Üngümküleyngün Jerusalen waria mu

TÜFACHI pu che Jesu tañi pu inanieetew ngeyngün. Feyentufingün (müngeltufingün), ka mülekayngün Jerusalen waria mu. Ka petu kom kiñewün mu üngümküleyngün (ingelküleyngün), kiñe fütra wüwükün apolrumefi kom ti ruka chew ñi mülemum engün. Kiñe fütra kürüf reke wüwükürumey ñi rupan. Ka fewla wef triparumey kewün kütral reke wente kiduke ñi longko mu engün. ¿Peafuymi ti kütral wentelen kom ti pu inaniekeetew ñi longko mew? ¿Chem pifel am ta tüfa?

¡Fey kiñe afmatun dungu! Jesu ka müleputuy tañi Chaw wenu mapu mu, ka wütrulnakümelpafi Ngünechen ñi lif küme püllü tañi pu inanieetew mu. ¿Kimimi chem ñi femün chi püllü ñi femal engün? Kom fill kake kewün llituy ñi dungun engün.

Fentren Jerusalen waria che allkülu ti wüwükün, kiñe fütra kürüf reke, ka küpayngün ñi peam chem dungu ñi rupan. Kiñeke tati pu che kake mapu küpayngün ñi wenuñpüramal ti Pentekoste Israel che ñi trawün. ¡Müna afmatun dungu pepay tati pu witran! Tati pu inawngepelu kidu ñi kewün mew, feypi engün tati afmangechi dungu Ngünechen ñi femken.

‘Kom tüfachi pu che Galilea tuwingün,’ pi ti pu witrankülelu. ‘Feymu, ¿chumngechi pepi dunguyngün tüfachi kakewme kewün nielu tati pu mapu iñchiñ tañi tuwün mew?’

Fewla Pedro witrapüray ñi feypiafiel. Newentun dungu mu nütramelfi tati pu che chumngechi langümngey Jesu, ka Jewba ñi wiñomongeltuetew. ‘Fewla Jesu müleputuy wenu mapu Ngünechen ñi man püle mu,’ pi Pedro. ‘Ka kidu wütrunagümi ti feypikünuelchi lif küme püllü. Feymu lle müley tüfachi afmatun dungu.’

Feypilu Pedro tüfachi dungu, fentren ti pu che mu rume weñangküleyngün ñi femngen mu Jesu. ‘¿Chem chumaiñ iñchiñ?’ ramtuyngün. Pedro feypifi engün: ‘Müley tamün kangetual tamün mongen ka tamün fawtisangeal.’ Feychi antü küla warangka fawtisayngün, ka Jesu tañi inanieetew ngerputuyngün.