¿Jiwatanakasatakix kuna suytʼäwis utji?

“¿Mä jaqisti jiwxasinxa wasitat jaktanxaspati?”, sasaw nayra tiemponxa Job chachax jisktʼasïna (Job 14:14). Aka Uraqpachpan wali sum jakasiñatakiw munat familiaranakamampi wastat jikisxäta sapxiristam ukhaxa, ¿kunjams jikxatasisma?

Chiqpachansa, Bibliax akham siwa: “Ukampisa juman jiwirinakaxa jakatatapxaniwa” sasa. Ukat sarakiwa: “Aski jaqinakax uraq katuqapxani, wiñayatakiw ukan jakapxarakini” sasa (Isaías 26:19; Salmo 37:29).

Uka arsutanakar atinisiñatakixa aka jisktʼanakar qhanañchañasawa: ¿Kunatsa jaqix jiwi? ¿Kawkinkapxis jiwatanakaxa? Ukat ¿kunatsa jaktanipxapuniniw sasax sisna?

Kunatsa jiwtanxa ukat jiwatat jakañax utjaskakpachati

Jaqinakan jiwapxañapax Diosan amtapanxa qalltatpach janiw utjkänti sasaw Bibliax qhanañchi. Diosaw Adán chacharus Eva warmirus luräna, ukat Edén sat mä suma huertoruw usküna, ukatsti wawanakanïpxan ukat aka Uraq mä suma huertor tukuyapxam sasaw Diosax jupanakar sarakïna. Kamachinakap jan istʼapkasapän ukhakiw jiwapxasapänxa (Génesis 1:28; 2:15-17).

Adanampi Evampix Diosan munasiñapxa janiw askirjam uñjapkänti ukatwa jan istʼasisax ukham tʼaqhisiñar puripxäna, kunjamtï Diosax siskäna ukhama. “Kuna laqʼata luratäktatix ukar kuttañam[awa], laqʼätawa, laqʼarurakiw kuttäta” sasaw Diosax Adanar säna (Génesis 3:19). Adanax janïr luratäkän ukhaxa laqʼakïnwa mä arunxa janiw utjkänti. Ukham jan istʼasis juchachasitapatxa, Adanax laqʼarurakiw kuttʼañapäna, mä arunxa jiwañapänwa.

Ukhamasti jiwxtan ukhaxa janiw jakañax utjxiti. Uka tuqitxa Bibliax akham siwa: “Juchan waxtʼasiñapasti jiwañawa, ukampis Diosan waxtʼäwipax wiñay jakañawa” sasa (Romanos 6:23). Jiwatanakax janiw kuns amuyxapxiti sarakiwa, “khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti” sasa (Eclesiastés 9:5). Ukat jiwatanakatxa Bibliax saskakiwa: “Jiwxapxi ukapachaxa, laqʼaruw tukxapxi, ukürpachaw amtanakapax tukusxi” sasa (Salmo 146:3, 4).

Adanampi Evampikiw Diosan mayitaparux Edén huerton jan istʼapkänti, ukat ¿kunatarak jiwasar jiwañasti waktʼawayistu? Kunattix taqiniw Adanax juchachaskän uka qhipat yuriwaytanxa, ukatwa taqinix juchsa jiwañsa katuqawaytanxa. Bibliax akham siwa: “Kunjämatix mä sapa jaqi [Adán] tuqi juchax aka uraqir mantankixa, ukat jiwax uka jucha laykurak utjixa, ukhamarakiw jiwax taqi jaqirux katuntawayi” sasa (Romanos 5:12; Job 14:4).

Inas maynix akham jisktʼasirakchispa: “Jiwatat jakaskakiñatakixa, ¿janit jaqinakax jan jiwir almanïpki?” sasa. Waljaniw ukham yatichapxi, jiwañax mä punkjamaw yaqha jakäwir apistu sasa. Ukampis Bibliax janiw ukham yatichkiti. Jan ukasti jiwasaw almätanxa sasaw yatichi, mä arunxa jakir jaqiw almätanxa (Job 34:14,15; 1 Corintios 15:45, Machaka Testamento). Bibliax sarakïwa: “Uka kuttayanirix juchararan almapxa jiwañat qhispiyiwa” sasa (Santiago 5:20). Biblianxa janiw kawkhansa almax janiw jiwkiti jiwatatxa jakaskakiwa sasax yatichkiti.

Kunjamatsa jaqinakax wasitat jaktanipxaspa

Kunapachatï juchampi jiwañampix aka Uraqir mantankän ukhaxa, jaktäw tuqiw wasitat jaqinakar jakañ churä sasaw Diosax yatiyatayna. Uka tuqitxa Bibliax akham siwa: ‘Abrahamax yatïnwa Diosax [Isaac wawapar] jiwatat jaktayañataki chʼamanïtapa’ sasa (Hebreos 11:17-19). Abrahaman atinisitapax janiw ukhamakïkänti, kunattix Bibliax taqi chʼaman Diosatxa akham siwa: “Janiw jiwatanakan Diosapäkiti, jan ukasti jakirinakan Diosapawa, jupatakisti taqiniw jakasipki” sasa (Lucas 20:37, 38).

Jïsa, Taqi Chʼamani Jehová Diosax janiw ajllki ukanakar jaktayañataki chʼamanikïkiti jan ukasti taqi chuymaw ukham lurañ muni. Jesusax akham sänwa: “Jan muspharapxamti ak arsutaxatxa, horasax purininiwa taqi jiwatanakasti arupx istʼapxaniwa. Ukatsti uka jiwatanakax jaktapxaniwa” sasa (Juan 5:28, 29; Hechos 24:15).

Uka qhipatsti, Jesusax Naín sat markat mä jiwatar kallasinkir uñjäna. Jiwatax mä viuda warmin sapa yuqapänwa. Uka warmir wali llaktʼat uñjasax khuyaptʼayasïnwa; ukat jiwatar jakʼachasisax akham sänwa: “Wayna, nayaw sisma, ¡sartam!” sasa. Waynasti qunthapxänwa, ukat Jesusax mamaparuw katuyxäna (Lucas 7:11-17).

Ukatxa, Jesusax Jairon utapankaskän ukhaxa jaqinakax wal jacharasipkäna. Kunattix tunka payani maran imill wawapaw jiwxatayna, Jairox Judea sinagogan mä jilïrinwa. Jairon utapar purisinxa kawkinkäntï uka jiwataxa ukar jakʼachasisin akham sänwa: “Wawa ¡sartasim! sasa”. ¡Ukat jaktanxänwa! (Lucas 8:40-56.)

Qhipatxa Jesusan Lázaro sat amigopaw jiwxäna. Jesusax Lazaron utapar purïna ukhaxa, pusi uru jiwatäxänwa. Marta kullakapax wali llakitäskchïnsa, suytʼäwinïnwa, ukatwa akham säna: “Jiwatanakan qhipa urun jaktañapxa yattwa” sasa. Ukat Jesusax imäwir sarasinsti uka qala atiqapxam sasaw säna, ukat akham sasaw artʼarakïna: “¡Lázaro, mistunim!” sasa. ¡Ukatsti Lazarox mistunïnwa! (Juan 11:11-44.)

Ak amuytʼma, ¿Lazarox pusi uru jiwatäkasax kunjamans jikxataspachäna? Janiw alaxpachankaskäyätwa jan ukax infiernonkaskäyätwa sasax siskänti, ukhamäsapän ukhaxa yatiyasapänwa. Ukhamaxa, Lazarox jiw ikkaspäns ukham jiwatänwa, ukat janitï Jesucristox jaktaykasapänxa, “jiwatanakan jaktaniñapkamaw” ukham jiwatakïskasapäna.

Chiqansa, Jesusan milagronakapax janiw wiñayatakïkänti, kunattix jaktaykän uka jaqinakax wasitat jiwxapxarakïna. Ukampis Diosan chʼamapampixa, ¡jiwatanakax jaktanipxaspawa!, ukwa khä nayra patak maranakanxa Jesucristox uñachtʼayäna. Ukhamaxa, kunjamsa Diosax aka Uraqi Apnaqxani ukhax taqi jiwatanakax jaktanipxani ukwa Jesusan milagronakapax uñachtʼayäna.

Mä munat familiarax jiwxi ukha

Jiwañax mä uñisirjam arknaqistu ukhaxa, suytʼäwinisktansa wal llakistanxa. Abrahamax Sara warmipan jaktañapxa yatïnwa iyawsäwinirakïnwa ukampis Biblianxa akham siwa: “Abrahamasti warmipan jiwatapatxa wal jacharakïna” sasa (Génesis 23:2). Lazarox jiwkän ukhaxa, ¿kunjamas Jesusax jikxatasïna? “Llakitaw uñjasïna, chuymapsti chʼallxtayasirakïnwa”, ukat “jachänwa” (Juan 11:33, 35). Ukhamaxa, mä munat familiasan jiwatapat jachktan ukhax janiw jiskʼa chuymätas uñachtʼayktanti.

Mä wawax jiwxi ukhaxa wali llakiñaw utjaspa, ukampis mä taykatakix jukʼamp llakiwa. Ukatwa, mä taykax wali llakita jikxatasispa sasaw Biblianx saraki (2 Reyes 4:27). Awkis llakisirakispawa. Kunapachatï Rey Davitan Absalón wawapax jiwxän ukhaxa, wali llakitaw jupax akham säna: “¡Nayaw juma lanti jiwañ muniriskayäta!” sasa (2 Samuel 18:33).

Ukhamasti, jumatï jiwatanakax jaktanipxaniw sas atinistaxa, llakinakarux atipjasmawa. Bibliax akham siwa, “jani jumanakax mayninakjam llakisipxañamataki jan kuna suytʼañanjama” sasa (1 Tesalonicenses 4:13). Wal llakisiñat sipansa, jumax Diosaruw oración tuqix jakʼachasïta, Bibliansti akham sarakistuwa: ‘Jupaw chʼaman tukuyätam’ sasa (Salmo 55:22).

Jiskʼa tʼaqanakaxa Qullan Arunaka Bibliat apstʼatawa.