Octubre

Jesusajj jaktankäna uka qhepatwa Diosajj alajjpachar sarapjjañapatakejj yaqhepar ajlliñ qalltäna. Amuyatajja nayrïr patak maranakan jakiri cristianonakajja, inas taqeni alajjpachar sarañataki ajllitäpjjchïna. Qhepatjja, yaqhep jaqenakajj walja maranakaw cristianöpjjtwa sasin sapjjäna, ukampis ukajj kʼarïnwa. Ukhamäkchïnsa, Diosajja jupar taqe chuyma serviri cristianonakar ajlliskakïnwa (Mat. 13:24-30). Aka qhepa urunakansa, Diosajj ajlliskakiwa, ukhamat 144.000 ajllitanakar phoqachañkama. Jehová Diosatï akapacha janïr tukuskipan mayniru alajjpacharu sarañataki ajllini ukhajja, janiw Jupat jan wal parlañasäkiti (Isa. 45:9; Dan. 4:35; Rom. 9:11-13, 16). Jesusajj mä uñachtʼäwipan parlkäna uka trabajirinakjamäñ janiw munktanti. Uka uñachtʼäwinjja, alwat trabajirinakarusa, mä horak trabajirinakarusa patronapajj mä kikpakwa qollq churäna, uk uñjasaw alwatpach trabajirinakajj patronapat jan wal parlapjjäna (Mat. 20:8-15). w16.01 4:15

Diosajj janiw kuntï Abraham chachar maykäna ukham lurañas maykistuti. Diosajj maykistu ukanak janis sum amuykstanjja, jan ukajj ukanak phoqañajj chʼamakïchi ukasa, istʼaskakiñasawa, ukwa Diosajj muni. Yaqhep jilat kullakanakatakejja, jan uñtʼat jaqenakaru Diosan arunakapat parlañaw chʼamakïspa. Yaqhepatakisti yateqer masinakapata, jan ukajj trabajir masinakapata mayjäñaw chʼamarakïspa (Éxo. 23:2; 1 Tes. 2:2). Inas awisajj Abraham chachjam jikjjatasirïsta. Jupajja, mä qollur sarasinwa Isaac yoqaparojj sacrificiot loqtañapäna, uk lurañajja jupatak wali chʼamänwa. Ukham jikjjatasirïsta ukhajj jan sint llakisimti. Kunas Abraham chacharojj Diosan mayitanakap phoqañatakejj yanaptʼäna uk amtapunim. Diosar confiyiri nayra tiempon jakasir chachanakarusa warminakarusa, Diosan mayitanakap phoqañatakejj kunas yanaptʼäna uka toqenakat lupʼiñajja, jupanakat yateqasiñataki ukhamarak Diosamp sum apasiñatakiw yanaptʼistani (Heb. 12:1, 2). w16.02 1:3, 14

Saúl reyejj Davitar jiwayañwa munäna. Uk yatisajja, Jonatanajj mä amtaruw puriñapäna. ¿Khiti toqetsa saytʼasispäna? Mä toqetjja, awkiparuw istʼañapäna, maysa toqetsti Davitampiw mä juramento lurarakïna. Ukatsti, Diosajj janiw Saular yanaptʼjjänti, jan ukasti Davitaruw yanaptʼäna, uksa yatirakïnwa. Ukatwa Davitar jan jaytañ amtäna (1 Sam. 19:1-6). Jiwasajja, khiti toqets saytʼasiñäni uk amuyasiñasarakiwa. Jiwasatï markasata, yateqañ utasata, jan ukajj gustkistu uka pelot anatirinak toqeta saytʼasjjsna ukhajja, Jehová Dios toqet saytʼasiñajj janiw nayrankjjaspati. Kunas Henry jilatar pasäna uk amuytʼañäni, jupajj ajedrez anatañ sum yatïna. Escuelapajj walja kutiw ajedrez anatañan atipatayna, ukatwa mayamp atipañapatak yanaptʼañ munäna. Niyakejjay ajedrez anatañajj sapa seman tukuya apasirïchïnjja, tantachäwinakar sarañatakisa yatiyir sarañatakis janiw tiemponëjjänti. Jilatajj siwa: “Diosan munañap lurañat sipansa, escuelajar yanaptʼañaw nayrankjjäna, ukatwa escuelan ajedrez anatañ jaytjjayäta” sasa (Mat. 6:33). w16.02 3:10, 12

Jumatï waynästa jan ukajj tawaqösta ukhajja, cheqapunit bautisasiñ munta janicha ukjja, ¿kunjamatsa yatisma? Jehová Diosar mayisitamat amuytʼañamawa. Jumajja, ¿Diosarojj qawqha kutis mä urun mayistajja? ¿Kunjamas mayisitamajja? Kunanakatï llakisiyktam ukanakatjja, ¿qhana arunakampit mayista? Uka jisktʼanakar qhanañchañaw Jehová Diosan amigopätati janicha uk yatiñatakejj yanaptʼätam (Sal. 25:4). Awisajja, Biblia toqew Jehová Diosajj mayisitanakasar jaysistu. Ukatwa Diosan amigonakapajj Bibliat yatjjatañatak chʼamachasipjje. Ukhamatwa Diosar cheqpachapuni uñtʼañ munapjjatapsa, taqe chuyma serviñ munapjjatapsa uñachtʼayapjje (Jos. 1:8). Ukhamajj akham jisktʼasim: “¿Qhana arunakampit mayistjja? ¿Sapa semanat Diosan Arupat yatjjatasktjja? ¿Taqe chuymati Familiana Diosar Yupaychañataki Aruman arstʼañatakejj chʼamachastjja?” sasa. Uka jisktʼanakaw kunatsa bautisasiñ munta uk yatiñatakejj yanaptʼätam. w16.03 1:11, 13

Diosan arunakap yatiyasajj walja jaqenakaruw yanaptʼtanjja. Ukaw Anuario libronjj sapa mara uñjasi. Ukatjja, kimsa uru jachʼa tantachäwinsa, walja markanakat jachʼa tantachäwinsa mayachtʼataw jilat kullakanakasampejj irnaqtʼtanjja. Uka tantachäwinakanwa Jehová Diosar serviskakiñatak chʼamañchtʼir arstʼäwinaksa dramanaksa istʼtanjja uñtaraktanjja. Maysa toqetjja Jesusan jiwäwip amtañataki tantachäwiw mayachtʼarakistu. Uka tantachäwejj sapa maraw nisán phajjsit 14 uru saraqatarojj Inti jalantjjar apasi. Uka urojj Oraqpachanwa Jesusan jiwas layku jiwatapata yuspärañataki tantachtʼastanjja (1 Cor. 11:23-26). Uka tantachäwiru jutirinakarusti wali kusisitaw katoqaraktanjja. Cheqansa walja semananak nayraw jupanakarojj uka tantachäwir jiwasamp chika sarapjjañapatak invitʼtanjja. Jiwas sapakejj janiw jachʼañchatäñapäki, yupaychatäñapäki uka Jehová Diosan yatiyäwinakapjj Oraqpachan yatiyksnati. Ukampis taqeni yatiyir sarañatak chʼamachastan ukhajja, waranq waranqa jaqenakaruw uka yatiyäwimpejj pursna. w16.03 3:4, 6, 7

Taman yanaptʼañ muniri jilatar kun lurañapatakis mä jilïr irpirejj mayini ukhajja, kunatsa lurañapa ukjja Bibliampiw qhanañchtʼañapa. Ukhamatwa Bibliarjam lurañapataki yanaptʼani. Sañäni, Tantachasiñ Uta mantaña pichañapataki jilatar mayini ukhajja, Tito 2:10 qellqatwa jupar uñjjattʼayaspa. Ukatjja, akham sasaw uka qellqatampejj qhanañchtʼaspa: “Jumatï sum pichstʼäta ukhajja, Diosan yatichäwipajj sumätapwa jaqenakajj amuyapjjani. Ukatjja jilïr jilat kullakanakarus yanaptʼarakïtawa” sasa. Jupampi ukham parltʼasajja, mayninakan askip thaqhañapatakiw yanaptʼani. Kunapachatï luratanakapampi jilat kullakanakar yanaptʼatap amuyani ukhajja, kusisitaw jikjjatasirakini. Jilatatï jilïr irpirin ewjjtʼaparjam lurani ukhajja, ‘walik ukham lurtajja’ sasaw jilïr irpirejj chʼamañchtʼañapa. Ukhamatwa nayrar sartaskakiñapatak yanaptʼani. Jilatar ukham chʼamañchtʼañajja, mä alirus jiltañapatak umamp warjjatʼkaspa ukhamawa. w15 4/15 2:7, 8

¿Awisajj sapaki, sinti jan walin jikjjatasirïtati? Inas jan trabajoni, usuntata, yateqañ utan jan waltʼäwinakana, jan ukajj kunayman yaqha jan waltʼäwinakan uñjasirïsta. Ukhaman uñjasis jan khitin yanaptʼatajj inas chuyma ustʼat jikjjatasirïsta. Cheqas jaqejj janiw yaqhep jan waltʼäwinak askichkaspati. Ukhamanakan uñjasisajj ¿kunsa lurasma? Jehová Diosaruw confiyañama, ukatakiw Bibliajj chʼamañchtʼistu (Pro. 3:5, 6). ¿Diosar cheqapunit confiysna? ¡Jïsa! Jehová Diosajj servirinakapar yanaptʼiwa, ukjja Biblian utjki uka sarnaqäwinakaw uñachtʼayistu. Jumatï jan walin uñjassta ukat janirak khitis yanaptʼkstam ukhajja, jan sint llakisimti. Pablot yateqasim, jan waltʼäwinakan uñjasisajj Jehová Diosar taqe chuym confiyam. Ukatsti ukhaman uñjasisajj kunjamsa Jehová Diosajj yanaptʼasktam uksa juma pachpaw amuyañamaraki. Ukhamtï lurätajja, Jehová Diosarojj jukʼampiw confiyäta ukat jukʼamp sumwa Jupampejj apasirakïta. w15 4/15 4:3-5

Dios contra saytʼasipjjañapatakiw Supayajj jaqenakar engañji (1 Juan 4:8). ¿Kunjamsa uk luri? Diosan amigopäñajj janis wakiskaspa ukhamwa jaqenakar amuyayi (Mat. 5:3). Supayajj jaqenakan amuytʼanakapjja chʼamaktʼayiwa ukhamat Jehová Diosan cheqa yatichäwinakap jan yateqapjjañapataki. Jehová Diosajj janiw yaqha diosanakar yupaychañas munkiti, Supayajj uk sum yati (Éxo. 20:5). Ukatwa kunayman kʼari religionanakamp jaqenakar engañji. Jaqenakajj Diosar yupaychañat sipansa nayra achachilanakaparu, kunanakatï alajjpachansa akapachansa utjki ukanakar yupaychapjje ukhajja, Supayajj walpun kusisi. Ukanak lurapki ukanakajj Jehová Diosarus kusisiyapkaspa ukhamwa amuyapjje, ukampis yupaychatanakapajj inamayakiwa. Isaías profetan tiempopanjja niya ukhamarakiw israelitanakampejj pasäna. Ukatwa Diosajj jupanakar akham säna: “¿Kunatsa qollqenakam kunatejj jan askïki ukar inamay tukjasipkta? Sum istʼapjjeta, ukatsti [...] sinti suma manqʼanak manqʼapjjäta” sasa (Isa. 55:2). Uka arunakampejja, kʼari religionanakajj jan wali manqʼampi sasïkaspas ukham amuytʼayasaw Diosajj jupanakar yanaptʼañ munaskäna. w15 5/15 1:14, 15

Kunjamsa uka arunakajj phoqasini uk Abel chachajj wal lupʼpachäna, ukat qalltan kunjamtï Adanampi Evampejj jan juchanïsajj jakasipkäna ukham wasitat jakañatakejja, mayniw ‘kayut achjatäñapäna’ uksa amuyarakpachänwa. Diosajj arsutanakap phoqapuniniwa sasaw taqe chuyma confiyäna (Gén. 4:3-5; Heb. 11:4). Noé chachajj ukhamarakiw Diosar iyawsatapat Uma Juiciot qhespïna (Heb. 11:7). Uma Juicio pasatatsti, Diosar iyawsatapatwa sacrificio loqtarakïna (Gén. 8:20). Noejj Abel chachjamarakiw kunjamsa jaqenakajj juchampita jiwañampita, qhespiyatäpjjani ukar taqe chuyma confiyäna. Uma Juicio qhepat jan walinakajj wasitampiw utj-jjäna, ukhaw Nemrod chachajj Dios contra saytʼasïna, ukhamäkchïna ukhasa, Noé chachajj Diosar iyawsaskakïnwa, arsutanakap phoqasiñapsa suytʼaskakïnwa (Gén. 10:8-12). Jaqenakajj kunjamsa jan wali apnaqerinakata, juchata, jiwañata qhespiyatäpjjani uk amuytʼañajj Noé chachar wal chuymachtʼpachäna. Jiwasajj ukhamarakiw jutïr urunak uñjksnas ukham amuytʼsna (Rom. 6:23). w15 5/15 3:4, 6

Kuna jan walinakantï jutïr urunakan uñjassna ukanakat sinti lupʼisksna ukhajja, usuntjjsnawa, Diosarus janiw confiyjjsnati. Ukhamajja, jan walinakan uñjasisajj Jehová Diosaw yanaptʼitani sasin confiyapjjañäni. Ukat kuntï jichhürutak ajllita jiskʼa tʼaqajj siski uka arunak amtapjjapuniñäni. Cheqansa, kunjamsa jikjjatastan uk amuytʼasin suma arunakampi maynejj chuymachtʼistu ukhajja kusisitaw jikjjatastanjja. Jehová Diosar servir awk taykasampi, espososampi esposasampi, jan ukajj sum uñtʼkistu uka amigosampi parltʼañajja, jan sint llakisiñatakiw yanaptʼistu. Pablojj akham sänwa: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim. Diosajj jumanakarojj churapjjarakïtamwa samarañapa, ukasti taqe kuntejj jaqejj amuytʼkaspas ukat jukʼamp jachʼawa. Uka samarañasti jumanakan chuymanakamsa, amuyunakamsa imaniwa Cristomp mayakïpjjatam layku” sasa (Fili. 4:6, 7). Ajay toqet jan aynachtʼañatakejja, jilat kullakanakasa, jilïr irpirinakasa, Amuyasiri Cheqapa Uywatasa, angelanakasa, Jesusasa, Jehová Diosasa walpun yanaptʼapjjestu uk janipuni armañäniti. w15 5/15 4:16, 17

Jerusalén markanjja, Jesusajj templot alay toqen wali uñtʼat mä estanqueruw saräna. Uka estanquerojj kunayman usuni jaqenakaw sarapjjerïna, ¿kunarusa? Umar mantasinsa maynejj qollasjjaspa ukhamwa amuyapjjerïna. ¿Kunatsa Jesusajj ukar sarpachäna? Jaqenakar munasiñatwa saräna. Uka jaqejj janïr Jesusajj aka Oraqen naskäna uka nayratpacha usutäjjänwa (Juan 5:6-9). Jesusajj uka usuntat jaqerojj akham sasaw jisktʼäna: “¿Qollatäña muntati?” sasa. Jupajj wali llaktʼataw Jesusar säna: “Tata, janiw khiti yanaptʼiris utjkituti uma onjjtkipan mantañajjatakejja. Sapa kuti mantañ munkta ukkhajja, yaqhakiw nayraqat mantawayjje” sasa. Ukjjarusti Jesusajj uka jan sartirjam jaqerojj sänwa: “Sartam, ikiñam apthapisim, ukatsti sarjjarakim” sasa. Ukspachaw uka jaqejj qollatäjjäna, ikiñap apthapisinsti sartawayjjarakïnwa. Jutïr pachanjja Jesusajj walja milagronakwa lurani. Jesusan jaqenakar wal munasitapsa amuyaraktanwa. Walpun jupajj jaqenakar yanaptʼañ munäna, ukatwa estanquerojj saräna. Jiwasajj jupatwa yateqasiñasa. Akapachanjja walja jaqenakaw kunayman jan waltʼäwinakan uñjasipjje, jiwasajj jupanakar yanaptʼañwa munaraktanjja, ukhamajj yanaptʼa munapki uka jaqenakar thaqhasipkakiñäni. w15 6/15 2:8-10

Jesusajj Diosat mayisiñ akham sasaw yatichañ qalltäna: “Nanakan Awkejja” sasa. Ukhamasti Jehová Diosajj taqe aka Oraqpachankir jilat kullakanakan Awkipawa (1 Ped. 2:17). Jehová Diosajja, mä qawqha cristianonakarojj alajjpachar sarapjjañapatakiw ajlliwayi. Jupanakasti Jehová Diosan wawapjam uñtʼatäjjapjjewa (Rom. 8:15-17). Aka Oraqen jakañataki suytʼäwinïpki ukanakajj Jehová Diosarojj ‘Awki’ sapjjarakispawa. Jehová Diosaw jupanakarojj jakañsa, ukhamarak kunanakatï jakañatak munaski ukanaksa churi. Ukampis jutïrin kunapachatï jan juchanëjjapjjani ukhamarak qhepïr yantʼaru atipapkani ukhaw Jehová Diosajj wawanakaparjam katoqjjani (Rom. 8:21; Apo. 20:7, 8). Jichhürunakanjja, cristiano awk taykanakajj akham sasaw wawanakapar yatichapjje: ‘Jehová Diosajj Awkisawa, jupar mayisiñajj wali askiwa’ sasa. w15 6/15 4:4-6

“Ñanqhatjja qhespiyapjjeta” sasin mayisisajja, Supayat jarkʼaqapjjeta sasaw Diosat mayisisktanjja. ¿Kunjamatsa Supayat jarkʼaqatäñ munatas uñachtʼaytanjja? Akapachar jan mitisisa ukhamarak “akapachan yänakapsa” jan munasa (Juan 15:19; 1 Juan 2:15-17). Jehová Diosajj niyaw Supayarojj waranqa maranakatak ñachʼantani, ukatjja aka ñanqha pacharus tukjarakiniwa. Uka uru puriniñapkamasti, Supayajj Jehová Diosar serviñat kunaymanitwa jitheqtayañ munistani. Jupajj tiempopan jukʼakïtap yatisisajj wali coleratawa, ukatwa Diosarojj “ñanqhatjja qhespiyapjjeta” sasin mayiskakiñasa (Apo. 12:12, 17). ¿Supayajj jan utj-jjani uka pachan jakasiñ munasmati? Ukhamächi ukhajja, Jesusajj mayisiñ yatichkäna ukarjamaw sarnaqañama. Ukatakejja, Reinomampisti apnaqapjjeta, sutimasti jachʼañchatäpan, munañamajj aka Oraqen luraspan sasaw Diosar mayisiñama. Kunanakatï jakañatakisa Jupat jan jitheqtañatakis munaski ukanakjja Diosajj sapüruw churätam, uka toqet janipun pächasimti (Mat. 6:9-13). w15 6/15 5:12, 17, 18

Kʼari religionanakar tʼunjañajj saytʼayatäkani uka tiemponjja kunanakas pasani uk janiw yatktanti. Inas chʼama tiemponakächini, inas utanakassa jan ukajj yänakassa aptʼaschiñäni. Jerusalenat sarjjañatakejja, cristianonakajj utanakapsa yänakapsa jan ukajj cosasanakapsa jaytanukupjjänwa, ukat kunayman jan waltʼäwinakanwa uñjasipjjarakïna (Mar. 13:15-18). Ukatwa jiwasajj akham sas jisktʼasiñasa: “Kunanakatï utjkitu ukanakat mä qawqhampiki qheparañatak ¿wakichtʼatätti? Jehová Diosat jan jitheqtañatakejj kunanak lurañay wakischini ukanak lurañatakejj ¿wakichtʼatätti?” sasa. Uka tiemponjja, kuna jan walinakansay uñjaschiñänejja, jiwasakiw Jehová Diosar yupaychaskakiñäni. Ukham lurasasti Daniel profetat yateqasitaswa uñachtʼayañäni (Dan. 6:10, 11). Jachʼa tʼaqhesïwi tiemponjja, “Diosan reinopat” suma yatiyäwinakajj janiw yatiyasjjaniti. ¿Kunatsa? Uka toqet yatiyañajj tukuyatäjjaniwa. ‘Akapachan tukusiñapakiw’ suyatäjjani (Mat. 24:14). Ukäñkamasti juchañchäwi arunakakwa jan ajjsartʼas yatiyjjañäni. Inas akham sas yatiychiñäni: “Supayan akapachapajj niyaw tʼunjatäjjani” sasa. w15 7/15 2:3, 8, 9

Jan akapachankirïpjjatam laykojja waljaniw uñisipjjätam sasaw Jesusajj säna. Uka jaqenakajj janiw Diosan gobiernopat kunsa yatipkiti. Ukatwa Diosan gobiernop toqet saytʼasiñajj kunatsa jiwasatak wali wakiskirejja uk jan amuyapkiti. Ukhamajja, kunsay jaqenakajj parlasipkpan jan ukajj kunsay lurasipkpan Jehová Diosatakjam sarnaqañatakisa, Jupar istʼañatakisa chʼamachasiskakiñäniwa (Dan. 3:16-18). Qʼajjo wayn tawaqonakatakejja, mayninakat sipan mayjäñajj chʼamakïspawa. Yaqhepanakajja, inas ajjsarañat banderar aruntjjapjjakchispa, jan ukajj yaqha ukhamanak lurjjapjjakchispa. Ukatwa awk taykanakajj jan ajjsaras saykatapjjañapatak wawanakapar yanaptʼapjjañapa. ¿Kunjamsa yanaptʼapjjaspa? Kunjamsa Jehová Diosajj ukanak uñji ukjja, Familiana Diosar Yupaychañataki Arumanwa parltʼapjjaspa. Ukatsti, Bibliat yateqapki uk qhana arunakampi respetompi parltʼañatakiw yatichapjjarakispa (Rom. 1:16). Wakischi ukhajja, awk taykanakajj kunarutï iyawsktan uka toqetwa yatichirinakar qhanañchtʼapjjarakispa. w15 7/15 3:15, 16

Jehová Diosajja, wali munat Yoqaparu aka Oraqer khitanisarakiw munasiñap uñachtʼayistu. Jesusasti jiwasan ‘wiñay jakañanïñasatakiw’ jakäwip loqtasiwayi (1 Juan 4:9). Apóstol Pablojj akham sänwa: “[Cristow] horasapar jiwawayi jiwasan juchanakas layku. Janiw khitis jasakejj mä jaqe layku jiwkaspati, ni mä aski jaqe laykusa; inas maynejj jiwarakchispa mä suma aski jaqe layku. Ukampis Diosajj munasiñapwa uñachtʼayistu, kunapachatejj jiwasanakajj juchanïskäyätan ukapachaw Cristojj jiwasanak layku jiwawayi” sasa (Rom. 5:6-8). Jesusan jiwatapajja qawqsa Jehová Diosajj munasistu ukwa uñachtʼayistu, ukatsti Jesusan jiwatap toqew Diosampejj sum apasiraktanjja. Kunjamtï uñjktanjja, Jehová Diosajj Yoqapar aka Oraqer khitanisajja, jaqenakar munasitapwa uñachtʼayäna. Jumatï Diosar taqe chuyma serviskakïtajja, jutïrin wali suma Paraisonwa jakasïta. Cheqansa, ukajj Jehová Diosan suma regalopawa, ukat sipan yaqha jukʼampi suma regalojj janiw utjkaspati. w15 8/15 1:13, 15

Jehová Diosan apnaqata mä suma Paraison jakasisajj wali kusisitaw jikjjatasiñäni. Ukatwa jichhatpach Diosan markapar istʼañataki chʼamachastanjja. Ukampis Jehová Diosan markapajja, inas awisajj yaqha luräwinak phoqañatak maychistaspa. Amuytʼañataki, Estados Unidos markankir Betelan trabajir yaqhep jilat kullakanakajja, Betelat mistusin yaqha luräwinak phoqapjjañapatakiw mayisiwayi. Tamanak tumptʼirinakat yaqheparojja, chuymanïpjjatapata jan ukajj yaqha ukhamanakatwa precursor especialjam servipjjañapatak mayisiwayaraki. Ukham yaqha luräwinak katoqasajja, uka jilat kullakanakajj wali kusisitaw jikjjatasipjje, Jehová Diosas jupanakarojj wal bendici. Jiwasatï kusisita jakasiña, ukhamarak Jehová Diosan bendicionap katoqañ munstan ukhajja, ¿kunsa lurañasa? Jehová Diosaruw oracionan yanaptʼa mayiñasa, kuntï lurirjamäktan ukwa lurañasa, kuna luräwi katoqasas kusisitäñasarakiwa (Pro. 10:22). Paraisonjja, inas mä cheqajj jakasiñatak wal gustchistaspa, ukampis yaqha cheqan jakasiñatak mayistaspa ukhajja, ¿kamachsnasa? Kawkha cheqsay jakañatak churchistani jan ukajj kuna trabajsay katoqchiñänejja, taqe chuymaw phoqañäni. Paraison jakasitasatjja Jehová Diosar walpun yuspärañäni. w15 8/15 3:8

Noé chachan urunakapanjja, jaqenakajj jan walinakakwa lurapjjerïna. Ukampis jupajj janipuniw jan wali jaqenakampejj sarnaqerïkänti. Antisas warmipampi, yoqanakapampi, yoqanakapan warminakapampikiw chikachasïna. Ukatsti taqeniw arca lurapjjäna, Diosan arunakapsa yatiyapjjarakïna (2 Ped. 2:5). Ukhamatwa Uma Juiciot qhespipjjäna. Jiwasanakajj Noé chachampita familiapampita jutirïtanwa. Jupanakatï Diosar jan istʼapkasapäna, ukhamarak jan wali jaqenakampi sarnaqapjjasapäna ukhajja, janiw qhespipkasapänti, jiwasas janirakiw utjkasänti. Maysa toqetjja, nayrïr cristianonakajj Diosar istʼasarakiw sarnaqapjjäna, Diosar jan servirinakampejj janiw chikachasipkänti. Ukaw Jerusalenajj 70 maran tʼunjaskäna ukat qhespiñatakejj yanaptʼäna (Luc. 21:20-22). w15 8/15 4:17, 18

Jiwasatï kusistʼasin sum jikjjatasiñ munstan ukhajja, qawqha tiemposa ukat kunanakampis kusistʼasktan uka toqetwa amuyasiñasa. Ukatakejja, ¿kunjamsa concienciasajj yanaptʼistaspa? Bibliajja, ‘jan wali luräwinakan qhepap jan arkapjjamti’ sasaw ewjjtʼistu. Uka jan wali luräwinakajj akanakawa: wachoqa jucha lurañanaka, qʼañu lurañanaka, vicionaka, idolonakaru yupaychañanaka, layqasiñanaka, uñisisiñanaka, quejanakan sarnaqañanaka, celasiñanaka, jupa pachpatak munañanaka, tʼaqaqtasin yaqha tamanaka tukuñanaka, envidiasiñanaka, jaqe jiwayañanaka, machañanaka, jiljas manqʼañanaka, ukanakaru uñtat yaqha lurañanakampi. “Khitinakatejj akanak lurapki ukanakajja janiw Diosan reinopanjja katoqatäpkaniti” sasaw apóstol Pablojj qellqäna (Gál. 5:19-21). Uk yatisajja, akham jisktʼasiñasawa: “Concienciajarjamajja, ¿markaj toqet saytʼasisin pelot anatañasa, uñchʼukiñasa, jan ukajj usuchjasiñjam anatirinaka uñchʼukiñasa nayatakejj walikïskiti? ¿Kawkïr videonakantï layqasiñanakasa, wachoq jucha luririnakasa, machañanakasa uñachtʼayaski ukanak uñchʼukiñajj walikïskiti?” sasa. w15 9/15 2:11, 12

Jehová Diosajj janiw jaqenakarojj jupanak pachpa apnaqasipjjañapatak lurawaykiti sasaw Bibliajj qhanañchi. Jehová Diosakiw kunjamsa kusisit jakassna uk yati. Ukhamajja, Jupar istʼasa, respetasa sarnaqasakiw kusisita sum jakassna. Taqe ukanakjja Jehová Diosajj jiwasar munasiñatwa yatichistu. Mä munasiri awkejja, wawanakapan suma ukhamaraki kusisita jakasipjjañapwa muni. Ukampis jichhürunakanjja, jila parte jaqenakajj jutïrin kunjamänis aka Oraqen jakasiñajj uk janiw yatipkiti, ukatwa kunanakatï akapachan utjki ukanak jikjjatañataki trabajisajj tiempop inamay aptʼasipjje (Sal. 90:10). Ukampis jiwasajja, walpun Jehová Diosar yuspärtanjja. ¿Kunatsa? Jupaw jichhürunakan kusisita jakasiñatakejj yatichistu, jutïrinsti wiñay jakañwa churarakistani. w15 9/15 4:10, 11

Bibliajj qellqaskäna uka tiemponakanjja, Jehová Diosajj kunjamsa israelitanakar yanaptʼaskäna ukjja waljaniw uñjapjjäna. Sañäni, Jehová Diosajj milagronak lurasaw Egipto markat qhespipjjañapatak markapar yanaptʼäna. Suma Oraqe katoqapjjañapäkäna ukansa, walja guerranak atipapjjañapatakiw yanaptʼarakïna (Jos. 9:3, 9, 10). Cheqas Jehová Diosaw markapar yanaptʼaskäna, ukampis Diosan markaparu uñisir reyinakajj janiw ukar iyawsapkänti. Ukatwa Diosan markap contra nuwasisajj atipjat uñjasipjjäna. Mä qawqha maranak qhepatsti, kunjamsa Jehová Diosajj markapar yanaptʼaskäna ukjja mä reyejj walja kutiw uñjäna, uka reyisti Acab satänwa, jupajj wali qhoru reyïnwa. Mä kutejja, Eliasajj alajjpachat nina saraqaniñapatakiw Diosar mayïna, Diosasti mayisïwipjja istʼänwa. Ukhamarusa, Elías profetajja walpun Diosajj jall puriyanini sasaw Acab reyir säna. Ukhamapuniw phoqasïna (1 Rey. 18:22-45). Jehová Diosaw taqe uka milagronak luraskäna, ukampis Acab reyejj janiw uk iyawskänti. ¿Kunsa ukajj yatichistu? Jehová Diosajj kunjamanakatsa jakäwisan yanaptʼistu uk sum amuyañasawa. w15 10/15 1:4, 5

Jiwasatï Jehová Diosar confiyañäni, Jupatakjam sarnaqarakiñäni ukhajja, Diosajj yanaptʼistaniwa. Apóstol Pablojj akham sänwa: “Diosajj jachʼañchatäpan, jupajj chʼamaniwa kuntejj mayktan, lupʼkaraktan ukanakata jukʼampi lurañataki, chʼamap toqe jiwasanak taypina luratapata” sasa (Efe. 3:20). Janis taqe kunpun lurirjamäkstanjja, kuntï Jehová Diosatak lurirjamäktan uk lurañatakejj taqe chuymaw chʼamachastanjja, ukham chʼamachasitas Diosajj bendiciniwa sasaw confiytanjja. Jehová Diosan yanaptʼap uñjasajj wal kusistanjja. Jiwasatï Diosan munañaparjam kuns mayiñäni ukhajja, Diosajj churistaniwa (1 Juan 5:14). Jehová Diosar taqe chuyma confiyañäni ukhajja, Jupajj bendicistaniwa, ukatsti jukʼamp iyawsäwi mayiñäni ukhas churarakistaniwa. Ukhamatwa jukʼamp iyawsäwinïñäni, ‘Diosan markaparusa’, mä arunjja, Reinoparus mantarakiñäniwa (2 Tes. 1:3, 5). w15 10/15 2:16-18

Jehová Diosan luratanakapata ukhamarak Arupat lupʼiñajja, cristianjam jiltañatakiw yanaptʼistani (Heb. 5:14; 6:1). Maynitï Diosan luratanakapata, Arupata lupʼiñatak jan tiempo apstʼaskaspa ukhajja, iyawsäwipan aynachtʼaspawa, Diosan markapatsa cheqa yatichäwinakatsa jitheqtjjarakispawa (Heb. 3:12). Khitinakatï Diosan Arup jan ‘taqe chuymampi istʼapki, ukhamarak jan katoqapki’ ukanakajj janiw cheqa yatichäwinak katjjasipkaspati, jan ukasti ‘kunayman llakisiñanakampi, qamirkankañampi, akapach kusistʼañanakampiw’ apayasipjjaspa sasaw Jesusajj säna (Luc. 8:14, 15). Ukhamajj Diosan Arupat lupʼisipkakiñäni. Ukaw Jehová Diosat yateqasiñatakisa Jupjam chuymanïñatakis yanaptʼistani (2 Cor. 3:18). Jehová Diosar uñtʼañasa, Jupat yateqasiñasa janiw tukuskaniti, wiñayatakïniwa. ¡Ukajj mä suma bendicionapuniwa! (Ecl. 3:11.) w15 10/15 4:13, 14

Awk taykanakjamajja, wawanakaman Jehová Diosat jan jitheqtapjjañapwa munapjjpachätajja. Diosajja, wawanakamaru Jupatakjama sarnaqapjjañapataki yanaptʼapjjasma sum uywapjjasma ukwa muni (Efe. 6:4). Wawanakamar sapüruw Bibliat yatichapjjañama. Mä awkejja, wawanakapan escuelar sarapjjañapwa munejja, ukhamat yateqapjjañapataki, jakäwitak wakichtʼatäpjjañapataki. Cristiano awk taykanakajja, ukhamarakiw wawanakapan Jehová Diosar uñtʼapjjañap munapjje, cheqas ukaw jan walinakat amuytʼasiñatakejj yanaptʼaspa. Ukatwa tantachäwinakata, jachʼa tantachäwinakata, Familiana Diosar Yupaychañataki Arumat jan faltasipjjañapatak chʼamañchtʼapjje. Kunjamtï Jesusajj arkirinakapar yatiyapjjañapataki yanaptʼkänjja, ukhamarakiw awk taykjamajj wawanakaman yatiyapjjañapataki yanaptʼapjjañama. Nayraqatajja, yatiyir sarañaru yatintapjjañapatakiw yanaptʼapjjañama. Ukatsti jaqenakaru Bibliat parlañ munapjjañapatakiw yanaptʼapjjañamaraki. w15 11/15 2:6

Familia taypin pʼeqtʼirirojja, Jehová Diosaw uttʼayawayi. Ukhamajj familiapar janiw jan wal uñjañapäkiti, jan ukasti wali munasiñampiw uñjañapa, ukwa Jehová Diosajj muni. Chachajj warmin pʼeqepawa sasaw Diosan Arupajj qhanañchi. Ukampis warmiparojj jachʼaruw aptañapa sasaw saraki (1 Ped. 3:7). ¿Kunjamsa chachajj warmiparu jachʼar aptaspa? Kunjamäskis warmipajja ukwa amuyañapa, ukatsti kuntï siski uksa istʼañaparakiwa. Bibliajj siwa: “Chachanaka, munasipjjam warminakamaru, kunjämtejj Cristojj [tamaru] munasi, ukhamarak jakañapsa jupa layku aptʼasiwayi ukhama” sasa (Efe. 5:25). Jesusajj walpun arkirinakaparojj munasïna, ukatwa jupanak laykojj jakañapsa aptʼasiwayi. Chachanakatï Jesusat yateqasisina warmiparu munasiñampi uñjapjjani ukhajja, warminakatakejj chachapar munasiñasa, respetañasa, amtanakapar yanaptʼañas janiw chʼamäkaniti (Tito 2:3-5). w15 11/15 4:6, 7

Jesusan arkirinakapajj jiljjattaskakïnwa, ukhamajj jukʼampi griego aru parliri jaqenakaw cristianor tukupjjäna. Niyakejjay griego arojj taqenin parlatächïnjja, Mateo, Marcos, Lucas, Juan qellqatanakajj griego arutwa qellqasïna. Apóstol Pablojj qellqkäna uka cartanakasa, yaqha ukham qellqatanakasa griego arutwa qellqasirakïna. Griego Arut Qollan Qellqatanakanjja, walja cheqanakanwa Hebreo Arut Qollan Qellqatanakat copiasïna, ukanakat jila partejj Septuaginta qellqatatwa copiasïna. Uka qellqatjja jiwasjam pantjasir jaqenakas jaqokipapkchïnjja, ukhamarak janis arut arurjam jaqokipapkchïnjja, uka qellqatanakajj jichhürunakan Diosan Arupat uñtʼatawa. Taqe ukanakajja, ¿kunsa uñachtʼayistu? Jehová Diosajj taqe arunaksa, costumbrenaksa mayak uñjatapwa uñachtʼayistu (Hech. 10:34). w15 12/15 1:8, 9

Taqeniw sapür parltanjja, ukampis ak amuytʼañasawa, jornälpacha parlañajj janiw wakiskapuniti. Diosan Arupajj ‘amuktʼañ horasaw’ utji sasaw qhanañchi (Ecl. 3:7). Kunapachatï maynejj parlaski ukhajj janiw jiwasajj parlañasäkiti, ukhamatwa parlki ukar respetatas uñachtʼayañäni (Job 6:24). Kunatï jan yatiyasiñapäki uksa janirakiw arsuñasäkiti, ni maynin colerayatas jankʼak arsuñasäkiti (Pro. 20:19; 1 Ped. 3:10, 11). Maysa toqetjja, Diosan Arupajj ‘parlañ horasaw’ utji sasaw qhanañcharaki (Ecl. 3:7). Amuytʼañataki, amigomatï mä regalo churiristam ukhajja, wal yuspärasma, uka regalo mä kʼuchur liwkatañat sipansa wali sum uñjasaw yuspäratam uñachtʼayasma. Jehová Diosajj ukhamarakiw mä regalo churistu, cheqas parlirwa lurawayistu. ¿Kunjamsa ukat yuspärsna? Arunakasamp mayninakar chʼamañchasa, Jehová Diosar jachʼañchasa, kunjamsa jikjjatastan, kunsa amuytan uk mayninakar sasinwa yuspäratas uñachtʼaysna. w15 12/15 3:4, 5

Jichhürunakanjja janiw milagro toqe qollir mä cristianojj utjkiti (1 Cor. 12:9). Ukampis yaqhepajj yanaptʼañ munasaw qollasiñ toqet jilat kullakanakar ewjjtʼapjje, jupanakajja yanaptʼa jan mayitpachaw ewjjtʼapjje. Cheqas qollasiñ toqet ewjjtʼañajj janiw jan walipunïkiti. Mä kutejja, apóstol Pablojj Timoteo waynan purak usunïtap yatisajja ewjjtʼänwa, Timoteojj inas jan qʼoma uma umantasin ukham usuntchïna. Ukham ewjjtʼañajj walikïskaspawa, ukampis kuna kasta qollanakampis qollasiñapa, jan ukajj kunsa manqʼañapa, kunsa jan manqʼañapäkaraki uk mayninakar iyawsayañaw jan walïkaspati. ¿Kunatsa? Jilat kullakanakarojj jukʼampiw usuntaysna. Yaqhepanakajja, iyawsayañ laykojj akham sapjjaspawa: “Mä familiarajajj jumjam usutarakïnwa, ukampis aka qolla umtʼasaw walipti” sasa. Inas yanaptʼañ munasajj ukham ewjjtʼsna, ukampis ukham ewjjtʼasajj mayniruw jukʼamp jan waltʼaysna, uk janipun armañäniti (Pro. 27:12). w15 12/15 4:13

Jiwasajj taqeniw Adán chachat jucha katoqawaytanjja, uka jucha laykuw jiwaraktanjja (Rom. 5:12). Ukampis Jehová Diosajj wal munasistu, ukatwa Yoqaparojj jiwas layku jiwañapatak aka Oraqer khitaniwayi (Heb. 2:9). Jesusan jiwatapatjja yaqha askinakaw utjarakini. Mayajj akawa, jiwañajj wiñayatakiw chhaqtayatäni (Isa. 25:7, 8; 1 Cor. 15:22, 26). Taqe khitinakatï Jesusar iyawsapki ukanakajja, wiñayatakiw sumana, kusisita jakasipjjani. Yaqhepajj alajjpachana, yaqhepasti aka Oraqenaraki (Rom. 6:23; Apo. 5:9, 10). Jesusan jiwatapatjja, ¿kuna yaqha bendicionanakas utjarakini? Taqe aka Oraqpachajj mä suma Paraisor tukuyatäniwa, usutanakajj qollatäpjjaniwa, jiwatanakasti jaktanipjjarakiniwa (Isa. 33:24; 35:5, 6; Juan 5:28, 29). Taqe ukanakajja, Jehová Diosampina, Jesusampina munasiñapatwa phoqasini, ukatwa jupanakar munastanjja (2 Cor. 9:15). w16.01 2:5, 6

Kunapachatï Jehová Diosajj mä cristianor alajjpachar sarañatak ajllki ukhajja, amuyupajj mayjtʼiwa. ¿Kunatsa? Janïr alajjpachar sarañatak ajllitäkasajja, aka Oraqen wiñay jakañwa suypachäna. Inas akapachan jan walinak tukusiñap suychïna. Ukatjja, inas jaktaniri familiaranakaparu, amigonakaparu katoqañ suyarakchïna. Maysa toqetjja, uta utachasiñata, uka utan jakasiñata, uvanak yapuchasiñata, uka yapunakat manqʼasiñatwa lupʼpachäna (Isa. 65:21-23). Ukampis alajjpacharu sarañataki Diosan ajllitäsajja, uka cristianon suytʼäwipajj mayjtʼiwa. ¿Kunatsa? ¿Akapachan sinti jan walinak uñjasati suytʼäwipajj mayjtʼpacha? Jan ukajj ¿wali llakinakana, jan walinakan uñjasisacha alajjpachar sarañ amtpacha? Aka Oraqen jakasiñajj janis sumäkaspa, alajjpachan jakañas jukʼamp sumäkaspa ¿uk amuyasati alajjpachar sarañ munpacha? Janiwa. Amuyupjja Jehová Diosaw mayjtʼayi. Kunapachatï Jehová Diosajj alajjpachar sarañataki mä cristianor ajllki ukhajja, Jupaw qollan ajayup churasajj uka cristianon amuyupsa, suytʼäwipsa mayjtʼayi. w16.01 3:11, 13

Jehová Diosaw taqe kunsa lurawayi. Jupakiw wali yatiñanisa taqe chʼamanisa. Mä kutejja Job chachajj Jehová Diosat akham sänwa: “Nayajj yattwa jumajj taqe kunatakisa chʼamanïtama, janiw jumatakejj kunas jan lurañjamajj utjkiti” sasa (Job 42:1, 2). Niyakejjay Diosajj wali yatiñani, taqe chʼamanïchejja, jan khitin yanaptʼataw kunsa luraspa, ukampis taqenir munasitap laykojja Jupajj yanaptʼayasiwa. Amuytʼañataki, Jehová Diosajj Jesusaruw nayraqat luräna. Jupampi yanaptʼayasisaw taqe kunsa lurawayi (Juan 1:1-3, 18). Ukhamasti Jehová Diosajj Jesusampiw yanaptʼayasïna, jupatsa yaqhanakar yatiyarakïnwa, ukhamatwa Jesusar jachʼañchäna (Col. 1:15-17). w16.01 5:1, 2