Qurit lurat vaca qallu

¡JAN samti! ¿Jichhax aka jaqinakax kamachasipkisa? ¡Vaca qalluruw yupaychasipki! ¿Kunatsa?

Moisesax qullut jan jankʼaki saraqanxipanxa, israelitanakax akham sapxänwa: ‘Moisesarux kunapunix pasxchi, janiw yatktanti. Aka uraqit mistxañataki mä dios lursusipxañäni’ sasa.

‘Walikiwa. Quri aretenakam churapxita’ sasaw Moisesan Aarón jilapax säna. Iyaw sasaw Aaronarux churapxäna. Quri umatatayasinsti mä vaca qall lursüna. Ukat markax akham sänwa: ‘¡Akaw Egiptot apsuri Diosasaxa!’ sasa. Ukat jachʼa fiest lurapxäna, ukat vaca qalluruw yupaychapxäna.

Jehová Diosax uk luraskir uñjasax wal colerasïna. Ukatwa Moisesarux akham säna: ‘Jankʼaki saraqma. Egiptot irpsunit markax jan walinakwa luraski. Kamachinakaj armasaw mä vaca qallu nayraqatan altʼasipxi’ sasa.

Moisesax jankʼakiw qullut saraqanïna. Jakʼachasisasti, ak uñjäna. ¡Vaca qall nayraqatanwa jaqinakax warurtʼasipkäna thuqtʼasipkäna! Moisesax walpun colertʼasïna, ukatwa kamachinak qillqat qalanak jaqtʼasin jiskʼa jiskʼa tʼunjäna. Ukatxa lurat vaca qall katusinxa ninampiw phichkatäna, ukatsti laqʼjam ñutʼjäna.

Sinti jan walpunwa uka markax luräna. Ukatwa, Moisesax mä qhawqhanirux espada apxarusipxam sänxa. ‘Vaca qallur yupaychir jan wali jaqinakax jiwapxañapawa’ sasa. ¡Ukat 3.000 jaqinakaruw jiwarayapxäna! Jehová Dios mayarukiw yupaychañasa janiw yaqha diosanakaruxa, ¿aka sarnaqäwix janit uk uñachtʼaykistu?