Quim ngülamtucheaiñ

1. ¿Inei mülei ñi ngülamtucheal? ¿Chumngelu?

QUIÑEQUE che cüdautuquelai tañi ngülamtucheal, huelu caquelu cüdautuquei. Femfule rume, quiñeque mu com mülei taiñ ngülamtucheal. ¿Chumngelu? Jesús feipi tañi piuqueyehun mu quimngeai tati pu rüfngechi cristiano (Juan 13:35). Duamnielu ñi ngülamtungeal quiñe peñi cam lamngen ngülamtufiliyiñ, pengelaiñ taiñ piuqueyefiel. Cafei, Biblia pengeli quiñe cüme huenihuen ngülamtuuquei rüf piuque mu (Prov. 27:9).

2. ¿Chem mülei ñi cüme femal pu loncolelu ca chumngelu? (Ca inaduamnge ti huichulechi dungu “Ti trahun rangiñ semana mu ngülamtungequeiñ”).

² Doyelchi mai pu loncolelu mülei ñi quim ngülamtuchefengeal, ¿chumngelu am? Jehová engu Jesús elfalcünueyu ñi cüme cuidañmangeal tañi trahunche (1 Ped. 5:2, 3). ¿Chumngechi femquei engün? Hulün mu hueupin Biblia mu tripalu, ngülamtuquefingün caque quiñeque pu peñi ca lamngen ca tati pu püntütripalu. ¿Chumngechi femafui pu loncolelu ca com iñchiñ taiñ hulal cümeque ngülamtun?

3. 1) ¿Chumngechi quimafuiñ taiñ hulal cümeque ngülam? (Isaías 9:6; ca inaduamnge ti huichulechi dungu “Ngülamtucheliyiñ, inayentuafiyiñ Jesús”). 2) ¿Chem peaiñ tüfachi troquiñ mu?

³ Taiñ doi cüme ngülamtucheal, ngüneduamafuiñ ñi femün quiñeque che tripalu Biblia mu. Doi cüme ngülamtuchefe ta Jesús. Biblia feipiquei “Afmatufal Ngülamtufe” (papeltunge Isaías 9:6). Tüfachi troquiñ mu peaiñ chem mülei taiñ femal ngülamtuen pingeliyiñ, ca chumngechi hulafuiñ ngülam ngülamtuen pingenoliyiñ rume. Ca peaiñ chumngelu fente falin-ngei taiñ cüme dullial chumtepu ca chumngechi taiñ hulal ti ngülam.

NGÜLAMTUEN PINGELIYIÑ, ¿CHUMAFUIÑ?

4, 5. Ngülamtuen pingeliyiñ, ¿chem ramtuhuafuiñ? Feipinge quiñe ejemplo.

⁴ Feipingeliyiñ taiñ hulal quiñe ngülam, feita ayühulafeiñmu taiñ quimche troquingeel, ca ayüafuiñ taiñ ngülamtufemafiel. Huelu hune ramtuhuafuiñ: “¿Cüme adümpefiñ tüfachi dungu tañi hulal ngülam?”. Cüme adümnofiliyiñ ti dungu, doi cümeafui quelluafiel taiñ hueni ñi peafiel quiñe che doi adümuulu.

⁵ Raquiduamnge tüfa: quiñe tami hueni huesa cutrancülei, feipieimu tañi ngüneduamün fillque tratamiento, huelu feipielmu tami ngülamtuafiel chuchi tañi dullial. Eimi doi ayüniefimi chi quiñe tratamiento, huelu medicongelaimi ca cüme adümuulaimi chi, feimu doi cümeafui quelluafiel tami hueni ñi peafiel quiñe che doi adümuulu.

6. ¿Chemu cümei taiñ ngülamtufemnoal?

⁶ Quiñeque mu adümuulu troquihuafuiñ taiñ ngülamtuafiel taiñ hueni. Femfule rume, cümeafui taiñ pichi üngümal taiñ ngülamtuafiel taiñ hueni, ¿chemu am? Biblia feipi: “Petu ñi huiñoldungunon, ti nor chengelu ñi piuque cüme raquiduamquei chem ñi feipial” (Prov. 15:28). Feimu adümfilu ti dungu troquiuliyiñ rume, doi cümeafui taiñ hune chillcatual, llellipuafiel Jehová ca cüme raquiduamal, femngechi taiñ ngülam nüucüleai Jehová tañi raquiduam mu.

7. ¿Chem quimeltueiñmu Natán ñi femün?

⁷ Raquiduamaiñ chem ñi rupan profeta Natán. Ti rey David feipilu ñi cüpa deumafiel ti templo Jehová ngealu, Natán feipifemfi ñi cümen tañi femal müten, huelu Jehová dullilafi David tañi femal ti templo. Feimu, Natán petu ñi huiñoldungunofiel ta David, mülefui tañi hune ngüneduamafiel ñi chem pifel Jehová (1 Crón. 17:1-4). ¿Chem quimeltuqueiñmu tüfa? Quiñe hueni ngülamtuen pile, ‘matucaulayaiñ taiñ dungual’ (Sant. 1:19).

8. ¿Ca chemu cuñiutucuhuafuiñ taiñ ngülamtual?

⁸ Ca quiñe dungu mu mülei taiñ cuñiutucuhual petu taiñ hulnon quiñe ngülam. Huesa ngülamtufiliyiñ quiñe che, fei huesa tripale, iñchiñ culpaconafuiñ. Feimu llemai rume falin-ngei taiñ cüme raquiduamal petu taiñ hulnon quiñe ngülam.

NGÜLAMTUEN PINGENOLIYIÑ, ¿CHUMAFUIÑ?

9. Petu tañi ngülamtunon, ¿chem mülei ñi cüme ngüneduamal pu loncolelu? (Gálatas 6:1).

⁹ Quiñeque mu tati pu loncolelu mülei ñi ngülamtuafiel quiñe peñi cam lamngen “cüme miyaunolu” (papeltunge Gálatas 6:1). Quiñe che cüme miyaunolu, cüme dullilayafui ñi femün, fei fütra culparpuafui. Tati pu loncolelu eluucülei ñi quelluafiel feichi pu cristiano tañi serfinieafiel Jehová ca tañi nierpual rumel mongen (Sant. 5:19, 20). Tati pu loncolelu quimtucunieingün com pu cristiano trürlai ñi raquiduam, feimu caquerumeafui ñi dulliquen tañi mongen mu. Feimu petu tañi ngülamtunon, cüme ngüneduamaingün tati peñi cam lamngen ñi rüf huelulcaupen mai (Rom. 14:1-4). Huelu tati pu loncolelu ngüneduamle rüf tañi huelulcan, ¿chumngechi doi cüme ngülamtuafuingün?

10-12. ¿Chem mülei ñi femal pu loncolelu ngülamtuen pingenole? Feipiaimi quiñe pengelün dungu (ca inaduamnge ti adentun).

¹⁰ Tati pu loncolelu duamün tami ngülam pingenole, doi cüdautuafui ñi ngülamtual. ¿Chumngelu? Pablo feipi quiñe cristiano cüme miyaulayafui tañi ngüneduamnon mu. Feimu petu ñi ngülamtunofiel quiñe che, pu loncolelu mülei ñi femal quiñeque dungu, femngechi quelluafui pu che ñi doi eluucüleal tañi ngülamtungeal.

¹¹ Raquiduamaiñ quiñe ejemplo mu. Quiñe peñi nganquelu ti semilla quiñe yafü mapu meu. Petu ñi tucunon ti semilla, pepicaquefi ti mapu, fei hula tucuquei ti semilla, cafei hutrucoquefi. Ca femngechi tati pu loncolelu ngülamtuen pingenolu, mülei ñi femal quiñeque dungu, femngechi tati che doi eluucüleai tañi ngülamtungeal. Tati loncolelu feipiafui tañi duamtufiel, feimu cüpa nütramcaeyu piafui. Tati loncolelu quimngele tañi poyechefengen, caquelu eluucüleaingün tañi allcütuaeteu.

¹² Tati nütramcan mu ti loncolelu feipiafui: “Com iñchiñ huelulcauqueiñ, feimu duamnieiñ taiñ ngülamtungeal”. Femngechi tati che doi eluucüleafui tañi allcütuaeteu (Rom. 3:23). Fei Biblia mu piuqueyenquechi ca yamquechi pengelelafi chem dungu mu ñi huelulcahun. Tati peñi cam lamngen ngüneduamle ñi huelulcan, fei ti loncolelu feipiayu chumngechi ñi norcünutual ñi femün, femngechi tati nganfe reque tucui ti semilla. Afal chi nütramcan, ti loncolelu saquiafi ti caquelu dungu ñi cüme femquen, trür llellipuafuingu, femngechi ti nganfe reque hutrucoafui (Sant. 5:15).

13. Pu loncolelu, ¿chumngechi ngüneduamafui ñi cüme adümüñmangen ñi ngülam?

¹³ Quiñeque rupa, tati ngülamtungelu cüme adümlayafui chem tañi feipingeel. ¿Chem femafui pu loncolelu tañi femngechi rupanoal? Piuqueyenquechi entuafui quiñeque ramtun, fei ngüneduamafui ñi adümel ti ngülam, fei ñi inayafiel (Ecl. 12:11).

TÜNGCÜLEN CA PIUQUEYEN MU HULAIÑ TI NGÜLAM

14. ¿Chemu cümelai illcunquechi ngülamtual?

¹⁴ Com iñchiñ culpafe chengeiñ, feimu huesa duamelafuiñ caquelu taiñ feipin ca taiñ femün mu (Col. 3:13). Biblia feipi quiñeque mu hueluquentu illcutuhuafuiñ (Efes. 4:26). Huelu cümelai taiñ ngülamtual illculen mu, ¿chemu? “Tati illcufe inaquelai Chau Dios ñi norngechi dungu” (Sant. 1:20). Illcunquechi ngülamtuliyiñ, doi huesalcalerpuafui ti dungu. Feipiafuiñ tati che taiñ huesa duameleteu, huelu doi cümeafui taiñ tüngcületual taiñ feipiafiel.

15. ¿Chem quimeltueiñmu Elihú tañi femün? (Ca inaduamnge ti adentun).

¹⁵ Peaiñ chem quimeltueiñmu Elihú ñi cüme ngülamtufiel Job. Fentren antü Job incahui tañi feipintucueteu mu tañi pu coilaque hueni. Elihú ca allcütulefui, fei cutranpiuqueyefi Job. Huelu Job tañi incahual, feipi quiñeque dungu Jehová mu rüfngenolu, feimu Elihú rume illcui. Huelu Elihú matucaulai tañi dungual, doi mai tüngcületulu, fei hula yamquechi ngülamtufi (Job 32:2; 33:1-7). Tañi femün quimeltueiñmu quiñe falin dungu. Taiñ ngülamtual quiñe che, mülei taiñ tüngcüleal. Cafei, piuqueyen mu ca yamün mu hulaiñ ti ngülam (Ecl. 3:1, 7).

NGÜLAMTUCHEAIÑ CA ALLCÜTUAIÑ NGÜLAM

16. ¿Chem quimeltueiñmu Salmo 32:8?

¹⁶ Chau Jehová feipieiñmu: “Ngülamtuayu iñche ñi adquiñ mu” (papeltunge Salmo 32:8). Tüfa pengeli deu taiñ ngülamtueteu Jehová, quelluniequeiñmu taiñ inanieafiel ti ngülam. ¿Chumngechi inayentuafuiñ Jehová? Deu taiñ ngülamtufiel quiñe che, yafültucunieafiyiñ ca quellunieafiyiñ ñi inayafiel ti ngülam.

17. Pu loncolelu ngülamtueteu Biblia mu, ¿chum duamelqueiñmu? (Isaías 32:1, 2).

¹⁷ Famülque mu, doi falin-ngei taiñ hulal cümeque ngülam ca taiñ ngülamtungeal (2 Tim. 3:1). Tati pu loncolelu hulqueingün cümeque ngülam Biblia mu tripalu, femngechi füshcüduamelqueiñmu ca quelluqueiñmu taiñ serfinieafiel Jehová. Feimu trürümngei “huitrunco reque quiñe ancülechi troquiñ mapu mu” (papeltunge Isaías 32:1, 2). Mañumcüleiñ taiñ pu hueni eluqueteu cümeque ngülam taiñ duamnieel. Tañi feipin ayüfali ca rume falin-ngei “milla manzana reque mülelu plata rali mu” (Prov. 25:11). Feimu llemai, amulepe taiñ cüme ngülamtucheal ca taiñ allcütual cümeque ngülam.