Kamachinakap Diosax churi

EGIPTOT mistunxapxäna uka urutxa pä phaxsiw pasxäna, Sinaí qulluruw israelitanakax puripxäna, uka qullux Horeb satarakiwa. Uka qullunwa nayrax nakhir chʼaphi taypit Diosax Moisesar arxayänxa. Israelitanakax uka qullu jakʼanwa mä qhawqha urunak samarapxäna.

Moisesax qulluruw makatäna, israelitanakasti pampan suyapxäna. Israelitanakax istʼapxitaspa ukat wali munat markajäspa ukwa munta sasaw Jehová Diosaxa Moisesar qullun arxayäna. Moisesaxa saraqanisaxa, Jehová Diosan arunakapwa israelitanakaru yatiyäna. Ukat taqiniw Jehová Diosar istʼañ amtapxäna, kunattix markapäñwa munapxäna.

Ukatxa, qullut jiwqʼiw mistüna, walja qʼixu qʼixunakaw istʼasirakïna, ukanaksti Jehová Diosaw utjayäna. Ukatxa israelitanakaruxa akham sasaw säna: ‘Nayätwa juman Jehová Diosamaxa, nayaw Egiptotxa apsunsma’ sasa. Ukat aka kamach churäna: ‘Janiw jumaxa nayat sipana yaqha diosanakarux yupaychätati’ sasa.

Diosax yaqha llätunka kamachinakampwa jan ukax mandamientonakampwa churäna. Ukat markpachaw wal axsarapxäna. Moisesarux akham sapxänwa: ‘Jum parlxayapxita, Diosax jan nanakampixa parlkpanti, jan jiwapxañanakajataki’ sasa.

Ukatsti, Jehová Diosax Moisesarux sänwa: ‘Qullur makatanma. Nayasti qillqat sillpʼa qalanak churäma, ukaruw nayax qillqta kun lurapxañaptï munkta ukxa’ sasa. Ukhamasti Moisesax mayamp qullur makatäna. 40 uruy arumaw ukankäna.

Diosax markapatakix walja kamachinakanïnwa. Uk Moisesax qillqäna. Ukatxa, qillqat sillpʼa qalanakampwa Moisesar churarakïna. Uka qalanakarux Dios kikpaw markapar siskän uka arunak qillqäna. Ukax Tunka Mandamientonaka satarakiwa.

Uka Tunka Mandamientonakax wali wakisirinakawa. Israelitanakar mayni kamachinak churkäna ukanakax ukham wakisirinakarakiwa. Maynïristi akham siwa: ‘Jehová Diosamarusti taqi chuymamampi, taqi amuyumampi, taqi almamampi, taqi chʼamamampiwa munasïta’. Yaqhasti akham sarakiwa: ‘Jaqi masimarusti juma kikparjamaw munasirakïta’. Diosan Yuqap Jesucristoxa, akïr pä kamachinakaw Israelar churaskän uka kamachinakat wali jachʼaxa sänwa. Ukat jutïrinwa Diosan Yuqapatsa yatichäwinakapatsa jukʼampi yatxataskañäni.