9 yatichäwi
Kunjamsa ‘qhipa urunakankatas’ yattanxa
1, 2. ¿Chiqpachapunit qhipa urunakan jakasktan ukxa kunjamats yatsna?
DIOSAN Apnaqäwipax niyaw jaqin apnaqäwinakaparu, jan waltʼäwinakaru ukat tʼaqhisiñanakaru tukjani, ¿kunjamatsa uk yattanxa? ¿Chiqpachapunit qhipa urunakan jakasktanxa?
2 Jesucriston arkirinakapax uk yatiñ munapxäna. Ukatwa akham sas jisktʼapxäna: ¿“Kawkïrïnis chimpuxa” jumax Apnaqäwimankxäta ukhaxa, ukat “akapach tukuskan uka urutsa”?, sasa (Mateo 24:3). Uraqpachanwa jan waltʼäwinakax utjani sasaw Jesusax sum qhanañchäna, ukhamatwa aka pachan ‘tukuya horasapätapasa’, ‘qhipa urunakätapasa’ yatisiñapäna (Daniel 11:40; 2 Timoteo 3:1). ¿Uka chimpunak jichhürunakan uñjtanti? Jïsa, ¡uñjtanwa!
Jachʼa chʼaxwäwinaka
3, 4. Kuntï Jesusax arsuwaykäna ukaxa, ¿kunjamsa phuqasiski?
3 “Mä jachʼa markax yaqha jachʼa marka contraw nuwasini, mä markasti yaqha marka contrarakiw sartani” sasaw Jesusax satayna (Mateo 24:7). 1914 maranwa, jachʼa markanakax yaqha markanak contra nuwasiñatak saytʼasipxäna, ukham nuwasiñax janipuniw nayrax utjkänti. Nayra sarnaqäwinakat yatxattʼat jaqinakax uka jan waltʼäwirux Jachʼa Chʼaxwäwi sasaw sutiyapxatayna. Uka Nayrïr Jachʼa Chʼaxwäwjamaxa, janipuniw ukham chʼaxwäwix utjkänti. Niya 20.000.000 soldadonaka ukat yaqha jaqinakampiw jiwarapxäna, janipuniw yaqha chʼaxwäwinakanxa ukham jiwarapxirïkänti.
4 Nayrïr Jachʼa Chʼaxwäwiw qhipa urunakankxatas uñachtʼayistu mä chimpükaspas ukhama. Jesusax uka tuqitxa akham sasaw satayna: “Akanakasti jachʼa tʼaqhisiñan qalltapakïskiwa” sasa (Mateo 24:8). Ukhamäskapunïnwa, kunattix Payïr Jachʼa Chʼaxwäwinxa jukʼamp walja jaqinakaw jiwarapxäna, niya 50.000.000 soldadonak ukat yaqha jaqinakampiw jiwarapxäna. 1900 maranakanxa, 100.000.000 jaqinakaw yaqha chʼaxwäwinakan jiwarapxaraki, ¡janipuniw nayra chʼaxwäwinakanxa ukham jiwarapkänti! Jaqix jupa pachpa apnaqasiñ laykux ukham jan waltʼäwinakaruw puriwayi.
Yaqha chimpunaka
5-7. ¿Kuna chimpunakas qhipa urunakankatas uñachtʼayistu?
5 Jesusax yaqha chimpunakatwa arsuwayatayna, “utjaniwa jachʼa uraq khathatinaka, manqʼat awtjayasiñanaka, ukhamarak usunaka taqi chiqana” sasaw säna (Lucas 21:11). 1914 marat jichhakamax jan waltʼäwinakakiw utjawayi, ukhamatwa uka arsutapax sum phuqasiski.
6 Sapa kutiw uraq khathatinakax utji ukan walja jaqinakarakiw jiwarapxi. Nayrïr Jachʼa Chʼaxwäwi qhipatxa, gripe española satäkis uka usuxa, niya 20.000.000 jaqinakwa jiwarayi; yaqhipasti, 30.000.000 jilaw jiwarapxi, sasaw sapxi. SIDA usux waranq waranqa jaqinakaruw jiwarayaski ukat jutïrinsa millón millonaruw jiwarayani. Sapa maraw chuyma usumpi, cancerampi ukat yaqha usunakampi jaqinakax jiwarasipki. Yaqhipasti manqʼatjamarakiw jiwarasipki. 1914 marat aksaruxa, Apocalipsis libron parlki uka ‘caballor latʼxatatanakax’ jachʼa chʼaxwäwinakampi machʼanakampi ukat usunakampix jan jaktʼkañ jaqinakaruw jiwarayapxi.
7 Lunthatasiñanakasa jan waltʼäwinakasa taqi markanakanwa sapürutjam jilxattaski, uka tuqit Jesusax akham sasaw satayna: “Ñanqha luräwi mirtatap laykusti, waljanin munasiñapaw thayarani” sasa (Mateo 24:12, MT).
8. ¿Kunjamsa 2 Timoteo 3 jaljan qillqatäki uka profecianakax jichhürunakan phuqasiski?
8 Ukampisa, sarnaqäw tuqitxa akham sasaw Biblian profecianakapax säna: “Yatiñamarakiwa, qhipa urunakanxa jan wali tiemponakaw jutani. Jaqinakax michʼaw tukupxani, qullqi chuymaraki, jachʼa jachʼaw tukupxani, jilamp parlirinakaraki. Diosat jan wali parlapxani, awkinakaparus janiw istʼkxapxaniti, jan yäqasirïnakäpxaniwa, Diosar arkañarus janirakiw jayskxapxaniti. Jan munasiñanïpxaniwa ukhamarak jan khuyapayasiñani, arunak apnaqirinaka, jan wali luräwinakapxa janiw apanukupkaniti, wali qhurunakäpxaniwa, aski luräwinakan uñisirinakaparakïniwa. Aljantasirïpxarakiniwa, jan axsarasaw kuna jan walsa arsupxarakini, jachʼa jachʼa tukuñampi phuqhantatäpxarakiniwa, jupanakan pachpa munañanakapakwa thaqapxani Diosan munañap thaqañat sipansa. Suma Dios chuymäkaspas ukhamaw tukupxani, ukampis chiqpach Diosar arkañan chʼamapxa apanukupxaniwa [...]. Ukampis jan wali jaqinakax ukhamarak sallqjirinakasa jan walit jukʼamp jan waliruw sarapxani” (2 Timoteo 3:1-3). Taqi ukanakax uñjkataw phuqasiski.
Kunatsa jan waltʼäwinakax utji
9. Qhipa urunak qalltkasaxa, ¿kunasa alaxpachan utjawayi?
9 Yaqha jan waltʼäwiw 1914 maranxa utjarakïna. Uka urunakanxa kunjamtï Apocalipsis libron siskixa, “mä jachʼa nuwasiñaw alaxpachanxa utjäna. Arcángel Miguelasti angelanakapampi saytʼasisinxa uka dragonampiw nuwasïna, Dragonampi angelanakapampisti saytʼasipxarakïnwa, ukampis janiw atipjapkänti, alaxpachansti utjañanakax janiw jupanakatakix lugarax utjkxänti. Ukhamax uka dragonax jaqunukutäxänwa alaxpachatxa. Uka dragonapï nayrapacha uka jachʼa katarïnxa, ukasti Supaya, Satanás satarakiwa, juparakiw aka uraqin jaqinakarux wali sallqjañanak luri. Jupampi angelanakapampisti aka uraqiru jaqtanitäxapxänwa” (Apocalipsis 12:7-9).
10, 11. Supayampi saxranakampi aka Uraqir jaquqanitatxa, ¿kuna jan waltʼäwinakakis uñjawayi?
10 ¿Kunas uraqinkirinakatakix utjawayi? Profeciax akham saskakiwa: “¡Wali llakisiñarakiw uraqin ukhamarak qutan utjirinakatakixa! Supayasti jumanakan ukaruw wali colerat juti, tiempopan jukʼakïtapa yatisina” sasa. Jïsa, Supayax tiempopan jukʼakïtapa yatiwa, ukatwa janïr apnaqäwip tukuskipanxa, jaqinakar Diosat jithiqtayañatakix wal kuns luraskaki (Apocalipsis 12:12; 20:1-3). Jan walinakakwa uka angelanakax amtaparjam sarnaqasax lurasipki. 1914 marat aksaruxa, Uraqix jan waltʼäwinakampikiw phuqantatäski.
11 Jichhürunakatxa Jesusax akham sataynawa: “Sustjasiñanakampi ukhamaraki jachʼa unañchanakampiw uñjasini” (Lucas 21:11).
Saxranakan ukat jaqinakan apnaqäwipax niyaw tukusxani
12. Janïr aka pacha tukuskani ukaxa, ¿kawkïr profecias phuqasini?
12 ¿Qhawqha profecianakas phuqasiñampïski? ¡Jukʼakïxiwa! Qhip qhipa urunakan phuqasir mä profeciax akawa: 1 Tesalonicenses 5:3 jiskʼa tʼaqanxa akham siwa: “Kunapachatix jaqix akham siskani: ‘Taqi kunas sumakïskiwa, janiw kunas paskaniti’ sasa, ukkhawa akatjamata jupanakxaru tʼunjäwix jutani” sasa. Ukhamasti, ‘kunapachatix jaqix ukham siskani’ ukhaw akapachan tukusiñapax qalltani. Kunapachatï jaqinakax sumankasipkäni ukhaw akatjamat tʼunjatäpxani.
13, 14. ¿Kuna jan wali urunakatsa Jesusax parlatayna, ukat kunjamsa tukusiñapa?
13 Supayamp apnaqat aka pachax niyaw tukusxani. Mä jachʼa tʼaqhisïwimpiw tukusini, kunjamtï Jesusax siskatayna ukhama, jupax akham sataynawa: “Ukürunakanxa walja tʼaqhisiñanakaw utjarakini. Ukham tʼaqhisiñsti janiw jichhürkamax khitis uñjkiti aka uraqi luraski ukürutpacha, ni uka pasatats utjkarakiniti” sasa (Mateo 24:21).
14 Jachʼa tʼaqhisïwix Armagedón Diosan jachʼa chʼaxwäwipanwa tukusini. Daniel profetax uka pachanxa Diosaw, “taqi yaqha reinonakarux tukjani” sasaw säna. Diosat jithiqtat akapach apnaqirinakan tukusïwipäniwa. Alaxpachankir Apnaqäwikiw taqi kunatï uraqin utjki ukanakxa uñjxani. Daniel profetax akham sasaw satayna, “Janipuniw [...] yaqha markanakampixa” apnaqayxaniti, sasa (Daniel 2:44; Apocalipsis 16:14-16).
15. ¿Kunas Supayampir saxranakapampir kamachasini?
15 Uka pachanxa, janiw Supayan luräwinakapas ni saxranakan luräwinakapas utjxaniti. Uka qallasir angelanakarux jan markanakar ‘sallqjañapatakiw’ chhaqtayatäpxani (Apocalipsis 12:9; 20:1-3). Jan mayampitakiw tʼunjatäpxani. Jaqinakax wali kusisitaw ukham tʼaqhisiñanak jan utjipanxa jikxatasipxani.
¿Khitinakas jakasipkakini? ¿khitinakas jiwapxarakini?
16-18. Aka pachan tukusïwipatxa, ¿khitinakas jakasipkakini ukat khitinakas jiwapxarakini?
16 Kunapachatï Jehová Diosan taripañ urupax jutkani ukhaxa, ¿khitinakas jakasipkakini? ¿Khitinakas jiwapxarakini? Khitinakatï Diosan Apnaqäwip iyawsapki ukanakakiw jarkʼaqatäpxani ukat jakasipkakini siw Bibliaxa. Khitinakatï Diosan Apnaqäwipar jan iyawsapki ukanakarux janiw jarkʼaqatäpkaniti, jan ukasti Supayamp chikaw tʼunjatäpxani.
17 Proverbios 2:21, 22 jiskʼa tʼaqanakax akham siwa: “Aski luriri qʼuma jaqinakasti, [Diosan Apnaqäwipar iyawsirinakasti] aka uraqinwa wiñayatak jakapxani. Ukampis jan wali sarnaqir jaqinakasa, [Diosan apnaqäwipar jan iyawsirinakasa] jan sum phuqhasa sarnaqirinakasa, aka uraqitxa apanukuta tukjatäpxaniwa” sasa.
18 Salmo 37:10, 11 jiskʼa tʼaqanakanxa akham sarakiwa: “Akat mä jukʼa urunakarux ñanqha lurir jaqinakax chhaqtxaniwa; jupanakar thaqkätasa, janiw jikxatkätati; llampʼu chuymaninakasti uraq katuqapxani, jilarkir sumankañampiw kusisipxarakini” sasa. Salmo 37:29 jiskʼa tʼaqax akham siwa: “Aski jaqinakax uraq katuqapxani, wiñayatakiw ukan jakapxarakini” sasa.
19. ¿Kuna iwxtʼanakarus sum istʼañasa?
19 Salmo 37:34 jiskʼa tʼaqax siwa: “Tatitur taqpach chuymamp suytʼam, jupar jaysarakim, jupaw uraq katuqañamatakix chʼamañchätam, ñanqha luririnakan tʼunjasïwip uñjarakïta” sasa. Salmo 37:37, 38 jiskʼa tʼaqanakanxa sarakiwa: “Aski jaqir uñtam, suma jaqir uñjam: jutir jakañapax sumankañ jakañaniwa; ñanqha luririnakasti tukjatäpxaniwa, jutïr pachpa jakañapaw tʼunjaskani” sasa. Uka suma iwxtʼanakaruw sum istʼañasa
20. ¿Kunatsa wali kusisit jikxatastanxa?
20 Niyaw jan waltʼäwinakasa tʼaqhisiñanakasa tukusxani uk yatisaxa, Diosax sum jakasiñas muni sasax wali chuymañchtʼataw jikxatastanxa. Uka profecianakax niyaw phuqasxani, uk yatisax wal kusistanxa.
[20 janan fotopa]
Bibliaw qhipa urunakan ‘chimpunakat’ parläna
[22 janan fotopa]
Khitinakatï Diosan apnaqäwipar jan iyawsapki ukanakax niyaw Armagedonan tukjatäpxani. Khitinakatï iyawsapki ukanakax suma Uraqinwa wiñay jakasipxani