Ti Mapu huesalcangequei, ¿chem pilei Biblia?

“Pu che ñi huesa femmequen mu, pürüm müleai doi huesaque dungu. Fentren fütraque huaria ñamai co mu. Müleai are turpu ñi mülequenofel. Fütraque cürüftucu mahun. Com Mapu mu müleai rume pichinque co. Fentrenque anümca ca culliñ ngehuelayai. Tüfa ta coila no. Pu gobierno cambianole ñi huesa femquefiel ti Mapu, com tüfa rupayai. Femngechi pengeli tati ciencia” (ti secretario general Naciones Unidas mu, António Guterres pingelu, nütramcai ñi feipin ti Grupo Intergubernamental de Expertos sobre el Cambio Climático, 4 conchi abril, 2022).

“Ñi caletun mu ti clima, pu cientifico feipimequeingün 423 parques nacionales Estados Unidos mu epe com huesalcalerpuai. Tüfachi parque rume arengen mu huesalcauquei. Com tüfachi dungu ñi rupayal rume cuñiutucuhun-ngei: lüpümtucuhun, fütraque mangiñ co, ñi lliuhun fütraque trangliñ, ñi tripan fütraque lafquen ca ñi rume arengen mu” (feipi ti revista The New York Times, 15 conchi junio, 2022).

¿Cümelcalerpupeafui mai ti Mapu? ¿Inei cümelcacünutuafui tüfachi huesaque dungu? Peafimi ñi feipin ta Biblia.

Biblia feipicünui ñi huesalcangeal tati Mapu

Ti Biblia feipi Chau Dios ‘apümcayafi tuchi huesalcamequefilu ta mapu’ (Apocalipsis 11:18). Tüfachi versiculo quimeltueiñmu cüla dungu:

1. 1. Pu che ñi huesalcayafiel ti Mapu.

2. 2. Ñi huesalcamequengen ti Mapu afai.

3. 3. Chau Dios cümelcacünutuafi com ti Mapu, pu che femlayai.

Cüpalei cümeque dungu

Biblia feipi “tati Mapu rumel mülecayai” (Eclesiastés 1:4). Ca rumel müleai che fei mu.

• “Tati pu norngechi che llohuai ti Mapu ñi ngen-ngeal engün, ca rumel müleaingün fei mu” (Salmo 37:29).

Com dungu cümelcacünungetuai Mapu mu.

• “Tati desierto ca tati anquen mapu rume ayühun nieai, ca tati laf mapu ayüucületuai ca rume rayületuai” (Isaías 35:1).