Epu peñi hue coneltulelu ti Troquiñ Adniechequelu
TACHI trahun femngelu 5 conchi octubre 2024 feipingei peñi Jody Jedele ca Jacob Rumph dullingei ñi coneltuleal ti Troquiñ Adniechequelu. Fei engu yeniei fentren tripantu cüdahuelquefiel ta Jehová.
Jody Jedele ca tañi domo, Dámaris
Peñi Jedele choyüngei Misuri huaria, Estados Unidos mu. Pichicalu müten quimeltungei ti rüf dungu. Cheu ñi mülequefel pichilequefui pu Dunguquelu Ineingen Jehová. Feimu quimfi fentren peñi ca lamngen quellumequefulu amuldungual tañi lof mu. Pefilu am ñi quiñeucülen ca piuqueyeuquen pu peñi ca lamngen, nengümüñmaeyu tañi piuque. Fautizahui 15 conchi octubre 1983. Rume ayüquefui amuldungucheal. Feimu tripalu müten colegio mu, precursor regularngerpui septiembre 1989 tripantu.
Petu pichicalu quisu ca tañi lamngen, tañi pu chau yequefeyu Betel ruca mu. Tüfa raquiduameleyu ñi quelluconal Betel mu. Fei rupachi antü mu, femürpuingu. Septiembre 1990 tripantu, peñi Jedele mangelngei ñi cüdahual Betel mülelu Wallkill mu. Hunelu mu coneltui lifturucan mu, fei hula quelluntucui Servicios Médicos mu.
Feichi mu püllelefui trahunche huincadunguquelu. Fentren che mülefui, feimu duamngefui fentren quellu. Taiñ peñi Jedele amui ñi quelluntucual, fei eluhui ñi quim huincadungual. Pichiñma mu, tañi circuito mu quimürpufi quiñe precursora Dámaris pingei. Rupachi antü mu niehuingu, fei trür cüdahuingu Betel mu.
Feichi 2005 tripantu mu, tripaingu Betel mu tañi cuidayafiel taiñ peñi ñi ñuque, ca tañi llalla ca tañi chedcui. Feichi mu, mür engu precursor regularngefuingu. Taiñ peñi elungei ñi quimeltual tati Escuela ñi Pepicangeam pu Precursor. Ca quelluntucui ti Troquiñ Huentru ñi Quellual pu Cutrancülelu Pital mu. Ca fei hula, tati Comité Regional de Construcción pingelu.
Feiti 2013 tripantu mu ca huiño mangelngeingu Betel mu, femngechi ñi quelluntucual engu ñi deumangeal Betel ruca Warwick huaria mu. Rupachi antü, ca coningu ti Betel mülelu Patterson ca Wallkill huaria mu. Taiñ peñi ca quelluntucui ti Troquiñche Adniequelu ti Deumarucan Cüdau ca ti Troquiñche Quelluchequelu ñi Tuculelngenoal Mollfüñ ti che. Marzo 2023 mu, taiñ peñi quelluntucui ti Troquiñche Adcünuquelu ti Amuldungun Cüdau. Com feitachi cüdau ñi elungequeel, feipi: “Quiñeque mu cüdaungeafui ca pichi llicayafuiñ chi elungen mu quiñe hue cüdau. Feimu rume cümeafui maneluhual Jehová mu, quisu am quelluqueteu iñchiñ taiñ femal chem cüdau rume”.
Jacob Rumph ca tañi domo, Inga
Peñi Rumph choyüngei California mu, Estados Unidos. Petu pichilu, tañi ñuque amuldunguhuequelafui ca amuquelafui trahun mu. Huelu enseñalquefi Biblia tañi püñeñ. Fill tripantu, feitachi pichi huentru amuquefui tañi abuela mu, fei rume cüme testigongefui ca quellufi tañi doi quimafiel ta Biblia. Feimu 13 tripantu nielu, feipi ñi quimeltulelngeal Biblia. Fei fautizahui 27 septiembre 1992 mu. Ca tañi ñuque ca huiño amuldungui ca amui trahun mu. Cafei, tañi chau, tañi peñi ca tañi lamngen ca fautizahurpui.
Huechengelu taiñ peñi Rumph, inaduamfi tati pu precursor fente ñi ayüucülequen engün. Feimu tripalu colegio mu, precursorngerpui septiembre 1995 tripantu mu. Feiti 2000 tripantu mu, huiñamtuhui Ecuador mu cheu ñi doi duamniengen amuldunguquelu. Fei mu quimfi quiñe precursora Inga pingelu, Canadá mu tuulu. Rupachi antü mu niehuingu. Nieulu engu müten, fei amuingu quiñe pichi trahunche mülelu Ecuador mu. Fachantü feitachi pichi trahunche quiñe fütra trahunchengetui.
Rupachi antü mu, precursor especialngerpuingu, fei elfalcünungei ñi huitrancontuafiel pu trahunche. Feichi 2011 tripantu mu, mangelngeingu ti clase 132 Galaad pingechi Escuela mu. Tripalu engu feichi escuela mu, 5 pais mu miyauquefuingu ca fillque elfal cüdau niequefuingu: Betel mu, misionero ca huitrancontuquefuingu tati trahunche. Taiñ peñi ca quimeltuquefui tati Escuela ñi Pepicangeam pu Amuldunguquelu Ngünechen ñi Gobierno.
Tati COVID-19 ñi duam mu, huiñotuingu Estados Unidos mu. Fei mangelngeingu Betel mülelu Wallkill mu. Fei mu feitachi peñi pepicangei ñi cüdahual ti Troquiñche Adcünuquelu ti Amuldungun. Fei hula huercüngeingu ti Betel Ecuador mu, fei mu taiñ peñi coneltui ti Troquiñche Adcünuquelu Betel ruca. Fei 2023 tripantu, huercüngeingu ta Warwick. Enero 2024 mu, taiñ peñi quelluntucui ti Troquiñche Adcünuquelu ti Amuldungun Cüdau. Raquiduamün mu fillque püle tañi miyauquen, feipi: “Falin-ngelai cheu taiñ serfifiel Jehová, doi falin-ngei inei iñchiñ taiñ serfiquefiel ta Jehová: taiñ pu peñi ca pu lamngen”.
Müna falintuquefiyiñ chumngechi ñi cüdauquen feitachi pu peñi (Filip. 2:29).