Diciembre

Awisajja kuntï Biblian liyktan uk janiw entiendksnati. Jan ukajj janiw kunjamtï suykayätan ukhampun Diosajj oracionanakas contestkistaspati, ukaw pächasiyistaspa. Pächasiskaksna ukhajja, Diosarojj jukʼat jukʼat janiw confiyjjsnati, janirakiw Jupampis sum apasjjsnati (Sant. 1:7, 8). Kuntï jutïrin katoqañ suyktan ukarus janiw creyjjsnati. Apóstol Pablojja, kuntï jutïrin katoqañ suyktan ukajj mä anclar uñtasitawa sasaw säna (Heb. 6:19). Mä jachʼa thayajj sartki ukhajja, anclaw barcorojj katjjasi, jachʼa qalanakar jan chocañapatakisa katjjasirakiwa. Ukampis anclan cadenapatï tʼaqasispa ukhajja, janiw anclajj barcor katjjasjjaspati. Kunjamtï sarrojj cadenar jan waltʼaykejja, ukhamarakiw kunanakatï pächasiykistu ukajj Diosar confiyañan aynachtʼayistaspa. Maynitï pächaskasin jan walinakan uñjasispa ukhajja, Jehová Diosan promesanakapar janiw confiyjjaspati, jan confiyasajj janiw suytʼäwinëjjaspati. Maynitï ukham pächasispajja, janiw kunapachas kusisitäkaspati. w21.02 pág. 30 párrs. 14, 15

Abrahanajj familiapampi Ur markat sarjjäna ukhajja, inas 70 marats jilanëjjchïna (Gén. 11:31-12:4). Ukatjja, niya patak maraw carpanakan jakäna, Canaán oraqnamwa viajirakïna. 175 maraniw Abrahanajj jiwjjäna (Gén. 25:7). Ukampis Jehová Diosajj ‘Canaán oraqejj wawanakamar churatäniwa’ siskäna uka promesa phoqasir janiw uñjkänti. Janirakiw Diosan Reinopajj apnaqjjañapäkäna uksa uñjkänti. Walja jan walinakansa uñjaskchïnjja, Abrahanajj taqe chuymaw Diosar confiyaskakïna, promesap phoqañapsa kusisitaw suyaskakïna. ¿Kunas aguantañatak yanaptʼäna? Jehová Diosaw Abrahanarojj jan walinakat jarkʼaqäna, amigoparjamaw uñjarakïna (Gén. 15:1; Is. 41:8; Sant. 2:22). Jiwasajj Abrahanjamarakiw kawkïr markatejj cheqpach cimientonïki uk suyasktanjja (Heb. 11:10). Ukampis janiw uka marka uttʼayasiñap suyktanti, kunattejj Diosan Reinopajja 1914 maranwa uttʼayasiwayjje. Uka Reinojj alajjpachan apnaqjjewa (Apoc. 12:7-10). Aka oraqen apnaqjjarakispa ukwa suyasktanjja. w20.08 pág. 4 párrs. 11, 12

Mayninakaru sum istʼañatakejja, humilde chuymanïñasawa, paciencianïñasarakiwa. ¿Kunatsa mayninakaru sum istʼañatak chʼamachasiñasa? Maya, sum istʼasajj janiw jilat kullakanakasat jan walinak jankʼak amuykañäniti. Paya, jilat kullakanakasajj kunjamäsipkisa, kunatsa mä kuns lurapjje ukwa amuyañäni. Ukaw jupanakat jukʼamp sinttʼasiñatak yanaptʼistani. Kimsa, inas kunjam chuymanisa uk yatisiñapatak maynir yanaptʼarakchiñäni. Awisajja, kunjamäsktansa uk maynir yatiytan ukhakiw kunjam chuymanïtansa uk yatistanjja. Yaqhep jilat kullakanakatakejja, kunjamäsipkisa uk yaqhanakaru yatiyañajj chʼamakiwa. ¿Kunatsa? Kunjamantï nayrajj uñjasiwayapki, kunjam familiansa jilsuwayapjje, jan ukajj kunjam jaqëpjjesa ukaw parltʼasiñ jarkʼaspa. Jilat kullakanakan jiwasar confiyañapatakejj walja tiempow pasaspa, ukhakiw kunjamäsipkisa uk yatiyapjjestaspa. Ukampisa Jehová Diosjam paciencianïñäni ukhajja, jilat kullakanakasajj confiyapjjestaniwa. Tiempompejja, kunjamäsipkisa uksa yatiyapjjarakistaniwa. Ukhajj wali sumwa jupanakar istʼañasa. w20.04 págs. 15, 16 párrs. 6, 7

Chawllanakajja, kawkjantï umajj sumäki, manqʼas waljäki ukawjanakanwa jakapjje. ¿Kuna horasas chawll katur sarapjjakispati? Pacífico qotankiri mä islan jakasiri mä jilatajj kamsataynas misionero mä jilatarojj uk amuytʼañäni. Islankir jilatajja, ‘chawll katur sarañäni’ sasaw misionerorojj säna. Misionerosti, ‘ukhamajj arumanthi alwa, las nuever sarañäni’ sasaw säna. Ukampis jilatajja, ‘uka horasajj janiw chawllajj utjkiti, kuna horasatï chawllajj utjki ukhaw sarañasa’ sasaw säna. Ukhamarakiw nayrïr cristianonakajj kuna horasansa kawkjansa jaqejj utjäna ukhajj predikir sarapjjerïna. Sañäni, Jesusan discipulonakapajja templona, sinagoganakana, utat uta, qhatunakan predicapjjerïna (Hech. 5:42; 17:17; 18:4). Jiwasajj ukhamarakiw territoriosankir jaqenakar sum uñtʼañasa. Kawkjansa ukat kuna horasas jaqenakar jikjjatsna ukarjamaw predikir sarañasaraki (1 Cor. 9:19-23). w20.09 pág. 4 párrs. 8, 9

Jesusan amigopäñasatakejja, Diosan markapajj kunanaktï amtki ukanakar istʼañasawa. Jesusajj congregacionan pʼeqtʼiripawa, jupaw munasiñamp cuidapkistu uka jilatanakar uttʼayi. Uka jilatanakar istʼtan ukhajja, Jesusan jukʼamp suma amigopätanwa (Efes. 4:16). Sañäni, Diosan markapajja, Tantachasiñ Utanak jukʼamp sum apnaqañatakiw chʼamachasi. Ukatakejja, yaqhep congregacionanakajj mayachthapisiwa. Ukham lurasaw donacionanakajj ina chʼusar jan aptʼaskiti. Maysa toqetsti, uka cambionakar jilat kullakanakan yatinoqtapjjañapaw wakisïna. Diosar taqe chuyma serviri uka jilat kullakanakajja, nayrajj inas mä congregacionan walja maranak tantachasipjjchïna, ukankir jilat kullakanakampis wali yatitäpjjchïna. Ukampis yaqha congregacionan servipjjañapatakiw jupanakar mayisiwayi. Diosan markapajj kunanaktï amtki ukanakar jilat kullakanakajj istʼapjje ukhajja, Jesusajj wal kusispacha. w20.04 pág. 24 párr. 14

Norte toqenkir reyimpi sur toqenkir reyimpejja, oraqpach apnaqañatakiw jupanakkam chʼajjwapjje. Sañäni, Segunda Guerra Mundial qhepatjja Unión Sovieticampi jupar yanapiri markanakampejj Europa cheqankir markanakat jilaparte apnaqañwa qalltapjjäna. Ukatwa sur toqenkir reyejj yaqha markanakampi mayachtʼasisajj ejercitop jachʼaptayäna, ukajj Organización del Tratado del Atlántico Norte (OTAN) satawa. Uka pä reyinakajja wali chʼamani ejercitonïñatakiw walja qollqe gastapjjäna. Ukatsti África, Asia, América Latina cheqanakan guerrajj utjkäna ukhajja, jupanakar yanapiri markanakaruw uka pä reyejj yanapapjjäna, ukhamatwa uka pä reyejj guerrankapjjarakïna. Aka qhepa maranakanjja, Rusia markampi jupar yanapir markanakampejj oraqpachan wali chʼamaniruw tukuwayapjje. Ukhamarakiw sur toqenkir reyimpejj computadoranak taypejj guerrankapjje. ‘Computadoranak toqew qollqe aptʼasiyañ munitu, gobiernojar aynachtʼayañwa munaraki’ sasaw uka pä reyinakajj jupanakkam juchañchasipjje. Ukhamarusa kunjamtï Daniel profetajj siskänjja, norte toqenkir reyejj Diosan markapar jan waltʼayaskakiwa (Dan. 11:41). w20.05 pág. 13 párrs. 5, 6

Isaías profetan tiempopanjja, Jehová Diosajj akham sasaw markapar säna: “¿Mä taykajj wawanakaparojj armasiti [...]? Inas uka taykajj armaschispa, ukampis nayajj janipuniw armaskäti” sasa (Is. 49:15). Biblianjja, awisakiw Jehová Diosajj wawan mä warmir uñtasitäkaspas ukham parli. Qhawqsa servirinakapar munasi uk amuytʼayañatakejja, mä warmejj qhawqsa wawapar munasi uka toqetwa Jehová Diosajj parläna. Kuntï Jasmín sat mä kullakajj siskäna ukhamarakiw wawanakani warminakajj sapjjaspa, jupajj akham sänwa: “Wawasar ñuñtʼayktan ukhajja, jukʼampiw jupar munastanjja, uka munasiñajj wiñayatakiwa” sasa. Jehová Diosajja, munat servirinakapat maynejj predikir jan mistjje, tantachäwinakarus jan sarjje uk yatiwa. Uka munat jilat kullakanakat waljaniw congregacionar kuttʼanjjapjje, wali munasiñampiw katoqjjaraktanjja. Jehová Diosajj kuttʼanjjapjjañap wal muni, jiwasas ukwa munaraktanjja (1 Ped. 2:25). w20.06 pág. 18 párrs. 1-3

¿Jan uñjaski uka regalonakajj utjpachati? Jïsa, utjiwa. Jan uñjaski uka regalonakajj jukʼamp valoraniwa. Jesusajj mä qollun yatichkäna ukhajja, kunatï wali valoranïki ukanak alajjpachar imañatwa parläna, ukanakajj qollqet sipansa jukʼamp valoraniwa. Jupajj sarakïnwa: “Kawkintï suma imatanakamajj utjki ukankarakiniw chuymamajja” sasa (Mat. 6:19-21). Kunanakarutï wali valoranit uñjktan ukanak jikjjatañatakiw chuymasajj chʼamañchistu. Jehová Diosajj suma jaqet uñjistu ukhajja, ‘kunatï valoranïki ukanak alajjpacharus imkatksna’ ukhamawa. Kunjamtï Jesusajj siskänjja, uka imatanakasar janiw kunas tukjkaspati ni khitis lunthatkaspati. Apóstol Pablojja, ‘kunanakatï jan uñjaski ukanakar chuym churañatakiw’ chʼamañchistu (2 Cor. 4:17, 18). Jan uñjaski uka regalonakat yaqhepajja, kuna bendicionanaktï jutïrin Diosat katoqkañäni ukanakawa. ¿Jan uñjaski uka regalonakar wali valoranit uñjatas uñachtʼaytanti? w20.05 pág. 26 párrs. 1, 2

Kuntï israelitanakajj Moisesat yateqapkäna ukajja, kunjamtï jallojj yapur sulljjatkejj ukar uñtataw chuymanakap qhanartayäna, chʼamañchtʼarakïna. Yatichatasajj jaqenakan chuymap qhanartayañapatakisa, chʼamañchtʼañapatakis ¿kunsa lurañasa? Predicasajja, Bibliampiw jaqenakarojj Jehová Diosan sutip yatichañasa. Bibliat apstʼat qellqatanakwa chursna, videonakwa uñtaysna, Internetan jw.org® cheqar mantapjjañapatakiw chʼamañchtʼaraksna, taqe ukanakajj Jehová Diosaruw jachʼañchi. Trabajonsa, escuelansa, viajensa Jehová Diosajj kunjam Diosasa uka toqet parlañatakiw chʼamachasiñasa. Diosajj aka oraqetakisa jaqenakatakisa kuna sumanaksa amti uka toqetwa parlañasa. Ukanak istʼasajja qhawqsa Jehová Diosajj jaqenakar munasistu ukwa amuyasipjjaspa. Munasir Awkisat sapa kuti yatichtan ukhajja, sutipajj santot uñjatäñapatakiw yanaptʼasktanjja, Diosat kʼarinak yatichapki ukanakajj jan cheqätapwa qhanstayaraktanjja. Diosan Arupakiw jaqenakarojj chuym qhanartayaspa (Is. 65:13, 14). w20.06 pág. 10 párrs. 8, 9

Jehová Diosar kuttʼañ munirinakar yanaptʼañatakejj ¿kunjam chuymanïñasasa? Herencia tukuntir waynat parliri uñachtʼäwejj kuns yatichistu uk yatjjatañäni (Luc. 15:17-24). Uka waynajj jan wal luratap amuytʼasisajj utaparuw kuttʼjjäna. Tatapajja, wawapar jutaskir uñjasajj tʼijukamaw saräna, wali munasiñampi qhomanttʼasaw wawapar munasiskakitap uñachtʼayäna. Uka waynarojja, chuymapajj wal juchañchäna, ukatwa “wawamätwa sañatakis janiw walïkti” sasin tatapar säna. Kunjamäskisa uksa taqwa yatiyäna, ukhamatwa taqe chuyma arrepentisitap tatapajj amuyäna ukatwa wal sinttʼasïna. Ukatjja mä jachʼa fiesta wakichayarapïna, mä suma isi churapjjañapatakiw servirinakapar mayirakïna. Ukhamatwa wali munat wawaparjam katoqatap uñachtʼayäna. Jehová Diosajj herencia tukuntir waynan tatapjamawa. Jupajj congregacionat jitheqtatanakarojj wal munasi, kuttʼanjjapjjañapwa munaraki. Jupat yateqasiñäni ukhajja, kuttʼanjjapjjañapatakiw yanaptʼsna. Ukatakejj paciencianïñasawa, kunjamäsipkisa uksa amuyañasawa, munasirïñasarakiwa. w20.06 págs. 25, 26 párrs. 8, 9

Jesusajja, “kusisitaw” yaqhepajj Biblian arunakap katoqapjjani, ukampisa jan walinakajj utjkani ukhajj jankʼakiw Diosar confiyatapajj aynachtʼani sasaw säna (Mat. 13:3-6, 20, 21). Jesusar arkasajj kunayman jan walinakana, yantʼanakanwa uñjasiñäni, inas yaqhepajj ukanak jan amuyapkchiti (Mat. 16:24). Jan ukajja, ‘cristianöjjasajj jan kuna llakiniw jakasëjja’ sasin amuyapjjarakchi. Ukampis akapachanjja jan walinakajj utjakipuniniwa. Mä jan walin uñjasisajj janiw kusisit jakasjjsnati (Sal. 6:6; Ecl. 9:11). Diosan servirinakapat jilapartejja, kuntï creyktan ukajj cheqäskapuniwa sasaw taqe chuyma confiyapjje. ¿Kunjamatsa uk yattanjja? Mä jilatasa jan ukajj mä kullakasa jupanakar chuym ustʼayi, jan ukajj juchachasi ukhajj janiw Diosar confiyatapajj aynachtʼkiti (Sal. 119:165). Jan walinakan uñjasisajj aynachtʼañat sipansa jukʼampiw Jehová Diosar confiyi (Sant. 1:2-4). Jiwasajj jan walin uñjasisajj ukhamarakiw Jehová Diosar wal confiyañasa. w20.07 pág. 8 párr. 1; pág. 9 párrs. 4, 5

Biblia janïr liytʼkasajja, sum amuytʼañatakejj Jehová Diosaruw yanaptʼa mayisiñasa. Sañäni, mä problema askichañatak ewjjtʼanak thaqaskstan ukhajja, Diosaruw uka ewjjtʼanak Biblian jikjjatañatakejj yanaptʼa mayisiñasa, ukhamat suma amtanakar puriñataki (Filip. 4:6, 7). Niyas uñjksna ukham amuytʼañajja, Diosan mä suma regalopawa. Ukhamajj Biblian mä sarnaqäwi liykasajja, niyas ukanak uñjksna, jiwasas jupäksna ukhamwa amuytʼañasa. Kunanaktï jupajj uñjkäna uk uñjañataki, kunjamas jikjjatasïna uk amuyañatakiw chʼamachasiñasa. Ukham lurañäni ukhajja, wali askinakwa yateqañäni. Ukatjja lupʼiñasawa. Lupʼiñajja, kuntï liyktan ukanakat sum amuykiptʼañawa, kunsa ukampejj yatichañ munistu ukanak amuykiptʼañarakiwa. Ukatjja, amuyunakas mayachthapiñatakiw lupʼiñajj yanaptʼarakistu. Ukhamatwa kuna toqetsa mä yatichäwejj parlaski uk sum amuytanjja. Biblia liyisin jan lupʼiñajja, mesa patjjan jaratatat mä rompecabeza aleqak uñchʼukiñampi sasiwa. Ukampis lupʼiñajja, uka rompecabeza sum armthapiñampi sasiwa, ukhamat kunas utji uk sum uñjañataki. w21.03 pág. 15 párrs. 3-5

Apóstol Pablojja, kunanaksa nayrajj luräna ukat lupʼisajj akhamwa amuyaspäna: ‘Janitï Diosar taqe chuyma servkiriskayätjja, inas carcelan jistʼantat jan uñjaskiriskchiyätti’ sasa. Asia provinciankirinakan jupar jaytanukutapatjja, jupanakatak wal coleraspäna, mayni amigonakaparus janiw confiyjjaspänti. Ukampis janiw ukanak lurkänti. Jiwañap jakʼankjjatap yatkasasa, jakäwipan Jehová Diosar jachʼañchañaw nayrankäna. Mayninakar kunjamat chʼamañchtʼañatakis chʼamachasiskakïnwa, Jehová Diosarus taqe chuyma confiyasaw orasiskakïna. Yaqhepajj jupar jaytanukupkäna ukjjat janiw sint lupʼkänti, antisas jan jitheqtir amigonakapajj kunjamsa munasiñampi yanaptʼapjjäna ukat wal yuspäräna. Diosan Arupatsa yatjjataskakïnwa (2 Tim. 3:16, 17; 4:13). Jukʼampisa, ‘Jehová Diosasa, Jesusas nayar munasipjjetuwa’ sasaw confiyäna. w21.03 pág. 18 párrs. 17, 18

Khä 100 mara qhepatjja, cheqpach cristianonakan congregacionaparojj falso cristianonakaw mantapjjäna. Jupanakajja, Diosan Arup qʼewjayasajj kʼari yatichäwinakwa yatichapjjäna, cheqa yatichäwinakjja imantapjjarakïnwa. Uka tiempot 1870 marakamajja, Diosar serviri mä organizacionajj janiw utjkänti. Falso cristianonakajj jan wali qorar uñtasitaw jiltapjjäna, ukatwa khitinakas cheqpach cristianonakäpjje uk yatiñajj chʼamäna (Mat. 13:36-43). ¿Kunatsa uk yatiñajj wali wakiskirejja? 100 marat 1870 marakam utjkäna uka gobiernonakat janiw mayas Daniel 11 qellqatajj parlki uka norte toqenkiri, jan ukajj sur toqenkiri reyinakäpkaspänti. Uka maranakanjja, Diosar serviri mä organizacionajj janiw utjkänti, ukhamajj janiw Diosan markapar jan waltʼayapkaspänti. Norte toqenkir reyisa sur toqenkir reyisa, 1870 mara qhepatwa uñstapjjäna. w20.05 pág. 3 párr. 5

Joel profetajja, tʼiju tʼijunakaw Israel markar qʼal tukjapjjani, uka tʼiju tʼijunakajj leonanakan lakapar uñtat wali ari lakanakapampejj Israel markan taqpach plantanakapwa manqʼantapjjani sasaw profeciapan säna (Joel 1:4). Kunjamtï walja tʼiju tʼijunakajj jan khitin jarkʼkay sarapkejja, ukar uñtasitaw Diosan markapajj predicapjje sasaw walja maranakajj uka profeciat amuyayätanjja. Ukham predicatasajj ‘markaru’ mä arunjja religión pʼeqtʼirinakamp apnaqat jaqenakaruw wal llakisiyi sasaw amuyayätanjja. Ukampis taqpach profecía sum uñakiptʼasajja, kuntï amuykayätan uk cambiañ wakisitapwa amuytanjja. Jehová Diosajj tʼiju tʼijunakat kuntï siskäna uk amuytʼañäni, Jupajj akham sänwa: “[Norte] toqeta jutir tʼiju tʼijunaksa jumanakatjja jayaruw apanukurakï” sasa (Joel 2:20). Jehová Diosan Testigonakapajj Jesusan mayitapar istʼasaw predicapjje, discipuloparuw jaqenakar tukuyapjjaraki. Ukhamajj Testigonakatï tʼiju tʼijunakampi sasïchejja, ¿kunatsa Diosajj jupanakar jayar apanukuspa? (Ezeq. 33:7-9; Mat. 28:19, 20). Diosajj janiw servirinakaparojj jayar apanukkiti, antisas kunatï jan ukajj khititï markapar jan waltʼayki ukaruw jayar apanuku. w20.04 pág. 2 párr. 3; pág. 3 párrs. 4, 5

Jehová Diosajj janis oracionanakas jankʼak contestkistaspa ukham amuyañäni ukhajja, ¿kunsa lurañasa? Santiagojj “Diosar mayisisipkakim” sasaw ewjjtʼistu. Jehová Diosajj kutin kutin jan waltʼäwinak aguantañatak yatiñanïñ mayitasatjja, janiw jiwasatak coleraskaniti. Jan ukasti jan michʼasisaw yatiñanïñ churistani (Sal. 25:12, 13, TNM). Jupajja, kuna yantʼanakansa uñjastan uk sumwa yatiski, jiwasat sinttʼasiwa, yanaptʼañwa munarakistu. ¿Uk yatiñajj kusiskañajjaya? Jehová Diosajj Arup toqew yatiñanïñ churistu (Prov. 2:6). Ukatakejj Biblia estudiañasawa, Bibliat apstʼat qellqatanakatsa yatjjatañasarakiwa. Ukampis janiw yatjjatañakejj wakiskiti, jan ukasti kuntï Jehová Diosajj ewjjtʼkistu ukarjamaw sarnaqañasaraki. Discípulo Santiagojj akham sänwa: “Diosan arunakap phoqerïpjjam, jan aleq ischʼukirikïpjjamti” sasa (Sant. 1:22). Jehová Diosan ewjjtʼanakapar istʼtan ukhajja, sumankir jaqeru, amuytʼasiri, khuyaptʼayasir jaqeruw tuktanjja (Sant. 3:17). Ukham jaqëñajja, kuna kasta yantʼan uñjaskasas kusisitäskakiñatakiw yanaptʼistu. w21.02 pág. 29 párrs. 10, 11

Bibliat yateqerinakajja, jilat kullakanakan yanaptʼapampiw nayrar sartapjjaspa, bautisasiñsa amtapjjarakispa. Ukatwa congregación jiltañapatakejj taqe publicadoranakajj yanaptʼapjjañapa. Mä precursorajj akham siwa: “Mä säwiw utji, ‘mä wawa uywañatakejj mä markaw munasi’ sasa. Jaqenakaru Bibliat yatichañatakejj ukhamarakiw munasi. Sañäni, Diosan markapar maynin mantañapatakejja, taqe jilat kullakanakan yanaptʼapaw munasi” sasa. Jilïr jaqer tukuñapkamajja, mä wawajj taqen yanaptʼapwa katoqawayi. Sañäni, familianakapa, amigonakapa, yatichirinakapaw chʼamañchtʼawayapjje, wali wakiskirinak yatichawayapjje. Yateqerin bautisasiñapatakejja, ukhamarakiw taqe publicadoranakajj yanaptʼapjjsna. Ewjjtʼasa, chʼamañchtʼasa, yateqaskay sarnaqasaw yanaptʼsna (Prov. 15:22). Ukhamajj Bibliattï maynir yatichaskstanjja, ¿kunatsa jilat kullakanakajj yateqerisar yanaptʼañ munapjjepan jan jarkʼañasäki? Taqeniw Bibliat yateqerisar nayrar sartañapatak yanaptʼapjjaspa, ukatwa jan jarkʼañasäkiti. w21.03 pág. 8 párrs. 1-3

Wayn tawaqonakasa jilïrinakasa, jan walinak lurkasin Diosar sumsa servisksna ukham janiw tukuñasäkiti. Apóstol Juanajja, cheqa yatichäwin sarnaqkasajj janiw qʼañu juchanak lurañasäkiti sasaw säna (1 Juan 1:6). Jehová Diosar kusisiyañ munstan ukhajja, taqenis luratanakas uñjapkaspa ukhamwa sarnaqañasa. Cheqas taqe luratanakaswa Diosajj uñjaski, janiw kuna juchsa Jehová Diosat imtʼksnati (Heb. 4:13). Janiw kunjamtï jaqenakajj juchanak lurañar uñjapki ukham uñjañasäkiti. Apóstol Juanajj jakkäna uka tiemponjja, ‘kuntï Diosajj uñiski ukanak lurkasas Diosan amigopäsksnawa’ sasaw apostatanakajj sapjjäna. Jichhürunakanjja, waljaniw uka pachp amuyapjjaraki. Diosarojj creyipjjtwa sapkchisa, janiw kunjamtï Diosajj jucha lurañar uñjki ukham uñjapkiti, yamas chacha warmi ikthapiñ toqet Diosajj kamsisa uk janiw istʼañ munapkiti. Kunanakatï Jehová Diosatak qʼañu juchäki ukanakjja, ‘maynejj muñchi ukhajj luraskaspawa, ukajj sapa maynitäjjewa, janiw juchäkiti’ sasaw jaqenakajj sapjje. w20.07 pág. 22 párrs. 7, 8

¿Kullakanakat jan wal parlapki ukhajj arjjattanti? Congregacionansa mä kullakat jan wal parlapkaspa ukham sañäni, jupan esposopajj janiw Testigökiti, walja kutiw tantachäwinakarus qheptʼat puri, tukuyjjepansti jankʼakiw sarjjaraki, wawanakaparus awisakiw tantachäwir irparaki. Uk uñjasajja, ‘kunatsa Testigjamajj esposopampi jan respetayaski’ sasaw jupat jan wal parlapjje. Ukampis kullakajj qhawqtï puedki ukarjamaw chʼamachasiski. Jupajj janiw kuna horaruy mistuñ munchi jan ukajj puriñ munchi ukarjam sarnaqkaspati, ni wawanakaparus munañaparjamak apnaqkaspati. ¿Kunjamsa kullakar arjjatsna? Kullakan chʼamachasitapat felicitañasawa, mayninakarus kuntï luraski ukajj walikïskatapwa amuytʼayañasa, ukhamat jan jukʼamp jupat jan wal parljjapjjañapataki. Jilïr irpirinakajja, kunjamsa Jehová Diosajj kullakanakar uñjasiñap muni uk yatipjjewa (Sant. 1:27). Ukatwa Jesusjam amuytʼirïpjjatap uñachtʼayapjje, janiw kunatï jan phoqañjamäki ukanak mayipkiti (Mat. 15:22-28). Jupanakajj kullakanakar yanaptʼañatak chʼamachasipjje ukhajja, kullakanakajj jupanakat llakisipjjatap amuyapjjewa. w20.09 págs. 24, 25 párrs. 17-19

Danielajj humilde chuymani jaqënwa, Jehová Diosan yanaptʼapsa thaqapunirïnwa. Amuytʼañataki, Diosan yanaptʼapampi Nabucodonosor reyin samkap qhanañchkäna ukhajja, janiw jupa pachpajj jachʼañchaskänti, antisas humilde chuymampiw Jehová Diosar jachʼañchäna (Dan. 2:26-28). ¿Kunsa ukat yateqsna? Jiwasan mä discursosatï jilat kullakanakar wal gustani jan ukajj predicacionan suma experiencianakanïñäni ukhajja, Jehová Diosaruw jachʼañchañasa. Janitï Jupajj yanaptʼkistaspajja, janipuniw taqe ukanak lurksnati, uk amuyasakiw humilde chuymanïtas uñachtʼayañäni (Filip. 4:13). Ukham amuyasajja, Jesusat yateqasitaswa uñachtʼayaskaraktanjja. Jupajj Jehová Diosarupuniw confiyasirïna (Juan 5:19, 30). Janipuniw Awkip lanti saytʼañ amtkänti. Filipenses 2:6 textojj Jesusat akham siwa: “Janiw Dios lanti saytʼañajj amuyupan utjkänti, mä arunjja janiw Diosjam tukuñ munkänti” sasa. Jesusajj kunanak lurañatakikis derechonïna uk sumwa yatïna, ukatwa Awkipan autoridadap respetäna. w20.08 pág. 11 párrs. 12, 13

Wiñay jakañar apki uka thakin tʼijurinakat yaqhepajja usutäpjjewa, jiwasajj janiw uka usup uñjktanti, ni kunjamasa uksa yatkaraktanti. Jiwasatï jan walinakan uñjasitasat Jehová Diosar jukʼamp serviñ jan puedkstan, jan ukajj kunjamäsktansa uk yaqhanakajj janis amuyapkaspa ukham amuyasstan ukhajja, Mefibóset chachan sarnaqäwipaw chʼamañchtʼistaspa (2 Sam. 4:4). David reyejj jan walinakwa Mefibóset chachat amuyäna, janiw cheqapar uñjkarakïnti, janiw ukakïkänti, Mefibosetajj kayut usutarakïnwa, taqe ukanakwa aguantañapäna. Ukhampachasa janiw colerkänti, antisas kuna sumanakatï jupar paskäna ukanak wali valoranitwa uñjäna. Davidajj kunja munasiñampis nayrajj jupar uñjäna ukat wal yuspärarakïna (2 Sam. 9:6-10). Ukatsti Davidajj jan cheqapar uñjkäna ukhajja, kuna jan walinakas pasaskäna uk taqpachwa Mefibosetajj amuytʼäna. Davidan ukham pantjasitapat janiw colerkänti, janirakiw kuntï Davidajj lurkäna ukatsa Jehová Diosar juchañchkänti. Jan ukasti Jehová Diosan uttʼayat reyirojj taqe chuymaw yanaptʼäna (2 Sam. 16:1-4; 19:24-30). Jehová Diosajja, Mefibosetat yateqasiñasatakiw sarnaqäwip Bibliar qellqayäna (Rom. 15:4). w20.04 pág. 26 párr. 3; pág. 30 párrs. 18, 19

Inas congregacionasan misioneronaka, precursor especialanaka jan ukajj precursor regularanakajj utjchi. Jupanakajj sapüruw predicapjje, Bibliatsa yatichapjjaraki. Uka jilat kullakanakajj janis walja utjirinïpkchejja, Jehová Diosajj walja bendicionanakwa jupanakar churi (Mar. 10:29, 30). Congregacionan ukham jilat kullakanak utjatapat walpun Jehová Diosar yuspärtanjja. ¿Espíritu santomp uttʼayat jilatanakampi, precursoranakampi ukhamarak misioneronakampikit congregacionan wali valoranïpjje? Janiwa. Sapa publicadoraw Jehová Diosatakisa congregacionatakis wali valoranïtanjja (Rom. 10:15; 1 Cor. 3:6-8). ¿Kunatsa ukham sistanjja? Cheqas congregacionatakejja, jaqenakar Jesusan discipulopar tukuyañaw wali importantejja (Mat. 28:19, 20; 1 Tim. 2:4). Bautisat publicadoranakasa jan bautisat publicadoranakasa, taqeniw jaqenakar yatichañatak chʼamachastanjja, ukatwa taqenis Diosatak wali valoranïtanjja (Mat. 24:14). w20.08 pág. 21 párrs. 7, 8

Kunjamtï jichhürutak ajllita texton siskejja, jan walinakan uñjaskañäni ukhajj Jesusaw yanaptʼistani. Cheqas arunakapajj wal chʼamañchistu. ¿Kunatsa? Awisajj jan walinak aguantañajj chʼamakiwa. Sañäni, familiasat maynejj jiwjje jan ukajj mä amigosas jiwjje ukhajja, janiw mä qhawqha urunakakejj llakisktanti, jan ukasti awisajj walja maranakaw llakistanjja. Yaqhepanakajj edadanëjjapjjatap laykuw kunayman jan walinakan uñjasipjjaraki. Yaqhepasti llakimpiw aynachtʼapjjaraki. Ukampis Jesusajj ‘sapüruw’ jiwasampïski, sinti jan walinakansa uñjaskchiñänejja, aguantaskakiñäniwa (Mat. 11:28-30). Jehová Diosajj angelanakap toqew yanaptʼistu sasaw Diosan Arupan sarakistu (Heb. 1:7, 14). Sañäni, kunapachatï ‘Reinon suma yatiyäwinakap taqe markankirinakaru, tribunkirinakaru, kunayman parlani jaqenakaru’ predicktan ukhajja, angelanakaw yanaptʼistu, irparakistu (Mat. 24:13, 14; Apoc. 14:6). w20.11 págs. 13, 14 párrs. 6, 7

Yateqerejj kuntï yateqaski ukajj Diosan Arupat jutatap amuyaspa, ukwa muntanjja (1 Tes. 2:13). Ukatakejj ¿kunsa lurañasa? Kuntï yateqki uk arsuñapatakiw chʼamañchtʼañasa. Jiwasaki textonak qhanañchañat sipansa, juparuw mä qhawqha textonak qhanañchañapatak mayiñasa. Biblian yatichäwinakaparjam kunjamsa sarnaqaspa uk jupa pachpa amuytʼasiñapatakiw yanaptʼañasaraki. Kawkïr textonaktï liytʼki ukanakat kunsa amuyi uk yatiñatakejja, yaqha jisktʼanakampiw jisktʼañasa (Luc. 10:25-28). Akham sasaw jisktʼsna: “¿Aka textorjamajj Diosajj kunjam Diosaw sasmasa?”, “¿kunjamsa aka cheqa yatichäwejj yanaptʼiristam?”, “¿kuntï yateqkta ukajj kunjamakis jumatakejja?” sasa. Walj yateqañat sipansa, kuntï yateqki ukaruw wali valoranit uñjañapa, ukarjamaw sarnaqañaparaki, ukaw jukʼamp wakiskirejja. Bibliampipuniw yatichañasa, suma yatichirïñasatakejj humildëñasarakiwa. w20.10 pág. 15 párrs. 5, 6

Predicañajj tiempoparuw tukuyjjani. Noé chachan urunakapat amtañäni. Uka tiemponjja, Jehová Diosajj taqe kunsa horasapar lurirïtapwa uñachtʼayäna. Mä 120 maranak faltkipanwa, kunapachas Uma Juiciojj jutani uk amtjjäna. Walja maranak qhepatjja, arca lurañapatakiw Diosajj Noé chachar mayïna. Noé chachajj mä 40 jan ukajj 50 maranakaw jan samartʼas trabajïna. Jaqenakajj janis istʼañ munapkchïnjja, arcar mantañ horasäjjewa sasin Diosajj siskäna ukhakam yatiyaskakïnwa. Jehová Diosajj tiempoparuw ‘arcan punkupjja jistʼantjjäna’ (Gén. 6:3; 7:1, 2, 16). Niyaw Diosajj ‘predicacionajj tukusjjewa’ sasin sistani. Supayan apnaqat akapacharus niyaw tukj-jjarakini. Cheqapar sarnaqer jaqenakakiw aka oraqen jakjjapjjani. Uka uru puriniñapkamajja, Noé chachata ukhamarak amparanakap jan samarayas Diosar servipkäna ukanakat yateqasipjjañäni. Ukhamajj predicación nayrar uchapjjañäni, paciencianïpjjañäni, Jehová Diosampir promesanakapampir confiyapjjarakiñäni. w20.09 pág. 13 párrs. 18, 19

Khitis pʼeqtʼañapa ukajj jan yatiskaspa ukhajja, Diosan familiapan chʼajjwañaw utjaspa, janiw khitis kusisit jakasjjaspati. Sañäni, kun lurañatakis khitirus istʼañäni ukajj janiw yatisjjaspati, ni khitis lurañapa uksa yatjjsnati. Ukatwa Diosajj munasirïtapat chachanakar familian pʼeqtʼañapatak uttʼayawayi. Ukhamajja, ¿kunatsa walja warminakajj esposopan tʼaqesiyata uñjasipjje? Kunattejj yaqhep chachanakajja, Jehová Diosajj familiatak leyinak churki ukar janiw istʼapkiti, jan ukasti markapan costumbrenakaparjamakiw esposanakapar uñjapjje, jan ukajj askip thaqasakiw ukham tʼaqesiyapjje. Sañäni, yaqhepajja wali importantet uñjayasiñataki, “chachätwa” sañatakikiw esposapar munañaparjam apnaqapjje. Inas akham amuyapjjchi: ‘Janiw nayar munañapatak obligkiristti, ukampis ajjsarayasaw nayar respetayasirista’ sasa. Yaqhepajja ukham ajjsarayasaw munañaparjam esposanakapar apnaqapjje. Ukham amuyir chachanakajja, janiw kunjamtï warminakar respetompi uñjasiñapäki ukham uñjapkiti, janirakiw kunjamtï Jehová Diosajj munki ukhamäkiti (Efes. 5:25, 28). w21.02 pág. 3 párrs. 6, 7

Problemanakasajj wal llakisiyistani ukhajja, Jehová Diosaruw oracionan yanaptʼa mayisiñasa, ukaw sumak jikjjatasiñatak yanaptʼistani. Oracionasar istʼasajja, ‘Jehová Diosaw sumankañap churistani, uka sumankañapasti jaqenakajj kuntï amuyki ukat sipansa jukʼampiwa’ (Filip. 4:6, 7). Jehová Diosajj wali chʼamani espíritu santopampiw jan sint llakisiñatak yanaptʼistani (Gál. 5:22). Jehová Diosar oracionan mayiskasajja, kunas llakisiyistu, kunjamas jikjjatastan taqe ukanakwa yatiyañasa. Kuna jan walintï uñjasktan ukatï askichañjamäskchi ukhajja, kunjamsa uk askichsna, ukarjamas luraraksna ukatakiw Diosar yatiña ukat chʼama mayiñasa. Jan askichañjamäkchi ukhajja, jan ukat sinti llakisiñatakiw yanaptʼa mayisiñasaraki. Kunas llakisiyistu uk qhan mayisiñäni ukhajja, kunjamsa Jehová Diosajj mayisitasar istʼistu uk tiempompejj amuyañäniwa. Jan jankʼak istʼkistani ukhajja, orasiskakiñasawa. Diosajj jan qarjtasa qhan mayisiñaswa muni (Luc. 11:8-10). w21.01 pág. 3 párrs. 6, 7

Congregacionasanjja janiw casado jilat kullakanakakisa ni wawanakani jilat kullakanakakisa utjkiti, jan ukasti walja solter jilat kullakanakaw utjaraki. ¿Kunjamsa jupanakar uñjañasa? Jesusajj kunsa solteröñ toqet amuyäna uk amtañäni. Jesusatakejj Diosan munañap lurañaw nayrankäna, ukatwa jan casaraskänti. Janirakiw casarasipjjañamawa jan ukajj solteröpjjañamawa sasajj sirïkänti. Ukampis yaqhep cristianonakajj solteröñwa amtapjjani sasaw säna (Mat. 19:12). Jesusajj solteröpkäna ukanakarojj respetompiw uñjäna, janiw casadonakat menosäpkaspas jan ukajj kunas jupanakar faltkaspa ukham uñjirïkänti. Apóstol Pablojj Diosar sirvkäna ukhajja Jesusjam solterorakïnwa. Pablojj casarasiñajj janis walïkaspa ukham janiw yatichkänti. Sapa mayniw casarasiñsa solteröñsa amtañapa sasaw säna. w20.08 pág. 28 párrs. 7, 8

Apóstol Juanajj walja maranakaw jakäna, suma experiencianakanirakïnwa. Jupajj kunayman jan walinakanwa uñjasïna, ukajj Diosar serviñan aynachtʼayaspänwa, ukampis Jesusan mandamientonakaparjam lurañatakejj wal chʼamachasïna. Uka mandamientonakat mayajja, jilat kullakanakar munasiñänwa. Ukatwa Juanajj Jehová Diosampi Jesusampejj munasipjjetuwa, jan waltʼäwinakansa yanaptʼapjjapunitaniwa sasin jan pächaskänti (Juan 14:15-17; 15:9, 10). Janiw Supayasa ni jupan apnaqat akapachas Juanarojj jilat kullakanakapar arunakapampi luratanakapampi munasiñ uñachtʼayañapatakejj jarkʼkänti. Jiwasajja, apóstol Juanjamarakiw Supayan apnaqata jan wali pachan jaktanjja, akapachajj uñisiñampi phoqantatawa (1 Juan 3:1, 10). Supayajj jilat kullakanakasar uñissna ukwa muni, jan jupar dejkañäni ukhajj janiw puedkaniti. Ukhamajja, jilat kullakanakasar arunakasampi luratanakasampi munasitas uñachtʼayapjjapuniñäni. Ukham lurañäni ukhajja, Jehová Diosan markap taypinkatasat wali kusisitäñäniwa, janirakiw kunats arrepentiskañäniti (1 Juan 4:7). w21.01 pág. 13 párrs. 18, 19

Supayan apnaqat akapachan jakañajj chʼamakiwa, ukatwa awisajj jan kuns lurañ puedjjsnati (2 Tim. 3:1). Ukampis janiw llakisiñasäkiti ni ajjsarañasäkisa. Kuna jan walinakansa uñjastan uk Jehová Diosajj sum yatiski. Yanaptʼa munkañäni ukhajja, Jupaw atipjiri kupi amparapamp katjjäsistani (Is. 41:10, 13). Jehová Diosajj yanaptʼapunistaniwa, Bibliajj kunayman problemanakar saykatañatakiw chʼam churarakistani. Videonaka, Bibliat liytʼat dramanaka, Jupanakjam iyawsäwinïpjjañäni siski uka librorakiw Biblian qellqatäki uka sarnaqäwinak jukʼamp sum amuytʼañatak yanaptʼistu. Ukanak janïr uñtkasa, janïr istʼkasa, jan ukajj janïr liytʼkasajja, Diosaruw kuna yatichäwinakas yanaptʼistaspa uk jikjjatañatak oracionan mayisiñasa. Ukatjja, Diosan uka serviripäksnas ukhamwa amuytʼañasa. Kunsa luräna, kunjamsa Diosajj problemanakapar saykatañatak yanaptʼäna ukwa lupʼiñasaraki. Ukjjarojja, kuntï yateqtan ukarjamaw lurarakiñasa. Jiwasar yanaptʼatapat Jehová Diosaruw yuspärañasaraki. Mayninakar chʼamañchtʼasa yanaptʼasaw Jupar yuspäratas uñachtʼaysna. w21.03 pág. 19 párrs. 22, 23

Chacha warminaka, jumanakatï wawanïñ munapjjsta ukhajja, akhamwa jisktʼasipjjañama: “¿Jiwasajj José chachjama María warmjama humilde chuymanïtanti, jupanakjam Dios chuymätanti, Jehová Diosajj mä wawar uywañatak confiyistaspati?” sasa (Sal. 127:4). Maysa toqetjja, jumatï wawanëjjsta ukhajja, akhamwa jisktʼasiñamaraki: “¿Wawanakajar chʼama tukuña trabajojj kunjamasa uk yatichaskti?” (Ecl. 3:12, 13). “¿Akapachan utjki uka jan walinakat wawanakajar jarkʼaqañatakejj chʼamachasiskti?” sasa (Prov. 22:3). Cheqas janiw taqe jan walinakat jarkʼaqañ puedksnati. Ukampis jan walinakar saykatapjjañapatakejja, Biblian yatichäwinakapar confiyañwa munasiñamp yatichañasa (Prov. 2:1-6). Sañäni, mä familiarasatï Diosat jitheqtjjani ukhajja, kunatsa Jehová Diosat jan jitheqtañasäki ukwa Bibliamp wawanakar yatichañasa (Sal. 31:23). Jan ukajj mä munat familiarasasa jan ukajj amigosasa jiwani ukhajja, kawkïr textonakas jan sint llakisiñatak yanaptʼaspa ukwa uñachtʼayañasa (2 Cor. 1:3, 4; 2 Tim. 3:16). w20.10 pág. 27 párr. 7