Quellufemafiyiñ pu ayülu ñi doi quimal

1. ¿Chumquei quiñeque che amuldungulelfiel mu? (Hechos 13:47, 48; 16:14, 15).

HUNEN siglo mu, fentrenque che lloufemi ti cümeque dungu allcütulu müten (papeltunge Hechos 13:47, 48; 16:14, 15). Fachantü ca femquei quiñeque che. Allcütun mu müten ti cümeque dungu, lloufemquefingün. Quiñeque che ellaca mu pinofulu rume tañi amuldungulelngeal, rupachi antü eluuqueingün tañi quimafiel ta Chau Dios. ¿Chumafuiñ pefiel mu che “ayünielu ñi llohual ti rüf dungu”?

2. Taiñ amuldungun cüdau, ¿chumngechi trürümngeafui tañi chumquen ta che tañi huerta mu?

² Peaiñ quiñe ejemplo. Quiñe huentru cüdauquelu tañi huerta mu niei tucucan tomate. Com tañi fün trürlai, quiñeque hune quelüquei, caquelu petu carülequei. Tati quelülu hunelu mu entungequei. Feiti petu carülelu amulei ñi hutrucongen. Tüfa trürümafuiñ taiñ amuldungun cüdau mu. Com che trür llouquelai ti rüf dungu. Feimu quiñeque che eluucülele tañi allcütual, iñchiñ quellufemafiyiñ ñi quimafiel Chau Dios ñi dungu (Juan 4:35, 36). Inaduamfiliyiñ inei tañi eluucülen tañi doi quimal ca inei ñi petu femnon, quimaiñ chumngechi taiñ quelluafiel. Tüfachi troquiñ mu ngüneduamaiñ epu dungu: amuldunguyahun mu pefiliyiñ che eluucülelu ñi allcütual, ¿chumngechi quelluafuiñ? Ca, ¿chumngechi quelluafuiñ tañi serfirpuafiel ta Jehová?

TI CHE ELUULE TAÑI ALLCÜTUAL, ¿CHEM FEMAFUIÑ?

3. Inaduamfiliyiñ quiñe che ayülu tañi allcütual, ¿chumaiñ? (1 Corintios 9:26).

³ Amuldunguyauliyiñ, inaduamfiliyiñ quiñe che ayülu tañi allcütual, pürüm müten quelluafiyiñ tañi quimafiel ta Jehová ca tañi hueniyeafiel. Alüñma rulpacünulayaimi. Hue nütramcafiel mu müten ti che, mangelafimi tañi chillcatual Biblia ca ñi amual trahun mu (papeltunge 1 Corintios 9:26).

4. Feipiaimi ñi rupan quiñe domo pürüm eluulu ñi quimeltulelngeal Biblia.

⁴ Feipiafimi tami enseñalelafiel Biblia. Quiñeque che eluufemquei tañi quimeltungeal Biblia. Peaiñ chem ñi rupan Canadá mu. Jueves antü mu quiñe üllcha domo fülcontufi quiñe carrito, fei entui quiñe folleto ¡Rumel ayüucüleaimi! pingelu. Fei ti lamngen mülelu ti carrito mu feipieyu: “Ayülmi, ca enseñahuafuiñ Biblia”. “Ayüafun” pi tati üllcha, fei elufi tañi numero telefono. Feichi antü mu müten ti domo huercülelfi quiñe mensaje, fei ramtufi chumül tañi estudiayal. Ti lamngen feipieyu sabado mu. Fei ti üllcha feipi: “¿Chumngelu hule no?”. Viernes antü mu papeltuingu Biblia. Fei sabado antü amui ta trahun mu. Fei müchai müten eluhui tañi doi cüme hueniyeafiel Jehová.

5. Quiñeque che pürüm eluunole ñi quimelelngeal Biblia, ¿chumafuiñ? (Ca inaduamnge ti adentun).

⁵ Com tati che taiñ allcütueteu pürüm eluuquelai tañi quimeltulelngeal Biblia. Quiñeque che doi duamniei tiempo. Feimu hunelu mu nütramcayafuiñ chem tañi ayüqueel. Cüme raquiduamafiliyiñ ti che ca duamtufiliyiñ, pichiñma mu eluhuafui ñi quimeltulelngeal Biblia. ¿Chem piafuiñ taiñ enseñalelafiel Biblia tati pu che? Taiñ huiñoldungual, feula peaiñ ñi femquen quiñeque peñi ca lamngen pepiluulu tüfachi dungu mu.

6. ¿Chem piafuiñ taiñ huiño pemetuafiel ti che?

⁶ Quiñeque feitachi pu peñi ca lamngen adümuulu feipiqueingün quiñeque mapu mu doi cümeafui feipinoafiel tati che “estudiayayu ta Biblia” ca “trür chillcatuayu”. Doi cümeafui feipiafiel ti che “nütramcayafiyu Chau Dios ñi dungu” cam “doi quimafuyu tati Biblia”. Taiñ huiño pemetuafiel ti che, feipiafuiñ: “Biblia huiñoldunguquei fentren dungu taiñ ramtuuqueel, feimu ngüneduamfali”. Cam feipiafuimi: “Biblia niei fentren cümeque ngülam”. Ca feipiafuimi chi: “Pichin minuto mu müten quimafuimi falinque quimeltun tami quelluaeteu”. Duamfalngelai tami feipiafiel ti che: “Fill semana cüpayan”, femngechi tami huesa duamelnoafiel ca ñi obligangelu troquiunoal.

7. ¿Chumül inaduamquei quiñeque che ñi quimeltumequengen ti rüf dungu? (1 Corintios 14:23-25).

⁷ Mangelafimi ñi amual trahun mu. Pablo tañi antü mu, quiñeque che hue trahuluulu müten chi inaduamingün tañi quimeltumequengen tati rüf dungu (papeltunge 1 Corintios 14:23-25). Fachantü ca femquei. Amun mu trahun, doi müchai hueniyerpuquefingün Jehová. ¿Chumül mangelafuiñ ti che? Tati lifru ¡Rumel ayüucüleaimi! quimeltun 10, mangelfi tati estudiante tañi amual trahun mu. Huelu feipilayaimi: “Puuli hula feichi quimeltun mu, mangelafiñ tati che”. Hue nütramcafiliyiñ müten ti che, mangelafuiñ ñi amual ti trahun afchi semana mu. Feipiafuimi chem ñi nütramcangeal ti hueupin cam chem ñi quimeltungeal Ti Huerquen feichi semana mu.

8. Mangelfiliyiñ quiñe che ti trahun mu, ¿chem feipiafuiñ? (Isaías 54:13).

⁸ Mangelfiliyiñ ta che trahun mu, feipiafiyiñ chumngelu taiñ trahun trürlai caquelu religion mu. Quiñe estudiante hue amulu ti trahun afchi semana mu, ramtufi tañi quimeltuqueteu: “Tati adniefilu ti trahun, ¿com quimnieñmafi tañi üi com tati trahuluulu ta fei mu?”. Ti lamngen feipi: “Iñchiñ taiñ trahunche quiñe familia reque felei, feimu com quimüñmahuiyiñ caque quiñeque taiñ üi”. Ti estudiante feipieyu: “Iñchiñ taiñ iglesia mu quimüñmaulaiñ taiñ üi”. Ca cümeafui taiñ feipiafiel ti che chemu taiñ trahuluuquen (papeltunge Isaías 54:13). Trahuluuqueiñ taiñ püramyeafiel Jehová, taiñ doi quimafiel ca taiñ hueluquentu yafültucuhual (Heb. 2:12; 10:24, 25). Feimu taiñ trahun cüme adcünungei, cüme pepicangei ca calechi huimtun inaniequelaiñ (1 Cor. 14:40). Cafei taiñ Trahunhue Ruca dumiñcülelai, doi mai alofcülei, femngechi pelolequeiñ ca cüme allcütuqueiñ ti trahun. Ca nütramcaquelaiñ politica dungu mu, chaftuuquelaiñ chem dungu mu no rume ca huirareluuquelaiñ. Ca mangelfiliyiñ ti che, pengelelafuiñ ti video ¿Chumqueingün am pu Dunguquelu Ineingen Jehová tañi Trahunhue Ruca mu?

9, 10. Mangelfiliyiñ quiñe che trahun mu, ¿chem piafuiñ tañi llicalenoal? (Ca inaduamnge ti adentun).

⁹ Quiñeque llicaleingün tañi amual ta trahun mu. “Amuli feipingean tañi testigongeal” piqueingün. Feimu feipiafiyiñ tati estudiante ñi cüme lloungequen com che trahun meu, fei re allcütumeafui müten. Tati nielu pichiqueche ca cüme lloungequeingün. Huichu enseñangequelai pu pichiqueche, feimu com quiñentrür anüafuingün ti familia tañi allcütual. Femngechi pu chau quimnieingün cheu ñi mülen tañi pu pichiqueche ca chem tañi quimeltungequen (Deut. 31:12). Ca pedingequelai ta plata, Jesús cai feipilu: “Refalta llohuimün, feimu refalta hulaimün” (Mat. 10:8). Ca feipiafiyiñ duamfalngelai ñi tucutuhual rume falichi tucutuhun mu. Chau Dios ngüneduamquelai pu che tañi ad ca tañi tacun, doi mai chem ñi mülen tañi piuque mu (1 Sam. 16:7).

¹⁰ Ti che amule trahun mu, cüme duamelafiyiñ. Quelluafiyiñ tañi quimafiel pu loncolelu ca caquelu peñi ca lamngen. Piuqueyenquechi chalingele ca duamtungelu troquiule, doi ayüafui chi tañi huiñotual. Ti che yenole Biblia trahun mu, iñchiñ pengelelafiyiñ ca chem publicacion ñi papeltumequengen.

¿CHUMNGECHI QUELLUAFUIÑ PU HUE ESTUDIAMEQUELU?

11. ¿Chumngechi respetañmayafuiñ ñi tiempo ti che?

¹¹ Hue enseñalmequefiliyiñ quiñe che, ¿chem mülei taiñ loncontucual? Quimtucunieaiñ tati che fentren duam niei. Feipifiliyiñ ti che taiñ puhual quiñe hora, femaiñ llemai, com pu che huimtulenole rume ñi femquen. Cafei hue quimeltulelfiliyiñ quiñe che, müte alüñmalayaiñ. Quiñeque peñi ca lamngen pepiluulu ñi quimeltuchen feipiquei tati che ayüfule rume tañi doi enseñangeal, müte alüñmalayaiñ, femngechi tati che ayünieai taiñ huiñotual. Cafei, iñchiñ müten nütramcalayaiñ, doi mai elcünuafiyiñ tati che ñi feipial chem tañi nieel tañi piuque mu (Prov. 10:19).

12. Hue amuliyiñ taiñ chillcatulelmeafiel quiñe che, ¿chem loncontucunieaiñ?

¹² Hue amuliyiñ taiñ chillcatulelmeafiel Biblia ta quiñe che, ayünieiñ ñi quelluafiel tañi quimafiel ta Jehová ca Jesús ca ñi poyerpuafiel. Taiñ femal tüfa, com taiñ enseñaqueel entuaiñ Biblia mu, quisu taiñ quimün mu no (Hech. 10:25, 26). Pablo inayentufali tañi femün, com tañi enseñaqueel nüucülei Jesús mu. Fei huercüngei taiñ quimafiel ca piuqueyeafiel Jehová (1 Cor. 2:1, 2). Pablo ca raquiduamelfi pu cristiano ñi quelluafiel pu hueque discipulo tañi doi cüme cristianongerpual. Femngechi tüfa engün trürümngeafui quiñe ruca deumangelu falichi cura mu, plata ca oro mu (1 Cor. 3:11-15). Feitachi pu hueque discipulo mülefui ñi doi feyentuafiel Jehová ca ñi yamnieafiel, ca mülefui ñi quimchengeal ca quim ngüneduamal (Sal. 19:9, 10; Prov. 3:13-15; 1 Ped. 1:7). Inayentuafiyiñ Pablo tañi femün. Quelluafiyiñ tati pu papeltuquelu Biblia, femngechi tañi feyentuleal engün ca tañi cüme hueniyeafiel Jehová (2 Cor. 1:24).

13. Quimeltucheliyiñ, ¿chumngechi pengelafuiñ taiñ ñochi duamngen ca duamtuchequen? (2 Corintios 10:4, 5; ca inaduamnge ti adentun).

¹³ Quimeltucheliyiñ, inayentuafiyiñ Jesús ñi ñochi duamngen ca ñi duamtuchequen. Ramtulayafiyiñ ti che taiñ yehuelcanoafiel. Inaduamfiliyiñ ti estudiante ñi adümnofiel quiñeque quimeltun, amulepe müten ti chillcatun. Fei hula, ca huiño nütramcatuafuiñ feichi dungu mu. Tati che cüdautule ñi inayal quiñe quimeltun, obligalayafiyiñ. Doi mai, eluafiyiñ tiempo ñi puhual tañi piuque mu (Juan 16:12; Col. 2:6, 7). Biblia feipi tati coilaque quimeltun ‘rume foliluucülequei reque’ che tañi piuque mu, mülei ñi teifücangeal reque (papeltunge 2 Corintios 10:4, 5). Tati estudiante cüdautuafui chi tañi famentuafiel coilaque quimeltun tañi feyentuqueel fentren tripantu mu. Feimu hunelu mu quelluafiyiñ tañi cüme hueniyeafiel Jehová, femngechi cüdautulayai ñi ngedunentuafiel reque feichi quimeltun foliluucülelu reque ñi piuque mu (Sal. 91:9).

¿CHUMNGECHI QUELLUAFUIÑ PU HUE AMULU TRAHUN MU?

14. ¿Chumngechi llohuafuiñ tati amulu trahun mu?

¹⁴ Jehová ayüquei com che amulu trahun mu taiñ cüme llohuafiel, chem tuhun-ngelu rume, huimtun ca tunten plata nielu rume (Sant. 2:1-4, 9). Peaiñ chumngechi taiñ femal.

15, 16. ¿Chumngechi cüme duamelafuiñ pu hue amulu trahun mu?

¹⁵ Quiñeque che amuquei trahun mu tañi quimal taiñ chumquen taiñ trahun mu. Ca quiñeque amuquei tañi feipieteu mu caquelu tañi amual. Feimu pefiliyiñ quiñe che hue amulu trahun mu, chaliafiyiñ. Cümei tami cüpan piafiyiñ. Huenicantuafiyiñ, huelu nüngayel-layafiyiñ. Feipiafuiñ taiñ trür anüal. Duamfalfule, pengelafuiñ taiñ Biblia mu ca taiñ publicacion cam eluafuiñ quiñe. Ca raquiduamaiñ ca chem chumafuiñ taiñ cüme duamelafiel. Quiñe huentru hue amulu trahun mu, huesa duami inaduamlu tañi tucutuucülenon chumngechi ñi tucutuucülen pu testigo. Feichi peñi tañi llohueteu trahun mu feipieyu ñi duamcülenoal chumngechi tañi tucutuucülen mu, eimi reque müten feleiñ com pifi. Feitachi huentru fautizahurpui, huelu turpu ngoimanentulai ñi cüme llohueteu tüfachi peñi. Felei llemai, rume falin-ngei taiñ cüme duamelafiel pu amulu taiñ trahun mu. Huelu cuñiutucuhuaiñ taiñ connoal fei engün tañi dungu mu (1 Ped. 4:15).

¹⁶ ¿Ca chumafuiñ taiñ cüme duamelafiel pu amulu trahun mu? Taiñ nütramcan mu, huiñoldunguliyiñ ca coneltuliyiñ trahun mu, cuñiutucuhuaiñ taiñ huesa dunguyenoafiel pu testigongenolu ca ñi feyentun engün. Femngechi pengelaiñ taiñ respetaquefiel com che. Chem pilayaiñ rume taiñ huesa duamelnoafiel taiñ pu huitran, femngechi ayüafuingün tañi huiñotual trahun mu (Tito 2:8; 3:2). Illamcalayafiyiñ chem tañi feyentuqueel ta che (2 Cor. 6:3). Doi mülefui tañi cuñiutucuhual tati pu hulquelu hueupin. Mülei quiñeque feipin ñi adümquefiel pu testigo müten, feimu ti hueupife ñi cüme duamelafiel pu huitran quimeltuai tañi chem pifel.

17. Pefiliyiñ che eluucülelu taiñ allcütuaeteu, ¿chumaiñ?

¹⁷ Rupan mu chi antü, doi falin-ngei taiñ amuldungual. Petu mülei che ayünielu ñi doi quimafiel Chau Dios ca tati Biblia (Hech. 13:48). Feimu pefiliyiñ che eluucülelu ñi allcütual, pürüm feipiafiyiñ taiñ enseñalelafiel Biblia ca tañi amual ta trahun mu. Femngechi quelluafiyiñ ñi amuleal “ti rüpü yequefilu ta che ñi rumel mongeleal” (Mat. 7:14).