ভাগ ৯
পৰিয়াল হিচাপে যিহোৱা ঈশ্বৰক উপাসনা কৰক
“স্বৰ্গ, পৃথিবী . . . এই সকলোৰে সৃষ্টিকৰ্ত্তাক প্ৰণিপাত কৰাহঁক।”—প্ৰকাশিত বাক্য ১৪:৭
এই ব্ৰচাৰখনৰপৰা আপুনি জানিবলৈ সক্ষম হʼল যে বাইবেলত এনে বহুতো সিদ্ধান্ত উল্লেখ আছে যিয়ে আপোনাক আৰু আপোনাৰ পৰিয়ালক সহায় কৰিব পাৰে। আপুনি আনন্দত থকাটো যিহোৱা ঈশ্বৰে বিচাৰে। যদি আপুনি যিহোৱা ঈশ্বৰৰ উপাসনাক নিজৰ জীৱনত প্ৰথম স্থান দিয়ে, তেনেহʼলে তেওঁ প্ৰতিজ্ঞা কৰিছে যে ‘এই সকলো আপোনাকো দিয়া হʼব।’ (মথি ৬:৩৩) যিহোৱা ঈশ্বৰে, আপুনি তেওঁৰ বন্ধু হোৱাটো বিচাৰে। ঈশ্বৰৰ লগত বন্ধুত্ব গঢ়ি তুলিবলৈ পোৱা যিকোনো সুযোগ এৰি নিদিব। সঁচাকৈ, এজন ব্যক্তিৰ বাবে যিহোৱা ঈশ্বৰে দিয়া ই এক মহান সুযোগ!—মথি ২২:৩৭, ৩৮.
১ যিহোৱা ঈশ্বৰৰ লগত আপোনাৰ সম্পৰ্ক দৃঢ় কৰক
বাইবেলত কি উল্লেখ আছে: “মই . . . তোমালোকৰ পিতৃ হম, আৰু তোমালোকো মোৰ পো-জী হবা; ইয়াক সৰ্ব্বশক্তিমান প্ৰভুৱে কৈছে।” (২ কৰিন্থীয়া ৬:১৮) আপুনি ঈশ্বৰৰ ঘনিষ্ঠ বন্ধু হোৱাটো তেওঁ বিচাৰে। প্ৰাৰ্থনাৰ যোগেদি আপুনি এই বন্ধুত্ব গঢ়ি তুলিব পাৰিব। আপুনি “নিৰন্তৰে প্ৰাৰ্থনা” কৰাটো ঈশ্বৰে বিচাৰে। (১ থিচলনীকীয়া ৫:১৭) তেওঁ আপোনাৰ চিন্তা-ভাৱনা আৰু অন্তৰৰ কথা জানিবলৈ আগ্ৰহী। (ফিলিপীয়া ৪:৬) পৰিয়ালৰ সৈতে প্ৰাৰ্থনা কৰোঁতে তেওঁলোকে লক্ষ্য কৰিব যে আপোনাৰ বাবে যিহোৱা ঈশ্বৰ কিমান বাস্তৱ।
প্ৰাৰ্থনাৰ যোগেদি যিহোৱা ঈশ্বৰৰ লগত কথা পতাৰ উপৰিও, আপুনিও তেওঁৰ কথা শুনাৰ প্ৰয়োজন। বাইবেল আৰু ইয়াৰ আধাৰিত প্ৰকাশনবোৰ অধ্যয়ন কৰাৰ যোগেদি আপুনি তেওঁৰ কথা শুনিব পাৰে। (গীতমালা ১:১, ২) আপুনি শিকা বিষয়বোৰ ধ্যান কৰক। (গীতমালা ৭৭:১১, ১২) ইয়াৰ উপৰিও নিয়মীয়াকৈ সভাবোৰলৈ আহিলে আপুনি ঈশ্বৰৰ কথা শুনিব পাৰিব।—গীতমালা ১২২:১-৪.
যিহোৱা ঈশ্বৰৰ বিষয়ে আনক জনোৱাৰ যোগেদিও আপুনি তেওঁৰ লগত আপোনাৰ সম্পৰ্ক দৃঢ় কৰিব পাৰিব। আপুনি এই কাৰ্য্যত যিমানেই ব্যস্ত থাকিব, ঈশ্বৰৰ লগত আপোনাৰ সম্পৰ্ক সিমানেই দৃঢ় হʼব।—মথি ২৮: ১৯, ২০.
আপুনি কি কৰিব পাৰে:
প্ৰতিদিনে বাইবেল পঢ়িবলৈ আৰু প্ৰাৰ্থনা কৰিবলৈ আছুতীয়াকৈ সময় ৰাখক
এটা পৰিয়াল হিচাপে মনোৰঞ্জন আদি বিষয়বোৰত বেছি গুৰুত্ব দিয়াতকৈ, আধ্যাত্মিক বিষয়বোৰত প্ৰথম স্থান দিয়ক
২ পৰিয়াল উপাসনাৰ আনন্দ লওক
বাইবেলত কি উল্লেখ আছে: “ঈশ্বৰৰ ওচৰলৈ চাপি আহাঁ; তাতে তেৱোঁ তোমালোকৰ ওচৰলৈ চাপিব।” (যাকোব ৪:৮) পৰিয়াল উপাসনা কৰিবলৈ এখন তালিকা থকাৰ প্ৰয়োজন আৰু সেই তালিকা অনুসৰি আপুনি নিয়মীয়াকৈ পৰিয়াল উপাসনা কৰা উচিত। (আদিপুস্তক ১৮:১৯) কিন্তু ঈশ্বৰৰ কাষ চাপিবলৈ কেৱল ইয়ে যথেষ্ট নহয়। আপোনাৰ দৈনন্দিন জীৱনত যিহোৱা ঈশ্বৰ এক ভাগ হোৱা উচিত। ঈশ্বৰৰ লগত আপোনাৰ পৰিয়ালৰ সম্পৰ্ক দৃঢ় কৰিবলৈ, আপুনি নিজৰ পৰিয়ালৰ লগত “বহোঁতে বা বাটত যাওঁতে, আৰু শোওঁতে বা উঠোঁতে” ঈশ্বৰৰ “বিষয়ে কথা-বতৰা” হওক। (দ্বিতীয় বিবৰণ ৬:৬, ৭) যিহোচূৱাৰ দৰে আপুনিও এইদৰে কʼব পাৰে: “মই আৰু মোৰ পৰিয়ালে হলে যিহোৱাৰ আৰাধনা কৰিম।”—যিহোচূৱা ২৪:১৫.
আপুনি কি কৰিব পাৰে:
পৰিয়ালৰ প্ৰতিজন সদস্যৰ প্ৰয়োজনীয়তাৰ প্ৰতি ধ্যান ৰাখি, তেওঁলোকক নিয়মীয়াকৈ শিক্ষা দিবলৈ এখন তালিকা প্ৰস্তুত কৰক