Febrero

Yantʼanakan uñjastan ukhaw suma cristianöñatak kunas faltaskistu uk amuyassna. Kunjam chuymanïtansa uksa amuyasiraksnawa. Yantʼanakan aguantañajja, jukʼamp suma cristianor tukuñatakiw yanaptʼistani. Amuytʼañataki, pacienciampiw kuns suytʼañäni, jukʼamp yuspärasirïñäniwa, yaqhanakatsa jukʼampirakiw khuyaptʼayasiñäni. Niyakejjay aguantañajj suma cristianor tukuñatak yanaptʼchistojja, janiw jan waltʼäwinakat mistuñ laykukejj Diosan aski yatichäwinakap pʼakintañasäkiti. Sañäni, inas jan wali amuyunak apanukuñatak chʼamachasiskstan. Ukhamächi ukhajja, ukanakar purtʼasiñat sipansa, Jehová Diosaruw uka jan walir jan puriñatak yanaptʼa mayisiñasa. Ukhamatwa jiwas pachpa apnaqasiñ yateqañäni. Familiasantï Diosar serviñ jarkʼapjjchistu ukhajja, janiw aynachtʼkañäniti, jan ukasti taqe chuymaw Jehová Diosar serviskakiñäni. Amtapuniñäni, Jehová Diosamp sum uñjatäñatakejj jan walinakan aguantañasawa (Rom. 5:3-5; Sant. 1:12). w16.04 2:15, 16

Jehová Diosajja, janiw mä qhawqha jaqenakakis mayninakat sipan jukʼamp sumäkaspas ukham amuykiti, jan ukasti Jupatakejj taqenis mä kikpakïtanwa. Jehová Diosajj janiw costumbrenakasat armtʼasiñas munkiti, jan ukasti walja costumbrenak utjatapajja, kunayman jakasiri jaqenak utjatapwa uñachtʼayi (Rom. 10:12). Nasiwayktan uka markat jachʼa jachʼa tukuñajja, uka markar jukʼamp munañatakiw chʼamañchistaspa. Ukarakiw akapachar mitisiñatakejj apistaspa. Cristianonakasa, markasaru jukʼamp munasiñarojj purtʼasiraksnawa. Nayrïr patak maranakansa, yaqhep cristianonakajj yaqha markatäpjjatap laykojja, jilat kullakanakapar jiskʼachapjjänwa (Hech. 6:1). Jiwasajja, ¿kunjamatsa markasat jachʼa jachʼa tukuskatas yatsna? Amuytʼañataki, yaqha markat jutiri mä jilatatï ewjjtʼistaspa ukhajja, ¿uka jilatar istʼañäniti? Jan ukajja, ¿“nanakaw jukʼamp sum lurañ yatipjjta” sasin janich istʼjjañäni? Ukham lurañat sipansa, kunjamtï jichhürutak ajllita textojj siski uka ewjjanakarjamaw lurañasa. w16.04 4:12, 13

Jesusajja, “Diosan Reinopat” suma yatiyäwinakjja yatiyapunirïnwa, arkirinakapajj uka pachparak lurapjjaspa ukwa jupajj muni. Jichhürunakanjja, ¿khitinakas uka yatiyäwinakjja “taqe markanakan” yatiyasipki? (Mat. 28:19). Jehová Diosan Testigonakapakiw uk lurasipki. Walja markanakan misionerot irnaqtʼiri mä sacerdotejja, akham sasaw mä jilatar satayna: “Testigonakarojj sapa markanwa ‘¿kuna toqetsa yatiyapjjta?’ sasin jisktʼirïta. Jupanakasti, jan sum amuytʼasisajj ‘Diosan Reinopatwa yatiyapjjta’ sasin sapjjetäna” sasa. Ukampis uka Testigonakajj janiw jan amuytʼasirïpkänti, jan ukasti cheqpach cristianonakjamajj mä amtanikïpjjatapwa uñachtʼayasipkäna (1 Cor. 1:10). Jupanakasti, kuna toqettï Yatiyañataki sat revistajj yatiyaski uka toqetarakwa yatiyasipki. Uka revistasti, Yatiyañataki. Jehová Diosan Reinopat Yatiyaski satawa. Yatiyañataki revistajja, sapa kuti mistki ukhajj niya 59 millón revistanakaw 254 arunakan imprimisi. Oraqpachanjja, uka revistakiw taqe revistanakat sipansa jilpachajj lakirasi. w16.05 2:6

Precursor regularatsa irnaqtʼañ munksna ukham sañäni. Ukatakejj kunatï wakiski ukampik jakañ amtasajja, jukʼa qollqenïsasa, jan walja cosasanakanïsas ¿kusisit jakasiskakïti? sasaw jisktʼassna. Biblianjja, precursorjamaw Diosar servipjjañama sasin janiw siskiti. Janis precursoräkañänejja, Jehová Diosarojj taqe chuymaw serviskaksna. Ukampis Jesusajja, Diosan Reinop nayrar uchirinakajj walja bendicionanakwa katoqapjjani sasaw säna (Luc. 18:29, 30). Ukatsti, Jehová Diosar jachʼañchañatak chʼamachasitasjja, wali askitwa Jupajj uñji sasaw Bibliajj qhanañchi. Diosajj janiw pä chuyma serviñassa, ni llakit serviñassa munkiti sasinsa qhanañcharakiwa (Sal. 119:108). Uka qellqatanak liytʼasasa, Jehová Diosar oracionan mayisisasa, kunsa Jupajj uka toqet amuyi uk yatsnawa. Suma amtanakar puriñatakis yanaptʼarakistaspawa, Jehová Diosan bendicionapsa katoqaraksnawa. w16.05 3:13

Wayn tawaqonakataki wakichtʼat qellqatanakajja, janiw jupanakatakik luratäkiti, jan ukasti jilïrinakarus yanaptʼarakispawa. Taqeniw iyawsäwis arjjatañasa, chuymasan munañaparjam jan sarnaqañatakis chʼamachasiñasa. Ukatsti, jan walinak lurañataki mayninakajj wiytapkistu ukarusa, taqenirakiw saykatañasa, jan wali kusistʼäwinakatsa jarkʼaqasiñasarakiwa. Wayn tawaqonakataki wakichtʼat qellqatanakajja, taqe ukanakatwa parli, ukham yaqha yatichäwinakatsa parlarakiwa. Jumatï jilïrëjjsta ukhajja, ¿uka qellqatanakajj wayn tawaqonakatakikiwa sasinti amuyañama? Janiwa. Uka qellqatanakajj wayn tawaqonakatakjam luratäkchi ukasa, Biblian aski yatichäwinakaparjam wakichtʼatawa. Ukhamasti taqeniw uka qellqatanak liytʼapjjaspa. Bibliat apstʼat qellqatanakasajja, wayn tawaqonakarojj janiw jan waltʼäwinakaru saykatañatakik yanaptʼawaykiti, jan ukasti ajay toqen jiltapjjañapatakisa, Jehová Diosar jakʼachasipjjañapatakisa yanaptʼawayarakiwa. Jilïrinakarusa uka qellqatanakajj yanaptʼarakispawa (Ecl. 12:13). w16.05 5:15, 16

‘Jehová Diosasti mä sapa Diosakiwa’, uk yatiñajj wal chuymachtʼistu. Israelitanakarojja, Suma Oraqer mantasin jan walinakan uñjasipkäna uka jan waltʼäwinakaru saykatañatakiw uk yatiñajj chʼamañchtʼäna. Ukhamarakiw jachʼa tʼaqesïwi urun qhespiñatak jiwasar yanaptʼistani. Paraison mayninakamp sum apasiñatakisa, mayachtʼat jakasiñatakis yanaptʼarakistaniwa. ¿Jehová Diosajj mä sapa Diosakïtap sumti amuytanjja? Ukhamächi ukajja, Jupa saparuki servipjjañäni. Ukatjja, taqe chuymampi, taqe jakañampi, taqe chʼamampi Jupar munasipjjañäni. Jilat kullakanakasampi sum apasiñatakisa, taman mayachtʼatäñatakis chʼamachasiskakiñäni. Ukhamtï lurañänejja, Jesusajj suma jaqetwa uñjistani, ukatsti jupajj akham sistaniwa: “Jutapjjam, jumanakajj Awkejjan bendecitanakapa, katoqapjjarakimay wiñay jakañjja jumanakataki wakichatäkis uka, kawkïritejj aka oraqe qalltatpacha luratäki” sasa (Mat. 25:34). w16.06 3:2, 20

Jan altʼat chuymanïsna ukhajja, jan walinak lurasajj janis kuna jan walsa lurksna ukhamwa amuyassna. Ukhamäspa ukhajja, Dios nayraqatan janiw ñatjañjam ñeqʼëjjsnati. Ukhamasti, mä jilatasa jan ukajj mä kullakas chuym ustʼayawaychistu, jan ukajj taman luräwinak katoqktan ukanak aptʼasstan ukhajja, ¿kunjamakis jikjjatastanjja? ¿Chuyma ustʼatati jikjjatasirïtanjja? Jan ukajja, ¿Jehová Diosat jan jitheqtasin ‘jilat kullakanakampi sum apasiñaw jukʼamp wakiskirejja’ sasincha amuyirïtanjja? (Sal. 119:165; Efe. 4:32.) Jiwasatï juchanak lurasin jan arsuskañäni ukhajja, Diosan ewjjanakapar istʼañajj chʼamakëjjaspawa. Ukatsti sapürutjamaw juchanak jukʼamp lurjjsna (Ecl. 8:11). Pornografía uñchʼukiñar yatintatäkäna mä jilatajj akham siwa: “Jan amuyasisakiw jilïr irpirinak contrajj jan walinak parljjayäta” sasa. Ukham luratapatjja Jehová Diosampis janiw sum apasjjänti. Jan wal luratapajj yatisïna ukhasti jilïr irpirinakan yanaptʼap katoqasïnwa. Cheqansa taqeniw pantjasirïtanjja, jan walinaks luraraktanjja. Ukampis ewjjtʼapkistu jupanakat jan walinak parljjsna, jan walinak lurasas mayninakaruk juchañchsna ukhajja, chuymasajj qalaraspawa. Ukhamar jan purtʼasiñatakejj Jehová Diosaruw perdón mayisiñasa, yanaptʼapsa mayisiñasarakiwa. w16.06 2:5, 6

Jesusan arkirinakapajja, kunsa manqʼapjjani, umapjjani, isisipjjani ukanakatwa llakisipjjäna. Ukanakat jan sinti llakisipjjañapwa Jesusajj munäna. Arkirinakapatï ukanakata jan ukajj kunanakatï jakañatak wakiski ukanakat sinti llakisipjjaspäna ukhajja, kunatï wali wakiskirïki ukatwa armasipjjaspäna. Arkirinakapat Jesusajj wal llakisïna, ukatwa wali uñtʼat arstʼäwipanjja, kunatï jakañatak wakiski uka toqet jan sinti llakisipjjañapatak pusi kutimp ewjjtʼäna (Mat. 6:27, 28, 31, 34). Jesusajja, jakasiñatakejj kunanakas wakisi uk sum yatïna. Ukatsti, arkirinakapajj ‘qhepa urunakan’ jan wali tiemponakan jakapjjañapätapsa yatirakïnwa (2 Tim. 3:1). Jichhürunakanjja, walja jaqenakajj janiw trabajo jikjjatirjamäpkiti, alasiñatakejj taqe kunas jukʼampiw urut urutjam jiljjattaski. Yaqhep cheqanakanjja, jaqenakajj pisin jakasipjje, manqʼañapas jukʼakiw utji, awisajj jan manqʼataw uñjasipjje. Ukampis Jesusatakejj jakañaw manqʼat sipansa jukʼampi wakiskirejja, jañchisti isit sipansa jukʼampiraki. w16.07 1:8, 9

Pantjasir jaqenakjamajja, janiw Diosan munañaparjampun sarnaqerjamäktanti. Ukhamajj Jupan khuyapayasiñap katoqañatakejj janiw askïktanti, jiwañasakiw wakisjjaspa. Salomón reyejj akham sänwa: “Aka oraqenjja janiw khitis aski jaqejj utjkiti, janipun juch lurasa aski lurirejja” sasa (Ecl. 7:20). Qhepatjja, apóstol Pablojj akham sarakïnwa: “Taqeni jucha lurapjjatap laykusti Diosampejj janiw katoqatäpkiti” “juchan wajjtʼasiñapasti jiwañawa” sasa (Rom. 3:23; 6:23a). Jehová Diosajja, jaqenakar wal munasitap laykuw “mä sapa Yoqapar” khitaniwayi. Ukham lurasaw Jehová Diosajj wali khuyaptʼayasirïtap uñachtʼayistu (Juan 3:16). Pablojj akham sänwa: “Diosajj munasiñapatwa [jan ukajj khuyapayasiñapatwa] munäna taqetak [Jesusan] jiwañapa, jichhasti jachʼa kankañapampi ukhamarak jachʼañchäwimpi corontʼatawa jiwañan tʼaqhesitap layku” sasa (Heb. 2:9). Diosajja, ‘Jesusan jiwatap toqew wiñay jakañ churistu’ (Rom. 6:23b). w16.07 3:3, 4

Casarasiñajja, janiw jan walit uñjatäkiti. Ukampis ¿kunjamatsa chacha warmi jakañajj qalltawayi, ukat kuna amtampisa? Uka jisktʼar qhanañchañajja, Diosajj kuna amtampis jaqechasiñ uttʼayawayi uk sum uñjañataki, ukhamarak casadonakar kuna bendicionanaksa Diosajj churi uk amuyañatakiw yanaptʼistani. Amtañäni, Diosaw Adán nayrïr chachar lurawayi, jupaw animalanakarojj sutinak uchañapäna. Adán chachasti, taqe animalanakajj paninkamakïtapwa amuyäna, ‘ukampis uka animalanakat janiw kawkïris jaqeru yanaptʼirjamajj utjkänti’. Ukatwa Diosajj Adanar mä jachʼa iki puriyäna, ikiñkamasti mä jaraphi apsüna. Uka jaraphitwa Diosajj mä warmi luräna, ukatsti chacharuw warmipäñapatak churjjäna (Gén. 2:19-24). Kunjamtï uñjktanjja, chacha warmi jakañajj Diosan mä suma regalopawa. Walja maranak qhepatsti, kuntï Diosajj Edén jardinan siskäna uka pachpa arunakwa Jesusajj akham säna: “Chachajj awkiparu taykaparu jaytanukusin[wa] warmipampi mayachasjjani, panipasti mayakëjjarakiniwa” sasa (Mat. 19:4, 5). Diosajj Adanan mä jaraphipatwa nayrïr warmi luräna. Ukhamajj chacha warmi jakjjasinjja, purapat sum apasiñataki luratäpjjatapwa amuyapjjpachäna. Chacha warmejj jan jaljtasin sum jakasipjjaspa, mä chachaniki jan ukajj mä warminiki jakasipjjaspa ukwa Diosajj munäna. w16.08 1:1, 2

Jesusajja, janiw walja jaqenakaruk parlirïkänti, jan ukasti sapa maynimpiw parlarakirïna, jupanakarojj wali munasiñampiw parlirïna. Amuytʼañataki, mä kutejja, Sicar marka jakʼan utjkäna uka phujut um waysuñatakiw mä warmejj saräna, uka warmiruw Jesusajj parläna (Juan 4:5-30). Impuesto cobriri Mateo Leví chachampis parlarakïnwa, juparojj arkiripäñapatakiw invittʼäna. Jesusan arkiripar tukjjäna uka qhepatjja, Jesusampiru yaqhanakampiruw manqtʼasiñatak invittʼäna. Ukanjja, Jesusajj waljanimpiw parläna (Mat. 9:9; Luc. 5:27-39). Natanaelajj jan walinakwa Nazaretankirinakat parläna, Jesusajj uka markansa naskchïnjja, juparojj suma arunakampiw parläna. Ukaw Jesusat sum amuyañapatakisa, jupat jukʼamp yateqañatakis Natanaelar yanaptʼäna (Juan 1:46-51). ¿Kunsa Jesusat yateqsna? Jaqenakan sum istʼapjjañapatakejja, suma arunakampiw parlañasa. Ukham parlapjjañapatak Bibliat yateqerinakar yanaptʼañäni ukhajja, jupanakajj kusisitaw yatiyapjjani. w16.08 4:7-9

Jan walinak jan askichirjamäjjasajja, walja chacha warminakaw jaljtaña, jan ukajj divorciasiñ amtapjje. Yaqhep chacha warminakajja, jan waltʼäwinakap janis askichirjamäpkaspa ukhamwa amuyapjje, ukatwa jaljtañ amtapjje. Niyakejjay chacha warmir Diosajj mayachtʼawaychejja, jaljtapjjañapajj janiw walïkaspati, ukwa Jesusajj amuytʼayäna. Jupasti akham sänwa: “Jaqejj janiw jaljtaykaspati kuntejj Diosajj mayachkis ukjja” sasa (Mat. 19:3-6; Gén. 2:24). Jehová Diosajja, chacha warminakajj jan jaljtasa sum jakasipjjaspa ukwa muni (1 Cor. 7:39). Janipun ak armapjjañäniti, taqeniw Jehová Diosar cuenta churañäni. Uk yatisasti chacha warminakajj jankʼakiw jan waltʼäwinakap askichapjjañapa. w16.08 2:10, 11

Taqe horasanwa amuyasiñasa. ¿Kunatsa? Uñisirinakasajj jan suyat horasaru, jan ukajj aynachtʼatäskañäni ukhaw jan waltʼayistaspa. Uñisirinakas contra saytʼasiñäni ukhajja, atipjañäniwa. Ukampis jiwasatï jan amuyaskañäni, uñisirinakasar jan saykatkarakiñäni ukhajja, Supayasa akapachasa, pantjasir chuymasas aynachtʼayistaspawa. Ukhamasti janipun aynachtʼañäniti, nayrar sartañatak chʼamachasiskakiñäni (1 Ped. 5:9). Uñisirinakasar atipjañatakejja, kunatsa jupanak contra saytʼastan ukwa amtañasa. Cheqansa Jehová Diosampi askit uñjatäñ layku ukhamarak bendicionap katoqañ laykuw chʼamachastanjja. Hebreos 11:6 qellqatajj akham siwa: “Jupar jakʼachasiñatakejja maynejj iyawsañapawa Diosajj utjatapa, ukhamaraki jupar thaqerinakarojj bendecirïtapa” sasa. Diosamp askit uñjatäñatakejj chʼamachasiñasawa (Hech. 15:17). w16.09 2:4, 5

Jehová Diosar jachʼañchir amtanakar puriñatakiw Bibliajj yanaptʼistu. Ukhamäkchi ukasa, uchaskañäni uka isejj jiwasar gustatapwa uñachtʼayani. Alkañäni uka isejj janiw mayninakan isip kikpapunïkaniti. Ukampis uchaskañäni ukajj sumäñapawa, qʼomäñaparakiwa. Kawkjantï jikjjatasktan ukatakjamaw isthaptʼasiñasaraki, ukatsti jakasktan uka cheqan janiw jan walit uñjatäñapäkarakiti. Yäpar isthaptʼasiñatak suma isinak jikjjatañajj chʼamakiwa. Jichhak uñstir isinakakwa jila parte jaqenakajj tiendanakan aljapjje. Ukatwa suma faldanaka, vestidonaka, blusanaka jikjjatañajj chʼamakïspa. Jan sinti tʼeqe pantalonanaka, saconaka jikjjatañas chʼamakïspawa. Jiwasar suma isinaka jikjjatañatak chʼamachasir uñjasajja, jilat kullakanakajj wal kusisipjjani. Isisitasampi Jehová Diosar kusisiyatas yatisajja, jiwasas kusisirakiñäniwa, ukaw taqe kunat sipans jukʼamp wakiskirejja. w16.09 3:15, 16

Wawanakamar uñachtʼäwinakampi yatichasajja, sum amuytʼapjjañapatakiw yanaptʼasktajja. Kuntï yatichkta uk sum amuyapjjañapatakisa, jan armapjjañapatakisa, kuntï Bibliajj siski uk cheqätap amuyapjjañapatakis yanaptʼaraktawa. Yateqañsa wal munapjjarakini. Sañäni, jichhürutak ajllit textot ¿kunjamsa amuytʼayasma? Jehová Diosaw ak jiwasatak qellqayawayi sasin sañat sipansa, amuytʼañapatakiw yanaptʼañama. Akham sasaw amuytʼayasma: “Job chachajj jakkäna uka tiemponjja, aka Oraqejj aleq ukhamak jan kunjjar warktʼatätap jaqenakajj janiw creyipkpachänti. Mä pelotasa, mä qalasa mä kunjjar uchatäñapawa sasaw amuyapjjäna. Uka tiemponakanjja, Oraqejj jan kunjjaru warktʼatätapjja, janiw khitis yatkänti, janirakiw telescopiosa ni avionanakas utjkänti” sasa. Bibliajj nayras qellqasiwaykchejja, Jehová Diosaw qellqayawayi, ukatwa kunatï cheqäki ukpun yatichi (Neh. 9:6). w16.09 5:9, 12

Jehová Diosaru Jesusaru iyawsañajja, janiw kuntï jiwas layku lurapki ukak yatiña ni kuntï jutïrin lurapkani ukak yatiña sañ munkiti, jan ukasti yateqktan ukarjam jakaña sañwa muni. Ukatsti yaqhanakarojj jupanakar uñtʼapjjañapatak yanaptʼañasarakiwa. Diosan apnaqat Paraíso oraqen jakañatakejja, iyawsäwinïñasawa, jan ukajj Diosar confiyañasawa. Ukajj mä panqarampi sasiwa. Mä panqaran sum jilañapatakejja, umampi warjjattʼañaw wakisi, janitï umamp warjjatjjsna ukhajja, jiwsuspawa. Iyawsäwisan sum jilañapatakejja, jiwasaw chʼamachasiñasa (Luc. 22:32; 2 Tes. 1:3; Tito 2:2; Heb. 3:12). w16.10 4:4, 5

Daniel waynasa, amigonakapasa, Babilonia markar apataw uñjasipjjäna. Ukanjja, Babilonia markankirinakajj costumbrenakaparjam sarnaqayañwa munapjjäna, janiw ukakïkänti, religionapan yatichäwinakaparjam sarnaqapjjañapwa munapjjarakïna. Ukatakejja, ‘caldeonakan arunakapwa’ jupanakar yatichapjjäna, ukatsti babilonio sutinakwa uchapjjarakïna (Dan. 1:3-7). Daniel waynar uchapkäna uka sutejja, Bel sat wali uñtʼat diosaparuw uñtayäna. Uka suti uchasajja Jehová Diosat sipansa, Babilonia markankir diosapas wali chʼamanïkaspa ukham amuyayañwa Nabucodonosor reyejj munpachäna (Dan. 4:8). Babilonianjja, Daniel waynarojj reyinkir wali suma manqʼanakwa churañ munapjjäna. Ukampis Danielajj Diosan leyinakap jan pʼakintañwa ‘chuymapan amtäna’ (Dan. 1:8). ¿Kunatsa Danielajj yaqha markankasin Jehová Diosat jan jitheqtkäna? Hebreo arupat utjkäna uka Qollan Qellqatatwa sapür yatjjatirïna, ukaw Diosat jan jitheqtañatakejj yanaptʼäna (Dan. 9:2). Paqallq tunka maranakas Babilonia markankchïnjja, hebreo sutipat uñtʼatäskakïnwa (Dan. 5:13). w16.10 2:7, 8

1919 marat aksarojja, Jesusajj Amuyasiri Cheqapa Uywata toqew Bibliat sum amuyañatakisa ukarjam sarnaqañatakis yanaptʼistu (Mat. 24:45-47). Jiwasatï Biblian yatichäwinakap istʼañänejja, taman sumankañaw utjani, qʼoma, mayachtʼata ukhamaw Diosar servirakiñäni. Akham jisktʼasiñasawa: “¿Janipunit Jesusat jitheqtkäjja? ¿Amuyasiri Cheqapa Uywatarojj taqe chuymat istʼäjja?” sasa. Diosan servirinakapajja, alajjpachan suma organistʼataw Jupar servipjje, ukwa Biblia liytʼasajj yateqtanjja. Amuytʼañataki, Ezequiel profetajja, Jehová Diosaruw mä carron saraskir uñjäna, uka carrojj kawksarutï Diosajj sarañ munkäna uksaruw jankʼaki jan saytʼasa saräna (Eze. 1:4-28). Niyaw Jesusampi angelanakapampejj jan wali jaqenakar tukjapjjani. ¡Janipuniw khitis Jehová Diosarusa, sutiparusa, apnaqäwiparus jiskʼachjjaniti! w16.11 3:9, 10

Nayrïr cristianonakjamarakiw jiwasajj maynit maynikam chʼamañchtʼasiñataki ukat Jehová Diosat yateqañatak tantachastanjja (1 Cor. 14:31). Jehová Diosar walja maranak servirinakasa, chʼamañchtʼatäñ munapjjarakiwa. Josué chachat amtañäni, israelitanakajj Suma Oraqeru mantañampïsipkäna ukhajja, Jehová Diosajj Josué chacharuw pʼeqtʼañapatak ajllïna. Josué chachajj walja maranakas Diosar servchïnjja, jupar chʼamañchtʼañapatakiw Diosajj Moisesar akham säna: “Jichhajj churamay Josué chacharojj ewjjanaka, ukhamarak juparojj chʼamañcham, thuru saytʼasiyarakim, jupaw markan nayrap sarani, uka oraqenaksa katuntarakini, kawkïrtï jichhajj uñjta ukanaka” sasa (Deu. 3:27, 28). Israelitanakajj walja guerranakanwa nuwasipjjañapäna, ukatjja mä nuwasïwin atipjataw uñjasipjjañapäna, ukatwa Josué chachar chʼamañchtʼañajj wakisïna (Jos. 7:1-9). Jiwasajj jilïr irpiri jilatanakaru, tamanak tumptʼir jilatanakaruw chʼamañchtʼaraksna. Jupanakajj Diosan markap sum uñjañatakiw chʼamachasipjje (1 Tes. 5:12, 13). w16.11 1:12, 13

Kʼari religionan munañaparjam jan sarnaqañ munapjjatapjja, Bibliat Yatjjatirinakajj janiw familiaparukisa, amigonakaparukisa ni iglesiar saririnakarukis sañ munapkänti. Jan ukasti, Jachʼa Babiloniajj jan walin sarnaqerïtap taqenin yatipjjañapwa munapjjäna. Ukatwa diciembre, 1917 marat 1918 mara qalltakamajj “Jachʼa Babiloniajj aynachtʼjjewa” sat tratado lakirapjjäna. Bibliat Yatjjatirinakajj jukʼanikïpchïnsa, 10 millón tratadonakwa lakirapjjäna. Cristianöptwa sapki ukanakajj kunjamäpjjesa ukwa uka tratadojj qhanañchäna. Uk yatisajja, ¡iglesia pʼeqtʼirinakajj wal colerapjjäna! Ukhamäkchïnsa, Bibliat Yatjjatirinakajj yatiyasipkakïnwa. Jupanakatakejj ‘Diosar nayraqat istʼañaw wakisïna, jaqenakar istʼañat sipansa’ (Hech. 5:29). Ukhamasti Nayrïr Jachʼa Chʼajjwäwinjja, cristianonakajj Jachʼa Babiloniatwa mistusipkäna, yaqhanakarus ukat mistupjjañapatakiw yanaptʼasipkarakïna. w16.11 5:2, 4

Ukham sasinjja, Pablojj cristianonakata ukhamarak jan cristianöpkäna ukanakatwa parlaskäna sasaw yaqhepanakajj sapjje. Ukampis uka arunakjja, Pablojj ‘Diosatak yaqhachat’ cristianonakaruw qellqäna (Rom. 1:7). Ukhamasti ‘jañchin munañaparjam jakirinakasa’ ukhamarak ‘ajayurjam jakirinakasa’ cristianonakäpjjänwa. Pablojj sarakïnwa: “Janchin munañapankaskäyätan ukkhajja, leyejj jiwasanakarojj juchachasiñ amtayirikïnwa” sasa (Rom.7:5). Uka arunakampejja, ‘jañchin munañaparjama jakirinakatakejj’ jan wali luräwinakaparjama, munañaparjama sarnaqañaw nayranki sasaw Pablojj qhanañchäna. w16.12 2:5, 7

Awisajja, jan wali luräwinakap amtasaw jaqenakajj llakisipjje. David reyejj ukhamarakiw jan wali luräwinakap amtasajj chuym wal usuyasïna, ukatwa akham säna: “Chuymajjan aynachtʼatap laykuw ayqorakta” sasa (Sal. 38:3, 4, 8, 18). Ukhaman uñjasisajja, Jehová Diosajj khuyaptʼayasisin perdonitaniwa sasaw David reyejj confiyäna (Sal. 32:2, 3, 5). Maysa toqetjja, akapachan jan walinak uñjasaw llakita jikjjatasiraksna. Amuytʼañataki, Davidajj jiwayatäñatak arknaqatäkäna ukhajja, wali llakitänwa, ukhaman uñjasisaw Salmo 55 qellqatan jikjjataski uka arunak qellqäna (Sal. 55:2-5). Ukham llakinakan uñjasisajja, Jehová Diosar confiyaskakïnwa. Ukatwa jan waltʼäwinakat mistuñatakejj Jehová Diosar yanaptʼap mayïna. Ukatsti mayitaparjamaw kuns lurarakïna (2 Sam. 15:30-34). ¿Kunsa Davidat yateqassna? Llakinakampi aynachtʼañat sipansa, jan waltʼäwinakat mistuñatakiw chʼamachasiñasa, ukatsti Jehová Diosaw yanaptʼitani sasaw confiyañasaraki. w16.12 3:14, 15

Jehová Diosajj Natán profeta toqew David chachar cheqañchäna, ukjja taqe chuymaw Davidajj katoqasïna. Ukatjja, Jehová Diosaruw mayisirakïna, wasitat Jupampi sum apasiñ munatap uñachtʼayañatakejja, taqe juchanakapwa arsusïna (Sal. 51:1-17). Aynachtʼañat sipansa, juchar purtʼasisajj kuna jan walinsa maynejj uñjasispa ukwa David chachajj yateqäna. Janiw mayampis uka pachpa juchar purtʼasjjänti. Mä qhawqha maranak qhepat David chachajj jiwjjänwa. Jucharus purtʼasiwaykchejja, janis kuna jan walsa lurkaspa ukhamwa Jehová Diosajj jupat amti (Heb. 11:32-34). ¿Kunsa Davidat yateqsna? Juchar purtʼasiñäni ukhajja, taqe chuymaw arrepentisiñasa, ukatjja uka juchanak Jehová Diosar yatiyasinjja, ‘perdonita’ sasinwa mayisiñasa (1 Juan 1:9). Jilïr irpirinakampis yanaptʼayasiraksnawa, jupanakaw Jehová Diosampi wasitat sum apasiñatakejj yanaptʼapjjestaspa (Sant. 5:14-16). Jehová Diosampi yanaptʼayasisajja, Jupajj perdonitaniwa sasin confiyataswa uñachtʼaytanjja. Ukhamajj janiw mayampis pachpa juchar purtʼasiñasäkiti, antisas Jehová Diosar confiyasaw serviskakiñasa (Heb. 12:12, 13). w17.01 1:13, 14

¿Kunjamatsa jachʼa jachʼa tukuñajj utjaspa? Kunatï jan lurañasäki uk lurasaw jachʼa jachʼa tuksna, uksti jan paciencianïtasatwa lursna. Pantjasirïtasatjja, taqeniw kunatï jan lurañasäkäna uk lurawaytanjja. Ukampis jiwasatï sapa kuti jachʼa jachʼa tukus jan lurañasäki uk lurañäni ukhajja, Jehová Diosampejj janiw sum apaskañäniti, ukwa Saúl reyin sarnaqäwipajj amtayistu. Salmo 119:21 qellqatajj akham siwa: “Jachʼa jachʼa tukurinakarojj toqenoqta[wa]” sasa. ¿Kunatsa Diosajj ukham lurpacha? Nayraqatjja, jiwasatï jachʼa jachʼa tukusa kuntï jan lurañasäki uk lurañäni ukhajja, Jehová Diosarojj janis apnaqerisarjam respetksna ukhamäspawa. Maysa toqetsti, kuntï jan lurañasäki uk lurañäni ukhajja, mayninakampejj janiw mä amtar purirjamäkañäniti, ni sumsa apaskarakiñäniti (Pro. 13:10). Ukatjja kuntï jan lurañasäki uk luratas mayninakajj amuyapjjani ukhajja, phenqʼachataw uñjassna (Luc. 14:8, 9). Taqe ukanak yatisajja, kunatsa Jehová Diosajj altʼat chuymanïñas muni uk sum amuytanjja. w17.01 3:4, 5

Janiw Adanajj Jehová Diosat yateqasisajj cheqaparjam sarnaqkänti. Adanajj wiñay jakañwa aptʼasïna, pantjasitap laykuw wawanakapajj pantjasiri, jiwiri ukhamätanjja (Rom. 5:12). Jupan juchachasitapatjja janiw wiñay jakktanti, wawanakasas jiwasjam pantjasirïpjjarakiwa. Nayrïr awk taykasaru Diosat jitheqtayasajja, Supayajj taqe jaqenakaruw Diosat jitheqtayañ munaraki (Juan 8:44). Nayratpachas jichhakamasa Jehová Diosajj jaqenakar munasiskakiwa. Adanampi Evampejj Supay toqetsa saytʼasipkchïnjja, jaqenakajj Jehová Diosamp sum apasipjjaspa, wiñayatak jakapjjaspa ukwa Diosajj muni (2 Ped. 3:9). Ukatwa Jupampi sumankthapiñatakejj kunatï wakiski ukanak lurawayi (Juan 3:16). w17.02 1:12-14

Jehová Diosat yateqasisatï mayninakan suma luratanakap uñjañäni ukhajja, jukʼamp altʼat chuymanïñäniwa. Wali askit uñjatäñat sipansa, jan ukajj mayninakar kuntï lurapjjañapäki uk mayiñat sipansa, jupanakampiw yanaptʼayasiñäni, ukatsti kuntï sapkistani ukwa lurarakiñäni. Kunapachatï jilat kullakanakasajj jukʼamp luräwinak katoqapjjani ukhajja, kusisiñäniwa. Cheqas jilat kullakanakasampi Jehová Diosar servisajj Jupar wal yuspärtanjja (1 Ped. 5:9). Maysa toqetjja, jiwasatï Biblian ewjjanakapat lupʼiñänejja, Diosajj kunjam chuymanisa, kunjam amuyunisa ukwa amuyañäni. Ukaw Jupatakjam amtañatak yanaptʼistani. Bibliat yatjjatasasa, oración lurasasa, kuntï yatjjatktan ukarjam sarnaqasasa, concienciasajj jukʼamp sumäniwa (1 Tim. 1:5). Ukaw jiwasat sipan mayninakaru nayrar uchañatak yanaptʼistu. Ukanakarjam sarnaqañäni ukhajja, Jehová Diosaw jukʼamp altʼat chuymanïñatakisa, yaqha ukham toqenakansa ‘yanaptʼaskistani’ (1 Ped. 5:10). w17.01 4:17, 18

Jilat kullakanakarojj wali respetompiw uñjañasa. Ukatsti khitinakatï Diosan tamap pʼeqtʼapki uka jilatanakarus respetompiw uñjañasaraki, sañäni: Jilïr irpirinakaru, tamanak tumptʼirinakaru, sucursal sarayirinakaru, Oraqpachan Jilïr Irpirinakaru. Taqe jupanakaw Diosan markapat llakisipjje, ukatwa jupanakajj Diosan mä churäwipaw sasin Bibliajj qhanañchi (Efe. 4:8). Uka jilatanakarojj kuna markatäpasa, wali yatjjattʼatäpasa janisa, qollqenïpasa janisa wali respetompiw uñjtanjja. Nayra cristianonakajja, tama sarayirinakarojj wali respetompiw uñjapjjerïna, jiwasajj ukhamarakiw tama sarayirinakarojj uñjañasa. Ukampis janirakiw angeläpkaspas ukham uñjañasäkiti, ni jiwasat jilankapkaspas ukhamsa uñjañasäkarakiti. Uka jilatanakajj Diosan markapar wal yanaptʼapjje, altʼat chuymanïpjjarakiwa ukatwa jupanakar wali respetompi uñjañasa (2 Cor. 1:24; Apo. 19:10). w17.03 1:13

Herodes Agripa I (primero) reyejj janiw Jesusjam altʼat chuymanïkänti. Mä jachʼa tantachäwinjja, Herodesajj jila valorani wali suma isinakampi isthapitänwa. Jupar uñjasasa ukhamarak parlir istʼasas jaqenakajj akham artʼapjjäna: “¡Aka arojj janiw jaqen arupäkiti, jan ukasti mä diosan arupaw!” sasa. Herodesajj jachʼañchatäñwa munäna, ukatwa ukspachajj Jehová Diosan “angelapajj Herodesar usuntayäna, Diosan sutip jan jachʼachatap layku. Ukatsti jiskʼa laqʼonakan manqʼantataw Herodesajj jiwjjäna” (Hech. 12:21-23). Ukhamajja, Jehová Diosajj markap pʼeqtʼañapatakejj janiw Herodesar ajllkänti. Ukampis Jesusajja, Jehová Diosan ajllitätapwa qhan uñachtʼayäna, Jehová Diosarukiw markap pʼeqtʼirjam uñjasajj jachʼañchirïna. Jehová Diosajj janiw mä qhawqha maranakaki Jesusan pʼeqtʼañap munkänti. Jesusajj jiwatat jaktasinjja discipulonakaparojj akham sänwa: “Nayar churatawa taqe munañanïñajja alajjpachansa, akapachansa [...]. Amtasipjjapunim, nayajj sapürupuniw jumanakampïskta akapachan tukusiñapkama” sasa (Mat. 28:18-20). w17.02 3:20, 21