Ngünechen ñi dungu pepiluwün dungu

1. ¿Chumngelu (chemu) rakiduamkeymi Ngünechen ñi Dungu ñi pepiluwün-ngen? (Inaduamnge ti adentun ellaka mu mülelu.)

CHAW DIOS ñi feypin, mülelu Biblia mu, “mongen dungu ka pepiluwün dungu” (Ebrew 4:12). Pu poyekefilu ta Jewba küme kimnieiñ tüfa, ngüneduamlu am iñchiñ ñi küme elkünutufiel taiñ mongen ka kakelu che ñi mongen. Petu taiñ poyekenofiel ta Jewba, kiñeke iñchiñ weñekefuiñ, drogatukefuiñ kam femkefuiñ pekan kudumuwün. Kakelu rüf ayüwkülelafuiñ, famoso ngefulu rume kam niefulu fentren plata (Eclesiastés 2:3-11). Welu Biblia ñi kellun mu, fewla nierpuiñ maneluwün ka küme yenierpuiñ taiñ mongen, ñamkiyawkefuiñ rume. Ayüwülkeeiñmew papeltufiel kiñeke che ñi rupan tati trokiñ “Ti Biblia küme elkünutueyew ñi mongen”, tati chillka Ti Werken mu. Kafey duamnieiñ Biblia taiñ kelluaetew ñi doy küme weniyeafiel ta Jewba, fawtisawlu rume iñchiñ.

2. Chaw Dios ñi Dungu, ¿chumngechi kellukefi kiñeke che wünen siglo mew?

² We dungu no fentren che ñi küme elkünutufiel tañi mongen kimlu ti rüf dungu. Wünen siglo mu femngechi femingün kiñeke peñi ka lamngen dullingelu (ngümintungelu) ñi amual wenu mapu mew (papeltunge 1 Korintio 6:9-11). Pablo nütramkay chem che ñi koneltunoal Chaw Ngünechen ñi Ngünenien mu, fey feypi: “Femngechi chengekefuymün kiñekentu eymün ta kuyfi mew”. Welu Chaw Ngünechen tañi Dungu ka tañi newen kellueyew engün ñi küme elkünutual tañi mongen. Kiñeke dew fawtisawlu kütu kulpayngün, feymu küme weniyewelafingün ta Jewba. Tati Biblia nütramkay ñi wemünentungen ti trawünche mu kiñe peñi dullingelu ñi amual wenu mapu mu. Welu fey wüla küme elkünutuy ñi mongen tañi wiñotual ti trawünche mu (1 Korintio 5:1-5; 2 Korintio 2:5-8). Feley llemay, Chaw Ngünechen ñi Dungu kellufi fentren peñi ka lamngen ñi küme elkünutuafiel tañi mongen. Ngüneduamfiel tüfa müna yafültukukeeiñmew.

3. ¿Chem inaduamaiñ tüfachi chillkatun mu?

³ Tati Biblia pepiluwün-ngey. Tüfa Jewba mu küpay, feymu ayüleiñ taiñ küme adümafiel (2 Timotew 2:15). Tüfachi chillkatun mu inaduamaiñ chem chumafuiñ taiñ kelluaetew Biblia ñi pepiluwün taiñ mongen mu, amuldungun mew ka taiñ kimeltual trawünche mew. Ngüneduamfiel tüfa kelluaeiñmu taiñ doy piwkeyeafiel ka mañumtuafiel taiñ Fütra Chaw, kidu am taiñ kimeltukeetew taiñ kümelkaleal (Isaías 48:17).

TAIÑ MONGEN MU

4. 1) Taiñ kelluaetew ti Biblia, ¿chem müley taiñ femal? 2) ¿Chumngechi elantükünukeymi tami papeltuafiel Biblia?

⁴ Taiñ kelluaetew ti Biblia, müley taiñ wimtuleal ñi papeltuafiel, ka doy kümeafuy femngechi femal fill antü (Josué 1:8). Kom iñchiñ nieiñ fentren duam taiñ mongen mu, ka kiñeke elfal küdaw kütu, welu eluwaiñ taiñ katrütunoaetew tüfa taiñ papeltuafiel Biblia (papeltunge Efesio 5:15, 16). Elkünuafuiñ taiñ papeltuafiel puliwentu, amulechi antü mew kam pun mu. Tati wirintukufilu kiñe salmo feypi: “¡Müna piwkeyefiñ tami ley! Kom antü rakiduamniefiñ” (Salmo 119:97). ¡Iñchiñ ka femngechi rakiduamkeiñ!

5, 6. 1) ¿Chumngelu fente falin-ngey taiñ rakiduamken Biblia mu? 2) ¿Chem chumafuiñ taiñ küme rakiduamal taiñ papeltupeel mu? 3) Tami papeltufiel ka rakiduamfiel Biblia, ¿chumngechi kellukeeymu?

⁵ Re papeltulayafiyiñ Biblia, welu may duamfalngey taiñ küme rakiduamal taiñ papeltupeel mu (Salmo 1:1-3). Femngechi müten inayafiyiñ Biblia ñi wülkeelchi kimün taiñ mongen mu. Feymu chillkatufiliyiñ Biblia papel mew kam taiñ elektroniko chemkün mu, eluwaiñ ti Biblia ñi puwal taiñ piwke mu.

⁶ ¿Chem chumafuiñ taiñ küme rakiduamal taiñ papeltupeel mu? Petu papeltufiliyiñ ti Biblia, pichi üngümaiñ, fey ramtuwaiñ: “Tüfa, ¿chem kimeltuenew Jewba mu? ¿Inaniekefiñ tañi mongen mu? ¿Chumngechi doy küme elkünutuafun tañi mongen?”. Küme rakiduamliyiñ Biblia mew, ka ngillatuliyiñ ta Jewba, fey küpa inanieafiyiñ ñi ngülam. Femngechi ti Biblia ñi pepiluwün kümelkayaeiñmew taiñ mongen mu (2 Korintio 10:4, 5). 

AMULDUNGUN MEW

7. ¿Chumngechi küme adümafuiñ ti Biblia amuldungun mu?

⁷ Müna falin-ngey taiñ adümnieafiel ti Biblia taiñ amuldungual ka kimeltucheal. Kiñe peñi feypi: “Jewba iñchiñ amuldungufuliyiñ, iñchiñ müten nütramkalayafiyiñ pu che, eluñmayafiyiñ ta Jewba ñi dungual”. Feymu, papeltulelfiliyiñ Biblia tati pu che, femngechi eluñmayafiyiñ ta Jewba ñi dungual. Küme dulliaiñ chem versikulo taiñ papeltual, tüfake ta puway pu che ñi piwke mew (1 Tesalonisense 2:13). Feymu ramtuwnge: “Amuldungun mu, ¿yafüluwken tañi papeltulelafiel Biblia tati pu che?”.

8. Amuldungun mu, ¿chumngelu re papeltulayaiñ kiñe versikulo tati pu che?

⁸ Welu re papeltulayaiñ ti versikulo. Epe kom pu che küdawtukey ñi adümafiel Biblia ñi feypin. Femngechi ka rupakefuy kuyfi mu (Romanu 10:2). Rakiduamlayafiyiñ ti ngen ruka ñi adümfiel kom ñi feypiel ti versikulo. Feymu, ¿chem chumafuiñ? Wiño feypiafiyiñ tati doy falin-ngechi dungu, ka kelluafiyiñ ñi doy küme adentuafiel. Femngechi Chaw Dios ñi Dungu puway ti che ñi longko ka ñi piwke mew (papeltunge Luka 24:32).

9. Petu taiñ papeltunofiel kiñe versikulo, ¿chem feypiafuiñ tati pu che ñi doy yamnieafiel ti Biblia?

⁹ Chem piaiñ petu taiñ papeltunofiel kiñe versikulo, tüfa taiñ kelluafiel tati pu che ñi doy yamnieafiel ti Biblia. Feypiafuiñ: “Papeltuafiyiñ chem ñi feypiel taiñ Wenu Chaw tüfachi dungu mu”. Kam, nütramkafiliyiñ kiñe che duamtunofilu pu religion, kam inakefilu mapuche feyentun, feypiafuiñ: “¿Allkütukefuymi tüfachi kuyfi feypin?”. Kom tati pu che kakerumey, feymu pepikayaiñ chem feypial petu taiñ papeltunofiel kiñe versikulo, femngechi ñi ayüwmayal ti che (1 Korintio 9:22, 23).

10. 1) ¿Chumi kiñe peñi? 2) Amuldungun mu, ¿chumngechi ngüneduamkeymi tati Biblia ñi pepiluwün?

¹⁰ Fentren peñi ka lamngen amuldungun mu, ngüneduamkeyngün Biblia ñi puwün pu che ñi piwke mew. Kiñe peñi witranmakefuy kiñe chachay fentren tripantu papeltufilu taiñ chillka. Welu kiñe antü re elulafi ti chillka, doy may papeltulelfi 2 Korintio 1:3, 4 feypilelu: “Ngünechen [...], taiñ rumel kutranpiwkeyenieetew ka taiñ yafülkeetew. Kisu ta yafülkeeiñmew kom taiñ kutrankawün mew”. Tüfa puwi tati chachay ñi piwke mew, feymu feypifi ti peñi ñi wiño papeltulelaetew. Fey feypi kidu ka tañi domo ñi duamnieel tañi yafültukungeal, ka doy küpa kimfi ti Biblia. Feley llemay, Biblia ñi pepiluwün puwkey pu che ñi piwke mu amuldungun mew (Hecho 19:20).

TAIÑ KIMELTUAL TRAWÜNCHE MEW

11. ¿Chem müley ñi femal pu kimeltuchekelu trawün mu?

¹¹ Müna ayükeiñ taiñ trawüluwken pu peñi ka lamngen iñchiñ. Trawüluwkeiñ taiñ poyeafiel ta Jewba. Welu kafey, kümeke dungu kimeltulelngekeiñ. Feymu, pu peñi kimeltuchekelu trawün mu ayüwkeyngün, welu tüfa kiñe pekan küdaw no tati (Santiaw 3:1). Feymu müley ñi yafüluwal engün tañi entual kom ñi kimeltukeel Biblia mew. Fey, eymi elungelmi tami kimeltucheal trawün mu, ¿chumngechi kelluafuymi tami pu allkütukeetew Biblia ñi pepiluwün mu?

12. Kiñe wewpitukelu, ¿chem chumafuy ñi doy falin-ngeal ti Biblia kidu ñi wewpin mew?

¹² Doy falin-ngepe ti Biblia tami wewpin mu (Juan 7:16). Feymu kuñiwtukuwaymi chem no rume ñi doy falintungeal Biblia mu: tami nütramkaelchi rupan dungu, pengelün dungu, ka chumngechi tami dunguken. Ka longkontukuaymi: tami rüf kimeltuafiel Biblia ñi feypin, re papeltulel-layafimi pu che. Feley llemay, fentren versikulo papeltulmi, epe kom pu che longkontukulayafingün. Feymu küme dulliaymi chem versikulo tami feypial. Fey wewpitulmi, papeltuafimi feychi versikulo, kelluafimi ti allkütukelu ñi adümafiel, feypiaymi kiñe pengelün dungu ka chumngechi tañi inayafiel (Nehemías 8:8). Kafey elungelmi kiñe bosquejo tami kimal chem feypial, küme chillkatuafimi ti bosquejo ka kom ti texto ñi nieel. Ngüneduamnge chumngechi tati texto kellukeeymu tami kimal ñi chem pilen ti papel. Fey dullinge kiñeke texto tami kimeltuafiel ñi chem pilen ti bosquejo (kümeke ngülam peafuymi tati chillkatun 21-23 ti lifru Benefíciese de la Escuela del Ministerio Teocrático). Ka ngillatuafimi ta Jewba tami kelluaetew ñi doy küme kimeltual kidu ñi Dungu. Biblia feypi: “Esdra pepikakünufi ñi piwke tañi ngüneduamal Jewba ñi ley ka tañi inayafiel, ka kimeltuafiel pu israelche tati ngülam ka ley dungu” (Esdras 7:10). Ka feypi: “Ayüwün-ngey tati che kimchengerpulu, ka tati che kim ngüneduamürpulu, tüfa am doy kümelkakeeyew ti plata mew ka doy falin-ngechi dungu wülkeeyew ta milla mew” (Proverbios 3:13, 14).

13. 1) Kiñe lamngen, ¿chumngechi kellueyew kiñe texto ñi papeltungeel trawün mu? 2) Kimeltungelu ti Biblia trawün mu, ¿chumngechi kellukeeymu?

¹³ Kiñe lamngen Australia tuwün-ngelu, fentren wedake dungu mu rupay, ka fawtisawlu rume, rakiduamkelafuy Jewba ñi rüf piwkeyeetew. Welu kiñe texto ñi papeltungeel trawün mu puwi ñi piwke mu. Kidu küme rakiduamkefuy feychi versikulo mu, feymu doy chillkatuy ka papeltuy kakelu texto. Femngechi küme kimürpuy Jewba ñi piwkeyeetewa (inaduamnge ti kimal dungu). Eymi kay, ¿allkütuymi trawün mu kiñe texto ñi puwün tami piwke mu? (Nehemías 8:12.)

14. ¿Chumngechi pengelafuiñ taiñ falintufiel Biblia?

¹⁴ ¡Rüfngey llemay! Kom mañumniefiyiñ ta Jewba taiñ eluetew ti Biblia. Kidu feypikünuy ñi rumel müleal tüfa, ka femtriparpukey ñi feypin (1 Pedro 1:24, 25). Feymu wimtuleaiñ taiñ papeltuafiel, inanieafiyiñ taiñ mongen mu ka kelluafiyiñ pu che Biblia ñi feypin mu. Femngechi femliyiñ, pengelaiñ taiñ falintufiel tüfachi fütra yewün, welu doyelchi may pengelaiñ taiñ piwkeyeniefiel ta Jewba, taiñ eluetew ti Biblia.