Noviembre

Kuntï Adanampi Evampejj aptʼasiwayapki ukanakwa Diosajj churistani, wiñay jakañsa churarakistaniwa. Adanampi Evampejj janiw Jehová Diosar taqe chuym munasipkänti, ukatwa Jupar jan serviñ amtapjjäna. Ukhamäkchïnsa, wawanïpjjañapataki, ukat kunjamsa wawanakapar uywapjjani uk jupanak pachpa amtapjjañapatakiw Diosajj jaytäna. Ukampis munañaparjam sarnaqañ amtasajja, jan amuytʼasirïpjjatapwa Adanampi Evampejj uñachtʼayapjjäna. Jilïr wawapajj sullkaparuw jiwayäna, jaqenakajj jupanakatakik taqe kuns muniri, jaqe masipar jan walinak luriri ukhamaw tukupjjarakïna (Gén. 4:8; 6:11-13). Ukampis Diosajja, Jupar serviñ munirinakar kunjamsa salvani uk yatjjänwa (Juan 6:38-40, 57). Jehová Diosajj wali munasiri, pacienciani ukham Diosawa. Jupar jukʼamp uñtʼaskakïta ukhajja, jukʼampirakiw munasïta. Nayrïr chacha warmjam munañamar sarnaqañat sipansa, Diosar jakäwim katuyasiñwa munarakïta. w19.03 pág. 2 párr. 3; pág. 4 párr. 9

Familiaranakasasa jilat kullakanakas kuna jan walinakansa uñjasipjje uk amuyañatakiw chʼamachasiñasa. Wayn tawaqonakatsa, jilïrinakatsa, usutanakatsa, mä familiaran jiwatapat llakitäpki ukanakatsa llakisiñasarakiwa. “¿Kunjamasktasa?” sasin jisktʼasajja, sum istʼañasawa. Kunjamäsipkisa uk amuyatas yatipjjañapatakiw chʼamachasiñasaraki. Ukatsti, kunampitï yanaptʼirjamäktan ukampiw yanaptʼañasa. Ukham lurasajja, cheqpach munasirïtaswa uñachtʼaytanjja (1 Juan 3:18). Janiw taqenis mä igualak jan waltʼäwinakar saykatktanti. Ukhamasti, kunjamas jikjjatasipjje ukarjamaw mayninakar yanaptʼañasa. Yaqhepatakejja, problemanakapat parlañajj chʼamakïspawa, yaqhepatakejj janiraki. Ukhamajj mayninakar yanaptʼañsa munkstanjja, janiw mayjtʼayir jisktʼanak lurañasäkiti (1 Tes. 4:11). Awisajja, mä llakitan arunakapajj janis walïkaspa ukhamäspawa. Ukampis ukhamaw jupajj jikjjatasi, uk amuyañatakiw chʼamachasiñasa. Ukhamajja, istʼañatakejj jankʼakïñasawa, janiw jan amuytʼasisajj jankʼak kuns parlañasäkiti (Mat. 7:1; Sant. 1:19). w19.03 pág. 19 párrs. 18, 19

¿Jehová Diosan cheqa yatichäwinakapat parlañ ajjsarayastanti? Mä reyin palaciopan trabajiri Nehemías chachat parltʼañäni. ‘Jerusalenan perqanakapasa punkunakapas qʼala tukjatawa’ sasin yatiyapjjäna ukhajja, Nehemiasajj wal llaktʼasïna (Neh. 1:1-4). “¿Kunatsa llakitäta?” sasin reyejj jisktʼäna ukhajj wal ajjsarayaspachäna. Ukatwa janïr kun siskasajj Diosar mä qhawqha arunakamp mayisïna. Ukham luratapatwa reyejj Diosan markapar wal yanaptʼäna (Neh. 2:1-8). Ukhamajj janïr kun siskasajja, orasiñajj wali wakiskiriwa, ukwa Nehemiasat yateqsna. Jonás chachat parltʼarakiñäni. Diosajj Nínive markar sarañapatak mayïna ukhajja, Jonasajj wal ajjsaratap laykojj yaqha cheqaruw sarjjäna (Jon. 1:1-3). Ukampis qhepatjja, Diosan yanaptʼapampejj Nínive markar sarasaw Jonasajj ukankir jaqenakar yatiyäna, ukham luratapajj wal uka jaqenakar yanaptʼäna (Jon. 3:5-10). Ukhamajj ajjsarañas utjkchinejja, Jehová Diosaw jupar serviñatakejj yanaptʼistani, ukwa Jonasan sarnaqäwipat yateqsna. w19.01 pág. 11 párr. 12

Kuntï Bibliat yateqktan ukarjam sarnaqjjtan ukhajja, yaqhep amigonakasasa, familiaranakasas janiw nayrjam uñj-jjapjjestaspati, ¿kunatsa? Arkirinakapat parlkasajja, Jesusajj akham sasaw Awkipar mayïna: “Kunatï cheqäki ukanak taypiy jupanakarojj santor tukuyam. Arunakamajj cheqawa” sasa (Juan 17:17). “Santor tukuyam” siski uka arunakajj “yaqhaqtaña” jan ukajj “yaqhachaña” sañwa munarakispa. Diosan arunakaparjam sarnaqjjasajja, akapachat yaqhaqtatäjjtanwa, janiw jupanakjam sarnaqjjtanti. Ukhamïpansti amigonakasasa familiaranakasas janiw nayrjam uñj-jjapjjestuti. Yaqhepajj kunarutï creyktan ukanakatsa janiw yatiñ munapkiti, ukampis ukanakajj pasañapapunïnwa. Jesusajj akham sänwa: “Mä jaqen enemigopajj pachpa utapatwa sartani” sasa (Mat. 10:36). Ukampis kunatï cheqäki uk yateqañatakejj kunanaksa jaytapkstajja, ukat sipan jukʼampinakwa katoqapjjäta sasaw Jesusajj sarakïna. w18.11 pág. 6 párr. 11

Apóstol Pablojj wali valoranitwa jilat kullakanakapar uñjäna, ukajj kuntï jupanakat siskäna ukanwa amuyasi. Sañäni, oración lurkäna ukhajj jupanakat Diosar yuspärapunirïnwa. Cartanakapansa, ukhamarakiw qhawqsa jupanakar munasïna uk qellqäna. Sañäni, Romanos 16:1-15 textonjja, 27 cristianonakan sutinakapwa aytäna. Ukanjja, Priscampi Aquilampejj ‘niyapuniw naya laykojj jakañap aptʼasipjjäna’ sasaw amtäna. Febe kullakajj “walja jilatanakar arjjatiriwa, naya pachparus arjjatarakitänwa” sasaw sarakïna. Ukhamasti, Pablojj chʼamañchtʼkir arunakwa uka munat jilat kullakanakar säna. Jilat kullakanakajj pantjasirïpjjänwa, Pablojj uk yatïnwa. Ukhamäkchïnsa, suma luratanakapatwa qellqäna. Uka cartajj congregacionan liytʼaskäna ukhajja, Pablojj jupanakat siskäna uk istʼasajj wal jilat kullakanakajj kusisipjjpachäna, Pablorojj jukʼampiw munasipjjarakpachäna. ¿Jiwasajj ukhamarakit jilat kullakanakasarojj luratanakapatsa suma arunakapatsa sapa kut yuspärtanjja? w19.02 pág. 16 párrs. 8, 9

Pantjasirïtas laykojj inas akham jisktʼasstan: “¿Diosar taqpach chuymampi serviñatakejj perfectöñajati?” sasa. Janiw perfectöñasäkiti. ¿Kunatsa ukham sistanjja? Jehová Diosajj janiw pantjasitanakas amjjäskiti. Bibliajj akham siwa: “Dios Tatay, jumatejj taqpach juchanak amjjäsiskakismajja, ¿khitirak nayraqataman saytʼaspasti?” sasa (Sal. 130:3). Jupajj pantjasirïtassa juchachasirïtassa yatiwa, taqe chuymaw perdonarakistu (Sal. 86:5). Qhawqsa lurirjamätan uk Jehová Diosajj yatiwa, ukatwa kuntï lurirjamäktan ukak mayistu (Sal. 103:12-14). Diosar taqpach chuymamp serviñatakejj taqe chuymaw Jupar munasiñasa, janirakiw kunäkipansa Jupat jitheqtañasäkiti. Jan walinakan uñjaskasas Diosar munasiskaktan ukhajja, taqpach chuymamp serviskataswa uñachtʼaytanjja (1 Crón. 28:9; Mat. 22:37). Diosan leyinakapajj cheqapätapwa yattanjja, alajjpachankir Awkisaruw kusisiyañ munaraktanjja. Jupar munasiñatwa taqe kuns ewjjtʼaparjam lurtanjja. Ukhamatwa Diosar taqpach chuymampi servipjjatas uñachtʼaytanjja. w19.02 pág. 3 párrs. 4, 5

Kunatï walïki uk lurañajj kunjamsa yanaptʼistu uk uñjtan ukhajja, jukʼampiw Diosar confiytanjja (Sant. 1:2, 3). Yamas Diosajj wawanakapjam uñjistu ukhajj wal kusistanjja, jukʼampirakiw Jupar kusisiyañ muntanjja (Prov. 27:11). Sapa yantʼanakar saykattan ukhajja, Diosar taqe chuyma servitaswa uñachtʼayasktanjja (Sal. 119:113, NM). Cheqas taqe chuymaw Jehová Diosar munastanjja, ukatwa mandamientonakap istʼaña, munañaparjam sarnaqañ amttanjja (1 Rey. 8:61). Taqeniw pantjasir jaqëtanjja. Ukhamajj pantjaskañäni ukhajja, Ezequías reyitwa amtasiñasa. Jupajj pantjaskchïnsa, arrepentisisajj “taqe chuymaw” Jehová Diosar serviskakïna (Is. 38:3-6; 2 Crón. 29:1, 2; 32:25, 26). Ukhamasti, Supayajj chuymas qʼañuchañ munkistu ukar saykatapjjañäni. Jumat jan jitheqtas serviñatakisa ‘istʼasirïñatakis yanaptʼita’ sasinsa Jehová Diosar mayisiskakiñäni (1 Rey. 3:9, NM; Sal. 139:23, 24). w19.01 págs. 18, 19 párrs. 17, 18

Tantachäwinakan arstʼañajj jiwaspachparuw yanaptʼistu (Is. 48:17). Nayrïr toqetjja, niyakejjay arstʼañatak jukʼamp sum wakichtʼasstanjja, Diosan Arupsa, kunjamsa Bibliarjam sarnaqsna uksa jukʼamp sumwa amuytanjja. Payïr toqetjja, comentarionakasampi yanaptʼasajj jukʼamp kusisitaw tantachäwinakan jikjjatastanjja. Kimsïr toqetsti, niyakejjay arstʼañatak wal chʼamachasstanjja, kuntï arstʼkañäni ukajj janiw chuymasat jankʼak mistkaniti. Kunarutï creyktan uk arstʼañaswa Diosajj muni. Arstʼktan ukhajja, Jehová Diosajj sum istʼaskistu, arstʼañatak chʼamachasktan ukarus wali valoranitwa uñji (Mal. 3:16). Ukatwa bendisirakistu (Mal. 3:10). Kunatsa tantachäwinakan arstʼañasa ukwa sum amuytʼawaytanjja. w19.01 pág. 8 párr. 3; págs. 9, 10 párrs. 7-9

Jehová Diosajj kunjamsa uñjistu ukanwa qhawqha yatiñanisa uk amuytanjja. Walja leyinak churañat sipansa, pacienciampiw munasirïñ yatichistu. Yatichäwinakaparjam sarnaqañaswa muni, kunatï jan walïki uk uñisiñassa munarakiwa. Jesusajj mä qollun kunanaktï yatichkäna ukaw kunatsa jaqenakajj jan walinak lurapjje uk amuytʼayistu (Mat. 5:27, 28). Jesusajj Diosan Reinopan Reyit apnaqjjani ukhajja, kunas wali, kunas jan walïkaraki uk jupjam uñjañatakiw machaq mundon yanaptʼaskakistani (Heb. 1:9). Jañchi toqena amuyuna perfectöñatakis yanaptʼarakistaniwa. Janiw jan walinak lurañ munañajj chuymasan utj-jjaniti, janirakiw pantjasjjañänisa, kusisitakiw jakasjjañäni. Kunjamtï Diosajj siskänjja, cheqpachapuniw ‘wawanakapjamajj libre jakasjjañäni’ (Rom. 8:21). Libres jakaskchiñänejja, janiw taqe kunsa munañasarjampuni lurkañäniti, Jehová Diosat yateqasiñäni ukhakiw cheqpachapuni libre jakassna (1 Juan 4:7, 8). w18.12 pág. 23 párrs. 19, 20

Leyirjamajja, mä chachajj warmipar ‘qʼañu sarnaqatap jikjjataspäna’ ukhajj divorciasispänwa. “Qʼañu” sasinjja, kuna toqetsa parlaskäna uk janiw Leyejj qhanañchkänti, inas kunatï jan lurañäki ukanak lurañächïna, phenqʼaskayanak lurañächïna, ukampis janiw aleq ukhamatak maynejj divorciaskaspänti (Deut. 23:14). Jesusajj aka oraqenkkäna uka tiemponjja, judionakat waljanejj kun utjipans divorciasjjapjjakïnwa (Mat. 19:3). Cheqas janiw jupanakjamäñ munktanti. Malaquías profetajj jakkäna uka tiemponjja, walja chachanakaw Diosar jan servir tawaq warmimpi casarasiñatakejj divorciasipjjerïna. Diosajj kunsa uka toqet amuyäna uk Malaquías profetajj akham sänwa: ‘Jupajj divorciasiñar uñisiwa’ sasa (Mal. 2:14-16, NM). Diosajj nayrïr chacha warmir uttʼaykäna ukhatpachwa ukham amuyäna. Jupajja chachajj ‘warmipampiw mayachasjjañapa, panpachanisti mä sapa jaqekïpkaspasa ukhamäpjjaniwa’ sasaw säna (Gén. 2:24). Jesusajj awkipjamarakiw amuyäna, ukatwa akham säna: “Kuntï Diosajj mä yukur mayachki ukjja, jan khiti jaqes jaljtaypanti” sasa (Mat. 19:6). w18.12 pág. 11 párrs. 7, 8

Yaqhep jilat kullakanakajj Diosar serviñatakejj jaya cheqaruw sarapjjaspa. Jupanakajj Isaías profetjamaw sapjjarakispa. Jehová Diosajj “¿khitirus khitäjja? ¿Khitis nayat arsur sarani?” säna ukhajja, “akankasktwa nayajj, nayar khitasita” sasaw Isaías profetajj säna (Is. 6:8). Yanaptʼajj wakiski, ukat lurirjamäskstan ukhajja, ¿Isaías profetjamat saraksna? Diosan arunakap yatiyañata, arkirip tukuyañat parlkasajja, Jesusajj akham sänwa: “Ukhamasti khititï cosecha apthapiyaski ukar mayipjjam, trabajirinak yapupar khitaniñapataki” sasa (Mat. 9:38). ¿Kawkjantï yatiyañajj jukʼamp munaski ukan precursorat servir sarsnati? ¿Yaqha jilatarusa jan ukajj kullakarus ukham sarañapatak yanaptʼsnati? Walja jilat kullakanakajja, ukham jaya cheqan servisaw Jehová Diosaru, jaqe masipar munasitap uñachtʼayapjje. ¿Kunjamanakansa Jehová Diosarojj jukʼamp serviraksna? Jiwasatï Diosar jukʼamp serviñataki chʼamachasiñäni ukhajja, wali kusisitäñäniwa. w18.08 pág. 27 párrs. 14, 15

Mateo, Marcos, Lucas, Juan qellqatanakajja, Diosajj kunsa utjirinïñat amuyi uk sumwa qhanañchi. Yoqaparojj kawkïr awk taykas aka oraqen uywani ukjja wali amuyumpiw Diosajj ajllïna. Jan añcha qollqen chacha warmiruw ajllïna (Lev. 12:8; Luc. 2:24). Mariajj Jesusar ususïna ukhajja, “janiw kawkir puriñas jupanakatak utjkänti, ukatwa telanakampi kʼirtʼasajj uywa liwañjjar iktʼayäna” sasaw Bibliajj qhanañchi (Luc. 2:7). Diosatï Yoqapan nasiñapatak mä suma lugar churañ munaspäna ukhajja, churaspänwa, ukampis Jupar taqe chuyma servir familia taypin jilsuñapwa munäna. Uka sarnaqäwit sum yatjjatasajja, kunsa Diosajj utjirinïñ toqet amuyi ukwa amuytanjja. Yaqhep awk taykanakajja, wawanakapan Diosamp sum apasipjjañapatak chʼamachasiñat sipansa, taqe kun churañatakiw chʼamachasipjje. Ukampis Diosatakejja, jupamp sum apasiñaw jukʼamp wakiskiri. ¿Jiwasajj ukhamti amuyaraktan? ¿Kunsa luratanakasampejj uñachtʼaytanjja? w18.11 pág. 24 párrs. 7, 8

Jehová Diosajj kusisiñ churir Diosawa, ukatwa kusisitäñas muni, kunatsa kusisitäñasa uksa sarakistuwa (Deut. 12:7; Ecl. 3:12, 13). Ukampis aka jan wali pachanjja, kusisita jakasiñajj chʼamakïspawa. ¿Kunatsa chʼamakïspa? Kunayman jan waltʼäwinakan uñjasisajj janiw kusisit jakasksnati. Sañäni, divorciasitasata, jan trabajonitasata, familiasat maynejj congregacionat jaqsuta uñjasitapata, jan ukajj jiwatapatwa jan kusisit jakasksnati. Ukatjja, familiasan inas jan waltʼäwinakajj utjchispa, trabajir masinakasa, jan ukajj escuelankir masinakasaw jiskʼachapjjestaspa, jan waltʼayañatak arknaqataw uñjassna, jan ukajj carcelan uñjasisaw llakita jikjjatassna. Inas usuntsna, jan ukajj jan qollañjam usuni, llaki usuni uñjassna, ukanak utjipanwa jan kusisitäksnati. Ukampis “kusisiri wali chʼamani”, mä arunjja Jesucristojj chuymachtʼañwa munistu, taqenis kusisitäsna ukwa munaraki (1 Tim. 6:15; Mat. 11:28-30). Ukatwa Jesusajj mä qollun yatichkäna ukhajja, Supayan apnaqata akapachan jakkasas kunanakas kusisit jakasiñatak yanaptʼistaspa uk waljanak qhanañchäna. w18.09 pág. 17 párrs. 1-3

Yaqhepanakajj Bibliat yateqjjasajj jankʼakiw jan wali costumbrenakap jaytjjapjje. Ukampis yaqhepatakejj wali chʼamawa (Prov. 23:23). Inas familiapana, trabajir masinakapana jan ukajj amigonakapan jarkʼatäsajj uka costumbrep jaytañ ajjsarayasipjjchispa. Yamas jiwat familiaranakar amtañ costumbre jaytañaw jukʼamp chʼamäspa. Ukampis kunjamsa yaqhep jilat kullakanakajj ukanak jaytawayapjje ukaw yanaptʼistaspa. ¿Kunsa cristianöjjapjjäna ukanakajj lurapjjäna? Bibliajj akham siwa: “Libronakap mayar apthapisajj taqe jaqenak nayraqatan phichantapjjäna. Uka libronakan preciop jaksupjjäna ukhajja, phesqa tunka waranqa qollqeruw jaksupjjäna” sasa (Hech. 19:19, 20). Uka cristianonakajj jan sinttʼasisaw wali valoran libronakap phichantapjjäna, ukham luratapat walja bendicionanak katoqapjjäna. w18.11 pág. 7 párrs. 15, 16

Israelitanakajj Jordán Jawira makatapjjäna uka qhepatjja, Josué chachajj mä jaqempiw jikisïna. Uka chachajj mä espada aytʼatänwa. Jupajj akham sänwa: ‘Nayajj Diosan ejercitopan jilïripätwa’ sasa. Jupajj Diosan markapar arjjatañatakiw ukankaskäna (Jos. 5:13-15). Uka ángel toqejja, Jericó markar katuntañatakejj kunsa lurañapäna ukwa Jehová Diosajj Josué chachar ewjjtʼäna. Qalltanjja, uka ewjjtʼanakat yaqhepajj janis walïkaspa ukhamwa Josué chachajj amuypachäna. Diosajj ‘israelit jaqenakar circuncidam’ sasaw säna. Ukhamïpansti, walja urunakaw soldadonakajj jan nuwasiñ puedipkaspänti (Gén. 34:24, 25; Jos. 5:2). Circuncidat soldadonakajj inas akham jisktʼasipjjchïna: ‘¿Familianakasarojj kunjamsa enemigonakasat jarkʼaqañäni?’ sasa. Ukampis Jericó markankirinakajj janiw nuwantapkänti, jan ukasti wal sustjasipjjäna. Bibliajj akham siwa: “Jericó markan taqe punkunakapasti jistʼantatänwa, janirakiw khiti jaqes mistkänti ni mantkarakïnsa israelitanakan jan mantapjjañapataki” sasa (Jos. 6:1). Uk uñjasajja, israelitanakajj jukʼampiw Diosar confiyapjjäna. w18.10 pág. 23 párrs. 5-7

¿Kunsa Pablon humilde chuymanïtapat yateqsna? Nayraqatajj kunanaktï Jehová Diosan yanaptʼapampejj lurktan ukanakat janipuniw jachʼañchayasiñasäkiti. Akham jisktʼasiñasawa: “¿Kunjamsa Diosan arunakap yatiykta uka jaqenakar uñjtjja? ¿Jaqenakajj markajan yaqhanakar jiskʼachapki ukhamarakit nayajj jiskʼachtjja?” sasa. Jehová Diosan Testigonakapajja, Diosan arunakap istʼirinakar thaqaskaktanwa. Ukatakejja, yaqhepajj jiskʼachatäpki uka jaqenakan arup parlañwa yateqapjje, kunjamtï jakasipki ukham jakañsa yateqapjjarakiwa. Ukham lurir jilat kullakanakajj jachʼa jachʼa tukuñat sipansa, kunjamsa uka jaqenakajj jakasipjje uk amuyañatakiw chʼamachasipjje, ukhamat Diosan arunakapampi chuymanakapar purtʼañataki. w18.09 pág. 5 párrs. 9, 11

Romanonakajj Judasar jiwayjjapjjänwa. Judasat sipansa, ukat kutkatasiri mayni judionakat sipansa, jila parte judionakajj Mesiasan puriniñap wal suyapjjäna, jupaw romanonakat salvatäñasatakejj pʼeqtʼani sasaw amuyapjjäna (Luc. 2:38; 3:15). Waljanejj jupaw Israel markar wasitampi uttʼayasin aka oraqen apnaqjjani sapjjarakïnwa. Ukhamat yaqha markanakankir waranq waranqa judionakajj markapar kuttʼanjjapjjañapataki. Bautisir Juanajja, akham sasaw mä kutejj Jesusar jisktʼäna: “¿Jumätati jutañapäkäna ukajja, jan ukajj yaqharuch suyapjjäjja?” sasa (Mat. 11:2, 3). Jupajja, Jesusati jan ukajj yaqha jaqecha kuntï judionakajj suyasipki uk phoqaypachäni sasin inas yatiñ munchïna. Jesusajj jaktayatäjjäna uka qhepatjja, pä arkirinakapaw thakin Jesusamp jikisipjjäna, Mesiasat parlkasajj akham sapjjänwa: “Jupaw Israel markar salvañatakejj ajllitäpacha sasaw suyasipkayäta” sasa (Luc. 24:21). Mä qhawqha urunakatsti apostolonakajj Jesusar akham sapjjarakïnwa: “Tata, ¿aka tiemponti Israel markatakejj reino mayamp uttʼayaskta?” sasa (Hech. 1:6). w18.06 pág. 4 párrs. 3, 4

Diosan markapat mä yatiyäwi istʼasajj wal amuyasiñasawa. Supayajj Diosan servirinakaparojj ‘uruy arumaw juchañchi’ uk janipuniw armañasäkiti (Apoc. 12:10). Ukatwa Jesusajj kunayman jan wali arunakampiw enemigonakasajj kʼarintistani sasin säna (Mat. 5:11). Jiwasatï Jesusan uka arunakapar istʼañänejja, janiw uka jan wali yatiyäwinakat sustjaskañäniti. Jiwasarojj mensajenaka, correo electrónico ukanak amigonakasaru familiaranakasar ¿apayañajj gustistuti? Mä wakiskir yatiyäw istʼasasa mä experiencia yatisas kunjamatï televisionana jan ukajj radion yatiyirinakajj jankʼaki yatiyañ munapki ¿ukhamti yatiyañ munaraktanjja? Ukampis janïr apaykasajj akhamwa jisktʼasiñasa: ‘¿Aka yatiyäwejj cheqäskapuniti? ¿Sumti ukanakat yatjjattjja?’ sasa. Ukajj cheqäskapuniti janicha uk jan sum yatkstanjja, jan munkasaw kʼari yatiyäwinakaki jilat kullakanakar yatiyasksna, ukajj janiw walïkaspati. Ukhamajja, apayañat sipansa borrsjjañasawa. w18.08 pág. 3 párr. 3; pág. 4 párrs. 6, 7

Jesusajj kusisitäsna ukwa muni, ukatwa uka arunak säna. Cheqas walja jaqenakajja, yanaptʼtan ukhajj yuspärapjjestuwa, ukampis janiw taqe kunpun sum katoqasipkiti. Katoqasirinakajja, yaqhanakar yanaptʼañ munapjjarakispawa. Ukhamajja janis jaqenakajj yuspärapkchistojja, yanaptʼañatak chʼamachasiskakiñasawa. Ukham lurasajj qhawqsa mayninakar yanaptʼsna uk janiw yatktanti. Mayninakar taqe chuyma churirinakajja, janiw kun katoqañ layku churapkiti. Jesusajj uka toqet akham sänwa: “Jumajj mä jachʼa manqʼäwi wakichkäta ukhajja, pobrenakaru, amparat usutanakaru, cojonakaru, juykhunakar invitañamawa, ukhamatwa jumajj wal kusisirakïta. Jumar kuttʼayañatakejj janiw jupanakan kunas utjkiti” sasa (Luc. 14:13, 14). Biblianjja, “khititejj mayninakaru khuyapayasiñamp uñji ukajj bendecitawa” ukat “jan kunan jaqempiru, pisi chʼaman jaqempir uñjirejj kusisiñan jaqewa” sasaw qhanañchi (Prov. 22:9; Sal. 41:1). Cheqas mayninakar yanaptʼasajj kusisitätanwa. w18.08 págs. 21, 22 párrs. 15, 16

Yatiyäwinakajja janiw taqpachajj cheqäkaspati, jan suma yatjjatatäspawa, ukhamarus taqeniw pantjasirïtanjja. Ukhamajj ¿kunas mä yatiyäwejj cheqati janicha uk yatiñatakejj yanaptʼistaspa? Biblian yatichäwinakap uñtʼaña ukat ukarjam sarnaqañaw yanaptʼistaspa. Ukanakat mayajj akham siwa: “Maynin arunakapa jan sum istʼkasina arsuñajja, jan amuytʼanïña, mä pʼenqarakiwa” sasa (Prov. 18:13). Ukat yaqhasti “jan amuytʼasiri jaqejj taqe kuntejj sapki ukarojja iyawsakiwa” sasaw amtayarakistu (Prov. 14:15). Maynïristi, wali jaya tiempos Jehová Diosar serviskstanjja ‘janipuniw amuyusaruki confiyañasäkiti’ sasaw ewjjtʼarakistu. Mä yatiyäwejj cheqati janicha uk nayraqat sum yatjjatañatak chʼamachasiñäni ukhajja, suma amtanakaruw puriñäni ukhamatwa Biblian yatichäwinakapajj yanaptʼistani. w18.08 pág. 7 párr. 19

Bautisasisajja, cheqapuni Jehová Diosankataswa taqenir uñachtʼaytanjja, Jupar istʼañ amtataswa uñachtʼayaraktanjja. Jesusajj bautisasïna ukhajja, niya ukhamarakwa luräna, Jehová Diosarojj akham sänwa: “Dios Tatitojjay, munañam lurañaw kusisiyitu” sasa (Sal. 40:7, 8). Jesusan ukham luratapatjja, ¿kunjamakis Jehová Diosajj jikjjatasïna? Biblian akham siwa: “Jesusajj bautisatäjjasinjja ukspachaw umat mistjjäna. Ukatjja alajjpachaw jistʼartäna, Juanan uñjkatarakiw Diosan espiritupajj Jesusjjar jutäna, mä palomar uñtata. Ukatsti mä aruw alajjpachat istʼasirakïna, akham siri: ‘Jupajj Wawajawa, wali munatawa, nayajj wal jupat kusista’ sasa” (Mat. 3:16, 17). Jesusajj Jehová Diosankjjänwa, ukhamäkchïnsa Dios saparuki taqe chuyma serviñwa amtäna, ukajj walpun Diosar kusisiyäna. Jehová Diosajj jakäwis Jupar katuyastan ukhajja, ukhamarakiw wal kusisi, ukham luratasat bendisistaniwa (Sal. 149:4). w18.07 pág. 23 párrs. 4, 5

Moisesajja, ‘apsurapipjjäma’ sasin inas Aaronampit jupampit parlaskchïna. Ukampis ukham parlatapajj Diosar jan respetatapwa uñachtʼayäna, cheqas Jehová Diosaw uka milagro luraskäna. Salmo 106:32, 33 qellqatajj akham siwa: “Meriba umanak jakʼan Tatiturojj qʼapisiyapjjäna [jan ukajja, colerayapjjäna], jupanak laykuw Moisesajj jan walir purïna, jupan chuymap mayjtʼayapjjäna, lakapasti jan arsuñanak parläna” sasa (Núm. 27:14). Kunjamächïnjjaya, Moisesan luratapajj janiw Jehová Diosar jachʼañchkänti. Ukatwa Moisesampir Aaronampirojj akham säna: ‘Janiw jumanakajj arunakajar istʼapkistati’ sasa (Núm. 20:24). Cheqas ukajj wali jachʼa juchänwa. Uka nayrajja, Jehová Diosajj jupa contra saytʼir israelitanakarojj janiw Canaán oraqer mantaykänti (Núm. 14:26-30, 34). Ukhamajj Moisesan Jehová Dios contra saytʼatapatjja, jupanakjam juchañchatäñajj wakisirakïnwa. Ukatwa Diosajj Suma Oraqer jan mantaykarakïnti. w18.07 pág. 14 párrs. 9, 12; pág. 15 párr. 13

Mä jilatatakejj alcohol umañajj jan walïkchi ukhajja, concienciapar respetatasat janiw alcohol umkañäniti ukhamat jan lanktʼayañataki. Yaqhepajj Jehová Diosan janïr Testigopäkasajj wali umirïpjjänwa, ukampis jichhajj janiw alcohol ni mä jukʼsa umañ munjjapjjeti. Jupanakar janiw lanktʼayañ munktanti ni jan walinakan uñjasipjjañapsa munktanti (1 Cor. 6:9, 10). Ukhamajj mä jilatatï alcohol churatajj jan munkani ukhajja, janiw obligañasäkiti. Timoteot parltʼañäni, jupajj mä 20 maranïkäna ukhajja, circuncidayasïnwa. Ukham luratajj walsa usuyaskchïnjja, Diosan arunakap yatiyañapäkäna ukanakar jan lanktʼayañatakiw uk luräna. Jupajj apóstol Pabljamarakiw jaqenakar jan lanktʼayañ munkänti (Hech. 16:3; 1 Cor. 9:19-23). ¿Jiwasajj mayninakar jan lanktʼayañatakejj chʼamachasiraktanti? w18.06 págs. 18, 19 párrs. 12, 13

Diosar jan servir mä jaqer uñtʼta ukhajj ¿qhawqsa jupat yatta? Cheqas mä jukʼakwa yatisma. Inas sutipa kunjam uñnaqtʼanisa ukak yatchisma. Ukampis mä Testigor uñtʼta ukhajj janiw ukhamäkiti, jukʼampinakwa yattajja. Sañäni, Jehová Diosar wal munasitapa, suma chuymanïtapa, Diosajj markapar jawsatapwa yattajja (Juan 6:44). Jupajj yaqha markatäkchisa, yaqha costumbrenïkchisa, yaqha kasta jañchinïkchisa, waljanakwa jupat yattajja, jupas ukhamarakiw jumat yati. Jupajj yaqha arsa parlkchejja, kuntï Diosajj yatichkistu uka ‘qʼoma aru’ jumjam parlatapwa jankʼaki amuyta. Mä arunjja, jupasa jumasa, Jehová Diosaruw servipjjta, Biblian yatichäwiparjamaw sarnaqapjjta, jutïr urun sum jakasiñsa suyapjjaraktawa. Uk yatiñajja, wali wakiskiriwa ukaw jupar confiyañatakisa, jupampi walja tiempo sum apasiñatakis yanaptʼiristamjja. w18.12 pág. 21 párrs. 9, 10

Criston yanaptʼapampejja, ‘judío cristianonakan circuncidasiñapajj janiw wakisjjeti’ sasaw Jerusalén markankir jilïr irpirinakajj amtjjapjjäna (Hech. 15:19, 20). Ukampis walja maranak qhepatjja, judío cristianonakajj wawanakapar circuncidasipkakïnwa. Ukatwa akham sasin jisktʼassna: ‘Niyakejjay Moisesan Leyipajj Jesusan jiwatapamp chhaqtjjchïnjja, ¿kunatsa circuncisión toqet jan waltʼayasiñajj utjaskakïna?’ sasa (Col. 2:13, 14). Yaqhep cristianonakatakejja, mä yatichäwir jankʼak iyawsañajj janiw faciläkiti. Judío cristianonakampejj ukaw pasarakïna, circuncisión toqet yatichäwir iyawsapjjañapatakejj tiempow pasañapäna (Juan 16:12). Judionakatakejja, circuncisionajj Diosampi sum apasiñatak mä señalänwa, ukampis ‘janiw ukhamäjjeti’ sasin iyawsañajj yaqhepatak chʼamakïnwa (Gén. 17:9-12). Yaqhepasti markapankirinakamp jan tʼaqesiyatäñ munasaw jan iyawsapkänti (Gál. 6:12). Ukampis tiempompejja, Cristojj walja ewjjtʼanakwa Pablo toqejj jupanakar churäna (Rom. 2:28, 29; Gál. 3:23-25). w18.10 págs. 24, 25 párrs. 10-12

Caifás chachajj arumäjjäna ukhaw Jesusar katuntapjjañapatakejj soldadonakar khitäna. Jesusajj uk lurapjjatap yatïnwa, ukatwa qhep qhepa kuti apostolonakapamp manqʼkäna ukhajj mä qhawqha espadanïpjjañapatak mayïna. Pä espadajj jupanakar yatichañatak walikïspänwa (Luc. 22:36-38). Uka arumajj walja jaqenakaw Jesusar katuntir jutapjjäna, uk uñjasajja, Pedrojj colerasisaw uka jaqenakat maynirojj jiñchup thoqoqayäna (Juan 18:10). Ukampis Jesusajj jupar akham sänwa: “Imañapar uka espadam imasim, espada aytirejj espadampi jiwayataw uñjasini” sasa (Mat. 26:52, 53). Jesusan uka arunakapajj kuntï uka nayrajj Diosar maykäna ukarjamänwa. Jupajja, ‘discipulonakajajj janiw akapachankirïpkiti’ sasaw Diosar mayïna (Juan 17:16). Discipulonakajja, ina chʼusat tʼaqesiñanak askichañapatakejj Diosaruw jaytapjjañapäna. Ukatwa Diosan servirinakapajj sumankañana, mayachtʼata ukham jakastanjja. Diosajj servirinakapar ukham jakasir uñjasajj wal kusispacha (Sof. 3:17). w18.06 pág. 7 párrs. 13, 14, 16

Supayajj janiw jan walinakaruk puriyañ munkistuti, jan ukasti Jehová Diosat jitheqtañasatakiw ajjsarayañ munarakistu. Inas jupajj gobiernonak toqejj Diosan arunakap yatiyañ jarkʼchispa, jan ukajj Bibliarjam sarnaqañ munatasatwa trabajir masinakasampi yateqer masinakasampi jiskʼachayistaspa (1 Ped. 4:4). Tantachäwinakar jan sarañasatakis familiaranakasampiw jarkʼayistaspa (Mat. 10:36). ¿Kunjamsa ukanakar saykatsna? Maya, niyakejjay Supayajj jiwasanak contra nuwasiskchejja, uka jan waltʼäwinakajj utjakipuniniwa, janiw sustjasiñasäkiti (Apoc. 2:10). Paya, uka jan walinakat sipan kunas jukʼamp wakiskiri ukwa amuyañasa. Jehová Diosarojj kun katoqañ laykukis sirvsna ukhamwa Supayajj amuyi. Jan walinakan uñjasisajj Diosar ‘maldecipjjaniwa’ sasaw amuyaraki (Job 1:9-11; 2:4, 5). Kimsa, taqe kunat sipansa Jehová Diosaruw confiyañasa, jupaw jan walinakar saykatañatakejj chʼam churistani. “Nayajj janipuniw jaytanukkämati” sasaw Jupajj sistu (Heb. 13:5). w18.05 pág. 26 párr. 14

Jehová Diosan arunakap yatiyatasajj qhawqsa jaqenakar yanaptʼaspa uk janipuniw armañasäkiti. Jupanakajj janis istʼañ munapkchejja, qhepat istʼjjapjjestaspawa. Cheqas waljanejj janiw istʼañ munapkistuti, ukampis uñchʼukisipkistuwa. Sañäni, suma isthaptʼatätanti, respetasirïtanti janicha, munasirïtanti janicha uk amuyapjjewa. Yaqhepajj jan walsa jiwasanakat amuyapkchejja, tiempompejj suma sarnaqatas uñjasajj janiw ukham amuyjjapjjeti. Sergio jilatampi Olinda esposapampejj precursoratwa servisipki. Jupanakajj akham sapjjewa: “Usuntapjjataj laykojja, mä qhawqha tiempojj janiw yatiyir sarjjapjjayätti. Ukampis kuttʼjjapjjayäta ukhajja yaqhepajj akham sapjjetänwa: ‘Kunats jan jutjjapjjta, walpun faltachasipjjsma’” sasa. Bibliajj akham siwa: “Alwatajja yapucham, jaypʼusa yapucharakim” sasa. Jiwasatï Diosan Reinopat jan qarjtasa yatiyaskakiñäni ukhajja, ‘aka oraqpachan yatiyasiñapatakiw’ yanaptʼañäni (Mat. 24:14). Jehová Diosarus wal kusisiyañäni. Jupajj ‘achunak achoqasipkaki’, mä arunjja, jan qarjtas yatiyasipkaki ukanakarojj munasiwa (Luc. 8:15). w18.05 pág. 16 párrs. 16-18

Jehová Diosajja, jaqenakajj juchar purtʼasipkäna uka tiempotpachwa chʼamañchtʼirïtap uñachtʼayäna. Adanampi Evampejj Edén jardinan Dios contra saytʼapjjäna uka qhepatjja, Diosajj mä profecía arsüna, ukaw Adanan wawanakapar chuymachtʼañapäna. Uka profeciajj Génesis 3:15 texton qellqatawa. Ukanjja, Supayasa luratanakapas qʼala tʼunjatäniwa sasaw Jehová Diosajj säna (1 Juan 3:8; Apoc. 12:9). Noé chachajj Diosar jan servir jaqenak taypinwa jakäna, jupampi familiapampikiw Jehová Diosar servipjjäna. Taqe cheqansa nuwasiñanaka qʼañu juchanak lurañakiw utjaskäna. Uk uñjasajja, Noé chachajj llakimpiw aynachtʼaspäna (Gén. 6:4, 5, 9, 11; Jud. 6). Kuna jan walinakatï aka oraqen utjki ukanakajj kunjamsa qʼal tukjasini, jupasa familiapas kunsa salvasiñatakejj lurapjjañapa ukanakwa Diosajj säna (Gén. 6:13-18). Uka arunakajj walpun Noé chachar chʼamañchtʼpachäna. w18.04 pág. 15 párrs. 1, 2

Jiwasatï ajjsarirïstanjja, mayninakar janiw chʼamañchtʼkiristti sasajj janiw amuyañasäkiti. Mayninakar chʼamañchtʼañajj janiw chʼamapunïkiti. Mä jilatarusa jan ukajj kullakarusa kusisitaw aruntañasa. Ukampis jupatï jan kusisit aruntkistani ukhajja, ak amtañasawa: inas kuna jan walinakan uñjasiskchi, maynimpi parlañsa munarakchi. Uk uñjasajja, jupar chʼamañchtʼañatakejj taqe chuymaw istʼañasa (Sant. 1:19). Taqeniw mayninakar chʼamañchtʼsna. Salomón reyejj akham sasaw qellqäna: ‘Kunja askisa arunak horasapar jikjjatañajja’ sasa. Ukat akham sarakïnwa: “Suma kankañampi [jan ukajj nayrampi] uñtäwejj chuymarojj kusisiyiwa; suma yatiyäwinakasti chʼamañchiwa” sasa (Prov. 15:23, 30). Apóstol Pablojja, Diosar cantañataki utjki ukanak mayninakampi cantañajj wal chʼamañchtʼistaspa sasaw qhanañchtʼarakïna (Hech. 16:25; Col. 3:16). Jehová Diosan urupajj jukʼamp jakʼachasinjjepanjja, maynit maynikam chʼamañchtʼasiñajj jukʼamp wakiskirïniwa (Heb. 10:25). w18.04 pág. 23 párr. 16; pág. 24 párrs. 18, 19