Bibliankir libron jakhupa 63: 2 Juan

Qillqiri: Apóstol Juan

Kawkins qillqasïna: Éfeso jan ukax uka jakʼana

Kuna marans tukuyasïna: 98 jakʼana

JUANAN payïri qillqatapaxa jiskʼakïnwa, inas qillqatax mä papiro sat janaruk mantchïna, ukampis jiskʼakïkchinsa walja wakiskiri yatichäwinakaniwa. Qillqatapanxa ‘ajllit mamaru ukat wawanakapampiruw qillqanta’ sasaw sarakïna. Kunapachatï aka cartax qillqatäkäna ukhaxa, “Kyria” (griego arunxa “mama”) siski uka aruxa utjapunïnwa mä sutjam uñtʼatänwa, yaqhipa qillqirinakaxa sapxiwa: mayniw ukham sutinïpachänxa ukat ukaruw qillqaspachäna sasa. “Ajllit mamaru” siski uka arunakampixa mä tamaruw Juanax qillqaskpachäna sasaw yaqhipanakax amuyapxaraki. Inas tamanak arknaqirinakan jan amuyapxañapatak ukham qillqchïna. Ukhamächin ukhaxa, ‘kullakaman’ aruntanakapaw sas aka carta tukuyañatakix qillqaskäna ukampixa, yaqha taman aruntanakapäpachänwa. Ukhamaxa payïr cartax janiw nayrïr cartapjamax taqinitak qillqaskänti, maynitak qillqatakïpachänwa jan ukasti mä tamataki (1 tʼaqa).

² Juanax aka cartxa janiw qillqkiti sañatakixa janiw kunas utjkiti. Jupa pachpat parlkasaxa ‘chuymanïxtwa’ sasaw sarakïna. Janiw chuymanïxatapatxa ukapunïskiw sisktanti jan ukasti mä ‘katjäsirjamätapatwa’ ukham sistanxa (Gál. 2:9, NM), ukhamarak taqpach apostolanakat qhipa jiltʼirjamaxa, chiqpachansa tamanxa mä jilïr ‘chuymanipunïskänwa’. Wali uñtʼatarakïnwa cartap liytʼirinakatakixa, janiw kunas munaskänti jupan qillqatapapunïskiw sañatakixa. Juanan nayrïr cartapampi ukat Juan librompix niya kipkakiwa ukax uñachtʼayistuwa jupapun aka cartxa qillqaskatapa. Payïr cartaxa nayrïr cartjamarakiw Éfeso markana jan ukax uka jakʼanakan qillqaspachäna, 98 mara jakʼana. Cyclopedia de McClintock ukat Strong qillqataxa Juanan payïri ukat kimsïri cartapatxa akham sarakiwa: “Niya kipkakïtapatxa saraksnawa, nayrïri cartapxaruxa Éfeso markatxa qillqasikirakpachänwa payïri ukat kimsïr cartanakapaxa, sasa. Nayrïr cartaxa kunjam sarnaqañäkitï uka tuqit parlänxa, ukat payïri ukat kimsïri cartanakaxa jukʼamp uka sarnaqañ tuqitxa qhanañchtʼaskäna” sasa.a Ukhamapunïskiw sañatakisa, 100 maranakan jakir Ireneo sat chachaxa, uka cartatxa aytasipunirïnwa, ukat uka pachpa maranakan jakir Clemente de Alejandría sat chachasa uka cartax chiqapunïskiw sarakirïnwa.b Ukampis Juanan cartanakapaxa, Fragmento Muratoriano qillqatanak taypinsa utjarakiwa.

³ Niyakixay Juanan mayïr carta qillqatapax chiqapunïskchïnxa, kʼari yatichirinakaw cristianonakan iyawsäwinakapxa aynachtʼayañ munapxäna, ukat aka cartax qillqasïna. Jupanakax wali munasiñampiw chiqa yatichäwinakan sarnaqasipkäna, ukampis kʼari yatichirinakat amuyasipxañapatakisa, jithiqtapxañapatakisa Juanax qillqatanakapampix liyirinakaparuw amuytʼayañ munäna.

KUNATSA WALI ASKIXA

⁵ Kunjamäkäntï Juanan urunakapanxa ukhamarakiw jichhürunakaxa Jesucriston qhäna amuytʼkañ yatichäwinakaparux yaqhip jaqinakax jan istʼañ munapkiti. Jan ukasti uka yatichäwinakat sipansa jukʼamp munasipkakïnwa, jachʼa jachʼa tukuñataki, wali yatxatat jaqinakjam uñtʼatäñataki, munañanakap jikxatañ laykuxa tamarux jan wali yatichäwinakampiw mayjtʼayapxäna ukhamat tʼaqanuqtayañataki. Juanatakixa, tamax munasiñana ukat chiqa yatichäwin Awkinpin ukat Yuqampin mayachtʼat sarnaqapxatapaxa wali askipunïnwa. Jichhürunakanxa ukham mayachtʼata sarnaqir tamanakarux askirjamaw uñjañasa, ukatxa khitinakatï Qullan Qillqatanakarux kʼari yatichäwinakapampi qʼiwjapki ukanakampixa janiw chikachasiñasäkisa ni aruntañasäkisa. Diosan kamachinakaparjam sarnaqkasasa, chiqpach cristianonakamp wali kusisita sarnaqkasasa, akham saraksnawa ‘Dios Awki, ukhamarak Tatit Jesucristo, Dios Awkin Yuqapax bendecipxistaniwa, churapxarakistaniwa khuyapayasiñapa, samarañapana, chiqampina munasiñampina” sasa (3 tʼaqa). Chiqansa Diosax mä wawak sarnaqiri tamarux bendiciwa sasaw Juanan cartapax qhanañchistu.

[Qhanañchäwinaka]