Septiembre

Qollur janïr makatkasajj Abrahamajj akham sasaw servirinakapar säna: “Jumanakajj akhar asnompi chika qheparapjjam. Wawajjampi nayampisti sarasipkakïwa, Diosaruw yupaychanipjjä, ukatsti jumanakan ukaruw kuttanjjapjjarakï” sasa (Gén. 22:5). Abrahamajj ‘kuttanjjapjjäw’ sasinjja, ¿kʼarispachänti? Janiwa. Kunatsa ukham sispachäna uk sum amuyañatakejj Bibliaw yanaptʼistaspa (Heb. 11:19). Hebreos qellqatajj akham siwa: “Abrahamajj yatïnwa Diosajj jiwatanak jaktayañatakis chʼamanïtapa” sasa. Jiwatanakajj jaktaniniwa sasin taqe chuymaw Abrahamajj confiyäna. Chuymanëjjäna ukhajja, kunjamsa Jehová Diosajj juparusa Sara warmiparus wawanïpjjañapatak yanaptʼäna uk janirakiw armkänti (Heb. 11:11, 12, 18). Jehová Diosatakejj janiw kun lurañas chʼamäkiti, uksa Abrahamajj sumwa yatïna. Yoqapar loqtañapäkäna uka urojj kunas paskchispänjja, ‘Jehová Diosajj kunjamatsa yoqajar kuttʼayitaniwa’ sasaw taqe chuyma confiyäna. Ukatwa Bibliajj Abrahamat akham sispacha: “Taqe khitinakatejj iyawsäwi layku Diosampi katoqatäpki ukanakan awkipa” sasa (Rom. 4:11). w16.02 1:3, 13

Jehová Diosaw Saularojj reyïñatak ajllïna. Ukampis jan istʼasirïtapatjja, Diosajj janiw uka reyir sum uñj-jjänti (1 Sam. 15:17-23). Ukhamäkchïna ukasa, Diosajj janiw reyïñat apaqkänti. ‘Tatitun tronopana qontʼatäsinjja’ jan walinakwa Saulajj luräna, ukatwa waljanitakejj Diosar istʼaskakiñajj chʼamakïna (1 Cró. 29:23). Ukampis Jonatanajj janipuniw Jehová Diosat jitheqtkänti. ¿Kunjamatsa Jonatán waynat yateqasitas uñachtʼaysna? Jakasktan uka cheqanakanjja, walja autoridadanakaw utji, jupanakar respetasaw Jonatanat yateqasitas uñachtʼaysna. Jehová Diosajj akham sistuwa: “Taqeniw autoridadanakarojj jaysapjjañama” sasa. Mä autoridadatï jan sum apnaqkchi ukhajja, istʼaskakiñasawa. Ukampis Diosan leyinakap pʼakintayañ munapjjestani ukhajja janiw uka autoridadanakar istʼañasäjjeti (Rom. 13:1, 2). Maysa toqetjja, taqe khitinakarutï Jehová Diosajj tamansa familiansa pʼeqtʼapjjañapataki uttʼayki ukanakaruw respetañasaraki, ukhamatwa Jupar taqe chuyma servitas uñachtʼayañäni (1 Cor. 11:3; Heb. 13:17). w16.02 3:5, 6, 8

Diosar servirinakapajja, ‘taqe chuymaw Jupar loqtañatakejj sartapjjani’, wayn tawaqonakas ukhamarak lurapjjani sasaw Bibliajj qhanañchi. Ukhamasti, bautisasiñ amtasksta ukhajja, janiw mayninakajj juma lanti amtapjjañapäkiti, jan ukasti juma pachpaw uka amtar puriñama. Awk taykamatï Jehová Diosan Testigopächi ukhajja, jukʼampiw uka toqet amuytʼasiñama. Jilanakamaru kullakanakamaru jan ukajj amigonakamaru bautisasir uñjasaw jumajj bautisasiñ munjjarakisma. Ukhamächi ukajj amuyasiñamawa. Janiw bautisasiñajj waktʼjjetuwa sasin amuyasasa ni mayninakar bautisasir uñjasakis bautisasiñamäkiti, jan ukasti kunjamsa Jehová Diosajj bautisasiñar uñji ukwa amuyañama. Ukatakejj bautisasiñajj kunatsa wali wakiskirejja uk sum amuytʼañatakiw tiempo apstʼasiñama. w16.03 1:11, 12

¿Kunjamataksa uka luräw phoqsna? Maynit maynikam yanaptʼasisakiw uk phoqsna (Efe. 4:16). Diosan Reinopat suma yatiyäwinak jukʼamp jaqenakar yatiyañatakejja, suma wakichtʼatäñasawa. Ukatakejj tamanwa ewjjtʼanak katoqtanjja. Ukarjam lurañäni ukhajja, jilat kullakanakasampejj jukʼamp mayachtʼataw yatiyañäni. Sañäni, yatiyir mistuñataki tantachäwinjj walja ewjjtʼanakwa katoqtanjja. Ukatsti, Bibliat apstʼat qellqatanakampiw Diosan Reinopat yatiyir sartanjja. Awisajja, yatiyañatak campañanakajj utjki ukan yanaptʼañatakiw mayipjjarakistaspa. Ewjjtʼanakarjam yatiyañäni ukhajja, ‘alajjpachan jalnaqaski’ uka angelan wiñay qhespiyasiñ arunakapjj mayachtʼataw Oraqpachankir jilat kullakanakasampejj yatiyapjjañäni (Apo. 14:6). w16.03 3:4, 5

Jutïr pachanjja machaq rollonaka, jan ukajj libronakaw jistʼarasini sasaw Diosan Arupajj qhanañchi. Kunanakatï uka rollonakan qellqatäkani ukarjam yatjjatasaw jaktirinakasa Paraison jakirinakas Jehová Diosan amuyunakap jukʼamp sum amuyapjjani. Ukhamajj niyakejjay Jehová Diosan arunakap jukʼamp sumpach amuychiñänejja, taqeniw munasiñampi respetompi uñjasiñäni, janirakiw uñisisiñasa ni jiskʼachasiñas utj-jjaniti (Isa. 26:9). Jesucristojj Reyjam aka Oraqpach apnaqjjani ukhajja, ¿kunanakampsa yateqpachañäni? ¿Kunanaksa mayninakarus yatichpachañäni uk amuyasmati? Jiwasatï ‘uka libron qellqatäki’ ukarjam sarnaqañäni, Jehová Diosarus jan jitheqtas serviñäni ukhajja, sutisajj wiñayatakiw ‘jakañ libron’ qellqantatäni, ukat jiwasas wiñayatakiw aka Oraqen jakasirakiñäni. w16.03 4:19, 20

13 jan ukajj 14 maranïsipki ukhatpach jilatanakar wakichtʼañajj wali wakiskiriwa sasaw experienciani walja jilïr irpirinakajj sapjje. Waynitojj qawqha maranisa ukarjamaw taman lurañanakajj churasispa. ¿Kunatsa jilïr irpirinakajj jilatanakar waynitutpach wakichtʼapjjañapa? Ukham wakichtʼäta ukhajja, jukʼamp maranëjjapjjani ukhajj Diosar loqtasipkakiniwa, janirakiw akapachampis apayasipkaniti (Sal. 71:17). Taman jukʼamp lurañ munañapatakejja, jilïr irpirinakajj janiw kunsa lurañapa ukak jilatar sapjjañapäkiti. Jan ukasti, kunatsa uk lurañapa uksa sapjjañaparakiwa. Ukham lurasaw Jesusajj mayninakar wakichtʼirïna. Apostolonakapar janïr yatiyir khitkasajja, kunatsa yatiyir sarapjjañapa ukwa nayraqat qhanañchtʼäna. Jupasti akham sänwa: “Nayar churatawa taqe munañanïñajja alajjpachansa, akapachansa. Taqe akapachankir jaqenakar yatiyir sarapjjam, nayar arkir tukuyapjjam” sasa (Mat. 28:18, 19). w15 4/15 2:5, 6

Nayrïr patak maranakanjja, Roma markan jakasir cristianonakajj jan wali tiemponwa jakapjjäna. Romanonakajj jan sinttʼasisaw jupanakar arknaqapjjäna. Cristianonakas markan phichantatäñapatak juchanïpkaspa ukhamwa uñjapjjäna. Uka tiemponwa romanonakajj apóstol Pablor katuntapjjäna. Ukhaman uñjasisajj inas jupajj akham jisktʼaschïna: “¿Cristianonakajj yanaptʼapjjpachïtaniti?” sasa. ¿Kunatsa? Mä kutejj sinti jan waltʼäwinwa uñjasïna ukat janiw khitis yanaptʼkänti (2 Tim. 4:16). Ukampis Pablojj sänwa: ‘Jesusaw yanaptʼitäna, chʼamsa churarakitäna’ sasa. ‘Aka jan waltʼäwin aguantañatakisa, jutïrin kuna jan walir atipjañatakis Diosaw chʼam churarakitani’ sasaw taqe chuyma confiyäna. Ukatwa akham säna: “Tatituw taqe jan walit qhespiyaskitani” sasa (2 Tim. 4:18). Cristiano jilanakajajj janis yanaptʼapkchitanejja, Jehová Diosampi Jesusampiw yanaptʼapjjetani sasaw taqe chuym confiyäna. w15 4/15 4:1-3

Jesusajj wawat jilsjjasin Mesiasaruw tukuñapäna, Supayajj uk sum yatïna. ¿‘Mä wawar jiwayañajj sinti jan walïspawa’ sasat Supayajj amuypachäna? Janiwa. Jupatakejj kunatï walïki ukat jan walïkaraki ukanak lurañajj pachpakiwa. Ukatwa Jesusarojj naskäna ukhajj jankʼaki jiwayañ amtäna. ¿Kunsa Supayajj ukatak lurpachäna? Kunapachatï Herodes reyejj ‘judionakan reyipan’ nasitap yatïna ukhajja, wal colerasïna jiwayañwa amtarakïna (Mat. 2:1-3, 13). Ukatwa akham säna: ‘Taqe yoqall wawanakaru jiwarayapjjam pä maranit aynacharu, taqe Belenankirinakaru, ukhamarak uka jakʼankirinakarusa’ sasa (Mat. 2:13-18). Jesusajj janiw ukan jiwayatäkänti. Ukampis ¿kunsa ukajj Supayat uñachtʼayistu? Jupatakejja, jaqen jakañapajj janiw kuna valoranïkisa ni wawanakan jakañapasa. Supayajj mä leonar uñtasitaw warartʼasis sarnaqaski (1 Ped. 5:8). Jupajj jan sinttʼasiriwa, janipun uk armapjjañäniti. w15 5/15 1:10, 12, 13

Jan uñjktan uk uñjksnas ukham amuytʼirwa Jehová Diosajj lurawayistu. Ukaw kunas jutïrin pasani uk suytʼañatakisa, jan ukajj suma amtanakar puriñatakis yanaptʼistu. Jehová Diosajja, kunatï jutïrin paskani uk yatiwa. Ukanakjja Biblia toqew yatiyistu. Janisay ukanak uñjkstanjja, kunanakatï paskani uk sumwa amuytʼsna. Ukaw Diosan arsutanakapajj phoqasipuniniwa sasin taqe chuyma confiyañatak yanaptʼistu (2 Cor. 4:18). Sañäni, Ana warmejj kunatï pasañapäkäna ukwa amuytʼäna. Jupajja, Samuel wawapajj tabernaculon niyas loqtkaspa ukhamwa amuytʼäna. Ukham amuyatapajj janiw aleq samkakïkänti, jan ukasti phoqasiñapapunïnwa. Ukaw kun lurañtï amtkäna uk phoqañatakejj yanaptʼäna (1 Sam. 1:22). Jehová Diosan arsutanakapajj niyas phoqasjjaspa ukham amuytʼañajj janiw inamayäkiti, phoqasipuniniwa (2 Ped. 1:19-21). Jehová Diosan nayra tiempon servirinakapajja, kunas jutïrin pasani uka toqetwa lupʼipjjerïna. w15 5/15 3:1-3

Walja qollqenïña toqet lupʼisin Diosat armasiñajj janiw walïkaspati. Jesusajja, “jupatakik taqe kuns arkuntasir jaqempejja” kunas pasaspa uka toqet parlasinjja, akham sänwa: “Dios nayraqatanjja jan kunanikiwa” sasa (Luc. 12:16-21). Jehová Diosajja, taqe kuns Jupatakjam lurtan ukhajja wal kusisi (Pro. 27:11). ‘Alajjpacharu suma yänaka imasitasatjja’ Jehová Diosajj wali askitwa uñjistu (Mat. 6:20). Cheqas Jehová Diosampi sum apasiñaw taqe kunat sipansa wali askejja. ‘Akapachan walja yänaka’ jikjjatañatakiki chʼamachasisksna ukhajja, sinti llakinakanwa uñjassna (Mat. 6:19). Jesusajj sänwa: “Suma arunak istʼkasinsa, sintwa llakisipjje akapach yänakatsa, qollqetsa. Taqe ukanakasti juparojj atipjiwa, suma arunakasti janirakiw jupan chuymapanjja jiltkaspati” sasa (Mat. 13:18, 19, 22). w15 5/15 4:15, 16

Jehová Diosan chʼamapampiw Jesusajj walja muspharkañ milagronak luräna. Janiw lepra usuni jaqenakaruk qollkänti, jan ukasti kunayman usuninakaruw qolläna. Jichhürunakanjja, doctoranakajj usutanakar qollañatakejj mayninakatwa riñonapsa, lloqopsa, kʼiwchapsa, jan ukajj yaqha ukhamanaksa apsupjje, ukhamat usutan cuerpopar uskuñataki. Ukampis Jesusajj janiw ukham lurkänti, jan ukasti pachparuw qolläna. Janiw ukakïkiti, usutajj Jesusat jayankchïna ukasa qollänwa (Juan 4:46-54). Alajjpachan Reyjam uttʼayat Jesucristojja, niyaw taqe kasta usunak wiñayatak chhaqtayjjani. Aka Oraqenkaskäna ukhajja, Jesusajj wali munasiñampiw jaqenakar uñjäna. Ukhamajj jutïr pachanjja, pisin jakasir ‘jaqenakat khuyaptʼayasiniwa, aynachtʼat jaqenakarus yanaptʼarakiniwa’ (Sal. 72:13). Jïsa, ¡Jesusajj taqe tʼaqhesirinakar yanaptʼapuniniwa! w15 6/15 2:6

Jesusajj yatichkäna uka oracionajja, Mateo 6:9-13 qellqatanwa jikjjatasi, uka oracionjja waljaniw yatipjje. Jaqenakar yatiykasajj niya sapa kutiw uka oracionat parltanjja. Sañäni, Diosan gobiernopat parlañatakisa ukhamarak ‘uka gobiernojj niyaw aka Oraqe mä suma paraisor tukuyani’ sañatakisa, [‘Reinomampisti’, NM] apnaqapjjeta” siski uka arunakampiw jaqenakar yatiytanjja. Ukatjja, ‘Diosajj sutiniwa, Juparojj respetañasawa’ sasin jaqenakar yatichañatakejja, “sutimajj jachʼañchatäpan [jan ukajj ‘qollanaptayatäpan’]” siski uka arunakampiw parlaraktanjja (Mat. 6:9). Jesusajj yatichkäna uka oracionjja waljaniw pʼeqer yatsusin Diosar mayisipjje. Ukampis ¿Jesusajj ukham mayisipjjañapti munpachäna? Janiwa. Jupasti sänwa: “Oración lurkasinjja jan inamaya [jan ukajj pachpa] arunakjja arsumti” sasa (Mat. 6:7). Qhepatjja, Jesusajj wasitampiw pachpa oración lurañ yatichäna, ukampis janiw kikpa arunakamp mayisiñ yatichkänti (Luc. 11:1-4). Diosarojj kunsa ukat kunjamsa mayisiñasa uk amuytʼasiñasatakiw Jesusajj ukham yatichäna. w15 6/15 4:1, 2

Supayan yantʼanakapar saykatañatakejja, Jehová Diosajj qollan ajayupampiw yanaptʼistu. Ukatsti, chʼamasa, tiemposa ukhamarak qollqesa jan ina chʼusar aptʼasiñatakiw Biblia toqesa tamap toqes ewjjtʼistu. Pä wawani Espen jilatampita Janne esposapampit parltʼañäni. Jilatajj akham siwa: “Jichhajj janiw precursorjam sirvjjapjjti, ukampis Jehová Diosarojj sapa kutiw yantʼanakar jan purtʼasiñatakejj yanaptʼa mayisipjjta. Ukatsti Jupamp sum apasiskakiñatakisa, taqe chuyma yatiyaskakiñatakisa yanaptʼjja mayisipjjaraktwa” sasa. ¿Kuna yaqha yantʼarus saykatañasaraki? Pornografía qʼañu luräwinak janiw uñchʼukiñasäkiti. Yaqhepajj jan wali amuyunak jan jankʼak apanukusaw ukanak uñchʼukiñar purtʼasipjje. Ukampis walja jilat kullakanakaw uka yantʼar atipapjje. Ukhamajj jiwasajj atiparaksnawa (1 Cor. 10:13). w15 6/15 5:15, 16

Diosajj tʼaqhesiñ urun sumankañ tiempo utjaykani ukajj ¿kunatakïnisa? Jehová Diosar cheqapunit munastanjja janicha ukwa uka sumankañ tiempon uñachtʼayañäni. Ukampis akapachankir jila parte jaqenakajja, ‘qarqa pʼiyanakar imantasiñwa’ thaqhapjjani, mä arunjja, akapachan organizacionanakajj utjki ukanakamp jarkʼaqayasiñwa munapjjani. Uka tiempon ¿waljaniw Diosar serviñ qalltapjjani sissnati? Janiwa. Romanonakajj nayrïr kutin Jerusalén marka tʼunjir sarapkäna ukhajja, jan tʼunjasakiw kuttʼawayjjapjjäna. Uka qhepat sumankañ utjkäna ukhajja, judionakajj janiw cristianor tukupkänti, jan ukasti cristianöjjapjjäna jupanakaw Jesusan arunakapar istʼasin Jerusalenat mistupjjäna. Jutïrin niya ukhamarakïniwa, Diosajj religionanakar tʼunjañ saytʼaykani ukhajja, janiw jaqenakajj Jehová Diosar serviñ qalltapkaniti, antisas cristianonakan Diosar munasitapa ukhamaraki ajllit cristianonakar yanaptʼatapa uñachtʼayañatak tiempöniwa (Mat. 25:34-40). w15 7/15 2:7

Jehová Diosan servirinakapajj mayachtʼataw aka Oraqpachan jakastanjja. Ukatwa mayninakat sipans mä markakis jukʼamp sumäkaspa ukham jan amuyañasäkiti. Inas familiaranakasasa, yaqha jaqenakasa, markasar munasiñ yatichawaychistu. Maysa toqetjja, inas yaqha markankirinakarusa, costumbrenakaparusa, aruparusa jan ukajj yaqha kasta jañchininakarus uñisiskakstan. Ukampis akwa amtañasa: markapat jachʼa jachʼa tukurinakarusa, jupanakakis mayninakat sipans jukʼamp sumäpkaspa ukham amuyirinakarus Diosajj uñisiwa. Uka toqet parlir Bibliat apstʼat qellqatanakwa yatjjatasma. Ukatsti, Jehová Diosaruw kunjamtï Jupajj jaqenakar uñjki ukham uñjañatak yanaptʼa mayisiñama (Rom. 12:2). Jehová Diosar istʼirïtas laykojja, janiw akapachankir jaqenakjamäktanti, ukjja vecinonakasasa, familiaranakasasa, trabajosankir masinakasasa, yateqer masinakasasa, sumwa amuyapjje. w15 7/15 3:14, 15

Biblianjja Diosar taqe chuyma mayisiri chachanakana warminakana oracionanakapaw qellqata. Jupanakajja, kunjamas jikjjatasipjjäna ukanakwa Diosar yatiyapjjäna. Uka oracionanakajj jiwasan yateqasiñasatakiwa. Ukhamajja, ¿janit uka oracionanakat Familiana Diosar Yupaychañataki Aruman yatjjatañajj wakiskaspa? Amuytʼañataki, inas Jonás chachan oracionapat yatjjatsna, jupajj mä jachʼa chawllan purakap manqhatwa Diosar mayisïna (Jon. 1:17–2:10). Templojj Diosar katuyaskäna ukhajja, kunjamsa Salomón reyejj Diosar mayisïna uka oracionatsa, ukhamarak Jesusajj mayisiñ yatichkäna uka oracionatsa yatjjataraksnawa (1 Rey. 8:22-53; Mat. 6:9-13). Diosar mayisiñasapuniwa. Ukhamtï lurañänejja, ‘Diosajj samarañapwa churistani, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti chuymanakassa, amuyunakassa imaniwa’ (Fili. 4:6, 7). w15 8/15 1:11, 12

Paraison jakasiñatak jichhatpach wakichtʼasiñ munstan ukhajja, Jehová Diosan markapar jichhatpach istʼañaruw yatinoqtañasa. Paraisonjja, aka Oraq mä suma jardinar tukuyañatakisa, jaktanirinakar Jehová Diosar uñtʼapjjañapatak yanaptʼañatakisa, kamachinakwa katoqañäni. Cheqas Paraison walja lurañanakaw utjani. Ukatwa akham jisktʼasiñasa: “Jan gustkitu uka trabajo Jehová Diosan markapajj churitaspa ukhajja, ¿iyaw sasati taqe chuyma phoqeristjja?” sasa. Paraison jakasiñatak jichhatpach wakichtʼasiñatakejja, janiw Jehová Diosan markapar istʼañ mayakejj wakiskiti, jan ukasti kuna luräwi katoqasas kusisitäñwa yateqañasa, ukatsti khitinakatï luräwinak churapkistu ukanakarus istʼañasarakiwa. Amuytʼañataki, Jehová Diosan markapan yaqha luräwi katoqasajj uk phoqañatakiw chʼamachasiñasa, ukatsti uka luräwisampejj kusisitäñasawa. Ukhamtï lurañäni ukhajja, kuna trabajtï Paraison katoqkañäni ukjja, kusisitaw phoqañäni. w15 8/15 3:6, 7

Salomonajj wali yatiñanïkchïnsa, jan walinakaruw purtʼasïna (1 Rey. 11:1-6). Jiwasas ukhaman uñjasiraksnawa. Ukhamajja, Jehová Diosar jan servirimpi casarasiñ janipun amtañäniti. Casarat chacha warminakat maynitï Jehová Diosar serviñ qalltaspa ukhajja, ¿kunsa Diosar serviñ qalltki uka jilatasa jan ukajj kullakas lurañapa? Bibliajj akham siwa: “Jumanakajj warminaka, chachanakamar istʼasa sarnaqapjjam, ukhamata inas kawkïri chachas jan Tatitur iyawskchi ukajj jumanakan sarnaqäwinakam toqe Tatitutaki jikjjatatäñapataki jan kuna arumpisa” sasa (1 Ped. 3:1). Mä warmitï suma esposäñatakisa, Biblian ewjjanakaparjam sarnaqañatakisa chʼamachasini ukhajja, inas esposopajj warmiparu sum sarnaqeri uñjasajj Diosar serviñ amtchispa. Maysa toqetjja, Diosar jan servir esposani jilatanakajj ukhamarakiw apóstol Pedron ewjjanakaparjam sarnaqapjjañapa. w15 8/15 4:15, 16

Yaqhep usunakatakejj qollajj janiw utjkiti, ukatwa kunampis qollayasiñäni uk amuytʼasiñasa. Yaqhep jaqenakajja, ‘aka qollampejj waljaniw qollasjjapjje’ sasaw sapjjaspa, ukampis ukajj janiw cheqäkaspati, jan ukasti aleq siwsäwikïspawa. Diosan amuytʼayatäsajja Pablojj akham qellqäna: “Suma chuymanïpjjatamajj [jan ukajj ‘amuytʼasirïpjjatamajj’, NM] taqe jaqenakan uñtʼatäpan” sasa (Fili. 4:5). Amuytʼasirïñäni ukhajja, janiw waliptañ laykukejj tiempo inamay aptʼaskañäniti, jan ukasti Diosar serviñatakiw jukʼamp chʼamachasiñäni. Jiwasatak llakisjjsna ukhajja, jiwasakis taqe kunat sipans jukʼamp wakiskirïsna ukhamäspawa (Fili. 2:4). Akapachanjja usuntañajj utjakipuniniwa. Ukhamasti, jiwas pachpat sinti llakisiñat sipansa, Jehová Diosar serviñaw jakäwisan jukʼamp wakiskirïñapa (Fili. 1:10). Cheqansa, kun lurañatakisa sapa mayniw amtjjañasa, ukampis amtatasat jan walinakan uñjasisajja janiw mayninakar juchañchañasäkiti. w15 9/15 2:8, 10

Jehová Diosajja, ‘cheqa Diosätapat’ wali sumwa wawanakapar yatichi (Sal. 31:5). Kunjam Diosasa, kunjamsa Jupar yupaychañasa uka toqenakatwa yatichistu. Ukatjja, kunjamsa kusisit jakassna uksa yaticharakistuwa. Ukhamajja, kuna cheqa yatichäwinak yatichasas Jehová Diosajj munasiñap uñachtʼayistu uk jichhajj yatjjatañäni. Jehová Diosajj jupar uñtʼañasatakejj wali wakiskiri yatichäwinakwa Jupa toqet yatichistu (Sant. 4:8). Amuytʼañataki, sutipwa qhanañchistu, uka sutipasti taqe sutinakat sipansa walja kutiw Biblian uñsti. Ukatjja kunjamas Jupajja uksa yaticharakistuwa. Sañäni, luratanakapat amuytʼasajja, wali chʼamanïtapa ukhamarak wali yatiñanïtapwa amuytanjja (Rom. 1:20). Ukatsti Biblia liytʼasajja, taqe kun cheqaparu lurirïtapa munasirïtapwa amuyaraktanjja. Jehová Diosar jukʼampi uñtʼañäni ukhajja, jukʼampiw Juparojj jakʼachasiñäni. w15 9/15 4:8, 9

Diosajj janis jaqenakatsa ni luratanakapatsa llakiskaspa ukhamwa waljanejj amuyapjje. Sañäni, noviembre, 2013 maranjja Haiyan sat supertifón mä jachʼa thayaw lamar qotat um llumstayanisin Filipinas markan walja cheqanak tukjäna. Uka pasatatjja, mä marka apnaqeri alcaldejj sänwa: ‘Diosajj yaqha cheqankaskpachänwa ukatwa jan yanaptʼkistuti’ sasa. Yaqhep jaqenakasti, Diosajj janis jaqen luratanakap uñjkaspa ukhamwa amuyapjjaraki (Isa. 26:10, 11; 3 Juan 11). Apóstol Pablon tiempopanjja jaqenakajj ukhamäpjjarakïnwa. Janiw Diosarojj uñtʼañ munapkänti, qʼañu lurañanakampi, ñanqha amtañampi, michʼasiñampi, jan wali amtañampi, jan cheqap lurañanakampi phoqantatäpjjänwa (Rom. 1:28, 29). Ukampis Diosajj kuntï lurktan uk uñjaskiwa, uk sumwa jiwasajj amuytanjja. Ukhamarusa, akham jisktʼasiñasawa: “¿Diosajj cheqpachapuniw nayat llakisi sasat creytjja? ¿Diosajj jakäwijan kunjamsa yanaptʼaskitu uk sumti amuyasktjja?” sasa. w15 10/15 1:1-3

Diosan arunakapat yatiyir sarasaw Diosar taqe chuyma iyawsatas uñachtʼaytanjja. Yatiyir sarasajja, Diosan arsutapar confiyatasa, akapachan tukusiñapajj ‘horasaparu niya puriniñampïtapat’ jan pächasitaswa uñachtʼaytanjja (Hab. 2:3). Diosarojj taqe chuymat iyawsasktan janicha uk sum amuyañatakejja, akham jisktʼasiñasawa: “¿Diosan arunakap yatiyir sarañajj nayatak wali wakiskiriti? ¿Yatiyañatakejj taqe chuymat chʼamachasisktjja? ¿Kunayman toqetti jaqenakar yatiyañatak chʼamachasisktjja?” sasa (2 Cor. 13:5). Yatiyir sarañatak chʼamachasiñäni ukhajja, Diosar taqe chuyma iyawsataswa uñachtʼayañäni (Rom. 10:10). Maysa toqetjja, Diosar taqe chuyma confiyatasjja jan waltʼäwinakan aguantasaw uñachtʼayaraktanjja. Jiwasatï llakit jikjjatasiñäni ukhajja, ‘Diosampi Jesusampiw horasaparu yanaptʼitani’ sasaw taqe chuyma confiyañasa (Heb. 4:16). w15 10/15 2:12-14

Inas mä urojj Biblia apnaqañ jarkʼapjjchistaspa. Ukhamsa lurapkchispajja, janiw khitis kuntï yateqktan ukanakat lupʼiñjja jarkʼkistaspati. Sañäni, janiw khitis Bibliankir yaqhep tʼaqanak gustkistu uka toqet lupʼiñsa, kawkïr qʼochunakatï gustkistu ukanakat lupʼiñsa jarkʼkistaspati (Hech. 16:25). Kuntï yateqktan ukanak amtañ Diosan qollan ajayupaw yanaptʼistaspa. Ukhamajj jichhatpachaw wakichtʼasiñasa. Sapa semanatak Bibliat liytʼañajj utjki ukwa liytʼañasa, ukhamarak liyktan uksa lupʼiñasarakiwa. Jesusan arunakapata luratanakapata Mateo, Marcos, Lucas, Juan qellqatanakan liytʼasajj lupʼiñatakejj tiempo apstʼasiraksnawa (Rom. 10:17; Heb. 12:2; 1 Ped. 2:21). Jesusajj aka Oraqenkkäna ukhajj kunanaksa luräna uk yatiñatakejja, El hombre más grande de todos los tiempos librow utjistu. Uka librojja, wali suma yanaptʼapuniwa, yamas sapa jaljan jikjjataski uka jiskʼa tʼaqanak liytʼsna, lupʼiraksna ukhajj jukʼampiw yanaptʼistaspa (Juan 14:6). w15 10/15 4:11, 12

Bibliajj qellqaskäna uka tiemponjja, mä uywirejj janiw uywataparojj kunjamsa chuymapan jikjjatasi, kunsa amuyi uka toqenakat parlirïkänti. Ukampis Jesusajj apostolonakapar janiw uywatanakaparjam uñjkänti, jan ukasti amigonakaparjamaw uñjäna, cheqas jupanakatakejj wali munasiri, confiykaya amigönwa. Jesusajja, jila partejj apostolonakamp chikapunirïnwa, kunjamas chuymapan jikjjatasïna ukjja jupanakar awistʼirïnwa, janiw ukakïkänti, kunjamas jikjjatasipjjäna uk parltʼapjjäna ukhasa istʼarakirïnwa (Mar. 6:30-32). Ukham purapat parltʼasisajja, jukʼamp sumwa apasipjjäna, kuna luräwtï Jehová Diosajj jutïrin churañapäkäna ukatakis apostolonakapajj wakichtʼatäpjjarakïnwa. Jehová Diosar servisajj kunja kusisitas maynejj jikjjatasispa ukjja Jesusajj sum yatïna, ukatwa arkirinakapan kusisita jikjjatasipjjañap munarakïna. Ukatakejja, Diosan arunakapa jan inaktʼasa yatiyapjjañapataki, jaqenakar arkiripar tukuyapjjañapatakiw apostolonakapar chʼamañchtʼäna. Jupanakarusti sänwa: ‘Nayajj sapürupuniw jumanakampïskäjjaʼ sasa (Mat. 28:19, 20). w15 11/15 2:3, 5

Jehová Diosajja, wali munasiriwa (1 Juan 4:16). Jesucristojj Awkipjam munasirirakiwa. Diosajj juparuw taqe kunat sipansa nayraqat luratayna, walja millón millón maranakaw Jesusajj Awkipampi chikajj alajjpachan jakäna. Ukhamatwa Awkipat munasirïña yateqäna (Col. 1:15). Alajjpachankkäna ukhasa, aka Oraqenkkäna ukhasa, Awkipat yateqasisajj munasiñ uñachtʼayapunïnwa. Ukhamasti Jehová Diosasa, Jesusasa munasiñampipuniw alajjpachat apnaqanipjjestani. Mä kutejja akham arunakampiw mä chachajj Jesusar jisktʼäna: “¿Kawkïr mandamientos taqet sipansa wali jachʼajja?” sasa. Jesusasti juparojj sänwa: “‘[Jehová] Tatit Diosamaruw munäta taqe chuymamampi, taqe almamampi, taqe amuyumampiraki’. Akawa taqet sipansa jachʼa mandamientojja. Payïri mandamientosti ukar uñtatarakiwa: ‘Jaqe masimarusti juma kipkarjam munarakim’” sasa (Mat. 22:36-39). Cristianonakjamajj taqeniruw munasiñasa. w15 11/15 4:1-3

Jehová Diosajja, jaqenakampejj janiw hebreo arutak parlkänti, jan ukasti yaqha arunakatsa parlarakïnwa. Israelitanakajj Babilonia markar apatäpkäna uka qhepatjja, Diosan yaqhep servirinakapajj arameo arwa parljjapjjäna. Alejandro Magno chachajj walja markanak katuntkäna ukhajja, griego (koiné) aruw niya taqe markanakan parlasjjäna. Judionakas uka arwa parljjapjjarakïna, ukatwa Hebreo Arut Qollan Qellqatanakajj uka arur jaqokipasiñapajj wakisïna. Jaqokipaskäna uka qellqatanakat wali uñtʼata ukhamarak nayrïrejja, Septuaginta sasin uñtʼatänwa. Uka qellqatjja, 72 jaqenakaw jaqokipapjjäna, ukatwa taqpach qellqatajj jan mä kikpak luratäkiti. Yaqhepajja jaqokipañatakejj sapa arutakejj mä aru jikjjatañatakiw chʼamachasipjjäna, yaqhepasti amuyuparjamakiw jaqokipapjjarakïna. Kunjamsay jaqokipapkchïnjja, griego aru parliri judionakasa cristianonakasa, Septuaginta qellqatarojj Diosan Arupawa sasaw sapjjerïna. w15 12/15 1:4-6

Santiago 3:6 qellqatajj akham siwa: “Lajjrajj mä ninampi sasiwa” sasa. Kunjamtï ninajj maynir jan walinakar puriykaspajja, ukhamarakiw arsutanakasajj maynir jan waltʼayaspa. Cheqas kuntï arsktan ukajj maynirojj jan waltʼayaspawa, jan ukajj yanaptʼaspawa sasaw Bibliajj qhanañchi (Pro. 18:21). Ukhamasti, ‘arsutajampejj mayniruw chuym ustʼayirista’ sas amuyasin amukïñajj janiw wakiskaspati. Ninat amuytʼaskakiñäni, janiw jan phichantasiñ laykukejj nina jan apnaqjjsnati. Wali amuyumpi apnaqasajja, ninampejj juntʼurtʼassnawa, phaytʼassnawa, chʼamakansa qhantʼayasiraksnawa. Arsutasampejj niya ukhamarakiwa, jiwasatï amuytʼasis parlañäni ukhajja, Jehová Diosaruw jachʼañchañäni, ukatsti jaqe masisarus yanaptʼarakiñäniwa (Sal. 19:14). Kunjamas jikjjatastan, kunsa amuytan ukjja, arunakasampi jan ukajj amparamp parlasaw sissna, ukanakajj Diosan mä suma regalopawa. Ukampis janiw arunakasampi mayninakar chuym ustʼayañasäkiti, jan ukasti arunakasamp yanaptʼañasawa (Sant. 3:9, 10). w15 12/15 3:1-3

Pablosa jupamp chika saririnakas usuntapkäna ukhajja, Lucasajj jupanakar qollirïpachänwa. ¿Kunatsa ukham sistanjja? Biblianjja, Pablojj viajkasin awisajj usuntänwa sasaw qhanañchi (Gál. 4:13). Jesusajj sänwa: “Kʼumaranakatakejj janiw qolliri munaskiti, jan ukasti usutanakatakiw qollirejja munasejja” sasa (Luc. 5:31). Ukhamasti Lucas chachajj wali sumpunwa yanaptʼpachäna. Lucasajj doctoränwa janiw aleq mä qollirikïkänti. Biblianjja kawkinsa doctoräñatak yateqäna uka toqet janiw kamskisa, ukampis inas Laodicea markan yateqchïna. ¿Kunatsa ukham sistanjja? Pablojj Colosas markankir cristianonakar qellqasinjja, Lucasan aruntäwinakapwa apayäna, Colosas markajj janiw Laodicea markat jayan jikjjataskänti. Ukhamajja, Lucasatï Laodicea markan yateqchïna ukajja, Colosas markankir cristianonakar uñtʼpachänwa. ¿Kunatsa Lucasajj doctoränwa sasin saraktanjja? Lucas libronjja Jesusajj kuna kasta usunakatsa jaqenakar qolläna ukanakaw uñsti. Uka usunakat qhanañchañatakejja, kuna arunaktï doctoranakajj apnaqapki uka arunakampiw Lucasajj yaqhep cheqanak qellqatayna, Hechos libronjja ukham arunakajj uñstarakiwa. w15 12/15 4:11, 12

Jehová Diosajja, Yoqaparuw jiwasanak layku jiwañapatak aka Oraqer khitaniwayi, ukhamatwa munasiñap uñachtʼayistu (Juan 3:16; 1 Juan 4:9, 10). Uka toqetjja, apóstol Pablojj sänwa: “¡Jiwasarojj mä jachʼa churäwi [Diosajj] churistojja, ukasti jan amuytʼkayawa!” sasa. Kuntï Diosajj jutïritak arsuwayki ukajj Jesusan jiwatapjjaruw phoqasini (2 Cor. 1:20). Jesusan jiwas layku jiwatapajja, Diosan ‘jan amuytʼkaya mä jachʼa churäwipawa’, Diosajj kunja munasiñampis uñjistu ukajj Jupan yaqha ‘jachʼa churäwiparakiwa’. Diosan uka regalopajj wali sumapuniwa, janiw arumpejj qhanañchañjamäkiti. Uka regalo katoqasajj ¿kunjamsa jikjjatastanjja? ¿Kunsa lurañasa? Jan wali luräwinakjja jaytjjañasawa, yaqhanakar munasiñampi, khuyapayasiñamp uñjañatakiw chʼamachasiñasa, jan wal lurapkistu ukanakarus perdonañasarakiwa (1 Ped. 3:18). w16.01 2:1, 2, 4, 5

Inas ajllit mä cristianojj akham jisktʼaschispa: “¿Kunatsa Diosajj alajjpachar sarañatak nayar ajllpachïtu?” sasa. Ukatjja, uka luräwi phoqañatakejj janis wakichtʼatäkaspa ukhamwa amuyasirakispa. Ukampis alajjpachar sarañataki ajllitätapat janiw pächaskiti. Cheqansa ajllit cristianonakajj Pedrojj jikjjataskäna ukhamwa jikjjatasipjjaraki, jupasti sänwa: “Yupaychañäni Diosaru, Jesucristo tatitun Awkiparu, jupasti jachʼa khuyapayasiñap laykuwa jiwasarojj machaqat naciyistu, Jesucriston jiwatanak taypit jaktatap toqe. Ukasti jiwasanakarojj suytʼañanwa jakayarakistu, ukhamarakiw jumanakarojj kuntï Diosajj imarapkistus uka herencia alajjpachanjja katoqayapjjätam, ukajj janiw tukjatäkaspati, ni qʼañuchatäkaspasa, janirakiw mä panqarjamas wañskaspati” sasa (1 Ped. 1:3, 4). Ajllit cristianonakajj uka arunak liytʼapjje ukhajja, Dios pachpas uka arunak jupanakar siskaspa ukhamawa. w16.01 3:11, 12