APOCALIPSIS
JUANAR QHANAÑCHAT ARUNAKA

1 Aka arunakajja Jesucriston qhanañchat* arunakawa, Diosaw juparojj qhanañchäna,+ ukhamat kunatï mä jukʼa tiempot paskani ukanakat Diosan esclavonakapar qhanañchañapataki.+ Diosan esclavopäki* uka Juanar yatiyañapatakiw Jesusajj mä angelapar khitanïna, ukhamat kunanakatï jutïrin pasañapäkäna ukanak qhanañchañapataki.+ 2 Uka Juanaw Diosan arupatsa Jesucriston qhanañchäwipatsa yatiyäna, taqe kunanaktï uñjkäna ukanakwa jupajj yatiyäna. 3 Khititejj aka profecía arunak jachʼat liytʼki ukhamarak khitinakatejj ukan qellqat arunak istʼapki,+ phoqapkaraki ukanakajja kusisipjjpan. Señalat tiempojj jakʼankjjewa.

4 Naya Juanajj Asia provinciankir paqallq congregacionanakaruw+ qellqanipjjsma:

“Khititejj jakaski, nayras jakaskarakïna, jichhajj jutaskaraki”+ uka Diosana ukhamarak tronop nayraqatankki uka paqallqo espiritunakana+ wali khuyapayasiñapsa sumankañapsa jumanakajj katoqtʼasipjjam. 5 Khititejj “Suma Phoqeri* Testigöki”,+ “jiwatanak taypita nayraqat jaktirïki”,+ “aka oraqenkir reyinakan Apnaqeripäki”+ uka Jesucriston khuyapayasiñapsa sumankañapsa katoqtʼasipjjarakim.

Jupajj wal jiwasarojj munasistu,+ pachpa wilapampiw juchanakasatsa salvistu.+ 6 Juparakiw Dios Awkipatakejj reyinakaru+ sacerdotenakaru+ tukuyistu. Jïsa, jachʼañchatäñasa chʼamanïñasa wiñayatak jupampïpan. Amén.

7 Jupajj qenayanakampiw jutani,+ taqenirakiw uñjapjjani, jupar lanzampi jununtirinakas uñjapjjarakiniwa; jupa kawsaw aka oraqenkir taqe tribunakajj llakisiñat chuymanakap leqʼesipjjani.+ Jïsa, ukajj phoqasipuniniwa. Amén.

8 “Nayätwa Alfasa Omegasa”*+ siw Jehová* Diosajja. “Khititejj jakaski, nayras jakaskarakïna, jichhajj jutaskaraki uka Taqe Chʼamani Diosajja”.+

9 Naya Juanajja, jumanakan jilatamätwa, jumanakamp chikarakiw Jesusan arkiripjamajj+ tʼaqesta+ aguantarakta,+ jumanakamp chikarakiw reino*+ katoqäjja. Nayajj Diosat parlataj layku Jesusjjat qhanañchataj laykurakiw Patmos sat islankayäta. 10 Espíritu santow nayarojj Tatitun urupar irpitäna. Ukatjja qhepäjjajat maynin wali jachʼat artʼasitapwa istʼarakta, mä trompetan tuktʼasitapjama, 11 akham siri: “Kuntï uñjkta ukjja mä rollor qellqantam, ukatjja Éfeso,+ Esmirna,+ Pérgamo,+ Tiatira,+ Sardis,+ Filadelfia,+ Laodicea+ markanakankir paqallqo congregacionanakar apayarakim” sasa.

12 Khitis parlaskitäna uk uñjañatakiw nayajj kutikipstta, kutikipstasajja qorit lurat paqallqo candelabronakwa uñjta.+ 13 Uka candelabronak taypinjja, mayniruw uñjta, jupajj jaqen yoqapjamänwa.+ Jupasti kayukam purir mä isimpi isthapitänwa, pechopajja qorit lurat mä wakʼampi wakʼantatarakïnwa. 14 Pʼeqepasa ñikʼutapasa janqʼo tʼarwjamänwa, khunjam janqʼorakïnwa, nayranakapas aqaskiri ninar uñtatarakïnwa,+ 15 kayunakapajja kunjamtï mä suma cobrejj+ hornon umatatayatajj kʼajtkejja ukhamaw kʼajtäna, arupajj walja umar uñtasitaw suynäna. 16 Kupi amparapanjja paqallqo warawaranakaw+ utjäna, lakapatsa purapar arini mä espadaw+ mistüna, uka espadajj jachʼänwa, arirakïnwa, ajanupasa kunjamtï intejj wal kʼajtkejja ukhamaw kʼajtäna.+ 17 Kunapachatï jupar uñjta ukhajja, kayunakap nayraqataruw jiwatjam jaqotatta.

Jupajj kupi amparapamp loqjjatasaw akham situ: “Jan ajjsaramti. Nayätwa Nayrïrisa,+ Qhepïrisa,+ 18 jakirisa.+ Nayajj jiwatäyätwa,+ ukampis jichhajj wiñayans wiñayatakiw jakaskta,+ jiwañana, Sepulturana* llavenakapsa nayaw katta.+ 19 Ukhamajj kunanaktï jumajj uñjkta, kunanakatï jichhajj pasaski, kunanakatï ukanak qhepat paskani ukanakjja qellqantam. 20 Jumajj kupi amparajan paqallqo warawaranak uñjkayäta ukanakasa, qorit lurat paqallqo candelabronak uñjkayäta ukanakasa, Diosan imantat amtapawa. Uka paqallqo warawaranakajja paqallqo congregacionanakan angelanakapawa, uka paqallqo candelabronakajj paqallqo congregacionanakawa.+

2 ”Éfeso+ markankiri congregacionan angelaparojj+ akham sasin qellqam: khititejj kupi amparapar paqallqo warawaranak katjjaski ukhamaraki qorit lurat paqallqo candelabronak+ taypin sarnaqki ukajja akham siwa: 2 ‘Nayajj luratanakamsa, wal trabajitamsa, aguantatamsa yattwa. Jumajj jan wali jaqenakarojj janiw katoqktati, apostolonakäpjjtwa sirinakarus yantʼaraktawa,+ ukampis jupanakajj janiw apostolonakäpkiti, jupanakan kʼarïpjjatapsa katjaraktawa. 3 Jumajj aguantirïtamsa uñachtʼayaraktawa, sutij laykojj kunayman jan walinakwa aguanttajja,+ janirakiw qarjktati.+ 4 Ukampis mayaw juma contrajj utjitu: qalltan utjkayätam uka munasiñajj janiw utj-jjtamti.

5 ”’Jumajj kawkitsa jalaqtta uk amtasim, arrepentisirakim,+ kunanaktï qalltan lurirïkayäta ukanak lurarakim. Janitejj ukham lurkätajja, juman ukar jutasaw candelabrom lugarapat apaqäjja,+ arrepentisïta ukhakiw uk jan lurkäti.+ 6 Ukampis aka luratamaw juman sumajja: kunanaktï Nicolasan sectapajj+ lurki ukanakjja jumajj uñistawa, nayajj uka luratanakap uñisiraktwa. 7 Khititejj jiñchunïki ukajja, kuntï espiritojj congregacionanakar siski uk istʼpan:+ khititejj atipjkani ukarojja,+ jakañ qoqan* achunakapwa manqʼayäjja,+ ukajj Diosan paraisopankiwa’.

8 ”Esmirna markankiri congregacionan angelaparojj akham sasin qellqam: khititejj ‘Nayrïrïki Qhepïrïki’,+ khititejj jiwatäkasin jaktanki ukajja+ akham siwa: 9 ‘Tʼaqesitamsa pobrëtamsa nayajj yattwa, ukampis jumajj qamirïtawa.+ Judiöpjjtwa sirinakan jumanak contra jan wal parlapjjatapsa yatiraktwa, ukampis jupanakajj janiw judiöpkiti, jan ukasti Supayan* sinagogapäpjjewa.+ 10 Kunanakantejj tʼaqeskäta ukanakatjja jan ajjsaramti.+ Jumanakat yaqhepanakarojja, Diablojj carcelar llawintayasipkakïtamwa, ukhamat phoqatpach yantʼatäpjjañamataki, tunka urunakaw jumanakajj tʼaqesipjjarakïta. Jumajj jiwañkamajj janipun jitheqtamti, nayajj jakañ corona churäma.+ 11 Khititejj jiñchunïki ukajja, kuntï espiritojj congregacionanakar siski uk istʼpan:+ khititejj atipjkani ukarojja,+ payïri jiwañajj janipuniw kamachkanisa’.+

12 ”Pérgamo markankiri congregacionan angelaparojj akham sasin qellqam: khititejj purapar arini mä jachʼa ari espadanïki ukajja akham siwa:+ 13 ‘Kawkinsa jumajj jakta ukjja nayajj yattwa, kawkinkkitejj Supayan* tronopajja ukanwa jumajj jaktajja. Ukhampachas nayan sutijat jan jitheqtasaw sarnaqtajja,+ Antipas chachan urunakapansa nayarojj confiyaskakistawa,*+ jupajj nayan jan jitheqtiri testigojawa,+ kawkjantï Supayajj jakki ukanwa jupajj jumanakan uñjkatajj jiwayatäna.+

14 ”’Ukampis juma contrajj mä qhawqha arunak arsuñaw utjitu: juma taypinjja Balaaman+ yatichäwinakapar arkirinakaw utji. Jupaw israelitanakar lanktʼayañapatakejj Balac+ chachar yatichäna, ukhamat idolonakar loqtat aycha manqʼapjjañapataki, qʼañu jucha* lurapjjañapataki.+ 15 Juma taypinjja ukhamarakiw Nicolasan sectapan yatichäwinakapar arkirinakajj utji.+ 16 Ukhamajj arrepentisim. Janitejj arrepentiskätajja, jankʼakiw nayajj jutäjja, lakajankki uka jachʼa espadampiw jupanakamp nuwasirakëjja.+

17 ”’Khititejj jiñchunïki ukajja, kuntï espiritojj congregacionanakar siski uk istʼpan:+ khititejj atipjkani ukarojja,+ nayajj imantatäki uka maná manqʼatwa churäjja,+ mä jiskʼa janqʼo qalampwa churarakëjja. Uka jiskʼa qalanjja mä machaq sutiw qellqata, uka sutjja janiw khitis yatkiti, khititejj uka jiskʼa qala katoqki ukakiw yati’.

18 ”Tiatira+ congregacionan angelaparojj akham sasin qellqam: khititejj Diosan Yoqapäki, nayranakapas aqaskiri ninar uñtatäki,+ kayunakapas mä suma cobrer uñtatäkaraki+ ukajja akham siwa: 19 ‘Nayajj luratanakamsa, munasirïtamsa, Diosar confiyatamsa,* jupar servitamsa, aguantatamsa yattwa. Kunanaktï jichhajj lurkta ukanakajja, qalltan lurkayäta ukanakat sipansa jukʼamp waljawa, ukanaksa yatiraktwa.

20 ”’Ukampis mayaw juma contrajj utjitu: Jezabel+ warmir uñtasitäki uka warmirojj ukhamakiw uñchʼuktajja. Jupajj profetisätwa sasaw parli, esclavonakajarojj yatichäwinakapampiw engañji, ukhamat jupanakajj qʼañu jucha* lurapjjañapataki,+ idolonakar loqtat aycha manqʼapjjañapataki. 21 Jupan arrepentisiñapatakejj nayajj tiemp churtwa, ukampis jupajj janiw qʼañu jucha* luratapat arrepentisiñ munkiti. 22 Juparojj niyaw jan sartkiri usuntayäjja, jupamp adulterio jucha luririnakarojj wal tʼaqesiyäjja. Jupan luratanakapat arrepentisipjjani ukhakiw ukanak jan lurkäti. 23 Uka warmin wawanakaparojj jiwayir usumpiw jiwarayäjja, ukhamatwa taqe congregacionanakajj wali manqhankir amuyunaksa* chuymanaksa uñantirïtaj yatipjjani. Jumanakat sapa maynirojj luratanakamarjamaw castigapjjäma.+

24 ”’Khitinakatejj jumanakat Tiatira congregacionankapkta, taqe khitinakatejj Jezabelan yatichäwinakapar jan arkapkta, “Supayat* jutki uka kʼari yatichäwinaksa”+ jan uñtʼapkta ukanakarojj sapjjsmawa: “Janiw jumanakarojj kuna yaqha qʼepimpis apjjatapksmati. 25 Ukampis jutkä ukapachkamajja, kunanakatï utjapktam ukanakat wal katuntasipjjam.+ 26 Khititejj atipjkani, luräwinakajsa tukuykam phoqarakini ukarojja, akapachankir jaqenakjjaruw autoridad churäjja,+ 27 kunjamtï nayajj Awkijat autoridad katoqkta ukhama. Jupajj hierrot lurat varampiw jaqenakar awatini,+ ukhamatwa jupanakajj ñeqʼet lurat vasonakjam qʼala tʼunjatäpjjani. 28 Juparojj alwa warawara churarakëjja.+ 29 Khititejj jiñchunïki ukajja, kuntï espiritojj congregacionanakar siski uk istʼpan”’.

3 ”Sardis markankiri congregacionan angelaparojj akham sasin qellqam: khititejj Diosan paqallqo espiritupanïki+ ukhamaraki paqallqo warawaranïki ukajja+ akham siwa: ‘Nayajj luratanakam yattwa, jumajj jakkasmas ukhamätawa, ukampis jiwatätawa.+ 2 Wal amuyasim,+ jiwirjamäki ukjja chʼamañcharakim, kuntï Diosajajj lurañam munki ukjja janiw jumajj tukuyktati. 3 Ukhamajj kuntï jumajj katoqta, kuntï istʼta uk amtasipunim, ukanakjja phoqaskakim, arrepentisirakim.+ Janitejj ikit sartkätajja, nayajj mä lunthatar uñtataw jutäjja,+ janirakiw kuna horasarus jutä uk kunjamatsa yatkätati.+

4 ”’Sardis congregacionanjja yaqhepanakajj janiw isinakap qʼañuchasipkiti,+ jupanakajj nayamp chikaw janqʼo isinakamp isthapita sarnaqapjjani,+ kuna laykutejj jupanakan ukham isinïpjjañapajj wakisiwa. 5 Khititejj atipjkani ukajja,+ ukham janqʼo isinakampi isthapitäniwa,+ jakañ librotjja janipuniw sutip apskäti,*+ jan ukasti Awkij nayraqatansa angelanakap nayraqatansa sutip uñtʼtwa sasaw säjja.+ 6 Khititejj jiñchunïki ukajja, kuntï espiritojj congregacionanakar siski uk istʼpan’.

7 ”Filadelfia markankiri congregacionan angelaparojj akham sasin qellqam: khititejj santöki,+ cheqäki,+ Davidan llavepsa katkaraki,+ khititejj jan khitin llawintkaña llawirki, khititejj jan khitin llawirkaña llawintki ukajja akham siwa: 8 ‘Nayajj luratanakam yattwa, juma nayraqatanjja mä punku llawirta,+ janiw khitis uk llawintkaspati. Jumajj jukʼa chʼamanïkstasa arunakaj phoqtawa, janirakiw sutij jan uñtʼiris tukktati, uk nayajj yattwa. 9 Khitinakatejj Supayan* sinagogapankapki, jan judiökasas judiöpjjtwa+ sasin kʼarisipkaraki ukanakaruw jutayäjja, kayunakam nayraqataruw altʼasiyäjja, qhawqsa jumar munassma uksa jupanakar yatiyarakïwa. 10 Jumajj nayan aguantataj istʼasajj ukarjamaw phoqtajja,*+ yantʼa horasanjja nayajj jarkʼaqarakïmawa,+ uka yantʼajj taqe oraqjjaruw jutani, ukhamat aka oraqen jakirinakar yantʼañataki. 11 Jankʼakiw nayajj jutaskta.+ Kunatï juman utjktam ukatjja wal katuntasim, ukhamat jan khitis coronam jumar aparañapataki.+

12 ”’Khititejj atipjkani ukarojja, Diosajan templopanjja mä columnaruw tukuyäjja, janipuniw ukat mistkaniti. Juparusti Diosajan sutipampi,+ Diosajan markapan sutipampi, nayan machaq sutijampi qellqantäjja, Diosan uka markapajja, mä arunjja Machaq Jerusalenajja+ kawkjankkitï Diosajajj uka alajjpachatwa juti.+ 13 Khititejj jiñchunïki ukajja, kuntï espiritojj congregacionanakar siski uk istʼpan’.

14 ”Laodicea+ markankiri congregacionan angelaparojj akham sasin qellqam: khititejj Amén+ sasin uñtʼatäki, khititejj suma phoqeri* cheqap+ testigöki,+ Diosan nayrïr luratapäkaraki ukajja+ akham siwa: 15 ‘Nayajj luratanakam yattwa, jumajj janiw thayäktasa ni juntʼüktasa. Jumajj thayäsma jan ukajj juntʼüsma ukwa nayajj munirista. 16 Jumajj janiw juntʼüktasa, ni thayäktasa,+ jan ukasti llaphikïtawa,+ ukatwa nayajj lakajat jumar waqʼaqsunïma.* 17 Jumajj akham sistawa: “Qamirïtwa,+ walja utjirinïtwa, janiw kunsa munjjti” sasa, ukampis janiw yatisktati, jumajj wali llakkaña, sintkaña, pobre, juykhu, qʼalala ukhamätawa. 18 Nayajj akanakwa sirisma: ninamp qʼomachat qori nayat alasita, ukhamat qamiriptañamataki; janqʼo isinak alasita, ukhamat isthapitäñamataki ukhamarak jan isinïtam laykojj mayninak nayraqatan jan mä phenqʼa uñjatäñamataki;+ nayranakamatakejj pomada alasirakita, ukhamat nayranakamar uchtʼasisajj+ uñj-jjañamataki.+

19 ”’Taqe khitinakarutejj nayajj munaskta ukanakarojj toqenoqtwa, cheqañcharaktwa.+ Ukhamajj juchanakamat arrepentisim,+ Diosar taqe chuyma servirakim. 20 Nayajj punkun saytʼatäsktwa, leqtʼaniskaraktwa. Maynitejj aruj istʼani, punksa llawirarakini ukhajja, utaparuw mantäjja, jupampiw cena manqʼasëjja, jupas nayampiw manqʼasirakini. 21 Khititejj atipjkani ukarojja,+ nayamp chikwa tronojar qontʼayäjja,+ kunjamtï atipjatajat nayajj Awkijamp chik tronopar qontʼaskta ukhama.+ 22 Khititejj jiñchunïki ukajja, kuntï espiritojj congregacionanakar siski uk istʼpan’”.

4 Ukatjja alajjpachan llawirat mä punkwa nayajj uñjta, nayrïr aru istʼarakta, uka arojj trompetan tuktʼasitapjamänwa, akham sarakitänwa: “Akar makatanim, kunanakatï paskani ukanakwa uñachtʼayäma” sasa. 2 Ukatjja ukspachaw Diosan espiritupajj nayjjar jutäna, ukatsti alajjpachan mä trono uñjta, uka trononjja mayniw qontʼatäskarakïna.+ 3 Khititejj tronon qontʼatäskäna ukajja, jaspe*+ ukhamarak sardio* qalanakar uñtataw kʼajtäna, uka trono muytpachanjja mä kurmiw utjäna, uka kurmejj esmeraldar* uñtasitänwa.+

4 Trono muytpachanjja 24 trononakaw utjäna, uka trononakanjja 24 ancianonakaruw*+ qontʼat uñjarakta, jupanakajj janqʼo isinakamp isthapitäpjjänwa, pʼeqenakaparusa qori coronanakampi asjjatatäpjjarakïnwa. 5 Uka tronotsti lliju llijunakampi,+ arunakampi, qʼejjo qʼejjonakampiw+ mistunïna, paqallqo lamparanakarakiw trono nayraqatan nakhaskarakïna, uka lamparanakajj Diosan paqallqo espiritunakapawa.+ 6 Trono nayraqatanjja, vidrio lamar qotjamaw+ utjäna, ukajj cristalar uñtasitänwa.

Kawkjankkäntejj tronojj uka taypinsa, trono muytpachansa, pusi querubín angelanakaw+ utjäna, uka angelanakajja nayräjjatsa qhepäjjatsa nayranakamp phoqantatäpjjänwa. 7 Nayrïr querubín angelajja mä leonar uñtasitänwa,+ payïr querubín angelajja mä toror* uñtasitänwa,+ kimsïr querubín angelajja jaqe ajanunïnwa,+ pusïr querubín angelajja+ jalaskir pakar uñtasitarakïnwa.+ 8 Uka pusi querubín angelanakajj sapa mayniw sojjta chheqanakanïna, uka chheqanakapajj patjjatsa manqhatsa nayranakampi phoqantatänwa.+ Uruy arumaw jupanakajj akham sapjjäna: “Khititejj jakaski, nayras jakaskarakïna, jichhas jutaskaraki uka Taqe Chʼamani Jehová* Diosajja,+ santo, santo, santo Diosawa”+ sasa.

9 Kunapachatï uka querubín angelanakajj tronon qontʼatäki, wiñayans wiñayatak jakirïkaraki uka Diosarojj jachʼañchapki, honra churapki, yuspärapki ukhajja,+ 10 tronon qontʼatäki uka Dios nayraqatanwa 24 ancianonakajj+ qonqortʼasipjje, wiñayans wiñayatak jakirïki uka Diosaruw adorapjje.* Coronanakap trono nayraqatar uchasasti akham sapjjewa: 11 “Nanakan Jehová* Diosaja, jumaw jachʼañchäwi,+ honra+ katoqañatakisa, chʼamanïñatakisa*+ derechonïtajja. Jumaw taqe kunsa lurtajja,+ juman munañamatwa taqe kunas utji, munañamat luratarakiwa” sasa.

5 Khititejj tronon qontʼatäskäna uka Diosan kupi amparapanjja,+ purap lador* qellqata, paqallqo sellompi wali suma segurat mä rollo uñjta. 2 Ukatjja chʼamani mä angelaruw uñjarakta, jupajj akham sasaw wali jachʼat yatiyaskäna: “¿Khitis uka rollo jistʼarañatakisa, sellonakap apaqañatakis derechonejja?” sasa. 3 Uka rolljja janiw khitis alajjpachansa, ni oraqensa, ni oraq manqhansa jistʼarirjamäkänti, janirakiw kunatï ukan qellqatäkäna uksa liytʼirjamäkänti. 4 Nayajj walpun jachayäta, kuna laykutejj uka rollo jistʼarañatakisa kunatï ukan qellqatäkäna uk liytʼañatakis janiw khitis utjkänti. 5 Ukampis ancianonakat maynïriw akham situ: “Jan jachamti. Judá tribunkir Leonajja,+ mä arunjja Davidat+ jutirïki ukajj+ atipjiwa.+ Ukhamajj jupaw rollo jistʼaraspa paqallqo sellonakapsa apaqaspa” sasa.

6 Trono taypinsa, pusi querubín angelanak taypinsa, ancianonak+ taypinsa, kharinukutjam+ mä corderoruw+ uñjta. Uka corderojj paqallqo wajjranakanïnwa, paqallqo nayranakanirakïnwa. Uka nayranakapajj Diosan paqallqo espiritunakapawa,+ oraqpachar khitatäpjjarakiwa. 7 Uka corderojja, tronon qontʼatäskäna uka Diosar jankʼak jakʼachasisaw kupi amparapat rollo katoqäna.+ 8 Corderojj uka rollo katoqäna ukhajja, pusi querubín angelanakasa, 24 ancianonakasa+ Corderon nayraqataparuw qonqortʼasipjjäna. Uka ancianonakajja, sapa mayniw mä arpanïna, sapa maynirakiw incienson phoqantat qori pʼujru* platonakanïpjjäna. (Uka inciensojj santo jilatanakan oracionanakapawa).+ 9 Jupanakajj akham sasaw mä machaq canción cantapjje:+ “Jumaw rollo katoqañatakisa sellonakap apaqañatakis derechonïtajja. Sacrificiot loqtasisajj jumaw wilamampejj taqe tribunkir jaqenaka, kunayman aru parlirinaka, taqe kasta jaqenaka, markanaksa+ Diosatak altajja.+ 10 Jumarakiw jupanakarojj jiwasan Diosasatakejj reyinakaru+ sacerdotenakaru tukuytajja.+ Jupanakaw oraqjjarojj reyinakjam apnaqapjjani”+ sasa.

11 Ukatsti nayajj tronoru, querubín angelanakaru, ancianonakar muyuntat walja angelanakaruw uñjta, arunakapsa istʼaraktwa. Uka angelanakajj walja tunka waranqäpjjänwa,* waranq waranqapunïpjjänwa,+ 12 akham sasaw jachʼat sapjjäna: “Kharinukutäkäna uka Corderojja,+ autoridadanïñatakisa, qamirïñatakisa, yatiñanïñatakisa, chʼamanïñatakisa, honra katoqañatakisa, jachʼañchatäñatakisa, bendisitäñatakisa derechoniwa”+ sasa.

13 Ukatsti alajjpachana, aka oraqena, oraq manqhana,+ lamar qotana taqe jakirinakaruw istʼta, taqe kunanakatejj ukanakan utjki ukanakarus ukhamaraki. Taqe jupanakajj akham sapjjänwa: “Khititejj tronon qontʼatäki+ uka Diosasa Corderosa+ bendisitäpjjpan, honra katoqapjjpan,+ jachʼañchatäpjjarakpan, chʼamanïñas jupanakampïpan wiñayans wiñayapataki”+ sasa. 14 Pusi querubín angelanakajja, “¡amén!” sasaw sapjjäna. Ancianonakajj qonqortʼasisaw Diosar adorapjjarakïna.*

6 Ukatsti kunjamsa Corderojj+ paqallq sellonakat mä sellop apaqäna+ ukwa nayajj uñjta. Pusi querubín angelanakat mayniruw istʼarakta,+ jupajj mä qʼejjo qʼejjor uñtasitaw “¡jutam!” sasin artʼasïna. 2 Mä janqʼo caballo+ uñjarakta, uka caballjjar qonjjatatäkäna ukajja mä flechtʼañ arconïnwa, Diosaw juparojj mä corona churäna,+ ukatsti jupajj enemigonakapar atipjasaw mistüna, atipjäwip phoqachañatakiw misturakïna.+

3 Corderojj payïr sello apaqäna ukhajja, payïr querubín angelaruw+ istʼarakta, jupajj “¡jutam!” sasaw säna. 4 Ukatjja nina color mä caballow mistüna, uka caballjjar qonjjatatäkän ukarojja, oraqen sumankañap apaqañapatakiw autoridadajj churasïna, ukhamat jaqenakajj maynit maynikam jiwarayasipjjañapataki. Juparojj mä jachʼa espadaw churasirakïna.+

5 Corderojj kimsïr sello+ apaqäna ukhajja, kimsïr querubín angelaruw istʼarakta,+ jupajj “¡jutam!” sasaw säna. Ukatsti mä chʼiyar caballoruw uñjta, uka caballjjar qonjjatatäkäna ukajja amparapar mä balanza aptʼatänwa. 6 Pusi querubín angelanak taypinjja, mä arükaspas ukham istʼarakta, akham siri: “Mä denariotjja* mä kilo* trigo,+ mä denariotjja kimsa kilo* cebada, olivo aceitsa vinsa jan inamay tukjamti”+ sasa.

7 Corderojj pusïr sello apaqäna ukhajja, pusïr querubín angelaruw istʼarakta,+ jupajj “¡jutam!” sasaw säna. 8 Ukatjja qʼellsut mä caballoruw uñjta, uka caballjjar qonjjatatäkäna ukajj Jiwaña satänwa. Juparojj Sepulturaw* jakʼat arkaniskarakïna. Jupanakarojj oraqen chikatapan chikatapjjaruw* autoridadajj churasïna, ukhamat mä jachʼa espadampi, manqʼat pistʼañampi,+ jiwayir usumpi, oraqenkir salvaje animalanakampi jaqenakar jiwarayapjjañapataki.+

9 Corderojj phesqër sello apaqäna ukhajja, khitinakatejj Diosan arunakap phoqapjjatap layku ukhamarak yatiyapjjatap layku jiwarayatäpkäna+ ukanakan wilapwa*+ altar nayraqatan uñjta.+ 10 Jupanakajj akham sasaw wali jachʼat arnaqasipjjäna: “Taqe Kunjjar Munañani, santo, cheqpach Tatitu,+ ¿kunapachkamas oraqen jakir jaqenakarojj jan juzgkäta, wilanakaj wartapjjatapatsa jan vengaskarakïta?”+ sasa. 11 Tatitojj jupanakat sapa mayniruw kayukam purir janqʼo isinak churäna,+ ukatjja sarakïnwa: “Mä jukʼa tiempompi samartʼapjjam, kunapachatï esclavo masinakamajja, mä arunjja jilatanakamajj phoqatäjjani ukapachkama, jupanakajj kunjamtï jumanakajj jiwayatäpkayätajja, ukhamarakiw jiwayatäpjjani”+ sasa.

12 Corderojj sojjtïr sello apaqäna ukhajja, jachʼa terremotow sartäna, intejj tʼarwat* lurat llakisiñ isir* uñtataw chʼiyarar tuküna, phajjsis wilar uñtataw wila colorar tukurakïna,+ 13 alajjpachankir warawaranakas oraqeruw willirtarakïna, kunjamtï mä jachʼa thayajj higos qoqar* thaljasajj achunakap chʼojjñpach willirtayki ukhama. 14 Alajjpachajja kunjamtï mä rollojj rollthapiskejja, ukham rollthaptasaw chhaqtjjäna,+ taqe qollunakasa taqe islanakasa lugaranakapat onjjtayatarakïnwa.+ 15 Ukatjja aka oraqenkir reyinakasa, jachʼa autoridadanakasa, ejercitonakan comandantenakapasa, qamirinakasa, chʼamaninakasa, taqpach esclavonakasa, taqpach libre jaqenakasa, qollu pʼiyanakaru qollun utjki uka jachʼa qalanak taypiruw imantasipjjäna.+ 16 Qollunakarusa jachʼa qarqanakarusa* akham sasaw kutin kutin sapjjäna: “Imjjatapjjeta,+ khititejj tronon qontʼatäski uka Diosan ajanupatsa+ Corderon colerasiñapatsa imantapjjeta,+ 17 jupanakan colerasiñ jachʼa urupajj purinjjewa,+ ¿khitirak saytʼatäskakispasti?”+ sasa.

7 Ukatjja pusi angelanakaruw uñjta, uka angelanakajj oraqen pusi esquinanakapan saytʼatäsipkänwa, oraqen pusi thayanakapwa katjjasisipkarakïna, ukhamat jan kuna thayas oraqjjaru, lamar qotjjaru ni kuna qoqjjarus* thaytʼaniñapataki. 2 Inti jalsu toqet mistunir yaqha angelaruw uñjarakta, uka angelajj jakkir Diosan sellop aptʼatänwa. Ukatsti kawkïr pusi angelanakarutï oraqempiru lamar qotampir jan wal lurañatak autoridadajj churaskäna ukanakaruw wali jachʼat artʼäna, 3 akham sasa: “¡Oraqerusa, lamar qotarusa, qoqanakarusa* jan kuna jan wals lurapjjamti, Diosasan esclavonakapar paranakapat+ sellañ tukuyapkä ukapachkama!”+ sasa.

4 Qhawqhanis sellatäpjjäna ukwa nayajj istʼta, 144.000*+ Israelan taqe tribunakapat sellatäpjjäna:+

9 Ukatjja walja jaqenakaruw nayajj uñjta, jupanakarojj janiw khiti jaqes jaktʼirjamäkänti. Jupanakajj taqe markanakata, tribunakata, kunayman kasta jaqenakata, kunayman aru parlirinakat jutirïpjjänwa,+ trono nayraqatana Cordero nayraqatan saytʼatäsipkarakïnwa. Jupanakajj kayukam purir janqʼo isinakampi isthapitäpjjänwa,+ amparanakapansa palmera ramanak aptʼasitäpjjarakïnwa.+ 10 Ukatjja akham sasaw wali jachʼat arnaqasipjjäna: “¡Tronon qontʼatäki uka Diosasampita+ Corderompitwa salvacionajj juti!”+ sasa.

11 Taqpach angelanakajja tronoru, ancianonakaru,+ pusi querubín angelanakar muyuntataw saytʼatäsipkäna, ukatjja trono nayraqatar qonqortʼasisaw Diosar adorapjjarakïna,* 12 akham sasa: “¡Amén! Diosasajj jachʼañchatäpan, jachʼar aptatäpan, yatiñanïpan, yuspäratäpan, honra katoqpan, chʼamanirakïpan, wiñayansa wiñayapataki.+ Amén” sasa.

13 Ukjjarusti ancianonakat maynïrejj akham sasaw jisktʼitu: “Kayukam purir janqʼo isinakampi isthapitäpki ukanakajj+ ¿khitinakäpjjesa, kawkitsa jutapjje?” sasa. 14 Nayajj jankʼakiw jupar akham sista: “Tata, jumaw uk yattajja” sasa. Jupajj sarakituwa: “Jupanakajj jachʼa tʼaqesiñatwa mistunipjje,+ kayukam purir isinakapsa tʼajjsusipjjarakiwa, Corderon wilapampiw uka isinakap janqʼoptayapjje.+ 15 Ukatwa jupanakajj Diosan tronop nayraqatankapjje, uruy arumarakiw templopanjja Diosar servisipki. Tronon qontʼatäki uka Diosajja+ jupanakar jarkʼaqañatakiw mä carpa wakichani.+ 16 Jupanakajj janiw jukʼampejj manqʼat awtjayasjjapjjaniti ni umatsa pharjayasjjapjjaniti,* janirakiw lupisa nakhantir calorasa jupanakar nakhantjjaniti.+ 17 Kuna laykutejj trono taypinkki uka Corderow+ jupanakar awatini,+ jakañ churir uma jalsunakaruw irparakini.+ Diosajj taqe jachanakapwa nayranakapat picharani”.+

8 Corderojj+ paqallqöri sello+ apaqäna ukhajja, mä media horjamaw alajjpachan amuktʼapjjäna. 2 Ukatjja Dios nayraqatan saytʼat paqallqo angelanakwa uñjta,+ jupanakarojj paqallqo trompetanakaw churasirakïna.

3 Yaqha angelarakiw purinisajj altar nayraqatar saytʼasïna,+ jupajj incienso nakhayañ qori braserillos aptʼasitänwa. Juparojj walja inciensow churasïna,+ ukhamat santo jilatanakan oracionanakapamp chika trono nayraqatankki uka qori altarjjaru+ incienso loqtañapataki. 4 Angelan amparapankkäna uka incienson jewqʼepajj santo jilatanakan oracionanakapamp+ chikaw Dios nayraqatar makatäna. 5 Ukampis uka angelajj jankʼakiw braserillo aptasajj altarankir nina sankʼanakamp* phoqantäna, oraqeruw uka nina sankʼanak jaqtanirakïna. Ukatjja qʼejjo qʼejjonakampi, arunakampi, lliju llijunakampi,+ terremotompiw utjarakïna. 6 Paqallqo trompetanak katoqeri paqallqo angelanakajja,+ trompetanakap tuktʼañatakiw wakichasipjjäna.

7 Nayrïri angelajj trompetap tuktʼasïna ukhajja, chhijchhimpi ninampiw utjäna, ukanakajj wilamp mezclantatänwa, ukanakajj oraqer jaqtanitarakïnwa.+ Ukatjja oraqejj niya chikataw* nakhantäna, qoqanakajj* niya chikatarakiw nakhantäna, chʼojjña alinakasa taqpachaw nakhantarakïna.+

8 Payïr angelajj trompetap tuktʼasïna ukhajja, nakhaskiri mä jachʼa qollükaspas ukhamaw lamar qotar jaqontatäna.+ Ukatjja lamar qotajj niya chikataw* wilar tukurakïna.+ 9 Lamar qotan jakirinakatjja niya chikataw* jiwarapjjäna,+ barconakas niya chikatarakiw qʼala tʼunthapitäna.

10 Kimsïr angelajj trompetap tuktʼasïna ukhajja, lamparjam qhanir mä jachʼa warawaraw alajjpachat jalaqtanïna. Uka warawarasti niya chikatpach* jawiranakjjaru ukhamarak uma jalsunakjjaruw purïna.+ 11 Uka warawaran sutipajj Ajenjo satänwa. Umasti niya chikatpachaw* ajenj-jam kʼallkʼur tuküna. Uka uman wali kʼallkʼütap laykojja, walja jaqenakaw jiwarapjjäna.+

12 Pusïr angelajj trompetap tuktʼasïna ukhajja, intisa, phajjsisa, warawaranakasa niya chikatpachaw* usuchjatäpjjäna,+ ukhamat intisa, phajjsisa, warawaranakasa niya chikatpach chʼamaktʼapjjañapataki,+ urusa arumasa niya chikatpach jan qhananïñapataki.

13 Ukatjja altnam jalnaqer mä pakaruw nayajj uñjta, uka pakan wali jachʼat akham arnaqasitapwa istʼarakta: “¡Kunapachatï kimsa angelanakajj jiltʼir trompetanak tuktʼapkani ukhajj ay kunakïkani, ay kunakïkani, ay kunakïkani+ oraqen jakir jaqenakampejja. Uka angelanakajj niyaw tuktʼañampïsipki!”+ sasa.

9 Phesqër angelajj trompetap tuktʼasïna ukhajja,+ mä warawararuw alajjpachat oraqer jalaqtanitap uñjta, uka warawararuw Diosajj mikʼayar*+ apir pʼiyan llavep churäna. 2 Uka warawarasti mikʼayar* apir pʼiywa jistʼaräna, uka pʼiyatjja mä jachʼa hornotsa jewqʼsunkaspa ukhamaw jewqʼejj mistunïna, uka pʼiyat jewqʼejj mistunitapatjja, intisa airesa qʼal chʼamaktʼäna.+ 3 Uka jewqʼetjja langostanakaw* oraqer mistunïna,+ Diosaw jupanakarojj autoridad churäna, kunjamtï oraqenkir escorpionanakajj autoridadanïpkäna ukhama. 4 Uka langostanakarojj jupajj akham sänwa: “Oraqenkir pastonakarusa, chʼojjña alinakarusa, qoqanakarusa* janiw kuna jan wals lurapjjätati, antisas khitinakatï paranakapar Diosan sellop jan katoqapki ukanakarukiw jan waltʼayapjjäta”+ sasa.

5 Langostanakajj janiw jaqenakarojj jiwayapjjañapäkänti, jan ukasti phesqa phajjsiw tʼaqesiyapjjañapäna. Kunjamtï escorpionajj mä jaqer atacasajj tʼaqesiykejja, ukhamaw tʼaqesiyapjjañapäna.+ 6 Uka urunakanjja jaqenakajj jiwañwa thaqapjjani, ukampis janiw kunjamatsa jiwapkaniti. Jiwañsa wal munapjjani, ukampis janiw jiwas jupanakar munkaniti.*

7 Uka langostanakajj nuwasiñatak wakichat caballonakar uñtasitäpjjänwa,+ pʼeqenakaparojj qori coronanakjam asjjatatäpjjarakïnwa, ajanunakapajj jaqen ajanupar uñtasitarakïnwa, 8 ñikʼutanakapajj warminakan ñikʼutapjamänwa. Laka chʼakhanakapajj leonanakan lakanakapjamänwa,+ 9 pecho jarkʼaqañanakapajj hierrot luratjamänwa. Chheqanakapajj kunjamtï caballonakampi qatatit carronakajj wali suynasa nuwasir tʼijupkejja ukhamaw suynarakïna.+ 10 Ukhamarusa escorpionanakjam michʼini* wichʼinkanïpjjänwa, wichʼinkanakaparojj autoridadanïpjjarakïnwa, ukhamat jaqenakar phesqa phajjsi tʼaqesiyañataki.+ 11 Jupanakajj mä reyinïpjjänwa, uka reyisti mikʼayan* angelapawa.+ Hebreo arunjja, Abadón* satawa, griego arunjja Apolión* satarakiwa.

12 Nayrïr tʼaqesïwejj pasjjewa, ukanakjjarojj pä tʼaqesïwimpiw jutaski.+

13 Sojjtïr angelajj+ trompetap tuktʼasïna ukhajja,+ Dios nayraqatankki uka qori altaran wajjranakapatwa+ mä aru istʼarakta. 14 Uka arusti akham sasaw trompet aptʼatäkäna uka sojjtïr angelarojj säna: “Éufrates+ sat jachʼa jawiran ñachʼantatäpki* uka pusi angelanakar jararam” sasa. 15 Uka pusi angelanakajj jararatäpjjänwa, ukhamat jaqenakarojj niya chikatpach* jiwarayañataki. Jupanakajj uka horataki, urutaki, phajjsitaki, marataki wakichatäpjjänwa.

16 Ukatjja caballot sarir soldadonakajj pä patak millonäpjjatapwa nayajj istʼarakta. 17 Caballonakaru ukhamarak caballonakjjar qonjjatatanakaruw nayajj mä visionan uñjta, jupanakajj akhamäpjjänwa: pecho jarkʼaqasiñ chaleconakanïpjjänwa, uka chaleconakapajj ninjam wila coloränwa, jacinto colorjam azulänwa, ukhamarak azufrjam qʼellu coloränwa. Caballonakan pʼeqenakapajj leonanakan pʼeqenakapjamänwa,+ lakanakapatsa ninampi, jewqʼempi, azufrempiw mistüna. 18 Niya chikatpachaw* jaqenakajj uka kimsa plaganakamp jiwarayatäpjjäna, mä arunjja caballonakan lakapat mistur ninampi, jewqʼempi, azufrempi jiwarayatäpjjänwa. 19 Uka caballonakajj lakanakaparus wichʼinkanakaparus autoridadanïpjjänwa. Wichʼinkanakapajj pʼeqenakani asirunakjamänwa,* ukanakampiw jaqenakarojj usuchjapjjäna.

20 Khitinakatejj uka plaganakamp jan jiwarapkäna uka jaqenakajja, janiw luratanakapat* arrepentisipkänti. Demonionakar adorañsa,* qorita, qollqeta, cobreta, qalata, lawat lurata idolonakar adorañsa janiw jaytapkänti, uka idolonakajj janiw uñjapkaspati, ni istʼapkaspasa, janirakiw sarnaqapkaspasa.+ 21 Uka jaqenakajja jaqer jiwayapjjatapatsa, espiritunakampi parlapjjatapatsa,* qʼañu juchan* sarnaqapjjatapatsa, lunthatasipjjatapatsa janiw arrepentisipkänti.

10 Ukatjja alajjpachat saraqanir yaqha chʼaman angelaruw uñjta, jupajj mä qenayampi isthapitänwa,* pʼeqepjjarojj mä kurmiw utjarakïna, ajanupajj intjamänwa,+ kayunakapas ninar uñtat columnanakjamänwa. 2 Amparapanjja janatatat mä jiskʼa rollow utjäna. Kupi kayupampejj lamar qotjjaruw taktʼasïna, chʼeqa kayupampejj oraqjjaruw taktʼasirakïna. 3 Ukatjja kunjamtï mä leonajj wali jachʼat wararkejja, ukhamaw wali jachʼat artʼasirakïna.+ Jupajj artʼaskäna ukhajja, paqallqo qʼejjo qʼejjonakan parlatanakapaw istʼasïna.+

4 Paqallqo qʼejjo qʼejjonakajj parlapkäna ukhajja, nayajj niya qellqañampïskayätwa, ukampis alajjpachat mä aru istʼta,+ akham siri: “Kunanaktï paqallqo qʼejjo qʼejjonakajj parlapki ukanakjja, sellantam,* jan qellqamti” sasa. 5 Lamar qotjjaru oraqjjaru saytʼat uñjkayäta uka angelajja, alajjpacharuw kupi amparap loqtäna. 6 Ukatjja khititejj wiñayans wiñayatak jakirïki,+ alajjpachsa, oraqsa, lamar qotsa, ukanakan utjirinaksa lurirïkaraki+ uka Diosan sutipjjaruw juramento luräna, akham sasa: “Janiw jukʼamp suyañajj utj-jjaniti. 7 Kuna urunakantejj paqallqöri angelajj+ trompetap tuktʼañampïskani+ ukhaw Diosan imantat amtapajj+ cheqpachapun phoqasini, ukjja esclavo profetanakaparuw+ suma yatiyäwinakjam yatiyäna” sasa.

8 Alajjpachat istʼaskäna+ uka arojja, akham sasaw mayamp sitäna: “Lamar qotjjaru oraqjjaru saytʼatäki uka angelan amparapankki uka janatatat rollo mayir saram”+ sasa. 9 Uka angelan ukar sarasajja, uka jiskʼa rollo churita sasaw sista. Jupajj sarakituwa: “Akajj rollojja, manqʼantam,+ purakamanjja ukajj jarüniwa, ukampis lakaman miskʼir uñtat mosqʼäniwa” sasa. 10 Ukatwa uka angelan amparapat mayisajj uka jiskʼa rollo manqʼantta.+ Uka rollosti lakajanjja miskʼir uñtat mosqʼänwa,+ ukampis manqʼantjjta ukhasti purakajan wali jarünwa. 11 Ukatjja jupanakajj akham sapjjarakitänwa: “Jumajj kunayman kasta jaqenakata, markanakata, kunayman aru parlirinakata, walja reyinakampitwa profecía arunak mayamp parlañama” sasa.

11 Ukatjja mediñatak varar uñtasita mä soqosa lawa+ churasipkitäna ukhaw jupajj akham sitäna: “Sartam, ukatjja Diosan templopankir santuariop midtʼam, altarampi ukan adoririnakampir* midtʼam. 2 Ukampis templon santuariop anqäjjankki uka patio ukhamak jaytam, janirak midtʼamti. Uka patiojj markanakar churatawa, jupanakaw 42 phajjsinakajj+ sagrado markarojj+ takichasipjjani. 3 Nayaw pä testigonakajarojj llakisiñ isimpi* isthapit khitanëjja, ukhamat 1.260* urunak profecía arunak yatiyapjjañapataki”. 4 Uka pä testigojj pä olivo qoqampi*+ pä candelabrompi sasipjjewa,+ oraqen Tatitupäki uka nayraqatan saytʼatäsipkarakiwa.+

5 Maynitejj jupanakar usuchjañ munani ukhajja, jupanakan lakanakapat ninaw mistuni, ukampirakiw enemigonakapar tukjani. Maynitejj jupanakar usuchjañ munani ukhajja, ukham jiwayataw uñjasini. 6 Jupanakajj alajjpach jistʼantañatakisa+ profecía arunak parlapki uka urunakan jallojj jan puriñapatakis autoridadanïpjjewa.+ Umanak wilar tukuyañatakisa+ oraqer kunayman plaganakampi walja kuti usuchjañatakis autoridadanïpjjarakiwa.

7 Qhanañchañ tukuyapjjani ukhajja, mikʼayat* mistunir salvaje animalaw jupanak contrajj nuwasini, jupanakar atipjasaw jiwayarakini.+ 8 Jiwat cuerponakapajj jachʼa markan jachʼa thakipankapjjaniwa, uka jachʼa markajj Sodoma markampi Egipto markampi sasiwa, ukanwa jupanakan Tatituparojj lawar chʼakkatasajj* jiwayapjjarakïna. 9 Ukatjja kunayman kasta jaqenakasa, tribunkirinakasa, kunayman aru parlirinakasa, markankir jaqenakasa jupanakan jiwat cuerponakapjja, kimsa uru chikataniw uñchʼukipjjani.+ Janirakiw jiwat cuerponakapjja sepulturar imapjjañapsa munapkaniti. 10 Uka pä profetanakan jiwapjjatapatjja, oraqen jakirinakajj wal kusisipjjani, wal fiestachapjjarakini, maynit maynikamaw regalonaksa apayasipjjani, kuna laykutejj uka pä profetanakajj oraqen jakirinakaruw wal tʼaqesiyapjjäna.

11 Kimsa uru chikatanitjja, Diosaw uka paninirojj jaktayäna.*+ Jupanakajj kayut saytʼasipjjäna ukhajja, jupanakar uñjirinakajj wal ajjsarapjjäna. 12 Ukatjja alajjpachat mä aru akham sas artʼasinirwa istʼapjjarakïna: “Akar makatanipjjam” sasa. Jupanakajj mä qenayatwa alajjpachar makatapjjäna, enemigonakapas jupanakar uñjapjjarakïnwa.* 13 Uka horasanjja mä jachʼa terremotow utjäna, taqpach markatjja tunkïri partew allthaptäna.* Uka terremotonjja 7.000* jaqenakaw jiwarapjjäna, jiltʼirinakajj wal ajjsarapjjäna, alajjpachankir Diosarus jachʼañchapjjarakïnwa.

14 Payïri tʼaqesïwejj+ pasjjewa. Kimsïri tʼaqesïwejj jankʼakiw jutaski.

15 Paqallqöri angelajj trompetap tuktʼasïna ukhajja,+ alajjpachanjja wali jachʼat artʼasir arunakaw istʼasïna, akham siri: “Diosasana ukhamarak Cristopan+ Reinopajja*+ jaqenakjjaruw apnaqaski, jupajj wiñayan wiñayapatakiw reyjam apnaqarakini”+ sasa.

16 Dios nayraqatan trononakapan qontʼatäpkäna uka 24 ancianonakajja,+ qonqortʼasisaw Diosar adorapjjäna,* 17 akham sasa: “Taqe Chʼamani Jehová* Dios, yuspäranipjjsmawa. Jumajj jakasktawa,+ nayratpachaw jakasktajja, jumaw jachʼa chʼamam uñachtʼaytajja, reyjam apnaqañsa qalltaraktajja.+ 18 Ukampis markanakajj wal colerasipjjäna, jumasti jupanakatakejj wal colerasirakiyätajja, ukatjja señalat tiempojj purinjjarakïnwa, ukhamat jiwatanakajj juzgatäpjjañapataki, esclavo profetanakamaru,+ santo jilatanakaru, sutim ajjsaririnakaru, jiskʼanakaru, jachʼanakaru premio churañataki,+ ukhamarak oraqe tukjasipki ukanakar tukjañataki”+ sasa.

19 Alajjpachanjja Diosan templopankir santuariopaw+ jistʼarasïna, ukanjja pacton arcapaw uñjasirakïna. Ukatjja lliju llijunakampi, arunakampi, qʼejjo qʼejjonakampi, mä terremotompiw utjäna, jachʼa chhijchhinakaw wal purintarakïna.

12 Ukatjja alajjpachan mä jachʼa señalaw uñjasïna: mä warmiw+ intimpi isthapitäna,* phajjsisti kayup aynachankarakïnwa, pʼeqeparusti 12 warawaranakani mä coronampi asjjatatarakïnwa, 2 jupajj usur warmirakïnwa. Parto sartatapatsa ususiñataki tʼaqesitapatsa jupajj wal warariskarakïna.

3 Ukatjja yaqha señalwa alajjpachan uñjasirakïna: nina color mä jachʼa dragonaruw uñjta,+ uka dragonajj paqallqo pʼeqenïnwa, tunka wajjraniraki, pʼeqenakaparojj paqallqo coronani,* 4 wichʼinkapajj alajjpachankir warawaranakarojj niya chikatpachwa* qatattäna,+ ukatjja oraqeruw jaqtanirakïna.+ Niya ususiñampïskäna uka warmin nayraqataparuw dragonajj saytʼasïna,+ ukhamat wawajj naskani ukhajja, uka wawapar manqʼantañataki.

5 Uka warmejj mä yoqall wawa ususïna,+ uka wawaw hierrot lurat varampejj taqe markanakar awatini.+ Uka warmin wawapajj Diosan ukaru ukhamaraki tronopar aptatänwa. 6 Warmisti wasararuw escapjjäna, ukanwa Diosan wakichat mä lugarapajj utjäna, ukanarakwa juparojj 1.260* urunak manqʼayasïna.+

7 Alajjpachanjja mä guerraw sartarakïna. Miguelampi*+ angelanakapampejj dragonampiw nuwasipjjäna, dragonampi angelanakapampisti jupanakampiw nuwasipjjarakïna. 8 Ukampis dragonampi angelanakapampejj atipjataw uñjasipjjäna,* janirakiw jupanakatakejj alajjpachan mä lugaras utj-jjänti. 9 Ukhamasti jachʼa dragonajja,+ mä arunjja nayra asirojj*+ aynachar jaqoqanitänwa, khititejj Diablo+ ukhamarak Supaya*+ satäki, khititejj oraqen taqe jakirinakar engañjaski+ ukajja oraqer jaqoqanitänwa,+ angelanakapas jupamp chika jaqoqanitäpjjarakïnwa. 10 Ukatjja alajjpachan wali jachʼat akham artʼasir istʼarakta:

“¡Diosasajj jaqenakaruw salvi,+ jupan jachʼa chʼamapaw uñjasiraki. Reinopajj*+ apnaqañwa qalltjje, Cristopas autoridadanëjjarakiwa. Khititejj jilanakasar Dios nayraqatan uruy aruma juchañchki ukajja jaqoqatäjjewa!+ 11 Jupanakajj Corderon wilapampi,+ yatiyapkäna uka arunakampiw+ atipjapjjäna,+ jupanakajj janiw jakañanakaparojj munasipkänti,+ janirakiw jiwañsa ajjsarapkänti. 12 Ukhamajj alajjpachanakasa ukan jakirinakasa ¡kusisipjjam! Ukampis oraqetsa lamar qotatsa ¡ay kunakïkani!+ Diablojj wali colerataw jumanakan ukarojj saraqani, kuna laykutejj jupajj jukʼa tiemponikïtap yatiwa”.+

13 Dragonajj oraqer jaqoqanitäjjäna ukhajja,+ yoqall wawa ususkäna uka warmiruw jan waltʼayañatak arknaqäna.+ 14 Ukampis uka warmirojj jachʼa pakan pä chheqapaw+ churasïna, ukhamat wasaran utjki uka lugarapar jaltjjañapataki, asirutsa* wali jayankjjañapataki,+ ukanwa juparojj mä tiempompi, tiemponakampi, chikat tiempompi*+ manqʼayasïna.

15 Asirojj* lakapatwa mä jawirar uñtat um mistuyanïna, uka umampiw warmirojj qhepapat irpjjatäna, ukhamat jawirajj uka warmir ajjskatayasin jiwayañapataki. 16 Ukampis oraqew warmir yanaptʼir jutäna. Oraqejja lakap ansatatasaw dragonat mistkäna uka jawir umantjjäna. 17 Ukatwa dragonajj warmitak wal colerasïna, warmin wawanakapat jiltʼkäna ukanakamp nuwasiriw saräna,+ jupanakaw Diosan mandamientonakap phoqapjje, jupanakarakiw Jesusjjat qhanañchañatakejj uttʼayatäpjje.+

13 Dragonajj lamar qotankir chʼalljjaruw jan onjjtas saytʼasïna.

Ukatjja lamar qotat mistunir+ mä salvaje animalaruw uñjta.+ Uka animalajj tunka wajjranakanïnwa, paqallqo pʼeqenakanirakïnwa, wajjranakapajj tunka coronanakanïnwa,* pʼeqenakapanjja Dios contra parlir sutinakaw utjarakïna. 2 Nayajj uñjkayäta uka salvaje animalajja leopardor uñtasitänwa, ukampis kayunakapajj mä oson kayupjamänwa, lakapajj leonan lakapjamarakïnwa. Dragonajj+ uka animalaruw chʼamapsa, tronopsa, wali autoridadanïñsa churäna.+

3 Uka salvaje animalan mä pʼeqepajja jiwirjam usuchjatäkaspas ukhamänwa, ukampis heridap jakayasjjänwa.+ Oraqenkir taqe jaqenakas wali musparataw uka salvaje animalarojj arkapjjäna. 4 Ukatjja salvaje animalar autoridad churatap laykojja, dragonaruw adorapjjäna,* salvaje animalarojj akham sasaw adorapjjarakïna: “¿Khitirak salvaje animaljamasti? ¿Khitirak jupamp nuwasispasti?” sasa. 5 Uka salvaje animalajja, jachʼañchasiñataki Dios contra jan walinak parlañatakiw chʼam katoqäna, 42 phajjsinak munañap lurañatakiw chʼam katoqarakïna.+ 6 Uka animalajj lakap ansatatasaw Dios contra, sutip contra jan wal parläna, utjäwip contra, jïsa, alajjpachan jakirinak+ contraw jan walinak parläna.+ 7 Santo jilatanakampi nuwasiñapatakisa jupanakar atipjañapatakisa juparuw permiso churasïna,+ juparurakiw taqe tribunakjjaru, kunayman jaqenakjjaru, kunayman aru parlir jaqenakjjaru, markanakjjaru autoridadanïñajj churasïna. 8 Oraqen jakirinakajja taqeniw uka animalarojj adorapjjani.* Aka mundojj qalltkäna* ukhatpachajja, jupanakan sutinakapajj janiw jiwayat Corderon+ jakañ rollopan+ ni mayas qellqatäkiti.

9 Khititejj jiñchunïki ukajja istʼpan.+ 10 Maynitejj carcelar mantañapächi ukhajja, carcelar mantañapawa. Maynitejj espadampi jiwaychi* ukhajja, espadampi jiwayatäñapawa.+ Ukatpï santo jilatanakan+ aguantapjjañapasa+ Diosar confiyapjjañapasa*+ wakisejja.

11 Ukatjja oraqet mistunir yaqha salvaje animalaruw uñjarakta, uka animalajj corderjam pä wajjranïnwa, dragonjamarakiw parlañ qalltäna.+ 12 Uka salvaje animalajja nayrïr salvaje animal nayraqatanjja jupjam autoridadanïtapwa uñachtʼayäna.+ Oraqerusa ukan jakirinakarusa nayrïr salvaje animalaruw adorayarakïna.* Uka nayrïr salvaje animalajja niya jiwirjam usuchjatäkäna uksa jakayasjjänwa.+ 13 Ukatjja jachʼa señalanakwa luräna, jaqenakan uñjkatarakiw alajjpachat oraqerojj nina saraqayanïna.

14 Nayrïr salvaje animal nayraqatana jachʼa señalanak lurañapataki permiso katoqasajja, oraqen jakirinakaruw engañjäna. Ukañkamasti espadampi usuchjatäkäna, ukampis jaktkäna uka salvaje animalar+ uñtasit mä estatua+ lurapjjañapatakiw oraqen jakirinakarojj säna. 15 Payïr salvaje animalarojja, nayrïr salvaje animalan estatuapar samana* churañapatakiw permiso churasïna, ukhamat uka salvaje animalan estatuapajj parlañapataki ukhamarak uka estatuar jan adorañ* munirinakarojj taqenir jiwarayañapataki.

16 Jiskʼanakarusa, jachʼanakarusa, qamirinakarusa, pobrenakarusa, librenakarusa, esclavonakarusa, mä arunjja taqe jaqenakaruw kupi amparanakapata jan ukajj paranakapat marcatäpjjañapatak obligäna,+ 17 ukhamat jan khitis alañapataki ni aljañapataki, jan ukasti khitinakatejj salvaje animalan sutipampi+ jan ukajj sutipan numeropampi marcatäpki+ ukanakaki uk lurapjjañapataki. 18 Khititejj suma amuytʼasirïki ukajja, salvaje animalan numerop amuytʼpan, uka numerojj jaqen numeropawa, salvaje animalan numeropajj 666+ ukawa.* Khititï yatiñanïki ukakiw uk amuytʼaspa.

14 Ukatjja Corderoruw+ Sion Qollu+ patjjan saytʼat uñjta, jupamp chikajja 144.000+ ukhaniruw* uñjarakta, jupanakan paranakapanjja jupan sutipampi Awkipan sutipampi+ qellqatänwa. 2 Alajjpachat wal suynanir istʼarakta, ukajj walja umjama ukhamarak wali chʼamamp suynir qʼejjo qʼejj-jamaw wal suynäna. Nayajj istʼkayäta ukajja, cantirinakas arpanakap tuktʼasis cantapkaspa ukhamänwa. 3 Mä machaq cancionäkaspas+ ukhamwa jupanakajj trono nayraqatana, pusi querubín angelanak+ nayraqatana ukhamarak ancianonak+ nayraqatan cantapjjäna. Janiw khitis uka machaq canción yateqerjamäkänti, jan ukasti 144.000+ ukanakakiw* cantapjjäna, jupanakajj oraqet alatäpjjänwa. 4 Jupanakajj janiw warminakamp qʼañuchasipkänti, cheqansa virgen tawaqonakjamäpjjänwa.+ Kawkirutejj Corderojj sarki ukaruw jupanakajj arkapjjaraki.+ Diosatakisa Corderotakisa jaqenak taypit nayrïr achunakjam+ alatäpjjänwa,+ 5 janirakiw lakanakapanjja kuna engaños utjkänti, ni kuna manchas jupanakan utjkänti.+

6 Alajjpachan jalnaqaskir yaqha angelaruw uñjarakta. Jupajj oraqen jakirinakaru yatiyañatak wiñay suma yatiyäwinakanïnwa, mä arunjja taqe markanakaru, tribunakaru, kunayman parlani jaqenakaru, kunayman kasta jaqenakaru yatiyañataki.+ 7 Uka angelajj akham sasaw jachʼat artʼasïna: “Diosar ajjsarapjjam, jachʼañchapjjarakim, kuna laykutejj jaqenakar juzgañ horasajj purinjjewa.+ Ukhamajj khititejj alajjpachsa, oraqsa, lamar qotsa, uma jalsunaksa lurki uka Diosar adorapjjam”*+ sasa.

8 Ukatjja payïri angelaw akham sas jutarakïna: “¡Atipjatäjjewa! ¡Jachʼa Babiloniajj+ atipjatäjjewa!+ Jupaw qʼañu jucha* wal lurañ munatapampejj vinökaspas ukham taqe markanakar umantayäna”+ sasa.

9 Ukatjja kimsïri angelaw akham arnaqasis jutarakïna: “Maynitejj salvaje animalarusa+ estatuaparusa adorani,* paraparusa amparaparusa marcayasini ukhajja,+ 10 Diosan colerasiñ vinopjja+ umantarakiniwa, mä arunjja colerasiñ copapar jan kunamp mezclantat wartʼatäki uka vinopwa umantani. Santo angelanak nayraqatansa Cordero nayraqatansa ninampi azufrempi tʼaqesiyatäniwa.+ 11 Jupanakan tʼaqesipjjatapatjja,* jewqʼejj wiñayans wiñayapatakiw mistuni.+ Khitinakatejj salvaje animalarusa estatuaparus adorapki,* sutipampi marcatas uñjasipki ukanakajja,+ janiw urus ni arumas samartʼapkaniti. 12 Ukatwa santo jilatanakajja,+ mä arunjja khitinakatejj Diosan mandamientonakap phoqapki, Jesusar confiyas* jakapkaraki ukanakan+ aguantapjjañapajj wakisini”.

13 Alajjpachat akham siri mä aru istʼarakta: “Akanak qellqam: khitinakatejj aka tiempot uksarojj Tatitumpi mayakïsin jiwapki uka jiwatanakajj kusisipjjpan.+ Jïsa, espiritojj siwa, jupanakajj luratanakapat samarapjjpan, luratanakapajj jupanakamp chikäskiwa” sasa.

14 Ukatjja mä janqʼo qenay uñjta. Uka qenay patjjanjja mayniruw qontʼat uñjta, jupajj jaqen yoqapjamänwa,+ pʼeqepanjja mä qori corona asjjatatänwa, amparaparojj mä ari jusi* aptʼasitarakïnwa.

15 Yaqha angelaw templon santuariopat mistunirakïna, jupajj qenayjjan qontʼatäkäna ukarojj akham sasaw wali jachʼat artʼäna: “Jusimampi* yawthapiñ qalltam, cosecha apthapiñ horasajj purinjjewa, oraqenkir yapojj suma poqoratäjjewa”+ sasa. 16 Ukatjja qenay patjjan qontʼatäkäna ukajja oraq yawthapïna, ukhamatwa oraqejj yawthapitäna.

17 Yaqha angelarakiw alajjpachankir templon santuariopat mistunïna, jupajj mä ari jusi* aptʼatarakïnwa.

18 Ukatsti yaqha angelaw altarat mistunirakïna, jupajj ninjjar autoridadanïnwa. Khititejj ari jusinïkäna* ukarojja, akham sasaw wali jachʼat artʼarakïna: “Ari jusimpi yawthapiñ qalltam, oraqenkir uvas cosecha apthapim, uvasanakajj suma poqoratäjjewa”+ sasa. 19 Ukatjja uka angelajj oraqe yawthapïna. Oraqenkir uvas yapu yawthapisajja, uvas chʼirwañ jachʼa lugararuw jaqontäna, ukajj Diosan colerasiñapamp sasiwa.+ 20 Uvasanakajj marka anqäjjan takitänwa. Uka uvas chʼirwañ lugaratjja, caballonakan frenopkamaw wilajj mistüna, niya 300 kilometronak* ukchʼaruw wilajj saratatarakïna.

15 Ukatjja alajjpachan yaqha musparkañ jachʼa señalwa uñjarakta: paqallq angelanakaruw+ paqallq plaganakas aptʼasit uñjta. Ukanakaw qhepïr plaganakajja, ukanakampiw Diosajj colerasiñap tukuyjjarakini.+

2 Ukatjja ninampi mezclat vidrio lamar qotäkaspas+ ukham uñjta, uka vidrio lamar qota ladonjja, khitinakatejj salvaje animalarusa estatuaparusa+ atipjapki,+ sutipan numeropampis+ jan marcayasipki ukanakaruw Diosan arpanakap aptʼasit uñjarakta. 3 Diosan esclavopäki uka Moisesan cancionapa ukhamarak Corderon+ cancionapwa jupanakajj cantasipkäna,+ akham sasa:

“Taqe Chʼamani Jehová* Dios,+ juman luratanakamajj wali jachʼanakawa,+ wali musparkañarakiwa. Wiñay Rey,+ juman thakinakamajj cheqapawa,+ confiykañarakiwa. 4 Jehová* Dios, juma sapakiw jan jaytjasirïtajja,+ ¿khitirak jumar jan ajjsarkiristamsti, khitirak sutim jan jachʼañchkaspasti? Juman cheqaparjam juzgir Diosätam uñjasajja, taqe markanakaw juman ukar jutapjjani, nayraqatamanwa adorapjjarakïtam”*+ sasa.

5 Ukjjarojj tabernaculon* santuariop jistʼartaskir alajjpachan uñjta,+ 6 uka santuariotjja paqallq angelanakaw paqallq plaganakas+ aptʼasit mistunipjjäna, jupanakajj linot lurat llijkir qʼoma isimpi isthapitäpjjänwa, pechonakaparus qorit lurat wakʼampi wakʼantatäpjjarakïnwa. 7 Pusi querubín angelanakatjja, mayniw paqallq angelanakarojj qorit lurat paqallq pʼujru* platonak churäna, uka pʼujru platonakajj wiñayans wiñayatak jakiri Diosan colerasiñapamp phoqantatänwa.+ 8 Diosan kʼajtatapatsa+ chʼamanïtapatsa, santuariojj jewqʼempi phoqantatänwa. Paqallqo angelanakajj katoqapkäna uka paqallq plaganakan+ tukusiñapkamajj janiw khitis uka santuarior mantirjamäkänti.

16 Ukatjja santuariot+ mä jachʼa aru istʼta, paqallq angelanakarojj akham sasaw jachʼat artʼanïna: “Sarapjjam, Diosan colerasiñapamp phoqantat paqallq pʼujru* platonakjja oraqer warjjatanipjjam”+ sasa.

2 Nayrïr angelajj sarasaw pʼujru* platop oraqjjar warjjatäna.+ Ukatjja khitinakatejj salvaje animalan+ marcapamp marcatäpkäna, estatuaparus adorapkarakïna*+ uka jaqenakarojj wal sufriyir jan wali llagaw*+ tʼaqesiyäna.

3 Payïr angelajj lamar qotjjaruw pʼujru* platop warjjatarakïna.+ Lamar qotajj wilaruw tuküna,+ jiwat jaqen wilapjama, lamar qotan taqe jakirinakas* qʼalwa jiwarapjjarakïna.+

4 Kimsïr angelajja jawiranakjjaru ukhamaraki uma jalsunakjjaruw pʼujru* platop warjjatäna.+ Ukanakajj wilaruw tukurakïna.+ 5 Umanakjjar autoridadanïkäna uka angelarojj akham sir istʼarakta: “Jumajj jakasktawa, nayratpachwa jakasktajja,+ jan jaytjasiri Diosätawa,+ cheqaparjam uñjirïtawa, ukatwa ukanak lurañ amttajja.+ 6 Jupanakajj santo jilatanakana ukhamarak profetanakan wilapwa wartapjjäna,+ ukatwa jumajj jupanakar wil umaraytajja.+ Uka wila umarapjjañapajj wakisïnwa”+ sasa. 7 Altaratjja akham arunak istʼarakta: “Jïsa, Taqe Chʼamani Jehová* Dios,+ kunanaktï Juezjamajj amtkta ukanakajj cheqapawa, confiykañarakiwa”+ sasa.

8 Pusïr angelajj intiruw pʼujru* platop warjjatäna,+ intirojj jaqenakar ninamp nakhantayañapatakiw chʼamajj churasirakïna. 9 Uka jaqenakarojj ninan calorapaw nakhantäna, ukampis jupanakajj uka plaganakjjar autoridadanïki uka Diosan sutip contraw jan wal parlapjjäna, janiw arrepentisipkänti, ni Diosarus jachʼañchapkänti.

10 Phesqër angelajj pʼujru* platop salvaje animalan tronoparuw warjjatäna. Reinopajj* qʼala chʼamaktʼayatänwa,+ jaqenakasti tʼaqesipjjatap laykojj lajjranakapsa tʼuroqasipjjänwa, 11 ukampis usuyasipjjatap laykusa, llaganakanïpjjatap* laykusa alajjpachankir Dios contraw jan wal parlapjjäna, janiw luratanakapatsa arrepentisipkänti.

12 Sojjtïr angelajj Éufrates sat jachʼa jawirjjaruw pʼujru* platop warjjatäna.+ Uka jawiran umanakapajj qʼal wañsurakïna,+ ukhamat inti jalsu toqet jutir reyinakatak thaki wakichañataki.+

13 Ukatjja dragonampiru,+ salvaje animalampiru, falso profetampiruw uñjta, lakanakapatjja kimsa qʼañu yatiyäwinakaw* mistunïna, ukanakajj kʼayranakar uñtasitänwa. 14 Uka yatiyäwinakajj demonionakan amuytʼayatawa, oraqpachankir reyinakaw uka yatiyäwinak istʼapjje. Uka yatiyäwinakajj señalanakwa lurapjje,+ ukhamat reyinakarojj Taqe Chʼamani Diosan jachʼa urupan+ guerrajj apaskani ukar tantachthapiñataki.+

15 “Nayajj lunthatar uñtataw jutaskta.+ Khititejj uñnaqaskchi, isi usktʼasitarakïchi ukajj kusispan.+ Jupatejj ukham luranejja, janiw jan isinejj uñjaskaniti, janirakiw jaqe nayraqatansa mä phenqʼa uñjaskaniti”.+

16 Uka qʼañu yatiyäwinakajja, hebreo arun Armagedón*+ sat lugararuw reyinakar tantachthapipjjäna.

17 Paqallqöri angelajj aireruw pʼujru* platop warjjatäna. Ukatjja mä aruw santuariota,+ mä arunjja tronot akham sasin jachʼat artʼanïna: “¡Phoqasjjewa!” sasa. 18 Ukatjja lliju llijunakampi, arunakampi, qʼejjo qʼejjonakampiw utjäna, ukjjarojj mä jachʼa terremotow sartarakïna, uka terremotojj wali chʼamanïnwa, wali jachʼarakïnwa, jaqejj aka oraqen luratäkäna ukhatpachajj janiw ukhamajj utjkänti.+ 19 Jachʼa markajj+ kimsaruw jaljtäna, nacionanakan markanakapajj allthaptarakïnwa, Diosajj Jachʼa Babiloniatwa+ amtasirakïna, ukhamat vino copa jupar churañataki, uka copajj Diosan jachʼa colerasiñapawa.+ 20 Taqe islanakajj escapjjapjjänwa, qollunakas chhaqarjjapjjarakïnwa.+ 21 Jaqenakjjarojj jachʼa qala chhijchhinakaw alajjpachat purintarakïna,+ sapa chhijchhejj niya mä talento* qollqjam jathïnwa. Uka plagajj wali jachʼapunïnwa, ukatwa uka plagan utjatapatjja jaqenakajj Dios contra jan wal parlapjjäna.+

17 Paqallqo pʼujru* platonak+ aptʼatäpkäna uka paqallqo angelanakatjja, mayniw jutasajj akham sasin sitäna: “Jutam, kunjamsa walja umanakjjar qontʼatäki uka jachʼa prostituta warmirojj juchañchasini ukwa nayajj uñachtʼayäma.+ 2 Uka warmimpiw oraqenkir reyinakajj qʼañu jucha* lurapjjäna,+ oraqen jakir jaqenakas jupan vinopampiw umjasipjjarakïna, uka vinojj qʼañu jucha* luratanakapamp sasiwa”+ sasa.

3 Ukatjja espíritu santon yanaptʼapampiw uka angelajj wasarar apitäna. Ukansti mä warmiruw uñjarakta, llijkir wila color mä salvaje animaljjar qonjjatatänwa. Uka salvaje animalajj Dios contra jan wal parlir sutinakampi phoqantatänwa, paqallqo pʼeqenakanïnwa, tunka wajjranirakïnwa. 4 Uka warmejj morado+ ukhamarak llijkir wila color isimpi isthapitänwa, qorimpi, suma qalanakampi, perlanakampi kʼachachtʼatarakïnwa,+ amparaparojj mä qori copa astʼatarakïnwa, uka copajja ajjtaskañanakampi qʼañu jucha* luratanakapan ajjtaskañanakapampi phoqantatänwa. 5 Paraparojj mä sutimpi qellqkatatarakïnwa, uka sutejj kamsañs muni ukajj janiw yatiskänti, ukansti akham sänwa: “Jachʼa Babilonia, prostitutanakana+ oraqenkir ajjtaskañanakan taykapa”+ sasa. 6 Uka warmirojj santo jilatanakan wilapampi Jesusan testigonakapan wilapampi+ machantatwa uñjarakta.

Jupar uñjasasti nayajj wal musparayäta. 7 Ukatwa angelajj akham situ: “¿Kunatsa wal musparta? Nayaw kunatï aka warmit jan yatiski uk qhanañchäma,+ warmejj qonjjatatäki uka paqallqo pʼeqenakani, tunka wajjranakani salvaje animalatsa qhanañcharakïma.+ 8 Jumajj uñjkayäta uka salvaje animalajja, qalltanjja utjänwa, ukat janirakiw utj-jjeti, ukampis uka salvaje animalajj niyaw mikʼayat*+ mistuniñampïski, qʼala tʼunjatarakïniwa. Salvaje animalajj kunjamsa qalltan utjäna, ukat janirak utj-jjeti, qheparojj utjarakini uk uñjasajja, oraqen jakir jaqenakajj wal musparapjjani, jupanakan sutinakapajj aka mundojj qalltkäna* ukhatpachajj janiw jakañ rollon+ qellqatäkiti.

9 ”Ak amuytʼañatakejj yatiñanïñaw wakisi: paqallqo pʼeqenakajj+ paqallqo qollunakamp sasiwa, ukanakjjaruw uka warmejj qontʼasiraki. 10 Paqallqo reyinakaw utji: phesqaniw tinkjjapjje, maynejj utjaskiwa, maynisti janïraw utjkarakiti. Ukampis utj-jjani ukhajja, jukʼa tiempotakikiw utjani. 11 Ukatjja utjkäna, ukat janirak utj-jjeti uka salvaje animalajja,+ kimsaqallqöri reyimpi sasirakiwa, ukïrejj paqallqo reyinakat jutiriwa, jupas qʼala tʼunjatarakïniwa.

12 ”Jumajj uñjkta uka tunka wajjranakajja, tunka reyinakamp sasiwa, jupanakajj janïraw mä reino* katoqapkiti. Ukampis salvaje animalampi apnaqañatakiw mä horatak autoridadanïñ katoqapjjani. 13 Uka reyinakajj mä amtanikïpjjewa,* ukatwa uka salvaje animalarojj chʼamsa autoridadanïñsa churapjje. 14 Jupanakajj Corderompiw+ nuwasipjjani. Ukampis Corderojj jupanakar atipjaniwa,+ kuna laykutejj Corderojj tatitunakans Tatitupawa, reyinakans Reyiparakiwa.+ Ukatjja khitinakatejj jupampïpki, mä arunjja khitinakatejj jawsatäpki, ajllitäpki, jan jitheqtirïpki ukanakajja ukhamarakiw atipjapjjani”.+

15 Jupajj akham sarakitänwa: “Jumajj uñjkta uka umanakajja, kawkjantï prostituta warmejj qontʼatäki uka umanakajja, taqe kasta jaqenakampi, walja jaqenakampi, markanakampi, kunayman aru parlirinakampi sasiwa.+ 16 Uñjkta uka tunka wajjranakasa+ salvaje animalasa+ prostituta warmirojj+ uñisipjjaniwa, utjirinakapsa taqpachwa aparapjjani, jan isini jaytapjjani, jupanakaw jañchipsa manqʼantapjjani, ninampiw qʼal nakhantayapjjarakini.+ 17 Kuna laykutejj Diosaw amuyupjja chuymanakapar uchäna,+ ukhamat jupan amtap phoqapjjañapataki. Jupanakajj mä amuyunikïpjjänwa. Jupanakajj salvaje animalaruw+ reinop* churapjjäna, Diosaw uka amuyu jupanakar churäna, Diosan arunakapajj phoqaskani ukapachkama. 18 Uñjkta uka warmejja,+ oraqenkir reyinakjjar mä reinar uñtat apnaqki uka jachʼa markamp sasiwa”.

18 Ukatjja wali autoridadan yaqha angelaruw alajjpachat saraqanir uñjta, jupan kʼajtatapatjja oraqejj wal kʼajäna. 2 Jupajj akham sasaw wali jachʼat artʼasïna: “¡Atipjatäjjewa! ¡Jachʼa Babiloniajj atipjatäjjewa!+ ¡Uka markajj demonionakan utjäwiparuw tukjje, taqe demonionakana,* uñisita qʼañut uñjat taqe jamachʼinakan imantasiñaparuw tukjje!+ 3 Jupan vinopampi, mä arunjja jupan qʼañu jucha* lurañ wal munañampiw taqe markanakajj umjasipjjäna,+ oraqenkir reyinakas jupampiw qʼañu jucha lurapjjäna,+ oraqenkir comerciantenakas* jupan wali valorani imkatatanakapampiw qamiriptapjjäna, jupajja uka imkatatanakapat janiw phenqʼaskänti”.

4 Alajjpachat akham sir yaqha aru istʼarakta: “Nayan markaja,+ uka taypit mistjjapjjam, janitejj jumanakajj jupamp chika juchachasiñ munapksta, janitejj plaganakapsa katoqañ munapksta ukhajj uka taypit mistjjapjjam.+ 5 Jupan juchanakapajj alajjpachkam montontʼatawa,+ jupan jan wali luratanakapatsa Diosajj amtarakiwa.+ 6 Kunjamtï jupajj yaqhanakar uñjki ukhamarak jupar uñjapjjam.+ Jïsa, kunanaktï jupajj lurki ukanakatjja, mä ukhampi kuttʼayapjjam.+ Kuntï jupajj copar+ preparki ukatjja, mä ukhampi jupatak preparapjjam.+ 7 Kunjamtï jupajj jachʼañchaskänjja, kunjamtï jan phenqʼani wali qamiri jakkänjja, ukarjam jupar tʼaqesiyapjjam, llakisiyapjjarakim. Jupajj chuymapan akham saskakiwa: ‘Nayajj mä reinar uñtataw qontʼatäskta, janiw nayajj viudäkti, janirakiw kunapachas llakiskäti’+ sasa. 8 Ukatwa jupan plaganakapajj mä urunaki jutani, mä arunjja jiwañampi, llakisiñampi, manqʼat awtjayasiñampiw jutani. Ukatjja ninampi qʼala nakhantayataw uñjasirakini,+ kuna laykutejj jupar juchañchir Jehová* Diosajj wali chʼamaniwa.+

9 ”Oraqenkir reyinakajja, mä arunjja jupamp qʼañu jucha* lurapkäna, jupamp taqe kunani jan phenqʼani jakapkäna uka reyinakajja, jupar nakhantir jewqʼe uñjasajj jachapjjaniwa, llakisiñatsa chuymanakap leqʼesipjjarakiniwa. 10 Jupjam tʼaqesiñ ajjsarapjjatap laykojja, jupanakajj jayaruw saytʼasipjjani, akham sasa: ‘¡Jachʼa marka, wali chʼaman Babilonia marka, jumajj wali llakkañätawa,+ wali llakkañapunïtawa, mä horanakwa jumajj juchañchat* uñjastajja!’ sasa.

11 ”Oraqenkir comerciantenakajja wal jupatjam jachapjjani, llakisipjjarakini, taqe cargamentop jan khiti alasir utj-jjatap layku. 12 Jupanakatjja qori, qollqe, suma qalanaka, perlanaka, linot lurat suma hilo, morado telanaka, seda telanaka, llijkir wila color tela cargamentopjja janiw khitis alasjjaniti. Taqe kunanakatï suma olorani maderata, marfilata, suma maderata, cobreta, hierrota, mármol qalat luratäki taqe uka cargamentopjja janiw khitis alasjjaniti. 13 Janirakiw khitis canelsa, India markat apanit suma qʼaphini alinaksa, incienssa, suma olorani aceitsa, janqʼo incienssa, vinsa, olivo aceitsa, suma jakʼsa, trigsa, vacanaksa, ovejanaksa, caballonaksa, qatatiñ carronaksa,* esclavonaksa, jaqenaksa alasjjaniti. 14 Jïsa, kuna suma achtï jumajj munkayäta ukajj apanukjjtamwa, suma manqʼanakasa, kunanakatï wali sumäki ukanakas jumatak tukusjjewa. Janirakiw mayampis kuttʼanjjaniti.

15 ”Jupjam tʼaqesiñap ajjsarapjjatap laykojja, taqe ukanak aljasin qamiriptiri comerciantenakajj jayaruw saytʼasipjjani. Ukatjja jachapjjaniwa, llakisipjjarakiniwa, 16 akham sasa: ‘¡Jachʼa markajj wali llakkañawa, wali llakkañapuniwa! Jupajj wali suma linot lurat isimpi, morado isimpi, llijkir wila color isimpi isthapitänwa, qorita, suma qalanakata, perlanakata lurat walja joyanakampi kʼachachtʼatarakïnwa.+ 17 ¡Mä horanakwa wali qamirïñajj qʼal tukusïna!’ sasa.

”Barconakan taqe capitananakapasa, lamar qotan viajiri taqe jaqenakasa, marineronakasa, lamar qotan taqe trabajirinakasa, jayaruw saytʼasipjjäna, 18 jupan nakhantatapat mistkäna uka jewqʼe uñchʼukkasajja, akham sasaw arnaqasipjjäna: ‘¡¿Kawkïr markaraki aka jachʼa markjamasti?!’ sasa. 19 Pʼeqenakaparojj laqʼampiw jachʼjjatasipjjäna, ukatjja akham sasaw wali llaktʼata jachtʼasisa arnaqasipjjäna: ‘¡Jachʼa markajj wali llakkañawa, wali llakkañapuniwa! Lamar qotan barconakanïpkäna taqe ukanakajja, jupan qamirïtapatwa qamiriptapjjäna, jichhasti mä horanakwa jupajj qʼala tʼunjat uñjasi’+ sasa.

20 ”¡Alajjpachankirinaka, kunatï juparojj paski ukat kusisipjjam!+ ¡Santo jilatanaka,+ apostolonaka, profetanaka jumanakajj kusisipjjarakim! Kuna laykutejj Diosajj jumanak toqet saytʼasisaw jupar juchañchi”.+

21 Ukatjja wali chʼamani mä angelajja, molino jachʼa qalar uñtat mä qala aptasaw lamar qotar jaqontäna, akham sasa: “Babilonia jachʼa markajj aka qalar uñtataw jankʼak jaqtatäni, jan mayampitak chhaqtayatäniwa.+ 22 Arpa tuktʼasis cantirinakasa, music tukirinakasa, flautanaka trompetanaka tukirinakasa janipuniw mayampis juma taypin istʼasjjaniti. Juma taypin utjkäna uka artesanonakajj janiw mayampis utj-jjaniti, janirakiw mayampis molino qalan suynatapajj juma taypin istʼasjjaniti. 23 Juma taypinjja janiw kuna lamparas mayamp qhantjjaniti, janirakiw kuna novion arupasa, ni novian arupasa mayampejj istʼasjjaniti. Kuna laykutejj comerciantenakamajj oraqen wali importante jaqet uñtʼatäpjjänwa. Espiritunakampi parlasin*+ jan wali luratanakamampiw taqe markanakar engañjaraktajja. 24 Jïsa, profetanakana, santo jilatanakana,+ oraqen jan sinttʼasis taqe jiwayatanakan wilapajja uka markankänwa”.+

19 Ukatjja alajjpachan walja jaqenakan arnaqasitapjamwa istʼta, jupanakajj akham sapjjänwa: “¡Jah Diosar jachʼañchapjjam!*+ Diosasankiw salvacionasa, jachʼañchatäñasa, chʼamanïñasa. 2 Diosan juzgatanakapajj confiykañawa, cheqaparakiwa.+ Qʼañu jucha* luratanakapampi oraqer jan waltʼaykäna uka jachʼa prostituta warmirojj juchañchjjewa, esclavonakapan wilapjja amparapamp wartkäna uka wilatsa Diosajj vengasjjarakiwa”+ sasa. 3 Ukatjja jankʼakiw payïr kutimpejj akham sasin arnaqasipjjäna: “¡Jah Diosar jachʼañchapjjam!*+ Uka markan nakhantatapatjja jewqʼejj wiñayans wiñayapatak makataskakiniwa”+ sasa.

4 Ukatjja 24 ancianonakasa+ 4 querubín angelanakasa+ tronon qontʼatäkäna uka Diosarojj qonqortʼasisaw akham sasin adorapjjäna:* “¡Amén! ¡Jah Diosar jachʼañchapjjam!”*+ sasa.

5 Ukatjja mä aruw tronot akham sir istʼasirakïna: “Diosan esclavonakapa,+ jupar ajjsaririnaka, jiskʼanaka, jachʼanaka, taqeni Diosasar jachʼañchapjjam”+ sasa.

6 Ukatjja walja jaqenakan arupjamwa istʼta, walja uman suynatapjama ukhamarak wali jachʼat suynir qʼejjo qʼejjonakan suynatapjamwa istʼarakta. Jupanakajj akham sapjjänwa: “¡Jah Diosar jachʼañchapjjam!*+ ¡Taqe Chʼamani+ Jehová* Diosasajj niyaw reyjam apnaqañ qalltjje!+ 7 Kusisipjjañäni, walpun kusisipjjañäni, juparojj jachʼañchapjjañäni, Corderon casarasiñapajj purinjjewa, esposapas wakichtʼatäjjarakiwa. 8 Juparuw suma linot lurata llijkiri, qʼoma isejj churasïna, uka suma lino isejj santo jilatanakan cheqap luratanakapampi sasiwa”+ sasa.

9 Ukatjja angelajj akham situwa: “Ak qellqantam: Corderon casarasïwipan cenajj utjkani ukar invitatanakajj kusisipjjpan”+ sasa. Ukat sarakituwa: “Uka arunakajj Diosan cheqa arunakapawa” sasa. 10 Ukatsti jupar adorañatakiw* nayajj kayup nayraqatar qonqortʼasta. Ukampis jupajj akham situwa: “¡Wal amuyasim! ¡Jan uk luramti!+ Nayajj jumjam esclavokirakïtwa, Jesusjjat yatiyapjjañapäki uka jilatanakamjam esclavokirakïtwa.+ Antisas ¡Diosar adoram!+ Profecianakajj Jesusjjat yatiyañatak amtampi uskutawa”+ sasa.

11 Ukatjja alajjpach jistʼaratwa uñjta, ukanjja mä janqʼo caballo uñjarakta.+ Uka caballjjar qonjjatatäkäna ukajja Suma Phoqeri,*+ Cheqapa+ satawa, jupasti cheqapar juzguiriwa, guerransa cheqapar nuwasiriwa.+ 12 Nayranakapajj aqkir ninar uñtatawa,+ pʼeqepanjja walja coronanakaw* utjaraki. Jupajj mä sutiniwa, uka sutjja janiw khitis yatkiti, jan ukasti jupa sapakiw yati. 13 Jupajj wilamp manchata* isimp isthapitänwa, Diosan Arupa+ sat sutinirakïnwa. 14 Alajjpachankir ejercitonakajj janqʼo caballonakatwa jupar arkapjjarakïna, jupanakajj suma linot lurat janqʼo, qʼoma isinakamp isthapitäpjjänwa. 15 Lakapatjja mä ari jachʼa espadaw mistüna,+ ukhamat ukampi markanakar atacañataki. Jupajj hierrot lurat varampiw markanakar awatini.+ Uvas chʼirwañ lugaransa jupaw uvasanak taksurakini, ukajj Taqe Chʼamani Diosan jachʼa colerasiñapampi sasiwa.+ 16 Isipjjarojja, mä arunjja lankhu charapäki ukjjarojja mä sutimpi qellqjjatatawa, ukasti akawa: reyinakansa Reyipa, tatitunakans Tatitupa.+

17 Mä angelaruw uñjarakta, jupajj intin saytʼatäskänwa. Ukatjja wali jachʼatwa jupajj artʼäna, altnam jalnaqer taqe jamachʼinakarojj akham sasaw säna: “Akar jutapjjam, Diosan jachʼa cenapatak tantachasipjjam.+ 18 Reyinakana, ejercitonakan comandantenakapana, chʼaman jaqenakan aychap manqʼapjjam.+ Caballonakana, uka caballonakjjat saririnakana,+ taqenin aychapa manqʼapjjam, libre jaqëpasa, esclavo jaqëpasa, jiskʼäpasa, jachʼäpasa” sasa.

19 Ukatjja salvaje animalampiru, oraqenkir reyinakampiru, ejercitonakapampiruw uñjta. Jupanakajj caballjjat sarkäna uka contra, ejercitop contra nuwasiñatakiw tantachasipjjäna.+ 20 Uka salvaje animalajja falso profetampi chika katuntatänwa. Uka falso profetajja+ salvaje animalan+ marcapamp marcayasirinakarusa estatuapar adoririnakarusa* salvaje animal nayraqatan señalanak lurasaw engañjäna.+ Salvaje animalasa falso profetasa azufrempi nakhir qotaruw jakkirpach jaqontatäpjjäna.+ 21 Jiltʼirinakajja, caballjjat saririn lakapat mistkäna uka jachʼa espadampi jiwarayatäpjjänwa.+ Jupanakan aychanakapampejj taqe jamachʼinakaw sistʼasipjjarakïna.+

20 Ukatjja mä angelaruw alajjpachat saraqanir uñjta, jupajj mikʼayan*+ llavep aptʼasita, mä jachʼa cadenas aptʼasitänwa. 2 Uka angelajj dragonaruw+ katuntäna, mä arunjja Diablo,+ Supaya*+ satäki uka nayra asiruruw*+ katuntäna, juparusti 1.000 maratakiw ñachʼantarakïna.* 3 Ukatjja mikʼayaruw*+ jaqontäna, ukar llawintasaw sellantarakïna, ukhamat 1.000 maranak tukusiñapkamajj markanakar jan engañjañapataki. Ukatjja mä jukʼa tiempotak antutatäñapawa.+

4 Ukatjja trononakwa uñjarakta, ukan qontʼatanakarojj juzgapjjañapatakiw autoridadajj churasïna. Jïsa, khitinakatejj Jesusjjat yatiyapjjatap layku ukhamarak Diosjjat parlapjjatap layku jiwayata* uñjasipkäna, salvaje animalarusa estatuaparus jan adorapkäna,* paraparusa amparaparusa+ jan marcayasipkäna ukanakan wilapwa* uñjarakta. Jupanakajj jaktanipjjänwa, Cristompi+ chikarakiw 1.000 maranak apnaqapjjäna. 5 Ukaw nayrïri jaktäwejja.+ (Mayni jiwatanakajja,+ 1.000 maranak tukusiñapkamajj janiw jakañ katoqapkänti). 6 Khitinakatejj nayraqat jaktapki ukanakajja,+ kusisitäpjjewa, santöjjapjjarakiwa, janiw jupanakjjarojj payïr jiwañajj+ autoridadanïkiti,+ antisas jupanakaw Diosampina Cristompin sacerdotenakapäpjjani,+ 1.000 maranakaw Cristomp chikajj reyinakjam apnaqapjjarakini.+

7 Kunapachatï 1.000 maranakajj tukuyjjani ukhajja, kawkjantï llawintatäkäna uka lugaratjja Supayajj* antutatäniwa. 8 Jupaw aka oraqen pusi esquinapankapki uka markanakaru, mä arunjja Gog ukhamarak Magog satäpki ukanakar engañjir mistuni, ukhamat guerratak tantachthapiñataki. Jupanakajj lamar qotankir chʼallar uñtat waljanïpjjewa. 9 Oraqpacharuw jupanakajj saratatapjjäna, santo jilatanakan campamentoparu ukhamarak munat markaruw muyuntapjjäna. Ukampis ninaw alajjpachat saraqanisajj jupanakar qʼal nakhantäna.+ 10 Jupanakar engañjaskäna uka Diablojj ninampi azufrempi aqaskir qotar jaqontatänwa, salvaje animalampi+ falso profetampejj ukankapjjarakïnwa,+ ukanwa jupanakajj wiñayans wiñayapataki uruy aruma tʼaqesiyatäpjjani.*

11 Ukatjja mä jachʼa janqʼo trono uñjta, ukansti Diosaw qontʼatäskarakïna.+ Jupa nayraqatatjja oraqesa alajjpachasa escapjjapjjänwa,+ janirakiw jupanakajj jukʼamp uñjjatäjjapjjänti. 12 Ukatjja jiwatanakaruw uñjarakta, jiskʼan jachʼaniw jupanakajj trono nayraqatan saytʼatäsipkäna, rollonakas jistʼarasirakïnwa. Ukampis yaqha rollow jistʼarasïna, ukajja jakañ rollönwa.+ Jiwatanakajja kunanakatï uka rollonakan qellqatäkäna ukarjamaw luratanakaparjam juzgatäpjjäna.+ 13 Lamar qotajja jiwatanakwa entregjjäna, jiwañasa Sepulturasa* ukhamarakiw jiwatanak entregjjäna, sapa mayniw luratanakaparjam juzgatäpjjarakïna.+ 14 Jiwañampi Sepulturampejj* nina qotar jaqontatäpjjänwa.+ Uka nina qotajja,+ payïri jiwañampi sasiwa.+ 15 Khitinakatejj jakañ libron+ jan qellqantatäpkäna ukanakajja, nina qotar jaqontatäpjjänwa.+

21 Mä machaq alajjpachampi mä machaq oraqempwa uñjta,+ nayra alajjpachas nayra oraqes chhaqtjjänwa,+ lamar qotas+ janirakiw utj-jjänti. 2 Ukatjja sagrado markaruw uñjarakta, Machaq Jerusalenaru. Uka markarojj alajjpachata, mä arunjja Diosan ukat saraqanirwa uñjta.+ Jupajj esposopataki suma kʼachachtʼat mä noviar uñtat wakichtʼatänwa.+ 3 Ukatjja tronot akham artʼasinir mä aru istʼarakta: “Diosan tabernaculopajj* jaqenakampi chikäjjewa, jupanakampiw jupajj jakani, jupanakajj jupan markapäpjjarakiniwa. Diosajj jupanakampëjjaniwa.+ 4 Diosajj taqe jachanakapwa nayranakapat picharani,+ janiw jiwañajj jukʼamp utj-jjaniti,+ janirakiw llakisiñasa, jachañasa ni usuyasiñasa jukʼamp utj-jjaniti.+ Kunanakatï nayrajj utjkäna ukanakajj tukusjjewa” sasa.

5 Tronon qontʼatäkäna+ uka Diosajj akham sänwa: “Taqe kunsa machaqatwa nayajj luraskta”+ sasa. Ukatjja akham sarakïnwa: “Qellqantam, aka arunakajja confiykañawa, cheqarakiwa” sasa. 6 Ukatjja akham sarakituwa: “¡Phoqasjjewa! Nayätwa Alfasa Omegasa,* qalltasa tukuyasa.+ Taqe khititejj umat pharjatäki* ukarojja, jakañ churir uma jalsutjja gratisakiw nayajj churäjja.+ 7 Taqe khititejj atipjkani ukarojja, ukanakwa herenciat katoqani, nayajj jupan Diosapäyäwa, jupasti nayan wawajarakïniwa. 8 Ukampis ajjsaririnakasa, Diosar jan confiyirinakasa,*+ qʼañunak lurir jaqenakasa, ajjtaskañanak luririnakasa, jaqe masipar jiwayirinakasa,+ qʼañu jucha* luririnakasa,+ espiritunakampi parlirinakasa,* idolonakar adoririnakasa,* taqe kʼarisirinakasa,+ ninampi azufrempi nakhir qotar jaqontatäpjjaniwa.+ Ukasti payïr jiwañawa”.+

9 Paqallqo pʼujru* platonak aptʼatäpkäna uka paqallqo angelanakat mayniw jutäna, uka pʼujru platonakajj qhepïr paqallqo plaganakampi+ phoqantatänwa, uka angelajj akham sitänwa: “Jutam, noviaruw uñachtʼayäma, Corderon esposaparu”+ sasa. 10 Ukatjja espíritu santon yanaptʼapampiw wali jachʼäki wali altökaraki uka qollur irpitäna. Ukanwa alajjpachata, mä arunjja Diosan ukat saraqanir Jerusalén sagrado marka uñachtʼayitäna.+ 11 Uka markajj Diosan kʼajatapampiw kʼajäna.+ Kʼajatapajj mä suma qalan kʼajatapjamänwa, kunjamtï jaspe* qalajj vidrior uñtat wali qhan kʼajkejja ukhamaw kʼajäna.+ 12 Uka markajj wali jachʼa ukhamarak wali alto murallanakanïnwa, 12 punkunakanirakïnwa. Sapa punkunjja mä angelaw utjäna, uka punkunakarojja Israel markan 12 tribunakapan sutinakapaw qellqkatatarakïna. 13 Inti jalsu toqenjja, kimsa punkunakaw utjäna, alay toqenjja* kimsa punkunaka, aynach toqenjja* kimsa punkunaka, inti jalanta toqenjja kimsa punkunaka.+ 14 Uka markan murallanakapajja, 12 cimiento qalanakanïnwa. Uka cimiento qalanakajja, Corderon 12 apostolonakapan 12 sutinakapanïnwa.+

15 Khititejj nayamp parlkäna ukajja, mediñataki mä qori lawa* aptʼatänwa, ukhamat uka marksa, punkupsa, murallapsa midtʼañataki.+ 16 Uka markajja pusi esquinanïnwa,* largorus anchorus mä medidanikïnwa. Jupajj qori lawampi uka marka midtʼäna ukhajja, niya 2.220* kilometronakwa* midtʼäna. Largorusa anchorusa altorusa uka markajj mä pachpa medidanikïnwa. 17 Ukatjja markan murallapwa mindtʼäna, jaqen medidaparjama ukhamarak angelan medidaparjamajj niya 64 metronakanïnwa.* 18 Markan murallapajj jaspe qalat+ luratänwa, markajj wali suma qorit luratarakïnwa, wali qhana vidrior uñtata. 19 Uka markan murallapan cimientonakapajja, kunayman kasta suma qalanakampi* kʼachachtʼatänwa: nayrïr cimientojj jaspe qalat luratänwa; payïrejj zafiro qalata; kimsïrejj calcedonia qalata; pusïrejj esmeralda qalata; 20 phesqërejj sardónica qalata; sojjtïrejj sardio qalata; paqallqörejj crisólito qalata; kimsaqallqörejj berilo qalata; llätunkïrejj topacio qalata; tunkïrejj crisoprasa qalata; tunka mayanïrejj jacinto qalata; tunka payanïrejj amatista qalata. 21 Uka markan 12 punkunakapajja, 12 perlanakänwa, sapa punkojj mä perlat luratänwa. Uka markan jachʼa thakipajj suma qorit luratarakïnwa, suma qhana vidrior uñtata.

22 Uka markanjja janiw nayajj mä templo uñjkti, kuna laykutejj Taqe Chʼamani+ Jehová* Diosaw uka markan templopajja, Corderos ukhamaraki. 23 Uka markjjar intina, phajjsina qhantʼaniñapajj janiw wakiskänti, kuna laykutejj Diosan kʼajatapaw uka markar qhanjjatäna,+ lamparapajj Corderorakïnwa.+ 24 Uka markan qhanapampiw markanakajj sarnaqapjjani,+ oraqenkir reyinakajj uka markaruw jachʼañchapjjarakini. 25 Uka markanjja janiw arumajj utjkaniti, ukhamajj janiw kunjamatsa punkunakapajj urun jistʼantatäkaniti.+ 26 Markanakan kʼajatapsa jachʼañchäwipsa uka markaruw reyinakajj apapjjani.+ 27 Ukampis kunanakatï qʼañüki, khititejj ajjtaskañanak lurki, engañjirïkaraki ukajja, janiw kunjamatsa uka markarojj mantkaniti,+ jan ukasti khitinakatejj Corderon jakañ rollopan qellqatäpki ukanakakiw mantapjjani.+

22 Ukatjja angelajj jakañ churir umani mä jawir uñachtʼayitu,+ uka jawirajj vidrior uñtat wali suma chʼuwänwa, Diosana ukhamarak Corderon+ tronopatwa misturakïna, 2 jachʼa thakip taypnamwa saraqanirakïna. Jawiran purap thiyapanjja* 12 kuti achoqer jakañ qoqanakaw* utjäna, sapa phajjsiw achoqapjjarakïna. Uka qoqanakan laphinakapasti markanakar qollañatakïnwa.+

3 Diosajj janirakiw uka markarojj maldisjjaniti. Diosampin Corderompin+ tronopasa uka markankaniwa, esclavonakapas Diosaruw servipjjarakini. 4 Jupanakajj ajanupwa uñjapjjani,+ paranakaparus jupan sutipampi qellqatäpjjaniwa.+ 5 Janiw arumajj jukʼamp utj-jjaniti,+ janirakiw lamparan qhanapasa, intin qhanapasa wakisjjaniti, Jehová* Diosaw jupanakar qhanjjatani,+ jupanakajj wiñayans wiñayapatakiw reyinakjam apnaqapjjani.+

6 Angelajj sarakitänwa: “Aka arunakajj confiykañawa, cheqarakiwa.+ Jïsa, profetanak taypi parlkäna+ uka Jehová* Diosaw angelaparojj khitanïna, ukhamat kunanakas mä jukʼa tiempot pasani ukanak esclavonakapar uñachtʼayañataki. 7 Nayajj jankʼakiw jutaskta.+ Khititejj aka rollon profecía arunakap phoqki ukajj kusispan”+ sasa.

8 Naya Juanaw taqe ukanak istʼta, uñjarakta. Kunapachatï taqe ukanak istʼta, uñjarakta ukhajja, kawkïr angelatejj ukanak uñachtʼaykitäna ukan kayunakap nayraqataruw adorañatak* qonqortʼasta. 9 Ukampis jupajj akham situwa: “¡Wal amuyasim! ¡Jan uk luramti! Nayajj jumjam esclavokïtwa, khitinakatejj profetäpki uka jilatanakamjama, khitinakatejj aka rollonkir arunak phoqapki ukanakjam esclavokirakïtwa. Jumajj Diosar adoram”*+ sasa.

10 Ukatjja sarakituwa: “Aka rollon profecía arunakapjja jan sellantamti,* señalat tiempojj jakʼankjjewa. 11 Khititï jan cheqapäki ukajj jan walinak luraskakpan, qʼañüki ukajj qʼañunak luraskakpan, cheqapäki ukasti cheqapar sarnaqaskakpan, Dios nayraqatan santöki ukas santöskakpan.

12 ”‘Nayajj jankʼakiw jutaskta, kuntï nayajj churkä ukwa nayajj apasinkta, ukhamat sapa maynir lurataparjam churañataki.+ 13 Nayätwa Alfasa Omegasa,*+ nayrïrisa qhepïrisa, qalltasa tukuyasa. 14 Khitinakatejj kayukam purir janqʼo isinakap tʼajjsusipki ukanakajj kusisitäpjjewa,+ jupanakaw jakañ qoqanakat*+ manqʼañatakisa markar punkunakapnam mantañatakis derechonïpjjani.+ 15 Anunakasa,* espiritunakampi parlirinakasa,* qʼañu jucha* luririnakasa, jaqe masipar jiwayirinakasa, idolonakar adoririnakasa,* taqe khitinakatï kʼarisiñar munasipki, kʼarisis sarnaqapkaraki ukanakasa anqankapjjewa’.+

16 ”‘Naya Jesusaw angelajarojj taqe ukanak jumanakar yatiyañatak khitanta, ukajja congregacionanakan askipatakiwa. Nayajj Davidan familiapat jutirïtwa,+ jupan wawaparakïtwa, nayajj alwan kʼajtiri warawarätwa’”.+

17 Espiritumpi noviampejj+ “¡jutam!” sasipkakiwa. Taqe khititejj istʼki ukajj “¡jutam!” sasin sarakpan. Taqe khititejj umat pharjatäki* ukajj jutpan.+ Taqe khititejj munki ukajj jakañ churir umatjja gratisak umtʼpan.+

18 “Taqe khitinakatejj aka rollon profecía arunakap istʼapki ukanakaruw nayajj yatiyaskta: maynitejj aka rollon qellqatäki taqe ukanakar kuns yapjjatanejja,+ aka rollon qellqatäki uka plaganakampiw Diosajj jupar yapjjatani.+ 19 Maynitejj aka rollon qellqatäki uka profecía arunakat kunsa apaqanejja, kunanakatejj aka rollon qellqatäki ukanakat janiw Diosajj jupar kunsa katoqaykaniti. Mä arunjja janiw Diosajj jakañ qoqan*+ achupat jupar manqʼaykaniti, janirakiw sagrado markarus+ mantaykaniti.

20 ”Khititejj taqe ukanak yatiyki ukajj akham siwa: ‘Jïsa, jankʼakiw nayajj jutaskta’+ sasa”.

“¡Amén! Jutaskakim, Tatit Jesús”.

21 Tatit Jesusajj wali khuyapayasiñampi taqe santo jilatanakar uñjpan.