TROQUIÑ ÑI CHILLCATUNGEAL 33
ÜLCANTUN 4 Jehová iñche ñi Camañfe
Maneluunge tami piuqueyenieteu Jehová
“Nor piuqueyen mu cüpaleyu iñche meu” (JER. 31:3).
¿CHEM QUIMAIÑ?
Chumngelu falin-ngei taiñ maneluhual Jehová taiñ piuqueyenieteu ca chumngechi femafuiñ.
1. ¿Chemu hultucuimi tami mongen Jehová mu? (Ca inaduamnge ti adentun).
¿ACORDAIMI ti antü tami hultucuel tami mongen Jehová mu? ¿Chumngelu femimi? Tami quimfiel Jehová ca tami piuqueyerpufiel. Feimu feipicünufimi tami serfiafiel doi falin-ngei tami mongen mu ca tami piuqueyeafiel com tami piuque mu, com tami mongen, com tami raquiduam ca com tami nehuen meu (Mar. 12:30). Amuleyechi antü mu, tami piuqueyefiel doi tremürpui. Ramtungelmi tami piuqueyefiel Jehová, feipifemafuimi: “Piuqueyeniefiñ llemai, Chau Jehová hunelei tañi piuque mu”.
¿Acordaimi tunte tami piuqueyeniefiel Jehová hultuculu tami mongen ca fautizaulu? (Inaduamnge parrafo 1).
2, 3. 1) ¿Chem ayüniei Jehová taiñ maneluucüleal? (Jeremías 31:3). 2) ¿Chem peaiñ tüfachi troquiñ mu?
2 Huelu ramtungelmi tami piuqueyeteu Jehová, ¿chem huiñoldunguafuimi? Doi cüdaungeafui tami huiñoldungual. Raquiduamafuimi chi: “Fente cüme chengenolu am iñche, ¿piuqueyepeneu mai Jehová?” piafuimi chi. Quiñe lamngen piuqueyengelai petu pichicalu, feimu feipiquei: “Iñche rume piuqueyeniefiñ ta Jehová. Huelu quiñeque mu ramtuuquen: ‘¿Fei piuqueyepeneu mai iñche?’”. ¿Chem quelluafeimu tami ngüneduamal Jehová tami piuqueyenieteu?
3 Chau Jehová ayüniei tami rüf maneluhual tami piuqueyeteu (papeltunge Jeremías 31:3). Jehová eluhui tami quimafiel ca tami hueniyeafiel. Hultuculu tami mongen ca fautizaulu eimi, Chau Jehová nor piuqueyeimu. Tüfa quiñe falin regalo. Feita pengeli tami rume piuqueyeteu, fei chumcaunorume quisucünulayaimu. Jehová dullifi tañi pu poyequeteu “tañi saquin pu chengerpual”. Eimi ca femngechi troquiqueimu (Mal. 3:17). Jehová ayüniei tami raquiduamcüleal apostol Pablo reque. Fei feipi: “Rüf maneluucülen chem no rume catrütulayafi Chau Ngünechen taiñ piuqueyeaeteu: lan no rume, mongen no rume, chem püllü no rume, chem gobierno no rume, ti müleyechi dungu ca cüpaleyechi dungu no rume, chem nehuen no rume, tati alüpüralechi dungu ca tati alüconlu no rume, chem no rume ñi deumael Chau Ngünechen. Chem no rume catrütulayafui Chau Ngünechen taiñ piuqueyeaeteu” (Rom. 8:38, 39). Tüfachi troquiñ mu, ngüneduamaiñ chemu fente falin-ngei maneluucüleal Jehová taiñ piuqueyeteu ca chumngechi femafuiñ.
¿CHUMNGELU DUAMNIEIÑ QUIMTUCUAL JEHOVÁ TAIÑ PIUQUEYETEU?
4. ¿Chem coila entuquei Huecüfü ca chumngechi famentuafuiñ?
4 Quimtucunieliyiñ Jehová taiñ piuqueyenieteu, ‘nehuentuleaiñ tati Huecüfü ñi fillque ngünen mu’ (Efes. 6:11). Huecüfü femquei fillque dungu taiñ serfihuenoafiel Jehová. Quiñe tüfa, cüpa raquiduamelqueiñmu taiñ piuqueyenoeteu Jehová. Huelu feita quiñe fütra coila. Huecüfü ca trürümngei quiñe trapial mu (1 Ped. 5:8, 9). Ti trapial lloftuquefi pu culliñ nehuen-ngenolu tañi lümüafiel. Ca femngechi Huecüfü allmalltuquei nehuen-ngenolu iñchiñ. Huesa duamcüleliyiñ taiñ huesa rupan cuifi cam feula cam fill raquiduamcüleliyiñ cüpalechi antü mu, Huecüfü lloftulei taiñ püntünentuaeteu Jehová mu (Prov. 24:10). Huelu quimtucunieliyiñ Jehová taiñ piuqueyeteu, famentuafiyiñ Huecüfü ñi ngünencan (Sant. 4:7).
5. ¿Chumngelu duamnieiñ quimtucual Jehová taiñ piuqueyeteu?
5 Quimtucunieliyiñ Jehová taiñ piuqueyeteu, doi cüme hueniyeafiyiñ. ¿Chemu feipiafuiñ? Chumngechi taiñ deumaeteu Jehová, duamqueiñ taiñ piuqueyecheal ca taiñ piuqueyengeal. Feimu quiñe che piuqueyeiñmu, taiñ piuque mu tripaquei taiñ ca femngechi piuqueyeafiel. Feimu doi quimtucunieliyiñ Jehová taiñ piuqueyeteu, iñchiñ ca femngechi doi piuqueyeafiyiñ (1 Juan 4:19). Tüfa epuñpüle amulei. Feimu doi piuqueyefiliyiñ Jehová, fei doi piuqueyeaiñmu iñchiñ. Biblia feipi: “Fülconmün Chau Ngünechen mu, fei fülconai ta eimün meu” (Sant. 4:8). ¿Chem quelluaiñmu taiñ doi maneluhual taiñ piuqueyeteu Jehová? Peafiyiñ.
¿CHUMNGECHI DOI MANELUHUAFUIÑ TAIÑ PIUQUEYETEU JEHOVÁ?
6. Müte quimtucunolmi tami piuqueyeteu Jehová, ¿chumafuimi?
6 Llellipunieafimi Jehová tami adümal chemu tami piuqueyeteu (Luc. 18:1; Rom. 12:12). Fill antü fentren rupa llellipuafuimi Jehová tami quelluaeteu tami quimtucunieal tami piuqueyeteu. Quiñeque mu huesa duamafuimi tami chumngechi chengen, feimu “piuqueyelaeneu Jehová” piafuimi chi. Huelu loncontucunge, “Chau Ngünechen doicülei iñchiñ taiñ piuque mu” (1 Juan 3:19, 20). Chau Jehová puquintuniequei fillque cümeque dungu tami nieel piuque mu, eimi tami quimquenoel rume (1 Sam. 16:7; 2 Crón. 6:30). Feimu feipifinge Jehová tami chum duamcülen, ca “raquiduamtuculelen tami piuqueyen” piafimi (Sal. 62:8). Deu llellipuliyiñ, ¿chem mülei taiñ femal? Peafiyiñ.
7, 8. Ñi feipin ti salmo, ¿chumngechi pengeli Jehová taiñ piuqueyeteu?
7 Piuquentucufinge tami feipieteu Jehová Biblia mu. Jehová tañi nehuen mu adniefi quiñeque huentru ñi huirintucual Biblia, feimu rüfngei ñi feipin. Quiñe tüfa ta David, fei huirintucui: “Jehová fülmaniequefi com pu hueñancülelu ñi piuque; ca montulquefi com pu huesa duamcülelu” (Sal. 34:18). Femngechi duamcülelmi, quisulelu troquihuafuimi chi. Huelu quisulelaimi llemai, Chau Jehová feipicünui tami afcadinieaeteu. David huirintucui: “Tami trülque metahue mu ngülümüñmaen tañi cülleñu” (Sal. 56:8). Cuifi mu, quiñe che miyaulu desierto mu yequefui trülque metahue tañi nieal co. Com ti co falin-ngefui, rume pichin-ngefule rume. Ca femngechi Jehová puquintuniei ngüman mu iñchiñ. Fei rume falintuquefi taiñ cülleñu, ngülümquefi reque. David ca feipifi Jehová: “Cüme quimnieimi com tañi femqueel iñche” (Sal. 139:3). Felei llemai, Chau Jehová puquintuniei com taiñ femqueel. Huelu doi ngüneduamquei taiñ cüme femqueel (Heb. 6:10). ¿Chumngelu? Quisu rume falintuquei com taiñ femqueel taiñ ayühulafiel.a
8 Feitachi versiculo mu, Jehová feipiqueiñmu reque: “Iñche rume piuqueyenieyu ca falintuqueyu”. Huelu taiñ peel rupachi parrafo mu, Huecüfü cüpa raquiduamelqueiñmu taiñ piuqueyenoeteu Jehová. ¿Inei feyentuafimi cai? ¿Tati Huecüfü feichi fütra coilatufe, cam Chau Jehová manelfalngelu? Quiñeque mu piuqueyenoeteu Jehová troquihulmi, raquiduamnieafimi tüfachi ramtun (Sal. 31:5; Juan 8:44).
9. ¿Chem feipicünufi Jehová tañi pu piuqueyeteu? (Éxodo 20:5, 6).
9 Raquiduamnge chum duamquei Jehová tañi pu piuqueyeteu mu. Inaduamaiñ chem feipifi Jehová ta Moisés ca pu Israel che (papeltunge Éxodo 20:5, 6). Chau Jehová feipicünui ñi rumel piuqueyeafiel tañi pu piuqueyeteu. Nor piuquengelu am, feimu chumcaunorume catrütuuquelai ñi pengelelafiel piuqueyen tañi pu piuqueyeteu (Neh. 1:5). Feimu “¿piuqueyepeneu mai Jehová?” pilmi, ramtuhuafuimi “¿iñche cai piuqueyeniefiñ?”. Loncontucunienge: piuqueyeniefilmi Jehová ca cüpa ayühulfilmi, maneluhuafuimi ca tami piuqueyeteu (Dan. 9:4; 1 Cor. 8:3). Tüfa pengeli eimi piuqueyefilmi Chau Jehová, ¿chumngechi piuqueyelayafeimu cai? Felei llemai, Jehová rumel piuqueyeimu ca turpu quisucünulayaimu.
10, 11. ¿Chem ayüniei Jehová tami quimtucual Jesús tañi lan mu? (Gálatas 2:20).
10 Raquiduamnge Jehová ñi hultucun tañi Fotüm. Jehová huercüi tañi Fotüm ñi lapayal iñchiñ mu. Tüfa tati doi falin-ngechi regalo taiñ elueteu (Juan 3:16). Chau Jehová ca huercüi tañi Fotüm eimi tami duam mu. Raquiduamaiñ ñi rupan Pablo. Petu ñi cristianongenon, femquefui huesaque dungu. Ca deu cristianongerpulu, ca mülefui ñi chaftunieafiel ti culpan dungu (Rom. 7:24, 25; 1 Tim. 1:12-14). Huelu quimtucui Jesús ñi lan quisu tañi duam mu (papeltunge Gálatas 2:20). Jehová adniefi Pablo ñi huirintucual tüfachi dungu Biblia mu, feimu mülei iñchiñ taiñ quimeltungeal (Rom. 15:4). Jehová ayüniei tami quimtucual Jesús tañi lan eimi tami duam mu. Femngechi raquiduamülmi, doi maneluhuaimi tami piuqueyenieteu Chau Jehová.
11 Rume mañumquefiyiñ Chau Jehová hultuculu ñi Fotüm iñchiñ mu. Huelu ca quiñe dungu mu cüpai Jesús mapu mu: ñi quimeltual ti rüf dungu tañi Chau mu (Juan 18:37). Jesús quimeltui tunte ñi piuqueyefiel Jehová tañi pu che.
JESÚS QUIMELTUEIÑMU TUNTE TAIÑ PIUQUEYENIETEU JEHOVÁ
12. ¿Chumngelu manelfali Jesús ñi feipin tañi Chau mu?
12 Mülepalu Jesús mapu mu, ayühunquechi quimeltuchequefui ñi chumngen tañi Chau (Luc. 10:22). Manelfali llemai Jesús ñi feipin Jehová mu, ¿chumngelu? Rume fentren tripantu cai mülelu tañi Chau engu huenu mu, feimu rume cüme quimniefi (Col. 1:15). Jesús quimniei tunte ñi piuqueyeteu tañi Chau. Jesús ca ngüneduami Jehová ñi piuqueyefiel tañi pu poyequeteu mülelu huenu ca mapu mu. Inaduamaiñ ñi quimeltuel Jesús pengeli Jehová taiñ piuqueyeteu.
13. Jesús, ¿chem cüpa quimeltueiñmu Jehová mu?
13 Jesús poyen-ngechi Chau troquiniefi Jehová. Ayüniei iñchiñ taiñ ca femngechi troquinieafiel tañi Chau. Tati Evangelio mu, fentren rupa Chau pifi ta Jehová. Mülelu tañi pu discipulo engün, fentren rupa feipi “tamün Fütra Huenu Chau” ca “tamün Huenu Chau” (Mat. 5:16; 6:26). Petu ñi mülepanon Jesús mapu mu, pu serfiquefilu Jehová feipiquefuingün “Com Nehuen Nielu”, “Doi Alüpüralelu”, “Doi Fütra Deumaeteu” ca caquelu üi feipingequefui. Huelu Jesús Chau feipiquefui. Tüfa pengeli Jehová ayüniei taiñ pülleleal quisu mu chumngechi quiñe pichiche püllelei tañi chau mu. Ngüneduamaiñ epu rupan dungu Jesús ñi Chau pifiel ta Jehová.
14. Jesús, ¿chumngechi pengeli taiñ falintuqueteu Jehová? (Mateo 10:29-31; ca inaduamnge ti adentun).
14 Hune, ngüneduamaiñ ñi feipin Jesús Mateo capitulo 10 (papeltunge Mateo 10:29-31). Jesús feipi Chau Jehová quimniei quiñe pichi üñüm ütrüfnaglu mapu mu. Ti pichi üñüm poyequelafi Jehová, huelu Jehová falintuqueyu. Doyelchi mai falintuqueiñmu iñchiñ taiñ poyequefiel. Jesús ca feipi Jehová raquiniei com taiñ cal lonco. Taiñ quimüñmaqueteu Jehová doi pichique dungu cütu, pengeli fente taiñ duamtuqueteu. Felei llemai, Jesús cüme quimfalcünueiñmu taiñ rume falintuqueteu Jehová caque quiñeque iñchiñ.
Jehová falintuquei pichique üñüm, ngüneduamquei ütrüfnaglu mapu meu. Doi mai, eimi doi falintunieimu tami poyequefiel mu. (Inaduamnge parrafo 14).
15. Jesús ñi feipin tañi Chau mu, ¿chem raquiduameleiñmu? (Juan 6:44).
15 Peaiñ ca quiñe dungu ñi quimeltun Jesús tañi Chau mu (papeltunge Juan 6:44). Tami Fütra Chau ngüneduami tami cüme piuquengen, feimu quellueimu ñi quimafiel ca piuqueyeafiel (Hech. 13:48). Juan capitulo 6, versiculo 44 mu, Jesús acordaniepelai ñi feipingeel Jeremías mu. Tüfa mu Jehová feipifi tañi pu che: “Nor piuqueyen mu cüpaleyu iñche meu” (Jer. 31:3; ca ngüneduamafuimi Oseas 11:4). Taiñ poyen Chau Jehová ngüneduamquei fillque cümeque dungu taiñ nieel piuque mu, iñchiñ taiñ pequenoel rume.
16. 1) ¿Chem quimeltuqueiñmu Jesús ca chemu manelfali? 2) ¿Chem femafuiñ taiñ doi maneluhual Jehová tati doi cüme Chaungen? (Inaduamnge ti huichulechi dungu “Jehová fei tati doi cüme Chau”).
16 Jesús feipilai iñche tañi Chau müten, doi mai feipi eimi tami Chau. Jesús ayüniei taiñ maneluhual Jehová taiñ rume piuqueyeteu ca taiñ duamtuqueteu. Feimu piuqueyenoeteu Jehová troquihulmi, ¿chumafuimi? Raquiduamnge tüfa: Jesús coilatuquelai ca rume cüme quimniefi tañi Chau. Feimu feipilu taiñ piuqueyeteu Jehová, ¿rüfngenoafulu am? (1 Ped. 2:22).
DOI MANELUUNGE TAMI PIUQUEYENIETEU JEHOVÁ
17. ¿Chumngelu mülei taiñ doi maneluhual Jehová taiñ piuqueyeteu?
17 Acordayaiñ, Huecüfü femquei chem dungu rume taiñ püntünentuaeteu Jehová mu. Feimu taiñ huesa duamelaeteu, cüpa raquiduamelqueiñmu taiñ piuqueyenoeteu Jehová. Huelu re coilatumequei, feyentulayafiyiñ (Job 27:5). Feimu llemai, eluhuaiñ taiñ doi maneluhual Jehová taiñ piuqueyeteu.
18. ¿Chem femafuimi tami doi maneluhual tami piuqueyeteu Jehová?
18 Tüfachi troquiñ mu, quimürpuiñ chem femafuiñ taiñ doi maneluhual Jehová ñi piuqueyen mu. Llellipuafimi tami adümal chemu tami piuqueyeteu. Loncontucuaimi tati texto pengelquelu Jehová ñi duamtuquefiel tañi pu che. Ngoimaquilnge, Jehová piuqueyeniefi tañi pu piuqueyenieteu. Acordanieaimi, hultucui tañi Fotüm eimi tami duam mu. Maneluunge Jehová eimi tami Chau chumngechi feipi Jesús. Feimu ramtungelmi: “¿Feyentuquepeimi mai tami piuqueyeteu Jehová?”, ¿chem huiñoldunguafuimi? “Femquen llemai, iñche rume piuqueyeniefiñ. Fill antü yafüluuquen ñi pengelelafiel”.
ÜLCANTUN 154 Ti piuqueyechen aflayai
a Tami inaduamal caquelu versiculo pengelquelu Jehová ñi piuqueyechequen, peafimi ti troquiñ “Falinolu troquiuliyiñ” mülelu ti lifru Biblia ñi ngülam adniequeiñmeu.