TROQUIÑ ÑI CHILLCATUNGEAL 41
ÜLCANTUN 108 Chau Dios nor piuqueyechengei
Jehová tañi piuqueyechen afquelai
“ Jehová cüme piuquengei, feimu mañumafimün; aflayai taiñ nor piuqueyeaeteu” (SAL. 136:1).
¿CHEM QUIMAIÑ?
Loncontuculiyiñ ñi feipin Biblia Jehová ñi piuqueyechequen, quelluaiñmu taiñ nehuencüleal rupan mu huesaque dungu.
1, 2. ¿Chum duamcülequei fentren cristiano quiñeque mu?
RAQUIDUAMNGE ti farcu miyaulu lafquen mu. Mülele fütra cürüf tati reu nengümafeyu huallque püle, fei duamniefui quiñe ancla tañi nor amuleal.
2 Petu rupan mu cüdaungechi dungu, feiti farcu reque feleafuimi. Mülelu rangi quiñe fütra cürüf mu troquihuafuimi. Quiñe antü maneluhuafuimi tami piuqueyeteu Jehová ca tami quelluqueteu, huelu ca antü müte femlayafuimi chi. “¿Jehová mai ngüneduampei tañi femngechi rupamequen?” piafuimi chi (Sal. 10:1; 13:1). Yafültucuelmu quiñe hueni, cüme duamafuimi pichiñma mu (Prov. 17:17; 25:11). Huelu ca huiño fill raquiduamcüleafuimi chi, ca raquiduamafuimi Jehová tami duamtuhuenoeteu. Tati farcu reque duamnielu quiñe ancla, ¿eimi mu chem dungu ancla reque feleafui rupan mu huesaque dungu? Elcünulayaimi tami maneluucülen Jehová tami piuqueyenieteu, ¿chem quelluafeimu tami femal?
3. 1) ¿Chem cüpa feipi ti nor piuqueyen? (Salmo 31:7; 136:1). 2) ¿Chemu feipiafuiñ Jehová ñi hunelen tañi nor piuqueyequen? (Ca inaduamnge ti adentun).
3 Quiñe dungu tami quelluafeteu rupan mu huesa dungu meu: raquiduamal Jehová tañi nor piuqueyen mu (papeltunge Salmo 31:7; 136:1). Biblia feipilu nor piuqueyen, raquiduamafuiñ epu che epuñpüle ñi rume piuqueyeuquen ca tañi quisucünuuquenon. Jehová hunelei tañi nor piuqueyechen, Biblia feipi Jehová “rume piuqueyechequei” (Éx. 34:6, 7). Ti salmista ca feipifi ta Jehová: “Tami nor piuqueyen alün-ngei com tami pu ngillatuqueteu mu” (Sal. 86:5). ¿Chem quimeltueiñmu? Jehová turpu elcünuquelafi tañi pu serfiqueteu. Ngüneduamcülelmi Jehová ñi femngen, fei quiñe ancla reque feleafui rupalmi huesaque dungu mu, fei cüme raquiduamcüleaimi (Sal. 23:4).
Müleyüm cürüftucu mahun, ti ancla quelluquefi ti farcu amuconnoal lafquen mu. Ca femngechi maneluuliyiñ Jehová ñi poyen mu, nehuentucuaiñmu rupaliyiñ huesaque dungu mu. (Inaduamnge parrafo 3).
ACORDANIEAIMI BIBLIA PENGELI ÑI RÜFNGEN JEHOVÁ TAÑI PIUQUEYECHEN
4. Hue chillcatulu Biblia iñchiñ, ¿chem dungu quimürpuiñ, ca chumngelu fente maneluuqueiñ?
4 Tami nehuencüleal rupan mu huesaque dungu, acordayafuimi Biblia pengeli ñi rüfngen Jehová ñi piuqueyechen. Eimi hue chillcatulu Biblia, quimürpuimi Jehová tañi piuqueyechequen. Ca quimürpuimi Chau Dios tañi Jehová pingen, Jesús Chau Dios tañi Fotümngen, ca tati pu la tañi quimhuetuquenon, ca tañi mületual tati hue mapu cheu tañi rumel mongeleal pu che (Sal. 83:18; Ecl. 9:5; Juan 3:16; Apoc. 21:3, 4). Eimi deu quimfilu feitachi quimeltun, eluucülefuimi tami elcünunoal tami quimürpuel, ¿chemu? Ngüneduamimi tañi rüfngen. Ca femngechi acordanieliyiñ ñi rüfngen Jehová taiñ piuqueyeteu, raquiduamlayaiñ taiñ duamtuquenoeteu. Feula doi ngüneduamafuiñ.
5. ¿Chumngechi famentungeafui ti coilaque quimeltun?
5 Hue chillcatulu Biblia eimi, ¿chem quellueimu tami famentuafiel ti coilaque quimeltun? Trürümpelafimi chem tami quimeleteu Biblia ca chem tami quimelngequefel tami cuifi religion mu. Peaiñ quiñe pengelün dungu. Eimi quimeltungeimi chi Jesús tañi Dios ngen, huelu chillcatufilu Biblia eimi, ramtuhuimi tañi rüfngen feichi quimeltun. Fei doi cüme ngüneduamfiel mu Biblia, quimürpuimi Jesús tañi Dios ngenon. Femngechi elcünufimi tami quimeltungequefel, fei adümürpuimi Jesús “Chau Ngünechen ñi quiñen Fotüm”, “tati hunelu ñi deumael Chau Ngünechen” (Juan 3:18; Col. 1:15). Tati cuifi quimeltun foliluucülequei reque, feimu cüdaungeafui tañi elcünungeal (2 Cor. 10:4, 5). Eimi deu quimfilu tati rüf dungu, huiño feyentuhuelaimi tati coilaque quimeltun (Filip. 3:13).
6. ¿Chemu maneluhuafuimi Jehová “aflayai taiñ nor piuqueyeaeteu”?
6 Ca femngechi femafuimi tami doi maneluhual Jehová tañi piuqueyechen mu. Rupan mu huesaque dungu, ¿piuqueyepeneu mai Jehová? piafuimi chi. Huelu cümeafui tami ramtuhual: “¿Cümepei mai tañi femngechi raquiduamcülen?”. Fei raquiduamnge ñi feipin Salmo 136:1. Ramtuhuafuimi: “¿Chumngelu feipi Jehová ‘aflayai taiñ nor piuqueyeaeteu’? ¿Chemu fentren rupa feipingei feitachi salmo mu?”. Taiñ ngüneduampeel, hue chillcatulu Biblia eimi, pürüm feyentuimi fentren quimeltun. Ca femngechi mülei tami piuquentucunieal Jehová tañi piuqueyechen. Jehová tañi piuqueyechequenon feita coila quimeltun, famentufemfinge feichi quimeltun chumngechi tami femquen caquelu coilaque quimeltun.
7. Feipiaimi quiñeque versiculo pengelquelu Jehová tami piuqueyeteu.
7 Biblia doi quimfalcünui Jehová taiñ piuqueyeteu. Jesús feipifi tañi pu inanieteu: “Eimün doi falimün ta com feiti pichique üñüm meu” (Mat. 10:31). Jesús feipilai “eimün doi falipelaimün”, doi mai cüme quimfalcünui tañi falin-ngen engün. Jehová ca feipifi tañi pu che: “Iñche nehuentucuayu. Mai, iñche quelluayu. Nünieayu tañi man cuhu mu” (Is. 41:10). Jehová feipilai “quelluafeyu chi”, doi mai feipicünui tañi femal. Feimu rupan mu cüdaungechi dungu meu, ñi feipin tüfachi versiculo quelluafeimu tami rüf maneluucüleal Jehová tami piuqueyeteu. Tüfachi pu versiculo pengeli ñi rüfngen Jehová tañi piuqueyechen. Ca mülei tami llellipuafiel Jehová ca raquiduamal tüfachi pu versiculo meu. Femngechi feipiafuimi: “Iñchiñ quimürpuiñ taiñ piuqueyenieteu Chau Ngünechen, fei feyentuqueiñ tañi piuqueyechen mu” (1 Juan 4:16).a
8. Piuqueyenoeteu Jehová troquiucülelmi, ¿chumafuimi?
8 Huelu amulele tami raquiduamcülen tami piuqueyenoeteu Jehová, ¿ca chem femafuimi? Trürümnge chem tami raquiduamcülen ca tami quimtucunieel Jehová meu. Tami raquiduam calerumetuafui, feimu ngünencayafeimu. Huelu Biblia ñi feipin manelfali, feimu rüfngei taiñ piuqueyenieteu Jehová Biblia am feipilu. Feyentunoliyiñ Jehová taiñ piuqueyeteu, rulpacünuafuiñ Jehová tañi rüf piuqueyechequen, tüfa tati doi falin-ngelu ñi chumngen (1 Juan 4:8).
RAQUIDUAMNGE JEHOVÁ TAMI RUME PIUQUEYENIETEU
9, 10. Jesús feipilu “tañi Chau piuqueyeimünmeu”, ¿chem nütramcafui? (Juan 16:26, 27; ca inaduamnge ti adentun).
9 Entuafuiñ alün quimeltun Jesús ñi feipifiel mu tañi pu inanieteu: “Tañi Chau piuqueyeimünmeu” (papeltunge Juan 16:26, 27). Jesús feipilai tüfa re tañi cüme duamelafiel tañi pu discipulo. Feichi mu Jesús nütramcamequelafui tañi chum duamcülen engün, doi mai tati llellipun mu.
10 Jesús hue feipifui tañi pu discipulo ñi llellipual fei tañi üi mu, huelu feipilai fei tañi llellipungeal (Juan 16:23, 24). Falin-ngefui tañi quimal engün feichi dungu. Huiñomongetule Jesús, eluhuafuingün chi tañi llellipuafiel quisu, ¿chumngelu? Fei engün hueniyefuingün ta Jesús, fei raquiduamafuingün chi: “Jesús fente taiñ piuqueyeteu, allcütuaiñmu taiñ llellipun, fei ñi feipiafiel tañi Chau taiñ quelluaeteu”. Huelu Jesús feipieyu tañi femngechi raquiduamnoal engün, feimu feipi: “Tañi Chau piuqueyeimünmeu”. Femngechi feipicafi reque: “Tañi Chau ca femngechi rume piuqueyeimünmeu, feimu fei llellipuafimün”. Jesús ñi feipin, ¿chem quimeltuqueiñmu iñchiñ? Chillcatufiel mu Biblia, quimürpufimi Jesús ca piuqueyerpufimi, quimnieimi tami ca piuqueyenieteu (Juan 14:21). Huelu pu discipulo reque, quimtucunieaimi Jehová ca piuqueyenieimu. Feimu loncontucunielmi tüfa, maneluhuafuimi tami allcütuñmayaeteu tami llellipun (1 Juan 5:14).
Quimnielu am eimi Jehová tami poyenieteu, llellipuafuimi com piuque mu. (Inaduamnge parrafo 9, 10).b
¿CHEM DUNGU RAQUIDUAMELAFEIMU TAMI PIUQUEYENOETEU JEHOVÁ?
11. Müte piuqueyenoeteu Jehová troquiuliyiñ, ¿chumngelu ayühuafui Huecüfü?
11 ¿Cheu tuhui ti raquiduam Jehová taiñ piuqueyenoeteu? Quiñe dungu, Huecüfü meu. ¿Chemu feipiafuiñ? Huecüfü ayüniei taiñ püntütripayal Jehová mu. Fei raquiduamliyiñ Jehová taiñ piuqueyenoeteu, fei ayüucüleafui (1 Ped. 5:8). Raquiduamnge tüfa: Jehová fente tañi piuqueyefiel pu che, huli tañi Fotüm tañi montulafiel. Huelu Huecüfü raquiduamelqueiñmu fente tañi alün-ngen taiñ culpan, Jesús ñi hulün tañi mongen puulai iñchiñ mu (Heb. 2:9). Feimu müte piuqueyenoeteu Jehová troquiuliyiñ, ¿inei hueutripayafui? Tati Huecüfü. Ca fente taiñ huesa duamcülen serfihuenofiliyiñ Jehová, ¿inei ayühuafui? Tati Huecüfü llemai. Huecüfü cüpa raquiduamelqueiñmu iñchiñ taiñ piuqueyenoeteu Jehová, ¡huelu fütra coilatui! Fei ta piuqueyelaeyu Jehová (Efes. 6:11). Ngüneduamlu iñchiñ taiñ cüpa ngünencaeteu Huecüfü, doi nehuentuleaiñ taiñ famentuafiel (Sant. 4:7).
12, 13. Taiñ culpan chengen mu, ¿chemu raquiduamelafeiñmu taiñ piuqueyenoeteu Jehová?
12 Ca quiñelei taiñ raquiduamelafeteu taiñ piuqueyenoeteu Jehová, tüfa taiñ culpan chengen mu (Sal. 51:5; Rom. 5:12). Tati culpan püntülfi tati pu che Jehová mu. Cafei, tati culpan ca huesalcafi taiñ raquiduam ca taiñ cuerpo.
13 Tati culpan ñi duam mu contuqueiñmu fillque raquiduam. Feimu quisu culpatuuqueiñ, huesa duamqueiñ ca yehuequeiñ. Contuqueiñmu femngechi raquiduam culpalu iñchiñ. Ca femngechi raquiduamqueiñ ngüneduamlu iñchiñ taiñ culpafengen ca taiñ felenon chumngechi ñi ayüniefel Jehová ellaca mu (Rom. 8:20, 21). Raquiduamnge tüfa: quiñe cahuell allfülele quiñe tañi namun, cüntroleafui, fei pepi cüme amulayafui. Ca femngechi iñchiñ taiñ culpafe chengen mu cüntroleiñ reque, feimu cüdautuqueiñ com taiñ cüme femal. Feimu quiñeque mu raquiduamafuiñ Jehová taiñ piuqueyenoeteu. Femngechi rupan mu, acordayaiñ: Chau Jehová ‘pengelquefi nor piuque tañi pu piuqueyeteu ca feyentuquelu tañi huercün dungu’ (Neh. 1:5).
14. Raquiduamal Jesús tañi lan mu, ¿chumngechi quelluafeiñmu taiñ doi maneluhual Jehová taiñ piuqueyeteu? (Romanos 5:8; ca inaduamnge ti huichulechi dungu “Cuñiutucuucüleaiñ ti culpan ñi ngünencanoaeteu”).
14 “Jehová ngelafui tañi piuqueyeaeteu, piuqueyefalngenolu cai iñche” piafuiñ, feimu huesa duamafuiñ quiñeque mu. Felei, iñchiñ diturpulayafuiñ Jehová taiñ piuqueyeaeteu, feimu rume mañumfali taiñ piuqueyeteu. Felefulu rume, Jehová tañi hulün mu tañi Fotüm perdonaqueiñmu taiñ culpan, fei taiñ piuqueyeteu cai (1 Juan 4:10). Ca acordayafuimi Jesús cüpalai tati pu nor che mu, doi mai tati pu norngenolu (papeltunge Romanos 5:8). Com iñchiñ huelulcauqueiñ ca Jehová feipiquelaeiñmu taiñ turpu huelulcaunoal. Ngüneduamlu iñchiñ taiñ culpan chengen mu raquiduamafuiñ taiñ piuqueyenoeteu Jehová, doi eluhuafuiñ taiñ famentuafiel feichi raquiduam (Rom. 7:24, 25).
PÜNTÜTRIPALAYAIÑ JEHOVÁ MU
15, 16. Püntütripanoliyiñ Jehová mu, ¿chem dungu mu maneluhuafuiñ ca chemu? (2 Samuel 22:26).
15 Jehová ayüniei taiñ cüme nüucüleal fei meu (Deut. 30:19, 20). Femngechi femliyiñ, fei ca pülleconcüleai iñchiñ meu (papeltunge 2 Samuel 22:26). Püntütripanoliyiñ Jehová mu, fei maneluucüleafuiñ taiñ quelluaeteu chem rupafuliyiñ rume.
16 Chumngechi taiñ ngüneduampeel, fillque dungu mülei taiñ tüngcüleal rupan mu cüdaungechi dungu. Quimnieiñ Biblia quimeltuquei Jehová taiñ piuqueyenieteu ca taiñ quelluaeteu. Quiñeque mu raquiduamliyiñ taiñ piuqueyenoeteu Jehová, müte raquiduamtuculayafiyiñ taiñ huesa duamcülen, doi mai acordanieaiñ ñi rüfngen Jehová taiñ piuqueyeteu. Amulepe taiñ maneluucülen Biblia ñi feipin, Jehová aflayai taiñ nor piuqueyeaeteu.
ÜLCANTUN 159 Fill antü püramyeayu
a Ca peafimi Deuteronomio 31:8, Salmo 94:14 ca Isaías 49:15.
b ¿CHEM PENGELI TI ADENTUN? Quiñe peñi llellipufi Jehová, quelluen cuidayafiel tañi domo cutrancülelu. Ca llellipufi cüme püneal tañi plata ca quelluafiel tañi ñahue poyeafiel ta Jehová.