TROQUIÑ ÑI CHILLCATUNGEAL 23
ÜLCANTUN 2 “Jehová pingei tami üi”
¿Tunte falintuquefimi Jehová tañi üi?
“‘Eimün tati pu dunguquelu iñche ta ineingen’ pi Jehová” (IS. 43:10).
¿CHEM QUIMAIÑ?
¿Chumngechi coneltuleiñ taiñ incayafiel Jehová tañi üi?
1, 2. ¿Chumngechi quimiyiñ Jesús ñi fente falintuquefiel Jehová tañi üi?
JESÚS doi falintuquefi Chau Jehová tañi üi chem dungu mu rume. Jesús hunelei tañi incayafiel tañi Chau ñi üi. Chumngechi peiñ rupachi troquiñ mu, Jesús eluucülefui ñi layal tañi quimfalcünual Jehová ñi nor dungu femquen ca ñi yamfalngen tañi üi (Mar. 14:36; Heb. 10:7-9). Afle ti mil tripantu ñi ngünenieal Jesús, huiñoleltuafi ñi ngünenien tañi Chau, femngechi Jehová müten ñi püramyengeal (1 Cor. 15:26-28). Com tañi femün mu ca tañi femal pengelcünui fente ñi piuqueyefiel tañi Chau.
2 Jesús cüpai mapu mu tañi Chau ñi üi mu (Juan 5:43; 12:13). Quimelelfi tañi pu inanieteu Jehová tañi üi (Juan 17:6, 26). Quimeltui ca femi afmatun dungu tañi Chau ñi üi mu (Juan 10:25). Raquiduamcülen mu tañi pu inanieteu mu, llellipufi ta Jehová: “Tami üi ñi duam mu cuñiutucufinge engün” (Juan 17:11). Jesús doi falintuquefui tañi Chau ñi üi chem dungu mu rume. Feimu, ¿chumngechi quiñeque che cristianongen piafui quimnofiel mu rume Jehová tañi üi?
3. ¿Chem ngüneduamaiñ tüfachi troquiñ mu?
3 Iñchiñ taiñ rüf cristianongen inayentuquefiyiñ Jesús, feimu ca falintuquefiyiñ Jehová tañi üi (1 Ped. 2:21). Tüfachi troquiñ mu, ngüneduamaiñ chumngelu pu amuldunguquelu ti cümeque dungu yeniei Jehová tañi üi (Mat. 24:14). Ca peaiñ tunte mülei taiñ falintuafiel Chau Jehová tañi üi.
QUIÑE TROQUIÑCHE YENIELU JEHOVÁ TAÑI ÜI
4. 1) ¿Chem pifi Jesús tañi pu inanieteu petu ñi amutunon huenu mu? 2) ¿Chem ramtun huiñoldunguaiñ?
4 Petu ñi huiñotunon huenu mu, Jesús feipifi tañi pu inanieteu: “Elungelmün Chau Ngünechen ñi nehuen, yafüluhuaimün. Fei huldunguaimün iñche meu Jerusalén püle, com Judea, Samaria ca huall mapu püle” (Hech. 1:8). Feimu Jerusalén mu müten amuldungungelayafui, doi mai com troquiñ mapu püle. Femngechi com pu che eluñmangeafui ñi inayafiel ta Jesús (Mat. 28:19, 20). Huelu ngüneduamnge Jesús ñi feipin “huldunguaimün iñche meu”. Feimu, ¿Jesús mu müten mülefui ñi huldungual? Cam, ¿ca mülefui ñi quimafiel ca dungual Jehová ñi üi mu? Ngüneduamaiñ Hechos capitulo 15 taiñ peal ti huiñoldungun.
5. ¿Chumngechi pengelingün tati pu apostol ca pu loncolelu tañi quimngeal Jehová tañi üi? (Ca inaduamnge ti adentun).
5 Feiti 49 tripantu mu, tati pu apostol ca tati pu loncolelu Jerusalén mu trahuluhuingün tañi ngüneduamal chem chumal pu judiongenolu tañi cristianongeal. Tüfa mu ca mülefui Santiago, Jesús tañi peñi. Fei epe aflu ti trahun, feipi: “Symeón [Pedro] deu nütramcaeiñmeu, Chau Ngünechen feula ta lloufi pu catripanche. Femngechi tati pu catripanche meu dulliai che ñi yenieal tañi üi”. Acordafiel mu Amós ñi huirintucun, ca feipi: “Femngechi tati pu huentru mülehuelu, com piuque mu serfiafi ta Chau Jehová quiñentrür tati pu catripanche engün. Tüfachi pu che yeniei iñche tañi üi, pi Jehová” (Hech. 15:14-18). Femngechi tati pu hue discipulo re quimlayafingün müten Jehová, doi mai yenieai tañi üi ca quimeltulelafingün caquelu che feichi üi.
Pu apostol ca pu loncolelu quimtucuingün pu cristiano ñi yenieal Jehová tañi üi ca quimeltulelafiel tati pu che. (Inaduamnge parrafo 5).
6, 7. 1) Jesús, ¿chem ñi femal cüpai mapu mu? 2) ¿Chuchi doi falin dungu meu cüpai Jesús?
6 Jesús tañi üi cüpa feipi “Jehová montulchequei”. Felei llemai, Jehová adcünui Jesús ñi montulafiel com pu feyentulu. Jesús hultucupai ñi mongen tañi montulafiel pu che (Mat. 20:28). Femngechi femlu, eluñmafi pu che ñi perdonangeal ñi culpan ca tañi nierpual rumel mongen (Juan 3:16).
7 ¿Chemu tati pu che duamniefui tañi montulngeal? Taiñ pefiel rupachi troquiñ mu, Adán Eva engu caiñetufingu ta Chau Jehová, feimu ñamümingu tañi rumel mongeleal (Gén. 3:6, 24). Huelu Jesús cüpalai re tañi montulafiel pu che, ca mülefui tañi femal quiñe doi falin dungu. Tati Huecüfü coila dalluntucufi ta Jehová (Gén. 3:4, 5). Feimu pu che mülefui ñi quimal Jehová ñi huesa femnon, doi mai ñi rume cüme Chau ngen. Jesús cüpai Chau Dios tañi üi mu, ca femi com tañi feipieteu. Femngechi Jesús hunelei ñi incayafiel Jehová tañi üi.
¿Chumngechi quiñeque che cristianongen piafui quimnofiel mu rume Jehová tañi üi?
8. Pu che Jesús ñi discipulongeal, ¿chem mülefui ñi quimal?
8 Com tati pu che Jesús ñi discipulongeal mülefui ñi quimal ca adümafiel inei tañi montuleteu: fei Jehová llemai (Juan 17:3). Ca femngechi Jesús reque, quimngeafui tañi yenieel Jehová ñi üi. Ca mülefui tañi adümafiel ñi fente falin-ngen incayafiel Jehová tañi üi, femngechi müten montuafuingün (Hech. 2:21, 22). Com pu discipulo mülefui ñi quimal Jehová ca Jesús mu. Feimu ñi fentepual ñi llellipun mülelu Juan capitulo 17, Jesús feipi: “Quimeltulelfiñ engün tami üi. Ca fentecünulayan. Femngechi piuqueyecheaingün chumngechi piuqueyeen iñche. Fei quiñeucülean fei engün mu” (Juan 17:26).
“EIMÜN TATI PU DUNGUQUELU IÑCHE TA INEINGEN”
9. Taiñ rüf cristianongen, ¿chem doi falintuafiyiñ?
9 Ti pu rüfngechi cristiano meu doi fali com dungu mu ñi incayafiel Jehová tañi üi (Mat. 6:9, 10). Iñchiñ mülei taiñ doi falintuafiel Jehová tañi üi chem caquelu üi meu rume, ca pengelqueiñ taiñ femquen mu. ¿Chumngechi quelluntucuafuiñ taiñ incayafiel Jehová tañi üi, ca ñi pengelal ñi coilangen Huecüfü?
10. ¿Chem pengeli Isaías capitulo 42 puulu 44? (Isaías 43:9; 44:7-9; ca inaduamnge ti adentun).
10 Isaías capitulo 42 puulu 44 quimeltueiñmu chem taiñ chumal taiñ incayafiel Jehová tañi üi. Tüfa meu Jehová feipifi pu che tañi poyequenoeteu tañi pengelal fei engün tañi pu dios ñi rüfngen. Fei Jehová ramtui: ¿mülepei mai che ñi dunguñpeafiel feichi pu caquelu dios? Huelu ngelai inei no rume tañi femal tüfa (papeltunge Isaías 43:9; 44:7-9).
Inchiñ taiñ feipin mu ca taiñ femün mu pengelqueiñ Jehová müten ñi rüf Ngünechen ngen. (Inaduamnge parrafo 10, 11).
11. Ñi feipilen Isaías 43:10-12, ¿chem feipifi Jehová tañi pu che?
11 (Papeltunge Isaías 43:10-12). Jehová feipifi tañi pu che: “Eimün tati pu dunguquelu iñche ta ineingen, [...] iñche Ngünechen ngen”. Ca ramtufi: “¿Mülepei mai cangelu Dios?” (Is. 44:8). Iñchiñ elungeiñ taiñ incayafiel Jehová tañi üi, müna falintufali tüfa. Taiñ feipiqueel ca taiñ femqueel mu pengelqueiñ Jehová müten tañi rüf Ngünechen ngen, ca tañi üi ñi huentelen caquelu üi meu. Chumngechi yenieiñ taiñ mongen, pengelqueiñ taiñ rüf piuqueyefiel ta Jehová ca taiñ püntütripaquenon Jehová mu chumle rume Huecüfü. Femngechi quelluntucuafuiñ ñi yamniengeal Jehová tañi üi.
12. ¿Chumngechi femtripai Isaías 40:3, 5 ñi feipin?
12 Isaías ca feipicünui ñi pepicangeal Chau Jehová ñi rüpü (Is. 40:3). ¿Chum femtripai ñi feipicünuel? Juan ti Fautizachefe pepicalelfi ñi rüpü ta Jesús. Fei cüpai Jehová tañi duam mu ca dungui Jehová tañi üi mu (Mat. 3:3; Mar. 1:2-4; Luc. 3:3-6). Isaías ca feipicünui: “Jehová tañi afmatufalngen pengelcünungeai” (Is. 40:5). ¿Chumngechi femtripai feichi dungu? Jesús cüpalu mapu mu, rume cüme pengelcünui tañi chumngen tañi Chau, feimu Jehová cüpacai reque piafuiñ (Juan 12:45).
13. ¿Chumngechi inayentuafuiñ Jesús?
13 Incafiel mu Jehová tañi üi, inayentuquefiyiñ Jesús. Iñchiñ dunguqueiñ ineingen Jehová Jesús reque. Yeniequeiñ Jehová tañi üi ca feipiquefiyiñ pu che com tati cümeque dungu ñi femquen. Taiñ cüme femal tüfa, ca mülei taiñ feipiafiel pu che com ñi femün Jesús ñi yamniengetual Jehová tañi üi (Hech. 1:8). Jesús hunelei ñi dungun ineingen Jehová. Iñchiñ inayentuquefiyiñ Jesús (Apoc. 1:5). ¿Chumngechi pengelafuiñ taiñ falintuquefiel Jehová tañi üi? Peafiyiñ.
¿CA CHUMNGECHI PENGELAFUIÑ TAIÑ FALINTUQUEFIEL JEHOVÁ TAÑI ÜI?
14. Ñi feipilen Salmo 105:3, ¿chum duamqueiñ Jehová tañi üi mu?
14 Jehová tañi üi rume saquiquefiyiñ, feimu ñücüfcülelaiñ (papeltunge Salmo 105:3). Jehová ayüuquei taiñ nütramyeafiel quisu, ca taiñ yehuenoal (Jer. 9:23, 24; 2 Cor. 10:17). Rume ayühulqueiñmu Jehová fei iñchiñ taiñ Dios ngen. Iñchiñ rume falintuquefiyiñ taiñ incayafiel Jehová tañi üi ca taiñ feipiafiel caquelu che Jehová tañi norngen. Turpu yehuequelaiñ taiñ feipiafiel caquelu che taiñ Dunguquelu Ineingen Jehová ngen: cüdau mu, colegio mu, taiñ lof mu ca cheu rume miyauliyiñ. Huecüfü ayüquei taiñ catrütuaeteu taiñ quimeltunoal Jehová tañi üi (Jer. 11:21; Apoc. 12:17). Huecüfü ca tati pu coila quimeltuquelu ayüquei ñi acordangenoal Jehová tañi üi (Jer. 23:26, 27). Huelu iñchiñ rume piuqueyefiyiñ Jehová tañi üi, feimu eluuqueiñ taiñ rumel püramyeafiel (Sal. 5:11; 89:16).
15. ¿Chem coneltulei taiñ maneluhual Chau Jehová ñi üi meu?
15 Amulei taiñ maneluhun Chau Jehová ñi üi meu (Joel 2:32; Rom. 10:13, 14). Tüfa mu coneltulelai müten quimafiel tañi üi ca üituafiel. Cafei quimfiyiñ ñi chumngen, recüluuqueiñ quisu mu ca quintuqueiñ taiñ adnieaeteu (Sal. 20:7; 99:6; 116:4; 145:18). Ca femngechi quimeltuquefiyiñ ta caquelu che Jehová tañi üi ca tañi chumngen. Ca quelluquefiyiñ tañi cüme elcünutual ñi mongen ñi ayühulafiel Jehová, femngechi ñi montual engün (Is. 12:4; Hech. 2:21, 38).
16. ¿Chumngechi pengelafuiñ Huecüfü ñi coilangen?
16 Eluucüleiñ taiñ cutrancahual cütu taiñ püramyeafiel Jehová (Sant. 5:10, 11). Rupaliyiñ rume huesaque dungu mu püntütripaquelaiñ Jehová mu, femngechi pengelqueiñ Huecüfü ñi coilangen. Job ñi antü mu, Huecüfü entui tüfachi coila dungu: “Quiñe huentru hulcünuai com tañi nieel ñi montulal tañi mongen” (Job 2:4). Femngechi Huecüfü cüpa feipi pu che ñi serfiafiel Jehová cümelcalele müten, huelu femnole püntütripayai. Huelu tüfa rüfngelai, Job turpu püntütripalai. Iñchiñ ca pengelafuiñ Huecüfü tañi coilangen. Chumle rume tati Huecüfü taiñ püntünentuaeteu Jehová mu, fentecünulayaiñ taiñ serfifiel. Com piuque mu maneluucüleiñ taiñ cuñiutucuaeteu Jehová tañi üi ñi duam mu (Juan 17:11).
17. Ñi feipin 1 Pedro 2:12, ¿ca chumngechi püramyeafuiñ Jehová?
17 Pengelqueiñ taiñ respetaquefiel Jehová tañi üi (Prov. 30:9; Jer. 7:8-11). Iñchiñ cai yenielu Jehová tañi üi, feimu taiñ femquen mu püramyengeafui cam illamcangeafui Jehová tañi üi (papeltunge 1 Pedro 2:12). Feimu llemai, eluucüleiñ taiñ püramyeafiel Jehová taiñ feipin mu ca taiñ femquen mu. Femngechi quelluntucuafuiñ ñi yamniengeal Jehová tañi üi culpafengelu rume iñchiñ.
18. ¿Ca chem meu pengelafuiñ taiñ falintuquefiel Jehová tañi üi? (Ca inaduamnge ti quimal dungu).
18 Doyümniefiyiñ püramyeafiel Jehová tañi üi chem pingeliyiñ rume (Sal. 138:2). ¿Chemu feipiafuiñ? Femquen mu iñchiñ Jehová tañi ayüqueel, quiñeque che lladcüquei, feimu huesa dunguyeafeiñmu.a Jesús lai quiñe huesa che reque ca ti pu che illamcaeyu. Jesús eluhui tañi femngechi rupayal tañi Chau ñi püramyengeal. Biblia feipi Jesús “yehuelai ñi illamcangen meu rume” (Heb. 12:2-4). Müte duamcülelafui tañi chem pial caquelu che, fei doi falintuquefui tañi ayühulafiel Jehová (Mat. 26:39).
19. ¿Chem raquiduamqueimi Jehová tañi üi mu ca chemu?
19 Rume ayüucüleiñ taiñ serfifiel mu Jehová. Rume falintuquefiyiñ taiñ Dunguquelu Ineingen Jehová pingen. Feimu ayentungeliyiñ rume ca huesa dunguyengeliyiñ, duamcülequelaiñ. Iñchiñ meu doi falin-ngei Jehová tañi üi. Feimu Huecüfü catrütueliyiñmu rume, eluucüleiñ taiñ amuleal ñi püramyeafiel Jehová. Jesús reque, femngechi pengelaiñ taiñ doi falintuquefiel Jehová tañi üi chem dungu meu rume.
ÜLCANTUN 10 ¡Chau Jehová ta yamniengepe!
a Job nor huentrungefui, huelu rume falintufi chumngechi ñi troquingeal feichi mu dalluntucungelu. Hunelu mu lalu tañi pu yall ca niehuetunolu tañi chemcün, “Job culpalai ca feipintuculafi ta Chau Ngünechen ñi huelulcahun” (Job 1:22; 2:10). Huelu feipintucungelu ñi femün huesaque dungu, eluhui ñi incahual ca huesa entui ñi feipin. Doi falintufi ñi chumngechi troquingeal, doyümlai Jehová ñi püramyengeal (Job 6:3; 13:4, 5; 32:2; 34:5).