Tati papil Introducción a la palabra de Dios kelluaeiñmu llituam taiñ nütramkan
1. ¿Chem we kellu nieiñ taiñ amuldungual?
1 Pichin antü rupalu, llowiyiñ ti we papil Introducción a la palabra de Dios pingelu. Ngüneduampefuiñ may ñi trapümkeel fillke Biblia ñi wirintukun, ka kakewme Biblia dungu, chumngechi pengelkey ti lifru Razonamiento pingelu, feymu kelluafuy ñi llituam taiñ nütramkan. ¿Chumngechi kelluafeiñmew pepikawal taiñ nütramkan ti amuldungun mu?
2. ¿Chumngechi püneafuiñ ti papil Introducción a la Palabra de Dios pingelu ti amuldungun mu?
2 Kintuafuymi ti pura ramtun, fey feypiafuymi: “Pichiñma nütramkamekefiyiñ tami pu karuka che, ka fentren engün ramtuwkey: ‘¿Feyngepey may Chaw Ngünechen ñi kutrankamekefiel ta che?’ [Kiñeke lof mew, doy kümey ñi pengelelafiel ta che ti ramtun mülelu papil mu.] ¿Chem piafuymi kay? [Elnge tañi llowdungual]. Biblia küme llowdungukey tüfachi ramtun”. Biblia mu papeltufinge ka nütramelfinge kiñe kam doy wirilechi trokiñ dungu mülelu Biblia mu. Ti che ayüwüñmale, pengelelafuymi ti epu mari ramtun mülelu ti papil ñi wünen pagina mu, fey feypifinge tamu ngüneduamal kiñe duamelchi ramtun ka antü mu. Ka eluafuymi kiñe papil taiñ pünekeel chillkatuam, fey feypiafuymi: “Ka nien doy falin dungu tüfachi nütram mu”.
3. Amuldungumekelmi feychi lof chew müley fentren che koneltukenolu ti kristiano religion mu, ¿chumngechi kelluafeiñmew ti we papil?
3 Tati ramtun 4, 13 puwlu 17, rume kelluafeymu amuldungumekelmi feychi lof chew müley fentren che koneltukenolu ti kristiano religion mu. Kiñe dungu tüfa, püneafuymi ti ramtun 17, ka feypiafuymi: “Peyawülmekefiyiñ pu che taiñ kelluafiel tati pu reñma che. Kangentufiyiñ fill antü tati pu reñma chaftumekeyngün wedake dungu. ¿Chem piafuymi eymi? [Elnge tañi llowdungual]. Fentren pu kurewen-ngen müna falintuniefi tüfachi kim dungu: ‘Fey ti domo kay yamniepe tañi füta’. [Duamfalngelay ñi feypingeal ñi mülen mu Efesio 5:33. Welu kiñe domo engu nütramkamekelmi, papeltuafuymi ti dungu mülelu Efesio 5:28 mew.] Inafilmi tüfachi ngülam, ¿kümelkayafeymew may tamu kurewen-ngen mu?”.
4. ¿Chem feypiafuymi fente puwle chi nütramkan kiñe che koneltulenolu ti kristiano religion mu?
4 Dewelkale tamu nütramkan, pepikawnge tami wiño nütramkayal ka antü mu. Wiñotulmi ngüneduamafuymi kangelu texto mülelu inaduamngelu chi ramtun mu. Kümelu trokilmi, feypifinge tati che ti kümeke ngülam tamu nütramkael, Biblia mu tuwi. Dewma nütramkafilmi tati che engu, ka chem ñi rakiduamken Biblia mu, fey elelfinge kiñe chillka ñi duamniefel. (Pefinge Taiñ Amuldungukeel diciembre küyen 2013, pagina 3 puwlu 6 mew.)