Diciembre

Pantjasir jaqenakjamajj kuna jan walinakansa uñjastan uk Jesusajj sum yati, ukajj chuymar purtʼkiripuniwa. Aka oraqenkkäna ukhajja, Jesusajj ‘kusisipkäna ukanakampejj kusisïnwa, jachapkäna ukanakampejj jacharakïnwa’ (Rom. 12:15). Amuytʼañataki, 70 discipulonakapajj jaqenakan sum istʼapjjatapat wali kusisit kuttʼanipkäna ukhajja, Jesusajj kusisirakïnwa (Luc. 10:17-21). Lazaron jiwatapat wal jachapkäna ukanakar uñjasasti, “Jesusajj walpun llaktʼasïna, chuymapsa chʼalljjtayasirakïnwa” (Juan 11:33). Jesusajj janis pantjasir jaqëkchïnjja, jucharar jaqenakarojj khuyaptʼayasiñampi sinttʼasiñampiw uñjäna. ¿Kunatsa ukham uñjpachäna? Jupajj wali munasirïnwa. Jaqenakaruw jukʼamp munasïna (Prov. 8:31, NM). Ukham munasitapatwa kunas jaqen chuymapan utji uk yatiñ munarakïna. Apóstol Juanajj akham sänwa: “Kunas jaqen chuymapan utji uksa sum jupajj yatirakïna” sasa (Juan 2:25). w19.03 pág. 20 párrs. 1, 2

Supayajja, Job chachat taqe kunwa aparäna, servirinakaparus jiwarayänwa, jaqenakampis jan wali jaqetwa uñjayarakïna. Wali munat 10 wawanakaparuw jiwarayarakïna. Qhepatjja, llejjti usumpiw kayut pʼeqekam usuntayäna. Warmipajj uka jan walinak uñjasin wali llakitäsajja, ‘suma jaqëñ munaskaktawa, ¡ñanqhacham Diosaru, ukat jiwjjam!’ sasaw säna. Job chachajj jiwañakwa munjjäna, ukhampachas Diosar taqpach chuymamp serviskakïnwa. Ukatjja, Supayajj yaqha jan wal lurarakïna. Job chachan kimsa amigonakapaw visittʼir sarapjjäna, jupanakampiw Supayajj jukʼamp llakisiyäna. Uka jaqenakajj jan sinttʼasisaw Job chachar juchañchapjjäna. ‘Diosaw tʼaqesiyasktamjja’ sasaw sapjjäna, ‘Jupatakejj taqpach chuymampi servitamasa jan servitamas igualakiwa’ sasaw sapjjarakïna. ‘Jan wali jaqëtamatwa akhaman uñjastajja’ sasaw sapjjäna (Job 1:13-22; 2:7-11; 15:4, 5; 22:3-6; 25:4-6). w19.02 pág. 4 párrs. 7, 8

Jiwasatï Jehová Diosar taqe chuyma respetañäni ukhajja, janipuniw kunatï chuymap ustʼaykaspa uk lurkañäniti. Adanampi Evampitï Diosar ukham respetapjjaspänjja, janiw Jupa contrajj saytʼasipkaspänti. Ukampis Dios contra saytʼasipjjäna ukhajja, “ukspachaw nayranakapajj jistʼartäna”, mä arunjja, juchararäpjjatapwa amuyasipjjäna, wawanakaparojj mä usükaspas ukhamwa juchsa jiwañsa apkatapjjañapäna. Diosan leyinakap pʼakintapjjatap yatisajja, qʼalalasïpkatap amuyasajj phenqʼasiñat imjjatasipjjänwa (Gén. 3:7, 21). Jiwañar sinti ajjsarañajj janiw walïkiti. ¿Kunatsa ukham sistanjja? Kunjamatsa wiñayatak jakassna uk Jehová Diosajj yatiwa. Jiwasatï juchar purtʼasisajj taqe chuyma arrepentisiñäni ukhajja, Diosajj Yoqapan jiwatapar confiyatasat perdonistaniwa. ¿Kunjamsa Jesusan jiwatapar confiyatas uñachtʼaysna? Diosar jakäwis katuyasisa, ukhamarak bautisasisaw uñachtʼaysna (1 Ped. 3:21). w19.03 págs. 5, 6 párrs. 12, 13

Israelitanakajj taqe kunwa Diosat katoqapjjäna, ukatwa yuspärasirïpjjañapäna. Jupanakar esclavöñat qhespiyañatakejja, Jehová Diosajj tunka plaganakampiw egipcionakar castigäna. Qhepatsti, egipcionakan ejercitopar Mar Rojo sat qotan jiwarayasaw salvarakïna. Ukham luratapatjja, israelitanakajj Diosar wal yuspärapjjäna, mä cancionampiw atipjatapat jachʼañchapjjarakïna. ¿Kunas qhepat pasäna? Jan walinakan uñjasjjapjjäna ukhajja, kuntï Diosajj jupanak layku lurkäna uk armasjjapjjänwa, janirakiw yuspärjjapjjänti (Sal. 106:7). Bibliajj akham siwa: “Taqpach israelitanakaw jan walinak Moisés toqe, ukhamarak Aarón toqjja parlapjjäna” sasa. Ukham lurasajja, Dios contraw parlasipkäna (Éx. 16:2, 8). Uk uñjasajja, Diosajj wal chuym ustʼayasïna, ukatwa qhepat akham säna: ‘Jupanakajj taqeniw wasaran jiwarapjjani. Caleb sat chachampi Josué sat chachampikiw qheparapjjani’ sasa (Núm. 14:22-24). w19.02 pág. 17 párrs. 12, 13

Jesusajj janiw jachʼa jachʼa tukusin jiwatap amtañatakejj wali chʼama, jan apañjam mä tantachäw uttʼaykänti. Antisas maran may kuti, fácil apañ mä tantachäwinwa arkirinakapajj jupan jiwatap amtapjjañapäna (Juan 13:15; 1 Cor. 11:23-25). Ukhamatwa Jesusajj jan jachʼa jachʼa tukurïtap uñachtʼayäna. Cheqas alajjpachankir Reyisajj humilde chuymaniwa, uk yatiñajj wali kusiskañawa (Filip. 2:5-8). Jiwasatak llakisiñat sipansa, mayninakat llakisisaw Jesusjam humilde chuymanïtas uñachtʼaysna (Filip. 2:3, 4). Jiwañap jakʼäjjäna uka arumajj kunsa Jesusajj luräna uka toqet amuytʼañäni. Wali tʼaqesiyata jiwayatäñapsa yatkchïnjja, jupat jan jitheqtiri arkirinakapajj kunja llakitäpjjanisa ukjjatwa Jesusajj jukʼamp llakisïna. Ukatwa uka arumajj jupanakar yatichañataki, chʼamañchtʼañataki, chuymachtʼañatak tiempo apstʼasïna (Juan 14:25-31). Jesusajj mayninakatwa jukʼamp llakisïna. Ukhamatwa humilde chuymanïñ yatichawayistu. w19.01 pág. 21 párrs. 5, 6

¿Tantachäwinakan arstʼañatakejj amparamajj wali jathïkaspas ukhamti amuyasta? Janiw jumak ukham amuyasktati. Niya taqeniw arstʼañ mä jukʼa ajjsarayastanjja. Ukham ajjsartʼatamajj humilde chuymanïtamwa uñachtʼayaski, mayninakajj jumat sipansa jilïrïpkaspas ukham amuyatamwa uñachtʼayaskaraki. Diosajj ukham humilde chuymaninakarojj wal munasi (Sal. 138:6; Filip. 2:3). Ukampis Jupar jachʼañchañama, ukhamarak jilat kullakanakar tantachäwinakan chʼamañchtʼañamwa munaraki (1 Tes. 5:11). Diosajj wal munastamjja, Jupaw jan ajjsarañatak yanaptʼätam. Mä qhawqha textonakat parltʼañäni. ‘Taqeniw arsutasan pantjastanjja’ sasaw Bibliajj amtayistu (Sant. 3:2). Jehová Diosajj janiw jan pantjasir jaqëñas suykiti, ni jilat kullakanakas uk suyapkarakiti (Sal. 103:12-14). Jupanakajj familiasäkaspas ukhamäpjjewa, wal munasipjjarakistu (Mar. 10:29, 30; Juan 13:35). Awisajj janiw kuntï sañ munktan uk sumpun sisktanti, uk jupanakajj yatipjjewa. w19.01 pág. 8 párr. 3; págs. 10, 11 párrs. 10, 11

Ukham lurañajj janiw faciläkapuniti, ukampis lurasmawa. Diosajj kusisit jakasisma ukwa muni. Diosan yanaptʼapampejja, waynäkasasa jan ukajj tawaqökasas sumwa jakasisma, chuymankipstatäjjäta ukhas ukhamarakiw jakasisma. Uk sum amuytʼañatakejja, kunas israelitanakar Suma Oraqer mantañatak yanaptʼäna uk yatjjatañäni. Israelitanakajj Suma Oraqer niya mantañampïsipkäna ukhajja, Diosajj janiw ‘wali nuwasir soldadöpjjañamawa, guerran nuwasiñsa sum yateqapjjañama’ sasajj siskänti (Deut. 28:1, 2). Jan ukasti mandamientonakap istʼapjjañapataki, Jupar confiyapjjañapatakiw ewjjtʼäna (Jos. 1:7-9). Jaqen amuyuparjamajja, uka ewjjtʼajj janis wakiskirïkaspa ukhamänwa, ukampis israelitanakarojj wal yanaptʼäna. Jehová Diosan yanaptʼapampejj walja kutiw cananeonakar atipjapjjäna (Jos. 24:11-13). Diosar istʼañatakejj Jupar confiyañasawa, ukham lurasajj kusisitapuniw jakasiñäni. Nayra tiempon ukaw uñjasïna, jichhas ukhamäskakiwa. w18.12 pág. 25 párrs. 3, 4

Yaqhepajja, Biblian mä texto jukʼamp qhanañchasitapatwa lanktʼapjje. Yaqhepajj inas Diosan markap contra saytʼiri (apóstatas), jan ukajj Biblian yatichäwinakap conträpki ukanakampi mayachasjjapjjchi. Kunatjjay ukham lurapjjchi, yaqhepajj Jehová Diosata, congregacionat jitheqtañwa amtapjje (Heb. 3:12-14). Jupanakajj apóstol Pedrot yateqasisaw Jesusar confiyasipkakiñapäna. Yaqhepanakasti kunatï cheqäki ukat jukʼat jukʼatwa jitheqtjjapjjaraki, inas jan amuyasisa jitheqtapjjchi. Bibliajja, kunjamtï mä barcojj qota thiyat jukʼat jukʼat jitheqawaykejj ukamp sasiwa sasaw qhanañchi (Heb. 2:1). Cheqas jupanakajj janiw kunatï cheqäki uk jaytañ pensapkpachänti, ukampis Jehová Diosampi jukʼat jukʼat jan sum apasjjasaw markapat jitheqtjjapjje. w18.11 pág. 9 párrs. 5, 6

Jiwasatï Jehová Diosar jukʼamp sum serviñataki wakichtʼatäñ munstanjja, Diosan Reinopat Yatiyirinakataki Escuelar sarañatakiw mä solicitud phoqantsna. Ukanwa Diosar sapürunjam servipki uka jilat kullakanakarojj Diosan markapan jukʼamp trabajipjjañapatak wakichtʼapjje. Uka solicitud phoqantirinakajja, escuela tukuyasajj kawkir khitatas taqe chuymaw iyaw sapjjañapa. ¿Diosar ukham jukʼamp serviñ munsnati? (1 Cor. 9:23). Jehová Diosan servirinakapjamajja, wajjtʼasiri, munasiri, khuyaptʼayasiri ukhamäñwa muntanjja. Ukham lurasajj kusisita, sumakiw jikjjatasiñäni (Gál. 5:22, 23). Cheqas taqeniw Jehová Diosat yateqasisajj mayninakar yanaptʼasa Jupampi trabajiraksna (Prov. 3:9, 10). w18.08 pág. 27 párrs. 16-18

Inas maynejj akham jisktʼaschispa: “¿Kunataksa maynejj divorciasisin mayamp casarasispa?” sasa. Jesusajj uka toqet akham sänwa: “Khititejj warmipat divorciaski, ukatsti yaqhampi casaraski ukajja, adulterio juchwa warmip contrajj luri. Mä warmitejj chachapat divorciasisin yaqhampi casaraschi ukhajja, adulterio juchwa luri” sasa (Mar. 10:11, 12; Luc. 16:18). Jesusajj respetompiw casarasiñar uñjäna, mayninakan ukham uñjapjjañapwa munarakïna. Maynejj kun utjipans yaqhamp casarasiñatak divorciasikïna ukhajja, adulterio juchwa luraskäna. Ukham divorciasirinakajja, Diosatakejj casaratakïsipkiwa, panpachanejj ‘mä jañchikïsipkiwa’. Ukhamarus divorciasirejj adulterio jucharuw warmipar katuyaski sasaw Jesusajj säna. ¿Kunatsa ukham säna? Uka tiemponjja, divorciasir mä warmejj kunatï jakañatak munaski uk jikjjatañatakejj inas mayamp casarasiñ amtchispäna. Ukajj adulterio jucha lurañampi sasispänwa. w18.12 pág. 11 párrs. 8, 9

Diosampi parlasajja Habacuc profetajj janiw sinti llakisjjänti. Ukatwa Jehová Diosar confiyasajj taqe chuyma suytʼaskakiñ amtäna. Qhepatsti mayampiw akham säna: “Jan ajjsarañampiw suytʼäjja” sasa (Hab. 3:16). ¿Kunsa Habacuc profetat yateqsna? Maya, kuna jan walinakansa uñjaskchiñänejja, Jehová Diosar jan qarjtas oraskakiñasawa. Paya, Diosajj kuntï Arup toqesa markap toqesa ewjjtʼkistu ukarojj istʼañasawa. Kimsa, Diosaw tʼaqesiñanak horasapar chhaqtayani sasin pacienciampiw suytʼañasa. Ukham lurañäni ukhajja, Habacuc profetjamarakiw jan sinti llakiskañäniti, jan walinakan uñjaskañäni ukhas aguantaskakiñäniwa. Diosajj kuntï jutïr urunakan lurkani ukajja, jukʼamp paciencianïñatakiw yanaptʼistani, pacienciasti jan walinkkasas kusisitäñatakiw yanaptʼarakistani. Cheqas jutïritak kuna suytʼäwitï utjkistu ukajja, Diosaw horasapar taqe kunsa askichani sasin confiyañatakiw yanaptʼistu (Rom. 12:12). w18.11 págs. 15, 16 párrs. 11, 12

Mayninakar lanktʼayañata, mä arunjja mayninakar juchar puriyañata, jan ukajj Diosat jitheqtayañat parltʼañäni. Jesusajj uka toqet akham sänwa: “Nayar confiyir jiskʼanakat mayniru lanktʼayki uka jaqetakejja, jukʼamp walïspawa asnojj muyuyki uka molino qalampi kunkat chinuntasin qotar jaqontatäñapajja” sasa (Mar. 9:42). Maynir lanktʼayañajja, Jesusatak janipuniw walïkiti. Niyakejjay Jesusajj Awkipjam chuymanïchejja, Diosajj jan walitwa uñjaraki. Jesusan mä arkiripar luratanakasampi aleqat lanktʼayañajj janipuniw Diosatak walïkiti (Juan 14:9). Kunjamtï Jehová Diosampi Jesusampejj amuyapki ¿ukhamarakit jiwasajj amuytanjja? ¿Kunsa luratanakasampejj uñachtʼaytanjja? Mayninakar jan gustki ukham isisiñas gustkistaspa ukham amuytʼañäni. Isisitasajja, yaqhep jilat kullakanakatakejj janiw walïkaspati jan ukajj jan walinakwa amuyayaspa. Ukhamäspa ukhajj ¿kunsa lursna? Jaqe masisar munasstan ukhajj ¿gustkistu ukham isisiskakiñäniti? w18.11 pág. 25 párrs. 9, 10

¿Kunatsa taqenis Diosar taqpach chuymampi serviñasa? Supayajj jan walinakwa Dios contrasa jaqenak contras parläna. Diosajj jan wali apnaqeriwa, Jupatakik taqe kuns muniriwa, jan cheqaparjam kuns luririwa sasaw Supayajj Jehová Diosan sutip qʼañuchäna. Adanampi Evampejj Supayampiw mayachasipjjäna, Dios contraw saytʼapjjarakïna (Gén. 3:1-6). Edén jardinan jakkasajja, sapürutjamaw Diosarojj munasipjjaspäna. Ukampis Supayajj Dios contra saytʼaskäna ukhajja, Diosar jan taqpach chuymampi munasipjjatapwa uñachtʼayapjjäna. Job chachajj jakkäna uka urunakanjja, aka jisktʼar qhanañchañaw wakisirakïna: “¿Diosar munasipjjatapat Jupat jan jitheqtir jaqenakajj utjaspati?, mä arunjja, ¿jaqenakajj Diosar taqpach chuymamp servipjjaspati?” (Job 1:8-11). Job chachajj jiwasjam pantjasir jaqënwa, ukampis Diosajj taqpach chuymamp servitapat wal munasïna. w19.02 págs. 3, 4 párrs. 6, 7

Diosan Reinopat yatichäwinakajj qhawqha valoranisa uk amuytʼayañatakejja, Jesusajj suma perlanak thaqeri mä comerciante jaqetwa parläna. Uka jaqejj “wali valorani mä perla katjasinjja, jankʼakiw taqe utjirinakap aljir saräna, ukatsti uka perla alasïna” (Mat. 13:45, 46). Diosan Reinopat kunatï cheqäki ukanak yateqasasa Biblian yatichäwinakap yateqasasa, ukhamarakiw ukanakar wali valoranit uñjasajj kunayman jaytawaytanjja. Ukham wali valoranit uñjaskakiñäni ukhajj janipuniw aljkañäniti (Prov. 23:23). Ukampis yaqhepajj janiw valoranit uñj-jjapjjeti, ukatwa alj-jjapjje. Jiwasajj janipuniw uk lurañasäkiti. Jan ukasti kunjamtï Bibliajj ewjjtʼkistojja, ‘cheqa yatichäwinakarjam sarnaqasipkakiñasawa’ (3 Juan 2-4). Ukatakejj ukaw jakäwisan nayrankañapa, ukarjamaw sarnaqañasaraki. w18.11 pág. 9 párr. 3

Jehová Diosajj Jericó markankirinakampejj janiw nuwasipjjätati sasaw säna. Antisas sojjta urunakanjja, urun may kutiw Jericó marka muytapjjañapäna, paqallqöri urunsti, paqallqo kutiw muytapjjañaparakïna. Yaqhep soldadonakajja, ‘ukham lurasajj tiempsa chʼamsa inamayaw aptʼasiñäni’ sasaw amuyapjjpachäna. Ukampis jupanakar pʼeqtʼir Diosajja, kunatsa ukham luräna uk sumwa yatïna. Diosar istʼañajja, Jupar jukʼamp confiyañatakiw israelitanakar yanaptʼäna, janirakiw Jericó markankir soldadonakampis nuwasjjapjjänti (Jos. 6:2-5). ¿Kunsa uka sarnaqäwit yateqsna? Inas awisajj ‘¿kunatsa Diosan markapajj ukham lurañ amtpacha?’ sasin jisktʼassna. Nayrajj inas akham amuyirïstan: “Predicacionansa, tantachäwinakansa, Bibliat sapak yatjjatkasas janiw tabletanaka ni celularanaka apnaqañajj wakiskaspati” sasa. Ukampis uka aparatonakajj qhawqsa yanaptʼistu uk uñjasajja, janiw ukham amuyjjpachätanti. Ukhamajja, Diosan markapajj kuntï ewjjtʼkistu ukanakat inas qalltan pächaschiñäni, ukampis ukarjam luraskakiñasawa. Uka ewjjtʼanakajj qhawqsa yanaptʼistu uk amuyañajja, Jehová Diosar jukʼamp confiyañataki, jilat kullakanakasamp jukʼamp mayachtʼatäñatakiw yanaptʼistani. w18.10 pág. 23 párrs. 8, 9

Ukhamwa apostolonakajj Jesusar jisktʼapjjäna. Galileankirinakajj Mesiasar wal suyapjjatap laykuw Jesusar reyit uttʼayañ munapjjarakïna. Jupajj suma yatichirïnwa, usutanakarus qollänwa, manqʼat awtjatanakarus manqʼa churänwa, ukatwa suma reyïspawa sasin amuyapjjpachäna. Jesusajj niya 5.000 chachanakar manqʼayäna uka qhepatjja, jaqenakajj “reyit uttʼayañatakiw jupar katuntañ munapjjäna. Uk yatisasti Jesusajj mayampiw qollurojj sapak sarjjäna” (Juan 6:10-15). Qhepa alwajj Galilea Qota khurkatanjja, janiw jaqenakajj uka toqet sinti parljjapjjpachänti, ukatwa Jesusajj kunatsa aka oraqer jutäna uk qhanañchäna. Janiw kunatï jakañatak munaski ukanak churir jutkänti, jan ukasti Diosan arunakap yatichiriw jutäna. Jupanakar akham sänwa: “Trabajipjjam, ukampis jan tukusir manqʼa laykojja, jan ukasti wiñay jakañ churki uka jan tukuskir manqʼa layku trabajipjjam” sasa (Juan 6:25-27). w18.06 pág. 4 párrs. 4, 5

Jesusajj jaqenakar wal munasïna, kunjamäsipkis uksa amuyänwa. Niya pʼakisirjam soqos lawar uñtata jan ukajj niya jiwtʼaskirjam mechar uñtatäpkäna ukanakajj kunjamsa jikjjatasipjjäna uk amuyänwa. Ukatwa khuyaptʼayasiri, munasiri, wali pacienciani ukhamänjja (Mar. 10:14). Cheqas janiw kunjamsa jaqenakajj jikjjatasipjje uk Jesusjam yatksnati ni jupjamas yatichksnati. Ukampis yatiyktan uka jaqenakajj kunjamäsipkis uk amuysnawa, amuyañasawa. ¿Kunjamsa uk lursna? 1) munasiñampi parlasa, 2) wakiski ukapachan predicasa, 3) jan jaya tiempo parlasa. Empresarionakasa, politiconakasa, religión pʼeqtʼirinakas jan khuyaptʼayasiri qollqe chuyma ukhamäpjjewa. Ukatwa walja jaqenakajj usuchnoqatäpkaspasa, ananukutäpkaspas ukham jikjjatasipjje (Mat. 9:36). Waljanejja janiw khitirus ni kunarus confiyapkiti ni jutïritakis mä suytʼäwinïpkiti. Ukatwa jupanakarojj munasiñampi parlañasa. Cheqas jila parte jaqenakajja, janiw Bibliat sum yatitasata jan ukajj sum qhanañchatasat istʼapkistuti, jan ukasti jupanakat cheqpachapuni llakisitasata respetomp parlatasatwa istʼapjjestu. w18.09 págs. 31, 32 párrs. 13, 14

¿Kunjamsa Diosar uñtʼañajj wali wakiskirïtap uñachtʼaysna? Bibliat yatjjatasa, kuntï yateqktan ukarjam sarnaqasa, Diosar serviñ nayrar uchasaw uk uñachtʼaysna. Ukhamtï lurañänejja kusisitaw jakasiñäni, kunanaktï Diosajj jutïritak arsuwayki ukarus jukʼampirakiw confiyañäni (Tito 2:13). Kusisiña jikjjatañataki ukat kusisitäskakiñatakejja, Jehová Diosampi sum apasiñaw wakisiraki. Apóstol Pablojj akham sasaw qellqäna: “Tatitur servipjjatam laykojj kusisipjjapunim. Mayamp sapjjäma: ¡kusisipjjam!” sasa (Filip. 4:4). Diosampi sum apasiñatakejja, Bibliat yatjjatasin ukarjam sarnaqañasawa (Prov. 3:13, 18). Ukhamajj kusisita jakasiskakiñatakejja, kuntï Bibliat yateqktan ukarjamaw sarnaqaskakiñasa. Uk lurañajj kunja wakiskirisa ukjja, Jesusajj akham sänwa: “Jumanakatejj ukanak yatipjjsta, ukarjamarak lurapjjsta ukhajja, kusisipjjam” sasa (Juan 13:17; Sant. 1:25). Cheqas ukaw Diosat yatjjatañajj kunja wakiskirisa uk amuyasiñatak yanaptʼistu, wiñay kusisitäñatakis yanaptʼarakistu. w18.09 pág. 18 párrs. 4-6

Epafras jilatajj sumwa jilat kullakanakar uñtʼäna, wal jupanakat llakisirakïna. Uka jilatajj Pablomp chikas carcelankkchïnjja, yanaptʼa munirinakarojj yanaptʼapunirïnwa (Filem. 23). Ukhamatwa mayninakar cheqpach munasitap uñachtʼayäna. Jilat kullakanakasatak Diosat maytan ukhajja, wal jupanakar yanaptʼtanjja, yamas sutinakap aytas maytan ukhajj jukʼampiw yanaptʼtanjja (2 Cor. 1:11; Sant. 5:16). ¿Khitinakatakis sutinakap aytas oración lursna? Jichhürunakanjja, Epafras jilatjamarakiw waljanejj congregacionapankir jilat kullakanakataki, jan walinakan uñjasipki uka familianakatak Diosat mayipjje. Khitinakantï mä familiarapajj jiwki uka jilat kullakanakatsa, guerranakana, oraq khatatinakana, yaqha ukhamanakan uñjasiwayapki, jan ukajj jan qollqen uñjasipki uka jilat kullakanakatsa janirakiw armasiñasäkiti. Cheqas walja jilat kullakanakatakiw Diosat maysna. w18.09 págs. 5, 6 párrs. 12, 13

Apóstol Pablojja, janiw kunatï utjkistu uk churañatak parlkänti, jan ukasti mayninakar chʼamañchtʼañata, yanaptʼa munapki ukanakar yanaptʼañatwa parlarakïna (Hech. 20:31-35). Apóstol Pablojj arunakapampi, luratanakapampiw kunjamsa jiwasajj tiemposampisa, chʼamasampis mayninakar yanaptʼsna, mayninakat llakissna, munasiñampi uñjsna ukanak yatichawayistu. Jaqenakajj kunjamsa apasipjje uka toqet yatjjatirinakajja (sociólogos), mayninakar churirinakajj kusisitäpjjewa sasaw sapjjaraki. Uka toqet parlir mä yatichäwejj akham siwa: “Mayninakar yanaptʼasajja, jaqenakajj jukʼamp kusisitäpjjewa” sasa. Yaqhep yatjjatirinakajja, ‘ukham lurañajj kusisit jakañataki jan usuntañatakiw yanaptʼi’ sasaw sapjje. ‘Jan usuntañatakisa jukʼamp kusisitäñatakis jan kun katoqañ suyasaw mayninakar yanaptʼañasa’ sasaw yaqhepajj sapjjaraki. Jiwasajj ukhamätap yatjjayätanwa, kunattejj Luririsaw mä arunjja, Jehová Diosaw Biblia toqejj “churañanwa jukʼamp kusisiñajj utji” sasajj yatichistu (2 Tim. 3:16, 17). w18.08 pág. 22 párrs. 17, 18

Jesucristot mä profecía qellqkasajja, Isaías profetajj akham sänwa: “Jupajj janiw aleq uñkatasaki kunsa uñjkaniti, chʼajjwanaksa janirakiw aleqa parlanak istʼasaki tʼaqjkaniti. Aynachtʼatanakarusti cheqa luräwimpiw uñjani” sasa (Is. 11:3, 4). Uka arunakajj wali chʼamañchtʼkiriwa. Akapachanjja, yaqhachasir jaqenak taypinwa jaktanjja, ukatwa taqenis ukham mä Juez muntanjja. Uka Juezajja, mä arunjja, Jesusajj janipuniw jaqenakarojj uñkatasak juzgkaniti. Sapüruw mayninakat walsa jan walsa amuytanjja. Ukhamäkchisa pantjasirjamajj janiw Jesusjam cheqaparjamajj juzgksnati, aleq uñkatasakiw uk lurjjsna. Ukampis Jesusajj aka oraqenkaskäna ukhajj akham sasaw ewjjtʼäna: “Jan jumanakajj aleq uñkatasakejj juzgapjjamti, jan ukasti cheqaparjam juzgapjjam” sasa. w18.08 pág. 8 párrs. 1, 2

Cheqas janiw Jehová Diosan arunakapajj alajjpachat istʼasjjeti. Ukhamajj ¿kunjamsa parlistu? Biblia toqew parlistu. “Suma phoqeri” mayordomosa, espíritu santomp chʼamañchtʼataw walja yatichäwinak manqʼäkaspas ukham churistu. Qellqatanaka, Internetan yatichäwinaka, videonaka, grabacionanakaw utjistu (Luc. 12:42). Diosajj kunatï akapachan pasaski ukanak uñjaskiwa, niyarakiw kuna jan walinaktï Supayasa jupamp apnaqat jaqenakas lurapkistu ukanak askichani, ukar confiyañatakiw Bibliajj yanaptʼistu. Ukhamajj Jehová Diosan arup istʼapjjapuniñäni. Ukhamtï lurañänejja, jichhürunakansa jutïrinsa utjkani uka jan waltʼäwinakarojj saykatañäniwa. Bibliajj akham siwa: “Jumanakan aguantapjjañamajj wakisiwa, ukhamat Diosan munañap lurasajja, kuntï jupajj arskäna uk katoqapjjañamataki” sasa (Heb. 10:36). w19.03 pág. 13 párrs. 17, 18

Niyakejjay Moisesajj Israel markar walja maranak pʼeqtʼchïnjja, Josué chachajj ‘istʼapjjetaniti janicha’ sasaw jisktʼaspachäna (Deut. 34:8, 10-12). Mä librojj akham sasaw Josué 1:1, 2 qellqatat qhanañchi: “Nayra tiemponsa jichhasa, mä gobiernojj mä markan cambiasi ukhajja, markatakejj wali chʼamawa, jan waltʼäwinakas utjarakiwa” sasa. Josué chachajj qalltan ajjsarayasïnwa. Ukampis mä qhawqha urunakatjja, Diosar confiyasajj jankʼakiw kuntï Jupajj siskäna ukarjam lurañ qalltäna (Jos. 1:9-11). Ukham lurasajj janiw pantjaskänti, antisas kunjamtï Biblian siskejja, Jehová Diosajj mä ángel toqew juparusa israelitanakarus yanaptʼäna. Uka angelajj Diosan jilïr Yoqapäpachänwa, jupajj ‘Aru’ sasin uñtʼatawa (Juan 1:1; Éx. 23:20-23). Jehová Diosan yanaptʼapampejja, israelitanakajj jankʼakiw Josué chachar istʼañ qalltapjjäna. w18.10 págs. 22, 23 párrs. 1-4

Jehová Diosajj taqe chuyma Jupar servipki ukanakarojj uñtʼiwa, sutinakapsa ‘mä libroruw qellqaraki’. Jehová Diosan ‘libropan’ sutis qellqatäñap munstan ukhajja, ¿kunanaksa lurañasa? Malaquías profetajj ‘Diosaruw ajjsarañasa, ukhamaraki Diosatsa janipuniw armasiñasäkiti’ sasaw säna. Jehová Diosaru adorañat sipansa yaqharu jan ukajj mä kunaru adorjjsna ukhajja, Jupajj ‘jakañ libro’ sasin uñtʼatäki ukat sutis apsjjaniwa (Éx. 32:33; Apoc. 3:5). Jakäwis Diosar katuyasiñajja, janiw Diosan munañap lurä sañakïkiti ni bautisasiñakïkisa. Ukanakjja, jakäwisan may kutikiw lurtanjja, ukampis Jehová Dios toqet saytʼasitassa Jupan serviripätassa luratanakasampiw sapüru uñachtʼayañasa, mä arunjja, kunapachkamay jakchiñäni ukhakamaw Diosar istʼañasa (1 Ped. 4:1, 2). w18.07 págs. 23, 24 párrs. 7-9

Janiw ina chʼusatak Diosar serviñan jilïr jaqer tukksnati, sapüruw chʼamachasiñasa. Ukatakejj yatjjataskakiñasawa, sapürutjamaw amuytʼasiri jaqëñatakis chʼamachasiñasa. Ukatwa Diosan markapajj Biblia sapür liyiñatak chʼamañchistu (Sal. 1:1-3). ¿Uk lurañatakejj chʼamachasisktanti? Jiwasatï Biblia sapür liyiñänejja, Diosan leyinakapsa Biblian yatichäwinakapsa sumwa amuyañäni. Taqe leyinakat sipansa munasiñaw cristianonakatakejj jukʼamp wakiskiri. Jesusajj arkirinakapar akham sänwa: “Jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:35). Jesusan Santiago jilapajja, uka leyirojj ‘Reyin jachʼa leyipa’ sasaw säna (Sant. 2:8). Pablojj akham sarakïnwa: “Khititï yaqhanakar munaski ukajja, cheqpachapuniw leyirjam phoqaski” sasa (Rom. 13:10). Bibliarjamajja munasiñajj wali wakiskiriwa, cheqas “Diosajj munasiñawa” (1 Juan 4:8). w18.06 pág. 19 párrs. 14, 15

Israelitanakas Jehová Diosar colerayapkchïnjja, Moisesaw coleramp atipayasïna. Ukham coleratäsajja, kuna jan walinsa uñjasispa uk janiw amuykänti, ukatwa jan parlañanak parläna. Moisesarojj mayninakan luratanakapaw pantjasiyäna, ukatwa Jehová Diosar jan uñtjjänti. Israelitanakajj nayrïr kutin uma mayipkäna ukhajja, Moisesajj kunatï Diosatak walïkäna ukwa luräna (Éx. 7:6). Ukampis jichha kutinjja, inas ukham walja maranaka sapa kuti colerayapjjatapat wali qaritäjjchïna, aynachtʼatäjjarakchïna. Ukat inas Jehová Diosar jachʼañchañat sipansa jupatak llakisjjchïna. Moisesajj Jehová Diosar jan jitheqtas serviri profetäkchïnsa, pantjasïnwa, janiw Jehová Diosarus uñtjjänti, ukajj jiwasar pasarakistaspawa. Moisesajj niyaw Suma Oraqer mantañampïskäna, jiwasajj niyaw Paraíso oraqer mantañampïskaraktanjja (2 Ped. 3:13). Janipuniw khitis uk aptʼasiñ munktanti. Ukampis ukar mantañ munstan ukhajja, Jehová Diosar uñtaskakiñasawa, munañaparjamas sarnaqaskakiñasawa (1 Juan 2:17). w18.07 pág. 15 párrs. 14-16

Supayajj janiw munkir jan munkir jan walinak luraykistaspati (Sant. 1:14). Walja jaqenakajja, Supayan munañaparjamaw jan amuytʼasisa sarnaqasipki. Ukampis Diosan arunakap yateqjjasajj khitirus servini uk sapa mayniw amtjjañapa (Hech. 3:17; 17:30). Jiwasatï Diosan munañap taqe chuyma lurañ amtstanjja, Supayajj janipuniw Diosat jitheqtaykistaniti (Job 2:3; 27:5, NM). ¿Kunsa Supayasa demonionakas jan lurapkarakispa? Jupanakajj janiw kuntï amuyktan, jan ukajj kunatï chuymasan utjki ukanak yatipkaspati. Bibliajj janiw kawkjansa yatipjjewa sasajj siskiti. Jehová Diosampi Jesusampikiw yatipjjaspa (1 Sam. 16:7; Mar. 2:8). Jiwasatï Diosan munañaparjam sarnaqañatak chʼamachasiñäni ukhajja, Supayajj janiw wiñayatakejj jan walinak lurkistaniti, Jehová Diosaw jarkʼaqestani (Sal. 34:7). Enemigosar uñtʼañasajj wakisiwa, ukampis janiw jupar ajjsarañasäkiti. Jehová Diosan yanaptʼapampejja, pantjasir jaqëkasas Supayar atipjsnawa. Jiwasatï jupa contra saytʼasiñäni ukhajja, jupajj jiwasat jaltjjaniwa (Sant. 4:7; 1 Ped. 5:9). w18.05 pág. 26 párrs. 15-17

Mä wali wakiskir tantachäwirus jaya markar sarañamäkasma ukham amuytʼañäni. Autonakajj mistki ukar purisajj walja autonakwa uñjtajja. Kawkirutï sarañamäki uk sum yatisajja, kawkïr autotï ukar apkiristam ukwa thaqtajja, janiw yaqha cheqar sariri autorojj makatkasmati. Jakäwejja, yaqha markar sarañampi sasiwa. Niyakejjay wayn tawaqonakajj walja amtanakar puripjjañapächejja, jupanakajj niya ukhamarakiw awisajj jan kun lurirjam amuyasipjjaspa. Ukampis kunsa lurañ munapjje uk sum yatipjje ukhajja, suma amtanakaruw puripjje. Wayn tawaqonaka, ¿Jehová Diosar serviñati jakäwiman nayrankani? Khitinakatï Diosatakjam sarnaqañ munapjjchi ukanakajja, kunsa estudiapjjani, kunansa trabajipjjani, casarasipjjaniti janicha, wawanïpjjaniti janicha ukanak amtañatakejj Diosan ewjjtʼanakaparjamaw lurapjjañapa. Diosar jukʼamp serviñatak amtanïpki uk phoqañatakis chʼamachasipjjañaparakiwa. Jehová Diosar serviñ nayrar uchapki uka wayn tawaqonakajja, walja bendicionanakwa katoqapjjani, jakäwipansa suma amtanakaruw puripjjani. w18.04 pág. 25 párrs. 1-3

Jefté chachajj arup phoqänwa, phuchaparojj Siló cheqaruw tabernaculon jiwañapkam serviñapatak khitarakïna (Juec. 11:30-35). Ukham lurañajj Jefté chachatak chʼamänwa, ukampis phuchapatakiwa jukʼamp chʼamäpachäna. Ukhamäkchïnsa awkipan arsutaparjamaw luräna (Juec. 11:36, 37). Jupajj janiw casarasiñapäkänti ni wawaniñapäkänsa, awkipan sutipas ukhamakiw chhaqtjjañapäna, herenciapsa aptʼasiñaparakïnwa. Ukatwa chʼamañchtʼatäñ wal munäna. Bibliajj uka toqet akham siwa: “Israelitanak taypinjja mä costumbrejj utji sapa mara[w] tawaqonakajja Jefté chachan phuchapata pusi uru jachir sarapjjañapajja” sasa (Juec. 11:39, 40). Jichhürunakanjja, ‘kunanakatï Tatitunkki ukanakat llakisipki’ uka cristiano solter wayn tawaqonakajj ukhamarakiw chʼamañchtʼatäñ munapjje (1 Cor. 7:32-35). w18.04 pág. 17 párrs. 10, 11

Walja angelanakaw Supayamp mayachasisajj Dios contra saytʼapjjäna. Uka angelanakat yaqheparojja, Uma Juicio nayraw Supayajj warminakampi ikintasipjjañapatak chʼamañchasin engañjäna. Bibliajj uka toqet parlkasajj akham siwa: “Dragonajj [...] niya chikat warawaranakwa alajjpachat qatattäna” sasa (Gén. 6:1-4; Apoc. 12:3, 4). Diosan familiapat jitheqtasinjja, uka angelanakajj Supayan munañaparjamaw sarnaqjjapjjäna. Ukampis jupanakajj janiw aleq jan wali angelakïpkiti, jan ukasti wali suma organizatäpjjewa. Supayaw Diosan Reinopar niya uñtasit organizawayi. Juparakiw akapach apnaqapjjañapatakejj gobiernonakjam uttʼayawayi (Efes. 6:12). Supayajj uka organizacionap taypiw akapachankir taqe gobiernonakar apnaqe. w18.05 pág. 23 párrs. 5, 6

Jehová Diosajj munasiri suma awkiwa, ukatwa awisajj cheqañchistu. Davidajj wali wakiskiritwa uk uñjäna. Jupajj Diosan ewjjanakapat wal lupʼirïna, Jupjam amuyañ yateqañatakis chʼamachasirakïnwa. Ukatsti jukʼamp suma jaqer tukuñatakejj ukarjamaw sarnaqarakïna. Jumatï ukham luräta ukhajja, jukʼampiw Diosar munasïta, arunakaparjam sarnaqañsa munarakïtawa. Janiw ukakïkiti, amuytʼasir cristianoruw tukurakïta. Christin sat kullakajj akham siwa: “Kuntï liykta uka toqet sum yatjjatta lupʼirakta ukhajja, nayatakis Diosajj uka arunak qellqkaspa ukhamwa amuyta” sasa. Jumatï Dios chuymästajja, Jehová Diosaw yatiñanïñatakisa amuytʼasirïñatakis yanaptʼätam, ukaw akapacharusa kunatï akapachankir jaqenakar paskani ukarus Jupjam uñjañatak yanaptʼätam. Jehová Diosajja, kunas jakäwin jukʼamp wakiskiri uk yatiñama, suma amtanakar puriñama, jutïr urunakan kunatï paskani ukar jan ajjsarañamwa muni. Isaías profetajja, Diosajj jupar confiyirinakarojj sum uñjani, sumankañsa churarakiniwa sasaw säna (Is. 26:3). w18.12 pág. 26 párrs. 9, 10