Febrero

Jesusajj wal jaqenakat sinttʼasïna, uk amuyasaw waljanejj Reinon suma yatiyäwinakap istʼañ munapjjarakïna. Ukhamajj Jesusat yateqasiñäni ukhajja, jukʼampiw jaqenakar Diosar uñtʼapjjañapatak yanaptʼañäni. Yatiyktan uka jaqenakat sinttʼasiñatakejja, kunsa amuyapjje, kunjamäsipkisa uk amuyañatakiw chʼamachasiñasa, kunjam uñjatäñtï munktan ukhamarakiw jupanakar uñjañasa (Mat. 7:12). Jaqenakajj kunjam yanaptʼatäñsa munapjje ukwa amuyañasa. Diosan arunakap yatiykasajj taqenimp mä pachpa toqetak parlañat sipansa, kunjamsa jakasipjje, kunsa amuyapjje ukarjamaw sapa maynimp parltʼañasa. Wali amuyumpiw jisktʼañasaraki (Prov. 20:5). Ukhamatwa kunatsa Diosan Reinopat istʼapjjañapajj wakisi uk yatiñäni. Uk yatisajja, Jesusat yateqasisaw kunatï jupanakatak wakiski ukarjam parltʼañäni (1 Corintios 9:19-23 uñjjattʼarakïta). w19.03 pág. 20 párr. 2; pág. 22 párrs. 8, 9

Adanampi Evampejj jan manqʼapjjañapäkäna uka qoqan achupat manqʼapjjäna ukhajja, kunanaktï Jehová Diosajj jupanak layku lurkäna ukanakat jan yuspärapjjatapwa uñachtʼayapjjäna. Taqeniw jan jupanakjamätas uñachtʼaysna. Jiwasajj Diosan bendicionanakapat wal yuspärtanjja. Ukat bautisasisajja, “kunatï walïki jan walïkaraki uk Diosakiw saspa” sasin iyawsataswa uñachtʼaytanjja, Jupar munasitasa, confiyataswa uñachtʼayaraktanjja. Bautisasjjtan uka qhepatjja, amtasarjam sarnaqañat sipansa Diosan leyinakaparjamaw sapür sarnaqañasa. Ukham lurañajj chʼamäkchisa, waljaniw sapa marajj ukham lurapjje. Jumajj jupanakjamarakiw Diosan leyinakaparjam sarnaqasma. Ukatakejja, Bibliat yatjjataskakiñamawa, jilat kullakanakatsa janiw jayarstʼañamäkiti, wali munasiri alajjpachankir Awkimat kunanaktï yateqkta ukanakatsa yaqhanakaruw parlañama (Heb. 10:24, 25). Mä amtar puriñatakisti, kuntï Jehová Diosajj Arup toqesa markap toqes ewjjtʼktam ukaruw istʼañama (Is. 30:21). Ukham luräta ukhajja, kusisitaw jakasïta (Prov. 16:20). w19.03 pág. 7 párrs. 17, 18

Jehová Diosajj walja yatichäwinakwa manqʼäkaspas ukham churistu. Sañäni, tantachäwinak toqe, revistanak toqe, Internetan jw.org toqejj walja suma yatichäwinakwa katoqtanjja. Discursonak istʼasasa, Bibliat apstʼat qellqatanak liytʼasasa, jan ukajj JW Broadcasting programa uñtasasa, ¿“akajj nayatakjamapuniwa” sasajj janit sirïkta? Ukhamajj ¿kunjamsa Diosarojj uka suma regalonakat yuspärsna? (Col. 3:15). Oracionanakasanwa ukanakat yuspärsna. Jehová Diosar adorañatak tantachasktan uka Utan qʼomäñapataki ukat apthaptʼatäñapataki yanaptʼasaw Jupar yuspäratas uñachtʼayaraktanjja. Ukatwa uka Uta qʼomachañatakisa askichañatakis tiempo apstʼastanjja. Videonaka jan ukajj grabacionanak istʼañataki equiponak apnaqerinakasa, cuidadompiw uka equiponak apnaqapjje. Tantachasiñ Uta sum uñjasajja, jukʼamp tiempo aguantañapataki, ukhamarak askichañanak jan sinti utjañapatakiw yanaptʼasktanjja. Ukhamatwa yaqha Tantachasiñ Utanak lurasiñapatakisa askichasiñapatakis qollqejj utjaskakini. w19.02 pág. 18 párrs. 17, 18

Job chachajj Diosan luratanakapat lupʼipunirïnwa (Job 26:7, 8). Kunapachatï aka oraqeta, alajjpachata, qenayanakata, qʼejjo qʼejjot lupʼïna ukhajj wal musparäna, Diosan luratanakapat mä jukʼak yatitapsa amuyarakïnwa. Maysa toqetjja, kuntï Diosajj yatichkäna ukarojj wali valoranitwa uñjäna, ukatwa akham säna: “Mandamiento arunakapsa phoqhapuntwa” sasa (Job 23:12). Diosajj musparkañ Diosätap yatiña, ukhamarak Jupar respetomp uñjañaw Job chacharojj Diosar munasiñatakisa kusisiyañatakis yanaptʼäna. Ukarakiw Jupar taqpach chuymamp serviñatakis yanaptʼarakïna. Jiwasajj Job chachjamarakiw Diosan musparkañ luratanakapat lupʼiñatakejj tiempo apstʼasiñasa. Jichhürunakanjja, jaqenakajj jukʼampwa Diosan luratanakapat yatipjje, Biblias phoqatpachaw utj-jjarakistu, ukaw Diosar jukʼamp uñtʼañatak yanaptʼistu. Kuntï yatjjatkañäni ukajja, Diosajj musparkañ Diosätap yatiñataki, Jupar respetompi uñjañatakiw yanaptʼistani. Diosar ukham uñjañajja, Jupar munasiñataki, arunakaparjam sarnaqañataki, taqpach chuymampi serviñatakiw yanaptʼarakistani (Job 28:28). w19.02 pág. 5 párr. 12

Nayra tiempotpachaw marka apnaqerinakajj Diosan servirinakapar arknaqawayapjje. “Jan walinakwa lurapjje” sasin inas sapjjchi. Ukampis janiw ukhamäkiti, ‘jaqenakar istʼañat sipansa Diosar istʼañ’ amtatasatwa arknaqapjjestu (Hech. 5:29). Inas jiwasat sawkasipjjchispa, carcelarus llawintapjjchistaspa, jan ukajj nuwjapjjchistaspa. Ukampis Diosan yanaptʼapampejja, janiw ukhamat ukham kuttʼayktanti, jan ukasti, pacienciampiw suytʼtanjja. Babiloniar apatäpkäna uka Ananías, Misael, Azarías waynanakat kunsa yateqassna uk amuytʼapjjañäni. Jupanakajj llampʼu chuymampi, respetompiw qorit lurat mä jachʼa idolor ‘janiw altʼasipkiristti’ sasin Nabucodonosor reyir sapjjäna, kunatsa jan altʼasipkani uksa qhanañchapjjarakïnwa. Ukatjja, “Diosaw salvaskistani” sasajj janiw suyapkänti, jan ukasti, Jupan munañap luraspan sasaw sapjjäna (Dan. 3:1, 8-28). ¿Kunsa kimsa hebreonakat yateqassna? Jehová Diosat jitheqtayañ munapjjestani ukhajja, humilde chuymanïtaswa uñachtʼayañasa, Jupaw yanaptʼitani sasaw confiyañasaraki (Sal. 118:7). “Jan walinak lurtajja” sasin juchañchapjjestani ukhasti, respetompi, llampʼu chuymampiw qhanañchañasa (1 Ped. 3:15). Kunanakatï Diosamp sum apasitas aptʼasiykistaspa ukanaksa janiw lurañasäkiti. w19.02 págs. 10, 11 párrs. 11-13

Jesusan jiwatapat kuna suytʼäwinïtansa uka toqet lupʼiñaw jan ajjsarirïñatak yanaptʼistani (Juan 3:16; Efes. 1:7). Jesusan jiwatap amtañataki mä qhawqha semananak faltkipanwa uk lursna. Uka semananakajj Jesusan jiwatap amtañataki waktʼayasiwayki uka textonakwa liysna, Jesusan janïr jiwkipan kunanakas pasäna uka toqetwa lupʼiraksna. Ukhamatwa Jesusan jiwatap amtkañäni ukhajja, tʼantʼampi vinompejj kamsañsa muni, ukanakajj kunjamsa Jesusan jiwatapajj jan kikpanïtap uñachtʼayistu uk sum amuyañäni. Kuntï Diosasa Jesusas jiwas layku lurapki ukajj kunjamsa jiwasarusa familiasarus yanaptʼi uk amuytan ukhajja, suytʼäwisajj jukʼampiw jilti, tukuykam aguantañwa munaraktanjja (Heb. 12:3). Jesusajj humilde chuymani, jan ajjsariri ukhamawa, uk yatiñajj wali kusiskañawa, jupajj Jachʼa Jilïr Sacerdotesjamaw alajjpachan jiwas layku Diosar ruwtʼaski (Heb. 7:24, 25). Qhawqsa Jesusar yuspärtan uk uñachtʼayañatakejja, jupar istʼasaw jiwatap amtañasa (Luc. 22:19, 20). w19.01 pág. 22 párr. 8; págs. 23, 24 párrs. 10, 11

Diosar jachʼañchañatakiw arstʼtanjja, ukajj mä suma bendicionawa. Tantachäwinakan arstʼasajj ‘jachʼañchir sacrificionakwa Diosar loqtasktanjja’, janiw khitis jiwas lanti uk lurkaspati (Heb. 13:15). Jehová Diosasti, janiw taqenis mä pachpa sacrificio loqtañasa, mä arunjja, mä igualak arstʼañas suykiti. Tantachäwinakajj amigonakampi manqtʼasiñamp sasiwa. Mä jilatatï utapar invittʼistaspa ukhajja, ¿janit manqtʼasiñatak kuns apkaraksna? “Kuns apä” sasinsa llakiskchiñänejja, kunatï taqenir gustkaspa uk apañatakiw chʼamachasiñäni. Jehová Diosajj ukhamarakiw tantachäwinakar invittʼistu, Jupajj wali suma manqʼäkaspas ukhamwa walja yatichäwinak wakichi (Sal. 23:5; Mat. 24:45). Kuntï apirjamäktan uk apañaswa munaraki. Ukhamajj tantachäwinakatak sum wakichtʼasipjjañäni, arstʼañatak chʼamachasipjjarakiñäni. Ukhamatwa Diosan mesapat manqʼaskasajja, yaqhanakan manqʼasipjjañapataki, mä arunjja, yateqapjjañapatak yanaptʼañäni. w19.01 pág. 8 párr. 3; pág. 13 párr. 20

Bibliajj qellqaskäna uka urunakanjja, kʼari diosanakar adorañatakejj qʼañu juchanakwa jaqenakajj lurapjjerïna (Os. 4:13, 14). Waljaniw uk lurañ laykojj kʼari diosanakar adorapjjerïna. Ukampis ukham lurasajj janiw kusisit jakasipkänti. Davidajja, uka jaqenakajj ‘kunayman tʼaqesiñanakanwa uñjasipjje’ sasaw Salmo 16:4 qellqatan säna. Jupanakajj wawanakaparus uka diosanakaruw sacrificiot loqtapjjerïna (Is. 57:5). Ukajj janipuniw Jehová Diosatak walïkänti (Jer. 7:31). Jichhürunakanjja, ukhamarakiw kʼari religionanakajj qʼañu juchanak lurañasa, chacha pura jan ukajj warmi pura qʼañunak lurañas walikïkaspa ukham uñjapjje. Ukampis ukanak luririnakajj nayra tiemponjamarakiw jan walinakan uñjasipjje (1 Cor. 6:18, 19). Jaqenakajj librëpkaspas ukhamsa amuyasipkchejja, ‘kunayman tʼaqesiñanakanwa uñjasipjje’. Inas jumajj uk amuyirïsta. Ukatwa alajjpachankir Awkimar istʼañama. Jupar istʼañajj askimatakiwa uk janipun armamti. Jan walinak lurasajj mä jukʼa kusistʼkchïtasa, jukʼamp jan walinakanwa uñjasïta, uksa amtañamarakiwa (Gál. 6:8). w18.12 págs. 27, 28 párrs. 16-18

Diosan mä serviripatï qʼañu juchar purtʼasini ukhajja, jan juchanïki ukaw divorciasiniti janicha uk amtjjañapa. Jan juchanïki ukajja, divorciasisin casarasiñatak librëjjewa sasaw Jesusajj säna (Mat. 19:9). Ukampis perdonañ amtaspa ukhas walikïskaspawa. Oseas profetajj mayampiw warmiparojj utapar irpjjäna sasaw Bibliajj saraki. Ukhatjja, warmipajj janiw yaqha chachanakampi sarnaqañapäjjänti. Oseas profetajja, mä qhawqha tiempojj ‘janiw warmipampejj ikthapkänti’ (Os. 3:1-3, nota, nwt-E). Ukampis qhepatjja, mayampiw warmipampi ikthapjjpachäna. Ukajja Jehová Diosajj markapar perdonañ munkäna, jupamp sum apasiñ munkäna ukamp sasïnwa (Os. 1:11; 3:4, 5). ¿Kunsa ukajj yatichistu? Maynitï chachapana jan ukajj warmipana qʼañu jucha luratap yatkasin jupamp ikthapini ukhajja, perdonatapwa uñachtʼayi (1 Cor. 7:3, 5). Ukhamajj janiw Bibliarjamajj divorciasjjaspati, jan ukasti, casarasiñar Jehová Diosjam uñjañatakiw ukhat aksarojj chʼamachasipjjañapa. w18.12 pág. 13 párr. 13

Bibliat yatjjatkasajja, kunjamsa Jehová Diosjam amuyañajj jan walinakan uñjaskañäni ukhajj yanaptʼistaspa ukwa amuytʼañasa. Ukhamatwa akatjamat mä amtar puriñ waktʼistani ukhajj kun lurañsa yatiñäni. José waynat amuytʼañäni. Potifar chachan warmipajj jupamp ikintasiñ munkäna ukhajja, jankʼakiw ‘janiw’ säna. Ukhamatwa casaratäkasin yaqhamp sarnaqañat Diosajj kamsisa uk janiräkipan amuytʼatap uñachtʼayäna (Gén. 39:8, 9). Uka warmir akham sänwa: “¿Kunjämaraki nayasti uywirejjarusti uka jan wali luririststi, ukhamarak Dios contrasa juch lurarakiriststi?” sasa. Ukham sasinjja, Joseajj Jehová Diosjam amuyatapwa uñachtʼayaskäna. Jichhajj jiwasat amuytʼarakiñäni. Trabajir masisas jan wali amtampi arjjaykistaspa, jan ukajj maynis qʼañu lurañanakat parlir mensaje, jan ukajj jukʼa isin apsut foto apayankistaspa ukham sañäni. Jiwasatï kunsa Diosajj uka toqenakat amuyi uk janiräkipan amuytʼañäni ukhajja, janiw jan wali lurañanakar purtʼaskañäniti, antisas Jehová Diosjam amuyataswa uñachtʼayañäni. w18.11 pág. 25 párrs. 13, 14

Uka texton qellqatäki uka arunakajja, ‘Diosap laykojj kusisiñatsa thoqtʼasiniwa sañwa muni’ sasaw Bibliat yatjjatirinakat yaqhepajj sapjje. Habacuc profetan ukham chuymanïtapajj wali yateqaskayawa. Jehová Diosajj janiw musparkaña arunakaki arsuwaykiti, jan ukasti uka arunakajj phoqasiniwa sasaw sarakistu. Habacuc libron qellqatäki uka arunakajj Jehová Diosar confiyañwa yatichistu (Hab. 2:4). ¿Kunas Diosar confiyaskakiñatak yanaptʼistaspa? Jupampejj jukʼamp sumwa apasiñasa. Ukatakejj akanakwa lurañasa. 1) Diosarojj orasiñasapuniwa, taqe llakinakaswa yatiyañasaraki. 2) Kuntï Arup toqesa markap toqes ewjjtʼkistu ukar istʼañasawa. 3) Jupajj horasaparuw jan walinak chhaqtayjjani sasin confiyasaw pacienciamp suytʼañasa. Ukwa Habacuc profetajj luräna. Jupajj librop qellqañ qalltkäna ukhajj llakitäkchïnsa, kusisitaw Diosar taqe chuyma confiyasajj qellqañ tukuyjjäna. Jupat yateqasipjjañäni, ukhamatwa Jehová Diosajj mä munasir awkjamas qhomantkistaspa ukham amuyañäni. Ukajj aka jan wali pachanjja, wal chuymachtʼistani. w18.11 pág. 17 párrs. 18, 19

Jehová Diosajj munasistuwa sasajj ¿kunatsa sistanjja? Juan 3:16 textojj akham siwa: “Diosajj akapachar wal munatap laykuw mä sapa Yoqap churäna, ukhamat taqe khitinakatï jupar confiyapjjatap uñachtʼayapki ukanakajj jan jiwapjjañapataki, jan ukasti wiñay jakañ katoqapjjañapataki” sasa. Jesusan jiwas layku jiwatapajj qhawqsa munasistu ukwa uñachtʼayistu. Ukajj walpun chʼamañchtʼistu. Diosan Arupajja, janiw tʼaqesiñasa ni llakisiñasa ‘Criston munasiñapat apaqkistaniti’ sasaw sistu (Rom. 8:35, 38, 39). Jan walinakan jikjjatasisajj qarita, llakita, Diosar serviñansa aynachtʼat uñjastan ukhajja, Cristojj qhawqsa munasistu uk amtañaw aguantaskakiñatakejj yanaptʼistaspa (2 Cor. 5:14). Uka munasiñaw jakaskakiñatakisa Diosar serviskakiñatakis yanaptʼistu. Ukarakiw oraqen jan waltʼäwinak (desastres naturales) utjkani ukhasa, arknaqat uñjaskañäni ukhasa, taqe kunas tukuskaspa ukham amuyasisasa, jan ukajj wali llakitäñäni ukhas jan aynachtʼañatak yanaptʼarakistani. w18.09 pág. 14 párrs. 8, 9

Kunatï cheqäki ukarjam sarnaqañatakejja, Diosan taqe yatichäwinakaparuw iyawsañasa, ukarjamaw lurañasaraki, ukarakiw jakäwisan nayrankañapa. Taqe kunansa Biblian yatichäwinakaparjamaw sarnaqañasa. Jiwasajj Davidjamarakiw Diosan cheqa yatichäwinakaparjam sarnaqaskakiñ amtañasa. Jan ukhamäkaspajja, kunanaktï Diosan arunakap yateqañatakejj aptʼawayktan ukanakat lupʼiñwa qalltjjsna, wasitampi jikjjatañsa munjjaraksnawa. Ukampis janipun uk lurañäniti. Jiwasajja, Diosan kawkïr yatichäwinakaparus istʼañäni, kawkïrirus janiraki uk janiw ajllksnati, ukampis ukanakarjam sarnaqañatakejja, uka yatichäwinak iyawsañasawa, sum amuyañasarakiwa (Juan 16:13). Kunatï cheqäki ukat jan amuyasis jan jitheqtañatakejja, janiw tiempo ina chʼusar aptʼañasäkiti. Uka toqet jan amuyasksna ukhajj anatañanakaru, kunatï gustkistu ukanakaru, Internet jan ukajj televisión uñchʼukiñarukiw tiempo aptʼjjsna. Ukanakajj janis jan walïkchejja, Bibliat sapak yatjjatañata, predikir sarañata, jan ukajj yaqha ukham lurañanakatwa tiempo apaqestaspa. w18.11 pág. 10 párrs. 7, 8

Jakäwisajj akatjamat mayjtʼaspa ukhajja, wali llakita, jan kamachtʼirjama ukhamaw amuyassna (Prov. 12:25). Ukampis janis ukajj cheqäkaspa ukhamwa awisajj amuysna. Ukhaman uñjassna ukhajja, ¿kunas jan sinti llakisiñatak yanaptʼistaspa? (Sal. 131:1-3). Jichhürunakanjja, inas sinti jan walinakan uñjasstan. Ukhamächi ukhajja, kunjamsa ‘Diosan sumankañapajj’ amuyus jan walinakat jarkʼaqe uk amuypachätanwa (Filip. 4:6, 7). Ukhamajja wali llakitäkasajj Jehová Diosaruw yanaptʼa mayiñasa. Jupasti sumankañapwa churistani, ukaw Diosar jukʼamp serviñatak amtktan ukanak phoqañatakisa jan qarjtañatakis yanaptʼistani. Maysa toqetjja, Diosan espiritupajj Biblian kawkïr textonakas Jehová Diosar serviskakiñatak yanaptʼistaspa ukwa amtayistaspa (Juan 14:26, 27). w18.10 pág. 27 párr. 2; pág. 28 párrs. 5, 8

¿Kunas jaqerojj jukʼamp jan waltʼayawayi? Kʼarisiñawa. Ukajj jan cheqätap yatkasin jaqenakar engañjañ amtampi parlañawa. Nayrïr kʼarisirejj Supayawa, jupajj ‘kʼarin awkipawa’ sasaw Jesusajj säna (Juan 8:44). ¿Kunapachas jupajj kʼarisiñ qalltäna? Walja waranqa maranak nayraw Edén jardinan kʼarisiñ qalltäna. Adanampi Evampejja, Diosajj jupanakar churkäna uka paraisonwa wali sum jakasipjjäna. Ukampis Jupajja, ‘aski ukhamarak ñanqha yatiñ churir qoqatjja janiw manqʼapjjätati, manqʼapjjäta ukapachasti jiwapjjätawa’ sasaw säna. Supayajj ukanak yatkchïnsa, mä katari toqew Evar engañjäna, ukhamatwa kʼarisiñ qalltäna. Akham sänwa: “Janiw jiwapkätati. Diosajj yatiwa, kunapachatejj jumanakajj uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja, ukatsti Diosjamäpjjasmawa” sasa (Gén. 2:15-17; 3:1-5). w18.10 pág. 6 párrs. 1, 2

Qʼoma chuymanïñatakejja, janiw jan wali amuyunakasa ni jan wali lurañ munañanakas chuymasan utjañapäkiti. Ukhamatakwa Jehová Diosajj jupar servitas askit uñjani (2 Cor. 4:2; 1 Tim. 1:5). ‘Jehová Diosarojj janiw khiti jaqes uñjkaspati ni uñjasas jakkaspati’ sasaw Bibliajj qhanañchi (Éx. 33:20). Ukhamajj ¿kunatsa Jesusajj qʼoma chuymaninakajj “Diosar uñjapjjani[wa]” sasajj sispachäna? “Uñjaña” siski uka arojj griego arunjja, niyas uñjksna ukham amuytʼaña, entiendiña, yatiña sañwa munaspa. Ukhamajj ‘Diosar uñjañajja’ jupajj kunjam Diosasa uk amuyaña, ukat ukham Diosätapat jupar munasiña sañwa muni (Efes. 1:18). ¿Kunjamatsa Jehová Diosar uñjaraksna? Kunjamsa Jupajj yanaptʼistu ukanak amuyasaw uñjaraksna (Job 42:5). Maysa toqetjja, Jupar jan jitheqtasa qʼoma sarnaqañataki chʼamachasipki ukanakatakejj kuna suma bendicionanaksa wakichaski ukanak amuytʼasaw uñjaraksna. w18.09 pág. 20 párrs. 13, 15, 16

Kunatï cheqapäki ukarjam sarnaqañäni ukhajja, walja bendicionanakwa katoqañäni. Yatiñanïñatakejja walja yatichäwinaksa maynejj yatjjatañapäkchejja, ukarjam sarnaqani ukhakiw yatiñaniwa sissnajja, janiw qhawqha yatjjatatasa ukarjamajj yatiñaniwa sisksnati. Bibliajja, kʼisimiranakas “yatiñanïpjjewa” sasaw qhanañchi. Jupanakajja, manqʼañanak utjki ukapachan walja manqʼañanak imkatasaw yatiñanïpjjatap uñachtʼayapjje (Prov. 30:24, 25). Cristorojj kunatï Awkipar kusisiyki ukarjampun kuns luratapatjja, ‘Diosan yatiñapa’ sasaw sutiñchasiraki (1 Cor. 1:24; Juan 8:29). Kuntï maynejj lurañapäki uk yatiñampi ukarjam lurañampejj janiw pachpäkiti, Diosajj uk sum yati. Jupajja, khitinakatï humilde chuyman jaqëpki, jan walinak luratas pacienciampi aguantapki, kunatï cheqapäki ukarjamas sarnaqapjjaraki ukanakarojj bendisiwa (Mat. 7:21-23). Ukhamajja, congregacionajj humilde chuymani jaqenakan Diosar serviñ lugaräñapataki yanaptʼapjjañäni. Kunatï cheqapäki ukarjam sarnaqañatakejj tiempompi pacienciampis munaskchejja, ukarjam lurasajj humilde chuyman jaqëtaswa uñachtʼayañäni, ukatjja jichhasa jutïrinsa kusisitaw wiñayatak jakasiñäni. w18.09 pág. 7 párr. 18

Jehová Diosajj lurkistäna ukhajja, amtanakap phoqañatak Jupamp chika trabajsna ukwa munäna. Pantjasirïkstansa Diosar jan jitheqtas servirinakajj sapüruw Jupamp trabajiraksna. Sañäni, Diosan arunakap yatiyasa, Jesusan arkirip tukupjjañapatak jaqenakar yanaptʼasajj ‘Diosamp chikaw trabajipjjtanjja’ sasaw Bibliajj qhanañchi (1 Cor. 3:5-9). Taqe kun Luriri Diosamp chika trabajiñajj mä suma bendicionawa. Ukampis janiw Diosan arunakap yatiyasaki, Jesusan arkirip tukuyasakejj Jupamp trabajksnati. Jehová Diosampi trabajiñatakejj akanakwa luraraksna: 1) Familiasaru jilat kullakanakasaruw yanaptʼsna, 2) mayninakaruw katoqtʼsna, 3) Jehová Diosan markapatakiw trabajsna, Diosar jukʼamp serviñatakiw chʼamachasiraksna (Col. 3:23). Ukampis Jehová Diosar serviñatak kuntï mayninakajj lurapki uk janiw luratanakasamp igualayañasäkiti. Ak amtañasawa, janiw taqenis mä pachpa maranïktanti, ni taqenis kʼumaräktanti, janirakiw mä pachpaki kuns lurañ yatktanti ukat yaqha ukhamanakansa janiw pachpäktanti. w18.08 pág. 23 párrs. 1, 2

‘Taqe jisktʼanakamaruw jaysäma’ sasaw Jehová Diosajj Habacuc profetar munasiñamp chuymachtʼäna. Mä jukʼampitjja, llakinakapajj chhaqtjjañapänwa. Diosajj akham siskaspas ukhamänwa: “Nayar confiyasita, amuyatajj janisay jankʼäkpa, pacienciampi suytʼaskakim, mayisitamar istʼaskämawa” sasa. Diosajja kunapachas arsutanakap phoqani ukwa amtayäna, suytʼaskakim sasaw ewjjtʼarakïna. Cheqas Habacuc profetajj Diosan arunakap phoqasir uñjänwa. Diosaw jan walinak chhaqtayjjani sasin pacienciampi suytʼañäni ukhasa, kuntï siskistu ukarus istʼarakiñänejja, Diosar confiyañäniwa, jan walinakan uñjaskañäni ukhas janiw sinti llakiskañäniti. Diosajj kunapachas jan walinak tukjani uka toqet jan sinti llakisiñasatakiw Jesusajj ewjjtʼistu (Hech. 1:7). Jehová Diosajj horasaparuw uka jan walinak chhaqtayani, ukat janipun pächasipjjañäniti. Ukhamajja jan qarjtasa, humilde chuymampi, pacienciampi suytʼasipkakiñäni. Ukañkamajja, tiempo jan ina chʼusar aptʼasa Diosar taqe chuyma servisipkakiñäni (Mar. 13:35-37; Gál. 6:9). w18.11 pág. 16 párrs. 13, 14

Uka tiemponjja, jan judionakajj qʼañu jaqenakäpkaspas ukhamwa judionakajj amuyapjjerïna. Pedrojj ukham amuyunirakiw jilspachäna. Ukampis ¿kunas jan ukham amuyjjañatak yanaptʼäna? Kunanakatï paskäna ukaw yanaptʼäna. Sañäni, ukhanakakiw mä visión uñjäna (Hech. 10:9-16). Jiwasajj apóstol Pedrjamarakiw yaqhanakar yaqhachañajj chuymasan utjaskakiti janicha uk sum amuykiptʼañasa, yaqhanakas ewjjtʼapjjestani ukhajj katoqasiñasawa. Ukampis ¿kunampsa lursna? Jiwasatï taqenir munasiñatak chʼamachasiñäni ukhajja, janiw yaqhachasiñajj chuymasan utj-jjaniti (2 Cor. 6:11-13). Akham jisktʼasiñäni: “¿Nayjam jañchinïpki, costumbrenïpki, markajatäpki, jan ukajj tribujatäpki ukanakampikit chikachastjja?” sasa. Ukhamächi ukhajja, yaqhanakar uñtʼañatakiw chʼamachasiñasa. Inas jupanakampejj predikir sarsna, jan ukajj manqtʼasiñataki, kusistʼañatakiw utasar invittʼsna (Hech. 16:14, 15). Ukham lurañäni ukhajja, jukʼampiw jaqe masisar munasiñäni, janiw yaqhachasiñajj chuymasan utj-jjaniti. w18.08 pág. 9 párrs. 3, 6; pág. 10 párr. 7

¿Kunjamsa yaqhep Testigonakajj akapachankir jaqenakjam sarnaqapjje? Kusistʼañanak utji ukhajja, Diosar jan servir jaqenakjamaw thoqopjje, jan walinaksa lurapjje. Ukatjja, jupanakjamarakiw redes sociales sasin uñtʼatäki ukarus jan wali fotonakap apkatapjje, jan wali arunaksa qellqapjjaraki. Jupanakajj sum sarnaqañatak chʼamachasipki ukanakatakejj janiw yateqaskayäpkiti (1 Ped. 2:11, 12). Akapachajja, ‘jañchin munañanakaparjama, nayran munañanakaparjama, kunanakatï maynin utjki ukanakat jachʼañchasiñanakan’ sarnaqañasatakiw wal chʼamañchistu (1 Juan 2:16). Ukampis jiwasajj Jehová Diosanktanwa, ukatwa Jupajj ‘jan wali sarnaqañanak apanukuñasa akapachan utjki uka jan wali munañanak apanukuñas’ mayistu. Ukatjja ‘suma amuyumpi jakañasataki, cheqapar sarnaqañasataki, akapachankir jaqenak taypin Dios chuymäñasatakiw’ mayirakistu (Tito 2:12). Arsutasasa, manqʼastan ukasa, umktan ukasa, isisitasasa, kʼachachtʼasitasasa, trabajitasas Jehová Dios saparuki servitaswa qhan uñachtʼayañapa. w18.07 pág. 25 párrs. 13, 14

Jiwasatï Jehová Diosar uñtaskakiñänejja, janiw mayninakan luratanakapajj pantjasiykistaniti ni Jehová Diosamp sum apasiñsa aptʼasiykistaniti. Diosan markapan Moisesjam luräwinak katoqerinakajj janipuniw uk armapjjañapäkiti. Taqenis ‘salvasiñatakejj ajjsartʼasa khatattʼasa jukʼamp chʼamachasiñasas’ wakiskchejja, ak amtañasawa, Jehová Diosajj janiw mä pachpa leyimpik taqenir juchañchkistuti (Filip. 2:12). Antisas jukʼamp luräwinak Diosan markapan katoqatasatjja jukʼampirakiw Jehová Diosajj cuenta mayistani (Luc. 12:48). Ukampis Jehová Diosar cheqpachapun munasstan ukhajja, janiw kunas pantjasiykistaniti ni Diosan munasiñapatsa apaqkistaniti (Sal. 119:165; Rom. 8:37-39). Aka jan wali pachanjja, jukʼampiw alajjpachankir Jehová Diosar uñtaskakiñasa, ukhamat kuntï Jupajj lurañas munki uk yatiñasataki (Sal. 123:1). Janipuni mayninakan luratanakapajj Jehová Diosampi sum apasiñ aptʼasiyistpanti. w18.07 pág. 16 párrs. 19, 20

Jehová Diosan markapajj kunjamsa jiltaski uk yatiñajj walpun kusisiyistu. Cheqas ukaw Diosan servirinakapan mä qhanjam qhantaskatap uñachtʼayi. 2017 maranjja, 10 millonats jila jaqenakaruw Diosan arunakapat yatichasiwayi. Jesusan jiwatap amtañatakisti, waranq waranqa jaqenakaw tantachasipjjarakïna. Jupanakajja, kunjamsa Diosajj Yoqaparu khitanisajj juchampita jiwañampit kutsuyasin munasiñap uñachtʼayistu ukwa yateqapjjäna (1 Juan 4:9). Diosan markapanjja, kunayman aru parlirinakaw utji, ukampis mayachtʼataw Alajjpachankir Awkisar jachʼañchtanjja (Apoc. 7:9). Kuna arsa parlkstan, jan ukajj kawkinsa jakaskstanjja, “mä qhanar uñtataw akapachan qhants[na]” (Filip. 2:15). Diosan markapan jiljjattatapasa, mayachtʼata jupar servitasasa, kuna tiemponsa jakasktan uk amuyasis taqe chuyma serviskatasas Jehová Diosaruw jachʼañchi. w18.06 pág. 21 párrs. 1-3

Jesusatakejj manqʼañat sipansa Awkipan munañap lurañaw jukʼamp wakiskirïna, samaritana warmir yatiyañas ukham wakiskirirakïnwa (Juan 4:32-34). Jesusajj kunsa ukampejj yatichañ munäna uk janiw Santiagompi Juanampejj amuyapkänti. Samariankasipkäna ukhajja, discipulonakajj alojasiñatak mä uta thaqeriw mä jiskʼa markar mantapjjäna. Samaritanonakan jan alojañ munapjjepanjja, Santiagompi Juanampejj akham sapjjänwa: “Tata, munsta ukhajja, alajjpachat nina saraqaniñapatakiw mayipjjerista, ukhamat uka jaqenakar qʼal jiwarayañapataki” sasa. Ukampis Jesusajj jupanakar toqenoqänwa (Luc. 9:51-56). Santiagompi Juanampejj Galilea markapan uk pasaspäna ukhajja, ¿ukhamti sapjjarakispäna? Samaritanonakar yaqhachañajj chuymapan utjaskakpachänwa ukatwa ukham sapjjpachäna. Uka qhepatjja, apóstol Juanajj samaritanonakar yatiyiriw saräna, jupanakasti sumwa istʼapjjäna, ukhamïpanjja kunjamsa jupanakatak wal colerasïna uk amtasajj phenqʼaspachänwa (Hech. 8:14, 25). w18.06 págs. 10, 11 párrs. 12, 13

‘Kunatï cheqäki ukampi mä wakʼampjam wakʼantasstan’ ukhajja, Bibliarjamaw sarnaqañäni, kunatï cheqäki ukpunwa parlarakiñäni. Kʼarisiñajj Supayatwa juti, uka toqew jupajj jaqenakar engañji. Kʼarisiñajj kʼariski ukarusa kʼarinakar creyki ukarus janiw waltʼaykiti (Juan 8:44). Pantjasirïkstansa, kunatï cheqäki uk parlañatak chʼamachasipjjañäni, janipun kʼarisipjjañäniti (Efes. 4:25). Ukampis cheq parlañajj inas chʼamakïchispa. 18 marani Abigail kullakajj akham siwa: “Awisajj mä jukʼa kʼarisiñajj mä jan walitsa jarkʼaqestaspawa, ukatwa cheq parlañajj janis walïkaspa ukham awisajj amuyta” sasa. Ukampis ¿kunatsa cheq parlañasa? 23 marani Victoria kullakajj akham siwa: “Kuns cheqpun parläta, Diosar creyitamsa qhana arunakamp qhanañchäta ukhajja, jumat larusipjjaniwa. Ukampis jan ajjsarañatakiw yanaptʼätam, Diosampis jukʼamp sumwa apasïta, awk taykamas amigonakamas jukʼampiw respetapjjätam” sasa. Ukhamajj ‘kunatï cheqäki ukampi wakʼantasiñajj’ wali wakiskiriwa. w18.05 pág. 28 párrs. 3, 5

Akapachajj sapürutjam jukʼamp jan walir saraskipanjja, kuna tiemponsa jakasktan uka toqet jukʼampiw amuyasiñasa. Jehová Diosajj horasaparuw jan walinak tukjani (Mat. 24:42-44). Ukañkamajja, pacienciampiw suytʼañasa, amuyasiñasarakiwa. Sapüruw Diosan Arup liyiñasa, orasiñsa janipuniw armañasäkiti (1 Ped. 4:7). Yaqhep jilat kullakanakasajj kunjamsa Diosar walja maranak servisipki, kunjamsa mä qhanjamas qhanasipkaki ukanakatwa yateqasiñasa. Jiwasatï Jehová Diosar taqe chuyma serviñäni, jaqe masisarus yanaptʼañäni, jilat kullakanakampïñatakis tiempo apstʼasiñäni ukhajja, jukʼamp kusisitaw jakasiñäni, tiempojj ratukis paskaspa ukhamäniwa (Efes. 5:16). Walja kutis pantjaskstanjja, Jehová Diosajj jupar serviñatakejj yanaptʼaskakistuwa. Kuna tiemponakansa jakasktan uka toqet amuyasiñasatakisa jan qarjtañatakis ‘jaqenakwa mä bendicionar uñtasit churistu’ mä arunjja, jilïr irpirinakwa congregacionan churistu (Efes. 4:8, 11, 12). Ukhamajj mä jilïr irpiritï visittʼistani ukhajja, suma ewjjtʼanakap katoqasiñatak chʼamachasipjjañäni. w18.06 págs. 24, 25 párrs. 15-18

Jesusajja janiw munasipjjeta sasakejj discipulonakapar siskänti, jan ukasti “munasiñajan sarnaqasipkakim” sasaw säna. ¿Kunatsa ukham säna? Maynejj marat maratjamaw Jesusan discipulopäñatakejj aguantañapa. Kunatsa aguantañajj wakisi uk sañatakejja, “munasiñajan sarnaqasipkakim” sasaw walja kuti Juan 15:4-10 qellqatan qhanañchäna. ¿Kunjamatsa Criston munasiñapan sarnaqañ munatassa jupamp sum apasiñ munatassa uñachtʼaytanjja? Mandamientonakap istʼasaw uñachtʼaytanjja, mä arunjja, kuntï jupajj lurkäna uk lurañaswa muni. Ukatwa akham säna: “Kunjamtï nayajj alajjpachankir Awkin mandamientonakap phoqkta, munasiñapan sarnaqkarakta ukhama [lurapjjam]” sasa. Ukhamajj Jesusatwa yateqasiñasa (Juan 13:15). Jesusajj yatiyir sarapjjam sasin maykistu uka mandamientop phoqtan ukhajja, Diosar munasitaswa uñachtʼaytanjja. Cheqas Jesusan mandamientonakapajj Awkipan amuyuparjamawa (Mat. 17:5; Juan 8:28). Jehová Diosampiru Jesusampir munasiñänejja, jupanakajj munasipjjarakistaniwa. w18.05 pág. 18 párrs. 5-7

Jehová Diosar jukʼamp serviñ amtañajja, waynäkasa, jan ukajj tawaqökasajj kunsa estudiäta, kunansa trabajïta, jan ukajj yaqha ukham amtanakar puriñatakiw yanaptʼätam. Jakäwiman kuns luräta uk sum yatsta ukhajja, suma amtanakaruw purïta. Jumatï Diosar jukʼamp serviñ jankʼak amtätajja, jankʼakirakiw bendicionanak katoqäta. Aka oraqpachanjja, walja wayn tawaqonakaw Jehová Diosar jukʼamp serviñ amtasajj taqe chuyma servisipki. Ukatwa ‘walik ukham lurapjjtajja’ sasin chʼamañchtʼañasa. Ukham servisajj kusisitaw jakasipjje, Diosan Aruparjam sarnaqañsa yateqapjjarakiwa. Familianïpjjaniti janicha uka toqenakat sum amuytʼasipjjaraki. Salomón reyejj akham sänwa: “[Jehová] Tatitur taqe chuymamampi katuyasim [...]. Taqe luräwinakamanjja Tatitutjja amtasipunim, ukatsti jupajj cheqa thakinjamwa irpaskätam” sasa (Prov. 3:5, 6). Jehová Diosatakejja, wayn tawaqonakajj wali wakiskirïpjjewa. Jupajj wal jupanakar munasi, ukatwa yanaptʼi, bendisi, jan walinakatsa jarkʼaqaraki. w18.04 pág. 26 párr. 7; pág. 27 párr. 9

Apóstol Juanajj nayrïr patak maranakan jakir jilat kullakanakar wal chʼamañchtʼäna. Jesusan sarnaqäwipat qellqkäna ukajj walpun chʼamañchtʼäna, jiwasarus chʼamañchtʼaskakistuwa. Sañäni, “jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasin Jesusajj siskäna uka arunakjja, jupakiw qellqäna (Juan 13:35). Juanan qellqat kimsa cartanakanjja, wali suma yatichäwinakaw utji. Sañäni, pantjasitanakas amtasin wal llakistan ukhajja, Jesusan wila wartasitapajj “taqe juchanakasatwa qʼomachistu” siski uka arunakajj walpun chuymachtʼistu (1 Juan 1:7). Chuymasajj juchañchaskakistu ukhasti, “Diosajj chuymasat sipansa jukʼamp jachʼawa” siski uka arunakajj ukhamarakiw chuymachtʼistu (1 Juan 3:20). Apóstol Juan sapakiw “Diosajj munasiñawa” siski uka arunaksa qellqäna (1 Juan 4:8, 16). Payïri, kimsïri cartanak qellqkäna ukanjja, ‘cheqa yatichäwinakarjam sarnaqer’ cristianonakarojj walik ukham lurapjjtajja sasaw chʼamañchtʼäna (2 Juan 4; 3 Juan 3, 4). w18.04 pág. 18 párrs. 14, 15