5. Sum parltʼasiña

¿KAMSAÑSA MUNI?

Sum parltʼasiñatakejja, awk taykanakasa wawanakasa, kunjamäsipkisa kunsa amuyapjje ukanakatwa parltʼasipjjañapa.

¿KUNATSA WALI WAKISKIRI?

Qʼajjo wayn tawaqonakamp parltʼañajj chʼamakiwa. Jiskʼäsipki ukhajja, taqe kunwa awk taykapar yatiyapjje. Ukampis wayn tawaqöjjapjje ukhajja, janiw jupanakamp sint parljjapjjeti, kunjamäsipkisa kunsa amuyapjje ukas janiw yatisjjeti. Wawanakajj awk taykapat uma jawir khurkatankapkaspas ukhamawa. Wawanakajj janis jiwasamp parlañ munapkaspa ukham amuysna, ukampis ukhaw jupanakajj parlañ wal munasipkaspa.

¿KUNSA LURASMA?

Chʼamachasiñamawa. Chika arumkam parltʼañas wakiskchinejja, chʼamachasiñamawa.

“Awisajj akham sañjamawa: ‘¡Uru jurnalarakis juntüsktanjja! ¿Jichhakit parlañ munta?’ sasa. ¡Ukampis wawan parltʼasiñ munatapat kunjamarak colersnasti! Cheqas taqeniw wawanakasamp parltʼasiñ muntanjja” (Lisa).

“Urut ikintjjañaw gustitu, ukampis awisajj chika arum pasataw wawanakajamp sum parltʼasipjjerïta” (Herbert).

BIBLIAJJ KAMSISA: “Sapa maynis kunatejj jaqe masipatak walïki uk thaqaskakpan, jan jupatakik thaqpanti” (1 Corintios 10:24).

Sum istʼañamawa. Mä chachajj akham siwa: “Awisajj wawanakajajj parlasipkitu ukhajja, nayajj yaqhanak lupʼiskta. Jupanakajj uk amuyapjjewa” sasa.

¿Ukham pasaraktamti? Ukhamajj televisionsa, celularsa, yaqha ukham aparatonaksa jiwtʼayañamawa. Wawaman llakipajj janis jumatak jachʼäkchejja, jupar sum istʼañamawa, ukhamatwa wawamajj kunatï llakisiyki ukajj jumatak wali wakiskirïtap amuyani.

“Wawanakasajj kunjamäsipkisa ukjjat llakisitas yatipjjañapawa. Jan ukajj janiw jiwasamp parlañ munjjapjjaspati, yaqhanakan yanaptʼapwa thaqapjjarakispa” (Maranda).

“Wawanakamajj jan amuytʼasisas parlapkchinejja, janiw ratuk colerasiñamäkiti” (Anthony).

BIBLIAJJ KAMSISA: “Kunjamsa istʼasipkta uk amuyasipjjam” (Lucas 8:18).

Wawanakamamp parltʼasiñamapuniwa. Wawanakajja, yaqhanak lurkasaw awk taykapamp jukʼamp sum parltʼasipjje.

“Nanakajja, viajkasaw wawanakajamp parltʼasipjjta. Uñkatasis parlañat sipansa, ladopar qontʼat sarkasaw jupanakamp jukʼamp sum parltʼasipjjta” (Nicole).

Manqʼaskasaw wawanakamp sum parltʼassna.

“Arumanakajj manqʼaskasaw kuna jan walinakasa, kuna sumanakas uka urun pasapjjetu ukanakat parltʼasipjjta. Ukham parltʼasiñaw familiajar mayachtʼi. Jan waltʼäwinakar saykatañatakis jan sapak amuyasiñatakiw yanaptʼapjjetu” (Robin).

BIBLIAJJ KAMSISA: “Sapa maynis istʼañatakejj jankʼakïñapawa, janiw jan amuytʼasisajj parlañapäkiti” (Santiago 1:19).