8 yatichäwi

Diosan amtapax niyaw phuqasiski

1, 2. ¿Diosax jan waltʼäwinaka ukat tʼaqhisiñanak tukjañatakix kunsa amtäna?

WARANQ waranqa maranakaw jaqinakamp saxranakampix apnaqasiwayapxi, ukampis jan waltʼäwinakaruw jaqinakarux aptʼawayapxi. Ukampisa, Jehová Diosax janiw ukhamak tʼaqhisiñanak uñjkiti. Jan ukasti, saxranakampit jan waltʼäwinakampit jaqinakar qhispiyañatakiw wakichaski.

² Kunapachatï Edenan qallasipkatayna ukhaw Diosax mä apnaqäwi uttʼayañatakix arsuwayatayna, uka apnaqäwiw aka Uraqxa mä paraisor jaqinakatak tukuyañapäna (Génesis 3:15). Uka qhipatsti, Jesusaw Diosan arunakapat yatiyasax uka Apnaqäwit yatiyarakïna. Uka Apnaqäwikiw jaqinakatak chiqpach suytʼäwixa, sasaw qhanañchäna (Daniel 2:44; Mateo 6:9, 10; 12:21).

3. Jesusax aka Uraq apnaqkani uka tuqitxa, ¿kamsänsa ukat kunatsa?

³ Diosan Apnaqäwipax alaxpachatwa apnaqaniñapäna, ukatwa Jesusax akham säna, “Alaxpachankir Apnaqäwi” sasa. (Mateo 4:17, NM) Ukat ‘Diosan reinopa’ sasaw sarakïna, kunattix Diosaw uka Apnaqäw uttʼayañapäna (Lucas 17:20). Nayra waranq maranakanxa, Diosaw khitinakas uka Apnaqäwin apnaqapxani ukat kunsa lurapxani ukxa, mä qhawqha jaqinakamp qillqayatayna.

Aka Uraqin machaq Apnaqiripa

4, 5. ¿Kunjamsa Diosax Jesusar ajllitapxa uñachtʼayäna?

⁴ Khitis Diosan Apnaqäwipan apnaqani uka tuqit profecianakax Jesusanwa phuqasiwayi, ukat aksaruxa, niya pä waranq maranakaw pasawayxi. Diosax alaxpachat aka Uraqir Apnaqañapatakix Jesusaruw ajllitayna. Ukat Juparakiw jiwatatsa alaxpachan wiñay jakañapatakix jaktayäna. Uka jaktäwipxa waljaniw uñjapxäna (Hechos 4:10; 9:1-9; Romanos 1:1-4; 1 Corintios 15:3-8, NM).

⁵ Ukatsti, Jesusax “Diosan kupïxapan quntʼasiraki” (Hebreos 10:1). Ukanwa, alaxpachankir apnaqäwipan apnaqirit uttʼayatäñkam suyaskäna. Kunjamtï Salmo 110:1 jiskʼa tʼaqan siski ukaw phuqasïna, ukan akham siwa: “Kupixaxar quntʼasim, timanakamar [takxatañamkama, NM]” sasa.

6. ¿Kunjamsa Jesusax kunatï apnaqirïñatakix wakiski uk phuqatap uñachtʼayäna?

⁶ Jesusax aka Uraqinkäna ukhaxa, kunatï apnaqirïñatakix wakiskäna ukwa uñachtʼayäna. Jan waltʼäwinsa arknaqatasa, janipuniw Diosat jithiqtkänti. Uk lurasaxa, Supayan kʼarïtapwa uñachtʼayäna, jupax akham sasaw satayna, janiw khitis yantʼatax Diosar luqtxaniti sasa. Diosax janiw jan juchan jaqi lurasax pantjaskänti, ukwa Jesusaxa ‘qhipa Adanjamax’ jan ukax jan juchani jaqjamax uñachtʼayäna (1 Corintios 15:22, 45; Mateo 4:1-11).

7, 8. Jesusax aka Uraqinkäna ukhaxa, ¿kunsa lurawayatayna, ukat kunsa ukampix uñachtʼayäna?

⁷ ¿Khiti apnaqirisa kuna askinaktï Jesusax jukʼa maranakan lurkäna ukanak luraspa? Jesusax Diosan chʼamap katuqasaxa, usutanakarusa suchunakarusa juykhunakarusa uqaranakarusa amutunakarus qullänwa. ¡Jiwatanakarusa jaktayänwa! Ukhamasti, ukanakwa ukat jukʼamp askinakwa lurani (Mateo 15:30, 31; Lucas 7:11-16).

⁸ Jesusax aka Uraqinkäna ukhaxa walja askinakpunwa luräna, ukatwa Juan arkiripax akham satayna: “Utjarakiwa waljanakampi Jesusan luratanakapaxa. Sapa mayatix qillqasispaxa, amuyataxa uka qillqatanakax aka uraqpachatsa jilaraspawa” sasaa (Juan 21:25).

9. ¿Kunatsa llampʼu chuymani jaqinakax Jesusar jakʼachasipxäna?

⁹ Jesusax khuyaptʼayasirïnwa, ukat jaqinakarus munasirakïnwa. Pisin jakasirinakarusa jan waltʼäwin jikxatasirinakarusa yanaptʼänwa, ukat qamirinakarus jan ukax aytat jaqinakarus janirakiw jiskʼachkänti. Llampʼu chuymani jaqinakax Jesusan aka arunakaparuw istʼapxäna: “Nayar jutapxam taqi qarjatanaka jatjatanaka, nayaw [samarañ churapxäma]. Nayan yugoxa apapxam, ukatsti nayat yatiqasipxarakita. Nayasti llampʼu chuymani, altʼat chuymanirakïtwa, ukatwa almaman samarañapxa jikxatapxäta. Nayan yugoxasti jasa apañakiwa, [qʼipijasti] sinti phisnakirakiwa” (Mateo 11:28-30). Diosar axsarir walja jaqinakaw jupar jakʼachasipxäna ukat Apnaqäwipsa munapxarakïna (Juan 12:19).

Jesusamp chik apnaqirinaka

10, 11. ¿Khitinakas Jesusamp chik apnaqapxani?

¹⁰ Kunjamtï jaqin apnaqäwipanxa yanapirinak utjkixa, ukhamarakiw Diosan Alaxpachankir Apnaqäwipanxa yanapirinakax utjani. Jesusamp chikax yaqhanakaw Uraqxar apnaqapxarakini, ukatwa Jesusax jupamp chik sarnaqirinakarux nayampiw aka uraqirux apnaqapxäta sasax satayna (Juan 14:2, 3; Apocalipsis 5:10; 20:6).

¹¹ Ukhamasti, Jesusamp chik apnaqapxañapatakiw jaktʼkañ jaqinakar alaxpachan jakapxañapataki jaktayasiraki. Jupanakaw Diosan Apnaqäwipanxa, askinak wiñayatak aka Uraqirux apanipxani (2 Corintios 4:14; Apocalipsis 14:1-3). Kunjamtï uñjktanxa, Jehová Diosax tiempompiw khitinakas uraqir apnaqapxani ukxa yatiyxäna.

Jaqinakan apnaqäwipax tukusxaniwa

12, 13. ¿Kunsa Diosan Apnaqäwipax lurañampïski?

¹² Kunatï aka qhipa maranakan lurasiwayki ukanakxa, sumwa Diosax uñjawayi. Kunjamtï 9 yatichäwin uñjkañänixa, alaxpachankir apnaqäwipanxa Cristow apnaqirjam 1914 maran uttʼasiwayi sasaw Biblian profecianakapax qhanañchi, ukatxa niyaw Supayan apnaqäwinakapxa tʼunjani. Uka apnaqäwix ‘timasirinakar atipjañatakix’ wakichtʼatawa (Salmo 110:1, 2).

¹³ Uka tuqitxa Daniel 2:44 jiskʼa tʼaqanxa akham siwa: “Uka reyinakan [jichha pach apnaqirinakan] apnaqañapkamasti, alaxpachankiri Diosax [alaxpachan] mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampixa, jan ukasti jupaw [Diosan Apnaqäwipaw] taqi yaqha reinonakarux tukjani, wiñayan wiñayapaw uka reinox utjarakini” sasa.

14. Jaqin apnaqäwinakapax tʼunjatäxani ukhaxa, ¿kuna askinaksa Diosax apanini?

¹⁴ Ukham jaqin apnaqäwinakap tʼunjasax Diosan Apnaqäwipakiw Uraqpach apnaqxani. Alaxpachat apnaqasxani ukhaxa, janiw jaqin amuyunakapamp mayjtʼayatäxaniti. Alaxpachan Diosar katuyatäxaniwa, kawkhantï apnaqäwix uttʼayatäkan ukharuw kuttʼani. Ukhamax Diosamp apnaqataxa, janiw khitis kʼari yupaychäwinakampisa jaqin yatichäwinakapampisa ni politiconakampisa sallqjayasxaniti. Janiw ukanakxa utjayxaniti (Mateo 7:15-23; Apocalipsis 17-19).

[Qhanañchäwinaka]

[18 janan fotopa]

Jesusax aka Uraqinkkäna ukhaxa, usutanakaruw qulläna ukat jiwatanakarus jaktayänwa, kuntï jutïrin lurkani uk uñachtʼayañatakiw luräna

[19 janan fotopa]

Diosan alaxpachankir Apnaqäwipax jaqin taqi kast apnaqäwinakapwa wiñayataki tʼunjani