¿Chem am chi Chau Ngünechen ñi Gobierno?
Biblia ñi quimeltuqueel
Tüfa quiñe Gobierno Chau Jehová ñi elcünuel. Huenu mapu mu mülei, feimu Biblia ca üituquei “Chau Ngünechen ñi Gobierno huenu mapu meu” (Mateo 4:17; Marcos 1:14, 15). Fentren dungu trürümcüleafui tati huentru ñi ngünenien mu, huelu tüfa doicülei com dungu mu.
Ngüneniealu. Chau Dios dullifi ta Jesús ñi Lonco Ülmen-ngeal tañi Gobierno mu, ca elueyu doi pepiluhun ta chem huentru no rume ñi nienoafel (Mateo 28:18). Jesús re cümeque dungu femquei tañi pepiluhun mu. Doi mai pengelquei tañi manelfalngen ca cutranpiuqueyechengen (Mateo 4:23; Marcos 1:40, 41; 6:31-34; Lucas 7:11-17). Chau Ngünechen ñi quellun mu, Jesús dullifi quiñeque che fillque troquiñ mapu meu tuulu, fei huenu mapu mu ñi ngünenieal com ti Mapu Jesús engu (Apocalipsis 5:9, 10).
Tunte ñi puhual. Pu huentru ñi ngünenien fentecünuquei, huelu Chau Ngünechen ñi Gobierno rumel müleai ca “chumcaunorume apümcangelayai” (Daniel 2:44).
Pu che ngünengealu. Chem tuhun niele rume ta che, femle Chau Ngünechen ñi ayüqueel, ngünenieayu tüfachi Gobierno (Hechos 10:34, 35).
Huercün dungu. Tüfachi Gobierno re catrütuquelafi tati che ñi femal huesaque dungu, doi mai quimeltuquefi ñi doi cüme chengeal. Quiñe dungu, Biblia feipi: “‘Piuqueyefinge tami Ñidol Ngünechen com tami piuque meu, com tami mongen meu, ca com tami quimün meu.’ Fei tüfa tati hunen huercün dungu ca doi falilu com huercün dungu meu. Fei tati inalechi huercün dungu ca tüfa famngechi feipilei: ‘Piuqueyefinge tami chafche chumngechi piuqueyeniehuimi ta eimi’” (Mateo 22:37-39). Pu ngünengelu ñi piuqueyefiel Chau Dios ca tañi chafche mu, doyümfingün tañi chafche ñi cümelcaleal.
Quimeltun. Chau Ngünechen ñi Gobierno hulquei huercün dungu ñi doi cüme chengeal, huelu cafei quimeltuquefi ta che chumngechi ñi inanieafiel (Isaías 48:17, 18).
Chem ñi chumal. Tüfachi Gobierno mu femtriparpuai Chau Ngünechen ñi ayüqueel, cafei eluafi ta che afnoachi mongen quiñe cüme mülehue Mapu mu. Feimu tati pu ngüneniealu ülmencaulayaingün tati pu che ñi duam mu (Isaías 35:1, 5, 6; Mateo 6:10; Apocalipsis 21:1-4).