Jehová, taiñ “doi ayühulqueteu”

1, 2. 1) Alün che, ¿chum duamcülequei fachantü? 2) ¿Chem peaiñ tüfachi troquiñ meu?

FACHANTÜ tati pu che femquei fillque dungu tañi ayüucüleal. Huelu femfulu rume, nierpuquelai tati rüfngechi ayühun. Fentren pu che hueñancülei ca raquiduamquei tañi felerpual tañi mongen. Quiñeque serfiquefilu Jehová ca femngechi duamafui. Müleiñ ti afaelchi antü mu, feimu rupaqueiñ huesaque dungu mu ca hueñancüleafuiñ (2 Tim. 3:1).

² Tüfachi troquiñ mu ngüneduamaiñ chem dungu müntuñmayafeiñmu taiñ ayühun ca chem quelluafeiñmu taiñ huiño ayüucületual. Hunelu mu ngüneduamaiñ inei quelluafeiñmu taiñ rüf ayüucüleal.

JEHOVÁ QUELLUAFEIÑMU TAIÑ RÜF AYÜUCÜLEAL

3. Pefiel mu Jehová tañi deumael, ¿chem quimeltuqueiñmu Jehová mu? (Ca inaduamnge ti adentun).

³ Jehová rumel ayüucülequei ca ayüniei iñchiñ taiñ ayüucüleal, feimu deumai itrofill dungu taiñ ayühulaeteu pefiel mu. Ayüuqueiñ pefilu iñchiñ fente ñi tutelcalen taiñ mapu, ayecahuafuiñ pefilu iñchiñ aucantulu pichique culliñ, ca müna cüme duamelqueiñmu taiñ iyael ifiel mu iñchiñ. Piuqueyeiñmu llemai ta Jehová ca ayüniei taiñ ayüucüleal.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. 1) ¿Chumngechi ayüucülequei Jehová pefiel mu rume alün cutrancahun? 2) ¿Chumngechi quelluqueiñmu Jehová? (Salmo 16:11).

⁴ Jehová puquintuniefi tati pu che ñi cutrancauquen ca inaye hueñancüquei. Femfulu rume, Biblia feipi tañi “ayühun-ngechi Chau Ngünechen” ngen (1 Tim. 1:11). ¿Chem quelluqueyu tañi rumel ayüucüleal? Quiñe dungu, Jehová deu elantücünui ñi apümafiel cutrancahun ca hueñancün. Huelu petu ñi acunon feichi antü, Jehová puquintunieiñmu ca quelluqueiñmu cutrancahun mu iñchiñ. ¿Chumngechi femquei? Quelluqueiñmu taiñ rüf ayüucüleal (papeltunge Salmo 16:11). Peaiñ chumngechi Jehová ayühulfi tañi Fotüm.

5, 6. ¿Chemu Jesús ayüucülequei?

⁵ Jehová hunelei tañi ayüucülequen, Jesús inalei tañi ayüucülen. ¿Chemu? Jesús rume cüme yepai tañi Chau meu, feimu rumel ayüucülequei (Col. 1:15). Cafei, Jesús doi alüñma mülequei tañi Chau engu, Jehová mu tuhui com rüfngechi ayühun.

⁶ Ca femngechi, Jesús ayüucülequei femlu cai com tañi ayünieel tañi Chau (Prov. 8:30, 31; Juan 8:29). Feimu “iñche tañi poyen Fotüm, iñche tañi ayühuelqueteu” pi Jehová (Mat. 3:17).

7. ¿Chumngechi rüf ayüucüleafuiñ?

⁷ Iñchiñ ca femngechi ayüucüleafuiñ eluuliyiñ taiñ pülleconal Jehová mu. Doi alüñma eluuliyiñ taiñ quimafiel ñi chumngen ta Jehová, doi cüme inayentuafuiñ, feita quelluaiñmu taiñ doi ayüucüleal. Femliyiñ Jehová tañi ayüqueel, quimaiñ taiñ ayühulfiel, feimu iñchiñ ca ayüucüleaiñ (Sal. 33:12).a Huelu quiñeque mu hueñancüafuiñ pichin antü cam doi alüñmayafui. Femngechi duamcülelmi, raquiduamlayaimi tami ayühulquenofiel Chau Jehová. Fei quimniei tüfachi antü mu fentren huesaque dungu mülei, feimu hueñancüafuiñ quiñeque mu (Sal. 103:14). ¿Chem dungu müntuñmayafeiñmu taiñ ayühun ca chumngechi nietuafuiñ? Peafiyiñ.

¿CHEM QUELLUAIÑMU TAIÑ AYÜUCÜLETUAL?

8. ¿Chum duamcüleafuiñ rupan mu huesaque dungu?

⁸ Rupan mu huesaque dungu meu, niehuelayafuiñ ayühun. Huesa femngeimi chi tami serfiquefiel mu Jehová, ca cutrancauqueimi chi tañi rupan mu huesa dungu cheu tami mülen. Cam cutrancaumequeimi chi tami nien mu quiñe huesa cutran, tami füchalen mu cam tami fillalen mu. Rupan mu femngechi dungu, contuafeiñmu quiñe fütra hueñancün, doi mai pepi catrütunoliyiñ feichi dungu. Biblia feipi quiñeque mu fente taiñ hueñancülen raquiduamafuiñ taiñ turpu ayüucülehuenoal (Prov. 15:13). Quiñe loncolelu femngechi duami. Meli tripantu mu lai tañi peñi, tañi ñuque ca tañi chau. Feipi: “Mongelelu tañi pu chau ca tañi peñi, fentren dungu mu rupamequefun ca ayüquefun tañi doi alüñma müleal tañi peñi iñchiu, tañi ñuque ca tañi chau. Quisulelu troquiuquefun ca hueñancülequefun”. Felei llemai, taiñ rupan mu fütra huesaque dungu mu rume cansaleafuiñ ca huesa duamcüleafuiñ.

9. ¿Chem quelluafeiñmu taiñ huiño ayüucületual? (Jeremías 29:4-7, 10).

⁹ ¿Chem quelluafeiñmu taiñ ayüucületual? Fente raquiduamcülehuelayaiñ quiñeque dungu mu taiñ pepi catrütunofiel, doi mai mañumcüleaiñ taiñ nieelchi cümeque dungu. Tati pu che quimeltuquei: tañi ayüucüleal mülei tañi cüme tripaleal com ti dungu, huelu Biblia femngechi quimeltuquelai. Raquiduamnge tüfachi dungu mu: Jehová feipifi pu judio yengelu Babilonia mu tañi quintual tañi ayüucüleal yengen rume ca mapu mu (papeltunge Jeremías 29:4-7, 10). ¿Chem quimeltueiñmu tüfa? Ngüneduamaiñ ñi mülen cümeque dungu taiñ mongen mu, fei ayüucüleaiñ. Acordanieaimi, Jehová quisucünulayaimu ca quelluaimu llemai (Sal. 63:7; 146:5). Taiñ lamngen Effie rume mañumcülei Jehová tañi quellueteu. Fütra allfüi, fei pepi trecahuelai. Taiñ lamngen feipi: “Jehová ca tañi pu che ca tati trahunche quellueneu ca yafültucueneu. Cüpa pengelelfiñ tañi mañumcülen, feimu eluucülen tañi ayüucüleal”.

10. ¿Chumngelu ayüucüleafuiñ cutrancaucüleliyiñ rume?

¹⁰ Chem huesaque dungu mu rupamequeliyiñ rume iñchiñ cam taiñ familia, ayüucüleafuiñ llemai (Sal. 126:5).b ¿Chumngelu? Tati rüf ayühun coneltuquelai chem taiñ rupamequen. Quiñe precursora María pingelu, feipi: “Rupaliyiñ huesaque dungu mu, raquiduamtucuniefiyiñ Jehová tañi feipicünuel, feimu ayüucülequeiñ. Femfule rume, rupaliyiñ cutrancahun mu huesa duamqueiñ ca ngümaqueiñ. Huelu chem dungu rume rupale, taiñ Chau Ngünechen ayühulqueiñmu”. Loncontucunieaiñ, tunte rupamequeliyiñ rume huesaque dungu mu, rumel felelayai. Taiñ cutrancahun trürümfali quiñe pünon fotra mu. Fütra mahunle borracünutuquefi, ngehuetuquelai. Ca femngechi Jehová pichiñma mu apümafi taiñ cutrancahun, fei turpu ngehuetulayai.

11. Pablo ñi rupan, ¿chumngechi yafültucuafeiñmu?

¹¹ Quiñeque mu hueniyehuenofilu Jehová troquihuafuiñ, feimu peno huesa rupamequen piafuiñ. ¿Chem quelluafeiñmu? Raquiduamal quiñeque poyequefilu Jehová tañi huesa rupaquen. Quiñe tüfa, tati apostol Pablo. Jesús elueyu quiñe falin cüdau. Dullieyu tañi amuldungulelafiel “pu catripanche, pu lonco ülmen ca pu Israel che” (Hech. 9:15). Huelu Pablo rupai fentren huesaque dungu mu (2 Cor. 11:23-27). Huelu rupalai feichi dungu meu tañi hueniyenoeteu Jehová. Tañi nehuencülen mu quimfali Jehová tañi quellunieteu (Rom. 5:3-5). Feula raquiduamnge eimi tami rupamequen mu. Ca femngechi serfiniefimi Jehová cüdaungele rume tami mongen. Feimu quimfali Jehová tami quellunieteu ca hueniyeteu.

12. Pepi diturpunoliyiñ chem taiñ ayünieel, ¿chum duamafuiñ?

¹² Huesa duamelafeiñmu diturpunoliyiñ chem taiñ ayünieel (Prov. 13:12). Iñchiñ piuqueyeniefiyiñ ta Jehová ca mañumniefiyiñ, feimu fillque dungu femqueiñ ñi serfiafiel. Huelu ditunoliyiñ taiñ ayünieel, hueñancüafuiñ (Prov. 17:22). Quiñe precursora Holly pingelu, feipi: “Ayüniefun ñi amual ti Escuela ñi Pepicangeam pu Amuldunguquelu Ngünechen ñi Gobierno. Cafei, ca pais mu ayüniefun ñi amuldungumeal ca cüpa quellufun ñi deumarucayal ti hue Betel Estados Unidos mu. Huelu caletui tañi mongen, chem no rume pepi femlan, hueñancülehuetun”. Fentren pu che serfiquefilu ta Jehová ca femngechi rupaquei.

13. Chum amulele rume taiñ mongen, ¿chem pepi femqueiñ?

¹³ ¿Chem quelluafeiñmu taiñ ayüucületual? Mülei taiñ acordayal Jehová dicümtucuquelaeiñmu ñi femal taiñ pepi femnoafel. Pepi femnofuliyiñ rume ñi femquen ta caquelu, Jehová peniei chem ñi mülen taiñ piuque mu, feita doi falintuquefi. Fei ayüniei taiñ ñom chengeal ca manel chengeal (Miq. 6:8; 1 Cor. 4:2). Pepi femnoliyiñ quiñeque dungu, ¿cümepeafui mai taiñ quisu dicümtucuhual?c Femlai llemai. Feimu pepi femnoliyiñ com taiñ ayüniefel ñi doi cüdahuelafiel Jehová, raquiduamaiñ chem taiñ pepi femel müten. Raquiduamnge: ¿quelluafuimi quiñe hueche ñi doi hueniyeafiel Jehová? ¿Yafültucuafuimi pu füchalelu? ¿Mülepei mai quiñe che duamnielu ñi yafültucungeal? Pemeafuimi chi, mütrümafuimi ca huirintuculelafuimi mensaje. Chem rume femülmi ñi quelluafiel ta caquelu che, Jehová cümelcayaimu. Raquiduamnge, hue mapu mu itrofill dungu femaimi ñi serfiafiel Jehová tami raquiduamquenofel rume. Lamngen Holly taiñ nütramcapeel rupachi parrafo mu, feipi: “Ngañhuadcülelu iñche, pichi felequen ca raquiduamquen tañi rumel mongeleal. Ayünien ñi femal fillque dungu tañi doi cüdahuelafiel Jehová, quisu quelluaeneu tañi com huechunentuafiel hue mapu mu”.

14. ¿Ca chem dungu müntuñmaqueiñmu taiñ ayühun?

¹⁴ Doyümliyiñ re taiñ cüme rupaleal cam nieal plata, ayüucülelayaiñ. Internet meu pequeiñ che, ayüucülelu troquiquefiyiñ nielu cai fentren cümeque dungu. Raquiduamafuiñ taiñ ayüucüleal mülei ñi femal re taiñ ayüqueel müten, pasiayal ca ngillacayal itrofillem. Femal taiñ ayünieel huesa dungu no, femngechi deumaeiñmu ta Chau Dios. Huelu pu inaquelu tañi ayünieel müten rüf ayüucülelaingün. Quiñe precursora Eva pingelu feipi: “Raquiduamlu tañi cüme rupaleal müten, feicai piquelai ta che”. Felei llemai, re raquiduamliyiñ taiñ cüme rupaleal müten, hueñancülehuetuaiñ.

15. ¿Chem quimeltueiñmu Salomón ñi rupan?

¹⁵ Raquiduamaiñ ñi rupan ti lonco ülmen Salomón. Fill dungu femi tañi ayüucüleal: cümecümetui fillque iyael, ayüfalchi ül allcütui, falinque fillem ngillacai, huelu chem no rume ayühul-laeyu. Fei feipi: “Ti che tuduamquelai tañi pequeel mu ca tuduamquelai rume tañi allcüqueel mu” (Ecl. 1:8; 2:1-11). Quiñeque che raquiduamquei ñi nieal plata ca femal re tañi ayünieel müten eluayu ayühun piquei. Huelu tüfa re coila tati, femngechi dungu turpu hulquelai rüfngechi ayühun.

16. Quellufiel ta caquelu che, ¿chumngechi ayühuleiñmu? (Ca inaduamnge ti adentun).

¹⁶ ¿Chem quelluafeiñmu taiñ ayüucületual? Jesús quimeleiñmu: “Tati llouquelu ñi elungeel niei ayühun. Huelu doi niei ayühun tati hulquelu ñi nieel” (Hech. 20:35). Quiñe loncolelu Alekos pingelu feipi: “Pichique dungu femquen ñi quelluafiel caquelu che, femngechi raquiduamquelan iñche tañi dungu mu müten, feimu ayüucülequen”. ¿Eimi cai? ¿Chumafuimi caquelu che meu? Quimülmi ñi huesa rupamequen quiñe peñi cam lamngen, yafültucuafuimi. Cüme elcünutulayafuimi chi tañi huesa rupan, huelu nehuentucuafuimi. Piuqueyenquechi allcütuafimi ca cutranpiuqueyeafimi. “Nütramcayafimi ta Jehová, fei allcütuaimu tati” piafimi (Sal. 55:22; 68:19). Ca feipiafimi Jehová quisucünulaeimu (Sal. 37:28; Is. 59:1). Pepicalelafuimi iyael ca pasiameayu piafuimi. Mangelafuimi tamu trür amuldungumeal, femngechi yafücontupelayai. Eluhulmi ñi quelluafiel caquelu che, Jehová adnieafeimu tami yafültucucheal, femngechi rüf ayüucüleaimi (Prov. 11:25).

17. ¿Chumaiñ taiñ rüf ayüucüleal? (Salmo 43:4).

¹⁷ Doi cüme hueniyefiliyiñ Jehová, doi ayüucüleaiñ. Biblia feipi Chau Jehová mu cüpai ti rüfngechi ayühun (papeltunge Salmo 43:4). Feimu chem huesa dungu rume rupaliyiñ, tüngcüleafuiñ. Recüluuliyiñ Chau Jehová mu, fei quelluaiñmu taiñ ayüucüleal rumel meu (Sal. 144:15).