Wali llakitanakataki chuymachtʼäwi
“Diosan lurat uraqix wal tʼaqhisiski kunjamtix mä wawachasir warmix warariski ukhama” (Romanos 8:22). Uka arunakan qillqasitapatxa 1.900 maranakaw saraqawayxi, ukampis uka tiemponxa ukhamarakiw wali tʼaqhisiñanakax utjäna. Ukatwa cristianonakatakix akham iwxtʼax qillqasïna: “Mayjtʼatanakarux chʼamanchtʼapxam” sasa (1 Tesalonicenses 5:14).
Jichhürunakanxa jaqinakan llakinakapax sintipunïxiwa, ukhamarakiw llakitanakax jukʼamp jiljattasipki. Ukhamax ukanak yatisaxa, ¿muspharsnati? Janiwa, kunattix Bibliax akham siwa: “Qhipa urunakanxa jan wali tiemponakaw jutani” sasa (2 Timoteo 3:1-5). Qhipa urunakanxa, “Uraqinkir markanakax mayjtʼapxaniwa” sasaw Jesucristox säna, ukat saskakïnwa, ‘jaqix axsarañatsa ukat kunanaktï aka Uraqiru jutkani uk amuyasax thayarapxaniwa’ sasa (Lucas 21:7-11, 25-27; Mateo 24:3-14).
Walja tiempo llakit jikxatasisasa axsarayasisasa, jan ukax yaqha ukham jan waltʼäwinakan jikxatasisaxa, llakimpi aynachtʼataw jaqinakax uñjasipxi. Ukham sinti llakir apirinakax akanakäspawa: munat familianakasas jiwxaspa, divorciasiñanaka, jan irnaqäwin uñjasiña jan ukax jan qullkay usumpi usuntaña. Ukat janipunis kun lurañatakix walïkaspa, taqpach jaqinakarus jan wal lurkaspa, janis jaqinakatakix walïkaspa ukham amuyasisaw llakisipxaraki. Ukham jan waltʼäwinakax taqiniruw llakisiyistaspa, ukampis maynitix ukham llakir purtʼaschi jan ukax uka jan waltäwinakat jan misturjamäkchi ukhaxa jukʼampiw llakisirakispa.
Nayra tiempon jakiri jaqinakax llakisipxarakïnwa. Job chachax usuntata ukat jan waltʼäwin jikxatasirakïna. Diosas apanukuwayxaspa ukham amuyasïna, ukatxa jakäwixat axtastwa sasaw säna (Job 10:1; 29:2, 4, 5). Jacob chachax wawajax jiwatächiy sasax janiw khitimpis chuymachayasiñ munkänti (Génesis 37:33-35). David chachax sinti jan wali juchachasitapat wal amtasisax akham sänwa: “Sapürus llakitaw sarnaqta. [...] Jan akchʼa chamanïtwa” sasa (Salmo 38:6, 8; 2 Corintios 7:5, 6).
Jichhürunakanxa waljaniw wali llaktʼata sarnaqapxi kunattix jupanakpachatwa kuntï lurirjamäpki ukatsa jukʼamp lurañ munapxi, ukat sapürusa chʼamapatsa, amuyupatsa jukʼamp lurañ munapxaraki. Amuyatarjamaxa, estrés satäkis ukar jan wali amuyunakampi ukat llakinakampi yaptʼasaxa janchirusa, pʼiqirusa janiw waltʼaykaspati, ukatxa sinti llakisiñaruw ukax aparaki (Proverbios 14:30 uñxattʼarikïta).
Mä llakitarux kunjam yanaptʼañas wakisispa
Nayra 100 maranakanxa Filipos sat markankiri Epafrodito cristianon ‘wali usuntatapwa amigonakapaxa yatipxäna, uk yatisaw jupax wali llakit jikxatasïna’. Epafroditorux kuntï Apóstol Pablotakix munaskäna ukanakwa amigonakapax Roma markakam apayapxäna, ukampis ukanak apañapkamaw usuntäna, ukat inas akham sischïna; ‘amigonakajatakix janiw atinisiñjamäxti, janirakiw jupanakatakix kunatakïkxasa’ sasa (Filipenses 2:25-27; 4:18). Ukat ¿kunjamsa Pablox yanaptʼäna?
Epafroditorux Filipos markankir amigonakapar mä carta apayäna, ukanxa akham sänwa: “Taqi kusisiñampi [Epafroditor] katuqapxam kunjamätix mä tatitunkir jilatarux katuqañäki ukhama. Uka casta jupjam jilatarusti munasipxapunim” sasa (Filipenses 2:28-30). Pablox walik ukham lurasktax siskäna ukat Filipos markankir jilatanakapax sum katuqtʼapkäna taqi ukanakaw Epafroditorux jan llakinïñapatakix yanaptʼpachäna.
‘Mayjtʼatanakarux chʼamachtʼapxam’ sasaw Bibliax iwxtʼaraki, ukax taqi kunat sipansa wali askipuniwa. Mä llakit warmixa akham sasaw säna: “Mayninakan jumat llakisipxatapa yatiñax wali askiwa, ukat ‘waliptxätawa, jan llakisimti’ sas maynix siristam uka arunaksa walpun muntanxa” sasa.
Maynix wali llakit jikxataschixa jupapachpaw khitirutï atinisiñjamäki ukar thaqhañapa jupamp parltʼañataki. Suma chuymamp istʼañ yatiñaparakiwa. “Janiw ukham amuyañamäkiti”, “janiw ukham jaqïñamäkiti” sasax janiw tuqiñapäkis ni juchanchañapäkisa. Niyakixay wali llakitäskchixa, uka juchanchäwinakax jupa pachpat jukʼamp jan walïtapwa amuyasiyaspa.
Llakitax inas jan kunatakïkaspas ukham amuyaschispa (Jonás 4:3). Ukampis Diosan nayraqatapan wali askïtapwa amtasiñapa. Jesucristorux “apanukupxänwa” jan kunatakïkaspas ukhama, ukampis Diosatakix wali askïskakïnwa (Isaías 53:3). Jan payachasimti kunjamtï Diosax Yuqaparux wal munasïnxa ukhamarakiw munastamxa (Juan 3:16).
Tʼaqhisirinakatxa Jesusax khuyaptʼayasïnwa, ukat wali sum uñjarakïna (Mateo 9:36; 11:28-30; 14:14). Diosatakix jan yäqat jiskʼa jamachʼinakas wali askïtapwa Jesusax akham sas qhanañchäna: “Diosasti ukanakatxa janiw maynits armtʼaskiti” sasa. Ukhamaxa, ¡Diosatakixa munañap lurañ munapki ukanakaxa, wali askiwa! Jesusax jupanakat parlkasax akham sarakïnwa: “Ñikʼutanakamasa mayat maya jakhutawa” sasa (Lucas 12:6, 7).
Chiqpachansa, khititix sinti llakitäkchi ukat pantjasitanakapax wal llakisiychixa inas akham sischispa, Diosatakix janiw askïxti sasa. Diosan munasiñapas ukat yanaptʼapas janis jupatakïkxaspa inas ukham amuychispa. Diosan Arupanx akham sarakiwa: ‘Chuymasax kunatsa juchañchistaspawa’ sasa. Ukampis ukax ¿ukhamapunïpachati? Janiwa, kunattix jaqinakax jupanak pachpaw juchanchasipxaspa, ukat jan walirak amuyasipxaspa, ukwa Diosax sum yatiraki. Ukatwa Diosan arupanxa akham sas chuymachtʼistu: “Diosax jukʼampi jachʼawa chuymasat sipansa, jupasti taqi kunwa yatiraki” sasa (1 Juan 3:19, 20).
Jïsa, alaxpachankir wali munasir Awkisax janiw juchanakasaks ni pantjasitanakasaks uñchʼukkiti. Kunatsa maynix aynachtʼaspa, kuna amtanïtansa kunas chuymasan utji uksa Jupax yatiwa. Ukat taqiniw juchsa, usuntañsa ukat jiwañsa katuqawaytanxa, ukatwa jan taqi kuns lurirjamäktanti uksa yatirakiwa. Ukatxa wali llakita ukat jiwas pachpampis coleratätan ukhaxa, jan jucha lurañ munataswa uñachtʼaytanxa, ukat jan sinti jan walinkataswa uñachtʼayaraktanxa. Bibliax siwa janiw jiwasan munañasat ‘akapachax juchanchatäkiti’ sasa. Ukatwa Diosax jan walin uñjasitasatxa sinttʼasistu, khuyaptʼayasirïtap laykurakiw jan chʼamanïtasxa amtasiraki (Romanos 5:12; 8:20).
Jehová “Tatitux munasiriwa, khuyapayasiriwa” siw Biblianxa. “Kamisatix inti jalsut inti jalantkam wali jayaxa, ukham jiwasanakat juchanakas jayarstʼayistu. Jupax jiwasanakan laqʼätas yati, ñiqit luratäpxatas yatiraki” (Salmo 103:8, 12, 14). Chiqpachansa Jehová Diosakiw “chuymachirisasa. Taqi tʼaqhisiñanakasanwa [...] chuymachistu” (2 Corintios 1:3, 4).
Llakitanakaxa khuyapayasir Diosar jakʼachasisa ukhamaraki “Diosar llakinakam katuya[si]m” siski uka arunakar istʼasaw yanaptʼa jikxatapxaspa. Chiqpachansa jupax ‘llaktʼata sarnaqiri ukanakarusti chʼamañcharakiwa’ (Salmo 55:22; Isaías 57:15). Ukatwa Bibliax Diosat mayisiñapuniw sarakixa: “Taqi llakisiñanakamsti Diosar jaytapxarakim, jupasti jumanakatxa llakisirakiwa” sasa (1 Pedro 5:7). Jïsa, jaqinakax oración tuqiwa Diosar jakʼachasipxaspa, ukatwa ‘Diosan samarañapsa’ kusisita katuqapxarakispa (Filipenses 4:6, 7; Salmo 16:8, 9).
Jakäwisan kunanaks lurtan ukanakat amuytʼasiñäni ukhaxa llakir saykatañsa yanaptʼarakistaspawa. Ukat ejercicio lurañasa, chʼamanchkiri manqʼanak manqtʼasiñasa, qʼuma samana samsuñasa, sum samartʼañasa ukat jan sinti televisión uñchʼukiñasa wali wakiskiripuniwa. Mä warmixa llakitanakar yanaptʼañatakixa, kayuk sarnaqañatakiw irpirïna. Mä llakit warmix “janiw kawks sarañ munkti” säna ukhaxa, jupax suma arumpi ukat qhana arumpiw “sarañäniwa” sasax säna. Ukat uka warmix akham siwa: ‘Suxta kilometronakwa sarnaqapxta. Kuttʼanxasaxa wali qarjatänwa ukampis janiw ancha llakitäxänti. Ukhamax ejercicio lurañax qhawqsa yanaptʼistaspa uk yatiñatakixa qariñkam ejercicio lurañawa, ukax wali wakiskiripuniwa’ sasa.
Yaqhipanakax llakir atipjañatakixa kunayman lurapxi, doctoran ukarus sarapxiwa, ukampis janiw llakirux atipjapkapuniti. Ukatxa mä warmix akham sänwa: “Llakir atipañatakix taqikunpun lurtxa ukampis llakitakïsktwa” sasa. Ukhamarakiw awisanakax juykhunakarusa, uqaranakarusa ukat cojonakarusa janiw qullañjamäkiti. Ukampisa Bibliaxa taqi usuntañanakax jan mayampitakiw chhaqtayatäni sasaw qhanañchi, ukhamax mä llakitax Diosan Arunakapa sapüru liyisaxa chuymachtʼäwi ukat suytʼäwsa jikxataspawa (Romanos 12:12; 15:4).
Mä urunxa janiw llakisiñax utjxaniti
Kunanakatï aka Uraqpachan qhip qhipa urunakan pasañapäna uka tuqit parlkasaxa, Jesusax akham sasaw säna: “Kunapachatï akanakax pasañ qalltani ukkhaxa, chʼamachasipxam ukhamarak suyapxam jankʼakirakiw qhispiyatäxapxäta” sasa (Lucas 21:28). Kunjamsa chiqap jutïrpachar mantañatakix Diosax qhispiyistani uka tuqitwa Jesusax parlaskäna, ukansti “Aka Uraqix librëxañapataki tukusiña esclavöñata, Diosan wawanakapan qhispiyat jakäwipana” (Romanos 8:21).
Jaqinakaxa, ¡kunja kusisitakïpkani kunapachatix jan waltʼäwinakat qhispiyata ukat sapürutjamas chuymas qhanartata ukat taqi kuns qʼaphaki lurañataki jikxatasipkani ukhaxa! Ukhaxa janiw khitis llakinakampix aynachtʼat uñjasxaniti. Diosax jaqinakarux akham siwa: “Taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän ukanakax tukusxiwa” sasa (Apocalipsis 21:3, 4).
Jiskʼa tʼaqanakaxa Qullan Arunaka Bibliat apstʼatawa.