Octubre

Jesusjamaw amuyañasa, jupjamarakiw kuns lurañasa. Kunjamtï Jesusajj amuyki uk sum yatiñäni ukat jupjam amuyañatak chʼamachasiñäni ukhajja, jupan suma amigopäñäniwa. Kunjamsa Jesusat yateqassna uk amuytʼañäni. Munañap lurañat sipansa mayninakar yanaptʼañaw jupatak nayrankäna (Mat. 20:28; Rom. 15:1-3). Ukham jaqëtapatjja, mayninakar yanaptʼañatakejj kuns lurakïnwa, pantjasitanakapsa perdonarakïnwa. Jaqenakajj jan walsa jupat parlapkchïnjja, janiw facilak coleraskänti (Juan 1:46, 47). Jaqenakarojj janiw nayra pantjasitanakap amtayirïkänti (1 Tim. 1:12-14). Jesusat yateqasis sarnaqañajj wali wakiskiriwa, ¿kunatsa? Jupajj akham sänwa: “Jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:35). Ukhamajj akham jisktʼasiñäni: ¿Jesusat yateqasisa jilat kullakanakamp sumankañatak chʼamachasiskti? sasa. w20.04 pág. 24 párr. 11

Diosat jan walinak parliri, sutipat kʼarinak parliri jaqenak taypinsa jakaskstanjja, kunatï cheqäki ukjjat saytʼassnawa, mä arunjja Jehová Diosajj santötapa, taqe kun cheqapar uñjirïtapa, suma Diosätapa, wali munasirïtapwa jaqenakar yatiysna. Jupamp gobernatäñ munataswa uñachtʼayaraksna. Gobiernopakiw taqet sipansa cheqapar apnaqe, uka gobiernokiw suman jakasiña, kusisit jakasiña aka oraqer apanini sasaw jaqenakar yatiyaraksna (Sal. 37:9, 37; 146:5, 6, 10). Jehová Diosakiw gobernañatak derechoni sasin Bibliat yatichktan ukhaw sutip qʼomacharaktanjja. Diosan leyinakap yatichañajj wakisirïkchisa, Jupar munasipjjañapataki, taqe chuyma servipjjañapatak yanaptʼañaw jukʼamp importantejja. Ukatwa yatichkasajj Jehová Diosajj kunja suma Diosasa, kunjam chuymanisa ukanak jukʼamp qhanañchañasa (Is. 63:7). Ukham lurañäni ukhajja, jaqenakajj Jehová Diosar munasipjjaniwa, taqe chuyma munasipjjatapatwa Jupar istʼapjjarakini. w20.06 pág. 6 párr. 16; pág. 7 párr. 19

Jaqen lejjwipajj wali musparkañ lurtʼatawa. Mamitasan purakapankkayätan ukhajja, lejjwisajj kunjamtï Jehová Diosajj lurtʼawayki ukarjamaw jukʼat jukʼat musparkañar tukjjäna. Sapa minutojj walja waranqa celulanakaw pʼeqesan uñstäna. Uka toqet yatjjatirinakan aruparjamajja, mä jilïr jaqen lejjwipan niya 100.000 millón celulanakaw utji, ukanakajj neuronas satäpjjewa. Uka celulanakajja, juntpachajj mä kilo chikataniwa (1,5 kilos). Lejjwisajj kunaymaninak lurañatakiw yanaptʼistu, ukanakat mayajja parlañ yatiñawa. Parlktan ukhajj kunas cuerposan pasi uk amuytʼañäni. Mä aru arsuñatakejja, lajjrana, mallqʼana, lakana, quijadana, pechon utjki uka mä pataka musculonakwa lejjwejj onjjtayi. Kuntï mä jaqejj arski ukajj qhan amuyasiñapatakejja, uka musculonakajj wakisitarjamaw onjjtapjjañapa. Yatjjatatanakajj akham sasaw 2019 maran sapjjäna: ‘Jichhak nasita wawanakajja parlir istʼasajj arunak amuyapjjewa’ sasa. Ukham yatjjatasitapajja, kuntï walja yatjjatirinakajj amuyapki ukajj cheqäskapunitapwa uñachtʼayi. Uka yatjjatirinakajj akham sapjjewa: ‘Jiskʼatpachaw istʼasaki mä idioma yateqsna, yaqha idiomätapsa amuyañ puedsna, ukham luratätanwa’ sasa. Cheqas parlañ pueditasajj Diosan regalopawa. w20.05 págs. 22, 23 párrs. 8, 9

Abrahanajja, kunanakatï Ur markan sum jakasiñatak utjkäna ukanak taq jaytäna. ¿Kunatsa ukham luräna? “Abrahanajja kawkïr markatejj cheqpach cimientonïki uka markwa suyäna” (Heb. 11:8-10, 16). Abrahanajj suykäna uka markajj Diosan Reinopawa, Jesucristompi 144.000 ajllitanakampiw uka Reinonkapjje. Apóstol Pablojja, uka Reinojj ‘jakkir Diosan markapawa, mä arunjja alajjpachankir Jerusalenawa’ sasaw säna (Heb. 12:22; Apoc. 5:8-10; 14:1). Jesusasti uka Reinon jutañapatakiw arkirinakapar mayisiñ yatichäna, ukhamat Diosan munañapajj alajjpachansa aka oraqensa lurasiñapataki (Mat. 6:10). Diosan Reinopajj kunjam organizatäñapänsa uk janiw Abrahanajj sum yatkänti. Walja tiempow ukajj ‘Diosan imantat amtapäna’ (Efes. 1:8-10; Col. 1:26, 27). Ukampis jupat jutiri yaqhep wawanakapajj reyinakäpjjañap yatïnwa, Jehová Diosaw ukhamäñapatak jupar mä promesa arsüna (Gén. 17:1, 2, 6). w20.08 págs. 2, 3 párrs. 2-4

Apostatanakan yatichäwinakap janiw istʼañasäkiti. Cristiano congregacionajj utj-jjäna ukhatpachaw Supayajj engañjiri jaqenakampi cristianonakar engañjaski, ukhamat cristianonakajj Diosar jan confiyjjapjjañapataki. Ukatwa kunas cheqa yatichäwejja, kunas kʼari yatichäwejja ukanak sum amuyañasa. Jehová Diosar jan confiyjjañataki, jilat kullakanakasar jan munasjjañatakejja enemigonakasajj Internetampi, redes sociales ukanakampiw engañjistaspa. Janiw uka kʼari yatichäwinakar creyiñasäkiti, ukanakajj Supayatwa juti (1 Juan 4:1, 6; Apoc. 12:9). Supayan yantʼanakapar atipjañ munstan ukhajja, Jesusar jukʼamp confiyañataki, Diosajj kunjamsa Jesús toqejj amtanakap phoqaski ukar jukʼamp confiyañatakiw chʼamachasiñasa. Ukatsti Jehová Diosajj markapar uñjapjjañapatak suma phoqeri amuyasir esclavor uttʼayki ukarus confiyañasarakiwa (Mat. 24:45-47). Bibliat yatjjatapuniñäni ukhajja, Diosar confiyatasajj manqhakam saphintata mä qoqar uñtatäniwa. Apóstol Pablojj niya uka pachpa arunakwa sarakïna, kunjamtï jichhürutak ajllita textojj siski ukhama. w20.07 págs. 23, 24 párrs. 11, 12

Pantjasirïtas laykojja, aleq uñkatasakiw jaqenakar juzgañ yattanjja (Juan 7:24). Ukampis mayniru aleq uñkatasakejja, janiw kunjam jaqesa uk taqpach yatksnati. Uk amuytʼañäni, wali experienciani wali yatiñani mä doctorajja, janiw aleq uñkatasak mä jaqejj kunat usutasa uk sum yatkaspati. Jan ukasti uka jaqejj kunat usutänsa, jichhajj kunjamäskisa, kunas usuraki ukanak jisktʼasajj sumwa istʼañapa. Inas cuerpo manqhapajj kunjamäskisa uk yatiñatakejj mä radiografía mayirakchini. Mä doctoratï ukanak jan lurkaspa ukhajja, maynejj kunat usutasa uk janiw sum yatkaspati, pantjasispawa. Ukhamarakiw jilat kullakanakasar aleq uñkatasakejj kunjam chuymanïpjjesa uk jan sum yatksnati. Kunjam jaqëpjjesa uk yatiñatakejj chʼamachasiñasawa. Maynejj kunjamäskisa uk janipuniw Jehová Diosjam sum yatksnati. Ukampis Jupat yateqasiñatakiw chʼamachassna. Jehová Diosajj servirinakapar istʼiwa, nayrajj kunjam jakäwinïpjjänsa jichhajj kunjamäsipkisa uksa amuyiwa, khuyaptʼayarakiwa. w20.04 págs. 14, 15 párrs. 1-3

Humildëñatakiw chʼamachasiñasa, ¿kunatsa? Jachʼa jachʼa tukurinakajj janiw “suma amuytʼasir” jaqenakäpkiti. Antisas mayninakamp chʼajjwiri, wali wal tukurinakäpjjewa. Amuyunakapasa luratanakapasa, jupanak pachparusa mayninakarusa jan walinwa uñjasiyi. Jan cambiapkaspa ukhajja, Supayajj amuyunakap chʼamaktʼayasaw jan walir puriyaspa (2 Cor. 4:4; 11:3). Ukampis humildenakajj amuytʼasir jaqenakäpjjewa. Jupanak pachpatsa kunatï amuyañäki ukakwa amuyapjjaraki, ukatsti mayninakarojj jupanakat sipans jilankapkaspas ukhamwa uñjapjjaraki (Filip. 2:3). Biblian akham siwa: “Jachʼa jachʼa tukuñarojj Diosajj uñisiwa, humilde chuymaninakatjja jupajj wal khuyapayasi” sasa (1 Ped. 5:5). Amuytʼasirïpki ukanakajja, janiw Jehová Diosampi uñisitäñ munapkiti. Humildëñ munstan ukhajja, Biblian aka ewjjtʼaparjamaw sarnaqañasa: “Nayrajj kunjam jaqëpjjayätas ukanakjja isïkaspas ukham apsusipjjam, jan wali luräwinakamppacha. Antisas Diosajj churkistu uka machaq jaqëñamp isthapisipjjam”. Jesusajj kunjam jaqënsa ukwa yatjjatañasa, ukatsti jupat yateqasiñatakiw chʼamachasiñasa (Col. 3:9, 10; 1 Ped. 2:21). w20.07 pág. 7 párrs. 16, 17

Diosan congregacionapankasajj wali kusisitätanwa. Ukanjja, sumankañ utjayir jaqenakampi ukhamarak kusisita jaqenakampiw utji, ukatwa mä paraisonjam jakastanjja. Ukampis ¿kunjamsa congregacionar jumajj yanaptʼaskta? Congregacionajj jaqen cuerpopar uñtasitawa, congregacionankapki ukanakajj cuerpon partenakapar uñtasitarakiwa sasaw apóstol Pablojj säna (Rom. 12:4-8; 1 Cor. 12:12-27; Efes. 4:16). ¿Kunsa Pablon uñachtʼäwipat yateqsna? Nayrïr yatichäwi, sapa mayniw congregacionan wakiskir lurañanakanïtanjja. Akham sasaw Pablojj uñachtʼäwip qellqañ qalltäna: “Mä cuerpojj walja partenakaniwa, ukhamarus uka partenakajj janiw mä pachpa lurañanïpkiti. Jiwasampejj ukhamarakiwa, waljanïkstansa Cristompi mayakïtas laykojj mä cuerpokïtanwa. Niyakejjay sapa maynis cuerpon partenakapar uñtatästanjja, jiwaskamajj mayachtʼatätanwa” sasa (Rom. 12:4, 5). Congregación taypin sapa maynis yaqh yaqha lurañanïkstanjja, taqeniw valoranïtanjja sañwa Pablojj munaskäna. w20.08 pág. 20 párrs. 1, 2, 4

¿Kunjamsa familia pʼeqtʼirinakajj Jehová Diosat humilde chuymanïñ yateqasipjjaspa? Mä kuns lurapjjani ukhajja, wawanakaparojj kunjamsa lurapjjaspa uk jisktʼapjjaspawa, kuntï sapkani ukajj walikïskchi ukhajja, ukarjamaw lurapjjarakispa. Jehová Diosajj wali paciencianirakiwa. Amuytʼañataki, servirinakapajj jan jupjam amuyapkäna uk sapkäna ukhajja, pacienciampiw jupanakar istʼäna. Amtañäni, Jehová Diosajj Sodomampi Gomorrampejj tʼunjatäniw siskäna ukhajja, Abrahanajj walja kutiw jisktʼäna, ukampis Diosajj wali pacienciampiw jupar istʼäna (Gén. 18:22-33). Ukatjja Sarajj mä wawanïniwa sasin Diosajj Abrahanar siskäna ukhajja, jilïrëjjatap laykojj Sarajj larusïnwa. ¿Diosajj uk uñjasajj colerasïnti? Janiwa. Ukat sipansa, Jehová Diosajj respetompiw jupar uñjäna (Gén. 18:10-14). Awk taykanaka, jilïr irpirinaka, ¿kunsa Jehová Diosat yateqasipjjasma? Maynejj familiamana jan ukajj congregacionan jumjam jan amuyki ukhajj ¿jankʼakit cheqañchirïta? Jan ukajj ¿pacienciampich amuyunakap istʼirïta? Cheqansa, autoridadanïpki uka jilatanakajj Diosat yateqasiñatak chʼamachasipki ukhajja, familiatakisa congregacionatakisa mä bendicionäpjjewa. w20.08 pág. 10 párrs. 7-9

¿Kunsa Pablon sarnaqäwipajj yatichistu? Bibliat yateqañ qalltkayätan ukhajja, mayninakampi yanaptʼayasiñajj janiw jiwasatak chʼamäkpachänti. ¿Kunatsa? Yateqañajj wal utjatap amuyasaw yanaptʼayasiñ munayätanjja (1 Cor. 3:1, 2). ¿Ukampis jichhajj uka pachpti amuyaskaktanjja? Walja maranak Jehová Diosar sirvjjasasa, experiencianëjjasasa inas mayninakampi yanaptʼayasiñajj chʼamakëjjchi. Yamas jukʼa tiempok Diosar serviski uka jilatampi jan ukajj kullakampi yanaptʼayasiñajj jukʼamp chʼamäspawa. Ukampis jilat kullakanak toqew Jehová Diosajj jilpach chʼamañchtʼistu (Rom. 1:11, 12). Diosan chʼamap katoqañ munstan ukhajja, jilat kullakanakamp yanaptʼayasiñaw wakisi. Sumanak lurañatakejj janiw suma markatäñasa, jan usutäñasa, wali yatjjatatäñasa, wali qollqenïñas wakiskiti. Jan ukasti, humilde chuymanïña, Jehová Diosar confiyañaw wakisi. Ukhamasti, akanakwa lurañasa: 1) Jehová Diosaruw confiyañasa, 2) Diosan servirinakapat Biblian qellqatäki ukanakatwa yateqasiñasa, 3) jilat kullakanakampiw yanaptʼayasiñasa. Ukham lurañäni ukhajja, pisi chʼamanis amuyaskchiñänejj Jehová Diosaw chʼamanir tukuyistani. w20.07 pág. 14 párr. 2; pág. 19 párrs. 18, 19

Familiaranakasar predicktan ukhaw paciencianïñajj chʼamäspa. Eclesiastés 3:7 textonjja, ‘amuktʼañ horasa parlañ horasaw utji’ sasaw sistu, uka arunakaw familiar predicañatakejj yanaptʼistani. Suma sarnaqatasampis Diosar uñtʼapjjañapatak yanaptʼkstanjja, parlañjamäni ukhajj Jehová Diosat parlañasawa (1 Ped. 3:1, 2). Taqe chuymaw jaqenakarojj predicañasa yatichañasaraki, ukampis pacienciampiw taqenir uñjañasa, familiaranakasarus ukhamaraki. Diosan nayra servirinakapata ukhamarak jichha tiempon servirinakapatwa paciencianïñ yateqassna. Habacuc profetajj jan walinakan jankʼak tukusiñapsa munkchïnjja, “ischʼukiskakïwa, uñanaqaskakirakïwa” sasaw säna (Hab. 2:1). Apóstol Pablojja, asignacionap jankʼak tukuyañsa munkchïnjja, pacienciampiw “suma yatiyäwinak phoqatpach” predicaskakïna (Hech. 20:24). w20.09 págs. 11, 12 párrs. 12-14

Jesusajj wali chʼamaniwa, Jehová Diosakiw jupat sipan jukʼamp chʼamanejja. Ukhamäkchisa, janiw wali importantëkaspas ukham amuyaskiti. Jesusat yateqasis humildëtan ukhajja, wali munasirïtanwa, ukham munasirïsaw Diosan markapätas uñachtʼaytanjja (Luc. 9:48; Juan 13:35). Congregacionan jan walinakas utjkaspa, jilïr irpirinakajj janis ukanak askichañatak kuns lurapkaspa ukham amuystan ukhajja, ¿kunsa lurañasäspa? Quejasiñat sipansa, humildëñasawa, congregación pʼeqtʼirinakarus yanaptʼañasarakiwa (Heb. 13:17). ¿Kunas ukham lurañatak yanaptʼistaspa? Akham jisktʼasiñasawa: “¿Cheqapunit uka problemanakajj sinti jan walejja? Askichasiñapächi ukhajj ¿añchhitat askichasiñapa? ¿Nayat uka problema askichañaja? ¿Congregacionan mayachtʼatäñapatak yanaptʼaskti, jan ukajj wali importantëkiristsa ukhamcha tukusktjja?” sasa. Kunanaktï sum lurañ yatktan ukanakat sipansa, Jehová Diosatakejj humildëñasaw jukʼamp wakiskirejja, ratuki kuns sum lurañat sipansa mayachtʼatäñaw jukʼamp wakiskirirakejja. Ukhamasti Diosar servisajj humildëñatakiw chʼamachasiñasa. Ukhamatwa congregacionan mayachtʼatäñapatak yanaptʼañäni (Efes. 4:2, 3). w20.07 págs. 4, 5 párrs. 9-11

Diosar taqe chuyma serviri yaqhep warminakaw Jesusarojj “kunatï jupanakan utjkäna ukanakamp yanaptʼapjjäna”, Jesusajj wali valoranitwa uk uñjäna (Luc. 8:1-3). Cheqa yatichäwinakwa qhanañcharakïna. Sañäni, kunjamsa jaqenakajj jupar jiwayapjjañapäna, kunjamsa jaktaniñapäna ukwa jupanakar qhanañchäna (Luc. 24:5-8). Kunjamtï apostolonakar wakichtʼkänjja, ukhamarakiw uka warminakarojj jan walinakar saykatapjjañapatak wakichtʼäna (Mar. 9:30-32; 10:32-34). Jesusar jiwayañatak katuntapkän ukhajja, apostolonakajj escapjjapjjänwa. Ukampis Jesusar yanapapkäna uka warminakajj janiw escapapkänti, Jesusar lawan tʼaqesiskirsa uñjasipkänwa, ukajj wali musparkañawa (Mat. 26:56; Mar. 15:40, 41). Jesusan jaktatapatjja, Diosar serviri warminakaw nayraqat yatipjjäna. Jupanakaruw jaktatapat apostolonakar yatiyapjjañapatak mayïna (Mat. 28:5, 9, 10). Pentecostés 33 maran cristianonakajj espíritu santo katoqapkäna ukhajja, warminakajj katoqapjjarakpachänwa. Ukhamächi ukhajja, jupanakajj “Diosan musparkañ luräwinakapatwa” kunayman arut parlapjjpachäna (Hech. 1:14; 2:2-4, 11). w20.09 pág. 23 párrs. 11, 12

Jaqenakar Jesusan discipulopar tukuyasajja salvasipjjañapatakiw yanaptʼasktanjja. ¿Kunatsa ukham sistanjja? Mateo 28:19, 20 texton Jesusajj akham sänwa: ‘Sarapjjam, jaqenakar nayan discipulojar tukuyapjjam, bautisapjjarakim’ sasa. ¿Kunatsa bautisasiñajj wali wakiskirejja? Maynitï salvasiñ munchi ukhajja, bautisasiñapawa. Bautisasiñ munirinakajja, Jesusan jiwatapata jaktatapatwa salvasirista sasaw creyiñapa. Ukatwa apóstol Pedrojj cristianonakar akham säna: “Bautismo taypiw jichhajj Jesucriston jaktatapat salvatäsipktajja” sasa (1 Ped. 3:21). Ukhamajja, maynejj bautisasjje ukhatpachaw wiñay jakañ suyjjaspa. Jesusan discipulopar tukuyañatakejja, ‘suma yatichirïñaw’ wakisi (2 Tim. 4:1, 2). ¿Kunatsa? Jesusajj “sarapjjam, [...] jaqenakar nayan discipulojar tukuyapjjam, [...] yatichapjjarakim” sasaw säna. Apóstol Pablojj akham sasaw Timoteor sarakïna: “Ukanak phoqañatakejj chʼamachasiskakim, ukhamatwa juma pachpas salvasïta, ukhamaraki khitinakatï jumar istʼapktam ukanakas salvasipjjani” sasa. w20.10 pág. 14 párrs. 1, 2

Apóstol Pedrorojj predicañ wal gustäna. Suma predikirïñatakejj Jehová Diosaw jupar yanaptʼarakïna (Hech. 2:14, 41). Jiwasarusti, ¿kunas predicañ munañatakejj jukʼamp yanaptʼistu? Jehová Diosar munasiñaw yanaptʼistu. Predicañ ajjsarayasstan ukhajja, uka munasiñaw predicañatak yanaptʼistaspa. Jesusajj jaqenak katuñapatak Pedror invittʼkäna ukhajja, “jan ajjsaramti” sasaw jupar säna (Luc. 5:8-11). Pedrojj janiw Jesusan discipulopäñ ajjsarkänti, jan ukasti Jesusan milagrop uñjasaw ajjsarayasïna. Jesusajj mä milagro toqew walja chawllanak jupanakar katuyäna, ukatwa janis Jesusamp chika trabajiñatakejj wakichtʼatäkaspa ukham amuyasïna. ¿Jumajj ukhamarakit amuyasta? ¿Jesusan discipulopäsajj kunanaksa lurañama ukanakat lupʼisajj ukhamarakit ajjsarayasta? Ukhamächi ukhajj Jehová Diosaru, Jesusaru, jaqe masimar jukʼamp munasiñatak chʼamachasim, ukaw predicañ munañamatak yanaptʼätam (Mat. 22:37, 39; Juan 14:15). w20.09 pág. 3 párrs. 4, 5

‘Khitinakatï wiñay jakañatak suma chuymanïpki’ ukanakar yanaptʼañatakejja, wal chʼamachastanjja, taqe chuymaw tiempsa apstʼastanjja, qollqessa gastastanjja (Hech. 13:48). Ukham lurasajja, Jesusat yateqasitaswa uñachtʼaytanjja. Jupajj akham sänwa: “Nayan manqʼajajja, khitankitu ukan munañap lurañawa, kuna lurañtï jupajj churkitu uk tukuyañajarakiwa” sasa (Juan 4:34; 17:4). Jiwasajj ukhamarakiw kuna lurañtï Jesusajj jaytawaykistu uk tukuyañ muntanjja (Juan 20:21). Taqe jilat kullakanakasa ukhamarak inactivo publicadoranakasa, jiwasamp chika tukuykam aguantapjjaspa ukwa muntanjja (Mat. 24:13). Kun lurañastï Jesusajj maykistu uk phoqañajj janiw faciläkiti. Ukampisa janiw sapakejj uk phoqkañäniti. Jesusajja, ‘sapürupuniw jumanakampïskäjja’ sasaw arsuwayi. Jiwasajja ‘Diosamp chika trabajirïpjjtanwa’, ‘Criston discipulopäpjjaraktanwa’, ukhamasti Jehová Diosampi Jesucristompiw yanaptʼasipkistu (1 Cor. 3:9; 2 Cor. 2:17). Uka yanaptʼampiw kun lurañastï Cristojj maykistu uk phoqsna. ¡Uk phoqañasa, yaqhanakaru uk phoqapjjañapataki yanaptʼañasa wali kusiskañawa! (Filip. 4:13). w20.11 pág. 7 párrs. 19, 20

Kunanaktï awk taykanakajj amtapki ukajja, walja tiempow wawanakapar yanaptʼaspa jan ukajj jan waltʼayaspa. Jan wali amtanakar puripjjaspa ukhajja, walja jan walinakanwa wawanakapar uñjasiyapjjaspa. Ukampis suma amtanakar puripjjaspa ukhajja, kusisit jakasipjjañapatakiw yanaptʼapjjaspa. Wawanakas ukhamarakiw suma amtanakar puripjjañapa. Cheqas taqeniw alajjpachankir Jehová Dios Awkisar serviñ amtañasa, ukaw taqe amtanakat sipansa wali importantejja (Sal. 73:28). Jesusan awk taykapajja, wawanakapar Diosar servipjjañapatakiw yanaptʼañ munapjjäna. Diosar serviñajj jupanakatakejj kunja wakiskirisa ukajja, kunanaktï amtapkäna ukanwa qhan amuyasïna (Luc. 2:40, 41, 52). Jesusasti suma amtanakaruw purirakïna, ukaw Diosan amtap phoqañatak yanaptʼäna (Mat. 4:1-10). Jesusajj suma jaqënwa, jan ajjsariri, Diosar jan jitheqtas serviri ukhamänwa. Diosar serviri awk taykanakajj ukham wawanïsajj wal kusisipjjaspa. w20.10 pág. 26 párrs. 1, 2

Kimsa jilat kullakanakat parltʼañäni. Edadani mä kullakajja, kuntï tawaqökasin lurkäna ukwa amti. Jichhajj Diosar serviñajj jupatak jukʼamp chʼamäjjchisa, chʼamachasiskakiwa (1 Cor. 15:58). Kunjamsa familiapamp chika Paraison jakasini ukjjatwa sapür amuytʼaraki. Yaqha kullakasti, kunjamsa mä kullakajj jupar chuym ustʼayäna ukwa amti, ukampis ukanak armjjañatakiw chʼamachasi (Col. 3:13). Mä jilatasti, nayra juchanakapat sapa kutiw amtasi, ukampis Jehová Diosar taqe chuyma serviñatakiw jichhajj chʼamachasi (Sal. 51:10). ¿Kunsa uka kimsa jilat kullakanakajj lurapjje? Kimspachaniw kuntï nayra maranakan lurapkäna ukanak amtapjje, ukampis ukanak jan piensjjañatakiw chʼamachasipjje. ‘Nayraqatarupuni uñtañatakiw’ chʼamachasipjjaraki. ¿Kunatsa ukajj wali importantejja? Sañäni, mä jaqetï sapa kuti qhepäjjaru uñtaskaspa ukhajja, janiw nayraqatar cheq sarañ puedkaspati. Diosar serviñan ukhamarakiwa. Kunatï nayra maranakan pasawaykistu ukanakat sapa kuti amtañäni ukhajja, janiw Jehová Diosarojj taqe chuym serviñ puedjjañäniti (Luc. 9:62). w20.11 pág. 24 párrs. 1-3

Wali chʼamani Goliat soldadojj Davidar janis chʼamanïkaspa ukhamwa uñjäna. Goliat soldadojj Davidat sipans wali jachʼänwa, nuwasiñatak wali suma armaduranïnwa, guerra toqets wali experiencianïnwa. Davidajj waynitütap laykojj nuwasiñatak jan experienciani, jan chʼamani ukhamänwa, ukampis Jehová Diosaruw confiyäna. Ukham luratapat Diosaw Davidarojj Goliatar atipjañapatak chʼam churäna (1 Sam. 17:41-45, 50). Davidajj yaqha problemanwa uñjasirakïna, ukaw janis jarkʼaqasiñ puedkaspa, pisi chʼamanïkaspas ukham amuyayäna. Jupajj Saulan jan jitheqtiri serviripänwa. Jehová Diosaw Saularojj Israelan reyïñapatak ajllïna. Qalltanjja Saulajj Davidar respetänwa, ukampis qhepat jachʼa jachʼa tukutapatwa Davidat envidiasjjäna, uñisjjarakïna, jiwayañ kun munarakïna (1 Sam. 18:6-9, 29; 19:9-11). Saúl reyejj ina chʼusatsa Davidar tʼaqesiykchïnjja, Jehová Diosan ajllit reyïtap laykojj Davidajj respetaskakïnwa (1 Sam. 24:6). Diosaw aguantañatak chʼam churitani sasaw confiyäna (Sal. 18:1, pʼeqeñchäwipampi). w20.07 pág. 17 párrs. 11-13

Norte toqenkir reyimpita sur toqenkir reyimpit parlki uka profeciat niya taqpachaw phoqasiwayjje. Ukhamasti faltki ukajj phoqasirakiniwa, janiw ukat pächasktanti. Daniel capítulo 11 ukan qellqata profecía sum amuyañatakejja, kawkïr gobiernonakatï Diosan markapar jan waltʼayapkäna uka gobiernonakat parlaskatapwa amtañasa. Diosan markapajj oraqpachan utjki uka jaqenakat sipansa jukʼanikïpjjewa, ¿ukhamajj kunatsa uka gobiernonakajj Diosan markapar jan waltʼayañ munapjje? Supayampi jupan apnaqata akapachampejja, Jehová Diosana Jesusana servirinakapar chhaqtayañwa munapjje (Gén. 3:15; Apoc. 11:7; 12:17). Daniel libron qellqata profeciajja, Diosan Arupankir mayni profecianakampejj igualäñapawa. Cheqas Daniel libronkir profecía sum amuyañatakejja, Bibliankir yaqha profecianakampiw igualtʼayañasa. w20.05 pág. 2 párrs. 1, 2

Jichha tiemponjja, jiwatanakampejj kunas pasi uka toqet kunaymanwa jaqenakajj amuyapjje. Ukampis ¿kunsa Bibliajj yatichistu? Maynejj jiwjje ukhajja, cuerpopajj ñusantjjewa. Ukampis alajjpachampi oraqempi ina chʼusat lurir Diosaw jiwatanakarojj jaktayaspa, kunjam cuerponïñapatï wakiski ukhamwa Jupajj jaktayaspa (Gén. 1:1; 2:7). Apóstol Pablojja, Diosajj maynir jiwatat jaktaykani ukhajja janiw pachpa cuerpopampejj jaktaykaniti sasaw qhanañchäna. Uk amuytʼayañatakejj Pablojj mä jiskʼa ‘jathatwa’ parläna. Oraqer uchtan ukhajja, uka jathat mä machaq aliw mistunjje. Uka alejj janiw mä jiskʼa jathakëjjeti. Pablojja uka uñachtʼäwimpiw kunjamsa Diosajj ‘munañaparjam’ mä cuerpo luraspa uk amuytʼayäna. Ukhamarakiw “alajjpachankiri cuerponakasa aka oraqenkir cuerponakasa” utji sasaw Pablojj sarakïna. ¿Ukampejj kamsañsa munäna? Aka oraqen jakirinakajja, jañchi cuerponïtanwa, alajjpachansti espíritu cuerponïpjjarakiwa. Sañäni angelanakajj espíritu cuerponïpjjewa (1 Cor. 15:36-41). w20.12 pág. 10 párrs. 7-9

Taqeniw kusisita sum jakasiñ muntanjja. Ukhamäkchisa taqeniw awisajj jan walinakan uñjastanjja. Ukhaman uñjasisajja, kunjamtï David reyejj jichhürutak ajllita texton Jehová Diosar jisktʼäna ukhamarakiw jiwasajj jisktʼassna. Waljanakaw llakisiyistaspa, ukanakat yaqhepjja janiw chhaqtayksnati. Sañäni, sapa marajj qhawqhas isisa manqʼañasa ukat yaqha ukhamanakas jiljjattani uk janiw controlksnati. Escuelankiri jan ukajj trabajonkir compañeronakasajj qʼañu jucha lurañasataki, jan honradöñasatakiw chʼamañchapjjestaspa, jiwasajj janirakiw uk controlksnati. Markasan lunthatasiñ chhaqtayañsa janirakiw puedksnati. ¿Kunatsa? Akapachanjja, jilaparte jaqenakajj janiw Biblian wiñay yatichäwinakaparjam sarnaqapkiti. Yaqhep jaqenakajja, ‘akapachan jakañat llakisisaw’ Jehová Diosar jan sirvjjapjjeti, aka mundon diosapajj uk sumwa yati (Mat. 13:22; 1 Juan 5:19). Cheqas ukhamïpanwa akapachajj kunayman jan walinakamp phoqantata, ukaw jaqenakar wal llakisiyi. w21.01 pág. 2 párrs. 1, 3

Apóstol Juanajja, janiw jilat kullakanakasar uñisiñasäkiti sasaw ewjjtʼawayistu. Ukar jan istʼkañäni ukhajja, Supayajj munañaparjamaw jan walinak lurayistaspa (1 Juan 2:11). Ukaw Diosan yaqhep servirinakaparojj khä nayra patak maranak tukuyarojj pasäna. Supayajja, jupanakkam uñisisipjjañapataki, tʼaqjtayañatakiw wal chʼamachasïna. Apóstol Juanajj cartanakap qellqkäna uka tiempotakejja, Supayjam chuymani jaqenakaw congregacionan utj-jjäna. Ukanakat maynejj Diótrefes chachänwa, jupajj mä congregacionaruw tʼaqjtayaskäna. Jerusalenankir jilïr irpirinakajj congregacionanak tumptʼirinakar khitkäna ukanakarus janiw respetomp uñjkänti. Diotrefesajj wali jachʼa jachʼa tukur jaqënwa. Khitinakarutï uñiskäna ukanakar katoqtʼañ munir jilat kullakanakarojj congregacionat jaqsuñ kunwa munirïna (3 Juan 9, 10). Jichhürunakanjja, Supayajj kunaymanitwa Diosan markapar tʼaqjtayañatak chʼamachasiskaki. Janipuniw jilat kullakanakasar uñisiñasäkiti, yanaptʼañasapuniwa. w21.01 pág. 11 párr. 14

Panpacha reyinakaw 1914 marat aksarojj jukʼamp chʼajjwapjjäna, Diosan markaparus jukʼampwa jan waltʼayapjjäna. Sañäni, Primera Guerra Mundial ukanjja, Diosan servirinakapajj janiw guerrar sarañ munapkänti, ukatwa Alemaniasa Gran Bretañasa jupanakar jan waltʼayañatak arknaqapjjäna. Estados Unidos markansti Diosan markapar pʼeqtʼapkäna ukanakaruw carcelar llawintapjjarakïna. Ukajj Apocalipsis 11:7-10 texton qellqata profeciarjamaw phoqasïna. Norte toqenkir reyejja 1933 maratwa Diosan markaparojj jan waltʼayäna, yamas Segunda Guerra Mundial tiemponjja jukʼampiw Diosan markapar jan sinttʼasis tʼaqesiyäna. Hitler chachampi jupar yanapirinakampejj predicacionwa jarkʼapjjäna. Mä 1.500 Diosan servirinakaparuw jiwarayapjjäna. Walja waranqaniruw campos de concentración ukanakar apayapjjarakïna. Nortenkir reyejj ‘templorojj ñanqhachaniwa’, ‘sapa uru sacrificio loqtasiñäki uksti suytʼayarakiniwa’ sasaw Danielajj säna, ukham sasinjja, predicación jarkʼapjjaniwa sañwa munaskäna (Dan. 11:30b, 31a). Nazi partido pʼeqtʼiri Hitler chachajja, ‘Alemaniat Diosan markap chhaqtayawa’ sasaw juramentomp arsüna. w20.05 pág. 6 párrs. 12, 13

Jiwasatï taqe chuyma munasirïñäni ukhajja, janiw jilat kullakanakasar atipañ layku kuns lurkañäniti. Jonatanajj janiw Davidat envidiaskänti, janirakiw jupa lanti reyïñsa munkänti (1 Sam. 20:42). Jiwasajj jupatwa yateqasiñasa, janiw jilat kullakanakasarojj kuns sum lurañ yatipjjatapat envidiasiñasäkiti. Antisas kuntï Pablojj siskäna ukwa lurañasa, jupajj akham sänwa: “Mayninakarojj humilde chuymamp uñjapjjam, jumanakat sipansa jilïrïpkaspas ukhama” sasa (Filip. 2:3). Cheqas congregacionanjja, taqeniw mä kunans yanaptʼtanjja. Jiwasatï humildëñäni ukhajja, jilat kullakanakasan suma luratanakap uñjañäniwa, jupanakats yateqasirakiñäniwa (1 Cor. 12:21-25). Jiwasatï maynit maynikam taqe chuyma munasiñäni ukhajja, Jehová Diosar mayachtʼata, taqenis kusisit servipjjañapatakiw yanaptʼañäni. Jesusan cheqpach discipulopätaswa uñachtʼayarakiñäni. Uk uñjasajja, suma chuymani walja jaqenakajj Jehová Diosar serviñwa munapjjani, ukat jukʼampisa ‘wali munasiñampi khuyaptʼayasiri taqe kunan chuymachtʼasiri Jehová Diosaruw’ jachʼañchañäni (2 Cor. 1:3). w21.01 pág. 24 párr. 14; pág. 25 párr. 16

Jichhürunakanjja jaqenakajj Testigonakar uñisipjjestuwa, jiskʼachapjjarakistuwa, janis kuns yatksna, janis chʼamanïksna ukhamwa amuyapjjaraki. ¿Kunatsa? Janiw jupanakjam piensktanti ni sarnaqktansa. Akapachankir jaqenakajja, jachʼa jachʼa tukurinakaru, pʼeqe waytat sarnaqerinakaru, jan istʼasirinakaruw jachʼañchapjje. Ukampis Testigonakajj humildëñataki, llampʼu chuymanïñataki, istʼasirïñatakiw wal chʼamachastanjja. Janirakiw kawkïr markansa politicarusa ni ejercitorus mitisktanti. Testigonakajj janiw akapachankir jaqenakjamäktanti, ukatwa janis kunäksna ukham uñjapjjestu (Rom. 12:2). Akapachankir jaqenakajj jan walsa jiwasat amuyapkchejja, Jehová Diosajj sumanak lurañatakiw yanaptʼaskistu. Sañäni, oraqpachan predicañatakiw yanaptʼaskistu. Servirinakapajj kunayman arunakar revistanak traducisajj oraqpachanwa jaqenakar churtanjja, Bibliampiw walja millón jaqenakar sum jakasipjjañapatak yanaptʼaraktanjja. Ukanakajja Diosan yanaptʼapampiw lurasi. w20.07 pág. 15 párrs. 5, 6

Jesusajj Jehová Diosar istʼasapuniw sarnaqe. Ukham lurasajja, janis yatiñanïkaspa, janis kuns lurañ yatkaspa uk janiw sañ munkiti. Cheqas wali yatiñan jaqekiw qhana ukat fácil amuykaya yatichaspa, Jesusajj ukham yatichirïnwa (Juan 7:45, 46). Jehová Diosajja, Jesusajj qhawqha yatiñanïnsa uk yatïnwa, ukatwa alajjpachsa aka oraqsa lurkäna ukhajj jupamp yanaptʼayasïna (Prov. 8:30, TNM; Heb. 1:2-4). Jesusajj jiwatat jaktayatäjjäna ukhatpachaw Jehová Diosajj ‘alajjpachansa ukhamarak aka oraqensa munañanïñ churäna’ (Mat. 28:18). Jesusajj taqe kunsa lurañ yatkchejja, Awkipar munasitap laykojj Jupamp yanaptʼayasipuniwa. Esposonakajj Jesusatwa yateqasipjjaspa. Jehová Diosajja, janiw chacharojj esposapat jukʼamp importantëkaspas ukham amuyasin esposapar pʼeqtʼañapatak uttʼaykiti. ¿Kunjamatsa uk yattanjja? Jesusamp chika apnaqapjjañapatakejja, janiw chachanakaruk ajllkiti, warminakarus ajllirakiwa (Gál. 3:26-29). Jehová Diosajj Jesusar autoridad churasajj jupar confiyatapwa uñachtʼayi. Yatiñani mä chachasti, ukhamarakiw esposapar mä jukʼa autoridad churi. w21.02 pág. 11 párrs. 13, 14

Diosan Arupajj mä espejompi sasiwa, kunansa cambiañasa, kunjamsa uk lurañasa uk amuytʼasiñatakiw yanaptʼistu (Sant. 1:23-25). Sañäni, Bibliat yatjjatasajja, inas jankʼak colerasirïtas amuyassna. Jaqenakasa problemanakas colerayistani ukhajja, Jehová Diosan yanaptʼapampejj llampʼu chuymampi uñjañwa yateqañäni. Sumwa amuytʼasiñäni, suma amtanakaruw purirakiñäni (Sant. 3:13). Ukhamajja Bibliat yatjjatañajj wali wakiskiripuniwa. Awisajja, jan walinakar purtʼasisakiw kunatï jan lurañasäki uk yateqtanjja, ukampis ukham yateqañat sipansa, mayninakan suma luräwinakapata, jan suma luräwinakapat yateqañaw jukʼamp wakiskiri. Ukatwa Santiagojj Biblian qellqatäki uka Abrahán, Rahab, Job ukat Elías jupanakat yatjjatañatak chʼamañchistu (Sant. 2:21-26; 5:10, 11, 17, 18). Diosan uka servirinakapajja, jan waltʼäwinak kusisitaw aguantapjjäna. ¿Kunsa jupanakat yateqsna? Jiwasajj jupanakjamarakiw Jehová Diosan yanaptʼapampejj jan walinak aguantsna. w21.02 págs. 29, 30 párrs. 12, 13

Yatichiriw yateqeriparojj Bibliat amuytʼañapatak yanaptʼañapa. Ukampis jupatï compañtʼañasatak invittʼchistojja, yanaptʼañasatakiw invittʼistu uk amtañasapuniwa (Ecl. 4:9, 10). Ukhamajj ¿kunjamsa yanaptʼsna? Sumwa wakichtʼasiñasa. Nayraqatajja, yatichiriruw yateqeripat mä jukʼa jiwasar cuenttʼañapatak mayiñasa. Inas yateqeripajj kunjamasa, kawkïr yatichäwitsa yatjjatapjjani, kunjam yanaptʼañsa jichhürojj amti uk jisktʼsna. Ukatjja, kun lurañasas wakisispa, kun lurañas jan wakiskaspa, kunas yateqeripan nayrar sartañapatakejj chʼamañchtʼaspa ukanakatwa jisktʼaraksna. Cheqas yatichirejj janiw yateqeripat taqe kun awisañapajj wakiskiti. Ukampis kuntï siskistani uk sumwa istʼañasa. Joy sat mä misionera kullakajj akham siwa: “Compañirijar ukanak parltʼañajja, yateqerijar sum yanaptʼañapataki, yatichaskta ukhas sum arstʼañapatakiw yanaptʼi” sasa. w21.03 pág. 9 párrs. 5, 6

Akapachajj Diosan leyinakaparjam sarnaqatasatwa uñisistu, Diosan leyinakapajj kunjamatï akapachankir jaqenakajj sarnaqapki uka contrawa. Sañäni, jaqenakajj qʼañu juchanak lurañajj walikïkaspas ukhamwa uñjapjje, uka pachpa juchanakatwa Diosajj Sodoma, Gomorra markanakarojj tʼunjäna (Jud. 7). Qʼañu juchanakan sarnaqañat sipansa, Biblian yatichäwiparjamaw sarnaqtanjja, ukatwa jaqenakajj jiskʼachapjjestu, suma sum tukurïpjjtawa sasin sapjjarakistu (1 Ped. 4:3, 4). Jaqenakajj uñisipjjestani toqepjjestani ukhajj ¿kunjam jaqëñas aguantañatak yanaptʼistani? Diosaw yanaptʼitani sasin confiyañaw yanaptʼistani. Diosar confiyañajj mä escudomp sasiwa, ukaw ‘Supayan aqkir flechanakap jiwarayañatak’ yanaptʼistu (Efes. 6:16). Janiw ukakïkiti, munasirïñaw yanaptʼarakistu. ¿Kunatsa? Munasir jaqejj ‘janiw jankʼak coleraskiti’, amukiw taqe kunsa tʼaqesi, aguantaraki (1 Cor. 13:4-7, 13). Cheqas Jehová Diosaru, jilat kullakanakaru, enemigonakasar munasiñaw uñisipkistu uk aguantañatak yanaptʼistani. w21.03 pág. 21 párrs. 3, 4

¿Kunanak lurasas jilat kullakanakar munasitas uñachtʼaysna? Kuna jan waltï sapkistani ukhajj janiw jankʼak chuym ustʼayasiñasäkiti. Jesusajj janïr jiwkäna uka nayrajj kunas pasäna uk amtañäni. Jupajja, ‘khititejj jañchij manqʼkani, wilajsa umkani ukaw wiñay jakañ katoqani’ sasaw discipulonakapar säna (Juan 6:53-57). Uk istʼasajj waljaniw chuym ustʼayasisajj jaytanukjjapjjäna. Ukampis cheqpach amigonakapajj janiw jaytanukupkänti. Kunsa ukamp sañ munaskäna uk janiw amuyapkänti, inas sustjasipjjarakchïna, ukampis janiw chuym ustʼayasipkänti, ni pantjaspachawa sasas amuyapkänti. Antisas cheq parlirïtap yatisajj taqe chuymaw confiyapjjäna (Juan 6:60, 66-69). Jiwasajja, kunanaktï jilat kullakanakajj sapkistu ukanakat jankʼak chuym ustʼayasiñat sipansa, kunsa sañ munistu uk pacienciampiw istʼañasa (Prov. 18:13). w21.01 pág. 11 párr. 13