¿Chumngelu am fente falin-ngei taiñ quimal ñi mülen ta Ngünechen?

¿Chumngelu fente falin-ngei taiñ quimal ñi mülen ta Ngünechen? Com taiñ inaduampeel, raquiduameleimu ñi mülen ta Ngünechen ca cümeafui tami inaduamal chumngelu feipiafuiñ Biblia ñi cüpan Ngünechen meu. Fei maneluhulmi Biblia tañi feipin meu rume quelluafeimu, ¿chumngechi am? Peafiyiñ.

Doi ayühun nieaimi tami mongen mu

BIBLIA FEIPI: “[Ngünechen] elcünulai ñi pengelal ti cümeque dungu ñi femquen, quisu tati huercülqueimünmeu ta mahun ca cüme ngelcaquetranün ca eluqueimünmeu tamün duamtuelchi iyael, femngechi tamün ayüucüleam” (Hechos 14:17).

¿CHEM QUIMELTUEIÑMU?: Com ñi deumael Chau Dios Mapu meu quiñe regalo reque felei cüpalu quisu meu, ngüneduamülmi fente taiñ duamtunieteu Chau Dios doi falintunieafimi com ñi deumael Mapu meu.

Peaimi falinque ngülam tami quelluaeteu

BIBLIA FEIPI: “Fei quimaimi chem ñi cümen, ñi norngen ca chumngechi dullintuchenoal. Ca quimaimi chumngechi tami cüme miyahual” (Proverbios 2:9).

¿CHEM QUIMELTUEIÑMU?: Chau Dios deumaeiñmu. Feimu cüme quimniei chem duamnieiñ taiñ ayüucüleal. Fei chillcatufilmi Biblia quimürpuaimi fillque dungu tami quelluaeteu tami mongen meu.

Quimürpuaimi falinque dungu

BIBLIA FEIPI: “Peafimi ti quimün Chau Ngünechen mu cüpalu” (Proverbios 2:5).

¿CHEM QUIMELTUEIÑMU?: Maneluhulmi ñi mülen ta Ngünechen falinque dungu quimürpuafuimi. Eimi ramtuhuafuimi chi: “¿Chumal mongeleiñ? ¿Chumngelu sufriqueiñ? Ca lan mu tati pu che, ¿chem dungu rupaquei?”. Biblia meu quimürpuafuimi com tüfachi dungu.

Maneluhuafuimi ñi cüpayal cümeque dungu

BIBLIA FEIPI: “‘Iñche am cüme quimnien tañi raquiduamcülen eimün mu’ pi Jehová, ‘nien tüngcülechi raquiduam, ca huesa raquiduam nielan, tañi eluafiel ta eimün cüme felen ca quiñe maneluhun’” (Jeremías 29:11).

¿CHEM QUIMELTUEIÑMU?: Chau Ngünechen feipicünui cüpalechi antü meu quisu tañi duam mu ngehuelayai huesaque dungu, sufrihuelayaiñ ca lahuelayai ta che cütu. Maneluhulmi Chau Ngünechen tañi feipicünuel meu, quelluaimu tami chaftual tati huesaque dungu tami rupamequen fachantü.

Maneluucüleal ñi mülen ta Ngünechen, ¿chumngechi quellufi tati pu che?

Cyndi, Estados Unidos mu mülelu feipi: “Afmatulqueneu chumngechi Chau Dios quelluqueiñmu fillque dungu taiñ mongen meu. Chau Dios quelluqueiñmu taiñ quimal chem doyümnieal taiñ mongen meu, chumngechi cüme yeucüleal caquelu che inchiñ, ca chem chumafuiñ taiñ cüme hueniyeafiel ta Chau Dios”.

Elise, Francia mu mülelu feipi: “Tañi maneluucülen mu ñi mülen ta Ngünechen doi ayüucülen tañi mongen meu. Mülei fillque dungu tañi quimafel iñche Chau Ngünechen meu, tañi deumael mu cam tati Biblia meu, feimu rume ayüucülen”.

Pedro, mülelu Países Bajos mu feipi: “Inanieal Chau Dios tañi feipin Biblia mu quelluqueneu ñi ayüucüleal tañi mongen mu. Biblia tañi feipin quellueneu tañi huesa dungunoal, tañi doi duamtuchefengeal ca tañi cüme duamcüleal. Ca quelluqueneu tañi doi cüme chaungeal”.

Liz, Estonia mu mülelu feipi: “Petu tañi quimnofiel ta Chau Dios re iquefun, umautuquefun ca rume cüdauquefun, rüf ayüucülelafun tañi mongen meu. Huelu feula doi falintuniequefiñ tañi mongen ca doi ayüucülen”.

Adrien, Francia mu mülelu feipi: “Iñche rume cüdauquen tañi fill raquiduamcülenoal. Feimu quimal ñi mülehuenoal huesaque dungu, norngenochi dungu ca taiñ sufrihuenoal, rume quelluqueneu”.