Noviembre

Jonás chachat jan sum yatisajja, inas akham amuysna: ‘Jan confiykaña, jan istʼasiri jaqënwa’ sasa. Jehová Diosajja, juchañchir arunak Nínive markar yatiyañapwa Jonasar mayïna. Ukampis kasusiñat sipansa mä barcor sarjjatasaw maysar sarjjäna, Diosat ‘jayaruw jaltjjäna’ (Jon. 1:1-3). Uk uñjasajja, inas jiwasajj asignacionap phoqañapatak jan mayamp mayjjchisänti. Ukampis Jehová Diosajj janiw ukham lurkänti (Jon. 3:1, 2). Jonasajj chawlla manqhat Jehová Diosar oraskäna ukajja, kunjam chuymanïnsa uk yatiñatakiw yanaptʼistu (Jon. 2:1, 2, 9). Jonasajj walja kutiw Jehová Diosar orasïna. Chawlla manqhat oraskasajj kuntï siskäna ukajja, suma jaqëtapwa amuyayistu. Diosajj maykäna uk jan phoqañatakejj maysarus escapkchïnjja, oracionapajj humilde chuymanïtapa, yuspärasirïtapa, Diosar istʼañ wal munatapwa uñachtʼayistu. Ukatwa Jehová Diosajj Jonasan luratapak uñjañat sipansa kunjam chuymanïnsa uk uñjäna, profetäskakiñapatakis yaqha luräwinak churaskakïna. Jilïr irpirinakajja mayniru janïr ewjjtʼkasajja nayraqat ‘sumwa istʼapjjañapa’, ukham lurapjjañapajj wali wakiskiriwa. w20.04 pág. 15 párrs. 4-6

Nayrïr cristianonakajj cheqa yatichäwinakar creyipjjänwa, Diosan Arup amuyañatakis espíritu santon yanaptʼapwa thaqapjjäna. Yateqapkäna ukajj Qellqatanakarjamäskiti janicha uk yatiñatakejj jupanakpachpaw yatjjatapjjäna (Hech. 17:11, 12; Heb. 5:14). Janiw Diosan markapan munasiña utjatapatak Diosar confiyapkänti, janirakiw jilat kullakanakampi sum apasipjjatap laykukis Diosar servipkänti. Antisasa, ‘Diosar sum uñtʼapjjatapatwa’ confiyapjjäna (Col. 1:9, 10). Biblian cheqa yatichäwinakapajj janipuniw mayjtʼkaspati (Sal. 119:160). Sañäni, mä jilatajj chuyma ustʼayistu jan ukajj mä jachʼa juchar purtʼasi ukhajja, uka yatichäwinakajj janiw mayjtʼkiti. Janirakiw jan waltʼäwin uñjasktan ukhas mayjtʼkiti. Ukhamasti Biblian yatichäwinakap sum uñtʼañasawa, cheqätapatsa janirakiw pächasiñasäkiti. Kunjamtï jachʼa thayanak sartipan anclajj barcor katjjäskejja, ukhamarakiw Biblian yatichäwinakapar confiyañajj jan waltʼäwinakan katjjäsistani. w20.07 pág. 9 párrs. 6, 7

Kunapachatï ajllit cristianonakar yanaptʼtan ukhajja, Jesusajj juparus yanaptʼksna ukhamwa uñji (Mat. 25:34-40). Taqe chuyma yatichasaw jupanakar jukʼamp yanaptʼtanjja, Jesusaw ukham lurañas mayïna (Mat. 28:19, 20). Oraqpachan predicasiñapatakiw ajllit cristianonakajj wal chʼamachasipjje, uk phoqañatakejj ‘yaqha ovejanakan’ yanaptʼapaw munasi (Juan 10:16). Jiwasatï yaqha ovejanak taypinkstanjja, predicasajj ajllit cristianonakampiru Jesusampiru munasitaswa uñachtʼayasktanjja. Oraqpachan predicasiñapatak qollqemp yanaptʼasarakiw Jehová Diosampin Jesusampin amigopar tuktanjja (Luc. 16:9). Sañäni, obra mundial ukar qollqe donasaw yanaptʼsna. Uka qollqet mä partejja jan waltʼäwinakan uñjasipki uka jilat kullakanakar yanaptʼañatakiw aptasi. Congregacionan kuna gastonakatï utjki ukaruw qollqemp yanaptʼaraksna, yanaptʼa munapki uka jilat kullakanakarus yanaptʼaraksnawa (Prov. 19:17, TNM). w20.04 pág. 24 párrs. 12, 13

Uka texton qellqata profeciarjamajja, uka reyejj janiw ‘nayra awkinakapan Diosaparojj’ respeto uñachtʼaykänti. ¿Kunjamatsa uk luräna? Unión Sovieticajj religionanak qʼal chhaqtayañwa munäna. Ukatwa mä ley apsüna, uka leyirjamaw ‘Diosajj janiw utjkiti’ sasin escuelanakan yatichjjapjjäna. Unión Sovieticajja, ¿kunjamsa ‘chʼam churir satäki uka diosar’ jachʼañchäna? Ejercitop jukʼamp chʼamanir tukuyañatakisa armas nucleares ukanak lurayañatakis walja qollqwa gastäna, ukhamat wali chʼamanïñataki. Tiempompejja, norte toqenkir reyisa sur toqenkir reyisa walja millón jaqenak jiwarayañatakejj walja armamentonakanëjjapjjänwa. Norte toqenkir reyimpi sur toqenkir reyimpejja, mayachtʼasisaw ‘taqe kun tukjir mä ajjtaskañ’ uñstayapjjäna (Dan. 11:31, TNM). Uka ‘ajjtaskañajja’ Organización de las Naciones Unidas ukawa. w20.05 págs. 6, 7 párrs. 16, 17

¿Khitinakas Jehová Diosan markapat jitheqtatanakar thaqañ yanaptʼapjjaspa? Familiaranakapasa, jilïr irpirinakasa, precursoranakasa, yaqha jilat kullakanakasa taqeniw yanaptʼsna. ¿Diosan markapat jitheqtata mä amigosa, jan ukajj mä familiarasa utjistuti? ¿Carritompi predickasasa, utat uta predickasasa Jehová Diosan markapat mä jitheqtatampi jikisisajj kunsa lurañasa? ‘Visittʼatäñ munsta ukhajja, kawkjansa jakasta, celular numeromajj kawkïrisa ukanak jilïr irpirinakaruw yatiyapjjerista’ sasaw sañasa. Tomás sat mä jilïr irpirejj akham siwa: “Nayraqatjja, kawkjansa Jehová Diosan markapat jitheqtatanakajj jakapjjaspa uk yatiñatakejj jilat kullakanakaruw jisktʼta. Jan ukajja, ‘¿congregacionar jan jutjje uka jilatarusa jan ukajj kullakarusa uñtʼtati?’ sasaw jilat kullakanakar jisktʼirïta. Jehová Diosan markapat jitheqtatanakar visitta ukhajja, wawanakapata jan ukajj familiapatwa jisktʼta. Jupanakat yaqhepajja, nayrajj wawanakaparojj tantachäwinakar irpapjjerïpachänwa, inas wawanakapajj publicadoräpjjchïna. Jupanakarojj ukhamarakiw kuttʼanipjjañapatak yanaptʼsna” sasa. w20.06 pág. 24 párr. 1; pág. 25 párrs. 6, 7

Animalanakat sipansa jaqenakakiw kunanakatï pasawaykistu ukanakat amuytʼasisajj sum sarnaqañ yateqsna. Nayra luratanakasat amtañasa ukanakat lupʼiñasa sum sarnaqañatakiw yanaptʼistu, nayrjam jan amuyjjañatakiw yanaptʼarakistu (1 Cor. 6:9-11; Col. 3:9, 10). Cheqas kunatï walïki jan walïkaraki uk amuyañjja, concienciasar yatichsnawa (Heb. 5:14). Ukatsti mayninakar munasiñampi, sinttʼasiñampi, khuyaptʼayasiñampi uñjañ yateqaraksnawa, cheqapar uñjirïñsa Jehová Diosatwa yateqassna. Amtañ pueditasat yuspärañatakejja, qhawqha kutsa Jehová Diosajj yanaptʼistu, kunjamsa chuymachtʼistu ukanak amtañatakiw chʼamachasiñasa. Ukham lurañajja, Jehová Diosaw jutïrin yanaptʼaskakitani sasin jukʼamp confiyañatakiw yanaptʼistani (Sal. 77:12; 78:4, 7). ¿Kunjamatsa yuspäraraksna? Mayninakajj kunanaktï jiwas layku lurapki ukanakwa amtañasa, ukanakatsa jupanakar yuspärañasarakiwa. Khitinakatï yuspärasirïpki ukanakaw jilapartejj jukʼamp kusisit jakasipjje sasaw yatjjatatanakajj sapjje. w20.05 págs. 23, 24 párrs. 12, 13

Moisesajj Horeb qollun mä jachʼa qala pʼiyankkäna ukhajja, Jehová Diosan kʼajkir qhanap pasirwa uñjäna, kunjamas uk uñjasajj jikjjataspachäna uk amuytʼañäni. Perspicacia para comprender las Escrituras sat librojja uka toqet akham siwa: ‘Jesusajj janïr oraqer jutkäna ukhakamajja, kuntï Moisesajj uñjkäna uka pachpjja janiw khitis uñjkpachänti’ sasa. Moisesajj aka arunakwa istʼäna: “¡[Jehová] Dios Tatitusti, wiñay jakiriwa, ukhamarak khuyapayasiriraki. Janiw jankʼaki colerasirïkiti, jan ukasti jachʼa munasiriwa, ukhamarak cheqaraki! Waranqa wawanakaman wawanakapatakisa pachpa cheqa aski munasirikïskaniwa, ukhamarak perdonarakiwa jan wali luratanaksa, jan wali amtäwinaksa, taqe juchanaksa” sasa. Uka arunakjja, Diosajj mä ángel toqew sispachäna (Éx. 33:17-23; 34:5-7). Jichhürutak ajllita texton Moisesajj Diosan sutip arskäna ukhajja, kunatï paskäna ukwa amtpachäna. Diosan sutipat pienstan ukhajja, kunjam Diosasa ukwa amuytʼañasa. Sañäni, Diosajj wali chʼamani, yatiñani, cheqapar uñjiri, munasiri ukhamawa. Ukanakat amuytʼañajja, Jupar jukʼamp respetañatakiw yanaptʼistani (Sal. 77:11-15). w20.06 págs. 8, 9 párrs. 3, 4

Jesusajja, jumanakatï wali munasirïpjjätajja, taqeniw nayan discipulonakajäpjjatam yatipjjani sasaw säna (Juan 13:34, 35). Ukampis Diosar wal confiyañatakejja, janiw aleq munasirïñasakïkiti. Janiw cristianonakajj kunja munasirïpjjesa uk uñjasaki Diosar confiyañasäkiti. ¿Kunatsa? Amuytʼañataki, mä jilatasa mä jilïr irpirisa mä precursoras jachʼa juchar purtʼasispa, chuym ustʼayistaspa, Diosan markap conträjjaspa, janiw cheq yatichapkiti sasin sistaspa ukhajja, ¿kunsa lursna? ¿Aynachtʼsnati, Diosarus janit sirvjjsna? Diosar taqe chuyma confiyañatakejja, Jehová Diosar munasiñasawa, janiw kuntï mayninakajj lurapki ukarjamak Diosar confiyañasäkiti. Diosampiru jilat kullakanakampir munasiñajj Diosar confiyañatak yanaptʼistaspawa. Ukampis taqe chuyma confiyañatakejja, Bibliat sum yatjjatañasawa, kuntï yateqtan uksa amuytʼañasawa. Cheqas Diosat kunatï cheqäki ukjja Bibliaw yatichi, ukat jan pächasiñatakejj jiwaspachpaw yatjjatañasa (Rom. 12:2). w20.07 págs. 8, 9 párrs. 2, 3

Diosan markapar kuttʼaniñ munapki uka jilat kullakanakar jikjjatañatakejja, angelanakaw yanaptʼapjjestu, ukaw walja experiencianakan uñjasi (Apoc. 14:6). Ecuador markankiri Silvio jilatajja, markamar kuttʼañ yanaptʼita sasaw Jehová Diosar orasiskäna. Ukhamaruw pä jilïr irpirinakajj utapar puripjjäna. Ukat wakisitarjam yanaptʼañwa qalltapjjäna. Diosat jitheqtatanakarojj kuttʼanipjjañapatak yanaptʼasajja, wali kusisitäñäniwa. Salvador sat precursor jilatat parltʼañäni, jupajj Diosat jitheqtatanakar yanaptʼañatak wal chʼamachasi, jupajj akham siwa: “Awisajj congregacionar kuttʼanjjapjje ukhajj kusisiñat jachaqtʼastwa. Jehová Diosaw wali munat servirinakaparojj Supayan akapachapat mistunipjjañapatakejj yanaptʼaski, ukatsti congregacionaruw irpanjjaraki, ukan yanaptʼatajat wal kusista” sasa. Jumatï congregacionat jitheqtatästajja, Jehová Diosajj munasiskaktamwa, janiw ukat pächasiñamäkiti. Jehová Diosajj suyasktamwa, wali munasiñampiw katoqätam. w20.06 pág. 29 párrs. 16-18

Niyakejjay Jehová Diosajj ‘Yatichirisächejja’, jiwasan yateqasiñasatakejj ejemplonakwa Arupan qellqat jaytawayistu (Is. 30:21). Diosatakjam sarnaqer nayra jaqenakajj kunja suma chuymanïpjjänsa ukanakatwa lupʼiñasa. Yaqheparojj jan ukham suma chuymanïpjjatap laykojj kunas pasäna ukanakatsa lupʼiñasarakiwa (Sal. 37:37; 1 Cor. 10:11). Saúl reyir kunas pasäna uk amuytʼañäni. Waynäkäna ukhajja, wali humilde chuymanïnwa, taqet sipans wali menosäkaspas ukhamwa amuyasïna, ukatwa jupajj jachʼa privilegionak jan katoqasiñ munkänti (1 Sam. 9:21; 10:20-22). Ukampis, reyit uttʼayatäjjäna uka qhepatjja, jachʼa jachʼaw tukjjäna, kuntï jan lurañapäkäna ukwa lurjjarakïna. Mä urojja, Samuel profetaruw suyaskäna, ukampis pacienciapajj tukusjjänwa. Ukatwa jupa pachpajj Diosar sacrificio loqtäna, janiw uk lurañatak derechonïkänti. Ukatwa Jehová Diosajj jupar jan yanapjjänti, qhepatjja yaqharuw reyïñapatak ajllirakïna (1 Sam. 13:8-14). ¿Kunsa ukat yateqtanjja? Jan derechonïktan ukanakjja janiw lurañasäkiti. w20.08 pág. 10 párrs. 10, 11

Cheqas Jehová Diosaw Cristo toqejj congregacionar ‘jaqenakjja mä bendicionar uñtat churi’ (Efes. 4:8). Jupanakajja akïr jilatanakäpjjewa: Oraqpachan Jilïr Irpirinaka ukhamarak yanapirinakapa, Comités de Sucursal ukankirinaka, congregacionanak tumptʼir jilatanaka, Diosan markapan escuelanakajj utjki ukan yatichirinaka, jilïr irpirinaka, congregacionan yanapirinakapa. Uka jilatanakajj espíritu santomp uttʼayatäpjjewa, ukhamat jupanakajj Jehová Diosan munat ovejitanakapar cuidapjjañapataki ukhamarak chʼamañchtʼapjjañapataki (1 Ped. 5:2, 3). Congregacionan walja lurañanak phoqapjjañapatakiw espíritu santon yanaptʼapamp uka jilatanakar uttʼayasi. Kunjamtï amparanakasa, kayunakasa cuerpon yaqha partenakapas cuerpor yanaptʼkejja, ukhamarakiw uka jilatanakajj congregacionar kunayman lurañanakamp yanaptʼapjje. Jupanakajj janiw jachʼañchatäñ thaqapkiti, jan ukasti askinakap thaqañat sipansa jilat kullakanakatwa llakisipjje, jupanakar chʼamañchtʼañataki yanaptʼañatakiw wal chʼamachasipjjaraki (1 Tes. 2:6-8). Ukham jilatanak utjatapat walpun Jehová Diosar yuspärtanjja. w20.08 pág. 21 párrs. 5, 6

Jaqenakajj “qʼala usuchnoqata, ananukuta” ukhamäpjjewa, Reinon cheqa yatichäwinakap yatjjatapjjañapaw wakisiraki, ukatwa jupanakar predicañ wal muntanjja (Mat. 9:36). “Diosajj taqe kasta jaqenakan salvasipjjañapa ukhamarak kunatejj cheqäki uk sum uñtʼapjjañapwa mu[naraki]” (1 Tim. 2:4). Predicacionajj kunjamsa jaqenakar salvasiñatak yanaptʼi ukjjat lupʼiñaw predicañatak yanaptʼistani. Jiwasajj jaqenakan salvasipjjañapwa muntanjja (Rom. 10:13-15; 1 Tim. 4:16). Ukatakejja, herramientanakaw munasi, ukanak apnaqañsa sumwa yatiñasaraki. Jesusajja, kunjamsa jaqenakarojj predicapjjañapa uk sumwa discipulonakapar qhanañchäna. Kunsa apapjjañapa, kunjamsa, kawkjansa predicapjjañapa uksa qhanañcharakïnwa (Mat. 10:5-7; Luc. 10:1-11). Jichhürunakanjja, Diosan markapajj kit de enseñanza ukwa jaqenakar yatichañasatak churistu, ukanjja kunayman suma yanaptʼanakaw utji. Kunjamsa ukanakampejj yanaptʼayassna uksa Diosan markapajj yaticharakistuwa. Ukaw jan ajjsaras predicañatakisa, suma yatichirïñatakis yanaptʼistu (2 Tim. 2:15). w20.09 pág. 4 párrs. 6, 7, 10

Apóstol Juanajja khitinakarutï Diosat yatichkäna ukanakajj Diosar taqe chuyma servisipkakitap yatisajj wal kusisïna. Uka cristianonakajj walja jan walinakanwa uñjasipjjäna, ukatwa yanaptʼañatak chʼamachasïna, ukhamat Diosar jukʼamp confiyapjjañapataki. Jupanakarojj wawanakaparjamaw Juanajj uñjäna. Wawanakasasa jan ukajj Bibliat yatichktan ukanakasa bautisasipjje, Diosarus taqe chuyma servisipkaki ukhajja, ukhamarakiw wal kusistanjja (3 Juan 3). 98 maranjja Jehová Diosan espiritupaw kimsa cartanak qellqañapatak apóstol Juanar yanaptʼäna. Uka cartanakjja, Diosat jan jitheqtiri jilat kullakanakan Jesusar confiyasipkakiñapataki, cheqa yatichäwin sarnaqasipkakiñapatakiw Juanajj qellqäna. Apóstol Juanarojj kunjamsa apostatanakajj congregacionar engañjasipkäna ukaw wal llakisiyäna (1 Juan 2:18, 19, 26). Uka apostatanakajj Diosar uñtʼapjjtwa sapkchïnsa, janiw Diosan mandamientonakap phoqapkänti. w20.07 pág. 20 párrs. 1-3

Kuntï predicktan ukarojj taqe chuymaw confiytanjja, ukatwa taqe jaqenakan uk yatipjjañap muntanjja. ¿Kunatsa kuntï predicktan ukarojj taqe chuyma confiytanjja? Diosan promesanakapajj phoqasipuniwa (Sal. 119:42; Is. 40:8). Biblian qellqat yaqhep profecianakas ukhamarakiw jichhürunakan phoqasiski. Biblian yatichäwinakapajj walja jaqenakaruw cambiapjjañapatak yanaptʼaskaraki. Taqe ukanak uñjasaw kuntï predicktan ukarojj taqe chuyma confiytanjja. Ukatwa taqe jaqenakan Reinon suma yatiyäwinakap istʼapjjañap muntanjja. Jehová Diosar Jesusar confiyañaw jukʼamp predicañatak chʼamañchtʼarakistu, cheqas kuntï predicktan ukajj Jehová Diosatwa juti, Jesusarusti Diosaw Reinopan Reyipäñapatak uttʼayaraki. Jan walinakansa uñjaskchiñänejja, Diosaw jarkʼaqestani, chʼamsa churarakistani (Sal. 46:1-3). Ukatjja ak amtañasarakiwa, Jesusajj Jehová Diosatwa munañanïñsa chʼamsa katoqe, ukampiw predicación alajjpachat pʼeqtʼasinki (Mat. 28:18-20). Jehová Diosajj chʼamachasitasar bendisistaniwa, janiw ukat pächasktanti. w20.09 pág. 12 párrs. 15-17

Awisajja, yaqhep kullakanakajj jan waltʼañan uñjasipki ukhaw arjjatatäñsa yanaptʼatäñsa munapjje (Is. 1:17). Sañäni, mä viuda kullakasa jan ukajj divorciata mä kullakasa, kuntï esposopajj lurirïkäna uka lurañanakan yanaptʼatäñwa munaspa. Edadani mä kullakajja, doctorampi parlañatakiw yanaptʼa munarakispa. Yaqhep precursora kullakanakajja, Diosan markapanwa yaqhep proyectonakan yanaptʼapjje, ukatwa kunatsa mayni precursoranakjam jan predicapki sasin jupanakat jan wal parlapjjaspa, ukapachaw jupanakajj arjjatatäñ munapjjarakispa. Jesusat parltʼañäni, jupajj kullakanakat jan wal parlapjjäna ukhajja, jan pächasisaw jupanakar arjjatäna. Sañäni, Martajj Mariat jan wal parlkäna ukhajja, Jesusajj arjjatänwa (Luc. 10:38-42). Yaqha horasan Marian luratapat jan wal parlapkäna ukhajja, ukhamarakiw jupar arjjatäna (Mar. 14:3-9). Kunatsa Mariajj ukham luräna uk Jesusajj sumwa yatïna, ukatwa jupar chʼamañchtʼäna. Ukatjja, mä profecía arsurakïna, akham sasa: “Kawkjanakantï oraqpachan suma yatiyäwinakajj yatiyaskani uka cheqanakanjja, aka warmin luratapajj yatiyasirakiniwa” sasa. w20.09 pág. 24 párrs. 15, 16

Ovejanakajj chhaqapjjaspawa, mä suma awatirejj uk sum yati. Mä ovejajj chhaqki ukhajj janiw awatirejj ovejar castigkiti. Jehová Diosan servirinakapat yaqhepajja, janiw kuntï Diosajj maykäna uk lurapkänti, uk uñjasajj ¿kunsa Jehová Diosajj lurpachäna? Uk jichhajj yatjjatañäni. Jonás profetajja, asignacionap jan phoqañ laykojj escapjjänwa. Ukampis Jehová Diosajja, Jonasajj janis kun lurañatak walëjjaspa ukham janiw jankʼak amuykänti. Diosajj mä suma awatirjamaw Jonasar salväna, kuntï maykäna uk phoqañapatakis chʼam churarakïna (Jon. 2:7; 3:1, 2). Ukatsti, mä calabaza ali toqew jaqenakan vidapajj qhawqha valoranisa uk yatichäna (Jon. 4:10, 11). ¿Kunsa ukat yateqsna? Jilïr irpirinakajja, Jehová Diosan markapat jitheqtatanakarojj janiw janis Diosatak valoranëjjapjjaspa ukham uñjapjjañapäkiti. Antisas kunatsa Diosan markapat jitheqtjjapjje uk amuyañatakiw chʼamachasipjjañapa. Kuttʼanjjapjje ukhajja, munasiñamp uñjasipkakiñapawa, jupatsa llakisisipkakiñapawa. w20.06 págs. 20, 21 párrs. 10-12

Unión Soviética ukajj 1991 maranwa chhaqtjjäna, qhepatjja uka gobiernompi apnaqata markanakan jakiri Testigonakajj “mä jukʼa yanapwa” katoqapjjäna, mä arunjja librew Diosar sirvjjapjjäna. Unión Sovieticampi apnaqata markanakanjja, jilat kullakanakajj jan khitin jarkʼataw predikjjapjjäna, ukhamatwa mä jukʼa tiemponak walja waranqa jaqenakajj Diosar serviñ qalltapjjäna. Ukampis tiempompejja Rusia markampi jupar yanapiri markanakampiw norte toqenkir reyëjjapjje. Mä markajj norte toqenkir reyïñapataki jan ukajj sur toqenkir reyïñapatakejj aka kimsanakwa luri: 1) Diosan markaparuw uñisi, 2) luratanakapampiw Jehová Diosampiru markapampiru uñisitap uñachtʼayi, 3) jupanakkamaw atipasiñ munapjje. ¿Kunatsa Rusia markampi jupar yanapiri markanakampiw norte toqenkir reyejja sasin sistanjja? Jupanakajj walja waranqa jilat kullakanakaruw jan waltʼayañatak arknaqapjje, predicañsa jarkʼapjjaraki. Ukham lurasajj Jehová Diosampiru markapampiru uñisipjjatapwa uñachtʼayapjje. Ukatjja Gran Bretaña, Estados Unidos markanakaru, mä arunjja sur toqenkir reyir atipañatakiw wal chʼamachasipjjaraki. w20.05 pág. 12 párrs. 3, 4

Niyakejjay Jesusan discipulopar tukuyañatakejj suma yatichirïñasächejja, jukʼamp sum yatichañatakiw chʼamachasiñasa. Sapa semanaw Biblian cheqa yatichäwinakapjja, walja millón jaqenakar aka oraqpachan yatichtan. Taqeniruw Diosan arunakapat yatichañajj gustistu. Ukatwa uka toqet wal parlañ muntanjja. Yatiyañataki Revistat Yatjjatañataki sat wakichäwejj semana tukuyan apaski uk saraykasasa, jan ukajj Congregacionan Bibliat Yatjjatañataki sat wakichäwejj semanan apaski uk saraykasasa, janiw jilatajj sinti parlañapäkiti. Bibliat yateqeriru yatichkasajja, ukhamarakiw jan sinti parlañasäkiti. Antisas Bibliampipuniw yatichañasa. Ukhamajj yatichkasajja janiw sinti parlañasäkiti, janiw mä textotsa jan ukajj kuna yatichäwitsa taqpach qhanañchañajj wakiskapuniti (Juan 16:12). Jumajj bautisaskayäta ukhajj qhawqhaksa yatiyäta, jichhajj qhawqsa yatjjarakta uka toqetwa amuytʼañama. Ukapachajj mä jukʼakwa Bibliat yatpachayätajja (Heb. 6:1). Niyakejjay kuntï yatkta ukjja walja maranakat yateqstajja, janiw yateqerir jankʼak yateqañap mayiñamäkiti. w20.10 págs. 14, 15 párrs. 2-4

Jehová Diosajja, suma awk taykwa Jesusatakejj ajllïna (Mat. 1:18-23; Luc. 1:26-38). Mariajj Jehová Diosarojj taqe chuymaw munasïna, ukaw arunakapan qhan amuyasi (Luc. 1:46-55). Joseasti Jehová Diosar wal munasirakïna, kusisiyañwa munäna, ukatwa Diosar taqe kunan istʼirïna (Mat. 1:24). Jehová Diosajj janiw Jesusatakejj walja qollqeni awk tayk ajllkänti. Joseampi Mariampejj pobrëpjjänwa, Jesusajj naskäna uka qhepat sacrificio loqtapkäna ukanwa ukajj qhan uñjasïna (Luc. 2:24). Paqallqo wawanakats jukʼamp wawanakanïpjjatap laykojja, kunatï jakañatak wakiski ukampikiw jakasipjjpachäna (Mat. 13:55, 56). Jehová Diosajj mä qhawqha jan walinakat Jesusar jarkʼaqkchïnsa, yaqhanakatjja janiw jarkʼaqkänti (Mat. 2:13-15). Sañäni, qalltanjja Jesusan familiapat yaqhepajj janiw Mesiasätap creyipkänti, ukajj Jesusatakejj wali llakkañäpachänwa (Mar. 3:21; Juan 7:5). Ukatjja, uywiri José awkipajj jiwjjäna ukhajja, ukhamarakiw wal llakispachäna. w20.10 págs. 26, 27 párrs. 4-6

Mä jan walin uñjasisajj ¿jan yanaptʼirini sapak jikjjatasirïtati? Waljaniw ukham jikjjatasipjjerïna, Jehová Diosan servirinakapas ukhaman uñjasipjjarakirïnwa (1 Rey. 19:14). Ukhaman uñjasisajj Diosan arunakapatwa amtañasa. Jupajj akham sistuwa: “Nayajj janipuniw jaytanukkämati, janipuniw apanukkämasa” sasa. Ukhamajj jan ajjsarasaw akham sissna: “Jehová Diosaw yanapirijajja, janiw ajjsarkäti” sasa (Heb. 13:5, 6). Uka arunakjja, niya 61 maranwa apóstol Pablojj Judeankir cristianonakar qellqäna. Uka arunakajj kuntï Salmo 118:5-7 qellqatan siski ukwa amtayistu. Apóstol Pablojj salmistjamarakiw Jehová Diosarojj yanapiriparjam uñjäna, ¿kunatsa? Jehová Diosajj walja kutiw juparojj yanaptʼäna. Hebreonakar qellqkäna uka marat pä mara nayrajj kunas pasäna uka toqet parltʼañäni. Pablojj Roma markar viajkäna ukhajja, qotan kunayman jan walinakanwa uñjasïna (Hech. 27:4, 15, 20). Jehová Diosajj uka viajensa jan ukajj uka nayrasa kunaymanitwa yanaptʼäna. w20.11 pág. 12 párrs. 1, 2

‘Nayraw jichhat sipansa jukʼamp sum jakasiyäta’ sasin amuyañajj ¿kunatsa jan walïki? Awisajj kunatï sumäkäna ukanakakwa amtasjjsna. Amuytʼañatakejj israelitanakat parltʼañäni. Egipto markat qhespiyatäjjapjjäna uka qhepatjja, jankʼakiw kunjamsa Egipton tʼaqesipjjäna uk armasjjapjjäna. Antisas kuna sumanaktï uka markan manqʼapkäna ukanakakwa amtasipjjäna. Jupanakajj akham sapjjänwa: “Amtastanwa Egiptona inaki chawlla manqʼatasjja, ukhamarakiw manqʼarakïyätan pepinonaka, [sandianaka], puerronaka, cebollanaka, ajosanaka” sasa (Núm. 11:5). Ukampis ¿cheqapunit inaki jan ukajj gratisaki ukanak manqʼapjjäna? Janiwa. Israelitanakajj Egipton wal sufripjjäna, esclavöpjjarakïnwa (Éx. 1:13, 14; 3:6-9). Ukampis ukham sufripjjatap armasipjjänwa, jukʼampikiw ukanakar kuttʼañ munapjjäna. Kuntï Jehová Diosajj jupanak layku luraskäna ukanak piensañat sipansa, kuna sumanaktï Egipton katoqapkäna ukanakakwa piensasipkäna. Ukham lurapjjatapajj janiw Jehová Diosatakejj walïkänti (Núm. 11:10). w20.11 pág. 25 párrs. 5, 6

Jakäwisajj ‘mä qhawqha urunakatakikiwa, tʼaqesiñanakampi phoqantatarakiwa’, ukatwa awisajj llakissna (Job 14:1). Jehová Diosan walja nayra servirinakapajj ukham llakitäpjjarakïnwa. Yamas yaqhepajj jiwañwa munapjjäna (1 Rey. 19:2-4; Job 3:1-3, 11; 7:15, 16). Ukampis confiyapkäna uka Jehová Diosaw jupanakar chuymachtʼäna, chʼamañchtʼarakïna. Jiwasar chuymachtʼañataki yatichañatakejja, Diosajj Bibliaruw sarnaqäwinakap qellqayäna (Rom. 15:4). Jacobun José yoqapat parltʼañäni. Jupajj mä akatjamatwa awkipan wali munata wawapäkasajj Diosar jan uñtʼiri mä jaqen esclavopäjjäna (Gén. 37:3, 4, 21-28; 39:1). Ukat qhepatsti, Potifaran warmipajj ‘Joseajj abusañ munitu’ sasaw kʼarintarakïna. Potifarajja, ukajj cheqati janicha uk jan yatjjatasaw Josearojj carcelar llawintayäna, ukanjja cadenanakampiw ñachʼantapjjäna (Gén. 39:14-20; Sal. 105:17, 18). Ukhamanakan uñjasisajja, Joseajj wal llakispachäna. w20.12 págs. 16, 17 párrs. 1-4

Kunanakat orasiñas jukʼamp wakiskiri uka toqet parlkasajja, Jesusajj akham sänwa: “Sutimajj jachʼañchatäpan” sasa. ¿Uka arunakajj kamsañsa muni? Jachʼañchatäpan sasinjja, santot uñjatäpan, qʼomachatäpan, mä arunjja jan kuna qʼañunïpan sañwa munaski. Ukampis inas maynejj akham jisktʼaschispa: “Niyakejjay Diosan sutipajj santo, qʼoma, jan qʼañuni ukhamächejja, ¿kunatsa santot uñjatäñapajj wakisi?” sasa. Uka jisktʼar qhanañchañatakejja, mä sutejj kamsañsa muni ukwa amuytʼañasa. Mä sutejja janiw kunjamatï qellqaski kunjamatï arsuski ukakïkiti. Uka toqet Biblian akham siwa: “Walja qollqenïñata sipansa, jukʼamp askiwa suma jaqeta uñtʼatäñajja [jan ukajj mä suma sutinïñajja]” sasa (Prov. 22:1; Ecl. 7:1). ¿Kunatsa mä sutejj wali importantejja? Maynin sutipajja, jupajj kunjam jaqet uñtʼatasa ukwa uñachtʼayaraki, ukatwa sutejj wali importantejja. Sutisajj kunjam qellqañasa, kunjam arsuñasa ukajj janiw sinti importantëkiti, jan ukasti sutis istʼasasa uñjasas kunsa jaqenakajj jiwasat amuyapjje ukaw jukʼamp importantejja. Jehová Diosat kʼarinak parlapki ukhajja, jan wali Diosatwa jupar uñjayapjje, mä arunjja sutipwa qʼañuchapjje. w20.06 págs. 2, 3 párrs. 5-7

Walja problemanïsajj ukatakwa wal llakisjjsna. Sañäni, trabajat qollqesajj jan kunatak alcansipana, jan ukajj usutäsin jan trabajiñ pueditasatwa llakissna, jan ukajj trabajoswa aptʼassna ukatwa llakissna. ‘Diosan leyinakap pʼakintañatak yantʼat uñjasï ukhajj Diosat janit jitheqtkäjja’ sasaw llakisiraksna. ‘Supayan apnaqat jaqenakajj Diosan markapar jan waltʼaykani ukhajj kunsa lurañäni’ sasaw llakissna. ‘¿Ukanakat llakisiñajajj walikïskiti?’ sasin inas jisktʼasiraksna. Jesusajja, discipulonakaparojj ‘jan llakisipjjamti’ sänwa (Mat. 6:25). Ukampejj ¿janipuniw akchʼas llakisipjjañamäkiti sañti munäna? Janiwa. Jehová Diosan yaqhep nayra servirinakapajj wali llakitaw uñjasipjjäna, ukampis Jehová Diosajj jupanakar munasiskakïnwa (1 Rey. 19:4). Jan llakisipjjamti sasinjja, Jesusajj problemanakasat jan sinti llakisiñatakiw chʼamañchaskistäna. Wal llakissna ukhajja, inas Diosarojj jan sum sirvjjsnati. w21.01 pág. 3 párrs. 4, 5

Chachajj kunjamsa familiapar pʼeqtʼani ukatjja, Diosampiru Jesusampiruw cuenta churani (1 Ped. 3:7). Niyakejjay Jehová Diosajj taqpach familiapan pʼeqepächejja, kunjamsa wawanakapajj sarnaqapjjañapa uk sañatakisa phoqayañatakis derechoniwa (Is. 33:22-23). Jesusasti congregacionan pʼeqepjamajja, kunjamsa congregacionankirinakajj sarnaqapjjañapa uk sañatakisa phoqayañatakis derechonirakiwa (Gál. 6:2; Col. 1:18-20). Kunjamtï Jehová Diosampi Jesusampejj lurapkejja, ukhamarakiw familia pʼeqtʼirejj kunsa familiapajj lurañapa uk amtañatakejj derechoni (Rom. 7:2; Efes. 6:4). Ukampis janiw taqe autoridadanïkiti. Sañäni, kuntï familiapatak amtkani ukajj Bibliarjamäñapawa (Prov. 3:5, 6). Janiw ukakïkiti, familia pʼeqtʼirejj yaqha familianakajj kun lurapjjañapasa uk amtañatakejj janiw derechonïkiti (Rom. 14:4). Wawanakajj jilsjjasin utat sarjjapjje ukhajja, awkipar respetasipkakiwa ukampis kunsa jupanakajj lurapjjañapa, kunsa jan lurapjjañapäki uk sañatakejj janiw awkejj derechonëjjeti (Mat. 19:5). w21.02 págs. 2, 3 párrs. 3-5

Familia pʼeqtʼirinakajja, kunanakatï jakañatak munaski uk churasaw familiapar munasipjjatap uñachtʼayapjje. Ukampis Jehová Diosamp sum apasipjjañapatak familiapar yanaptʼañaw nayrankañapa, uk janipuniw armasipjjañapäkiti (Mat. 5:3). Jesusajj lawan chʼakkatatäkäna ukhasa, janiw María mamapat armaskänti, wal tʼaqeskasasa mamapar cuidañapatakejj apóstol Juanaruw encargäna (Juan 19:26, 27). Familia pʼeqtʼiri mä jilatajj walja wakiskir luräwinakanïspawa. Jupajj suma trabajtʼirïñapawa, ukhamatwa mayninakajj luratanakap uñjasin Jehová Diosar jachʼañchapjjani (Efes. 6:5, 6; Tito 2:9, 10). Congregacionan luräwinakanïchi ukhajja, jilat kullakanakaruw chʼamañchtʼañapa, cuidañapa, predicacionans wali yateqaskayäñapawa. Esposapampi wawanakapampis jan jaytasaw Bibliat yatjjatapjjañapa. Familiapan jan kuns faltañapataki, kusisitäpjjañapataki, Diosar servisipkakiñapatak yanaptʼani ukhajja, familiapajj wal jupar yuspärani (Efes. 5:28, 29; 6:4). w21.01 pág. 12 párrs. 15, 17

Bibliajja mä suma esposajj kunanaksa luraspa ukwa qhanañchi. Sañäni, utan lurañanak sum phoqasiñapatakiw uñjaspa, oraqenaksa alaspawa, aljarakispawa, ukatsti negocionaksa lurarakispawa (Prov. 31:15, 16, 18). Mä esposajja, kuntï jupajj amuyki uk sañatakejj derechoniwa, janiw mä esclaväkiti. Esposopajj jupar confiyiwa, kuntï siski uks istʼarakiwa (Prov. 31:11, 26). Mä chachatï ukham respetompi esposapar uñjani ukhajja, esposopar istʼañasa respetañas janiw kullakatak chʼamäkaniti. Jesusajj walja musparkañanaksa lurawaykchejja, Jehová Diosar respetasajj janiw jiskʼachatjam amuyaskiti (1 Cor. 15:28; Filip. 2:5, 6). Jesusat yateqasiri mä suma esposajj ukhamarakiw esposopan jupar pʼeqtʼatapatjja, janiw jiskʼachatjam amuyaskiti. Jupajja, esposopar munasitapatwa istʼi, jukʼampisa Jehová Diosar munasitapata, respetatapatwa istʼi. Ukampis mä kullakarutï jan cristiano esposopajj Jehová Diosan leyinakap pʼakintañap mayini ukhajja, kullakajj janiw jupar istʼjjaniti. w21.02 pág. 11 párrs. 14, 15; pág. 12 párr. 19

Jehová Diosan servirinakaparojja, Jupar munasiñaw arknaqat uñjaskasajj aguantañatak nayratpachas yanaptʼawayi. Sañäni, judionakan jachʼa tribunalapajj jan predicapjjañapatak apostolonakar jarkʼkäna ukhajja, Diosar munasiñaw ‘jaqenakar istʼañat sipansa Jupar istʼañatak’ yanaptʼäna (Hech. 5:29; 1 Juan 5:3). Gobiernonakampi arknaqat uñjasipki uka jilat kullakanakarojja, Jehová Diosar munasiñarakiw Jupat jan jitheqtañatak yanaptʼawayi. Akapachajj uñiskistu ukhajj janiw aynachtʼktanti, kusisitakïsktanwa (Hech. 5:41; Rom. 5:4, 5). Familiasajj Diosar serviñat jarkʼkistu ukhaw aguantañajj jukʼamp chʼamäspa. Diosar uñtʼañ munatas amuyapjje ukhajja, engañjayasksnasa, loqheksnasa ukhamwa piensapjjaspa (Marcos 3:21 uñjjattʼarakïta). Inas toqepjjchistaspa, nuwañ kun munapjjchistaspa. Ukampis janiw mayjtʼasiñasäkiti, “jaqen enemigopajj pachpa utapatwa sartani” sasaw Jesusajj säna (Mat. 10:36). w21.03 pág. 21 párrs. 6, 7

Maynitejj Diosan Arupat yatichañataki compañtʼañasatak mayistani ukhajja, yatichirimpi yateqerimpejj parlaski uk sumwa istʼañasa. Ukhamatwa wakiskani ukhajj jankʼak yanaptʼañäni. Ukampis amuyumpiw uk lurañasa, janiw jiwasak parlañasäkiti ni yatichirirus pantjasiyañasäkiti, janirakiw yaqha toqetsa parlañasäkiti. Ukhamajja, kuna toqettï yatjjatasipki uk sum amuyañapatakejj mä uñachtʼäwimpi jan ukajj mä jisktʼampiw mä jukʼa qhanañchtʼsna. Awisajj janis yanaptʼirjamäksna ukhamwa amuyassna. Ukampis Bibliat yateqerir felicittʼañäni, jupan amigopäñatakis chʼamachasiñäni ukhajja, nayrar sartañapatakejj yanaptʼañäniwa. Wakischi ukhajja, kunjamsa Jehová Diosar uñtʼawaytan, mä jan waltʼäwirus atipjawaytan, kunjamsa Diosajj yanaptʼawayistu ukanakatwa yateqerir mä jukʼa cuenttʼaraksna (Sal. 78:4, 7). Inas ukpun istʼañ munaskchïna. Ukhamajja, experienciasajj Diosar jukʼamp confiyañapataki, bautisasiñapatakiw yanaptʼaspa. w21.03 pág. 10 párrs. 9, 10

Bibliat yatjjatañ maynir yanaptʼtan ukhajja, ¿khitis jachʼañchatäñapa? Corinto markankir congregacionat qellqkäna ukhaw apóstol Pablojj uka jisktʼar qhanañchäna, akham sasa: “Nayaw ayruntayäta [jan ukajj mallkiyäta], Apolosasti umampiw warjjatarakïna, ukhamarus Diosaw jiltayaskäna. Ukhamajj janiw ayruntirisa ni umamp warjjatiris jachʼañchatäñapäkiti, jan ukasti jiltayki uka Diosaw jachʼañchatäñapa” sasa (1 Cor. 3:6, 7). Bibliat yatjjatañ maynir yanaptʼasajja, Pabljamarakiw Jehová Diosar jachʼañchañasa. Predicacionanjja Jehová Diosampi Jesusampi angelanakampi chikaw trabajtanjja, ¿kunjamsa ukarojj wali valoranit uñjsna? (2 Cor. 6:1). Suma yatiyäwinak taqe jaqenakar yatiyañatak chʼamachasisaw wali valoranit uñjtanjja. Janiw aleqakejj Diosan arunakap satañasäkiti, jan ukasti umampiw warjjatañasaraki. Mä jaqetï Bibliat yatjjatañ munchi ukhajja, yatjjatañapatak yanaptʼañasawa. Kunapachatï Bibliat mä yateqerejj Jesusan discipulopäñatak chʼamachasiski, amuyupsa chuymapsa Jehová Diosan yanaptʼapampi cambiaskaraki ukhajja, wal kusistanjja. w20.05 pág. 30 párr. 14; págs. 30, 31 párrs. 16-18