¿Chumngechi quintuaiñ cümeque ngülam?

1. Taiñ cüme tripayal taiñ dulliel, ¿chem chumafuiñ? (Proverbios 13:10; 15:22).

COM ayüqueiñ taiñ cüme dullial taiñ mongen mu. Ca com iñchiñ ayüqueiñ taiñ cüme tripayal taiñ dulliel. Biblia feipiquei taiñ femal tüfa, mülei taiñ quintual ngülam (papeltunge Proverbios 13:10; 15:22).

2. ¿Chem feipicünui Jehová?

² ¿Inei doi cüme ngülamtuafeiñmu? Jehová llemai. Feimu llellipunieafiyiñ ca pediafuiñ taiñ eluaeteu quimün. Feipicünui taiñ quelluaeteu, feipi: “Ngülamtuayu iñche ñi adquiñ mu” (Sal. 32:8). Chau Jehová eluqueiñmu taiñ duamnieelchi ngülam ca quelluqueiñmu taiñ inayafiel.

3. ¿Chem peaiñ tüfachi troquiñ meu?

³ Tüfachi troquiñ mu, Biblia mu ngüneduamaiñ meli ramtun: taiñ cümelcayafeteu ti ngülam, ¿chumngechi chengeaiñ? ¿Inei cüme ngülamtuafeiñmeu? ¿Chumngechi eluucüleafuiñ taiñ cüme llohuafiel ti ngülam? ¿Chumngelu cümelai caquelu ñi dullial iñche tañi femal?

ÑOM PIUQUENGEAIÑ TAIÑ CÜMELCAYAETEU TI NGÜLAM

4. Taiñ cümelcayaeteu ti ngülam, ¿chumngechi chengeafuiñ?

⁴ Mülei taiñ ñom chengeal taiñ cümelcayaeteu ti ngülam. Quimtucunieaiñ taiñ nienon com pepiluhun ca duamnieiñ quellu taiñ cüme dullial. Ñom chengenoliyiñ, Jehová quellulayaiñmu. Feimu papeltuliyiñ Biblia, ngüneduamlayafuiñ chumngechi taiñ quelluaeteu (Miq. 6:8; 1 Ped. 5:5). Huelu ñom chengeliyiñ, eluucüleaiñ taiñ inaduamal ca inayafiel ti ngülam mülelu Biblia mu.

5. ¿Chem fütraque dungu femi David?

⁵ Peaiñ chem quimeltuafeiñmu David tañi femün. Fei niefui fentren adümuhun ca femi fütraque dungu, huelu ñom piuquengefui. Fentren tripantu petu tañi lonco ülmen-ngenon, quimngequefui tañi cüme dungulquefiel ti arpa. Tati lonco ülmen Saúl cütu mütrümfaleyu tañi dungulelaeteu ti arpa (1 Sam. 16:18, 19). Rupachi antü mu, Jehová dullieyu tañi reyngerpual, fei elueyu tañi nehuen (1 Sam. 16:11-13). Cafei, David langümfi Goliat ca fentren tañi pu caiñe, feimu tati pu che saquiquefeyu (1 Sam. 17:37, 50; 18:7). Mallma piuquengefule David, feipiafui: “Iñche rume adümuhun che, duamnielan tañi ngülamtungeal” piafui. Huelu David ñom piuquengefui.

6. ¿Chumngechi quimiyiñ David ñi cüme llouquen ngülam? (Ca inaduamnge ti adentun).

⁶ David reyngelu dulli cümeque hueni tañi ngülamtuaeteu (1 Crón. 27:32-34). Petu tañi reyngenon, ca femngechi femquefui, allcütuñmaquefui ñi ngülam quimque che, huentru cam domongepe rume. Ca quiñe rupa allcütufi Abigaíl. Tüfachi domo ñi huentru Nabal pingefui, mallmangefui, quim mañumlafui ca yamchequelafui. Abigaíl ngülamtufi ta David tañi culpanoal Jehová mu. David ñom piuquengefui, feimu cüme lloumafi ñi ngülam (1 Sam. 25:2, 3, 21-25, 32-34).

7. ¿Chem quimeltueiñmu David ñi femün? (Eclesiastés 4:13; ca inaduamnge ti adentun).

⁷ ¿Chem cüme dungu quimeltuqueiñmu ñi femün David? Doi nieafuiñ autoridad caquelu che meu ca nieafuiñ pepiluhun, huelu “duamlan ñi ngülamtungeal” pilayafuiñ. Chem che rume elueliyiñmu cümeque ngülam, mülei taiñ cüme llohuafiel (papeltunge Eclesiastés 4:13). Femngechi quelluaiñmu taiñ connoal huesaque dungu meu ca taiñ huesalcanoafiel caquelu che.

¿INEI CÜME NGÜLAMTUAFEIÑMU?

8. ¿Chumngelu cümefui David ñi ngülamtuaeteu Jonatán?

⁸ David ñi femün ca quiñe dungu quimeltuqueiñmu. David allcütuñmaquefui ñi ngülam pu che cüme hueniyeniefilu Jehová ca cüme quimnielu chem ñi rupan. Quiñe rupa, David ayülu ñi cüme yeutual Saúl engu, feipifi Jonatán tañi ngülamtuaeteu. ¿Chumngelu rume cümefui ñi ngülamtuaeteu Jonatán? Jonatán cüme hueniyequefui Jehová. Cafei Saúl ñi fotümngefui, feimu cüme quimniefui ñi chau (1 Sam. 20:9-13). ¿Chumngechi inayentuafuiñ David?

9. ¿Inei feipiafuiñ taiñ ngülamtuaeteu? Feipinge quiñe ejemplo (Proverbios 13:20).

⁹ Duamnieliyiñ ngülam, cümeafui taiñ feipiafiel quiñe che cüme hueniyefilu Jehová ca cüme quimnielu ti dungu (papeltunge Proverbios 13:20).a Raquiduamnge tüfa: quiñe hueche peñi ayüniefui tañi nieal afcadi. ¿Inei feipiafui ñi ngülamtuaeteu? Feipifile quiñe cauchu hueni, feita eluafeyu cümeque ngülam tripalelu Biblia mu. Huelu doi cümeafui feipifile quiñe cüme curehuen serfiquefilu Jehová ca tañi cüme quimnieteu. Feitachi curehuen feipiafeyu chumngechi inayal Biblia ñi ngülam ca chem tañi quimürpun quisu tañi curehuen-ngen mu engu.

10. ¿Chem ngüneduamaiñ feula?

¹⁰ Deu peiñ taiñ ñom chengeal ca inei feipiafuiñ taiñ ngülamtuaeteu. Feula peaiñ chumngelu falin-ngei eluucüleal taiñ allcütual cümeque ngülam ca chumngelu cümelai caquelu ñi dullial taiñ femal.

ELUUCÜLEAIÑ TAIÑ ALLCÜTUAL CHI NGÜLAM

11, 12. 1) ¿Chem ngelafui taiñ femal? 2) ¿Chem chumi Rehoboam ñi dullial quiñe falin dungu?

¹¹ Quiñeque che quintuquei ñi ngülamtungeal, huelu deu dulli ñi chumal, feimu re ayüniei caquelu che ñi feipiaeteu ñi cümelcamequen. Femngechi femlu tüfachi che, eluucülelai tañi ngülamtungeal. Rehoboam tañi huesa tripan quimeltuqueiñmu ñi cümenon tüfa.

¹² Rehoboam reyngerpui lalu tañi chau Salomón. Rehoboam deu reyngelu, pu che cümelcalequefui. Huelu raquiduamquefuingün, Salomón rume eluquefeiñmu cüdau pi, feimu feipifingün Rehoboam ñi müte cüdaunoal engün. Ti lonco ülmen feipieyu duamnien tiempo tañi raquiduamal. Hunelu mu, cüme amulei ñi dungu. Feipifi pu fütaqueche ñi ngülamtuaeteu, tüfa engün quelluquefui tañi chau Salomón (1 Rey. 12:2-7). Huelu allcütuñmalafi ñi ngülam ti fütaqueche, ¿chumngelu am? Rehoboam deu quimniepelafui ñi chumal, feimu ayüniefui chi ñi quelluntucungeal müten, fei feipifi tañi caquelu hueni tañi ngülamtuaeteu. Fei engün feipieyu ñi doi eluafiel cüdau tati pu Israel che. ¿Tüfa peno ñi raquiduamniefel Rehoboam? Feimu inafi feichi ngülam (1 Rey. 12:8-14). Rehoboam allcütufi tañi pu hueni, fei huesa tripai ñi dungu. Tati pu che caiñetueyu ca quintuingün cangelu lonco ülmen. Femngechi Rehoboam tüngcülen ngüneniehuelai (1 Rey. 12:16-19).

13. ¿Chumngechi quimafuiñ ñi rüf eluucülen allcütual chi ngülam?

¹³ ¿Chem quimeltueiñmu ñi femün Rehoboam? Feipiliyiñ taiñ ngülamtungeal, dullinielayaiñ taiñ piuque mu taiñ chumal. Doi mai, eluucüleaiñ llohual chi ngülamtun. Mülei taiñ ramtuhual: “Feipifiel mu quiñe che ñi ngülamtuaeteu, huelu feipinoelimu ñi raquiduamnieel, ¿falintuhuequetulafiñ ñi ngülam?”.

14. Elungeliyiñ ngülam, ¿chem mülei taiñ acordayal? Feipinge quiñe ejemplo (ca inaduamnge ti adentun).

¹⁴ Raquiduamnge tüfachi dungu mu. Quiñe peñi feipingei ñi elungeal quiñe cüme cüdau. Feipingei tañi cüme cullingeal, huelu alüñma camapuleai tañi pu familia mu. Petu ñi llounofiel chi cüdau, feipifi quiñe loncolelu ñi ngülamaeteu. Biblia mu pengelelngei ñi doi falin-ngen quelluafiel ñi familia ñi fülcüleal Jehová mu (Efes. 6:4; 1 Tim. 5:8). Tüfachi peñi ayülafi chi ngülamtun, fei ayüniei ñi llohual chi cüdau. Feimu amulerpui ñi ramtun cañpüle, femngechi ñi feipingeal chem ñi ayünieel quisu. ¿Chem pimi? Tüfachi peñi, ¿eluucülefui ñi ngülamtungeal? ¿Cam deu quimniefui quisu ñi chumal? Loncontucunieaiñ, taiñ piuque ngünencayafeiñmu (Jer. 17:9). Quiñeque mu taiñ doi duamnieelchi ngülam ayüquelafiyiñ chi, huelu mülei taiñ cüme allcütuafiel.

FEIPILAYAFIYIÑ CAQUELU TAIÑ DULLILELAETEU TAIÑ CHUMAL

15. ¿Chem ngelai taiñ femal ca chumngelu?

¹⁵ Jehová ayüquei quisuque iñchiñ taiñ dullial taiñ chumal (Gál. 6:4, 5). Chumngechi ngüneduampeiñ, cümei ñi quintungeal ngülam Biblia mu ca quimque cristiano mu, huelu feipilayafiyiñ taiñ dullilelaeteu taiñ chumal. Maneluuliyiñ rume quiñe hueni mu, feipilayafuiñ: “Tüfachi dungu eimingele, ¿chem chumafuimi?”. Ca femlayaiñ ñi chumquen caquelu taiñ raquiduamnon mu.

16. ¿Chem mülefui ñi quisuque dullial tati pu Corinto cristiano? (1 Corintios 8:7; 10:25, 26).

¹⁶ Peaiñ chem ñi rupan hunen siglo Corinto trahunche mu. Pu cristiano mülefui ñi quisu dullial ñi iyafiel cam ñi inoafiel feichi ilo chalintucungequefui chi pu coilaque dios mu. Pablo feipi: “Iñchiñ quimnieiñ pu adentun chem dungu no tati, quiñe Ngünechen müten mülei” (1 Cor. 8:4). Feimu, quiñeque cristiano dulliafui ñi iyafiel müten tüfachi ilo chalintuculelngefui chi coilaque dios. Huelu caquelu cristiano dulliafui ñi inoafiel ñi tüngcüleal tañi raquiduam (papeltunge 1 Corintios 8:7; 10:25, 26). Quisuque pu cristiano mülefui ñi dullial chem ñi chumal. Pablo feipilafi pu cristiano ñi dullilelafiel caquelu chem ñi femal. Cafei feipilafi tañi inayentuafiel müten caquelu ñi femün. Doi mai, feipi: “Caque quiñeque iñchiñ juzgayaiñmeu Chau Ngünechen” (Rom. 14:10-12).

17. Inayentufiliyiñ caquelu ñi femqueel, ¿chem rupayafui? Feipinge quiñe ejemplo (ca inaduamnge ti adentun).

¹⁷ ¿Chem femngechi dungu rupayafui famülque meu? Raquiduamaiñ ti doi pichique troquiñ mollfüñ mu. Quisuque pu cristiano mülei tañi dullial ñi llohuafiel cam ñi llounoafiel raquiduamfiel mu Biblia ñi feipin.b Cüdautuafuiñ taiñ cüme adümafiel, huelu mülei taiñ ngüneduamafiel taiñ quisu dullial (Rom. 14:4). Femliyiñ müten ñi chumquen caquelu peñi ca lamngen, quim dullilayaiñ. Doi mai, mülei taiñ ngüneduamafiel Biblia taiñ quisuque dullial taiñ chumal, femngechi quimchengerpuaiñ (Heb. 5:14). Feimu dullialiyiñ quiñe dungu, mülei taiñ ngüneduamafiel Biblia ñi ngülam, fei hula feipiafuiñ quiñe doi quimchi peñi cam lamngen taiñ quelluaeteu taiñ doi cüme adümafiel chi dungu.

QUINTUNIEAIÑ NGÜLAM

18. ¿Chumquei Jehová iñchiñ meu?

¹⁸ Chau Jehová eluqueiñmu taiñ quisuque dullial, femngechi pengeli fente ñi maneluucülen iñchiñ mu. Feimu eluqueiñmu Biblia ca cümeque hueni, fei engün quelluqueiñmu taiñ adümal chumngechi inayafiel Biblia ñi ngülam. Femngechi Jehová cuñiutucuqueiñmu quiñe cüme chau reque (Prov. 3:21-23). ¿Chumngechi pengelelafuiñ taiñ fente mañumniefiel com taiñ eluqueteu?

19. ¿Chumngechi ayühulafuiñ Jehová?

¹⁹ Tati pu chau rume ayüuquei pefiel mu tañi pu yall ñi cüme tremcülen, ñi cüme hueniyefiel Jehová ca ñi quelluquefiel caquelu pu che. Ca femngechi Jehová rume ayüuquei taiñ peeteu taiñ doi cüme cristianongerpun, taiñ cüme allcütuquefiel ngülam ca taiñ cüme dulliqueel.