হস্তমৈথুন অভ্যাসৰ ওপৰত জয় লাভ কৰক

হস্তমৈথুন হৈছে এনে এক অভ্যাস, যাক যিহোৱা ঈশ্বৰে ঘৃণা কৰে।a এই অভ্যাস কৰা লোকসকলে কেৱল নিজৰ স্বাৰ্থ পূৰ কৰিবলৈ বিচাৰে আৰু ইয়ে এজন ব্যক্তিৰ চিন্তাধাৰাক ভ্ৰষ্ট কৰিব পাৰে। ইয়াৰ উপৰিও হস্তমৈথুন কৰা লোকসকলে, বিপৰীত লিংগক যৌন ইচ্ছা পূৰ কৰা কেৱল এক বস্তু বুলি ভাবিব পাৰে। তেওঁলোকৰ বাবে যৌন সম্পৰ্ক দুজন ব্যক্তিৰ মাজত হোৱা প্ৰেমৰ পৰিণামস্বৰূপে নহয়, কিন্তু এনেকুৱা অভ্যাসলৈ পৰিণত হয়, যিয়ে কেৱল অলপ সময়ৰ বাবে আনন্দ দিয়ে আৰু তেওঁলোকৰ যৌন উত্তেজনাৰ পৰা শাম কটাৰ এক উপায় বুলি ভাবে। কিন্তু মন কৰিবলগীয়া কথা যে ইয়ে কেৱল অলপ সময়ৰ বাবেহে উত্তেজনা লাঘব কৰে। প্ৰকৃততে হস্তমৈথুনে “ব্যভিচাৰ, অশুচিতা, কামাভিলাষ” আদি কাৰ্য্যবোৰক দমন কৰাৰ পৰিৱৰ্তে ইয়াক বেছি কৰিবলৈ জাগৃত কৰে।—কলচীয়া ৩:৫.

পাঁচনি পৌলে এইদৰে লিখিছিল, “এই হেতুকে, হে প্ৰিয়বিলাক, এইবোৰ প্ৰতিজ্ঞা পোৱাত, আহাঁ, আমি শৰীৰ আৰু আত্মাৰ সকলো মলৰ পৰা নিজক শুচি কৰি, ঈশ্বৰলৈ ভয় ৰাখি, পবিত্ৰতা সিদ্ধ কৰোঁহক।” (২ কৰিন্থীয়া ৭:১) যদি আপোনাক পৌলৰ এই বাক্য পালন কৰিবলৈ অসুবিধা হৈছে, তেনেহʼলে নিৰাশ নহʼব। যিহোৱা ঈশ্বৰে সকলো সময়তে ‘ক্ষমা’ কৰিবলৈ আৰু সহায় কৰিবলৈ সাজু থাকে। (গীতমালা ৮৬:৫; লূক ১১:৯-১৩) নিঃসন্দেহ, নিজৰ ধিক্কাৰ দিয়া হৃদয় আৰু কেতিয়াবা কেতিয়াবা ব্যৰ্থ হোৱাৰ পাছতো, এই অভ্যাস এৰিবলৈ আপুনি কৰা চেষ্টাই ইয়াৰ প্ৰমাণ দিয়ে যে আপোনাৰ এক ভাল মনোভাব আছে। আমি এই কথা মনত ৰখা উচিত যে “ঈশ্বৰ আমাৰ হৃদয়তকৈয়ো মহান, আৰু তেওঁ সকলোকে জানে।” (১ যোহন ৩:২০) ঈশ্বৰে আমাৰ কেৱল পাপবোৰকে লক্ষ্য কৰে এনে নহয়, কিন্তু তেওঁ আমাৰ সম্পূৰ্ণ ব্যক্তিত্বলৈ লক্ষ্য কৰে। তেওঁ আমাৰ বিষয়ে সম্পূৰ্ণ জানে আৰু সেইবাবে যেতিয়া আমি তেওঁৰ ওচৰত ক্ষমা বিচাৰি প্ৰাৰ্থনা কৰোঁ, তেতিয়া তেওঁ বৰ পুতৌৰে আমাৰ প্ৰাৰ্থনা শুনে। সেইবাবে, এটা সৰু লʼৰাই যেনেকৈ কিবা সমস্যা হʼলে দেউতাকৰ ওচৰলৈ দৌৰি যায়, ঠিক সেইদৰে নম্ৰতাৰে যিহোৱা ঈশ্বৰলৈ প্ৰাৰ্থনা কৰিবলৈ কেতিয়াও নাপাহৰিব। তেওঁ আপোনাক এক শুদ্ধ বিবেক ৰাখিবলৈ সহায় কৰিব। (গীতমালা ৫১:১-১২, ১৭; যিচয়া ১:১৮) নিঃসন্দেহ, আপুনি প্ৰাৰ্থনা কৰাৰ অনুসৰি কিছুমান গুৰুত্বপূৰ্ণ পদক্ষেপ লোৱাৰ প্ৰয়োজন আছে। উদাহৰণস্বৰূপে, আপুনি যিকোনো ধৰণৰ অশ্লীল কাৰ্য্যক্ৰমবোৰৰপৰা আৰু অসৎ সংগতিৰপৰা আঁতৰি থাকিবলৈ প্ৰাণ-টাকি চেষ্টা কৰক।b

যদি এই বেয়া অভ্যাসৰপৰা আপুনি ওলাই আহিব পৰা নাই, তেনেহʼলে ইয়াৰ বিষয়ে আপোনাৰ পিতৃ বা মাতৃক জনাওক বা আপোনাৰ বিষয়ে চিন্তা কৰা কোনো পৰিপক্ক ভাই বা ভনীৰ লগত কথা হওক।c—হিতোপদেশ ১:৮, ৯; ১ থিচলনীকীয়া ৫:১৪; তীত ২:৩-৫.