Ti hueichan huesalcaquefi com che
“Rupalu ti Segunda Guerra Mundial ta fantepu mu doyelcülei ti hueichan. Feichi 8 mil millon che mapu mu, 2 mil millon che mülei cheu ñi rupamequen hueichan”.
Ñi feipiel Amina Mohammed Naciones Unidas ñi vicesecretaria general, 26 conchi enero, 2023 tripantu.
Tüngcülechi mapu ruparumeafui hueichan. Pu che mülenofule rume cheu ñi rupamequen hueichan, huesalcangeafui ca. Fentepuufule rume ti hueichan, fentren tripantu amulerpuafui cutrancahun. Peaiñ quiñeque ejemplo:
Mülei filla. Ti Programa Mundial de Alimentos feipi: “Hueichan ñi duam mu doi fillalerpuquei pu che. Fentren ngüñün mülei cheu ñi rupamequen hueichan”.
Cutrancülerpuquei pu che. Feipingele müten ñi müleal hueichan, fill raquiduamcülequei tati pu che. Feichi pu che mülelu cheu ñi rupamequen hueichan allfürumeafui cafei cutrantuleafui ñi raquiduam. Huelu fentren rupa nielaingün doctor tañi peaeteu.
Pu che obligangequei ñi lefmahual cañpüle. Ti troquiñ Alto Comisionado de las Naciones Unidas para los Refugiados feipi feichi septiembre cüyen 2023 tripantu, doi 114 millon che com mapu mu elcünuingün ñi ruca tañi lefmahual. Fentren che femngechi rupai hueichan ñi duam mu.
Ngelai duamnieelchi plata. Hueichan ñi duam mu, cüdautuquei pu che ñi nieal tañi duamnieel, doi falilu cai itrofillem. Pu gobierno duamtuquei fentren plata ñi hueichayal, fei doyümquelafi pu che ñi nieal educacion ca lahuen, feimu pu che cutrancauquei. Ca rupayüm ti hueichan rume, falin-ngei ñi huiño deumangetual feichi troquiñ mapu.
Huesalcangei ti mapu. Pu che cutrancauquei huesalcangelu tañi mapu. Podümngequei cürüf ca ti co, fei feichi dungu ñi duam mu fillque cutran contuqueyu pu che. Ca rupafule rume hueichan, mülehuequei bomba ellcalelu mapu mu ñi trofmequen, allfülquefi che ca quiñeque mu langümquefi cütu.
Hueichan ñi duam mu huesalcangequei mapu ca cutrancauquei pu che.