Febrero

Jilat kullakanakasarojj sumwa uñtʼañasa. Ukhamajj tantachäwi janïr qalltkipansa, tukuyarusa jupanakamp parltʼapjjapuniñäni, predikiris jupanakamp chika mistuñäni, puedstan ukhajj manqtʼasiñatak invittʼarakiñäni. Ukham lurañajj wal yanaptʼistani. Sañäni, mä kullakajj jan sinttʼasirjamäspawa ukampis ajjsarirïtapwa yatsna. Wali qollqeni mä jilatajj qollqe chuymäkaspas ukhamäspawa ukampis wali wajjtʼasirïtapwa yatsna. Wawanakani mä kullakajj esposopan jarkʼatäsaw tantachäwinakar sapa kuti qheptʼat purinispa, ukwa yatiraksna (Rom. 14:4). Cheqas janiw ‘yaqhanakan luräwinakapar mitisiñasäkiti’ (1 Tim. 5:13). Ukampis jilat kullakanakasar uñtʼañajj wakisiwa, ukhamatwa kunatsa ukham jaqëpjje uk yatiñäni. Coleraykistu uka jilataru jan ukajj kullakaru sum uñtʼasajja, kunatsa ukham jaqejja ukwa yatsna. Cheqas ukham lurañajj chʼamakiwa. Ukampis chuymanakam wali jachʼa jistʼarapjjam sasin Bibliajj siski ukarjam lurañatak chʼamachastan ukhajja, Jehová Diosatwa yateqasisktanjja. Jupajj “taqe kasta jaqenaka[ruw] munasi” (1 Tim. 2:3, 4; 2 Cor. 6:11-13). w20.04 págs. 16, 17 párrs. 10-12

Janïr jiwayatäkäna uka arumajja, Jesusajj maynit maynikam munasipjjañapatakiw discipulonakapar amtayäna. Ukaw mayachtʼatäpjjañapataki, akapachankir jaqenakan uñisitäkasas aguantapjjañapatak yanaptʼañapäna, ukwa Jesusajj yatïna. Tesalonicankir congregacionajj qalltatpachaw arknaqat uñjasipjjäna. Ukampis uka cristianonakajj munasirïpjjatapata, Diosar jan jitheqtas servirïpjjatapat wali yateqaskayäpjjänwa (1 Tes. 1:3, 6, 7). Pablojja, jupanakan ‘munasiñanakapajj jukʼampi utjaskakiñapatakiw’ chʼamañchtʼäna (1 Tes. 4:9, 10). Ukham munasiñaw llakitanakar chuymachtʼañatakisa, jan chʼamaninakar yanaptʼañatakis chʼamañchaspäna (1 Tes. 5:14). Jupanakajj Pablon ewjjtʼaparjamaw lurapjjäna, ukatwa niya mä mara qhepat payïr cartapan jupanakar akham säna: ‘Maynit maynikam munasiñanakamajj jukʼampiw jiljjattaski’ sasa (2 Tes. 1:3-5). Cheqas munasirïpjjatapaw jan waltʼäwinak aguantañatakisa, arknaqat uñjasipkäna uk aguantañatakis yanaptʼäna. w21.03 pág. 22 párr. 11

Cristianonakajj wiñay jakañ katoqañatakejja kawki thaktï tʼijuñasäki uknamaw tʼijuñasa, mä arunjja Cristot yateqasisaw jakañasa (Hech. 20:24; 1 Ped. 2:21). Ukampis Supayampi, jupar arkirinakampejja Diosar serviñat saranukuñaswa munapjje, ukatsti jupanakamp chik sarsna ukwa jaqenakajj munapjjaraki (1 Ped. 4:4). Jupanakajja, cristianjam sarnaqatas uñjasajj larusipjjewa, ukatsti jupanakas jukʼamp sum jakasipkaspa, libres jakasipkaspa ukhamwa amuyasipjje. Ukampis ukajj kʼarikiwa (2 Ped. 2:19). Cheqap thaki ajlliñajj wali wakiskiriwa. Supayajja “jakañar apir” kʼullkʼu thaknam tʼijuñas janiw munkiti, jan ukasti jilaparte jaqenakajj sarapki uka ancho thaknam tʼijuñaswa muni. Uka ancho thak sarañajj facilakiwa, ukampis “jiwañar apir” thakiwa (Mat. 7:13, 14). Jakañar apir thakit jan saranukuñatakejja, Jehová Diosaruw confiyañasa, kuntï siskistu ukarus kasuñasarakiwa. w20.04 pág. 26 párr. 1; pág. 27 párrs. 5, 7

Aka qhepa maranakanjja, Rusia markampi jupar yanapir markanakampejj Suma Oraqeruw mantapjje (Dan. 11:41). ¿Kunjamsa? 2017 maranwa Rusia markajj predicañsa tantachasiñsa Jehová Diosan Testigonakapar jarkʼañ qalltawayi, yaqhep jilat kullakanakarus carcelaruw llawinti. Bibliat apstʼat qellqatanaksa, ukhamarak Machaq Mundon Jakirinakataki (Traducción del Nuevo Mundo) sat Biblia jarkʼawayi. Ukatsti Rusia markankir sucursalsa, Tantachasiñ Utanaksa, Salón de Asambleas sat utanaksa katuntasipjjewa. Ukanak uñjasawa, Oraqpachan Jilïr Irpirinakajj ‘Rusia markampi jupar yanapir markanakampejj norte toqenkir reyïpjjewa’ sasin 2018 maran sapjjäna. Jehová Diosan servirinakapajj janiw gobiernonak contrajj saytʼktanti, janirakiw yaqha gobierno utjañapatakis apoyktanti, ni gobiernojj jan wal luristu ukhas ukham lurktanti. Jan ukasti, Biblian utjki uka ewjjtʼar istʼasaw “reyinakataki, taqe apnaqerinakataki” Diosat mayiraptanjja, yamas uka gobiernonakajj Diosar serviñ jarkʼapjjaniti janicha uk amtañampïsipki ukhajja, jukʼampwa jupanakatak mayiraptanjja. w20.05 pág. 14 párr. 9

Awk taykanaka, wawanakamajj Biblian yatichäwinakapat jan pächasipjjañapatakejja, Jehová Diosan suma amigopäpjjañapawa, kuntï Bibliajj yatichki ukarus taqe chuymaw confiyapjjañapa. Wawanakamar Diosat yatichañ munapjjsta ukhajja, jumanakaw Bibliat suma yatjjatirïpjjañama. Kuntï yateqapkta ukanakat amuytʼañatakejj tiempo apstʼasipjjañama. Ukhamatwa wawanakamarojj uka kikpa lurapjjañapatak yatichapjjäta. Kunjamtï Bibliat yateqerinakar yatichapktajja, ukhamarakiw wawanakamarojj Bibliat yatjjatañataki yanaptʼanakajj utjki ukanakampejj kunjamsa yatjjatapjjaspa uk yatichapjjañama. Ukham lurasaw Diosar munasipjjañapataki, suma phoqeri amuyasir esclavor confiyapjjañapatak yanaptʼapjjäta, jupanakaw qellqatanak manqʼäkaspas ukham churistu (Mat. 24:45-47). Janiw Biblian fácil yatichäwinakapak yatichapjjañamäkiti. Jan ukasti qhawqha maranisa, qhawqsa yateqaspa ukarjamaw “Diosan imantat yatiñapsa” qhanañchapjjañama, ukhamatwa Diosar wal confiyapjjani (1 Cor. 2:10). w20.07 pág. 11 párrs. 10, 12, 13

Jaqenakajj pantjasirïpkchisa, walja millón jaqenakaw jichhürunakan Jehová Diosan amigopäpjje. Jiwasajj Jesusan jiwatapar confiyatasatwa Diosan amigopäsna. Jesusan jiwatapatwa jakäwis Diosar katuyasiñsa bautisasiñsa puediraksna. Ukanak lurtan ukhajja, walja millón cristianonakjamarakiw Taqe Chʼamani Diosan ‘suma amigopätanjja’. Jupanakajja, jakäwip Diosar katuyasis bautisata cristianöpjjewa. ¿Jehová Diosan amigopätasat kunjamsa yuspäratas uñachtʼaysna? Abrahán ukat Job chachanakat yateqasisa. Jupanakajj 100 jila maranakaw jan jitheqtas Diosar servipjjäna. Qhawqha tiemposay Diosar serviskstanjja, jupanakjamarakiw jan jitheqtas aka jan wali pachan Jehová Diosar serviskakiñasa. Ukhamarakiw Daniel chachat yateqasisajj vidasat sipansa Diosan amigopäñar jukʼamp valoranit uñjañasa (Dan. 6:7, 10, 16, 22). Jehová Diosan yanaptʼapampejja, kunayman yantʼanakwa aguantañäni, ukhamatwa Jupan amigopäskakiñäni (Filip. 4:13). w20.05 pág. 27 párrs. 5, 6

Mä kutejja, David sat reyejj Betsabé (Bat-Seba) sat warmir jarisiskirwa uñjäna, jupajj casada warmïnwa. ‘Janiw jaqe masiman warmip munätati’ siskäna uka ley Davidajj sumwa yatïna (Éx. 20:17). Ukampis uka warmir uñchʼukiskakïnwa. Ukatwa chuymapajj pächasjjäna. Mä toqetjja, uka warmimpïñwa munäna, mä toqetsti Diosar istʼañwa munarakïna. Walja maranakas Jehová Diosar munaskchïnjja ajjsararakchïnjja, munañapampiw apayasïna. Ukhamatwa jachʼa juchanakar purtʼasïna, Diosan sutipsa qʼañuchäna, jan juchan jaqenakarusa familiaparus sufriyarakïna (2 Sam. 11:1-5, 14-17; 12:7-12). Jehová Diosajj Davidar cheqañchänwa, ukhamatwa mayampi amigopäjjäna (2 Sam. 12:13; Sal. 51:2-4, 17). Chuymapan pächasitap laykojj kuna jan walinakansa uñjasïna, qhawqsa mayninakar sufriyäna ukanak janiw armaskpachänti. Salmo 86:11 qellqatajj akham sasaw traducisirakispa: “Jan pächasir chuym churita” sasa. ¿Jehová Diosajj Davidan uka mayisitapar istʼpachänti? Jïsa. Qhepatjja, ‘Davidajj phoqat chuymampiw Jehová Diosar sirvjjäna’ sasaw Bibliajj qhanañchi (1 Rey. 11:4; 15:3, TNM). w20.06 pág. 11 párrs. 12, 13

Jehová Diosajj qhawqsa servirinakapar munasi ukajja, mä sogampi sasiwa siw Biblianjja. ¿Ukajj kamsañsa muni? Uk amuytʼañatakejj wali manqha mä pozorus jalantksna ukham sañäni. Wali manqhätap laykojj mistuñajj chʼamäspawa. Ukampis maynejj mä sogampi uka pozot waysustaspa ukhajj wal yuspärsna. Jehová Diosajja jupat jitheqtat israelitanakat parlkasajj kuntï jichhürutak ajllita textojj siski uka arunakwa säna. Jichhürunakan Diosajj ukhamarakiw jupat jitheqtatanakar yanaptʼañ muni, jupanakajj kunayman problemanakampi llakinakampi aynachtʼatäpjjewa. Mä pozo manqhankapkaspas ukhamawa. Qhawqsa jupanakar munasi uk yatipjjañapwa Diosajj muni, ukatsti Jupar kuttʼjjapjjaspa ukwa munaraki. Jehová Diosajj jiwas toqew jupanakar munasitap uñachtʼayaspa. Congregacionat jitheqtatanakarojja, ‘Jehová Diosajj munastamwa, nanakas munasipjjaraksmawa’ sasaw sañasa, uk yatipjjañapajj wali wakiskiriwa. w20.06 pág. 27 párrs. 12, 13

Estebanajj jiwayatäjjäna uka qhepatjja, walja cristianonakaw Jerusalén markat escapjjapjjäna, ‘Judea ukhamarak Samaria uksa toqenakar ananukutaw uñjasipjjäna’. Jupanakat yaqhepajj Chipre, Antioquía markakamaw puripjjäna (Hech. 7:58-8:1; 11:19). Uka discipulonakajj kunayman jan walinakanwa uñjasipjjpachäna. Ukhamäkchïnsa, uka cheqanakan taqe chuymaw predicasipkakïna, ukatsti kawkjakamatï romanonakajj apnaqapkäna ukanakan congregacionanakaw uttʼayasïna (1 Ped. 1:1). Ukampis nayrïr cristianonakan problemanakapajj janiw ukaruk tukuskänti, qalltakïskänwa. Sañäni, khä 50 mara jakʼanakanjja, romankir Claudio emperadorajj Roma markat sarjjapjjañapatakiw judionakar mayïna. Ukatwa cristianöjjapjjäna uka judionakajj utanakap jaytasajj yaqha markanakar jakir sarjjapjjäna (Hech. 18:1-3). Khä 61 maranakanjja, kunjamsa jilat kullakanakajj jiskʼachata, carcelar apata, kunanakapatï utjkäna ukanakas aparata uñjasipjjäna uka toqetwa apóstol Pablojj qellqäna (Heb. 10:32-34). Yaqha jaqenakjamarakiw yaqhep cristianonakajj pobrëpjjäna, usuntapjjarakïna (Rom. 15:26; Filip. 2:25-27). w21.02 págs. 26, 27 párrs. 2-4

Diosar confiyañänejja, janiw Supayasa ni arkirinakapasa Diosat jitheqtaykistaniti (2 Juan 8, 9). Akapachankir jaqenakajj uñisistaniwa, uk sum yattanjja (1 Juan 3:13). Juanajj akham sänwa: “Akapachajj Supayan amparapankiwa” sasa (1 Juan 5:19). Akapachan tukusiñapajj sapürutjamaw jukʼamp jakʼachasisinki, ukatwa Supayajj nayrat sipansa jukʼamp coleratäjje. Supayajj janiw qʼañu juchanakampikisa, ni apostatanakan yatichäwinakapampikisa Diosat apaqañ munkistuti, jan ukasti tʼaqesiyasaw Diosat apaqañ munarakistu. Supayajj jukʼa tiemponikëjjatap laykuw predicación jarkʼañatakisa, Diosar jan confiyjjañasatakisa jukʼamp chʼamachasiski. Ukatwa yaqhep markanakan kunanaktï Jehová Diosan Testigonakapajj lurktan ukanakat mä jukʼakisa, jan ukajj taqpachasa jarkʼat uñjasi. Ukhampachas uka markanakankir jilat kullakanakajj aguantasipkakiwa. Kunsay Supayajj luraskistpan, jan jitheqtas Diosar serviskakiñäniwa. w20.07 pág. 24 párrs. 12, 13

Diosajja wali suma oraqen jaqenakajj wiñayatak jakasipjjaspa ukwa munäna. Ukampis Adanampi Evampejj wali munasiri Awkip contraw saytʼapjjäna, ukatwa wiñay jakañ aptʼasipjjäna, wawanakapamppacharuw jiwañar apjjaruyapjjäna (Rom. 5:12). Uk uñjasajj ¿kunsa Jehová Diosajj luräna? Kunjamsa juchampit jiwañampit jaqenakar kutsuyaspa uk jankʼakiw amtäna (Gén. 3:15). Yoqap sacrificion churañwa amtäna, ukhamat juchampit jiwañampit Adanan wawanakapar kutsuyañataki. Ukatwa Diosar serviñ amtapki ukanakajj wiñay jakañ katoqapjjaspa (Juan 3:16; 1 Cor. 15:21, 22). Jehová Diosajj Jesús taypiw walja millón jiwatanakar jaktayani. Ukampis janiw taqe jiwatanakajj juntok jaktanipkpachäniti. ¿Kunatsa? Taqeni juntok jaktanipjjaspa ukhajja, jankʼakiw aka oraqejj phoqantjjaspa, chʼajjwañakirakiw utj-jjaspa. Ukampis Jehová Diosarojja, janiw ukajj gustkiti. Sumankaña utjañapatakejj taqe kunas suma ordentʼatäñapawa, uk Jupajj sum yati (1 Cor. 14:33). w20.08 pág. 14 párr. 3; pág. 15 párr. 5

Bibliat yateqerejja, Jehová Diosan Testigopäñapataki Bibliat yateqaskatapwa amuyañapa. Ukatwa mä yateqerejj Bibliat taqe chuyma yateqasajj bautisasiñatak akanak luri: nayraqatjja, Jehová Diosar uñtʼasajj wal Jupar munasi, taqe chuymaw confiyaraki (Juan 3:16; 17:3). Ukatsti, Jehová Diosan amigoparu jilat kullakanakan amigoparuw tukjje (Heb. 10:24, 25; Sant. 4:8). Tiempompejja, jan walinakjja jaytjjewa, juchanakapatsa arrepentisjjarakiwa (Hech. 3:19). Diosar confiyatapaw yaqha jaqenakar cheqa yatichäwinak parlañatak chʼamañcharaki (2 Cor. 4:13). Qheparusti, Diosar vidap katuyasisaw bautisasjjaraki (1 Ped. 3:21; 4:2). Uka urojj taqenitak wali kusiskañawa. Ukhamajja, Bibliat yateqerimatï ukanak lurañatak chʼamachasiskchi ukhajja, walik ukham lurasktajja sasaw nayrar sartaskakiñapatak chʼamañchtʼañama. w20.10 pág. 18 párrs. 12, 13

Congregacionan mayninakamp igualayassna ukhajj janis kunatak sirvksna ukhamwa amuyasjjsna. Yaqhepajj wali suma yatichirinakäpjjewa, yaqhepasti sumwa kuns organiztʼapjje, mayninakarus chuymachtʼiri, chʼamañchtʼiri ukhamäpjjewa. Ukatwa ‘janiw nayajj jupanakjamäkti’ sasin amuyjjsna. Ukham amuyatasajj humilde chuymanïtaswa uñachtʼayi (Filip. 2:3). Ukampis ak amtañäni: sapa kuti ukham igualayassna ukhajja, aynachtʼsnawa. Kunjamtï apóstol Pablojj siskänjja, janis congregacionar kunansa yanaptʼksna ukhamwa amuyasjjsna. Nayrïr patak maranakan jakir cristianonakat yaqheparojja, Jehová Diosajj espíritu santop toqew milagronak lurapjjañapatak chʼam churäna, ukampis janiw taqenejj mä pachpa lurañ katoqkänti (1 Cor. 12:4-11). Ukhamäkchïnsa, taqeniw Diosatakejj wali valoranïpjjäna. Cheqas jichhürunakan janiw Jehová Diosajj milagronak lurañatak chʼam churjjestuti. Ukampis yaqh yaqha lurañanakanïkstansa taqeniw Jehová Diosatak valoranïtanjja. w20.08 pág. 23 párrs. 13-15

Jan ajjsarirïñataki Jehová Diosar yanaptʼa mayisïta ukhajja, jupajj oracionanakam istʼaniwa, janirakiw sapaki jaytjkätamti, yanaptʼapunïtamwa (Hech. 4:29, 31). Kunjamsa Jehová Diosajj jan walinakar atipjañatak yanaptʼawaytam, cambionak lurañatakis chʼam churawaytam ukanakatwa lupʼiñama. Niyakejjay Jehová Diosajj Mar Rojo qotnam pasapjjañapatak israelitanakar yanaptʼchïnjja, jumarojj ukhamarakiw Jesusan discipulopäñamatak yanaptʼiristam (Éx. 14:13). Salmistjamarakiw Diosar confiyañama, jupajj kuntï jichhürutak ajllita textojj siski ukwa säna. Jehová Diosaw machaq publicadoranakarojj ‘jan ajjsarirïpjjañapatak’ yanaptʼaspa. Kunjamsa Tomoyo sat kullakar yanaptʼäna uk uñjañäni. Nayrïr kuti predikir mistkäna ukhajja, nayrïr punkun akham sasaw mä warmejj jupar säna: “¡Janiw Testigonakat kuns yatiñ munkti!” sasa. Ukatjja punkumpiw jaqkatäna. Kullakajj janiw sustjaskänti, compañerapar akham sarakïnwa: “¿Uñjtati? Janïraw arskti ukhaw uka warmejj Testigötaj yatjjäna. ¡Ukajj wali kusiskañawa!” sasa. Tomoyo kullakajj precursoratwa jichhajj serviski. w20.09 pág. 6 párrs. 13, 14

Asá reyejja, ‘marka jakʼanakasampi suman sarnaqañjja Diosaw churistu’ sasaw israelitanakar säna (2 Crón. 14:6, 7). Ukampis janiw uka tiemporojj jan kunat llakisiñ tiempökaspas ukham uñjkänti. Jan ukasti markanaka, perqanaka, torrenaka, punkunak lurañwa qalltäna. ‘Markasajj jiwasan munañasankkipana ukanak lurañäni’ sasaw Judá markankirinakarojj säna. ¿“Munañasankkipana” sasajj kamsañsa munäna? Diosajj churkäna uka oraqenjja, jan khitin jarkʼataw jakasipjjäna, ukhamajj enemigonakapan jan ajjsarayataw markanak saytʼayapjjaspäna. Ukatwa markarojj uka samarañ tiempo aprovechañatak chʼamañchäna. Asá reyejj samarañ tiempo utjkäna ukhajj ejercitopwa wakichtʼarakïna (2 Crón. 14:8). ¿Kunatsa ukham luräna, janit Jehová Diosar confiykpachäna? Cheqas confiyänwa, ukampis jupaw reyjamajj markaru wakichañapäna, ukhamatwa jutïrin jan walinakar saykatapjjaspäna. Samarañ tiempojj mä jukʼa tiempokiw utjañapäna uk jupajj yatïnwa. Qhepatjja cheqapuniw uka tiempojj tukusjjäna. w20.09 pág. 15 párrs. 4, 5

Mä jilïr irpirejja, inas congregacionar jarkʼaqañatakejj kunsa jilat kullakanakajj lurapjjañapa, kunsa jan lurapjjañapäkaraki uk sañatakejj derechonïtwa sasin sischispa. Ukampis jilïr irpirinakan pʼeqtʼatapampi familia pʼeqtʼirinakan pʼeqtʼatapampejj janiw igualäkiti. Sañäni, Jehová Diosajja, jilïr irpirinakarojj congregacionan juezäpjjañapataki, juch lurasin jan arrepentisirinakar jaqsupjjañapatakiw autoridad churi (1 Cor. 5:11-13). Maysa toqetjja, kuntï jilïr irpirinakajj jan lurapkaspa uk lurapjjañapatakiw Jehová Diosajj familia pʼeqtʼirinakarojj autoridad churi. Ukanakat mayajja, familiapajj kunsa lurañapa, kunsa jan lurañapäki uk sañatakisa phoqayañatakis derechoniwa (Rom. 7:2). Sañäni, arumanakajj kuna horasas wawanakapajj utar purinipjjañapa uk sañatakisa, jan ukar istʼapjjatapat cheqañchañatakis derechoniwa (Efes. 6:1). Ukampis janïr ukanak amtkasajja, jupatï munasirïchi ukhajj esposapamp ‘mä jañchikïpjjatap’ laykojj jupampiw parltʼani (Mat. 19:6). w21.02 págs. 16-18 párrs. 10-13

Biblian utjki uka yatichäwinakjja, Diosajj humildëpki ‘suma chuymanïpki’ ukanakarukiw qhanañchi, ukatwa uka yatichäwinakajj wali valoranïpjje (Hech. 13:48). Humildenakajja, kuntï suma phoqeri amuyasir esclavojj Bibliat yatichki ukarojj taqe chuymaw istʼapjje (Mat. 11:25; 24:45). Cheqas janiw maynejj uka yatichäwinak jan yanaptʼampejj amuykaspati, ukanak amuyañajj taqe kunat sipansa wali valoraniwa (Prov. 3:13). Jehová Diosajj yaqha privilegio churarakistu. Jupatsa amtanakapatsa kunatï cheqäki ukanak yatiyañaswa mayistu (Mat. 24:14). Uka yatiyäwejj wali valoraniwa, jaqenakarojj Diosan familiapar mantanipjjañapataki, wiñay jakañ katoqapjjañapatakiw yanaptʼi (1 Tim. 4:16). Waljsa jan ukajj jukʼaksa predickstanjja, oraqpachan apaski uka predicacionaruw yanaptʼasktanjja (1 Tim. 2:3, 4). ¡Jehová Diosamp chika ukham trabajiñajj wali kusiskañawa! (1 Cor. 3:9). w20.09 págs. 26, 27 párrs. 4, 5

Apóstol Pablojj Roma markar viajkäna ukhajja, Jehová Diosajj walja kutiw jilat kullakanak toqe yanaptʼäna. Amtañäni: Pablojj Roma markar sarkäna ukhajja, Aristarcompi Lucasampiw jupar compañañ amtapjjäna. Pablomp ukham sarasajj vidapwa aptʼasipjjaspäna, janirakiw Jesusajj ‘Roma markar puriyapjjämawa’ sasajj jupanakar siskänti. Ukhampachas Pablomp chik sarañwa amtapjjäna. Viaj-jjapjjäna ukhakiw ‘janiw jiwapkätati’ sasin jupanakar yatiyasïna. Sidón sat puertor puripjjäna ukhajja, Julio oficialajj “amigonakapan ukar sarañsa janiw [Pablorojj] jarkʼkänti” (Hech. 27:1-3). Puteoli markar puripjjäna ukhasti, Pablompi jupamp chika saririnakampejj uka markankir jilatanakampiw jikisipjjäna. Jupanakajj paqallqo urunak quedasipjjañapatakiw mayipjjäna. Uka jilat kullakanakajja, Pablorusa jupamp chik saririnakarus kunatï wakiskäna ukanakwa churapjjäna. Pablosti chʼamañchkir experiencianakwa jupanakar cuenttʼpachäna, ukajj wal jupanakar kusisiypachäna (Hechos 15:2, 3 uñjjattʼarakïta). w20.11 pág. 16 párrs. 15-17

Awk taykanaka, taqe kunat sipansa, luratanakamampi arsutanakamampiw Jehová Diosar taqe chuyma munasipjjatam uñachtʼayapjjañama. Ukatjja, Jehová Diosar munasiñwa wawanakamar yanaptʼapjjañama, ukajj mä suma regalökaspas ukhamawa. Ukatsti, Bibliat sapa kuti yatjjatañasa, orasiñasa, tantachäwinakar sarañasa, predikir sarañasa kunatsa wali wakiskirejja ukwa yatichapjjañamaraki (1 Tim. 6:6). Maysa toqetjja, kunatï jakañatak wakiski ukanaksa wawanakamar churapjjañamawa (1 Tim. 5:8). Ukampis akwa amtapjjañama: akapachan tukusïwipat machaq mundor jakkiri pasañatakejja, janiw qollqenïñas cosasanakanïñas yanaptʼkaniti, jan ukasti Jehová Diosamp sum apasiñaw yanaptʼani (Ezeq. 7:19). Familiapan sum jakasiñataki suma amtanakar puripki uka awk taykanakar uñjañajj wali kusiskañawa. Ukham familianakan jilsuwayapki uka jilat kullakanakajja, kuntï jiskʼatpach yateqawayapki uka suma costumbrenakjja janiw armasipkiti, ukham suma yatichäwinak katoqasas awk taykaparojj wal yuspärapjje (Prov. 10:22). w20.10 págs. 28, 29 párrs. 10, 11

Kun lurasasa jan ukajj kun arsusasa qhepatakwa apóstol Pedrojj arrepentisïna. Sañäni, Jesusajj apostolonakapar ‘tʼaqesiyapjjetaniwa ukatjja jiwayapjjarakitaniwa’ siskäna ukhajja, jichhürutak ajllita texton siski uka arunakampiw Jesusar toqenoqäna (Mat. 16:21-23). Ukatwa Jesusajj Pedror cheqañchäna. Yaqha horasanjja, walja jaqenaka Jesusar katuntir jutapkäna ukhajja Pedrojj colerampi atipayasisaw jilïr sacerdoten esclavopar jiñchu thoqoqayäna (Juan 18:10, 11). Jesusajj mayampwa Pedror cheqañchäna. Pedrojj jachʼa jachʼa tukusaw mä kutejj akham säna: “[Mayni apostolonakajj] taqenis jumar jaytapkchïtamjja, ¡janipuniw kunäkipansa nayajj jaytjkämati!” sasa (Mat. 26:33). Ukhamsa jupa pachpar confiyaskchïnjja, qhepat jaqer ajjsarañampiw apayasjjäna, Pedrojj kimsa kutiw Yatichiripar jan uñtʼir tuküna. Ukatsti, “anqar mistusaw chuymas kawkstʼat wal jachäna” (Mat. 26:69-75). Ukham luratajat Jesusajj perdonitaniti janicha sasaw jisktʼaspachäna. Ukampis Pedrojj janiw uka llakimpi atipayaskänti. Pantjaskchïnsa, mayni apostolonakamp chikajj Diosar serviskakïnwa (Juan 21:1-3; Hech. 1:15, 16). w20.12 pág. 20 párrs. 17, 18

Familia pʼeqtʼirejja, kunayman toqetwa humilde chuymanïtap uñachtʼayaspa. Sañäni, janiw esposapana wawanakapan perfectöñap suykiti, kuntï familiapajj siski ukajj janis jupar gustkchejja, istʼiwa. Humilde chachajja, utan lurañanakampejj yanaptʼapuniwa, kawkjantï jakaski uka cheqan warminakakiw utan luräwinakap lurapjjañapa sasins amuyaskchejja, humilde chuyman chachajj yanaptʼaskakiwa. Ukham lurañajj chʼamakïspawa ¿kunatsa? Rachel sat mä kullakajj akham sarakiwa: “Kawkjantï jakaskta uka cheqanjja, mä chachatï esposapar plato jariña, uta qʼomachaña yanaptʼani ukhajja, ‘janiw chachäkiti, warmimp apnaqatawa’ sasaw vecinonakapas familiaranakapas amuyapjjani” sasa. Jakaskta uka cheqantï jaqenakajj ukham amuyapjjchi ukhajja, ak amtam: kayu jareqañajj esclavonakan trabajopäkchïnsa, Jesusajj discipulonakapan kayunakap jareqänwa. Familiap sum pʼeqtʼir chachajja, janiw wali importantet uñjayasiñ munkiti, jan ukasti esposapasa wawanakapas kusisitäpjjaspa ukwa muni. w21.02 pág. 2 párr. 3; pág. 4 párr. 11

Kuna sumanakatï paskistu ukanak amtañajj Jehová Diosan regalopawa; ukampis wali sumsa nayra maranakan jakasiwaykstanjja, Paraison jukʼamp sumaw jakasiñäni. Mayninakajj chuym ustʼayapjjestaspawa, ukampis perdonjjañäni ukhajja, Jehová Diosar kusisit serviskakiñäniwa. Nayra juchanakasat añch llakisisajj janiw Diosar kusisit sirvjjsnati. Ukatwa apóstol Pablot yateqasisajja, ‘Jehová Diosajj juchanakaj perdonjjetuwa’ sasin sañasa (1 Tim. 1:12-15). Jiwasajj wiñay jakañwa suyasktanjja. Machaq mundonjja, janiw kunatï llakisiykistu ukanak amtjjañäniti. Bibliajj akham siwa: “Kunatejj utjkän ukajj armatäjjaniwa, janirakiw khitis mayampsa [ukanakat] amtaskjjaniti” sasa (Is. 65:17). Inas wawatpacha Diosar serviwaystan, jichhajj edadanëjjarakstan, ukampis Paraison mayampiw wayn tawaqöjjañäni uk jan armañäniti (Job 33:25). Ukhamajj nayraqatarupuni uñtapjjañäni, Paraison jakasiñataki chʼamachasipjjañäni. w20.11 pág. 24 párr. 4; pág. 29 párrs. 18, 19

¿Kunas jutïrin pasani? Jachʼa tʼaqesïwinjja, Jehová Diosaw markapar jarkʼaqani. Maya, ‘oraqenkir reyinakajj’ Jachʼa Babiloniar tʼunjkani, mä arunjja taqe falso religionanakar tʼunjkani ukhaw Jupat jan jitheqtir servirinakaparojj jarkʼaqani (Apoc. 17:16-18; 18:2, 4). Paya, Supayan apnaqat akapachankirinakat jiltʼkani ukanakar Armagedonan tʼunjkani ukhaw markaparojj jarkʼaqarakini (Apoc. 16:14, 16). Jehová Diosat jan jitheqtkañäni ukhajja, Supayajj janiw kunäkipansa wiñayatak jan waltʼaykistaniti. Antisas jupaw wiñayatak tukjatäni (Rom. 16:20). Ukhamajja, Diosajj churkistu uka taqpach armadurampi uchantasiñäni, janipun kunäkipansa apsusipjjañäniti. Janipun sapaki nuwasipjjañäniti, antisas jilat kullakanakasar yanaptʼapjjañäni, Jehová Diosan ewjjtʼanakaparus istʼapjjarakiñäni. Ukhamtï lurañänejja, wali munasir Awkisaw chʼamañchistani, jarkʼaqarakistani (Is. 41:10). w21.03 pág. 30 párrs. 16, 17

¿Kunjamsa Jehová Diosar confiyatas uñachtʼaysna? Ewjjtʼanakapar istʼasaw uñachtʼaysna. Biblianjja, jan ajjsarayasiñasa Jehová Diosar confiyañas qhawqha wakiskirisa uka toqet walja yateqaskay ejemplonakaw utji, jan suma ejemplonakas utjarakiwa. Suma ejemplonakat yatjjatkasajja, Diosar serviñan jarkʼata uñjaskasajj kunas jan ajjsarapjjañapatak jupanakar yanaptʼäna, ukwa amuytʼañasa. Sañäni, judionakan jilïr autoridadanakapajj apostolonakar jan predicapjjañapatak jarkʼapjjäna ukhajja, jupanakajj jan ajjsartʼasaw akham sapjjäna: “Jaqenakar istʼañat sipansa Diosar istʼapjjañajawa” sasa (Hech. 5:29). Jawqʼjata uñjasipkäna uka qhepatsa, janiw ajjsarayasipkänti. ¿Kunatsa? Jehová Diosajj jupanakampïskatapa, jupanakar wal munasitapwa yatipjjäna, ukatwa Diosan arunakap yatiyasipkakïna (Hech. 5:40-42). Estebanar jiwayañataki katuntapkäna ukhajja, jupajj ukhamarakiw jan ajjsarayaskänti, ‘ajanupajj mä angelan ajanupäkaspas ukhamaw uñjasirakïna’ (Hech. 6:12-15). ¿Kunatsa? Jehová Diosajj jupar munasitapwa yatïna, ukatwa jan ajjsarayaskänti. w21.01 pág. 4 párrs. 10, 11

Ukajja, qʼoma conciencianïpjjatapa, Diosamp sumat uñjatäpjjatapwa uñachtʼayi (Is. 1:18). Jupanakajj Diosar jakäwip katuyasisaw bautisasipjje, Jesusan jiwataparus taqe chuymaw confiyapjje, Diosan amigopäpjjarakiwa (Juan 3:36; 1 Ped. 3:21). Ukatwa Diosan tronop nayraqatan ‘uruy aruma’ Jupar servipjje, mä arunjja aka oraqenwa servipjje (Apoc. 7:15). Jupanakatakejj Reinow nayranki ukatwa predicapjje Jesusan discipulopar tukuñapatakis jaqenakar yanaptʼapjje (Mat. 6:33; 24:14; 28:19, 20). Walja jaqenaka sasin uñtʼatäpki ukanakajja, wali tʼaqesiñ tiempo pasatatsa Diosajj cuidaskakistaniwa sasaw confiyapjje. ¿Kunatsa? “Tronon qontʼatäki uka Diosajja jupanakar jarkʼaqañatakiw mä carpa wakichani” siw Bibliajja. Ukatjja yaqha ovejanakajj aka promesa phoqasirwa uñjapjjarakini: “Diosajj taqe jachanakapwa nayranakapat picharani”. Ukjja, walja tiempow suyapjjäna (Apoc. 21:3, 4). w21.01 pág. 16 párrs. 9, 10

¿Diosan markapankañajj wali kusiskañajjaya? Taqeniw Jehová Diosajj pʼeqtʼirinakar uttʼayki ukar respetañatak chʼamachastanjja. Jehová Diosajj chachanakarusa warminakarus pachpa valoranitwa uñji sasaw Bibliajj qhanañchi. Amuytʼañataki, apostolonakajj jakkäna uka tiemponjja, Jehová Diosajj chachanakarusa warminakarus milagronak lurapjjañapataki, kunayman aru parlapjjañapatakiw espíritu santop churäna (Hech. 2:1-4, 15-18). Jesusamp chika apnaqanipjjañapatakis chachanakaru warminakaruw ajlliwayaraki (Gál. 3:26-29). Ukhamarakiw Jehová Diosajj chachanakarusa warminakarus wiñay jakañ aka oraqen churani (Apoc. 7:9, 10, 13-15). Jesusajja, chachanakaru warminakaruw predicapjjañapataki, suma yatiyäwinak yatichapjjañapatak mayïna (Mat. 28:19, 20). Sañäni, Hechos libronjja Priscila sat kullakatwa parli. Jupampi Áquila sat esposopampejja, Qellqatanak wali sum uñtʼiri Apolos chacharuw Diosan arunakap “cheqaparjam wali sum qhanañchapjjäna” (Hech. 18:24-26). w21.02 pág. 14 párr. 1; pág. 15 párr. 4

Jilïr irpirinaka, jumanakaw jilat kullakanakarojj sum predicapjjañapatakisa, suma yatichirïpjjañapatakis yanaptʼapjjañama. Maynitï jumanak jakʼan yatichañ ajjsarayaschi ukhajja, jumanakaw yatichapjjasma. Jilïr irpirinakajja, yatichirinakan jan aynachtʼapjjañapatakisa nayrar sartasipkakiñapatakis wal yanaptʼapjjaspa (1 Tes. 5:11). Inas jiwasajj Bibliat jan maynir yatichkstanti, ukampis Diosar serviñan jiltañapatakejj taqeniw yateqerinakar yanaptʼsna. Ukatakejja, yatichirir compañktan ukhajj janiw jiwasak parlañasäkiti, antisas sum wakichtʼasisajj jukʼa arunakampikiw sum arstʼañasa, ukhamatwa yatichirir yanaptʼañäni. Yateqerinakajj tantachäwir jutapkani ukhajja, amigopäñatakiw chʼamachasiñasa, yateqaskayäñasarakiwa. Jilïr irpirinakajja, yateqerinakamp parltʼañatak tiempo apstʼasisaw jupanakar chʼamañchtʼapjjaspa. Yatichirinakarusti, Bibliat sum yatichapjjañapatak yanaptʼasa, felicittʼasaw chʼamañchtʼapjjarakispa. Mayniru Jehová Diosar munasiñapataki, serviñapataki mä jukʼaks yanaptʼstan ukhajja, wal kusistanjja. w21.03 pág. 13 párrs. 18, 19

Davidajj lurañanakap sum phoqerïnwa, confiykayarakïnwa. Sañäni, waynitüskäna ukhajja, awkipajj ovejanak cuidañapatakiw jupar encargäna, uk lurañajj chʼamäkchïnsa sum cuidañatakiw chʼamachasïna. Mä qhawqha tiempotjja, Davidajj akham sasaw Saúl reyir säna: “Kunapachatejj aka juman servirimajja, ovejanakap awatiskäna ukapachajja, mä leonasa jan ukajj mä ososa jutirïnjja, ukat mä oveja tamat apasjjerïna ukapachajj, nayajj qhepat arktirïyäta, ukat uka oveja aparirïtjja” sasa (1 Sam. 17:34, 35). Davidajj ovejanak cuidañatak encargatätap yatïnwa. Waynitunakajja, Davidjamarakiw kuna luräwtï katoqapki uk sum phoqañatak chʼamachasipjjañapa. Davidajja, waynitüskäna ukhatpachaw Jehová Diosampejj wali sum apasïna. Jupatakejj ukaw arpa tocañ sum yatiñat sipansa, jan ajjsarirïñat sipans wali importantëna. Davidatakejja, Jehová Diosajj janiw Diosapakïkänti, jan ukasti suma amigopänwa. Waynitunaka, jumanakatakejj Diosampi jukʼamp sum apasiñaw wali importantëñaparaki. w21.03 pág. 3 párrs. 4, 5