Marzo

Janiw jaqen uñisitäñ thaqktanti ni Diosar servitas layku tʼaqesiyatäñsa munktanti. Ukhamajj ¿kunatsa uñisitäkasas kusisitakïsksna? Maya, aguantktan ukhajja, Diosamp sumat uñjatätanwa (1 Ped. 4:13, 14). Paya, Diosar jukʼampiw confiytanjja (1 Ped. 1:7). Kimsa, wiñay jakañwa katoqañäni, ukajj wali valoraniwa (Rom. 2:6, 7). Jesusajj jaktanjjäna uka qhepatjja, kuna kusisiñattï parlkäna, uka kusisiñwa apostolonakapajj jikjjatapjjäna. Jupanakar jawqʼjapkchïnsa, Jesusan sutipjjar janiw parlapjjätati sapkchïnsa, kusisitakïsipkänwa. ¿Kunatsa? “Jesusan sutip layku phenqʼachat uñjasipjjatapatjja Diosajj wali sum jupanakar uñjäna” (Hech. 5:40-42). Jesusar jukʼamp munasipjjatap laykojj janiw enemigonakapan uñisitäñ ajjsarapkänti. Ukatwa suma yatiyäwinak ‘sapüru’ yatiyasipkakïna. Jichhürun ukhamarakiw jilat kullakanakajj jan walinakan uñjaskasas Diosar jan jitheqtas servisipkaki. Jehová Diosajj janiw luratanakapatsa ni sutipar munasipjjatapatsa armaskaniti, ukwa jupanakajj yatipjje. w21.03 pág. 25 párrs. 18, 19

Ajllit cristianonakajj janiw alajjpachar sarañataki suytʼäwini nasipkiti, jan ukasti Diosaw uka suytʼäwi chuymanakapar uchi. Jupanakajj alajjpachar sarañataki suytʼäwipatwa wal lupʼipjje, orasipjjaraki. Uka premio katoqañsa wal suyasipkaraki. Espíritu cuerpopajj kunjamänisa uk janis yatipkchejja, alajjpachan Diosan Reinopan apnaqañwa suyasipki (Filip. 3:20, 21; 1 Juan 3:2). Yaqha ovejanakan suytʼäwipajj aka oraqen wiñay jakasiñawa, ukajj chuymapatwa mistu. Jupanakajj aka oraqejj mä suma paraisor tukuyaskani ukan yanaptʼañwa wal suyasipki, ukanjja jupanak pachpaw utapsa, huertopsa yaqha ukhamanaksa lurasipjjani, jan usuntasaw familianakapampi jakasipjjarakini (Is. 65:21-23). Aka oraqpachan kunayman lugaranakar viajiñwa munapjje, ukhamat Jehová Diosan musparkañ luratanakap sum uñtʼañataki, sañäni, qollunaka, jachʼa lamar qotanaka ukat yaqha ukhamanak uñtʼañataki. Ukampis sapürutjamaw Jehová Diosampejj jukʼamp sum apasipjjani, ukaw jupanakar jukʼamp kusisiyi. w21.01 págs. 18, 19 párrs. 17, 18

Babilonionakajj Jerusalén marka tukjapkäna uka qhepatjja, uka cheq pasir jaqenakajj akham sapjjänwa: ‘Aka markajj wasararuw tuku jan jaqeni, jan animalanakani, caldeonakan amparanakapar katuyatarakiwa’ sasa (Jer. 32:43). Joel profetajj Jerusalenat mä profecía arskäna ukhat 200 maranak pasatatjja, Jehová Diosajj Jeremías profetaruw pachpa profeciat jukʼamp arsuyäna. Uka profeciarjamajja, babilonio ejercitojj jan walinak lurir israelitanakarojj taqe cheqan thaqsusaw katurapjjañapäna. Diosajj akham sänwa: “Walja katurinakwa nayajj khitanï, israelitanakaru katurapjjañapataki. Walja jiwarayirinakwa khitanirakï israelitanakaru katurapjjañapataki, taqe qollunak toqetsa, ukhamaraki qarqa pʼiyanakatsa wayuraniñapataki taqe israelitanakaru. [...] Mä ukkhampi jupanakarojj pagayarakï ñanqhanaka, ukhamaraki juchanaka luratapatsa” sasa (Jer. 16:16, 18). Jan arrepentisir israelitanakarojj janiw jachʼa qotanakasa ni bosquenakasa babilonionakat imantkaspänti. w20.04 pág. 5 párrs. 12, 13

Escapañapäkäna ukhajja, Lot chachajj janiw Jehová Diosar jankʼak istʼkänti. Ukham luratapat inas jiwasajj akham amuysna: ‘Kuntï Jehová Diosajj siskäna ukajj janiw jupar importkänti, jan istʼasiri jaqënwa’ sasa. Ukampis Jehová Diosajj jupar yanaptʼänwa, ‘jupat khuyaptʼayasirakïnwa’. Ukatwa angelanakajj Lot chachampir familiapampir amparat waythapisa uka markat irpsupjjäna (Gén. 19:15, 16). Jehová Diosajj walja razonanakatwa Lot chachar khuyaptʼaypachäna. Inas Lot chachajj Sodoma marka jakʼan jakapkäna uka jaqenakar ajjsarchïna. Janiw ukakïkänti. Inas uka marka jakʼankir mä vallen pä reyinakajj alquitrán jan ukajj brea pozonakar jalantapkäna uk yatchïna (Gén. 14:8-12). Inas esposapatsa phuchanakapatsa llakisirakchïna. Niyakejjay walja utjirinïchïnjja, mä suma utanirakïpachänwa (Gén. 13:5, 6). Ukhamäkchïnsa taqe uka razonanakat janiw ni mayas Jehová Diosar jan jankʼak istʼañapatakejj walïkänti. Ukampis Diosajj janiw jan istʼasitapak uñjkänti, jan ukasti ‘cheqapar sarnaqer jaqetwa’ Lot chachar uñjäna (2 Ped. 2:7, 8). w20.04 pág. 18 párrs. 13, 14

Wayna jilata, wawäskayäta ukhatpach uñtʼapktam ukanakajja, inas wawarjamak uñjasipkchïtam, jupanakajj tiempompiw waynäjjatam amuyasipkani. Ukampis Jehová Diosajj janiw ukham uñjktamti. Jupajj sumwa jumar uñtʼtamjja, kunsa lurasma uksa yatirakiwa (1 Sam. 16:7). Diosamp jukʼamp sum apasiñatak chʼamachasim. Davidajja, Jehová Diosan luratanakap uñjasa, ukanakajj kunsa Jupat yatichäna ukanakat lupʼisaw Diosamp jukʼamp sum apasïna (Sal. 8:3, 4; 139:14; Rom. 1:20). Jehová Diosaruw chʼama mayisiñama. Sañäni, yateqer masinakamatï Testigötamat larusipjjätam ukhajja, Diosaruw ukanak aguantañatakejj yanaptʼa mayisiñama. Kuntï Bibliasa Bibliat apstʼat qellqatanakasa ukat videonakas siski uka ewjjtʼanakarjam lurañatakiw chʼamachasiñamaraki. Kunjamsa Jehová Diosajj jan waltʼäwinak atipjañatakejj yanaptʼtam uk uñjasajja, jukʼampiw Jupar confiyäta. Mayninakasti Diosar confiyatam uñjasajj jukʼampiw jumar confiyapjjarakïtam. w21.03 pág. 4 párr. 7

Sum apasir amigonakajja kunanaksa piensasipki kunjamäsipkisa taqe ukanakatwa parltʼasipjje. Jehová Diosan amigopäñampejj ukhamarakiwa. Jupajj Biblia taypiw jiwasar parlistu, ukanwa kunsa piensi, kunjamas jikjjatasi ukanak yatiyistu. Jiwasanakajj oración taypiw Jupamp parlaraktanjja. Oraskasajja, kunsa piensasktan, kunjamäsktansa ukanakwa yatiysna. Jehová Dios amigosajj wal munasistu, ukatwa oracionanakas istʼasajj jaysistu. Awisajj janiw jankʼak jayskistuti. Awisasti mayisiskakiñasaw wakisi. Ukampisa Jupajj jaysapunistaniwa, janiw ukat pächasiñasäkiti, horasaparu ukhamarak wakisitarjamaw jaysistani. Awisajja janiw kunjamtï munkayätan ukhampun jayskistaspati. Sañäni, kuna jan walintï uñjasktan uk janiw chhaqtaykaspati, ukampisa uka jan wali aguantañatakejj yatiña ukhamarak chʼamwa churistaspa (1 Cor. 10:13). Niyakejjay oracionajj Diosan regalopächejja, ¿kunjamsa yuspärsna? Bibliajj siski ukarjamaw lurañasa, ukan akham siwa: “Oracionsa lurapjjapunim” sasa (1 Tes. 5:17). w20.05 págs. 27, 28 párrs. 7, 8

Tʼijurinakajja jan lanktʼasiñatakejj nayrar uñtasapuniw tʼijupjje. Ukampis tinkupki ukhajja, jankʼakiw sarthapisajj tʼijusipkaki. Janiw kunas tinkuyäna uk thaqapkiti, jan ukasti tukuykam tʼijuñataki, ukhamarak premio katoqañatakiw chʼamachasipjje. Cristianjam tʼijuñanjja, walja kutiw lanktʼassna. Sañäni, arsutasana, jan ukajj luratasanwa pantjassna, mayni jilatasana jan ukajj kullakasan pantjasitapaw chuym ustʼayarakistaspa. Ukhaman uñjasisajj janiw aynachtʼañasäkiti, kunattejj taqeniw pantjasirïtanjja, taqenirakiw wiñay jakañar apki uka kʼullkʼu thakin tʼijusktanjja. Ukhamasti, mayni jilat kullakanakampi chuym ustʼayasiñasa quejasiñas awisajj utjakipuniwa (Col. 3:13). Ukampis kunas lanktʼasiyistu uk thaqañat sipansa, kuna premiotï suykistu uk katoqañatakiw chʼamachasiñasa, ukatjja tʼijuskakiñasawa. Janiw quejasisa chuyma ustʼata pachpar qheparañasäkiti, tinkusajj jan sartksna ukhajja, janiw tukuykam tʼij-jjsnati, janirakiw premio katoqksnati. Janiw ukakïkiti, wiñay jakañar apki uka kʼullkʼu thakin tʼijusipki ukanakarus lanktʼasiyaraksnawa. w20.04 pág. 26 párr. 1; pág. 28 párrs. 8, 9

Daniel profetajj kunayman metalanakat lurata mä estatua jaqetwa parli. Uka estatuan sapa partepajja, Jehová Diosan markapar jan waltʼayiri mä gobiernompi sasiwa. Hierrompita ñeqʼempita lurata kayunakapajja, qhepïr gobiernompi sasiwa, uka gobiernojj Gran Bretaña ukhamarak Estados Unidos markanakawa. Profeciarjamajja, Jehová Diosan Reinopajj aka oraqenkir taqe gobiernonakar chhaqtaykani ukhakamajja, uka wali chʼamani markanakajj utjaskakiniwa. Apóstol Juanajja, Diosan markapar jan waltʼayapkäna uka wali chʼamani gobiernonakatwa parlaraki. Profeciarjamajja, uka gobiernonakajj paqallqo pʼeqeni mä salvaje animalampi sasiwa. Paqallqöri pʼeqepajj Gran Bretaña ukhamarak Estados Unidos markanakawa. Uk yatiñajj wali wakiskiriwa, kunattejj janiw yaqha pʼeqempejj utj-jjeti. Cristompi alajjpachankir ejercitonakapampejj salvaje animalampiru paqallqöri pʼeqepampiru tukjapkani ukhakamajja, uka paqallqöri pʼeqejj gobernaskakiniwa (Apoc. 13:1, 2; 17:13, 14). w20.05 pág. 14 párrs. 11, 12

Uka jukʼa arunakajj akwa amuytʼayistu: Jehová Diosaw jakañ vida churirejja, Juparakiw munasiñsa utjayaraki. Jehová Diosajj wal munasistu, uka munasiñapaw jan ajjsarayasiñataki, kusisitäñatak yanaptʼistu. Cristianonakajj munasirïpjjaniti janicha uk janiw ajllipkaspati, jupanakajj munasirïpjjañapawa, ukajj mä mandatowa (Mat. 22:37-40). Jehová Diosar jukʼamp uñtʼtan ukhajja, nayrïr mandamientor istʼañajj facilakiwa. ¿Kunatsa? Jehová Diosajj perfecto Diosawa, munasiñampipuniw uñjistu, jiwasat llakisitapsa uñachtʼayarakistuwa. Ukampis payïr mandamientor istʼañajj chʼamakïspawa. ¿Kunatsa? Jilat kullakanakajj jiwasjam pantjasirïpjjarakiwa, awisajj arsutapampi luratapampiw chuym ustʼayapjjestaspa. Ukatwa Diosajj Biblia qellqerinakat yaqheparojj kunatsa ukat kunjamsa maynit maynikam munasiñ uñachtʼayasipjjaspa uk qellqayäna. Jupanakat maynejj apóstol Juanänwa (1 Juan 3:11, 12). w21.01 pág. 8 párrs. 1, 2

Qhawqha tiempsay Jehová Diosar serviskstanjja, akhamwa jisktʼasiñasa: “¿Supayajj pächasiyañ munkitu ukar atipañatak chʼamachasiskti?” sasa. Televisionansa, Internetansa qʼañu juchanak lurañar chʼamañchir videonaka jan ukajj fotonaka uñstki ukhajja, ¿kunsa lurtanjja? Janiw pornografiäkiti sasaw amuysna. Ukampis ¿Supayajj janit ukanakamp chuymas pächasiyañ munkistu? Kuntï uñjktan ukajja, kunjamtï mä jaqejj hachampi mä jachʼa tronco jaljki ukamp sasispawa. Nayraqatajj hachan afiltʼat lakapakwa troncor chhaqtayi, ukatsti jukʼat jukʼatwa hachajj troncor chhaqantjje, ukhamatwa troncojj jaljti. Videonakan qʼañu jucha lurañanakajj uñstki ukanakajj ¿janit hachan filo lakapjamäkaspa? Qalltanjja janis kunäkaspa, janis mayjtʼaykistaspa ukhamwa amuysna. Ukampis tiempompejj Dios contra juchachasiñaruw apistaspa. Ukatwa jan walinak chuymasar janipun mantayañasäkiti. Antisas chuymasajj Jehová Diosatak phoqatäñapataki, sutip ajjsarañapatakiw chʼamachasiñasa. w20.06 págs. 11, 12 párrs. 14, 15

Diosat jitheqtatanakajj kuttʼanjjapjje ukhajja, yanaptʼaskakiñasawa ukhamarak chʼamañchtʼaskakiñasawa. Jupanakajja Jesusajj mä uñachtʼäwin herencia tukuntir waynat parlkäna uka waynjamaw chuym wal usuyasisipkaspa (Luc. 15:17-24). Niyakejjay Supayan apnaqata akapachat kuttʼanipjjchejja, janïraw nayrjam Diosan amigopäpkiti. Ukatwa Jehová Diosar mayamp confiyapjjañapatak yanaptʼañasa. Jesusajj chhaqat ovejat parlkäna uka uñachtʼäwinjja, awatirejj kallachipar qʼepjjarusaw ovejap tamar apjjäna. Katjañatakejj wal chʼamachasïna, tiempo apsusirakïna. Ovejapajj janiw tamar sapak kuttʼañatakejj chʼamanïkänti, ukatwa awatirejj tamar apjjäna (Luc. 15:4, 5). Congregacionat jitheqtatanakajj Diosar mayampi confiyapjjañapatakejja, tiemposampi chʼamasampi yanaptʼañaw wakisispa. Ukatakisti espíritu santompi Bibliampi qellqatanakampiw yanaptʼistani. Ukhamasti jilïr irpirinakajj maynir yanaptʼañasatak mayipjjestani ukhajja, taqe chuymaw yanaptʼañasa. w20.06 pág. 28 párrs. 14, 15

Taqeniruw munasiñampi uñjañasa, ukhamatwa cheqpach cristianötas uñachtʼayañäni. Ukatjja, ‘Diosan munañap sum uñtʼaña, sum amuytʼañaw’ wakisiraki (Filip. 1:9). Ukanak jan lurksna ukhajja, ‘jaqenakan kʼari yatichäwinakapampi, jan wali amtanakapampiw engañjayassna’, jupanakat yaqhepajj apostatanakawa (Efes. 4:14). Nayrïr patak maranakan discipulonakapat waljanejj Jesusar jaytanukupkäna ukhajja, apóstol Pedrojj jan pächasisaw Jesusar akham säna: “Jumaw wiñay jakañar apiri arunakanïtajja” sasa (Juan 6:67, 68). Pedrojj janis uka horasajj Jesusan arunakap sum amuykchïnjja, Cristot kunatï cheqäkäna taqe ukanakwa amuyäna, ukatwa jan jaytanukkänti. ‘Kuntï Bibliajj yatichki ukajj cheqäskapuniwa’ sasin taqe chuym confiyañäni ukhajja, jan walinakan uñjaskasas Jehová Diosar confiyaskakiñäniwa, yaqhanakarus ukham confiyapjjañapatakiw yanaptʼarakiñäni (2 Juan 1, 2). w20.07 pág. 8 párr. 2; pág. 13 párr. 18

Jilat kullakanakasat sinttʼasisaw cheqa yatichäwit jan saranukupjjañapatak yanaptʼsna (1 Juan 3:10, 11, 16, 17). Walinsa jan walinsa maynit maynikamaw munasiñampi uñjasiñasa. Sañäni, ¿mä jilatasa jan ukajj mä kullakasa, familiapat maynin jiwatapatti chuymachtʼatäñ muni, jan ukajj kunan yanaptʼatäñcha muni? ¿Mä terremoto pasatapatti jilat kullakanakajj Tantachasiñ Uta jan ukajj utanakapa mayampi lurañatak yanaptʼa munapjje? Jilat kullakanakasar wal munasitasjja, janiw arunakampik uñachtʼayktanti, jan ukasti luratanakasampiw uñachtʼaytanjja. Maynit maynikam munasiñampi uñjasktan ukhajja, alajjpachankir Awkisatwa yateqasisktanjja (1 Juan 4:7, 8). Mayninakan pantjasitanakap perdonasaw munasirïtas uñachtʼayaraktanjja. Uk amuytʼañäni, maynejj chuym ustʼaykistu ukhajja, munasiñaw perdonañatakisa, pantjasitap armjjañatakisa yanaptʼistu (Col. 3:13). w20.07 pág. 24 párrs. 14, 15

¿Taqe jaktanirinakarojj juntokit Bibliat yatichpachañäni, jan ukajj sapa mayniruch kunjamtï jichhürunakan lurktan ukham yatichpachañäni? ¿Jaktanirinakajj congregacionanakar asignatäpjjpachäniti, jupanakat qhep jaktanirinakar yatichapjjañapatakejj jupanakar wakichaspachäniti? Janiw yatktanti, yatiñatakejj suytʼañaw wakisi. Ukampis Jesusajj waranqa mara apnaqañ niy tukuyjjani ukhajja, Jehová Diosan yatiñapajj taqe aka oraqpachan phoqtʼatäniwa (Is. 11:9). Uka waranqa maranjja, kunayman lurañanakan yanaptʼañatakejj waljaw utjani. Waranqa maranakanjja, Diosampi sumat uñjatäñatakejj taqeniw chʼamachasiskakiñäni. Ukatwa jaktanipkani ukanakarojj jan wali amuyunakap apanukupjjañapataki, Jehová Diosatakjam sarnaqañ munapjjañapatak khuyaptʼayasiñamp yanaptʼañäni (1 Ped. 3:8). Diosan servirinakapajj kunja humilde chuymanïpjjesa, Diosampi suma uñjatäñatakis kunjamsa chʼamachasisipkaki uk uñjasajja, jaktanirinakajj Diosar adorañwa munapjjarakini (Filip. 2:12). w20.08 pág. 16 párrs. 6, 7

Apóstol Pablon ewjjtʼaparjam luratanakasat amuykiptʼañäni ukhajja, kunanaksa sum lurañ yattan ukanakwa amuyañäni. Sañäni, inas mä jilïr irpirejj plataformat jan sum arstʼirïkchiti, ukampis predicasajj wali suma yatichirïspawa. Jan ukajj inas mayni jilïr irpirinakat sipans jan sum organiztʼasiñ yatkchiti, ukampis wali munasiri jilïr irpirïspawa, ukatwa jilat kullakanakajj jupamp parltʼañ jan ajjsarayasipkaspati, jan ukajj wali katoqtʼasiri jilatat uñtʼatarakïspawa (Heb. 13:2, 16). Kunanaksa sum lurañ yattan uk sum amuytʼañäni ukhajja, congregacionan yanaptʼaskatasat wal kusisiñäni. Ukatjja, janirakiw kuntï mayni jilat kullakanakajj sum lurañ yatipki ukanakatsa envidiaskañäniti. Congregacionan kunayman lurañanakansa yanaptʼaskstanjja, taqeniw Diosar jukʼamp sum serviñataki, suma yatichirïñatak chʼamachasiñasa. w20.08 págs. 23, 24 párrs. 16-18

Joseph Rutherford sat jilatajja, “Walja jaqenaka” sat jan armkañ mä discurswa Washington (Estados Unidos) markan mä jachʼa tantachäwin 1935 maran arstʼäna. Apocalipsis 7:9 texton ‘walja jaqenakat’ parlki ukanakajj khitinakäpjjesa ukwa jilatajj discursopan qhanañchäna. Uka walja jaqenakajj alajjpacharuw sarapjjani, ukampis Diosar jan taqe chuyma servipjjatapat janiw Jesusamp chika apnaqapkaniti sasaw Bibliat Yatjjatirinakajj amuyapjjäna. Rutherford jilatajja, walja jaqenaka sasin uñtʼatäpki ukanakajj janiw alajjpachar sarañatak ajllitäpkiti sasaw Bibliampi qhanañchäna. Jupanakajj Criston yaqha ovejanakapäpjjewa, wali tʼaqesiñ tiempjja jakkiriw pasapjjani, wiñayatakiw aka oraqen jakasipjjarakini sasaw qhanañcharakïna (Apoc. 7:14). Jesusajj akham sänwa: “Yaqha ovejanakaw nayan utjarakitu, janiw aka uyunkirïpkiti, ukhamarus uka ovejanakarojj anakiniñajarakiwa. Uka ovejanakasti arunakaj istʼapjjaniwa, mä sapa tamakïpjjaniwa, mä sapa awatirikiw utjarakini” sasa (Juan 10:16). Uka ovejanakajj Diosar jan jitheqtas servirinakäpjjewa, aka oraqen mä paraison jakañwa suyasipki (Mat. 25:31-33, 46). w21.01 pág. 14 párrs. 1, 2

Cristianonakajja, aguantañatakisa tukuykam predicañatakis wal chʼamachasiñasawa (Mat. 28:19, 20). Jaqenakajj kunatï jiwasatak faciläki ukakwa jilapart lurtanjja. Ukampis awisajj wali wakiskirïki ukanak lurañajj chʼamakïspawa. Ukatwa munañasar atipjañ yateqañasa. Ukhamasti kunatï wali chʼamjamäki uk lurañatakejj yanaptʼwa muntanjja. Ukatakejj Jehová Diosaw espíritu santop toqejj yanaptʼistani (Gál. 5:22, 23). Apóstol Pablojj lurañanakap sum phoqañatakis chʼamachaskchïnjja, kunatï walïki uk lurañatakejj jukʼampiw chʼamachasiñapäna, ukatwa ‘cuerpojar nuwjtwa’ sasajj sirïna (1 Cor. 9:25-27). Pablojj cristiano masinakaparojj lurañanakap sum phoqapjjañapatakiw ewjjtʼäna, “taqe kunsa wali suma, yäparu lurapjjam” sasaw sarakïna (1 Cor. 14:40). Diosar serviskakiñatakejj wal chʼamachasiñasawa, ukatakejj Diosan Reinopatsa predicañasapuniwa (Hech. 2:46). w20.09 págs. 6, 7 párrs. 15-17

Jichhürunakanjja, walja markanakanwa predicañajj jan jarkʼatäkiti. Jiwasatï ukham markanakan jakasstan ukhajja, ¿uk aprovechasktanti? Aka qhepa urunakanjja, Jehová Diosan servirinakapajj oraqpachanwa wali kusisita predicasipki yatichasipkaraki. Ukhamajj kunayman luräwinakanwa jiwasajj yanaptʼsna. Markasan sumankañ tiempo utjaskchi ukhajja, ¿kunsa lurañasa? (2 Tim. 4:2). Diosar kunjamsa jukʼamp sirvsna ukwa amuytʼasiñasa. ¿Janit jiwasas familiasas jukʼampi predicañatak chʼamachasksna? ¿Janit precursorat sirvksna? Jichha tiempojja, janiw qollqe thaqañataki cosasanak jikjjatañatak tiempökiti, ukanakajj wali tʼaqesiñ tiemponwa tukusjjani (Prov. 11:4; Mat. 6:31-33; 1 Juan 2:15-17). Walja publicadoranakajja, yaqhanakar predicañatakisa yatichañatakis yaqha arunakwa yateqawayapjje. Diosan markapas jupanakar yanaptʼañatakejja, 1.000 jila arunakanwa Bibliat apstʼat qellqatanaka videonaka apsuwayi. w20.09 pág. 16 párrs. 9-11

Mä suma soldadojj taqe chuymaw markapat saytʼasi. Khitinakarutï munaski kunanakarutï wali valoranit uñjki ukanakarus taqpach chʼamapampiw jan walinakat jarkʼaqe. Pablojj Timoteor akham sänwa: “Dios chuymäñatak chʼamachasiskakim” sasa. ‘Dios chuymäñajj’ ¿kamsañsa muni? Diosar taqe chuyma munasiña, janipun jupat jitheqtaña sañwa muni (1 Tim. 4:7). Dios chuymäñäni ukhajja, janipuniw cheqa yatichäwinak apanukkañäniti (1 Tim. 4:8-10; 6:6). Mä suma soldadojj lurañanakap sum phoqañ munchi ukhajja, wal chʼamachasiñapa. Timoteojj Pablon ewjjtʼaparjamajja, jan wali munañanak apanukuñataki, suma chuymanïñataki, jilat kullakanakampïñatakiw chʼamachasïna, ukhamatwa Criston suma soldadopätap uñachtʼayäna (2 Tim. 2:22). Jan wali munañanakar atipjañ munstan ukhajja, ukhamwa chʼamachasiñasaraki (Rom. 7:21-25). Ukatjja, kunjam jaqëkayätantï uk apanukusajj machaq jaqëñampiw isthapisiskakiñasa (Efes. 4:22, 24). Qaritäktan ukhasa, tantachäwir sarañatakejj chʼamachasiñasarakiwa (Heb. 10:24, 25). w20.09 pág. 28 párrs. 9-11

Mä yateqerin Diosar vidap katuyasiñapatakisa bautisasiñapatakisa paciencianïñaw munasi. Ukampis Jehová Diosar serviñ cheqapunit muni janich uk yatiñaw wakisiraki. Aka jisktʼanakatwa amuytʼañasa: ¿Jesusan arunakapar istʼañatak chʼamachasiskiti? ¿Jan ukajj Bibliat aleq yatiñatakikich yatjjataski? Kunanaksa yateqerejj nayrar sartañatak luraski ukanak sapa kuti amuytʼañasawa. Sañäni, ¿Jehová Diosar munasitapajj amuyasiti? ¿Diosar oracionan jakʼachasiti? (Sal. 116:1, 2). ¿Biblia liyiñajj gustiti? (Sal. 119:97). ¿Tantachäwinakarojj jan faltasisat sari? (Sal. 22:22). ¿Kuntï yateqki ukarjamat sarnaqaski? ¿Kuntï yateqaski ukanakjja familiaparusa amigonakaparus parliti? (Sal. 9:1). ¿Cheqapunit Jehová Diosan Testigopäñ muni? (Sal. 40:8). Yateqeritï ukanak jan lurkchi ukhajja, kunatsa jan chʼamachaski ukanak wali amuyumpiw yatjjatañasa, ukatjja munasiñampi qhana arunakampiw jupar parltʼañasaraki. w20.10 pág. 18 párrs. 14, 15

Jesusan alajjpachankir Awkipajj suma amtanakarupuniw puri, aka oraqenkir awk taykapasa ukhamarakiw suma amtanakar puripjjerïna. Jesusajj jilsjjasajja, jupa pachpaw suma amtanakar purjjarakïna (Gál. 6:5). Jupajj jiwasjamarakiw kun amtañatakis librëna, kun lurañtï munkäna ukwa jupajj amtaspäna. Ukampis Jehová Diosampi sum apasiskakiñwa amtäna. Jesusajj kunsa Diosan amtap phoqañatakejj lurañapäna uk amuyjjäna ukhajja, taqe chuymaw ukar iyawsäna (Juan 6:38). Walja jaqenakaw jupar uñisipjjañapäna, uk jupajj yatïnwa. Ukhaman uñjasiñ janis munkchïnjja, jupajj Jehová Diosar istʼañwa amtäna. 29 maran bautisasjjäna ukhajja, Awkipan munañap phoqañatakiw chʼamachasïna, ukaw jupatakejj wali importantënjja (Heb. 10:5-7). Kunapachatï lawan warkkatat tʼaqesiskäna ukhasa, Awkipan munañap phoqaskakïnwa (Juan 19:30). w20.10 pág. 29 párr. 12; pág. 30 párr. 15

Yaqhep jilat kullakanakajj usutäpjjatap layku jan ukajj yaqha problemanïpjjatap laykuw wal tʼaqesipjje, ¿ukham jilat kullakanakajj congregacionaman utjiti? Inas yaqhepanjja familiapat maynejj jiwjjchi. Jupanakan yanaptʼa munapjjatap yatstan ukhajja, Jehová Diosaruw kunatï jupanakar yanaptʼkaspa uka arunak sañatakisa jan ukajj kunatï jupanakar yanaptʼkaspa ukanak lurañatakis orasiñasa. Arunakasasa luratanakasasa jilat kullakanakasarojj walpun yanaptʼaspa (1 Ped. 4:10). Niyakejjay Jehová Diosajj jiwasampïskchejja, jan ajjsarasaw jan walinakar saykatsna. Diosajj Jesús toqe angelanak toqew yanaptʼistani. Amtaparjamächi ukhajja, autoridadanak toqes yanaptʼarakistaniwa. Kunjamtï taqenis yatktanjja, Jehová Diosajj espíritu santopampiw jilat kullakanakarojj chʼamañchaspa ukhamat jiwasar yanaptʼañapataki. Ukhamasti, jiwasajj apóstol Pabljamarakiw jan pächasis akham sissna: “Jehová Diosaw yanapirijajja, janiw ajjsarkäti. ¿Jaqejj kamacharakitaspasti?” sasa (Heb. 13:6). w20.11 pág. 17 párrs. 19, 20

Jehová Diosajj milagronak lurapjjañapatakiw apostolonakar chʼam churäna, ukatwa Diosajj jupanakampïskatapat jan pächasipkänti (Hech. 5:12-16; 6:8). Jehová Diosajj janiw jichhürunakan milagronak lurañatak chʼam churkistuti, ukampis cheqapar sarnaqatas layku tʼaqesiyat uñjasiñäni ukhajja, kusisitäñäniwa, ¿kunatsa? Jehová Diosajj munasiñampiw uñjistani, espiritupsa churarakistaniwa, ukwa Biblia toqejj qhanañchistu (1 Ped. 3:14; 4:14). Ukhamajja, jutïrin arknaqata uñjaskañäni ukhajj kunsa lurañäni ukat llakisiskañat sipansa, Jehová Diosaw yanaptʼistani, salvarakistani sasin jukʼamp confiyañatakejj kunsa lursna ukatakiw jichhajj chʼamachasiñasa. Jesusan promesaparuw confiyañasaraki. Jesusajj akham sänwa: “Nayaw arunaksa yatiñsa churasipkäma, enemigonakamajj taqeni mayachtʼasipkani ukhasa, janiw jupanakajj kun sañs puedepkätamti” sasa. “Aguantapjjatam laykojj jakañanakamsa salvasipjjätawa” sasaw sarakistu (Luc. 21:12-19). Maynejj Jehová Diosar jan jitheqtasa jiwañkam serviwayi ukhajja, jupajj kunjam jaqënsa uk Jehová Diosajj sumwa amtaski, ukatsti jaktayjjarakiniwa, uk amtañasapuniwa. w21.01 pág. 4 párr. 12

Janiw apóstol Pablokejj jiwatanakan jaktanipjjañap suykänti, Job chachasa ukhamarakiw suytʼäna. Diosajj nayat amtasisin jaktayitaniwa sasaw taqe chuym suytʼarakïna (Job 14:7-10, 12-15). ‘Jiwatat jaktañ’ yatichäwejja, cristianonakajj kuna yatichäwinakarutï creyipki ukanak taypinkiwa (Heb. 6:1, 2). Pablojj 1 Corintios capítulo 15 ukanwa uka toqet qhanañchäna. Uka tiempon jakir cristianonakarojja, uka arunakajj wal chʼamañchtʼpachäna. Jiwasarus wal chʼamañchtʼistu, jiwatanakan jaktaniñap walja tiemposa jan ukajj jukʼa tiempokis suyaskstanjja, ukar jukʼamp confiyañatakiw chʼamañchistu. Jesusan jaktatapajja, munat familiasasa amigonakasas jaktanipjjaniwa sasin confiyañatakiw yanaptʼistu. Jesusan jaktatapasti, Pablojj “kuna suma yatiyäwinaktï” Corintonkirinakar yatiykäna uka taypinkarakiwa (1 Cor. 15:1, 2). Jupajj akham sänwa: “Cristotejj jan jaktayatäkchïnjja, jumanakan Diosar confiyapjjatamajj inamayakiwa” sasa (1 Cor. 15:17). w20.12 pág. 2 párrs. 2-4

¿Kunas apóstol Pedror yanaptʼäna? Jesusan arunakapaw yanaptʼäna, jupajj akham sänwa: “Nayajj taqe chuymaw Diosar jumatak mayirapsma, ukhamat Diosar confiyañan jan aynachtʼañamataki” sasa. Jehová Diosajj kuntï Jesusajj maykäna ukarojj istʼänwa. Qhepatjja, Jesusaw Pedror uñstäna, inas chʼamañchtʼañatak ukham uñstchïna (Luc. 22:32; 24:33, 34; 1 Cor. 15:5). Yaqha horasanjja, Jesusajj mayampiw apostolonakar uñstäna, jupanakajj arum paqaraw chawlla katuñatak inamay chʼamachasipjjäna. Ukanwa Jesusajj qhawqsa Pedrojj jupar munasïna uk arsuñapatak mä oportunidad churäna, ukatsti jukʼamp lurañanak churasaw Pedror perdonatap Jesusajj uñachtʼayäna (Juan 21:15-17). Jesusajj kunjamtï Pedror yanaptʼkäna ukaw Awkipjam khuyaptʼayasirïtap uñachtʼayistu. Ukhamajj pantjasiñäni ukhajja, Jehová Diosajj janiw perdonkitaniti sasajj jan piensañäniti. Supayaw ukham piensañas muni, uk jan armañäniti. Antisas jiwas pachparusa chuym ustʼayapkistu ukanakarusa, kunjamtï alajjpachankir Awkisajj uñjkistu ukham munasiñampi khuyaptʼayasiñampi uñjapjjarakiñäni (Sal. 103:13, 14). w20.12 págs. 20, 21 párrs. 17-19

Khitinakatï ajjsarayasipkäna, Jehová Diosarus jan confiyapkäna ukanakat ¿kunsa yateqsna? Uka sarnaqäwinakat Biblian yatjjatañajja, jan jupanakjam lurañatakiw yanaptʼistani. Asá reyit parltʼañäni. Qalltanjja, Asá reyejj jan waltʼäwinakan uñjasisajj Jehová Diosaruw yanaptʼa mayisirïna. Ukampis qhepatjja, Diosar yanaptʼa mayisiñat sipansa amtaparjamakiw kuns lurjjäna (2 Crón. 16:1-3, 12). Amuyuparjamajja, Israel markampi nuwasiñatak sirionakar yanaptʼa mayiñajj waljamakïnwa. Ukampis ukham luratapajj mä jukʼa tiempokiw Judá markar yanaptʼäna. Jehová Diosajj mä profetap toqejj akham sänwa: “Siria markankiri reyin ejercitopajja jumarojj apanukjjtamwa, Tatitu Diosamaru jan iyawsatam layku, jan ukasti Siria markankir reyiru alkatasitam layku” sasa (2 Crón. 16:7). ¿Kunsa ukat yateqsna? Jiwasajj janiw Asá reyjam kuns amtasarjamak lurañasäkiti, Jehová Diosan Arupampiw yanaptʼayasiñasa. Awisajja, jankʼaki mä amtar puriñaw wakisini. Ukhamäkchinisa pacienciampi suytʼañäni, Jehová Diosar confiyarakiñäni ukhajj suma amtaruw puriñäni. w21.01 pág. 6 párrs. 13-15

Añchhitajj Diosan yaqhep servirinakapajja, qollqe jan utjipana jan waltʼäwinak utjipana guerra utjipanwa manqʼat pistʼat jakasipjje. Yaqhepajj Diosar servipjjatap laykuw carcelankapjje. Ukampis akapachan tukjäwip jakkirpach pasasajja, janiw manqʼat pistʼata jakasjjapjjaniti, Diosatsa walja yatichäwinakwa katoqapjjani, uk yatisaw walja jaqenaka sasin uñtʼatäpki ukanakajj wali kusisitäpjje. Diosajj Supayan apnaqat akapachar ‘nakhantir intir uñtata’ colerapampi tukjkani ukhajja, janiw jupanakarojj tukjkaniti, antisas jarkʼaqaniwa. Wali tʼaqesiñ tiempo jakkirpach pasirinakarojja, Jesusaw ‘jakañ churir umanakaru’ irpani, mä arunjja wiñay jakañ katoqapjjañapatakiw yanaptʼani (Apoc. 7:17). Ak amuytʼañäni: walja jaqenaka sasin uñtʼatäpki ukanakajj suma suytʼäwinïpjjewa, walja millón jaqenakajj jakawayapki ukanakatjja, jupanakakiw wiñay jan jiwasa jakapjjaspa (Juan 11:26). Ukham suytʼäwinïpjjatapat Jehová Diosarusa Jesusarus wal yuspärapjje. w21.01 pág. 17 párrs. 11, 12

Jesusajj janïr jiwayatäkäna uka arumajja, kuna jan walinakansa discipulonakapajj uñjasipjjañapäna uka toqetwa lupʼïna. Niyakejjay discipulonakapar wal munaschïnjja, Supayat jarkʼaqañapatakiw Awkipar mayïna (Juan 17:14, 15). Jesusajj alajjpachar kuttʼjjäna uka qhepatsa, Supayajj Jehová Diosar serviñ munirinakarojj jan waltʼayaskakispänwa, ukwa Jesusajj yatïna. Ukhamajja, Jehová Diosan markapajj Jupan jarkʼaqatäñapaw wakisïna. Jichha tiemponjja, jukʼampiw Jehová Diosamp jarkʼaqatäñ muntanjja. Supayajj alajjpachat jaqoqanitäjjewa, ‘wali coleratarakiwa’ (Apoc. 12:12). Arknaqapkistu ukanakat yaqheparojja, jiwasar arknaqasajj ‘Diosarus servipkaspa ukhamwa Supayajj amuyayi’ (Juan 16:2). Diosar jan creyipki ukanakat yaqhepajja, akapachan amuyuparjam jan luratasatwa arknaqapjjarakistu. Ukhamäskpansa, janiw ajjsarktanti, ¿kunatsa? Diosaw jarkʼaqestani, kunjamtï jichhürutak ajllit textojj siski ukhama. w21.03 pág. 26 párrs. 1, 3

Jehová Diosajj munasiñatwa taqe kuns luri. Jupan amigopäñasatak munasiñampiw yanaptʼarakistu. Jiwasar munasisaw salvasiñasatak Yoqapar khitanïna. Jesusasti jiwasar munasitap laykuw vidap loqtasiwayaraki (Juan 3:16; 15:13). Jan jitheqtiri servirinakapajja, Jehová Diosampi Jesusampejj wali munatäpjjewa, munasiñapat janiw khitis apaqkaspati (Juan 13:1; Rom. 8:35). Ukhamarakiw familia pʼeqtʼirejj taqe kunsa munasiñat lurañapa. ¿Kunatsa ukajj wali importantejja? Apóstol Juanajj akham siwa: “Maynitejj jilatapar uñjkasas jan munaskchi ukhajja, janirakiw jan uñjkañ Diosarojj munaskaspati” sasa (1 Juan 4:11, 20). Ukhamajja, familiapar munasiri mä chachajj Jehová Diosata Jesusat yateqasiñ munchi ukhajja, familiapajj Diosamp sum apasiñapataki, kusisita jakasiñapataki, kunatï jakañatak munaski uk jan faltañapatakiw llakisini (1 Tim. 5:8). Ukatjja wawanakaparus yatichaniwa, cheqañcharakiniwa. Jupasa, kunanakatï Jehová Diosar jachʼañchkaspa familiaparus yanaptʼkaspa uka amtanakar puriñwa yateqaskakini. w21.02 pág. 5 párrs. 12, 13

Kunjamsa nayra experiencianakasajj jan waltʼayistu, jiwas pachpat jan wal amuyktan ukas kunjamsa jan waltʼayistu uk Diosajj sum yatiski. Jiwas pachpajj jan wali jaqëksnas ukhamsa amuyaskstanjja, Diosajj kunjam chuyman jaqëtansa ukwa uñji (1 Juan 3:19, 20). Maynejj kunatï jan walïki uk jan lurjjañatakiw wal chʼamachasiskaspa. Ukampis uka jan wal mayamp lurasajj wal llakisispa. Cheqas pantjasisajj llakisipuntanwa (2 Cor. 7:10). Ukampis janiw sinti llakisiñasäkiti, janirakiw “janiw kunatakis sirvkti. Jehová Diosajj janipuniw perdonkitaniti” sasin juchañchasiñasäkiti. Ukajj janiw cheqäkiti, ukham amuyañajj Diosatsa jitheqtayistaspawa. Antisas Diosamp oracionan “uka jan wali luratanaka[sat] parlapjjañäni”, perdón mayisipjjarakiñäni (Is. 1:18). Taqe chuyma arrepentisitas uñjasajja, Diosajj perdonistaniwa. Ukatsti jilïr irpirinakaruw yanaptʼa mayiñasaraki. Jupanakajj pacienciampiw Diosar sum serviskakiñatak yanaptʼapjjestani (Sant. 5:14, 15). w20.12 pág. 23 párrs. 5, 6

Jesusajj respetompiw warminakar uñjirïna. Fariseonakajja, warminakarojj jiskʼachapjjerïnwa, janiw jaqenak nayraqatan jupanakamp parlapjjerïkänti, yamas Qellqatanakat janipuniw warminakamp parlapjjerïkänti. Ukampis Jesusajj janiw fariseonakjamäkänti, antisas wali wakiskir cheqa yatichäwinakatwa chachanakampisa warminakampis parlirïna (Luc. 10:38, 39, 42). Predikir sarirïkäna ukhasa, walja warminakaw jupamp chik sarapjjerïna, Jesusajj janiw jupanakar jarkʼirïkänti (Luc. 8:1-3). Yaqhep warminakarojja, jaktatap apostolonakapar yatiyañapatakiw khitäna (Juan 20:16-18). Apóstol Pablojja, ukhamarakiw warminakar respetompi uñjañapatak Timoteor ewjjtʼäna. Awichamampi mamitamampiw “sagrado qellqatanak” jiskʼatpach yatichapjjtamjja sasaw säna (2 Tim. 1:5; 3:14, 15). Romankir cristianonakar carta qellqkäna ukhajja, Pablojj walja kullakanakaruw sutipat aruntäna. Uka kullakanakajj kuntï lurapkäna ukanak amuyasasti jupanakarojj wal yuspäräna (Rom. 16:1-4, 6, 12; Filip. 4:3). w21.02 pág. 15 párrs. 5, 6