Ti kim longko ülmen wentru Salomon

KIÑE trokiñ mapu ka ñi longko ülmenkülelu, feyentufile ka yamniefile engün Jewba ñi Ngünenien, ¿chumngechi feleafuy chi mongen? Meli mari tripantu puwlu Salomon ñi ngünenieel pengeli ñi chumngen.

Petu ñi lanon, David üytufi ñi fotüm Salomon pingelu ñi longko ülmen-ngerpual. Kiñe antü, Salomon perumey ñi pewma mu ta Ngünechen, ñi eluaetew kom ñi ayükeel. Ti weche wentru ngillatuy ñi elungeal kimün ñi ngünenieal ti nor dungu mew. Jewba rume ayüy (mütre küpa) ñi feypietew, feymu elufi ñi ngillatuel. Ka feypikünufi: ‘Feyentulmi (müngeltulmi), fütra ülmen-ngerpuaymi, rume püramkünuaymi tami üy, ka alün mongen nieaymi’.

Salomon ñi fütra kimün kimngey kom püle. Kiñe antü epu domo kewamekeyngu (nalmekeyngu) kiñe we püñeñ mew iney ñi ñukengen, feymew amuyngu ñi pemeafiel ta Salomon. ¿Chumi am ta Salomon? ¡Feypi ñi katrüngeal epu trokiñ mew ti we püñeñ! Wünen domo ayüy (küpa) ñi femngeal, welu kangelu llellipuy ñi elungeal kangelu domo. Femngechi Salomon kimi ti llellipuchi domo, feyta ñi rüf ñuke ürke. Kimlu feychi dungu, kom pu israelche ngüneduamingün Salomon ñi nieel Ngünechen ñi fütra kimün.

Doy afmatun küdaw femlu Salomon, feyta Jewba ñi ngillatuwe ruka Jerusalen mew, feyta mu kom pu israelche amuafuyngün ñi püramyeafiel ta Ngünechen. Dewlu chalintukungey ti ngillatuwe ruka, fey Salomon wüli kiñe fütra llellipun ta Ngünechen, feymew feypi: “¡Lelinge! Ti kallfü wenu, may, ti fütra wenu mapu, pepi nielay mew rume eymi tami mülen üye mu ¡tunten no rume femlayafuy tüfachi ruka iñche ñi dewmael!” (1 Reyes 8:27).

Salomon kimngerpuy ka allküngey ñi üy alü kamapu mew, Seba püle Arabia mapu mu kütu (kenü). Ti domo ngünenielu feychi trokiñ mapu, ka amuy Israel mapu mu kidu ñi duam ñi pemeafiel ta Salomon ñi fütra ülmen-ngen ka kintukafiel ñi kimün. Rume afmatuy, feymew püramyefi ta Jewba tañi dulliel (ngümintuel) kiñe kim longko ülmen-ngelu. Ngünechen kümelkafi Salomon ñi ngünenieel, feymu doy küme felerpuyngün ka tüngküleyngün pu kuyfike israelche.

Welu kom ñi mongen mew, Salomon kintulay Jewba ñi kimün tañi ngüyületew. Kidu feyentuwelafi Jewba ñi pin, feymu fentren domo kureyefi, ka kiñeke fey engün püramyefingün koylake dio. ¿Chumngechi tripay? Feyta ñochi famentunieleyew ta Jewba mew, ka piwkeyerpuy koylake dio. Feymu lle Ngünechen feypifi: ‘Tami pu reñma (pu che) fentren mapu müntuñmangetuay’. Welu müntuñmangelayayngün kom tañi mapu ñi ngünenieel, Ngünechen ñi feypikünuel ta David müten. Salomon feyentukenofilu rume, Jewba ngoymalafi ñi eldungu femlu David engu.

(Tuwlu 1 Reyes kapitulo 1 ka puwlu 11, 2 Crónicas kapitulo 1 ka puwlu 9, ka Deuteronomio 17:17.)