwenolu rume küdawingün Chaw Jewba mu, fentren tripantu mu chi, feymu rume falintukefiyiñ engün (Eb. 6:⁠10). Rume echamenokefiyiñ engün (Luka 15:⁠4-7). Jesus reke, ¿chumngechi duamnieafuiñ pu amuldunguwenolu? Peafiyiñ.

16. ¿Chumngechi duamnieafuiñ pu amuldunguwenolu?

¹⁶ Piwkeyenkechi mangelafiyiñ pu amuldunguwenolu trawün mu. Feychi kidukünuetew tañi pu apostol, Jesus mangelfi kiñe trawün mu engün, femngechi yafültukufi (Mat. 28:⁠10; 1 Kor. 15:⁠6). Feymu famülke mu trawümekenole pu amuldunguwenolu, mangelafiyiñ ñi trawüal iñchiñ mu, femngechi yafültukuafiyiñ engün. Kiñeke amuldunguwenolu pürüm eluwlayafuy tañi trawüluwal, feymu mülefuy fentren rupa taiñ mangelafiel. Feychi mangelngelu pu apostol eluwingün ñi trawüluwal, feymu rume ayüwmapelay ta Jesus. Ka femngechi iñchiñ rume ayüwaiñ trawüluwle iñchiñ mu tati pu amuldunguwenolu (ka ngüneduamafuymi Matew 28:⁠16 ka Luka 15:⁠6).

17. Küpale trawün mu kiñe amuldunguwenolu, ¿chumngechi llowafiyiñ?

¹⁷ Küme llowafiyiñ pu amuldunguwenolu. Jesus trawüluwlu tañi pu apostol engün, eluwi tañi dunguafiel, femngechi küme duamelfi engün (Mat. 28:⁠18). Ka femngechi küpale kiñe amuldunguwenolu trawün mu, eluwaiñ taiñ dunguafiel, femngechi taiñ küme duamelafiel. Kiñeke mu kimlayafuiñ taiñ chem piafiel, welu “kümey tami küpan” pifiliyiñ müten, küme duamay.

18. ¿Chumngechi yafültukuafuiñ pu amuldunguwenolu?

¹⁸ Yafültukuafiyiñ pu amuldunguwenolu. Jesus feypifi tañi pu inanieetew ñi amuldungual wall Mapu püle, feymu pepilnoalu trokiwpelayngün. Feymu feypifi: “Iñche rumel mülean ta eymün mew” (Mat. 28:⁠20). Ñi feypiel ta Jesus rume kellufi tañi pu inanieetew, feymu rupachi antü mu amuldungumekeyngün ti kümeke dungu (Hecho 5:⁠42). Famülke mu pu amuldunguwenolu ka duamnieyngün ñi yafültukungeal. Llükayafuyngün chi ñi wiño amuldungucheal, feymu feypiafiyiñ tañi kidu amuldunguyawnoal engün. Eluwle ñi wiño amuldungucheal, “iñche ta compañaeyu” piafiyiñ. Femngechi tripale engün tañi amuldungucheal, ayüwküleayngün taiñ kellufiel mu. Pu amuldunguwenolu ngüneduamle taiñ peñi, lamngen trokiniefiel, eluwafuyngün ñi wiño amuldungucheal, fey kom ayüwküleaiñ.

WECHUNENTUAIÑ TAIÑ WERKÜETEW JESUS

19. ¿Chem eluwküleiñ taiñ femal? ¿Chemu am?

¹⁹ Afle Weküfü ñi ngünenieel, fentepuay taiñ amuldungun küdaw (Mat. 28:⁠20). Eluwküleiñ llemay taiñ wechunenturpual feytachi falin küdaw puwle feychi antü. Feymu ayüwünkechi wülkeiñ taiñ newen, tiempo ka taiñ plata taiñ peal “kom pu eluwlu ñi rumel mongeleal” (Hecho 13:⁠48, TNM). ¿Chemu femkeiñ tüfa? Femngechi inayentukefiyiñ ta Jesus. Kidu feypi: “Iñche tañi iyael reke feley tañi femal ñi Chaw ñi werküetewchi dungu” (Juan 4:⁠34; 17:⁠4). Iñchiñ ka femngechi kom piwke mu ayünieiñ taiñ femal Chaw Jewba taiñ werküetewchi dungu (Juan 20:⁠21). Ka ayünieiñ pu amuldunguwenolu ka kakelu che ñi konal tüfachi falin küdaw mu (Mat. 24:⁠13).

20. Ñi feypin 2 Korintio 4:⁠7, ¿chumngechi wechunenturpuaiñ Jesus taiñ werküetew?

²⁰ Küdawngey femal Jesus tañi werkün dungu, welu kidulelaiñ tati. Jesus feypikünuy ñi müleal iñchiñ mu. Kellufiel mu ta che ñi discipulo ngerpual, “chaf küdawkeiñ Chaw Ngünechen engu” ka “kiñewküleiñ ta Kristo mew” (1 Kor. 3:⁠9, TNM; 2 Kor. 2:⁠17). Feymu Jewba ka Jesus kelluaeiñmu taiñ femal tüfachi küdaw. Feymu wechunenturpuaiñ llemay. Rume ayüwün-ngey femal tüfachi küdaw ka rume ayüwün-ngey kelluafiel kakelu che ñi ka femürpual (papeltunge 2 Korintio 4:⁠7).