Bibliankir libron jakhupa 64: 3 Juan
Qillqiri: Apóstol Juan
Kawkins qillqasïna: Éfeso jan ukax uka jakʼana
Qhawqha marats parlasi: 98 jakʼana
AKA cartaxa Gayo sat chachar qillqatawa, janiw Diosat jithiqtirïkänti, ukatwa Juanax walpun jupar munasïna. Nayra 100 maranakan cristiano tama utjkäna uka urunakanxa waljaniw Gayo sat sutinïpxäna. Uka sutixa Griego Arut Qullan Qillqatanakanxa pusi kutiw uñstaraki, ukampis kimsa jan ukax pusi chachanakat inas parlchi (Hech. 19:29; 20:4; Rom. 16:23; 1 Cor. 1:14). Gayo sat sutininakatxa, mayni Gayoruw qillqkpachäna sañatakix janiw kuna qillqatas utjkiti. Gayox cristianonakan tamapankänwa ukak jupat yattanxa, Juanan wali munat masiparakïtapa, ukhamaraki aka cartax jupatak qillqatätapa, ukatwa Juanax “juma” sasax qillqäna.
2 Aruntkasax kuna arunakampitï qalltkäna ukhamaraki kuna arunakampitï tukuyäna ukanakaxa Juanan payïr cartapampix niya kipkakïnwa, ukatxa qillqirix jupapachpat ‘chuymanïxtwa’ sasaw säna, ukhamax apóstol Juanax janiw qillqkpachati sasax janipuniw payachasksnati (2 Juan 1). Kunjamatï qillqaskäna ukat kunjam arunakampitï qillqaskäna ukanakaxa amuytʼayistuwa Éfeso markana qillqasitapa, 98 mara jakʼana, kunjamtï paypach cartanakax qillqaskäna ukhama. Ukat aka cartax jiskʼakïtapatxa, yupaychäw tuqit nayra yatxatirinakax janiw sapa kuti aka cartxa aytasipxirïkänti, ukampisa Diosan amuytʼayat nayra Qullan Qillqatanakanxa Juanan Payïr cartapampi chikaw uñstixa.
3 Juanax qillqatapanxa tamanak tumptʼir jilatanakaru Gayox suma khuyaptʼayasiñampi katuqtʼirïtapatwa parlaskäna, ukatxa jupatakiki taqi kuns muniri Diótrefes sat chachampit parlarakïna. Gayo sat chacharu carta apayaskäna ukaxa inas Demetrio chachampi apayaschïna ukampis Juanan jupar khithatjamaxa inas Gayompix suma katuqtʼatäñapax munaschïna ukhamatwa jupax uka cartxa katuqarakispänxa. Kunatï akan qillqatäki ukat jukʼampxa janiw Gayotsa, Demetriotsa ni Diótrefes chachatsa yatiskiti. Ukampisa, nayra cristianonakaxa yakha markanakatäsipkchïnsa jupanakkamax wali munasiñampiw uñjasipxirïna. ‘Jupan sutipxaru’ saririnakaruxa janis uñtʼapkchïnxa, wali sum katuqtʼasipxirïna, ukham yatitäpxänwa (7 tʼaqa).
KUNATSA WALI ASKIXA
5 Apóstol Juanax irpir chuymanjamax jankʼakiw jan walinakat tamarux jarkʼaqirïna, ukham luratapaxa, aski uñachtʼäwiwa. Suma katuqtʼasiñasa ukat wali munasiñasa askipunïnwa ukatwa uka tamax wali sum uñjatarakïnxa, ukampis ukham askinak uñachtʼayasipkakiñapänwa uka chiqan jakir jilat kullakanakampisa ukhamaraki “jan uñtʼatanakampisa” (katuqir cristianonakatakix jan uñtʼatäpkäna ukanakampisa), “Diosan chiqa arunakap” apasipkirinakamp chikasa sarnaqasipkakiñapänwa (5, 8 tʼaqanaka). Ukampis Diótrefes chachax jachʼa jachʼa tukurïnwa, uka lurañarux Jehová Diosax uñisiwa, ukat jupax janiw Diosan apnaqäwiparjamax sarnaqkänti, apóstol Juanatsa ñanqha arunakamp jan walinakwa parlarakïna (Prov. 6:16, 17). Uka suma katuqtʼasirit uñtʼat tamaruxa janiw waltʼaykänti. Ukatpi Juanax qhana arunakampix uka jan walinakatxa arsünxa, ukhamarakiw taman chiqpach munasiñ uñachtʼayapxatapatxa wali sum parläna. Uka kipkarakiw jichhürunakanxa taqi chuymax, altʼat chuymanïtasxa uñachtʼayañasa, Diosan chiqa arunakaparjam sarnaqatassa, khuyaptʼayasirïtassa, ukhamaraki Tatitjam munasirïtassa, Juanan aka arsutaparjamaxa: “Khititix aski lurki ukïrixa Diosankiwa, ukampis khititix jan wal lurki ukaxa janiw Diosar uñtʼkiti” sasaw säna (3 Juan 11).