¿Inei montulafui taiñ mapu?

‘Ñi femün mu ta che rume huesalcangequei ti mapu’ piquei fentren che, fei tüfa fill raquiduameleyu engün. Pu quimche ca feipiquei fente ñi huesa femün mu ta che, cuñihun mu mülei fentren culliñ ca anümca ca fentren engün ngehuetulafui.

Pu che ñi femün mu, ¿apümcangepeai mai ti mapu? Cam ¿quimürpuafuiñ ñi huesalcanoafiel ti mapu ca com ñi mülen fei mu?

Pu che, ¿cüme elcünupetuafui mai ti dungu?

‘Pu che quimürpuafui ñi cuñiutucuafiel ti mapu ca fentecünuafui ñi huesalcamequefiel’ piquei fentren quimche. Huelu pu adümuhun-ngechi che ca feipiqueingün taiñ rüf cuñiutucuafiel ti mapu, mülei taiñ cüme elcünutuafiel fillque dungu. ¿Chuchi am? Peaiñ:

• Doi cüme cuidayafiel ti mapu, mahuidantu, malliñ ca lafquen.

• Cacünutual chumngechi ñi ngan-ngequen, cafei cacünutual chumngechi amulngequei fillque dungu, quiñe tüfa electricidad.

• Cacünutual chumngechi deumangequei ca hulngequei fillque iyael, femngechi ñi ngünamcangenoal. Cafei pu che ihuenope ilo ca challhua, doi mai re tucucan müten.

• Cafei loncontucual duamfal-lai nieal fentren chemcün taiñ cüme feleal.

¿Chem raquiduamimi? Pu gobierno, fillque empresa ca tati pu che, ¿quiñeucülepeafuingün mai ñi femürpual com tüfa? Cam ‘pu che turpu femlayafui tüfa fente tañi diñmatuquen ta plata, tañi quisutu duamuuquen ca raquiduamquelai ñi chumleafel cüpalechi antü meu’, ¿raquiduampeimi mai? (2 Timoteo 3:1-5).

Mülei maneluhun

Biblia feipicünui ñi cüme feletual taiñ mapu. Quimeltuqueiñmu chumngechi femngerpuai tüfa ca chumngelu tati pu che turpu femlayafuingün quisu ñi duam mu müten.

¿Chumngelu pu che cüme elcünutulayafui ti mapu? Chau Jehováa deumafi ti mapu ca elfalcünufi pu che ñi cuidayafiel (Génesis 1:28; 2:15). Huelu ñi cüme feleal engün, mülefui ñi inanieafiel Chau Dios ñi feipin ca eluhual tañi adnieaeteu (Proverbios 20:24). Huelu pu che famentufingün ta Chau Jehová ca eluhuingün ñi quisutu dullial chumngechi yenieal tañi mongen (Eclesiastés 7:29). Feimu nienon mu cai Chau Dios ñi quellun, pu che cüme cuidalayafui ti mapu, ca turpu femlayafuingün chem dungu no rume ñi cüme elcünutuafiel rumel mu (Proverbios 21:30; Jeremías 10:23).

¿Chem femngeai ñi cüme elcünungetual ti mapu? Chau Dios catrütuafi pu che ñi huesalcanoafiel ti mapu (Apocalipsis 11:18). Pu fillque gobierno re huesalcamequefingün ti mapu, feimu Chau Dios adcünulayaeyu engün ñi femürpual tañi ayüqueel, doi mai elcünutuai quiñe hue gobierno (Apocalipsis 21:1). Feimu Biblia meu, Jehová feipi: “Huecünumequetufiñ com dungu” (Apocalipsis 21:5).

¿Chumngechi femngeai tüfa? Chau Dios fentecünuafi ñi ngünenieel pu che, fei elcünuai quiñe hue gobierno, Chau Dios ñi Reino pingelu. Jesucristo loncoleai feichi gobierno mu, fei ngünenietuai ta com mapu meu (Daniel 2:44; Mateo 6:10).

Chau Dios ñi Gobierno mu quimelelngeai ta che ñi inayafiel Chau Dios tañi feipin (Isaías 11:9). Pu che eluule ñi ngünenieaeteu Chau Dios, feimeu müten cüme cuidayafingün ti mapu ca com ñi mülen fei mu. Cafei Biblia pengeli Chau Dios ñi Reino mu, pu che fente cüme mongen yenieaingün, huelu huesalcalayafingün ti mapu. Chau Dios ngünenietule ta mapu:

• Com pu che nieaingün iyael (Salmo 72:16).

• Ti mapu cüme hulai fün ca com taiñ duamnieel taiñ mongeluhuam (Isaías 35:1, 2, 6, 7).

• Tati pu che cüme cuidayafingün tati pu culliñ, ca tati pu culliñ huesalcalayafingün tati pu che (Isaías 11:6-8; Oseas 2:18).

• Rupahuelayai mangiñ co, fütraque nüyün ca caquelu femngechi dungu (Marcos 4:37-41).

Pichiñma mu, Chau Dios ñi Gobierno femürpuai com tüfa. ¡Eimi maneluhuafuimi llemai! Ayülmi tami doi quimal, papeltuafuimi ti troquiñ “Chaw Dios ñi Gobierno, ¿chumül ngünenietuafi ta Mapu?”.