অধিকাৰীসকলক কিয় সন্মান কৰা উচিত?

১, ২. (ক) অধিকাৰীসকলক সন্মান কৰাৰ বিষয়ে আমি কেনেধৰণৰ সংঘৰ্ষ কৰিবলগীয়া হয়? (খ) আমি কি কি প্ৰশ্ন আলোচনা কৰিম?

সৰু লʼৰাজনক আপুনি কিবা কৰিবলৈ কৈছে, কিন্তু সি কৰিবলৈ ইচ্ছা কৰা নাই। তেতিয়া সি কেনে আচৰণ কৰে আপুনি লক্ষ্য কৰিছেনে? লʼৰাজনৰ মনত কি চলি আছে, তাক আপুনি তাৰ মুখৰ আংগি-ভংগিৰপৰাই বুজিব পাৰিব। পিতৃ-মাতৃয়ে কি কৈছে তাক লʼৰাজনে শুনি পাইছে আৰু তেওঁলোকক সন্মান দিব লাগে বুলিও সি জানে। কিন্তু এই ক্ষেত্ৰত সি তেওঁলোকৰ কথা পালন কৰিবলৈ বিচৰা নাই। এই সৰু লʼৰাটোৰ দৰে আমি সকলোৱে এনে পৰিস্থিতিৰ সন্মুখীন হওঁ।

^২ অধিকাৰীসকলক সন্মান কৰাটো সদায় আমাৰ বাবে সহজ নহয়। আপোনাৰ ওপৰত থকা অধিকাৰীসকলক সন্মান কৰিবলৈ আপোনাৰ কেতিয়াবা অসুবিধা হয় নেকি? যদি হয়, তেনেহʼলে মনত ৰাখিব যে আপুনি এই সংঘৰ্ষত অকলশৰীয়া নহয়। আমি এনে এক সময়ত বাস কৰিছোঁ, যʼত অধিকাৰীসকলক সন্মান কৰাটো ক্ৰমান্বয়ে কমি আহিছে। কিন্তু, বাইবেলে আমাক অধিকাৰীসকলক সন্মান কৰিবলৈ আজ্ঞা দিছে। (হিতোপদেশ ২৪:২১) ঈশ্বৰৰ প্ৰেমত নিজকে ৰাখিবলৈ হʼলে আমি এনে কৰাটো অতি প্ৰয়োজন। সেইবাবে, কিছুমান প্ৰশ্ন আমাৰ মনলৈ অহাটো স্বাভাৱিক। অধিকাৰীসকলক সন্মান কৰাটো আমাৰ বাবে কিয় কঠিন হয়? যিহোৱা ঈশ্বৰে আমাক এইদৰে কৰিবলৈ কিয় আজ্ঞা দিছে আৰু ইয়াক পালন কৰিবলৈ কিহে আমাক সহায় কৰিব? কি কি উপায়েৰে আমি অধিকাৰীসকলক সন্মান দেখুৱাব পাৰোঁ?

অধিকাৰীসকলক সন্মান দেখুৱা কিয় কঠিন

৩, ৪. পাপ আৰু অসিদ্ধতা কেনেকৈ আৰম্ভ হৈছিল আৰু আমাৰ অসিদ্ধতাৰ বাবে অধিকাৰীসকলক সন্মান দেখুৱা কিয় কঠিন?

^৩ অধিকাৰীসকলক সন্মান দেখুৱা আমাৰ বাবে কিয় কঠিন, আহক আমি ইয়াৰ দুটা কাৰণ আলোচনা কৰোঁ। প্ৰথম কাৰণটো হৈছে আমি সকলোৱে অসিদ্ধ হওঁ। দ্বিতীয়টো হৈছে, আমাৰ ওপৰত অধিকাৰ চলোৱা লোকসকলো অসিদ্ধ। যেতিয়া আদম আৰু হৱাই যিহোৱা ঈশ্বৰৰ অধিকাৰৰ বিৰুদ্ধে এদন বাগিচাত বিদ্ৰোহ কৰিছিল, তেতিয়াৰেপৰা মানৱজাতিয়ে পাপ আৰু অসিদ্ধতাৰ অধীন হৈ পৰিল। গতিকে আমি কʼব পাৰোঁ যে বিদ্ৰোহ কৰাৰ দ্বাৰা এই পৃথিৱীত পাপ আৰম্ভ হৈছিল। আদমৰ সময়ৰপৰা বৰ্তমানলৈকে আমাৰ সকলোৰে বিদ্ৰোহ কৰাৰ প্ৰবৃত্তি জন্মৰেপৰা আছে।—আদিপুস্তক ২:১৫-১৭; ৩:১-৭; গীতমালা ৫১:৫; ৰোমীয়া ৫:১২.

^৪ আমি জন্মৰেপৰা পাপী হোৱাৰ বাবে সহজতে আমাৰ গৰ্ব আৰু ফিতাহী মৰাৰ মনোবৃত্তি থাকিব পাৰে। কিন্তু ইয়াৰ পৰিৱৰ্তে নম্ৰতা এনে এক গুণ, যাক আহৰণ কৰা আৰু সেই অনুসৰি কাৰ্য্য কৰি থাকিবলৈ কঠিন পৰিশ্ৰম কৰাৰ প্ৰয়োজন। আনকি বহুবছৰ ধৰি ঈশ্বৰক সেৱা কৰাৰ সত্ত্বেও আমি হয়তো আঁকোৰগোঁজ আৰু অহংকাৰী হৈ পৰিব পাৰোঁ। উদাহৰণস্বৰূপে, কোৰহৰ বিষয়ে অলপ সময় চিন্তা কৰক। তেওঁ বিভিন্ন পৰিস্থিতিৰ মাজতো ঈশ্বৰৰ সেৱকসকলৰ লগত একত্ৰিত হৈ যিহোৱা ঈশ্বৰক বিশ্বাসেৰে সেৱা কৰি আছিল। কিন্তু বহুবছৰ ধৰি যিহোৱা ঈশ্বৰক সেৱা কৰাৰ সত্ত্বেও তেওঁ বেছিকৈ অধিকাৰ পাবলৈ হাবিয়াহ কৰি মোচিৰ বিৰুদ্ধে বিদ্ৰোহ কৰিছিল। আমি জানোঁ যে মোচি সেই সময়ত পৃথিৱীৰ ভিতৰত আটাইতকৈ নম্ৰ ব্যক্তি আছিল। (গণনা পুস্তক ১২:৩; ১৬:১-৩) আন এক উদাহৰণ হৈছে ৰজা উজ্জিয়া। অহংকাৰী হৈ ৰজা উজ্জিয়াই পুৰোহিতসকলে কৰিবলগীয়া পবিত্ৰ সেৱাক, নিজে কৰিবলৈ যিহোৱা ঈশ্বৰৰ মন্দিৰত সোমাইছিল। (২ বংশাৱলি ২৬:১৬-২১) নিজৰ বিদ্ৰোহী আচৰণৰ বাবে এই লোকসকলে শাস্তিৰ সন্মুখীন হৈছিল। তেওঁলোকৰ বেয়া উদাহৰণৰপৰা আমি কিছু কথা শিকিব পাৰোঁ। আমাৰ মাজত থকা অহংকাৰ মনোবৃত্তি দূৰ কৰিবলৈ আমি কঠিন সংঘৰ্ষ কৰাৰ প্ৰয়োজন। কিয়নো অহংকাৰে আমাক অধিকাৰীসকলক সন্মান কৰিবলৈ বাধা দিয়ে।

৫. অসিদ্ধ লোকসকলে নিজৰ অধিকাৰক কেনেকৈ অপব্যৱহাৰ কৰে?

^৫ আনহাতে, অধিকাৰত থকা লোকসকলে কৰা কাৰ্য্যৰ বাবে তেওঁলোকে আনৰপৰা সন্মান নাপায়। ইয়াৰে ভিতৰত কিছুমান লোকে নিষ্ঠুৰ, স্বেচ্ছাচাৰী হোৱাৰ লগতে শাৰীৰিক আৰু মানসিকভাৱে লোকসকলক অত্যাচাৰ কৰে। অধিকাৰক অপব্যৱহাৰ কৰা বহুতো ঘটনা আমি ইতিহাসত দেখিবলৈ পাওঁ। (উপদেশক ৮:৯ পঢ়ক।) উদাহৰণস্বৰূপে, চৌলক ৰজা হিচাপে নিযুক্ত কৰাৰ সময়ত তেওঁ এজন সহজ-সৰল আৰু নম্ৰ ব্যক্তি আছিল। কিন্তু সময় অতিবাহিত হোৱাৰ লগে লগে তেওঁ অহংকাৰী আৰু ঈৰ্ষাপৰায়ণ হৈ পৰিল। আনকি তেওঁ ঈশ্বৰৰ এজন বিশ্বাসী ব্যক্তি দায়ূদৰ ওপৰতো তাড়না কৰিবলৈ আৰম্ভ কৰিছিল। (১ চমূৱেল ৯:২০, ২১; ১০:২০-২২; ১৮:৭-১১) ইয়াৰ পাছত দায়ূদ ইস্ৰায়েলৰ ৰজা হৈছিল। ইস্ৰায়েলৰ ভাল ৰজাসকলৰ ভিতৰত তেওঁ এজন আছিল। কিন্তু পাছলৈ তেওঁ নিজৰ অধিকাৰক অপব্যৱহাৰ কৰিছিল। দায়ূদে ঊৰিয়াৰ পত্নীৰ লগত অনৈতিক সম্পৰ্ক ৰাখি, তাইৰ নিৰ্দোষী স্বামীক মৃত্যু হʼবলৈ যুদ্ধক্ষেত্ৰলৈ পঠাইছিল। (২ চমূৱেল ১১:১-১৭) সঁচাকৈ, অসিদ্ধতাৰ বাবে লোকসকলে নিজৰ অধিকাৰক ভালদৰে ব্যৱহাৰ কৰিব নোৱাৰে। যেতিয়া অধিকাৰত থকা লোকসকলে যিহোৱা ঈশ্বৰক সন্মান নকৰে, তেতিয়া তেওঁলোকে নিজৰ অধিকাৰক আৰু বেছিকৈ অপব্যৱহাৰ কৰে। কিছুমান কেথʼলিক পোপে যিদৰে ব্যাপকভাৱে তাড়না কৰিবলৈ লোকসকলক উচটাইছিল, তাৰ বিষয়ে ব্ৰিটেনৰ এজন নেতাই এইদৰে লিখিছিল: “অধিকাৰে লোকসকলক ভ্ৰষ্ট কৰে আৰু বেছি অধিকাৰত থকা লোকসকলে বেছিকৈ ভ্ৰষ্টাচাৰ কৰে।” অধিকাৰক অপব্যৱহাৰ কৰা লোকসকলৰ বিষয়ে আলোচনা কৰাৰ পাছত আহক আমি এতিয়া এই প্ৰশ্নটোৰ উত্তৰ বিচাৰোঁ: আমি অধিকাৰীসকলক কিয় সন্মান কৰা উচিত?

অধিকাৰীসকলক কিয় সন্মান কৰা উচিত?

৬, ৭. (ক) যিহোৱা ঈশ্বৰৰ প্ৰতি থকা প্ৰেমে আমাক কি কৰিবলৈ অনুপ্ৰাণিত কৰে আৰু কিয়? (খ) আজ্ঞাকাৰী হোৱাত কি জড়িত আছে আৰু আমি ইয়াক কেনেকৈ দেখুৱাব পাৰোঁ?

^৬ যিহোৱা ঈশ্বৰ, সংগী মানৱ আৰু নিজৰ প্ৰতি থকা প্ৰেমৰ বাবে আমি অধিকাৰীসকলক সন্মান কৰোঁ। আমি ঈশ্বৰক সকলোতকৈ বেছি প্ৰেম কৰোঁ আৰু তেওঁৰ হৃদয়ক আনন্দিত কৰিব বিচাৰোঁ। (হিতোপদেশ ২৭:১১; মাৰ্ক ১২:২৯, ৩০ পঢ়ক।) আমি জানোঁ যে ঈশ্বৰৰ গোটেই বিশ্বৰ ওপৰত শাসন কৰাৰ অধিকাৰ আছে। কিন্তু এদন বাগিচাত তেওঁৰ শাসনৰ বিৰুদ্ধে বিদ্ৰোহ হোৱাৰ পাছৰেপৰা পৃথিৱীত বহুতোলোকে যিহোৱাৰ শাসনক ত্যাগ কৰি চয়তানৰ পক্ষ লৈছে। আনহাতে, যিহোৱা ঈশ্বৰৰ শাসনক সমৰ্থন কৰিবলৈ পোৱাৰ বাবে আমি আনন্দিত। প্ৰকাশিত বাক্য ৪:১১ পদত কৰা বৰ্ণনাই আমাৰ হৃদয়ক আনন্দিত কৰে। যিহোৱা ঈশ্বৰৰ যে গোটেই বিশ্বৰ ওপৰত শাসন কৰাৰ অধিকাৰ আছে, তাৰ বিষয়ে এই বৰ্ণনাই স্পষ্টৰূপে তুলি ধৰে। আমাৰ দৈনন্দিন জীৱনত যিহোৱা ঈশ্বৰৰ শাসনক স্বীকাৰ কৰি আমি তেওঁৰ অধিকাৰক সমৰ্থন কৰোঁ।

^৭ যিহোৱা ঈশ্বৰৰ অধিকাৰক সন্মান দেখুৱাত আৰু কি জড়িত আছে? আমি ঈশ্বৰক প্ৰেম কৰাৰ বাবে তেওঁৰ আজ্ঞা পালন কৰোঁ। কিন্তু কেতিয়াবা কেতিয়াবা তেওঁৰ আজ্ঞা পালন কৰিবলৈ আমাৰ অসুবিধা হয়। এনে সময়ত আৰম্ভণিত বৰ্ণনা কৰা সেই সৰু লʼৰাজনৰ দৰে আমিও অধীনতা দেখুৱাবলগীয়া হয়। সহজ নোহোৱাৰ সত্ত্বেও যীচুৱে নিজৰ পিতৃৰ আজ্ঞা পালন কৰিছিল। সেইবাবে, তেওঁ পিতৃ যিহোৱাক কʼব পাৰিছিল: “মোৰ ইচ্ছা নহয়, তোমাৰেই ইচ্ছা সিদ্ধ হওক।”—লূক ২২:৪২.

৮. (ক) বৰ্তমান সময়ত যিহোৱা ঈশ্বৰৰ অধিকাৰৰ অধীনত থকাৰ লগত কি জড়িত আছে আৰু এই বিষয়ে যিহোৱা ঈশ্বৰে কেনে অনুভৱ কৰে? (খ) পৰামৰ্শ আৰু অনুশাসন গ্ৰহণ কৰিবলৈ আমাক কিহে সহায় কৰিব? (“পৰামৰ্শ শুনা, আৰু শিক্ষা গ্ৰহণ কৰা” নামৰ বক্সত চাওক।)

^৮ এইটো সত্য যে বৰ্তমান সময়ত যিহোৱা ঈশ্বৰে নিজৰ সেৱকসকলৰ লগত ব্যক্তিগতভাৱে কথা নাপাতে। ইয়াৰ পৰিৱৰ্তে, তেওঁৰ বাক্য বাইবেল আৰু এই পৃথিৱীত থকা মানৱ প্ৰতিনিধিসকলৰ দ্বাৰা কথা পাতে। যিহোৱা ঈশ্বৰে নিযুক্ত কৰা বা অনুমতি দিয়া প্ৰতিনিধিসকলক সন্মান কৰাৰ যোগেদি আমি ঈশ্বৰৰ অধিকাৰক স্বীকাৰ কৰোঁ। যদি আমি এই লোকসকলে আগবঢ়োৱা বাইবেলৰ পৰামৰ্শ আৰু শুধৰণি গ্ৰহণ নকৰোঁ, তেনেহʼলে ঈশ্বৰে নিযুক্ত কৰা প্ৰতিনিধিসকলৰ বিৰুদ্ধে আমি বিদ্ৰোহ কৰা হʼব আৰু ইয়ে ঈশ্বৰক অসন্তুষ্ট কৰিব। মনত পেলাওক যে যেতিয়া ইস্ৰায়েলীসকলে মোচিৰ বিৰুদ্ধে অনৰ্থক বকবকনি কৰিছিল আৰু বিদ্ৰোহ কৰিছিল, তেতিয়া যিহোৱা ঈশ্বৰে ইস্ৰায়েলীসকলে তেওঁৰ বিৰুদ্ধে বিদ্ৰোহ কৰা বুলি কৈছিল।—গণনা পুস্তক ১৪:২৬, ২৭.

৯. সংগী মানৱৰ প্ৰতি থকা প্ৰেমে আমাক কেনেকৈ অধিকাৰত থকা লোকসকলক সন্মান কৰিবলৈ অনুপ্ৰাণিত কৰিব? বৰ্ণনা কৰক।

^৯ সংগী মানৱৰ প্ৰতি থকা প্ৰেমৰ বাবে আমি অধিকাৰত থকা লোকসকলক সন্মান কৰোঁ। ইয়াৰ অৰ্থ কি বাৰু? কল্পনা কৰক যে আপুনি এক বিশাল সেনাবাহিনীৰ এজন সৈনিক। সেনাবাহিনীৰ সফলতা নিৰ্ভৰ কৰিব, যেতিয়া প্ৰতিজন সৈনিকে নিজৰ নিজৰ কেপ্তেইনক সহযোগ কৰি তেওঁৰ আদেশ পালন কৰিব আৰু সন্মান কৰিব। যদি আপুনি কেপ্তেইনৰ আদেশ পালন নকৰে, তেনেহʼলে লগত থকা সৈনিকসকলৰ জীৱন বিপদত পৰিব পাৰে। নিঃসন্দেহ, বৰ্তমান সময়ত জগতৰ সৈনিকসকলে কেৱল বিনাশ কৰা দেখিবলৈ পোৱা যায়। কিন্তু যিহোৱা ঈশ্বৰৰ সৈনিকসকলে কেৱল লোকসকলৰ ভালৰ বাবেহে কাম কৰে। বাইবেলত শ শ বাৰ ঈশ্বৰক ‘বাহিনীবিলাকৰ যিহোৱা’ বুলি উল্লেখ কৰিছে। (১ চমূৱেল ১:৩) তেওঁ কোটি কোটি শক্তিশালী স্বৰ্গদূতৰ সেনাপতি হয়। কেতিয়াবা কেতিয়াবা যিহোৱা ঈশ্বৰে পৃথিৱীৰ সেৱকসকলক সেনাবাহিনীৰ লগত তুলনা কৰে। (গীতমালা ৬৮:১১; যিহিষ্কেল ৩৭:১-১০) যদি আমি যিহোৱা ঈশ্বৰে নিযুক্ত কৰা প্ৰতিনিধিসকলৰ বিৰুদ্ধে বিদ্ৰোহ কৰোঁ, তেনেহʼলে আমি আমাৰ লগত থকা সৈনিকসকলৰ জীৱন বিপদত নেপেলামনে? যেতিয়া এজন ভাই বা ভনীয়ে নিযুক্ত প্ৰাচীনসকলৰ বিৰুদ্ধে বিদ্ৰোহ কৰে, তেতিয়া মণ্ডলীৰ আন সদস্যসকলেও ইয়াৰ পৰিণাম ভুগিবলগীয়া হয়। (১ কৰিন্থীয়া ১২:১৪, ২৫, ২৬) যদি এটা সন্তানে পিতৃ-মাতৃৰ বিদ্ৰোহ কৰে, তেনেহʼলে পৰিয়ালৰ সকলো সদস্যই দুখ-কষ্ট ভুগিবলগীয়া হয়। সেইবাবে, অধিকাৰত থকা লোকসকলক সন্মান আৰু সহযোগ কৰাৰ দ্বাৰা আমি সংগী মানৱৰ প্ৰতি প্ৰেম দেখুৱাওঁ।

১০, ১১. অধিকাৰত থকা লোকসকলক সন্মান কৰিলে আমি কেনেকৈ ব্যক্তিগতভাৱে লাভৱান হʼম?

^১০ অধিকাৰীসকলক সন্মান কৰাৰ আন এক কাৰণ হৈছে, তেওঁলোকক সন্মান কৰিলে আমি ব্যক্তিগতভাৱে উপকৃত হʼম। যেতিয়া যিহোৱা ঈশ্বৰে আমাক অধিকাৰত থকা লোকসকলক সন্মান কৰিবলৈ কয়, তেতিয়া ইয়াক পালন কৰিলে আমাৰ কি উপকাৰ হʼব তাৰ বিষয়েও বৰ্ণনা কৰে। উদাহৰণস্বৰূপে, যিহোৱা ঈশ্বৰে বৰ্ণনা কৰে যে এক সুখী আৰু আনন্দৰ জীৱন লাভ কৰিবলৈ হʼলে, লʼৰা-ছোৱালীয়ে নিজৰ পিতৃ-মাতৃৰ আজ্ঞা পালন কৰা উচিত। (দ্বিতীয় বিবৰণ ৫:১৬; ইফিচীয়া ৬:২, ৩) মণ্ডলীৰ প্ৰাচীনসকলক সন্মান কৰিবলৈ ঈশ্বৰে পৰামৰ্শ দিছে। যদি ইয়াক পালন কৰা নহয়, তেনেহʼলে যিহোৱা ঈশ্বৰৰ লগত থকা আমাৰ সম্পৰ্কৰ মাজত সমস্যাৰ সৃষ্টি হʼব পাৰে। (ইব্ৰী ১৩:৭, ১৭) চৰকাৰী অধিকাৰীসকলৰ নিয়ম পালন কৰিবলৈ যিহোৱা ঈশ্বৰে আমাক আজ্ঞা দিছে, কাৰণ ইয়ে আমাক সুৰক্ষা দিব।—ৰোমীয়া ১৩:৪.

^১১ যিহোৱা ঈশ্বৰে কিয় আমাক অধিকাৰীসকলৰ আজ্ঞা পালন কৰিবলৈ কৈছে, ইয়াৰ কাৰণ জানিলে, তেওঁলোকক সন্মান কৰিবলৈ আমাৰ সহজ হʼব। তেনেহʼলে আহক, আমাৰ জীৱনৰ তিনিটা দিশত কেনেকৈ অধিকাৰীসকলক সন্মান দেখুৱাব পাৰোঁ তাৰ বিষয়ে আলোচনা কৰোঁ।

পৰিয়ালত সন্মান দেখুৱাওক

১২. স্বামী বা পিতৃক যিহোৱা ঈশ্বৰে পৰিয়ালত কি ভূমিকা দিছে আৰু তেওঁলোকে ইয়াক কেনেকৈ পূৰ কৰা উচিত?

^১২ যিহোৱা ঈশ্বৰে পৰিয়াল ব্যৱস্থাৰ নিজে আৰম্ভণি কৰিছিল। তেওঁ শৃংখলাবদ্ধ ঈশ্বৰ হোৱাৰ বাবে, পৰিয়ালৰ সকলো সদস্যৰ দায়িত্বৰ বিষয়ে সুন্দৰভাৱে ব্যৱস্থা কৰিছে। (১ কৰিন্থীয়া ১৪:৩৩) পৰিয়ালৰ মুৰব্বীৰ দায়িত্ব ঈশ্বৰে স্বামী বা পিতৃক দিছে। যীচুৱে যিদৰে মণ্ডলীৰ ওপৰত নিজৰ মুৰব্বীৰ দায়িত্ব পালন কৰিছিল, ঠিক সেইদৰে স্বামীয়ে যীচুৰ আৰ্হিক অনুকৰণ কৰাৰ যোগেদি তেওঁক সন্মান দেখুৱায়। (ইফিচীয়া ৫:২৩) স্বামীয়ে নিজৰ দায়িত্ব আওকাণ নকৰি, সাহসেৰে সকলো দায়িত্ব পূৰ কৰা উচিত। তেওঁ স্বেচ্ছাচাৰী বা নিৰ্দয় হোৱাৰ পৰিৱৰ্তে, মৰমিয়াল, ন্যায়পৰায়ণ আৰু দয়ালু হোৱা উচিত। স্বামীয়ে এই কথা মনত ৰখা উচিত যে তেওঁৰ অধিকাৰৰ এক সীমা আছে আৰু সেয়া হৈছে যিহোৱাৰ অধিকাৰতকৈ তেওঁৰ অধিকাৰ ওপৰত নহয়।

১৩. যিহোৱা ঈশ্বৰে বিচৰা অনুসৰি কেনেকৈ এগৰাকী মাতৃ বা পত্নীয়ে পৰিয়ালত নিজৰ দায়িত্ব পালন কৰে?

^১৩ এগৰাকী মাতৃ বা পত্নীয়ে স্বামীৰ সহকাৰিণী বা সহায়ক হিচাপে কাম কৰা উচিত। তাইকো পৰিয়ালত কিছুমান অধিকাৰ দিয়া হৈছে। কিয়নো বাইবেলত “তোমাৰ মাতৃৰ ব্যৱস্থা ত্যাগ নকৰিবা” বুলি উল্লেখ কৰিছে। (হিতোপদেশ ১:৮) নিঃসন্দেহ তাইৰ যি অধিকাৰ আছে, সেয়া স্বামীৰ অধীনত থাকে। স্বামীৰ দায়িত্ববোৰ ভালদৰে পালন কৰিবলৈ সহায় আগবঢ়োৱাৰ যোগেদি এগৰাকী পত্নীয়ে স্বামীৰ অধিকাৰক সন্মান দেখুৱায়। তাই স্বামীক তুচ্ছ জ্ঞান নকৰে, চতুৰালী কথাৰে ফুচুলাবলৈ চেষ্টা নকৰে বা মুৰব্বীৰ দায়িত্ব নিজৰ হাতত নলয়। ইয়াৰ পৰিৱৰ্তে, তাই স্বামীৰ কাম-কাজত সহযোগ আৰু সমৰ্থন আগবঢ়ায়। যদি স্বামীৰ নিৰ্ণয়বোৰত পত্নীয়ে সন্মত নহয়, তেনেহʼলে তাই সন্মানেৰে নিজৰ মনৰ ভাৱ প্ৰকাশ কৰিব পাৰে, কিন্তু তাই স্বামীৰ প্ৰতি নিজৰ অধীনতা দেখুৱা উচিত। যদি স্বামী সত্যত নাই, তেনেহʼলে পত্নীয়ে হয়তো কঠিন পৰিস্থিতিৰ সন্মুখীন হʼব পাৰে। কিন্তু তাই দেখুৱা অধীনতাৰ বাবে স্বামীয়ে হয়তো যিহোৱা ঈশ্বৰক উপাসনা কৰিবলৈ আগবাঢ়ি আহিব পাৰে।—১ পিতৰ ৩:১ পঢ়ক।

১৪. লʼৰা-ছোৱালীয়ে পিতৃ-মাতৃ আৰু যিহোৱা ঈশ্বৰৰ বাবে কেনেকৈ আনন্দ কঢ়িয়াই আনে?

^১৪ লʼৰা-ছোৱালীয়ে যেতিয়া পিতৃ-মাতৃৰ আজ্ঞা পালন কৰে, তেতিয়া যিহোৱা ঈশ্বৰ আনন্দিত হয় আৰু ইয়ে পিতৃ-মাতৃৰ বাবে সন্মান আৰু আনন্দ কঢ়িয়াই আনে। (হিতোপদেশ ১০:১) যি পৰিয়ালত পিতৃ বা মাতৃয়ে অকলে লʼৰা-ছোৱালীক চোৱা-চিতা কৰে, সেই পৰিয়ালতো লʼৰা-ছোৱালীয়ে পিতৃ বা মাতৃৰ আজ্ঞা পালন কৰা উচিত। তেওঁলোকে পিতৃ বা মাতৃক বেছিকৈ সহায় আৰু সহযোগ কৰাৰ প্ৰয়োজন আছে। যেতিয়া পৰিয়ালৰ সকলো সদস্যই ঈশ্বৰে দিয়া নিজৰ নিজৰ দায়িত্ব পালন কৰে, তেতিয়া পৰিয়ালত শান্তি আৰু আনন্দ বিৰাজমান হয়। ইয়ে পৰিয়াল জীৱনৰ উদ্ভাৱক, যিহোৱা ঈশ্বৰলৈ সন্মান কঢ়িয়াই আনে।—ইফিচীয়া ৩:১৪, ১৫.

মণ্ডলীত সন্মান দেখুৱাওক

১৫. (ক) মণ্ডলীত আমি কেনেকৈ দেখুৱাব পাৰোঁ যে আমি যিহোৱা ঈশ্বৰৰ অধিকাৰক সন্মান কৰোঁ? (খ) দায়িত্বত থকা লোকসকলৰ অধীনত থাকিবলৈ আমাক কি সিদ্ধান্তবোৰে সহায় কৰিব? (“নায়কসকলক মান্য কৰি তেওঁলোকৰ বশীভূত হোৱা” নামৰ বক্সত চাওক।)

^১৫ যিহোৱা ঈশ্বৰে তেওঁৰ পুত্ৰ যীচুক সত্য খ্ৰীষ্টান মণ্ডলীবোৰৰ ওপৰত ৰজা হিচাপে নিযুক্ত কৰিছে। (কলচীয়া ১:১৩) মণ্ডলীৰ সদস্যসকলক যিহোৱা ঈশ্বৰৰ লগত সম্পৰ্ক দৃঢ় কৰাত সহায় কৰিবলৈ যীচুৱে “বিশ্বাসী বুদ্ধিমান” দাসক এই দায়িত্ব দিছে। (মথি ২৪:৪৫-৪৭) বৰ্তমান সময়ত যিহোৱাৰ সাক্ষীসকলৰ প্ৰশাসন গোষ্ঠীয়ে “বিশ্বাসী বুদ্ধিমান দাস” হিচাপে সেৱা কৰে। প্ৰথম শতিকাৰ দৰে, প্ৰশাসন গোষ্ঠীয়ে চিঠি-পত্ৰ বা তেওঁলোকৰ প্ৰতিনিধিসকল, যেনে চাৰ্কিট ওভাৰচিয়াৰৰ যোগেদি বৰ্তমান সময়তো প্ৰাচীনসকলক নিৰ্দেশনা আৰু পৰামৰ্শ দিয়ে। যেতিয়া আমি ব্যক্তিগতভাৱে প্ৰাচীনসকলৰ অধিকাৰক সন্মান কৰোঁ, তেতিয়া আচলতে আমি যিহোৱা ঈশ্বৰৰ আজ্ঞা পালন কৰা বুজায়।—১ থিচলনীকীয়া ৫:১২; ইব্ৰী ১৩:১৭ পঢ়ক।

১৬. প্ৰাচীনসকলক কেনেকৈ পবিত্ৰ আত্মাৰ দ্বাৰা নিযুক্ত কৰা হয়?

^১৬ প্ৰাচীন আৰু পৰিচাৰকসকল সিদ্ধ নহয়। আমাৰ দৰে তেওঁলোকৰো দুৰ্বলতা আছে। তথাপিও প্ৰাচীনসকল হৈছে মানুহৰ ৰূপত “নানা বৰ।” (ইফিচীয়া ৪:৮) তেওঁলোকে মণ্ডলীৰ সদস্যসকলক যিহোৱা ঈশ্বৰৰ লগত সম্পৰ্ক দৃঢ় কৰাত সহায় কৰে। প্ৰাচীনসকলক পবিত্ৰ আত্মাৰ দ্বাৰা নিযুক্ত কৰা হয়। (পাঁচনিৰ কৰ্ম্ম ২০:২৮) কেনেকৈ বাৰু? পবিত্ৰ আত্মাৰ প্ৰেৰণাৰে লিখা ঈশ্বৰৰ বাক্য বাইবেলত প্ৰাচীনসকলৰ যোগ্যতাৰ বিষয়ে বৰ্ণনা আছে। প্ৰথমে তেওঁলোকে এই যোগ্যতাবোৰ আহৰণ কৰিব লাগিব। (১ তীমথিয় ৩:১-৭, ১২; তীত ১:৫-৯) ইয়াৰ উপৰিও এজন ভাইৰ যোগ্যতাবোৰ চালি-জাৰি চোৱাৰ সময়ত প্ৰাচীনসকলে পবিত্ৰ আত্মাৰ সহায়ৰ বাবে যিহোৱা ঈশ্বৰলৈ প্ৰাৰ্থনা কৰে।

১৭. মণ্ডলীৰ কিছুমান দায়িত্ব পালন কৰাৰ সময়ত, এগৰাকী ভনীয়ে কিয় মূৰত ওৰণি লয়?

^১৭ মণ্ডলীৰ সভাৰ পৰিচালনা কৰিবলৈ কেতিয়াবা কোনো প্ৰাচীন আৰু পৰিচাৰক নাথাকিব পাৰে। সাধাৰণতে এনে সভাবোৰ প্ৰাচীন বা পৰিচাৰকে পৰিচালনা কৰে, যেনে প্ৰচাৰৰ বাবে সভা। এনে পৰিস্থিতিত মণ্ডলীৰ কোনো বাপ্তিষ্মা প্ৰাপ্ত ভাইয়ে সেই দায়িত্ব পূৰ কৰিব পাৰে। কিন্তু, যদি কোনো যোগ্য ভাই উপস্থিত নাথাকে, তেনেহʼলে আধ্যাত্মিকভাৱে পৰিপক্ক এজনী ভনীয়ে এই দায়িত্ব পালন কৰিব পাৰে। সাধাৰণতে, বাপ্তিষ্মা প্ৰাপ্ত ভাইসকলে পালন কৰা কোনো দায়িত্ব যদি এজনী বাপ্তিষ্মা প্ৰাপ্ত ভনীয়ে পালন কৰিবলগীয়া হয়, সেইসময়ত তাই মূৰত ওৰণি লোৱা উচিত।a (১ কৰিন্থীয়া ১১:৩-১০) এইদৰে ওৰণি লোৱাৰ বাবে তাইক অসন্মান কৰা নুবুজায়। ইয়াৰ পৰিৱৰ্তে যিহোৱা ঈশ্বৰে ব্যৱস্থা কৰা পৰিয়াল আৰু মণ্ডলীৰ মুৰব্বীৰ প্ৰতি সন্মান দেখুৱাৰ এক সুযোগ।

জগতৰ অধিকাৰীসকলক সন্মান দেখুৱাওক

১৮, ১৯. (ক) ৰোমীয়া ১৩:১-৭ পদত উল্লেখ কৰা সিদ্ধান্তবোৰ আপুনি কেনেকৈ বৰ্ণনা কৰিব? (খ) আমি জগতৰ অধিকাৰীসকলৰ প্ৰতি কেনেকৈ সন্মান দেখুৱাওঁ?

^১৮ সত্য খ্ৰীষ্টানসকলে ৰোমীয়া ১৩:১-৭ পদত বৰ্ণনা কৰা সিদ্ধান্তবোৰ পালন কৰিবলৈ সম্পূৰ্ণ হৃদয়েৰে চেষ্টা কৰে। (পঢ়ক।) এই পদকেইটা পঢ়াৰ যোগেদি আপুনি বুজিব পাৰিব যে ইয়াত উল্লেখ কৰা “ক্ষমতা পোৱাবিলাকৰ” অৰ্থ হৈছে জগতৰ অধিকাৰীসকল। যিহোৱা ঈশ্বৰে কিছু সময়ৰ বাবে মানৱ চৰকাৰবোৰক এই পৃথিৱীত শাসন কৰিবলৈ অধিকাৰ দিছে। তেওঁলোকে নিয়ম শৃংখলা বজাই ৰখা আৰু জনসাধাৰণৰ বাবে প্ৰয়োজনীয় সেৱা আগবঢ়োৱা আদি কিছুমান গুৰুত্বপূৰ্ণ কাম কৰে। অধিকাৰীসকলে দিয়া নিয়মবোৰ পালন কৰাৰ যোগেদি আমি তেওঁলোকৰ প্ৰতি সন্মান দেখুৱাওঁ। আমি কৰ বা মাচুল দিয়াৰ বিষয়টো গুৰুত্ব সহকাৰে লওঁ। যদি চৰকাৰে আমাক নথি-পত্ৰ বা ফৰ্মত কিবা পূৰ কৰিবলৈ কয়, তেনেহʼলে আমি তাক সঠিকভাৱে বিৱৰণ দিওঁ। এইদৰে আমাৰ নিজৰ, পৰিয়ালৰ, ব্যৱসায় বা ধন-সম্পত্তিৰ ওপৰত প্ৰযোজ্য হোৱা সকলো চৰকাৰী নিয়ম পালন কৰোঁ। কিন্তু, যদি অধিকাৰীসকলে যিহোৱা ঈশ্বৰৰ আজ্ঞা উলংঘন কৰিবলৈ কয়, তেনেহʼলে আমি কেতিয়াও তেওঁলোকৰ আজ্ঞা পালন নকৰোঁ। ইয়াৰ পৰিৱৰ্তে, প্ৰথম শতিকাৰ পাঁচনিসকলৰ দৰে আমাৰো উত্তৰ হʼব: “মানুহতকৈ আমি ঈশ্বৰৰ আজ্ঞা মানিব লাগে।”—পাঁচনিৰ কৰ্ম্ম ৫:২৮, ২৯; “মই কাৰ অধিকাৰক সন্মান কৰা উচিত?” নামৰ বক্সত চাওক।

^১৯ আমি আমাৰ আচৰণৰ যোগেদি জগতৰ অধিকাৰীসকলক সন্মান দেখুৱাওঁ। কেতিয়াবা কেতিয়াবা হয়তো আমি চৰকাৰী অধিকাৰীসকলৰ লগত প্ৰত্যক্ষভাৱে কথা-বতৰা হোৱাৰ প্ৰয়োজন হʼব পাৰে। পাঁচনি পৌলেও ৰজা হেৰোদ আগ্ৰিপ্প আৰু ৰাজ্যপাল ফীষ্টৰ লগত কথা-বতৰা হৈছিল। তেওঁলোকৰ বিভিন্ন দুৰ্বলতা বা দোষ-ত্ৰুটি থকাৰ সত্ত্বেও পৌলে তেওঁলোকক আদৰেৰে সম্বোধন কৰিছিল। (পাঁচনিৰ কৰ্ম্ম ২৬:২, ২৫) চৰকাৰী কোনো উচ্চপদস্থ বিষয়া হওক বা স্থানীয় আৰক্ষীয়ে হওক আমি তেওঁলোকৰ লগত কথা-বতৰা হওঁতে, পৌলৰ উদাহৰণ অনুকৰণ কৰোঁ। ডেকা ভাই-ভনীসকলেও বিদ্যালয়ৰ শিক্ষক আৰু কৰ্মচাৰীসকলৰ লগত এইদৰে সন্মানেৰে আচাৰ-ব্যৱহাৰ কৰে। আমি কেৱল সত্যক ভালপোৱা লোকসকলক সন্মান কৰাই নহয়, কিন্তু সেই লোকসকলকো সন্মান কৰোঁ যিসকলে যিহোৱাৰ সাক্ষীসকলক বিৰোধিতা কৰে। আচলতে, যিহোৱাৰ সাক্ষী নোহোৱা লোকসকলেও অনুভৱ কৰিব লাগিব যে আমি তেওঁলোকক সন্মান কৰোঁ।—ৰোমীয়া ১২:১৭, ১৮ পঢ়ক; ১ পিতৰ ৩:১৫.

২০, ২১. অধিকাৰীসকলক সন্মান দেখুৱাৰ দ্বাৰা আমি কি কি আশীৰ্বাদ লাভ কৰোঁ?

^২০ আমি আনক সন্মান দেখুৱাৰ ক্ষেত্ৰত কৃপণালি কৰা উচিত নহয়। ইয়াৰ বিষয়ে পাঁচনি পিতৰে এইদৰে লিখিছিল: “সকলোকে সমাদৰ কৰা।” (১ পিতৰ ২:১৭) যেতিয়া লোকসকলে জানিব পাৰিব যে আমি তেওঁলোকক হৃদয়ৰপৰা সন্মান কৰোঁ, তেতিয়া তেওঁলোকে হয়তো সত্যৰ প্ৰতি আকৰ্ষিত হʼব। মনত ৰাখিব যে বৰ্তমান সময়ত এই গুণ বহুত কম সংখ্যক লোকৰ মাজতহে দেখা যায়। আনক সন্মান দেখুৱাৰ দ্বাৰা আমি যীচু খ্ৰীষ্টৰ এই আজ্ঞাক পালন কৰিছোঁ: “তোমালোকৰ পোহৰ মানুহৰ আগত প্ৰকাশিত হওক; তাতে তেওঁবিলাকে তোমালোকৰ ভাল কৰ্ম্ম দেখি, স্বৰ্গত থকা তোমালোকৰ পিতৃৰ স্তুতি কৰিব।”—মথি ৫:১৬.

^২১ এই অন্ধকাৰ জগতত, নম্ৰ হৃদয়ৰ লোকসকলে সত্যৰ প্ৰতি আকৰ্ষিত হৈছে। যেতিয়া আমি পৰিয়াল, মণ্ডলী আৰু জগতৰ অধিকাৰীসকলক সন্মান দেখুৱাওঁ, তেতিয়া হয়তো কিছুমান লোকে সত্যৰ প্ৰতি আকৰ্ষিত হৈ আমাৰ লগত পোহৰৰ পথত চলিবলৈ অনুপ্ৰাণিত হʼব। কি যে এক সুন্দৰ আশা, নহয় নে বাৰু? যদিও এনে নহয়, কিন্তু এটা কথা নিশ্চিত। আমি লোকসকলক কৰা সন্মানে যিহোৱা ঈশ্বৰক আনন্দিত কৰে আৰু তেওঁৰ প্ৰেমত থাকিবলৈ আমাক সহায় কৰে। ইয়াতকৈ আৰু ভাল পুৰস্কাৰ কি হʼব পাৰে?