Enero

Timoteojj Bibliat yatjjatatapatwa Diosar confiyäna, ukaw Diosan amigopäñatak yanaptʼarakïna. Jiwasajj ukhamarakiw kuntï Bibliajj Diosat yatichki ukanak yatjjatañasa, jan pächasiñatakis kuntï yatjjatktan ukanakat amuytʼañasa. Aka kimsa yatichäwinakat janiw pächasiñasäkiti. Maya, Jehová Diosaw taqe kuns luri (Éx. 3:14, 15; Heb. 3:4; Apoc. 4:11). Paya, Biblian yatichäwinakapajj Diosatwa juti (2 Tim. 3:16, 17). Kimsa, Diosajj mä suma organistʼat markaniwa, Jesucristompi pʼeqtʼatarakiwa, uka markajj Jehová Diosan Testigonakapawa (Is. 43:10-12; Juan 14:6; Hech. 15:14). Uka yatichäwinakat jan pächasiñatakejja, janiw Bibliat taqpachpun yatiñajj wakiskiti. Antisas ‘suma amuytʼirïñasawa’ ukhamatwa cheqa yatichäwinakat jan pächaskañäniti (Rom. 12:1). w20.07 pág. 10 párrs. 8, 9

Apocalipsis libronjja, langostanakajj jaqen ajanupar uñtasita ajanunïpjjewa, “pʼeqenakaparojj qori coronanakjam asjjatatäpjjarakïnwa” siwa (Apoc. 9:7). Uka langostanakajja, “Diosan sellop jan katoqerinakarukiw [mä arunjja Diosan enemigonakaparukiw] usuchjap[jje]”, phesqa phajjsinakaw ukham lurapjje, langostanakajj mä phesqa phajjsikiw jakapjje (Apoc. 9:4). Amuyatajja, Apocalipsis libron parlki uka profeciajj Diosan ajllit cristianonakatwa parlaskpacha. Jupanakajj jan ajjsarasaw Diosan juchañchäwi arunakap aka jan wali pachan yatiyapjje. Ukhamatwa akapachan yanapirinakaparojj jan waltʼayapjje. ¿Joel 2:7-9 textonsa Apocalipsis libronsa langostanakat parlki ukanakajj yaqha yaqhäpjjewa sañti muntanjja? Jïsa. Biblianjja, awisajj mä kunat parlkasajj janiw taqpach cheqanakan uka pachpa sañ munkapuniti. Sañäni, Apocalipsis 5:5 textonjja Jesusarojj ‘Judá tribunkir León’ sasiwa. 1 Pedro 5:8 textonsti Diablojj ‘leonar uñtataw warariski’ sarakiwa. w20.04 pág. 3 párr. 8; pág. 5 párr. 10

Sarái warmin Agar esclavapajj Abrán chachan esposapäjjasajja, jan sum amuytʼasisaw kuns luräna. Usurëjjasajja, Sarái warmirojj jan wawanïtapat uñisiñwa qalltäna. Ukatwa Sarái warmejj jupar jiskʼachas castigäna, ukhaman uñjasisajj Agar warmejj escapjjänwa (Gén. 16:4-6). Pantjasirïtas laykojj akham sasaw Agar warmit amuysna: ‘Jachʼa jachʼa tukutapatwa ukhaman uñjasïna’ sasa. Ukampis Jehová Diosajj janiw ukham amuykänti. Jan ukasti, mä angelaruw khitäna, uka angelajj cambiañapatakiw Agarar yanaptʼäna, bendisirakïnwa. Diosajj Agar warmir uñjaskänwa, jan walinakan uñjasitapsa yatiskarakïnwa, Agarajj uk amuyänwa. Ukatwa akham säna: ‘Uñjiri Diosätawa’ sasa (Gén. 16:7-13). ¿Kunsa Jehová Diosajj Agar warmit yatïna? Nayrajj kunanakas jupar pasäna, kunjamanakansa uñjasïna ukanakwa yatïna. Agar warmin Sarái warmir respeto faltatapajj Jehová Diosatak janiw walïkänti. Ukhamäkchïnsa Agar warmejj kunjamäskänsa, kuna jan walinakansa uñjasiskäna uk Diosajj yatïnwa, ukatwa juparojj munasiñamp uñjäna. w20.04 pág. 16 párrs. 8, 9

Apóstol Pablojja, taqe cristianonakaw mä carreran tʼijusktanjja sasaw säna (Heb. 12:1). Ukhamasti Jehová Diosajj servirinakapar kuna premio churañtï amtki uk katoqañatakejja, jilïrinakasa, waynanakasa, chʼamaninakasa, pisi chʼamaninakasa taqeniw jan qarjtas tukuykam tʼijuñasa (Mat. 24:13). Apóstol Pablojj tukuykamaw tʼijüna, ukatwa jan pächasis akham säna: “Tʼijuñansa tukuyañkamaw tʼijuwayta” sasa (2 Tim. 4:7, 8). ¿Kuna carreran tʼijuñatsa Pablojj parlaskäna? Sum yatichañatakejja, apóstol Pablojj nayra Grecia markan kuna anatañanakas utjäna ukanakat parlasaw awisajj yatichirïna (1 Cor. 9:25-27; 2 Tim. 2:5). Cristianonakan vidapajj mä carreran tʼijuñampi sasiwa sasaw Pablojj walja kuti säna (1 Cor. 9:24; Gál. 2:2; Filip. 2:16). Maynejj Jehová Diosar vidap katuyasisin bautisasjje ukhaw uka carreran tʼijuñ qallti (1 Ped. 3:21). Ukatjja Diosajj wiñay jakaña mä premior uñtasit churki ukhaw tʼijuñ tukuyi (Mat. 25:31-34, 46; 2 Tim. 4:8). w20.04 pág. 26 párrs. 1-3

Bibliajj akham siwa: “Tatitusti arunakapar phoqeriwa, jupaw jumanakarojj chʼamañchapjjätamjja, Supayatsa jarkʼaqapjjarakïtamjja” sasa (2 Tes. 3:3). Supayajj jan waltʼayañ munkistu ukat jarkʼaqasiñasatakejja, Jehová Diosajj mä armadurwa churistu (Efes. 6:13-17). Uka armadurajj wali chʼamaniwa, sumwa jarkʼaqaraki. Ukampis taqpach armadura uchantasiñäni ukhakiw jarkʼaqestani. Uka armaduran wakʼapat parltʼañäni. Kunatï cheqäki uka wakʼajja, Diosan Arupan qellqatäki mä arunjja, Biblian qellqatäki uka cheqa yatichäwinakawa. ¿Kunatsa uk uchasiñasa? ‘Kʼarin awkipata’, mä arunjja Supayat jarkʼaqasiñatakiw uchasiñasa (Juan 8:44). Supayajj walja waranqa maranakaw kʼarisiski, ‘oraqen jakirinakarus engañjaskaraki’ (Apoc. 12:9). Ukampis Biblian cheqa yatichäwinakapaw jan engañjayasiñatakejj yanaptʼistu. ¿Kunjamsa kunatï cheqäki uka wakʼa uchassna? Jehová Diosat kunatï cheqäki uk yateqasa, ‘espiritumpi cheqampi adorasa’, ukat ‘taqe kunan honrado chuymampi sarnaqasa’ (Juan 4:24; Efes. 4:25; Heb. 13:18). w21.03 págs. 26, 27 párrs. 3-5

Nayra Israel markanwa Jehová Diosar adorasïna, ukatwa Suma Oraqe satänjja. Ukampis 33 mara Pentecostés urut aksarojja, uka Suma Oraqejj janiw mä lugaräjjänti. ¿Kunatsa? Jehová Diosan markapajj janiw mä lugarankkiti, jan ukasti oraqpachankiwa. Ukhamajja “Suma Oraqe” sasajj kunanaktï Diosan markapajj lurki uka toqetwa parlaski, mä arunjja, predicacionata tantachäwinakata, yaqha ukhamanakatwa parlaski. Qhepa urunakanjja norte toqenkir reyejj walja kutiw Suma Oraqer mantawayi. Sañäni, Alemaniankir nazi partidojj norte toqenkir reyïkäna ukhajja, yamas Segunda Guerra Mundial utjkäna ukhajja, Diosan servirinakapar arknaqasa jiwarayasaw Suma Oraqer mantäna. Segunda Guerra Mundial qhepatjja Unión Sovieticaw norte toqenkir reyëjjäna, jupajj Diosan markapar arknaqasa, jupanakar yaqha markar apayasaw Suma Oraqer mantarakïna. w20.05 pág. 13 párrs. 7, 8

Diosan amigonakapat yaqhepajja Jesusajj janïr jiwkäna ukhaw jakapjjäna, jupanakat parltʼañäni. Abrahán chachajj Jehová Diosar wal confiyäna. Abrahanajj 1.000 jila maranakas jiwatäjjchïnjja, “nayan munata” amigojawa sasaw Diosajj jupat säna (Is. 41:8). ¿Kunsa ukat amuytanjja? Maynejj jiwatäjjchisa Jehová Diosajj amigoparjam uñjaskakiwa, ukhamajj Abrahán chachat Diosajj janiw armaskiti (Luc. 20:37, 38). Job chachat parltʼarakiñäni. Angelanakajj alajjpachan tantachasipkäna ukhajja, Jehová Diosajj akham sasaw Job chachat säna: “Janiw khitisa oraqenjja utjkiti jupjama cheqa, aski jaqejja, jupasti janipuniw khitirus ñanqha lurañ munkiti” sasa. Ukham sasaw qhawqsa jupar confiyäna uk uñachtʼayäna (Job 1:6-8). Daniel chachajja, jaqenakajj kʼari diosanakar adorapkäna uka markanwa mä 80 maranak jan jitheqtas Jehová Diosar servïna. ¿Kunjamsa Diosajj Danielar uñjäna? Danielajj wali edadanëjjäna ukhajja, kimsa kutiw angelanakajj jupar akham sapjjäna: ‘Diosasti jumarojj walpun munastam’ sasa (Dan. 9:23; 10:11, 19). Cheqansa, Diosajj jiwatäpki uka munat amigonakapar jaktayañ wal muni (Job 14:15). w20.05 págs. 26, 27 párrs. 3, 4

Bibliat mä suma yateqerejj inas Diosan leyinakap yateqchispa, respetomp uñjarakchispa. Ukampis ¿Jehová Diosar munasitapatti Jupar istʼani? Eva warmit amtañäni, jupajj Diosan leyinakap sumwa yatïna, ukampis janiw Diosar taqe chuym munaskänti. Adanampejj uka kikparakiw pasäna (Gén. 3:1-6). Ukhamajj janiw Diosan cheqa leyinakapaki, yatichäwinakapaki yatichañasäkiti. Diosan yatichäwinakapasa leyinakapasa jiwasar yanaptʼapunistuwa (Sal. 119:97, 111, 112). Ukampis Bibliat yateqerejja janiw ukham amuykaspati, Diosajj munasiñat leyinak churatap yatini ukhakiw ukham amuyani. Ukhamajj akham sasaw jisktʼsna: “¿Kunatsa Diosajj ‘ukham luram, jan ukajj jan ukham luramti’ sasin sispachïstu? ¿Kunsa ukajj Diosat yatichistu?” sasa. Jehová Diosat lupʼiñapataki, Jupar taqe chuym munasiñapatak yanaptʼañäni ukhajja, chuymaparuw purtʼsna. Ukham lurañäni ukhajja, janiw Diosan leyinakaparuk munaskaniti, Diosarus munasirakiniwa. Jukʼampiw Jupar confiyani, jan walinaksa aguantarakiniwa (1 Cor. 3:12-15). w20.06 pág. 10 párrs. 10, 11

Jehová Diosat jitheqtata mä jilatasa jan ukajj mä kullakasa, janiw jankʼakejj mayamp Diosan amigopäkaspati, ukatwa paciencianïñajj wakisi. Jitheqtatäpkäna ukanakat waljanejj akham sapjjewa: ‘Diosan markapar kuttʼañajatakejja, walja kutiw jilïr irpirinakasa jilat kullakanakasa visittʼapjjetäna’ sasa. Asia cheqan jakiri Nancy kullakajj akham siwa: “Congregacionankir mä suma amigajaw wal yanaptʼitäna. Jilïr kullakaparjamaw munasiñamp uñjirïtu. Kunanaktï nayrajj lurapjjerïkta ukanakwa amtayitäna. Kunjamäsktsa uk awisirïkta ukhajj wali pacienciampiw istʼirïtu, jan pächasisaw ewjjtʼirïtu. Jupajj suma amigapunïnwa, yanaptʼapunirïtuwa” sasa. Maynejj chuyma ustʼatäki ukhajja, mä heridanïkaspas ukhamawa. Jupajj kunjamäskisa uk amuyañajja, heridapar qolljjatañatak mä pomadampi sasiwa. Yaqheparojja mayniw congregacionan chuym ustʼayi ukatwa Jehová Diosat jitheqtapjje, walja maranakas pasjjchejj chuyma ustʼatäsipkakiwa. Ukatwa kuttʼaniñ jan munapkiti. Yaqhepajj ina chʼusatwa juchañchapjjetu sasin inas amuyasipjjchi. Jupanakajja, istʼatäñwa munapjje, kunjamäskisa uk amuyatäñwa munapjjaraki. w20.06 pág. 26 párrs. 10, 11

Tentacionanakar sapa kuti atipjäta ukhajja, kunatï walïki ukanak lurañajj jukʼamp faciläniwa. Kuntï jaqenakajj chacha warmi ikthapiñ toqet amuyapki ukajja, Supayatwa juti. Ukhamasti akapachankir jaqenakjam jan amuyasajj ‘Supayaruw atipjasktajja’. Kunas jan juchäki kunas juchajja ukjja Jehová Diosakiw sistaspa. Jiwasajj jan juchachasiñatakiw wal chʼamachastanjja. Ukampis mä juchar purtʼastan ukhajja, oracionanwa Diosar yatiytanjja (1 Juan 1:9). Mä jachʼa juchar purtʼastan ukhasti, jilïr irpirinakan yanaptʼapwa thaqaraktanjja. ¿Kunatsa? Jehová Diosaw jupanakarojj jiwasar yanaptʼapjjañapatak uttʼayi (Sant. 5:14-16). Nayrajj juchanakarus purtʼaskchiyätanjja, janiw ukanakat juchañchasjjañasäkiti. ¿Kunatsa? Wali munasir Jehová Dios Awkisajj Wawaparuw jiwas layku jiwañapatak khitanïna, ukhamat juchanakasat perdonatäñasataki. Juchanakasat taqe chuyma arrepentistan ukhajja, Diosajj perdonistuwa. Ukhamatwa qʼoma concienciampi Jupar serviskaksna (1 Juan 2:1, 2, 12; 3:19, 20). w20.07 págs. 22, 23 párrs. 9, 10

Mä tiemponjja Jehová Diosajj sapakïnwa, ukampis janiw llakitäkänti. Kusisitäñatakejja, jupajj janiw compaña munkänti. Ukhamäkchïnsa, yaqhanakajj jakapjjarakispa kusisitäpjjarakispa ukwa munäna. Ukatwa munasiñat taqe kun lurañ qalltäna (1 Juan 4:19). Nayraqatjja Jesús Yoqaparuw Jehová Diosajj luräna. Ukjjarusti, Jesús toqew “taqe kunatï alajjpachansa oraqensa utjki ukanak luräna”, angelanakamppacharu (Col. 1:16). Jesusajj Awkipamp chik trabajisajj wali kusisitänwa (Prov. 8:30, TNM). Angelanakas wal kusisipjjarakïna. ¿Kunatsa? Jupanakajj kunjamsa Jehová Diosampi Jesusampejj aka oraqe ukhamarak alajjpacha lurapjjäna uk uñjapjjänwa. ¿Uk uñjasajj kamachapjjänsa? Bibliarjamajja, wal kusisipjjäna, cheqas taqe kun luratap uñjasajj Jehová Diosar wal jachʼañchapjjäna, yamas jaqenakar lurkäna ukhajj jukʼampiw jachʼañchapjjpachäna (Job 38:7; Prov. 8:31, TNM). Taqe luratanakapajja, wali munasirïtapa, wali yatiñanïtapwa uñachtʼayi (Sal. 104:24; Rom. 1:20). w20.08 pág. 14 párrs. 1, 2

Jehová Diosajj munañataki, munatäñatakiw lurawayistu. Ukatwa uñisitajj chuym ustʼayastanjja, sustjasiraktanjja. Mä jilatajj akham siwa: “Soldadonakajj Testigötajat nuwjapjjetäna, insultapjjetäna, ajjsarayapjjetäna ukhajja, sustjasiyätwa jiskʼachataw amuyasiyäta” sasa. Jaqenakajj uñisipjjestu ukajj wal chuym ustʼayistu, ukampis janiw mayjtʼasktanti, kunattejj uñisitaw uñjasipjjäta sasaw Jesusajj säna. ¿Kunatsa akapachajj uñisistu? Akapachajj kunjamtï Jesusar uñiskänjja, ukhamarakiw ‘jan akapachankirïtasat’ uñisistu (Juan 15:17-19). Gobiernonakar respetkstansa, janiw politicar mitisktanti, banderarus aruntktanti ni himno nacionalsa cantktanti. Jehová Diosarukiw adortanjja. Supayampi arkirinakapampejj Jupa conträpkchisa, Diosakiw jaqenakar gobernañatakejj derechoni sasaw arjjattanjja (Gén. 3:1-5, 15). Reinopakiw taqe jan walinak askichani, enemigonakaparus niyaw tukjani sasaw predicaraktanjja (Dan. 2:44; Apoc. 19:19-21). Ukajja, llampʼu chuymaninakatakejj suma yatiyäwiwa, jan wali jaqenakatakisti jan wali yatiyäwiwa. w21.03 pág. 20 párrs. 1, 2

Jehová Diosajja, kullakanakarojj kunayman wakiskir lurañanakwa congregación taypin churi. Jupanakajj yatiñani, Diosar confiyiri, Diosar taqe chuym serviri, jan ajjsariri, suma luräwinak luriri ukhamäpjjewa (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Congregacionan edadani walja jilat kullakanak utjatapatjja, ukhamarakiw Jehová Diosar yuspärtanjja. Jupanakajj edadanëjjasajj jan walinakanwa uñjasipjje. Ukhamäkchisa, predicañatakejj wal chʼamachasipjje, mayninakar yatichañatakisa chʼamañchtʼañatakis wal chʼamachasipjjaraki. Jupanakajj wali yateqaskayäpjjewa. Jehová Diosatakisa jiwasatakis jupanakajj wali munatäpjjewa (Prov. 16:31). Jichhajja, wayn tawaqonakat amuytʼarakiñäni. Supayampi apnaqata ukhamarak kʼari yatichäwinakampi phoqantat akapachan jilsuñajj jupanakatak chʼamakiwa. Ukhamäkchisa tantachäwinakan arstʼapjjatapasa, predikir sarapjjatapasa, kuntï creyipki uka toqet jan ajjsaras saytʼasipjjatapasa wal chʼamañchtʼistu. Wayn tawaqonaka, jumanakajj congregacionan wali valoranïpjjtawa (Sal. 8:2). w20.08 págs. 21, 22 párrs. 9-11

Predikir mistuñ qalltktan ukhamarak Jehová Diosan Testigopat uñtʼayasktan ukhajja, “jachʼa oladanakar” uñtasitaw jan walinakajj sartaspa; familiaranakasaw jiwas conträjjapjjaspa, amigonakasas jiskʼachapjjestaspawa, jaqenakajj predicatas janiw istʼañ munapkaspati. ¿Kunas jan ajjsarirïñatak yanaptʼätam? Jesusaw predicación alajjpachat pʼeqtʼasinkaki ukwa nayraqat amtañama (Juan 16:33; Apoc. 14:14-16). Ukatjja, Jehová Diosajj cuidaskämawa sasin siskistu ukaruw jukʼamp confiyañamaraki (Mat. 6:32-34). Jehová Diosar jukʼamp confiyäta ukhajja, janiw ajjsarjjätati. ‘Testigonakampiw estudiaskta, tantachäwinakaparus sarjjaraktwa’ sasin amigonakamaru familiaranakamaru yatiykta ukhajj Diosar confiyatam uñachtʼaytajja. Diosan leyinakapar respetañatakis cambionakwa vidaman lurpachätajja, ukhamatwa Diosar confiyatamsa, jan ajjsarirïtamsa uñachtʼaypachätajja. Ukhamajj jan ajjsarirïñatak chʼamachasiskakim, ukham luräta ukhajja, Jehová Diosajj kawkjarutï sarkäta ukan jumampipunïniwa (Jos. 1:7-9). w20.09 pág. 5 párrs. 11, 12

Asá reyejj jiwasatak wali yateqaskayawa, jupajj Jehová Diosar taqe chuymaw confiyäna. Janiw jan wali tiemponak Diosar sirvkänti, suma tiemponsa servirakïnwa. Waynäkäna ukhatpachaw Diosarojj taqe chuyma servïna (1 Rey. 15:14). Judá markan falso diosanakar serviñ chhaqtayasaw uk uñachtʼayäna. “Jupasti yaqha diosanakana altaranakapjja aparpayänwa, ukhamarak idolonakan santuarionakapsa, ajjsarata qalanaksa jiskʼa jiskʼa tʼunjayäna, ukhamarak Asera idolon lantinakapsa tʼunjayarakïnwa” (2 Crón. 14:3, 5). Maacá sat awichaparusa, Judá markankir jaqenakaru mä idolor adorapjjañapatak chʼamañchatapatjja, reinäñatwa apaqarakïna (1 Rey. 15:11-13). Asá reyejj janiw falso diosanakar adorañak chhaqtaykänti. Judá markankir jaqenakarusa Jehová Diosar wasitampi adorjjapjjañapatakiw yanaptʼarakïna. Jehová Diosasti, Asá reyirusa Judá markankir jaqenakarus samarañ tiempo jan ukajj sumankañ tiempwa churäna. Asá reyejj apnaqkäna ukhajja, tunka maranakaw uka markankirinakajj samarañ tiempon jakasipjjäna (2 Crón. 14:1, 4, 6). w20.09 pág. 14 párrs. 2, 3

Kunatï valoranïki ukanakjja, awisajj yaqhanakaruw cuidapjjañapatak jayttʼastanjja. Sañäni, qollqenïktan ukhajja, awisajj jan chhaqayañatakisa jan lunthatsuyasiñatakisa bancoruw jayttʼastanjja. Apóstol Pablojja, kunsa Timoteojj Diosat katoqäna ukwa amtayäna. Diosajj kuna amtampis jaqenakar luräna ukwa jupar yatiyäna. Ukatjja arunakap predicañapatakiw mayirakïna (2 Tim. 4:2, 5). Kunanaktï Diosat katoqkäna ukanak jan apanukuñapatakiw Pablojj Timoteor ewjjtʼäna. Jehová Diosajj ukhamarakiw jiwasarojj kunatï wali valoranïki ukanak churistu. Jehová Diosajj munasiñapatwa Bibliankir cheqa yatichäwinak uñtʼayistu. Uka yatichäwinakaw kunjamatsa Jehová Diosan amigopäsna, kunjamatsa kusisit jakassna ukanak yatichistu, ukatwa uka yatichäwinakajj wali valoranïpjje. Uka yatichäwinak yateqtan, ukarjam sarnaqaraktan ukhajja, janiw kʼari yatichäwinakamp engañjayasjjtanti, ni qʼañu juchanakansa sarnaqjjtanti (1 Cor. 6:9-11). w20.09 pág. 26 párrs. 1-3

Biblian yatichäwinakapatjja taqe chuymaw jan pächasis parlañasa, uksti Bibliat yateqerejj amuyañapawa. Ukham parlañäni ukhajja, taqe chuymaw yateqarakispa. Ukatjja, kunjamsa Biblian yatichäwinakapajj yanaptʼawayistu ukwa cuenttʼaraksna. Ukhamatwa jupajj ‘uka yatichäwinakajj nayar yanaptʼarakitaspawa’ sasin saspa. Yateqerejj jan walinakan uñjaschi ukhajja, uka pachpa jan walinakan uñjasisajj kunsa yaqhep jilat kullakanakajj lurawayapjje ukwa yatichkasajj cuenttʼsna. Jan ukajj mä jan waltʼäwir saykatawayki uka jilatampi jan ukajj uka kullakampiw compañtʼayassna. Biblian yatichäwinakaparjam sarnaqañajj kunjamsa yanaptʼawayistu ukwa yateqerirojj amuytʼayañasa. Yateqeritejj chachanïchi jan ukajj warminïchi, ukampis jupajj Bibliat jan yatjjatkchi ukhajja, jupamppach yatjjatañapatakiw invittʼsna. Ukatjja yateqerirojj kuntï yateqaski uk familiaranakaparu amigonakaparu parltʼañapatakiw chʼamañchtʼaraksna (Juan 1:40-45). w20.10 pág. 16 párrs. 7-9

Joseampi Mariampejja, kuna ewjjtʼanakatï awk taykanakatakejj utjki ukarjamapuniw kuns lurapjjerïna, ukatwa Jesusarojj Jehová Diosamp suma uñjatäñapatak yanaptʼapjjäna (Deut. 6:6, 7). Panipajj Jehová Diosar wal munasipjjäna, wawanakapajj Diosar ukham munasipjjaspa ukwa munapjjarakïna, ukatakiw wal chʼamachasipjjäna. Joseampi Mariampejj Diosaru wawanakapamp chika adorañwa amtapjjäna. Sapa semanaw Nazaretankir sinagogar sarapjjäna. Sapa mararakiw Jerusalenarojj Pascua fiesta amtirejj sarapjjäna (Luc. 2:41; 4:16). Viajkasajja, Jesusarusa mayni wawanakaparusa Diosan markapat yatichapjjerïpachänwa. Ukatakejj inas kawki cheqanakattï Bibliajj parlki uka cheqanakar sarapjjerïchïna. Familiapajj waljäjjäna ukhajja, Joseatakisa Mariatakisa wawanakapamp Diosar adorañajj janiw faciläjjpachänti. Ukampis Diosar adorañataki wal chʼamachasipjjatapajja, Diosar jukʼamp jakʼachasiñatakiw jupanakar yanaptʼäna. w20.10 pág. 28 párrs. 8, 9

Maynitï Bibliat yatichañataki compañtʼañasatak mayistani ukhajja, nayraqatajj kuna yatichäwittï yatjjatapkani ukwa wakichtʼasiñasa. Dorín jilatajj akham siwa: “Compañirijajj suma wakichtʼata sari ukhajj wal kusista. Ukham wakichtʼasisajj sumwa arstʼani” sasa. Cheqas compañtʼañatak sum wakichtʼasiñäni ukhajja, yateqerejj panpachaniru wakichtʼat amuyasajj ukhamarakiw lurañ munani. Ukampis uka yatichäwi sum wakichtʼasiñ jan puedkstan ukhajja, kuna wakiskir puntonakas utji ukaksa jikjjatañasawa. Yatichañatakejja, orasiñajj wali importantewa. Ukhamajja, orañatak invittʼistani ukhajj kunjamsa orañäni uk janïräkipanwa amuykiptʼasiñasa. Ukhamatwa kunatï wakiski uk mayiñäni (Sal. 141:2). Japón markankiri, Hanae sat kullakajja, kunjamsa yatichiripar compañkäna uka kullakajj Diosar mayirïna, uk jichhakamas amtaskakiwa. Jupajj akham siwa: “Uka kullakan Diosamp sum apasitapajj qhana amuykayänwa. Nayajj jupjamäñwa munayäta. Oracionan sutij aytirïna ukhajja, wali munatäkiristsa ukhamaw jikjjatasirïta” sasa. w21.03 págs. 9, 10 párrs. 7, 8

Jesusajja, ‘Roma markar purïtawa’ sasaw apóstol Pablorojj 56 maran säna. Ukampis Jerusalenanjja, mä qhawqha judionakaw Pablorojj akatjamat katuntasin jiwayañ amtapjjäna. Romanonakan ejercitopan Claudio Lisias sat comandantepajja, ukanak istʼasajj jankʼakiw Pablorojj yanaptʼäna, soldadonakampiw Cesarea markar apayäna. Ukanjja, Félix sat gobernadorajj Herodesan palacioparuw llawintayäna. Ukhamatwa Pablor jiwayañ munapkäna uka judionakajj jan kuns kamachjjapjjänti (Hech. 23:12-35). Ukampis Félix gobernador lantejja, Festo sat gobernadoraw apnaqjjäna. Jupajj judionakamp sum uñjayasiñ munasajja, akham sasaw Pablor säna: “¿Janit jumajj Jerusalenar makatañ munkasma, ukhamat taqe ukanakat nayraqatajan juzgatäñataki?” sasa. Jerusalenar saraspäna ukhajj jiwayataw uñjasispäna ukwa Pablojj amuyasïna. Ukatwa akham säna: “¡Cesaran ukaruw nayajj sarañ munta!” sasa. Festo gobernadorajja, akham sasaw Pablor sarakïna: “Niyakejjay jumajj Cesarampi juzgatäñ munstajja, Cesarampi juzgatäyätawa” sasa. Tiempompejja, Pablojj Romankjjänwa, jupar jiwayañ munapkäna uka jaqenakatsa wali jayankjjarakïnwa (Hech. 25:6-12). w20.11 pág. 13 párr. 4; pág. 14 párrs. 8-10

Awisajja, chuymasajj juchañchistaspawa. Sañäni, yaqhepajj janïr Jehová Diosar uñtʼkasajj kuna juchanaktï lurapkäna ukanakatwa llakisipjjaspa. Yaqhepasti, bautisasipki uka qhepatwa pantjasipjje, ukatwa chuymapajj juchañcharakispa (Rom. 3:23). Cheqas taqeniw kunatï walïki uk lurañ muntanjja. Ukampis “walja kuti[w] pantjastanjja” (Sant. 3:2; Rom. 7:21-23). Jucha luratasat llakisiskakiñajj janis gustkchistojja, yanaptʼistaspawa. ¿Kunatsa ukham sistan? Ukham llakisiñajj cambiañataki, jan walinak jan mayamp lurjjañatakiw yanaptʼistaspa (Heb. 12:12, 13). Maysa toqetjja, yaqheparojj sintipuniw chuymapajj juchañchaspa. Mä arunjja, arrepentisjjapjjchisa, Jehová Diosajj perdonatap uñachtʼayjjchi ukhasa, juchanakapat llakisisipkakiwa. Ukham sint llakisiñajj aynachtʼayaspawa (Sal. 31:10; 38:3, 4). Ukampis nayra juchanakasat armasjjañasawa, janiw sint llakisiñasäkiti. ¿Kunatsa? Wal llakisisa Jehová Diosat jitheqtjjsna ukhajja, Supayajj wal kusisispa. Ukampis Jehová Diosajj juchanakas perdonjjestuwa, wal munasirakistu (2 Corintios 2:5-7, 11 uñjjattʼarakïta). w20.11 pág. 27 párrs. 12, 13

Uka Salmo qellqeri levitajj jachʼa jachʼa tukuri jan wali jaqenakatwa envidiasjjäna. Janis jupanakjam jan walinak lurañ munkchïnjja, wali sumsa jakasipkaspa ukham amuyasaw jupanakjam jakañ munarakïna (Sal. 73:2-9, 11-14). Amuyatajja, wali qollqeni, wali kusisita, jan kuna llakini ukhamjamäpjjänwa. ¿Kunas ukham jan amuyjjañatak levitar yanaptʼäna? Kunjamtï Jehová Diosajj uka jaqenakar uñjki ukham uñjañaw yanaptʼäna. Ukaw jan llakitäjjañatakis kusisitäjjañatakis yanaptʼäna. Diosarus akham sarakïnwa: “Jumamp chik utjasajj janiw kuns aka oraqen munkti” sasa (Sal. 73:25). ¿Kunsa yateqsna? Jan wali jaqenakan sarnaqäwipajj sumjamäkchisa janiw envidiasiñasäkiti. Kusisitjamas jakasipkchejja, janiw cheqpacha kusisitäpkiti, kusisiñapas jukʼa tiempotakikiwa (Ecl. 8:12, 13). Jan wali jaqenakat envidiassna ukhajj llakitakëjjsnawa, Diosatsa jitheqtjjaraksnawa. Ukhamajj levita chachjam amuyasiñäni ukhajj kuntï jupajj lurkäna uk lurarakiñäni: Munasir Diosan arunakapar istʼapjjañäni, Diosan servirinakapamp chikachasipjjarakiñäni. Jiwasatï Jehová Diosar taqe kunat sipansa jukʼamp munasiñäni ukhajja, cheqpach kusisitaw jakasiñäni, ‘cheqpach jakañar’ apki uka thakitsa janirakiw saranukkañäniti (1 Tim. 6:19). w20.12 pág. 19 párrs. 14-16

Jehová Diosar llakinakas oracionan yatiykasajja, jan walinakan uñjaskasas kuna sumanakas utjistu ukanakat lupʼisajj yuspärañasawa. Awisajja, kunjamas jikjjatastan uk yatiyañatakejj janiw arunakas utjkaniti. Ukampis ‘mirä amp suma yanaptʼita’ sasakis sañänejja, Jupajj istʼistaniwa (2 Crón. 18:31). Jiwasaruki confiyañat sipansa Jehová Diosaruw confiyañasa. Khä 700 antes de Cristo maranakanjja, Judá markajj asirionakan tʼunjatäña, esclavopäñ wal ajjsarasajja, Egipto markaruw yanaptʼa mayipjjäna (Is. 30:1, 2). Ukham lurasajj jan walinwa uñjasipjjäta sasaw Jehová Diosajj Judá markankirinakar säna (Is. 30:7, 12, 13). Kunjamsa cheqpachapun jarkʼaqasipjjaspa uk Isaías profetap toqew markapar säna. Isaiasajj akham sänwa: ‘Jumanakatejj paciencianïpjjäta, confiyapjjarakïta ukhajja, chʼamanïpjjätawa’ sasa (Is. 30:15b, TNM). w21.01 págs. 3, 4 párrs. 8, 9

Ajllit cristianonakajj Diosar jan jitheqtasa servipjjatapatjja, alajjpachanwa Cristomp chika sacerdotenakjama reyinakjama apnaqapjjani (Apoc. 20:6). 144.000 ajllit cristianonakajj alajjpachankjjapjjani ukhajja, Jehová Diosasa Jesusasa angelanakas wal kusisipjjani. Apóstol Juanajj 144.000 reyinakata sacerdotenakat parlañ tukuyäna ukhajja, Armagedón guerra jakkirpach pasir ‘walja jaqenakwa’ uñjäna. Uka grupojj nayrïr grupot sipan jukʼamp waljanïpjjewa, qhawqhanipunïpjjes ukajj janiw yatiskiti (Apoc. 7:9, 10). ‘Jupanakajj kayukam purir janqʼo isinakampi isthapitäpjjewa’, ukajj Supayan apnaqat ‘aka qʼañu pachatsa jitheqtatäpjjatapa’ Diosarus Cristorus jan jitheqtas servipjjatapwa uñachtʼayi (Sant. 1:27). Jehová Diosasa Jesusas kuntï jiwasanak layku lurawayapki uka kawsaw salvatätanjja sasaw jachʼat arnaqasipjjaraki. Palmera ramanakas aptʼasitäpjjarakiwa. Ukampejja, Diosajj Jesusar Reyit uttʼayatapa, Jesusamp apnaqatäñ munapjjatapwa uñachtʼayapjje (Juan 12:12, 13 uñjjattʼarakïta). w21.01 pág. 16 párrs. 6, 7

Mä chachajj familiapar sum pʼeqtʼañatakejja, kunjamsa Jehová Diosasa Jesusas pʼeqtʼapjje ukatwa yateqasispa. Humilde chuymanïñat amuytʼañäni. Jehová Diosakiw taqe yatiñanejja, ukhamäkchisa kuntï servirinakapajj mayipki uk istʼiwa (Gén. 18:23, 24, 32). Jupajj perfectökchisa, janiw perfectöñas suykiti, antisas pantjasir servirinakaparojj sum lurapjjañapatakiw yanaptʼi (Sal. 113:6, 7). ‘Jehová Diosajj yanapirisawa’ sasaw Bibliajj qhanañcharaki (Sal. 27:9, TNM; Heb. 13:6). David reyejja, Jehová Diosan humilde chuymanïtapata, nayar yanaptʼatapatwa taqe kuns lurawayta sasaw säna. Jichhajj Jesusat yatjjatarakiñäni. Jupajj discipulonakapan ‘Yatichiripa, Tatitupäkchïnsa’ kayunakap jareqänwa. Jesusajj akham sänwa: “Nayajj mä uñachtʼäwi jaytapjjsma, kunjamtï nayajj jumanakar lurapksma uka pachparaki jumanakajj lurapjjam” sasa (Juan 13:12-17). Jesusajj autoridadanïkchïnsa, janiw mayninakamp serviyasiñ suykänti, antisas jupaw mayninakar servïna (Mat. 20:28). w21.02 págs. 3, 4 párrs. 8-10

Waynitunaka, niyakejjay jumanakajj wali chʼamani ukhamäsipkstajja, congregacionan wal yanaptʼapjjasma. Jilat kullakanakar yanaptʼañatakejj waljanakwa lurapjjasma. Jumanakat waljaniw congregacionan yanapiripjam serviñ munapjjpachätajja. Ukampis yaqhep waynitunakajja inas akham amuyapjjchispa: ‘Wakiskiri luräwinak phoqañatakejj janiw experiencianïkiti, waynitüskiwa sasaw nayat amuyapjjaspa’ sasa. ¿Jumajj ukhamarakti amuyasta? Waynitukïskstasa, jichhatpachaw congregacionankir jilat kullakanakamp confiykayäñataki, respetop ganasiñatak chʼamachasisma. Waynitunakajja, waljanakwa lurañ yatipjje, ukampiw congregacionan yanaptʼapjjaspa. Sañäni, edadani jilat kullakanakajja Bibliat sapak yatjjatañatakisa, tantachäwinakatakis janiw tabletapa celularap apnaqañ sum yatipkiti, ukhamajj uka aparatonak apnaqañwa yatichapjjasma. Jupanakajj ukham yanaptʼapjjatamat wal yuspärapjjätam, alajjpachankir Awkimas wal kusisini. w21.03 pág. 2 párrs. 1, 3; pág. 7 párr. 18

Esposajj jachʼa yateqañ utanakar sarasajj esposopat sipansa jukʼamp yatjjatatäspawa, ukhamäkchisa esposow familiaparojj Diosar serviñan yanaptʼañapa. Sañäni, jupaw Bibliat familjam yatjjatkasajj sarayañapa (Efes. 6:4). Maysa toqetjja, esposos Diosar serviñan pʼeqtʼkchejja, esposajj Diosamp sum apasiskakiñatakejj jupa pachpaw chʼamachasiñapa. Ukhamajj Bibliat sapak yatjjatañatakisa, kuntï yatjjatki ukat lupʼiñatakis tiempo apsusiñapawa. Ukaw Jehová Diosar munasiskakiñatakisa, respetaskakiñatakis yanaptʼani. Esposopamp pʼeqtʼatäsajj kusisitarakïniwa. Kawkïr esposanakatï Jehová Diosar munasitap laykojj esposopar istʼapki ukanakajja, jan istʼirinakat sipans kusisitaw jakasipjjani. Jupanakajja, chachanakatakisa tawaq warminakatakis wali yateqaskayäpjjewa. Janiw ukakïkiti, familiapansa congregacionans sumankaña utjañapatakiw yanaptʼapjje (Tito 2:3-5). Jichha tiemponjja, Jehová Diosar jan jitheqtasa servirinakat jilapartejj warminakäpjjewa (Sal. 68:11, TNM). w21.02 pág. 13 párrs. 21-23

Jan ajjsarirïñsa, aguantañsa apóstol Pablotwa yateqassna. Awisajj aynachtʼataw jikjjatasïna, ukampis Jehová Diosaw chʼam churitani sasaw confiyirïna, ukaw aguantañatak yanaptʼäna (2 Cor. 12:8-10; Filip. 4:13). Jiwasatï humilde chuymampi Jehová Diosan yanaptʼap thaqañäni ukhajja, apóstol Pabljamaw chʼamani jikjjatasiñäni, janirakiw ajjsarkañäniti (Sant. 4:10). Yantʼanakajj janiw Jehová Diosan castigopäkiti, ukat janiw pächasktanti. Santiagojj akham sistuwa: “Jan waltʼäwin uñjasisajja, jan khitisa ‘Diosaw nayarojj yantʼitu’ sasajj sispanti. Diosajj janiw jan walinakampejj yantʼatäkaspati, janirakiw jupajj ni khitirus yantʼkiti” sasa (Sant. 1:13). Uka arunakat jan pächaskstan ukhajja, alajjpachankir munasir Awkisarojj jukʼampiw jakʼachasiñäni. Jehová Diosajj janiw “mayjtʼkaspati ni onjjtkaspasa” (Sant. 1:17). Jupajja nayrïr cristianonakarojj jan waltʼäwinak aguantapjjañapatakiw yanaptʼäna, ukhamarakiw jichha tiempon sapa maynir yanaptʼistani. Ukhamajja, Jehová Diosarojj yatiñanïñataki, Jupar jukʼamp confiyañataki, jan ajjsarirïñatak yanaptʼa mayisiskakiñäni. Jupasti oracionanakas istʼistaniwa. w21.02 pág. 31 párrs. 19-21

Bibliat mä yateqeritï tantachäwinakar jutjjchejja, jupamp parltʼañasapuniwa, ukhamatwa chʼamañchtʼañäni (Filip. 2:4). Familiapata, trabajopata, kuntï Bibliat yateqaski ukanakatwa jisktʼsna, ukampis janiw taqe kunat jiskhiñasäkiti. Ukatjja, kuna cambionaktï lurawayki ukanakatwa felicittʼsna. Ukhamatwa amigopar tuksna, nayrar sartañapatakisa, bautisasiñapatakis yanaptʼaraksna. Yateqerin nayrar sartaskipana, cambionak luraskipanjja, congregacionankir jilatasäjjaspasa jan ukajj kullakasäjjaspasa ukham amuyasiñapatakiw yanaptʼañasa. Ukatakejja, utasaruw invittʼsna (Heb. 13:2). Bibliat yateqeritï publicadoräjjchi ukhajja, jiwasamp predicañapatakiw invittʼaraksna. Brasil markankiri Diego jilatajj akham siwa: “Walja jilatanakaw jupamp predicañatak invittʼapjjeritäna. Ukajj jupanakar sum uñtʼañatakiw yanaptʼitäna. Waljanakwa jupanakat yateqta, Jehová Diosarusa Jesusarus jukʼampiw jakʼachasirakiyäta” sasa. w21.03 pág. 12 párrs. 15, 16

Jesusajj enemigonakamar munasipjjañamawa sasaw sistu (Mat. 5:44, 45). Cheqas ukajj chʼamakiwa, ukampis espíritu santon yanaptʼapampejj enemigonakasar munassnawa. Espíritu santon achupat yaqhepajja, munasiña, paciencianïña, khuyapayasirïña, suma chuymanïña, llampʼu chuymanïña, munañasampi jan apnaqayasiña ukanakawa, ukaw uñisipkistu uk aguantañatakejj yanaptʼistu (Gál. 5:22, 23). Diosar serviñ jarkʼirinakat waljanejja, esposapana jan ukajj esposopana, wawapana, vecinopan ukham jaqëtap laykuw cambiawayapjje. Yamas yaqhepanakajj Testigöjjapjjewa. Ukhamajja, Diosar servitasat uñisipkistu ukanakar munasiñajj chʼamächi ukhajja Jehová Diosaruw espíritu santop mayisiñasa (Luc. 11:13). Kuntï Diosajj siski ukar istʼañapuniw taqe kunat sipansa jukʼamp wakiskirejja, uk janipun armapjjañäniti (Prov. 3:5-7). Uñisiñajj chʼamaniwa, ukampis munasiñajj jukʼamp chʼamaniwa. Uñisiñajj maynin chuymap wal usuchjaspa, ukampis munasiñajj qollaspawa, ukhamatwa maynejj jan jiwas conträjjaspati. Mayninakar munasiñamp uñjtan ukhajja, Jehová Diosaruw kusisiytanjja. Ukhamajja, Diosar serviñat jarkʼapkistu ukanakajj uñisiskakchistanisa, kusisitakïsksnawa. w21.03 pág. 23 párr. 13; pág. 24 párrs. 15, 17

Joel chachan profeciaparjamajja, mä ejercitow israelitanakar jan waltʼayañatak sartañapäna (Joel 2:1, 8, 11). Jehová Diosajja, jan kasusir israelitanakar mä ‘ejercitompiw’ mä arunjja babilonio soldadonakampiw castigayäjja sänwa (Joel 2:25). Babilonionakajj norte toqetwa Israel markar jan waltʼayañatak jutapjjañapäna, ukatwa ‘norte toqet jutir’ ejército satäpjje (Joel 2:20). Uka ejercitojj suma organistʼat langostanakamp sasiwa. Joel profetajj uka ejercitot akham sänwa: “Sapa [soldadojj] thakip saraskaraki [...]. Markarus nuwantapjjarakiwa [...], uta patanakaruw mistupjje, lunthatanakjamarakiw ventananakat warkoqtawayapjje” sasa (Joel 2:8, 9). ¿Kunas pasäna uk amuytanti? Taqe cheqanwa soldadonakajj utjäna. Janiw imantasiñatak ni mä lugaras utjkänti. Janirakiw khitis babilonionakan espadapat escapañ puedkänti. Babilonionakajja (mä arun caldeonakajja) langostanakjamaw Jerusalén markarojj 607 (antes de Cristo [a.C.]) maran mantapjjäna. Kuntï ‘caldeonakan reyipajj’ Jerusalenan lurkäna ukat parlkasajja, Bibliajj akham siwa: ‘Janiw khititsa khuyaptʼayaskänti waynanakatsa, tawaqonakatsa, awkinakatsa, cojonakatsa’ sasa (2 Crón. 36:17). w20.04 pág. 5 párrs. 11, 12