Jeremías
19 Jehová Diosajj akham sänwa: “Jumajj sarasin mä machaq yuru sañunak luririt alanim.+ Markan mä qhawqha ancianonakapampi* sacerdotenakan mä qhawqha ancianonakapamp irpasim, 2 ukatsti Hinón+ valleruw* saräta, Jikʼillitanakan Punkupa satäki uka punku mantañaru. Ukanwa nayajj sisksma uka arunak yatiyäta. 3 Akham sätawa: ‘Judá markan reyinakapa, Jerusalén markan jakirinaka, Jehová Diosan arunakap istʼapjjam. Israelan Diosapäki uka ejercitonakan Jehová Diosapajj akham siwa:
”’“Nayajj niyaw mä jan waltʼäwi aka lugaratak apanëjja, khititejj uk istʼkani ukajj walpun musparani.* 4 Uksti nayaru apanukupjjatap layku aka lugarar jan uñtʼkañar tukuyapjjatap laykuw luräjja.+ Aka lugaranwa jupanakajj yaqha diosanakar sacrificionak loqtasipki, janirakiw nayra awkinakapasa ni Judá markan reyinakapasa ukanak uñtʼapkänti. Jichhasti jupanakajj jan juchaninakan wilapampiw aka lugarar phoqantapjje.+ 5 Jupanakajj Baal diosar adorañatakiw* alto cheqankir sagrado lugaranak lurapjjäna, ukhamat yoqall wawanakaparojj ninar phichantat ofrendanakjam Baal diosar loqtañataki,+ janiw nayajj ukham lurapjjañap maykayätti, janipuniw chuymajansa* uk munkayätti”+ sasa’.
6 ”‘“Ukatwa urunakajj jakʼachasisinki”, sistwa naya Jehová Diosajja, “ukapachasti aka lugarajj janiw Tófet satäjjaniti, ni Hinón valle* satäjjanisa, jan ukasti Jiwarayañ valle satäjjaniwa.+ 7 Nayajj Judá markampin Jerusalén markampin amtanakap ina chʼusaruw aka lugaran tukusiyäjja, jupanakar jiwayañ thaqasipki uka enemigonakap nayraqatanwa jupanakarojj espadamp tukjäjja. Jupanakan jiwat cuerponakapsti, aycha manqʼani jamachʼinakampiru salvaje animalanakampiruw manqʼapjjañapatak churäjja.+ 8 Aka markarojj wali sustjaskañaru khuyusiñaruw tukuyäjja. Taqe khitinakatï uka cheq pasapkani ukanakajj wali sustjataw uñchʼukipjjani, taqe jan waltʼäwinakap kawsajj khuyusipjjaniwa.+ 9 Nayajj yoqanakapana phuchanakapana aychanakap manqʼasiyäjja, sapa mayniw jaqe masipan aychap manqʼani, kuna laykutejj muyuntatäpjjaniwa, janirakiw kun lurirjamäpkanisa, kunapachatï enemigonakapasa jupanakan vidap apaqañ munirinakas muyuntapjjani ukapachana”+ sasa’.
10 ”Ukatsti jumamp chik sarapki uka chachanak nayraqatan uka yuru pʼakjam. 11 Jupanakarojj akham sarakim: ‘Ejercitonakan Jehová Diosapajj akham siwa: “Aka jaqenakarusa aka markarusa ukham tʼunjäjja, kunjamtï maynejj sañunak luririn luratap pʼakjki, uka pʼakitajj janirak askichañjamäki ukhama. Jupanakajj Tófet lugaranwa jiwatanak imtʼapjjani, imtʼañatak lugarajj jan utjkani ukhakama”+ sasa’.
12 ”‘Aka lugararojj ukham luräjja’, sistwa naya Jehová Diosajja, ‘aka lugaran jakirinakarus ukhamaraki, ukhamat aka markajj Tófet lugarjam tukuñapataki. 13 Jerusalén markankir utanakasa Judá markan reyinakapan utanakapasa, aka Tófet lugarjam qʼañuw tukupjjani.+ Kuna laykutejj jupanakajj techonak patjjanwa alajjpachankir taqe ejercitonakar sacrificionak loqtapjjäna,+ yaqha diosanakarus vino ofrendanak loqtapjjarakïna’”.+
14 Kunapachatï Jehová Diosajj profecianak arsuñapatak Jeremiasar khitkäna, ukatsti jupajj Tófet lugarat kuttʼjjäna ukhajja, Jehová Diosan utapan utjkäna uka patiopanwa saytʼasïna, markankir taqe jaqenakarojj akham sarakïnwa: 15 “Israelan Diosapäki uka ejercitonakan Jehová Diosapajj akham siwa: ‘Kuntï aka marka contrasa taqe jiskʼa markanakap contras arskta uka jan waltʼäwi apasinkta, nayan arunakaj janipun istʼañ munapjjatap layku’+ sasa”.