¿Chumngechi ayüucüleafuimi tami füchalen mu?

1, 2. ¿Chem raquiduamquei Jehová tañi pu serfiqueteu deu füchalelu? (Salmo 92:12-14; ca inaduamnge ti adentun).

QUIÑEQUE che cüme duamquei tañi füchan mu, huelu caquelu che chumquei rume tañi pengelnoal tañi petu füchan. ¿Eimi cai? Lingarrumele tami cal lonco, ¿cüpa ngedunentufimi? Femimi chi, huelu tüfa catrütulai tami füchalerpual, felelu cai ta mongen.

² Huelu, ¿chem raquiduamquei Jehová tañi pu serfiqueteu deu füchalelu? (Prov. 16:31). Jehová tañi adquiñ mu, adngechi anümca reque feleingün (papeltunge Salmo 92:12-14). ¿Chumngelu am? Tati pu fütraque anümca fentren tripantu nielu niei fentren tapül ca flor, feimu rume adngei. Mülei quiñe anümca cerezo japones pingelu, rume adelcalei ca alün tripantu mülequei. Tüfachi anümca doi adelcalelu nieafui doi mil tripantu. Ca femngechi pu serfiquefilu Jehová doi füchalelu doi adelcaleafui Jehová tañi adquiñ mu tati anümca reque. Jehová re peñmaquelafi ñi lingarcülen tañi lonco tañi pu che, doi mai tañi cüme hueniyeteu. Fei engün fentren tripantu yeniei ñi serfiquefiel Jehová cüdaungechi dungu mu rume, feita rume falintuquefi.

3. Jehová, ¿inei engün elufi cüdau deu füchalelu?

³ Pu serfiquefilu Jehová füchalu rume, Jehová ñi adquiñ mu rume falin-ngei.a Cuifi mu, Jehová elfalcünufi quiñeque füchaqueche ñi femal rume falin-ngechi cüdau. Quiñe tüfa Sara. Deu cushelu, Jehová feipieyu tañi nieal quiñe püñeñ, feichi püñeñ mu tripayai quiñe fütra troquiñche ca tati Mesías (Gén. 17:15-19). Ca femngechi Moisés deu füchalu, Jehová feipieyu ñi lifrenentuafiel pu Israel che Egipto mu (Éx. 7:6, 7). Cafei tati apostol Juan deu füchalu, Jehová adnieyu ñi huirintucual 5 lifru mülelu Biblia mu.

4. Ñi feipin Proverbios 15:15, ¿chem quelluafeyu pu füchalelu? (Ca inaduamnge ti adentun).

⁴ Füchan mu che cüdaungetui ñi mongen. Quiñe cushe lamngen feipi: “Cüdaungei taiñ füchalen, feimu duamfali taiñ fütra piuquecünuhual”. Huelu Jehová quelluafeimu tami ayüucüleal,b femngechi cüme duamcüleafuimi rupan mu rume cüdaungechi dungu (papeltunge Proverbios 15:15). Feitachi troquiñ mu, peaiñ chumafui pu füchalelu tañi ayüucüleal ca chumngechi quelluntucuafeyu com ti trahunche. Huelu hune ngüneduamaiñ chumngelu pu füchalelu cüdautuafui tañi ayüucüleal.

FÜCHAN MU CÜDAUNGEAFUI TAIÑ AYÜUCÜLEAL

5. ¿Chem dungu huesa duamelafeyu pu füchaqueche?

⁵ Tami füchan mu, ¿chem dungu huesa duamelqueimu? Pepi femhuelaimi chi quiñeque dungu tami femquefel. Müna ayüafun tañi huechengetual piqueimi chi (Ecl. 7:10). Taiñ lamngen Ruby feipi: “Cüdautuquen tañi tucutuhual. Tañi cutrancülen mu müte nengümuuquelan. Tañi tucual calcetas cütu cüdautuquefiñ. Nien artritis cutran, feimu ñi cuhu rume cutrantulei. Pichiquen dungu rume cüdautuquefiñ ñi femal”. Ca taiñ peñi Harold cüdauquefulu Betel mu feipi: “Pepi femhuelan quiñeque dungu tañi ayüquefel. Feimu quiñeque mu illcuquen. Iñche huechengelu, nehuen huentrungefun, ayüquefun ñi deportetual. ‘Harold conle ñi aucantual, huehuaiñ tati’ piquefuingün. Huelu feula, pepi conhuelayafun rume”.

6. 1) ¿Ca chem dungu mu huesa duamafui pu füchaqueche? 2) ¿Chem quelluafeyu pu füchaqueche ñi manejayal cam ñi femhuenoal? (Peafimi ti troquiñ “¿Cümeafui ñi manejahuenoal?” tüfachi revista mu).

⁶ Cuifi quisu femquefuimi tami duamnieel, huelu feula duamnieimi tami quellungeal. Tüfa huesa duamelafeimu chi. Tami ruca mu acui chi quiñe che tami cuidayaeteu cam eimi huiñamtuhuimi chi tami pu familia ñi ruca mu. Tami cutrancülen mu cam tami pelohuenon mu, pepi manejahuelaimi chi tami auto, pepi quisu tripahuelaimi cam pepi cüdauhuelaimi rume tami mapu mu, ¡müna huesa! Pepi femhuelaimi chi tami femquefel cuifi, huelu Jehová ñi adquiñ mu rume falin-ngeimi ca caquelu mu. Jehová quimniei tami chum duamcülen, fei puquintuniei tami piuqueyeniefiel ca tami pu peñi ca lamngen, Jehová tüfa doi falintuquefi (1 Sam. 16:7).

7. Hueñancülelmi tañi petu acunon Jehová tañi antü, ¿chem raquiduamafuimi?

⁷ Ramtuuqueimi chi: “¿Mongelepeafun mai puule Armagedón?”. Tüfa hueñancülafeimu. Femngechi duamcüleimi, ¿chem quelluafeimu? Acordayaimi, Jehová ngünam esperamequelai tañi cüpalal Armagedón (Is. 30:18). Doi mai elumequefi tiempo tati pu che, femngechi tañi quimaeteu ca tañi poyeaeteu (2 Ped. 3:9). Feimu huesa duamcülelmi petu acunolu Jehová tañi antü, raquiduamnge tunten che chi quimafui ta Jehová feitachi mülehuechi antü mu. Quiñeque tami pu che petu quimlafi ta Jehová, fei ca femafui.

8. ¿Chumafui pu füchaqueche fente ñi cutrancülen?

⁸ Chumten tripantu nieliyiñ rume, cutrancülen mu huesa entuafuiñ taiñ dungun cam femafuiñ quiñeque dungu taiñ repentiutuafel (Ecl. 7:7; Sant. 3:2). Ti nor huentru Job fente tañi cutrancülen mu, “ngam fill dungu” pi (Job 6:1-3). Cafei pu füchaqueche tañi cutrancülen mu cam tañi lahuentumequen, femafuingün ca feipiafuingün quiñeque dungu tañi femnoafel cümelcalefule. Huelu füchaleliyiñ cam cutrancüleliyiñ, allmalltulayaiñ taiñ huesa piafiel caquelu cam taiñ rumel serfingeal. Cafei ngüneduamliyiñ taiñ huesa pin, perdonaen pifemaiñ (Mat. 5:23, 24).

¿CHEM QUELLUAFEIMU TAMI AYÜUCÜLEAL?

9. ¿Chumngelu eluhuaimi tami quellungeal? (Ca inaduamnge ti adentun).

⁹ Eluunge tami quellungeal (Gál. 6:2). Ellaca mu, cüdaungeafui taiñ quelluen pial. Taiñ lamngen Gretel feipi: “Quiñeque mu, raquiduamquen tañi nüngayelafiel caquelu, feimu feipiquelan tañi quellungeal. Mülefui ñi cacünutual ñi raquiduam. Feimu ñom piuque mu ngüneduamün tañi duamün ñi quellungeal”. Loncontucunge: eluhulmi tami quellungeal, ca eluñmayafimi tañi ayüucüleal inei tami quellueteu (Hech. 20:35). Eimi ca ayüucüleaimi ngüneduamülmi tami piuqueyengen ca cuidangequen.

10. ¿Chumngelu pengelafuimi tami mañumcülen? (Ca inaduamnge ti adentun).

¹⁰ Pengelaimi tami mañumcülen (Col. 3:15; 1 Tes. 5:18). Mañumcüleiñ caquelu taiñ quellueteu. Huelu acordalayafuiñ chi taiñ mañumeyu pial. Huelu ayühunquechi mañumeyu pifiliyiñ, fei quimaingün taiñ falintuquefiel ñi femün. Taiñ lamngen Leah dapiquefilu pu füchaqueche Betel mu, feipi: “Quiñe cushe lamngen huirintuculelqueneu tañi feipiaeteu ñi mañumeteu. Pichingei tañi huirintucun, huelu pengeli alün piuqueyen. Rume falintuquefiñ tañi femqueel. Pengelqueneu ñi mañumcülen, feimu rume ayühulqueneu”.

11. ¿Chumngechi quelluafuimi caquelu? (Ca inaduamnge ti adentun).

¹¹ Quellucheaimi. Eluuliyiñ ñi doi quellucheal, müte raquiduamlayaiñ taiñ huesa rupamequen. Tati pu fütaqueche trürümafuiñ quiñe lifru nielu alün quimün. Huelu papeltungenole ti lifru, entungelayafui quimün. Ca femngechi eimi nieimi fentren quimün, huelu nütramcanofilmi huechequeche, quellulayayu tami quimün. Feimu quimürpuafimi huechequeche, entunge ramtun ca allcütuafimi tami feipieteu. Nütramcafinge chumngechi Jehová tami quellueteu tami mongen mu. Ca feipiafimi inale Jehová ñi feipin, ayüucüleai engün. Eimi yafültucufilmi tami huecheque hueni, eimi ca ayüucüleaimi (Sal. 71:18).

12. ¿Chem feipicünufi Jehová tañi pu serfiqueteu deu füchalelu? (Isaías 46:4; ca inaduamnge ti adentun).

¹² Llellipuafimi Jehová tami eluaeteu nehuen. Quiñeque mu cansaleaimi cam ngañhuadcüleafuimi, huelu acordayaimi Jehová “turpu ürcüquelai ca afeluuquelai” (Is. 40:28). Fei feipicünui tami eluaeteu nehuen ca tami yafültucuaeteu (Is. 40:29-31; papeltunge Isaías 46:4). Jehová com femquei tañi feipicünuel, fei rüf quelluaimu llemai (Jos. 23:14; Is. 55:10, 11). Quelluen pifilmi Jehová, fei eluaimu tami duamnieel. Femngechi ngüneduamaimi fente tami piuqueyeteu Jehová, fei rume ayüucüleaimi.

13. ¿Chem mülei taiñ acordayal? (2 Corintios 4:16-18; ca inaduamnge ti adentun).

¹³ Acordanienge tami huechengetual. Quimün mu che ñi alüñmanoal tañi huesa rupamequen, doi cüme chaftuquefi. Biblia feipicünui cüpalechi antü mu ngehuelayai füchan ca cutran no rume (Job 33:25; Is. 33:24). Raquiduamtucuaimi fente cüme mongen tami nietual cüpalechi antü mu: huechengetuaimi ca nehuen-ngetuaimi. Quimfiel tüfa, ayühulafeimu llemai (papeltunge 2 Corintios 4:16-18).

¿CHUMNGECHI QUELLUAFUIÑ PU FÜCHAQUECHE?

14. ¿Chumngelu falin-ngei taiñ pemeafiel ca mütrümafiel füchaqueche?

¹⁴ Elcünulayaiñ taiñ pemequefiel ca taiñ mütrümquefiel füchaqueche (Heb. 13:16). Fentren engün doi quisucünungelu troquihuingün. Quiñe fücha peñi feipi: “Pepi tripahuenolu tañi ruca mu iñche, rupanoalu troquiquefiñ ti antü. Müte nienolu duam iñche, quiñeque mu illcuduamquen ca huesa duamquen”. Pemefilu iñchiñ pu füchaqueche, pengelelquefiyiñ taiñ piuqueyefiel. Raquiduamqueiñ taiñ pemeafiel ca mütrümafiel pu füchaqueche. Huelu taiñ nien mu alün duam, quiñeque mu femquelaiñ. Huelu rume falin-ngei taiñ duamtuafiel pu füchaqueche. Feimu, ¿chem quelluafeiñmu taiñ femal? (Filip. 1:10). Huirintucuafuiñ ñi üi pu füchaqueche mülelu taiñ trahunche mu ca chem antü taiñ mütrümafiel cam mandalelafiel mensaje. Elantücünuaiñ chem antü taiñ pemeafiel ca feingepe taiñ amual.

15. Pu huechequeche, ¿chumafui trür pu füchaqueche engün?

¹⁵ Huechengelmi, ramtuhuafuimi chem tami nütramcayafiel pu füchaqueche ca chumngechi tami trür cüme rupaleal. Huelu fill raquiduamcülelayaimi, cüme hueningeaimi müten (Prov. 17:17). Nütramcayafimi petu tañi connon ti trahun ca afle ti trahun. Ramtuafuimi chi: “¿Chem texto mülelu Biblia mu doi ayüfimi?”. Ca feipiafuimi tami nütramcayaeteu chem ayecan dungu rupai tañi huechengen mu. Ca mangelafuimi tamu trür peafiel ti JW Broadcasting^®. Ca quelluafuimi caquelu dungu mu ñi pepilquenoel. Ngüneduamafuimi ñi cüme amulen tañi celular cam tablet, ca ñi nieel tati hue tripachi publicacion. Quiñe cushe lamngen Carol pingelu, feipi: “Mangelfinge tamu femal doi tami ayüqueel. Deuma cushen, huelu petu ayüucülen tañi mongen mu. Tañi ngillacameal ayühulqueneu ca taiñ trür iyal tañi pu hueni iñchiñ ca taiñ pemeafiel adelcalechi mapu”. Quiñe lamngen Maira pingelu feipi: “Quiñe tañi hueni niei 90 tripantu, iñche 33 tripantu. Rume cüme rupaqueyu, pequefiyu pelicula, ayecauqueyu. Feimu ngüneduamquelan rume fei tañi nien doi alün tripantu. Ca rupan mu cüdaungechi dungu, hueluconque recüluuqueyu”.

16. Pu füchaqueche amun mu doctor mu, ¿chemu cümei tañi compañngeal?

¹⁶ Pu füchaqueche amulu doctor mu, compañafuiñ. Yeafuiñ pital mu, huelu ca cümeafui taiñ compañafiel mülele ti doctor engu, femngechi ñi cüme atendengeal (Is. 1:17). Ca huirintucuafuiñ ñi feipieteu tati doctor. Quiñe cushe lamngen Rut pingelu feipi: “Quisuyaulu iñche, müte duamniequelaeneu ti doctor. Rüfngelai tami cutrancülen piqueneu. Huelu compañquiyaulu iñche, doi cüme dunguqueneu ca cüme ngüneduamqueneu. Feimu rume mañumniefiñ com pu lamngen eluuquelu tañi compañaeteu”.

17. ¿Chumngechi quelluafuiñ pu füchaqueche ñi amuldungual?

¹⁷ Trür amuldunguaiñ pu füchaqueche engün. Quiñeque füchaqueche müte nehuen-ngehuelai ñi amual fill ruca püle tañi amuldungual. Mangelafuimi chi tami compañaeteu carrito meu tañi amuldungual. Yelelafuimi quiñe pichi huancu tañi anüleal. Mangelafuimi tami compañaeteu tañi chillcatulelafiel quiñe che cam yeafuimi ti chillcatuquelu fei tañi ruca mu. Pu loncolelu adcünuafui ñi tripayal ti amuldungun pu füchaqueche ñi ruca mu, femngechi ñi doi cüdautunoal tañi tripayal. Pengelelfiliyiñ pu füchaqueche taiñ falintuquefiel ca piuqueyefiel, ayühulafiyiñ Jehová (Prov. 3:27; Rom. 12:10).

18. ¿Chem ngüneduamaiñ cüpalechi troquiñ mu?

¹⁸ Tüfachi troquiñ, quimiyiñ Jehová ca com iñchiñ taiñ falintufiel ca piuqueyenieel pu füchaqueche. Eimi füchalelmi, doi cüdaungepelai tami mongen, huelu Jehová quelluaimu tami ayüucüleal (Sal. 37:25). Maneluhuafuimi cüpalechi antü mu tami huechengetual ca tami doi cüme feletual. Huelu quiñeque iñchiñ mülei ñi cuidayafiel pu füchalelu cam cutrancülelu, ¿chem quelluafeyu tañi ayüucüleal? Cüpalechi troquiñ mu ngüneduamaiñ.